CISI ALIMWI ABANTU
Kuswaya ku Ireland
IRELAND mbusena bujisi zisi zyobilo: akati kazisi eezyi, cipati nca Republic of Ireland, mpoonya cisyoonto nca Northern Ireland, calo cili ncibeela ca United Kingdom.
Mugwagwa wiitwa kuti Giant’s Causeway
Cisi ca Ireland ciitwa kuti Emerald Isle akaambo kakuti mvwula ilawa kapati mucisi eeci calo cipa kuti muminzi kakulibonya kabotu. Lwizi, milonga, alimwi amalundu aali mumabali-bali aalwizi apa kuti busena oobu kabulibonya kabotu.
Ŋanda iivwumbidwe abwizu
Bantu baku Ireland bakaliyumya mumapenzi manji. Mucikozyanyo, bamwi bayeeyela kuti cakuma 1845 kusikila muma 1851, bantu babalilwa ku 1 miliyoni bakafwa akaambo kamalwazi alimwi anzala ciindi bulwazi bwazisyango nibwakanyonyoona magwili. Ikutija bukkale oobu, banji bakalongela ku Australia, Britain, Canada, alimwi aku United States. Mazuba aano, bana America ibali 35 miliyoni, bamasyaanyinakulu bakazwa ku Ireland.
Bana Ireland bazyibidwe kuti mbantu basangalizya alimwi ibasamausya beenzu. Zisobano nzyobayandisya kapati nkutanta mabbiza, criket, rugby alimwi abbola lyamaulu. Bamakaintu bayandisya cisobano ciitwa kuti camogie, icikozyenye acisobano ca hockey.
Bantu bamu Ireland balayandisya kwiizya alimwi akuswiilila nyimbo. Cizyano caku Ireland cakusotauka cilizyibidwe munyika yoonse. Ibazyana cizyano eeci inga babelesya buyo maulu, mubili nkouli kucamba inga taunyanyaali.
Baimbi bana Ireland
Bakamboni ba Jehova baliko mu Ireland kwamyaka iinda ku 100. Calino, kuli Bakamboni bainda ku 6,000 mucisi eeci alimwi mbasungu kukambauka mulumbe wamu Bbaibbele.
Nyimbo zyaku Ireland zilaimbwa kwiinda mukubelesya zintu zitondezyedwe ansi aawa mbuli: kalumbu, Irish bagpipes, bbanjo, cilimba, muntolilo, alimwi (angoma.)
SENA MULIZYI?
Mugwagwa uuli kunkomwe wa Northern Ireland nkoili kunyika ujisi misemu minji yamabwe aasiya aakapangwa ciindi ceele cizwa mumalundu aakazwa mulilo nicakatontola akuyuma ciindi nicakasika afwaafwi alwizi.