Cibalo 10

Jesu Ulaanguzu Kapati Kwiinda Madaimona

SENA ucikayeeyede kaambo kakapa kuti umwi wakali mungelo wa Leza abe Saatani Diabolosi?— Ikuyandisisya kukombwa nkokwakamupa kuti afwutatile Leza. Sena kuli bangelo bambi ibakamutobela Saatani?— Inzya nkobali. Ibbaibbele libaita kuti ‘mbaangelo ba Saatani’ naa madaimona.—Ciyubunuzyo 12:9.

Sena bangelo aaba babyaabi naa madaimona alamusyoma Leza?— Ibbaibbele lyaamba kuti, ‘imadaimona alazumina kuti Leza nkwali.’ (Jakobo 2:19) Pele balamuyoowa. Cili boobo akaambo kakuti balizyi kuti Leza uyoobasubula akaambo kazintu zibyaabi nzyobacita. Ino nzibi nzi nzyobacita?—

Ibbaibbele lyaamba kuti ibangelo aabo bakasiya munzi wabo wakujulu akuboola kuzikukkala anyika kabali bantu. Bakacita boobu akaambo kakuti bakayanda kuti boonane abanakazi babotu ibakali anyika. (Matalikilo 6:1, 2; Juda 6) Ino ncinzi ncozyi kujatikizya koonana?—

Ikoonana kulacitwa eelyo mwaalumi amwanakazi nobaswaangana munzila imwi iilibedelede. Kuzwa waawo, kulakonzya kukomena mwana mwida lyabanyina. Pele taciluzi pe kubangelo ikoonana. Leza uyanda kuti kakoonana buyo mwaalumi amwanakazi ibakwetene buya. Munzila eeyo, ikuti kwazyalwa mwana, imulumi alimwi amukaintu wakwe balakonzya kumulanganya mwana ooyo.

Eelyo bangelo nobakalisandula kuba bantunsi akoonana abanakazi anyika, ibana bakazyalwa bakaba mabbabbani nobakakomena. Bakali basilunya alimwi bakali kubauma bantu. Aboobo Leza wakaleta zambangulwe lipati ilyakanyonyoona babbabbani aabo alimwi abantu boonse bakali babyaabi. Pele wakalailila Nowa kuti ayake bwaato bupati kutegwa afwutule bantu basyoonto ibakali kucita zintu ziluzi. Imwiiyi Mupati wakaamba kuti eeco cakacitika kuciindi ca Zambangulwe cilayandika kuciyeeya.—Matalikilo 6:3, 4, 13, 14; Luka 17:26, 27.

Izambangulwe nolyakasika, sena ulicizyi cakacitika kubangelo babyaabi?— Bakaisamununa mibili yabantunsi njobakalipangilide akupiluka kujulu. Pele tiibakacili bangelo ba Leza pe, bakaba bangelo ba Saatani naa madaimona. Alimwi ino ncinzi cakacitika kubana babo ibabbabbani?— Bakafwa mu Zambangulwe. Abalo bantu boonse ibatakamumvwida Leza bakafwa.

Kuzwa kuciindi ca Zambangulwe, Leza tanaabazumizya bangelo kuba mbuli bantu alimwi. Pele nokuba kuti tatukonzyi kwaabona, imadaimona acipa kuti bantu kabacita zintu zibyaabi. Alijatikizyidwe mumapenzi manji aacitika sunu kwiinda lyoonse. Cili boobu akaambo kakuti akatandwa kuzwa kujulu akusowelwa anyika.

Sena ulikazyi kaambo ncotutakonzyi kwaabona madaimona?— Nkaambo mmyuuya. Pele tulakonzya kusyoma kuti nkwaali ncobeni. Ibbaibbele lyaamba kuti Saatani ‘nguuena bantu boonse munyika,’ alimwi imadaimonaakwe alamugwasya kucita boobo.—Ciyubunuzyo 12:9, 12.

Sena Diabolosi amadaimonaakwe balakonzya kutucenga naa kutweena aswebo?— Inzya, balakonzya ikuti tiitwacenjela. Pele tatweelede kuyoowa pe. Imwiiyi Mupati wakaamba kuti: ‘Diabolosi tajisi nguzu zyakundizunda pe.’ Ikuti katuli balongwe ba Leza lyoonse, uyootukwabilila kuli Diabolosi amadaimonaakwe.—Joni 14:30, Ci.

