Naakamana kusololela bantu ba Jehova kwamyaka minji, Joshua wakafwa kajisi myaka yakuzyalwa iili 110. Ciindi naakali kupona, bana Israyeli bakali kukomba Jehova. Pele Joshua naakafwa, bakatalika kukomba baleza bakubeja mbubwenya mbobakali kucita bana Kanana. Akaambo kakuti bana Israyeli tiibakazumanana kumumvwida, Jehova wakazumizya mwami wa Kanana Jabini kubapenzya kapati. Bantu bakakombelezya Jehova kuti abagwasye. Aboobo Jehova wakabapa mweendelezi mupya Baraki. Wakali kuyoobagwasya bantu kuti bapiluke kuli Jehova.

Musinsimi mukaintu Debora wakaita Baraki. Wakali kuyanda kumwaambila mulumbe iwakazwa kuli Jehova wakuti: ‘Ubweze baalumi bali 10,000 uunke ukaswaangane abasikalumamba ba Jabini kukalonga ka Kisoni. Ookuya uyoomuzunda Sisera silutwe wabasikalumamba ba Jabini.’ Baraki wakaambila Debora kuti: ‘Inga ndaunka buyo kuti twaunka limwi.’ Debora wakamwaambila kuti: ‘Tulaunka limwi. Pele kozyiba kuti tolinduwe uuyoomujaya Sisera. Jehova waamba kuti mukaintu nguuyoomujaya.’

Debora wakaunka a Baraki ku Cilundu ca Tabori kulibambila nkondo. Mbwaakaamvwida buyo makani aaya, Sisera wakabunganya nkalaki zyakwe zyankondo abasikalumamba mukkuti. Debora wakati kuli Baraki: ‘Sunu Jehova ulapa kuti uzunde.’ Baraki abaalumi bakwe ibali 10,000 bakaselemuka kuzwa a Cilundu kutegwa baswaangane ampi ya Sisera yanguzu.

Mpoonya Jehova wakapa kuti kalonga ka Kisoni kazule kapati. Nkalaki zyankondo izya Sisera zyakanjomba mumankanda. Sisera wakaisiya nkalaki akutija. Baraki abasikalumamba bakwe bakazunda basikalumamba ba Sisera, pele walo Sisera wakatija akuyooyuba mutente lyamukaintu wazina lya Jaeli. Mukaintu ooyu wakamupa mukupa kuti anywe mpoonya wakamuvwumba payi. Sikalumamba ooyu iwakakatede, wakoona. Kumane Jaeli cakusobelela wakaunka aalinguwe akumukankamina nkanka yatente kumutwe. Mpoonya wakafwa.

Baraki wakaboola kayandaula Sisera. Jaeli wakazwa mutente lyakwe akumwaambila kuti: ‘Konjila. Ndilakutondezya mwaalumi ngoyandaula.’ Baraki wakanjila akumujana Sisera kafwide. Baraki a Debora bakamutembaula Jehova akaambo kakupa kuti bana Israyeli bazunde basinkondonyina. Myaka iili 40 iyakatobela, kwakaba luumuno mu Israyeli.

Ciindi nokwakali nzala mucisi ca Israyeli, muna Israyeli wazina lya Naomi wakaunka kucisi ca Moabu antoomwe amulumaakwe alimwi abana babo bobilo. Mukuya kwaciindi, mulumi wa Naomi wakafwa. Bana bakwe bakakwata bamakaintu bana Moabu, umwi wakakwata Rute mpoonya umwi wakakwata Olipa. Mukubula coolwe, bana ba Naomi basankwa abalo bakafwa.

Ciindi Naomi naakamvwa kuti nzala yakamana mucisi ca Israyeli, wakapiluka kwabo. Rute a Olipa bakamutobela, pele kabacili munzila, Naomi wakabaambila kuti: ‘Mwakali bamakaintu bali kabotu kubana bangu alimwi muli kabotu akulindime. Ndiyanda kuti nyoonse mukakwatwe alimwi. Amupiluke kwanu ku Moabu.’ Bamakaintu aaba bakaamba kuti: ‘Tulamuyanda kapati! Tatuyandi kumusiya pe.’ Pele Naomi wakazumanana kubaambila kuti bapiluke. Mpoonya Olipa wakapiluka, pele Rute wakakaka. Naomi wakamwaambila kuti: ‘Bona, Olipa wapiluka kubantu bakwe akuli baleza bakwe. Kopiluka anguwe, uunke kuŋanda yabanyoko.’ Pele Rute wakati: ‘Nsikookusiya pe. Bantu bako bayooba bantu bangu, alimwi Leza wako uyooba Leza wangu.’ Ino uyeeya kuti Naomi wakalimvwa buti ciindi Rute naakaamba boobo?

Rute a Naomi bakasika kucisi ca Israyeli kumatalikilo aakutebula bbaale. Bumwi buzuba, Rute wakaunka kuyoobwezelela bbaale mumuunda wamwaalumi wazina lya Boazi, walo iwakali mwana wa Rahabu. Mwaalumi ooyu wakamvwa kuti Rute wakali muna Moabu walo iwakazumanana kukkala a Naomi. Wakaambila babelesi bakwe kuti kabasiya bbaale musyule kutegwa Rute kaubwezelela.

Buzuba oobo kumangolezya, Naomi wakabuzya Rute kuti: ‘Ino wabeleka mumuunda wabani sunu?’ Rute wakati: ‘Mumuunda wamwaalumi wazina lya Boazi.’ Naomi wakamwaambila kuti: ‘Boazi mubbululu wabalumi bangu. Kozumanana kubelekela mumuunda wakwe antoomwe abamakaintu bambi. Ookuya kuli kabotu.’

Rute wakazumanana kubeleka mumuunda wa Boazi kusikila kutebula nokwakamana. Boazi wakabona kuti Rute wakali muyumu kubeleka alimwi wakali mukaintu uuli kabotu kapati. Mumazuba aayo, ikuti mwaalumi wafwa alimwi tanaazyala bana basankwa, mubbululu wamwaalumi ooyo wafwa wakali kukonzya kumukwata mukaintu ooyo wakafwidwa. Aboobo Boazi wakamukwata Rute. Bakazyala mwana musankwa ooyo ngobakaulika zina lya Obedi, walo iwakazooba basyaanyinakulu ba Mwami Davida. Beenzinyina ba Naomi bakakkomana kapati. Bakaamba kuti: ‘Jehova wakakupa Rute, walo iwali kabotu kapati kulinduwe, lino mpaawa waba amuzyukulu. Jehova aatembaulwe.’