BAKUBUSI BALABUZYA
Ncinzi Ncondeelede Kuyoocita Ndaakubbapatizyigwa?—Cibeela 2: Amuzumanane Kusyomeka
Bbaibbele lyaamba kuti “Jehova kunyina nayakubaima cintu cili coonse cibotu, aabo beenda kabatajisi kampenda.” (Intembauzyo 84:11) Ino caamba nzi ‘kweenda kamutajisi kampenda?’ Caamba kupona kweelana acisyomezyo ncomwakapanga kuli Jehova nomwakali kulyaaba kulinguwe. (Mukambausi 5:4, 5) Ino inga mweenda buti kamutajisi kampenda nomwamana kubbapatizyigwa?
Mucibalo eeci tulalanga-langa makani aatobela:
Amuzumanane kuliyumya kumapenzi
Lugwalo luyandika: “Tweelede kwiinda mumapenzi manji kutegwa tukanjile mu Bwami bwa Leza.”—Milimo 14:22.
Bupanduluzi: Kwaamba masimpe, Banakristo boonse bayoojana mapenzi mubuumi bwabo. Mapenzi aamwi ngomukonzya kujana mbuli kusampaulwa naa kukazyigwa, alaboola akaambo kakuti muli Banakristo. Aamwi, mbuli penzi lyakubula mali naa kuciswa, alakonzya kumujatikizya muntu uuli woonse.
Ncomweelede kuzyiba: Zimwi ziindi, bukkale bwanu bulakonzya kucinca munzila njomwatali kuyeeyela. Bbaibbele lyaamba kuti zintu zibi zilakonzya kumucitikila muntu uuli woonse kufwumbwa naa Munakristo naa pe.—Mukambausi 9:11.
Ncomukonzya kucita: Mbwaanga mulizyi kuti muyoojana mapenzi, mulakonzya kulibambilila limwi. Aboobo, amwaabone kuti ncoolwe cakuyumya lusyomo lwanu alimwi akumusyoma kapati Jehova. (Jakobo 1:2, 3) Mukuya kwaciindi, muyoolimvwa mbwaakalimvwa mwaapostolo Paulo naakaamba kuti: “Muzintu zyoonse ndilijisi nguzu kwiinda muli yooyo uundipa nguzu.”—Bafilipi 4:13.
MAKANI AAKACITIKA NCOBENI. “Nondakabbapatizyigwa, bana bokwesu basankwa bakakasiya kasimpe, eeci cakapa kuti bazyali baciswe, alimwi andime ndakaciswa. Nicakaba cuuba-uba kulindime kutyompwa, akuluba kuti ciindi nondakalyaaba kuli Leza, ndakamusyomezya kubikka bukombi bwakwe mubusena bwakusaanguna mubuumi bwangu. Aboobo, kulyaaba kwangu nkokwakandigwasya kulwana buyumuyumu oobu.”—Ba Karen.
Muzeezo: Amwiiye kujatikizya Josefa. Mulakonzya kwiiya zyabuumi bwakwe kwiinda mukubala Matalikilo caandaano 37, 39 kusikila kucaandaano 41. Amulange-lange mibuzyo eeyi: Mapenzi nzi aakamucitikila cakutayeeyela, alimwi mbuti mbwaakalwana? In Jehova wakamugwasya buti Josefa?
Sena mulayanda lugwasyo alumbi?
Amubale zibalo zyakuti:
Amudaunilode cibalo cakuti:
Amuzumanane kwaazunda masunko
Lugwalo luyandika: “Umwi aumwi ulasunkwa kwiinda mukoongelezyegwa akucegwa azisusi zyakwe mwini.”—Jakobo 1:14.
Bupanduluzi: Zimwi ziindi, tulasunkwa azintu nzyotulombozya. Ikuti tiitwazyeeleba, tulakonzya kucita cibi.
