ZISI ALIMWI ABANTU
Kuswaya ku Costa Rica
MYAANDA yamyaka yosanwe yainda, bana Spain bakaswaya busena oobu ciindi cakusaanguna. Bakabuulika zina lyakuti Costa Rica (Rich Coast), kabayeeya kuti balajana ngolida inji—calo catakazwidilila. Mazuba aano, busena oobu tabujisi zibulo ziyandisi pele buzyibidwe kuba cisi civwubide kapati muzilengwaleza.
Bantu baku Costa Rica baitwa kuti Ticos, ibbala lizwa kucilengwa cabo cakubikka “-ico” kumamanino aamabala. Mucikozyanyo, muciindi cakwaamba kuti “un momento” (asyoonto), balakonzya kwaamba kuti “un momentico” (asyoonto buyo). Mumibandi yabo buzuba abuzuba, bavwula kwaamba kuti “¡pura vida!” (buumi busalala!) kutondezya kulumba naa kuzuminizya naa kwaamba kuti “kamwaamba” naa “musyaale kabotu.”
Syokwe lyaku Costa Rica lijisi zisyango ziindene-indene alimwi abanyama, mbuli cula wamucisamu uujisi meso aasalala (Agalychnis callidryas)
Akati kazyakulya nzyobakkomanina bana Costa Rica kuli ciitwa kuti gallo pinto (caamba kuti “mukombwe uujisi tudomwi-domwi”)—mupunga uujikidwe ulikke alimwi anyabo mpoonya balabikka twakubikka-bikka kutegwa cakulya cibote. Cakulya eeci cilakonzya kuligwa mafwumofwumo, syikati alimwi akumazuba. Cakunywa ncobavwula kupanga baciita kuti café chorreado—kkofi ngobaseba kubelesya cisani caangilidwe kucisamu.
Kuli mbungano zibalilwa ku 450 zya Bakamboni ba Jehova ku Costa Rica. Miswaangano yabo yeendelezyegwa mumyaambo iili 10, kubikkilizya a Mwaambo Wakutambaika waku Costa Rica alimwi amyaambo yobilo yamucisi ca Costa Rica—Bribri alimwi a Cabecar.
SENA MULIZYI? Mabwe aacezudwe kabotu manji akajanika ku Costa Rica. Bbwe liinda kukomena lili 2.4m mubwamba. Amwi ayeeyelwa kuti akkala kwamyaka iinda ku 1,400. Kunyina uuzyi kaambo ncaakapangilwa.
Mabwe aabulungene