KUBUZYA-BUZYA | ELDAR NEBOLSIN
Syaazibwene Mumakani Aakwiimba Ulapandulula Mbwaakatalika Kusyoma Muli Leza
Ba Eldar Nebolsin baku Uzbekistan mbaasyaazibwene mumakani aakwiimba. Bakali kwiimba antoomwe abasikulizya zilimba baku London, Moscow, St. Petersburg, New York, Paris, Rome, Sydney, Tokyo, alimwi aku Vienna. Ba Eldar bakakomenena ku Soviet Union alimwi tiibakali kusyoma kuti Leza nkwali. Pele mukuya kwaciindi bakazoozyiba kuti bantu bakalengwa a Mulengi siluyando. Balembi ba Sinsimuka! bakababuzya kujatikizya mulimo wabo wakwiimba alimwi alusyomo lwabo.
Ino mwakatalika buti kwiimba?
Bazyali bangu boonse mbaimbi. Bakatalika kundiyiisya kwiimba nindakajisi myaka yakuzyalwa yosanwe. Mukuya kwaciindi ndakaakwiiya kwiimba kucikolo cipati ku Tashkent.
Amutwaambile buyumuyumu bujanika mukwiimba abasikulizya zilimba.
Kunyina tubunga tobilo twabasikulizya zilimba tukozyenye. Tubunga ootu tuli mbuli zibelesyo zyakwiimbya zipati zyobilo “zilizyigwa” asikwiimbya. Ambweni buyumuyumu mbobakonzya kuba ambubo baimbi nkucikonzya kwiimba kweelana abusolozi bwasikwiimbya. Cili mbuli mubandi akati kabantu bobilo, muciindi cakuti muntu omwe kasololela mubandi lyoonse, umwi aumwi weelede kunoolekela mweenzinyina kutola lubazu mumubandi. Kanji-kanji inga kuli buyo ciindi comwe naa zyobilo zyakwiiya kutegwa kube kweendelana kuli boobo.
Ino inga mutola ciindi cinji buti kwiiya nyimbo?
Mawoola otatwe abuzuba alimwi ikutali kwiiya buyo zibeela zikatazya zyanyimbo pe, pele alimwi akuzyiba lwiimbo oolo mbolubede kakunyina kulwiimba buya. Acimbi ncondicita nkuswiilila nyimbo zimbi izyakaimbwa amuntu nguwenya wakazilemba nyimbo eezyo, calo cindipa kuti ndizyibe zinji kujatikizya lwiimbo ndondiyanda kwiimba.
Mbuti mbomukonzya kumuzyiba mwiimbi mubotu?
Ndilakonzya kumuzyiba ikuti kacikonzya kubelesya piano “mukwiimba.” Andipandulule. Piano ncibelesyo cakwiimbya cilizyigwa buya mbuli ngoma. Ikuti naa yaumwa, kulila kwa piano inga kuyaabuceya mukwiimpana azibelesyo zimbi zibelesya muwo naa ijwi lyamuntu lyalo likonzya kuzumanana kulimvwisya naa kuyungizya buya kulimvwisya. Aboobo baimbi beelede kubikkila maano kutegwa piano kaizumanana kulimvwisya. Balacita oobo kwiinda mukunyanyaasya maanza, tunwe alimwi akweendelanya cipedulo cili kululyo calo cipa kuti piano izumanane kulila alimwi akulimvwisya kabotu. Ikuti baimbi bacizyiba kuzunda buyumuyumu oobu, balakonzya kupa kuti piano kailila mbuli muntolilo, mweembo naa nkamu yabaimbi. Alimwi balakonzya kupa kuti ikozyanye acibelesyo cakwiimbya cibotu kwiinda zyoonse, ijwi lyamuntu.
Cakutadooneka, kwiimba mulakuyanda kapati.
Kulindime kwiimba ngomwaambo uukonzya kubelesyegwa kwaamba zyintu zikatazya naa zitakonzyeki buya kwaambwa mumajwi.
Ncinzi cakamupa kutalika kuyanda zyintu zyakumuuya?