Ncomweelede kuzyiba: Nomwabbapatizyigwa, mulakonzya kuzumanana kulombozya “zisusi zyanyama.” (2 Petro 2:18) Kunze lyaboobo, mulakonzya kusunkwa koonana kamutanakwata naa kukwatwa.
Ncomukonzya kucita: Amulibambilile limwi lino kamunatasunkwa, kutegwa mutakalekeli kulombozya kwanu kuti kumupe kutasala kabotu. Kamuyeeyede kuti, Jesu wakaamba kuti: “Taakwe uukonzya kubelekela basimalelo bobilo.” (Matayo 6:24) Mulakonzya kusala simalelo ngomuyanda. Amusale Jehova. Nokuba kuti kulombozya kubyaabi kwamukatazya buti, mulakonzya kusala kutakutobela kulombozya ooko.—Bagalatiya 5:16.
Muzeezo: Amuzizyibe zintu nzyomukonzya kuliyumya alimwi akulezya kwanu. Amusale balongwe bakonzya kumugwasya kuba abube buli kabotu. Amweelebe bantu, masena, alimwi abukkale bukonzya kupa kuti cimwaalile kucita ciluzi.—Intembauzyo 26:4, 5.
Sena mulayanda lugwasyo alumbi?
Amubale zibalo zyakuti:
“Ino Inga Ndalizunda Buti Sunko?”
“Ino Inga Ndacita Buti Kutegwa Ndileke Kuyeeya Makani Aakoonana?”
Amuzumanane kuyumya busungu bwanu
Lugwalo luyandika: ‘Amutondezye busungu mbubonya oobu . . . kusikila kumamanino, kuti mutabi batolo pe.’—Bahebrayo 6:11, 12.
Bupanduluzi: Ooyo uutabikkili maano kumulimo wakwe ulakonzya kuyaansi alimwi akuba mutolo.
Ncomweelede kuzyiba: Cakutadooneka mwakalikkomene alimwi mwakajisi busungu kapati ciindi nomwakabbapatizyigwa. Kuyungizya waawo, mwakali kumuyanda kapati Jehova. Pele mukuyakwaciindi, cilakonzya kumuyumina kuzumanana kumvwida Jehova muzintu zyoonse, alimwi eeci cilakonzya kumutyompya akupa kuti busungu bwanu kabuyaabuceya.—Bagalatiya 5:7.
Ncomukonzya kucita: Amuzumanane kucita ciluzi, nokuba kuti zimwi ziindi moyo wanu inga tiiwamukulwaizya kucita oobo. (1 Bakorinto 9:27) Calino, amuswene kuli Uso wanu wakujulu kutegwa mumuzyibe kabotu alimwi akubandika anguwe mumupailo lyoonse. Kuyungizya waawo, amuzumanane kuba abalongwe aabo ibayanda kubelekela Jehova.
Muzeezo: Kamuyeeya kuti Jehova ulamuyanda kapati alimwi ulilibambilide kumugwasya. Mutayeeyi kuti Jehova ulinyemede akaambo kakuti ikuti kwakaindi kasyoonto tamucili basungu. Bbaibbele lyaamba kuti: “Muntu uukatede ulamupa nguzu alimwi aabo batajisi nguzu ulabapa nguzu zinji.” (Isaya 40:29) Mukuyakwaciindi, uyookulongezya kusolekesya kwanu kwakuti mube basungu alimwi.
Sena mulayanda lugwasyo alumbi?
Amubale cibalo cakuti:
“Nobakubusi—Amuzumanane Kubelekela Lufwutuko Lwanu”
Acamu Cikuwa cakuti “How Can I Make Worship of God Enjoyable?”
Amweebelele kavidiyo kamu Cikuwa kakuti:
Masimpe ngakuti: Ikuti kamweenda kamunyina kampenda, muyoopa kuti moyo wa Jehova ukondwe! (Tusimpi 27:11) Uyookkomana akaambo kakuti mwakasala kuba kulubazu lwakwe, alimwi uyakumupa zyoonse nzyomuyandika kutegwa mukukake kusunka kwa Saatani.