“Tandilekeli Bulwazi Bwangu Kundipa Kulibilika Kapati”
“Ndakali kuyandika lugwasyo kutegwa ndicikonzye kubuka akoona. Kweenda cakali kucisa. Tiindakali kucikonzya kunywa musamu akaambo kakuti amoyo kwakalijalide. Ndakazwa zilonda zyatakali kupona alimwi mukuya kwaciindi zyakatalika kuyandalala. Ndakajisi zilonda mwida alimwi ndakaba acilungwida. Tiindakalizyi cakali kucitika. Ndakajisi buyo myaka iili 10.”—Elisa.
Nokuba kuti ulaciswa, Elisa ulakkomana kuyiisya bamwi Bbaibbele
BBALA lyakuti scleroderma, nkokuti “lukanda luyumu,” ndibbala libelesyegwa kwaamba malwazi ngobaciswa bantu babalilwa ku 2.5 miliyoni nyika yoonse. Musyobo ngobaciswa bana kanji-kanji bwiitwa kuti localized scleroderma, bwalo ibupa kuti lukanda luyume.
Pele Elisa, wakajanwa amusyobo uutegwa systemic scleroderma naakajisi myaka iili 10—bulwazi butajatikizyi buyo lukanda, pele lulajatikizya ambozibeleka zizo zyamukati, kubikkilizya ansa, moyo, mapunga, alimwi amala. Bamadokota bakali kuyeeya kuti musamu ngobakali kumupa wakali kukonzya kuyungizya buumi bwa Elisa amyaka buyo yosanwe. Pele lino kwainda myaka iili 14, alimwi Elisa ucipona. Nokuba kuti uciciswa, Elisa wazumanana kuzilanga munzila iili kabotu zintu mubuumi. Basikulemba Sinsimuka! bakabandika a Elisa kujatikizya bulwazi bwakwe alimwi ambwaacikonzya kuliyumya.
Ino wakazyiba lili kuti ulaciswa?
Nindakajisi myaka iili 9, ndakalicisa kukakokola, alimwi cakali kucisa kapati. Cilonda cakakomena alimwi tiicakali kupona. Nindakapimwa ndakajanika abulwazi bwa systemic scleroderma. Akaambo kakuti ndakali kuyaabwiindila kuciswa, twakali kuyandika kujana dokota wakajisi luzyibo lwakusilika bulwazi oobu.
Sena mwakamujana dokota uuli boobo?
Twakajana dokota uusilika malwazi aamafwuwa. Wakaambila bazyali bangu kuti balandipa musamu uukonzya kupa kuti bulwazi butafwambaani kundijaya akuti andiza kwainda myaka yosanwe inga ndapona. Bubi bwamusamu ooyu mbwakuti bwakali kuyoopa kuti mubili wangu kautacikonzyi kulwana malwazi. Nokuba malwazi mbuli syini naa kukola akali kukonzya kundijaya.
Pele sena kuli cibi cakacitika?
Peepe—mucoolwe mpaawa ndicipona! Pele nindakakkwanya myaka iili 12, mucamba mwakatalika kucisa kapati. Mwakali kucisa kwamaminiti aali 30, ziindi zimwi, ziindi zyobilo abuzuba. Mwakali kucisa kapati cakuti ndakali kukwiila.
Ino ncinzi cakali kupa kuti ulimvwe boobo?
Bamadokota bakajana kuti bulowa mbusyoonto kapati akuti moyo wangu wakali kubeleka kapati kutegwa bulowa busike kubongo. Munsondo buyo zisyoonto, ndakalimvwa kabotu akaambo kamusamu ngobakandipa. Pele aciindi eeco ndakatalika kuyeeya kuti kufwumbwa ciindi, cili coonse cakali kukonzya kucitika. Ndakalimvwa kubula nguzu, mbuli kuti kunyina ncondakali kukonzya kucita kujatikizya cakali kundicitikila.
Kwainda myaka iili 14 lino kuzwa nowakajatwa abulwazi oobu. Ino ulimvwa buti mazuba aano?
Asunu mubili ucicisa alimwi ndilaciswa amalwazi aamwi aajatikizya scleroderma, malwazi mbuli zilonda zyamwida, zilonda zyamumapunga, acilungwida. Nokuba boobo, tandilekeli bulwazi bwangu kundipa kulibilika kapati naa kusowa ciindi kuusa. Ndijisi zintu zimbi zyakucita.
Zintu zili buti?
Ndilaciyanda kudulowiŋa, kusuma zisani akupanga zyakulisakatizya. Mbwaanga ndili Kamboni wa Jehova, ndicita mulimo uuyandika kapati wakuyiisya Bbaibbele. Noliba leelyo nonditacikonzyi kuunka kumaanda aabantu, ndilacikonzya kugwasya Bakamboni bamwi basololela ziiyo zya Bbaibbele kubantu bali mucilawo cesu. Andime buya kuli bantu mbondiyiisya Bbaibbele. Mulimo wakukambauka undipa kupona buumi bujisi mpindu.
Nkaambo nzi ncocita mulimo ooyu nokuba kuti ujisi mapenzi aamwi?
Ndilizyi kuti makani ngondaambila bantu alayandika alimwi alagwasya. Kunze lyaboobo, nondijisi bubi kugwasya bamwi munzila iili boobu, cindipa kukkomana. Cindipa kulimvwa kabotu. Aciindi eeco cisyoonto, ndilaluba akuti ndilicisidwe.
Ino Bbaibbele likugwasya buti kuzilanga kabotu zintu?
Lindiyeezya kuti mapenzi aangu amapenzi aabamwi ngakaindi buyo kasyoonto. Lugwalo lwa Ciyubunuzyo 21:4 lwaamba kuti aciindi cakwe ceelede, Leza “uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.” Kuyeeya magwalo aali boobu cindigwasya kuyumya lusyomo lwangu mucisyomezyo ca Leza cakuti kumbele kuyoobota, kutali buyo kuli baabo baciswa malwazi aatasilikiki pele kuli boonse.