Lyoonse muŋanda yesu kwakali kujanika mabbuku manji ngobakali kuletelezya bataata kuzwa ku Moscow. Ibbuku ilyakandikkomanisya kapati lyakajisi makani aamu Bbaibbele aajatikizya mbowakatalika musyobo wabana Israyeli alimwi azyakabacitikila. Ibbuku limbi ndyondakajana lyakali lyakuti Mulakonzya Kupona Kukabe Kutamani mu-Paradaiso Anyika, ilyakamwaigwa a Bakamboni ba Jehova.a Mbolipandulula njiisyo zyamu Bbaibbele cakusalazya kwakandikkomanisya kapati. Ciindi nindakaunka ku Spain mu 1991 kuyooiya nyimbo, ndakalitolelezya alimwi ndakalibala ziindi zili mbozibede. Ndakakajana kasimpe kayeeme atwaambo tugwasya alimwi abumboni bwini-bwini.
Njiisyo iyakandikkomanisya kapati njacisyomezyo camu Bbaibbele cakuti bantu balakonzya kupona kukabe kutamani anyika. Eeci ndakacimvwisya kapati. Pele aciindi eeco kunyina Kamboni wa Jehova ngondakaswaangenye kale. Pele ndakali aamakanze aakuti kufwumbwa Kamboni ngondiyoobona ndiyoomulomba kuti andiyiisye Bbaibbele.
Ino mwakabonana buti a Bakamboni ba Jehova?
Kakwiindide mazuba masyoonto kuzwa ciindi nindakaba amakanze aakuyanda kwiiya, ndakabona bamakaintu bobilo, boonse bakajisi Bbaibbele mumaanza. Ndakalyaambauzya kuti ‘Balibonya mbuli kuti mbabantu mbondakabala mubbuku lyangu. Alimwi balakambauka mbubwenya mbuli Banakristo bakaindi.’ Kakutanainda ciindi ndakatalika kwiiya Bbaibbele a Kamboni umwi. Mazuba aano cilandikkomanisya kapati kugwasya bamwi kwiiya zya Mulengi wesu.
Ncinzi cakamupa kutalika kusyoma mu Mulengi?
Nyimbo nzezyakandipa kutalika kusyoma mu Mulengi. Bantu banji balazikkomanina kapati nyimbo kwiinda mbobakonzya kuzikkomanina banyama. Nyimbo zilakonzya kupa muntu kutondezya mbwalimvwa. Ncilengwa buya kuyanda kutobelezya nyimbo mboilila. Pele sena nyimbo zilayandika kutegwa tukafwutuke? Sena zilijisi lubazu kweelana ambobayiisya aabo basyoma mukusanduka kwazyintu kuti ibalaanguzu balikke mbabakonzya kupona? Peepe. Mukuyeeya kwangu, tacili camaano kwaamba kuti bongo bwamuntu, bwalo ibukonzya kupanga alimwi akukkomana anyimbo mbuli zyeezyo zyaba Mozart alimwi a Beethoven kuti bwakasanduka buya. Bupanduluzi bulimvwisya mbwakuti bongo bwesu bwakalengwa buya amuntu musongo alimwi Mulengi siluyando.
Bbaibbele lili mbuli nyimbo mbotu kapati alimwi mulumbe uukulwaizya kubantu boonse
Ncinzi cakamupa kusyoma kuti Bbaibbele lyakazwa kuli Leza?
Ibbaibbele lijisi mabbuku masyoonto-syoonto aali 66 aakalembwa abaalumi bali 40 alimwi lyakatola myaka iinda ku 1,600 kulembwa. Ndakalibuzya kuti, ‘Nguni iwakali kukonzya kweendelezya kulembwa kwabbuku libotu boobu?’ Bwiinguzi bolikke bumvwika mbwakuti ngu Leza. Mumizeezo yangu, ndiyeeya kuti Bbaibbele lili mbuli nyimbo mbotu kapati alimwi mulumbe uukulwaizya kubantu boonse.
a Mazuba aano kweendelezya ciiyo ca Bbaibbele, Bakamboni ba Jehova babelesya bbuku lyakuti Ino Ncinzi Cini Bbaibbele Ncoliyiisya? Mulakonzya kulijana a Web site ya www.jw.org.