“Tandicili Silunya”

MBONDAKABEDE KAINDI

Ndakazyalilwa ku Uganda mudolopo lya Gomba. Bunji bwabantu bakali bacete kapati. Dolopo lyesu lyakanyina malaiti, aboobo masiku twakali kubelesya malambe.

Bazyali bangu, ibakali balimi, bakalongela ku Uganda kuzwa ku Rwanda. Bakali kulima kkofi amabbanana, alimwi bakali kupanga bukoko buzyibidwe kapati butegwa waragi kuzwa kumabbanana. Kuyungizya waawo, bazyali bangu bakali kuvwuba nkuku, mpongo, ngulube alimwi aŋombe. Kweelana ambondakakomezyegwa, ndakasyoma kuti mukaintu weelede kulibombya kumulumaakwe ciindi coonse alimwi teelede kupa mizeezo yakwe.

Nondakakkwanya myaka 23, ndakalongela ku Rwanda, kwalo nkondakali kuunka mumasena aakuzyanina masiku abamusela wangu bamwi. Ibusena bumbi nkondakali kuunka kanji-kanji, balupati-pati bakandipa kkaadi kutegwa kandinjila buyo mahala. Alimwi ndakali kukkomana kweebelela mavidiyo aankondo. Aboobo mumasena mondakali kujanika alimwi azintu nzyondakali kukkomanina zyakapa kuti ndibe sinkondo alimwi acakolwa uutalilemeki.

Mu 2000, ndakatalika kukkala amukaintu uucili mwana-mwana wazina lya Skolastique Kabagwira, mpoonya twakaba abana botatwe. Kweelana ambondakaiya nondakacili mwana, ndakali kulangila kuti kandifwugamina anoondijuzya naa ciindi nayanda kulomba cintu cimwi. Alimwi ndakazyi kuti zintu zyoonse zyakali zyangu aboobo ndakali kukonzya kuzibelesya kufwumbwa mbondiyanda. Kanji-kanji, ndakali kuzwa masiku aŋanda mpoonya akupiluka cakuma 03:00 hrs kuseeni, kandikoledwe. Ndapiluka, ndakali kukonkomona amulyango, mpoonya kuti ba Skolastique batola ciindi kujalula ndakali kubauma.

Aciindi eeciya, ndakali mupati-mupati mukkampani yabasikugatela, alimwi ndakali kuvwola mali manji. Kuŋanda, ba Skolastique bakasola kundoongelezya kunjila cikombelo cabo ca Pentecostal akuyeeya kuti inga ndacinca. Pele ndakaka kuunka kucikombelo cabo. Muciindi caboobo, ndakatalika kumenena mate mukaintu uumbi. Akaambo kabukkale bwangu bwakutalilemeka, ba Skolastique bakazwa aŋanda abana besu boonse akuunka kubazyali babo.

Mulongwe wesu umwi wakabandika andime kujatikizya buumi mbondakali kupona. Wakandikulwaizya kujokela kuli ba Skolastique. Wakandaambila kuti bana bangu tiibakeelede kwaandanizyigwa andime ndebausyi. Aboobo mu 2005, ndakacileka kunywa, akumuleka mukaintu ngondakali kweenda limwi mpoonya ndakapiluka kuli ba Skolastique. Mu 2006 twakakwatana. Nokuba boobo, ndakacili silunya kubakaintu bangu alimwi akubatundulula.

