“Ŋanda Iituyeezya Nkondo Yakaindi”

KUNKOMWE iili kujwe aa Mulonga wa Motoyasu mu Hiroshima City ku Japan, kuli ŋanda iyakanyonyooka kulubazu lumwi alimwi ili muciimo eeco kuzwa mu 1945. Nkaambo nzi ŋanda eeyi ncoitabambululwi lino kwamyaka iitandila ku 70?

Ŋanda eeyi iyakajisi maanda otatwe kuya mujulu, yakamanizyigwa kuyakwa mu 1915. Kusaanguna yakali kubelesyegwa kaili busena bwakusumpula makwebo. Pele eeci cakacinca mu August 6, 1945, aciindi ca 08:15hrs. Aciindi eeco, bbomba lya atomic lyakusaanguna kubelesyegwa munkondo lyakabboloka mamita aali 550 atala aadolopo alimwi afwaafwi kapati aŋanda eeyi. Boonse ibakali mukati bakafwa. Nokuba boobo, zibeela zimwi zyaŋanda eeyi zyakazumanana kaziimvwi.

Icibalo cakalembwa abamukabunga ka UNESCOa caamba kuti, ŋanda eeyi “ituyeezya nkondo yakaindi yalo yakajisi nguzu izyakunyonyoona izyakapangwa abantu.” Mpoonya mu 1996 eeyi ŋanda yakalembwa amulongo wa UNESCO World Heritage List akwiitwa kuti Hiroshima Peace World Heritage.

Nokuba boobo, cuusisya ncakuti, ŋanda mbuli yeeyi iicibayeezya zintu zyakaindi tiiyalesya nkondo pe, yalo kanji-kanji iiboola abusyaacivwulemwangu, kusalana mubala, mwaambo, alimwi akwiindana zikombelo. Aboobo, sena nkondo iyoozumanana?

Ibbaibbele liingula kuti peepe! Lugwalo lwa Intembauzyo 46:9 lwaamba kuti, “[Leza] ulamanizya nkondo munyika yoonse mboizulwa. Ibuta ulabutyolaula alyalo sumo ulalipwayaula; inkalaki zyankondo ulazyuumpa amulilo.” Alimwi buya, Leza uyoogwisya mfwulumende zyabantu akubikka mfwulumende yanyika yoonse nkokuti, Bwami bwa Leza, bweendelezyegwa a Jesu Kristo, walo uuli ngo “Mwami wabami.”—Ciyubunuzyo 11:15; 19:16.

Kuzwa waawo, kunoonyina zintu zituyeezya nkondo izyakali kucitika kaindi. Lugwalo lwa Isaya 65:17 lwaamba kuti “zintu zyakaindi,” nkokuti mapenzi alimwi azintu zimwi zityompya mazuba aano, “tazikaibalukwi limbi pe, nokuba kuyeeyegwa mumoyo.”