BBAIBBELE MBOLYAKANDICINCA

Mu 2008, umwi wa Bakamboni ba Jehova wazina lya Joël wakakonkomona amulyango wesu, mpoonya ndakaswiilila kumulumbe wakwe. Kwamyezi minji, walo alimwi a Kamboni umwi, wazina lya Bonaventure, bakali kundiswaya lyoonse, alimwi twakali kuba amibandi yamu Bbaibbele. Ndakali kubuzya mibuzyo minji, kwaambisya kujatikizya bbuku lya Ciyubunuzyo. Ndakali kusola kutondezya Bakamboni kuti tiibakaluzi. Mucikozyanyo, ndakababuzya kaambo ncobaamba kuti “nkamu mpati” yaambidwe ku Ciyubunuzyo 7:9 kuti iyoopona anyika, kakuli kapango kaamba kuti ‘baimvwi kumbele lyacuuno cabwami [ca Leza] akumbele lya Mwanaambelele,’ Jesu Kristo. Ba Joël cakukkazika moyo bakayiingula mibuzyo yangu. Mucikozyanyo, bakanditondezya lugwalo lwa Isaya 66:1, kwalo Leza nkwaamba nyika kuti “ncilyatilo camaulu” aakwe. Aboobo nkamu mpati iimvwi aanyika kumbele lyacuuno ca Leza. Alimwi ndakabala lugwalo lwa Intembauzyo 37:29, lwalo lwaamba kuti balulami bayookkala lyoonse anyika mane kukabe kutamani.

Mukuya kwaciindi, ndakazumina kwiiya Bbaibbele. Aboobo ba Bonaventure bakali kutuyiisya mebo aba Skolastique. Notwakali kwiiya Bbaibbele, ndakaba amakanze aakucinca mubuumi bwangu. Ndakaiya kubeendelezya cabulemu bakaintu bangu. Tiindakacili kuyanda kuti kabafwugama ciindi nobandijuzya naa ciindi nobalomba cintu cimwi, alimwi ndakacileka kuba amuzeezo wakuti, zintu zyoonse zyamumukwasyi zyakali zyangu. Kuyungizya waawo, ndakacileka kweebelela mafilimu aankondo. Pele tiicakali cuuba-uba kucinca alimwi kwakali kuyandika kulilesya kapati alimwi akulicesya.

Myaka misyoonto musyule, ndakatolede mwanaangu wakusaanguna, Christian, kuyoolelwa abacibbululu ku Uganda. Pele nondakamana kubala lugwalo lwa Deuteronomo 6:4-7, ndakazyiba kuti Leza uyanda kuti mebo abakaintu bangu katubalanganya bana besu, calo cibikkilizya kubayiisya ncolyaamba Bbaibbele. Eelo kaka twakakkomana antoomwe amwaneesu ciindi notwakamujola aŋanda!

MBONDAGWASYIGWA

Ndakaiya kuti Jehova ngu Leza siluse, alimwi ndilijisi lusyomo lwakuti wakandilekelela kuzintu nzyondakali kucita kaindi. Ndilikkomene kuti ba Skolastique bakandisangana mukwiiya Bbaibbele. Twakalyaaba kuli Jehova alimwi twakabbapatizyigwa antoomwe mu December 4, 2010. Lino tulasyomana, alimwi tulazitobela njiisyo zyamu Bbaibbele mumukwasyi wesu. Bakaintu bangu balikkomene kapati akaambo kakuti ciindi nondakotoka kumulimo kunyina kumbi nkondiinda nduunka buyo kuŋanda. Kuyungizya waawo balikkomene akaambo kakuti ndibeendelezya cabulemu, ndakacileka kunywa bukoko alimwi tandicili silunya. Mu 2015, ndakasalwa kuba mwaalu kugwasyilizya kweembela mbungano yesu. Akati kabana besu bosanwe, botatwe bakabbapatizyigwa.

Ciindi nondakatalika kwiiya Bbaibbele a Bakamboni ba Jehova, tiindakazyisyoma mpoonya-mpoonya nzyobakali kundiyiisya. Pele ndakakkomana kapati nobakali kubelesya Bbaibbele kwiingula mibuzyo yangu. Mebo abakaintu bangu twazyiba kuti aabo baamba kuti babelekela Leza wakasimpe beelede kupona kweelana azyeelelo zyakwe, kutali kucita nzyobayanda. Ndilikkomene kapati kuti Jehova wakandikwela akuti lino ndili cibeela camukwasyi wakwe wakumuuya. Ciindi nondilanga musyule, ndilisinizyide kuti kwiinda mukugwasyigwa a Leza, muntu uuli woonse ulakonzya kucinca akumukkomanisya.