Cilayandika kapati kuti tuzyibe zintu zibyaabi madaimona nzyaanga atusungilizya kucita. Aboobo kociyeeyela eeci. Nzintu nzi zibyaabi nzyaakacita madaimona naakasika anyika?— Kalitanasika Zambangulwe, akali koonana abanakazi, icintu catakeelede kucitwa abangelo. Sunu madaimona alakkomana eelyo bantu nobatamumvwidi Leza kwiinda mukutautobela mulawo wakoonana. Andikubuzye mubuzyo ooyu, Mbaani balikke ibeelede koonana?— Wavwiila kabotu, balikke bantu bakwetene mbabeelede koonana.

Sunu basankwa bamwi abasimbi ibacili bana-bana baloonana, pele eeci tabeelede kucicita pe. Ibbaibbele litondezya kuti Leza nguwakalenga zizyo zyabwaalumi azyabukaintu. Jehova wakalenga zizyo eezyi zyamubili kutegwa zibeleke mulimo umwi uulibedelede akati kabantu bakwetene balikke. Imadaimona alakkomana eelyo bantu nobacita zintu nzyakasya Jehova. Mucikozyanyo, madaimona alakkomana kapati eelyo musankwa nasobanya zizyo zyabukaintu zyamusimbi aleelyo awalo musimbi nasobanya zizyo zyabwaalumi zyamusankwa. Tatuyandi pe kwaakkomanisya madaimona, tee kayi?—

Kuli acimbi ncaayanda madaimona pele Jehova ncasulide. Sena ulicizyi?— Mbulwani. (Intembauzyo 11:5) Bulwani ndeelyo bantu nobali basilunya alimwi nobacisa bamwi. Koyeeya kuti, eeco ncaakacita mabbabbani, ibana bamadaimona.

Alimwi imadaimona alayanda kukonga bantu. Zimwi ziindi alicengeezya kuba bantu bakafwa. Alimwi mane alakonzya kwiiya majwi aabaabo bafwide. Munzila eeyi, imadaimona alabacenga bantu banji akubapa kusyoma kuti bantu bafwide bacipona alimwi balakonzya kwaambaula abantu bacili baumi. Inzya, imadaimona apa kuti bantu banji kabasyoma kuti zyeelo naa zipuku nkozili.

Aboobo tweelede kucenjela kapati kuti Saatani amadaimonaakwe atatweeni pe. Ibbaibbele licenjezya kuti: ‘Saatani ulasoleka kulicita kuba mbuli mungelo mubotu, alimwi babelesi bakwe balacita mbubwena.’ (2 Ba-Korinto 11:14, 15) Pele mubwini, madaimona mmabi. Atubone mbwaanga asoleka kutusinikizya kuba mbuli ngawo.

Ino nkuukuli bantu nkobayiila bulwani, koonana kutali kwamumulawo, kusyoma mumizimo alimwi azyeelo?— Sena takuli kwiinda mukweebelela mapulogilamu amwi aatondezyegwa aacipekupeku alimwi amumabbasikopo, amukuyanzana abantu babyaabi kucikolo akubaa balongwe babi alimwi akubala mabbuku aamasesya? Sena ikucita zintu eezi kutupa kubaa cilongwe a Leza naa kutupa kuba balongwe ba Diabolosi alimwi amadaimonaakwe? Ino uyeeya buti?—

Ino nguni ngoyeeyela kuti uyanda kuti katumuswiilila alimwi akweebelela zintu zibyaabi?— Ngu Saatani alimwi amadaimonaakwe. Aboobo, ino ncinzi yebo andime ncotweelede kucita?— Tweelede kubala, kuswiilila alimwi akweebelela zintu zikonzya kutugwasya alimwi akutupa kubelekela Jehova. Sena inga wayeeya zintu zimwi zibotu nzyotukonzya kucita?—

Ikuti katucita zintu zibotu, tatweelede kwaayoowa pe madaimona. Jesu ulaanguzu zinji kwiinda madaimona, alimwi alamuyoowa. Bumwi buzuba madaimona akalilila Jesu ategwa: “Sena waboola kuzootunyonyoona?” (Maako 1:24, Ci) Sena tatukakkomani iciindi caakusika cakuti Jesu anyonyoone Saatani amadaimonaakwe?— Calino, tulakonzya kusinizya kuti Jesu unootukwabilila kumadaimona ikuti twazumanana kuba balongwe bakwe alimwi aba Bausyi bakujulu.

Atubale ncotweelede kucita kuli 1 Petro 5:8, 9 alimwi a Jakobo 4:7, 8.

[Cifwanikiso icili apeeji 57]

Ino ncintu nzi cibyaabi ibangelo aaba ncobakacita?

[Cifwanikiso icili apeeji 58]

Nkaambo nzi ncokuli mapenzi manji kapati sunu anyika kwiinda lyoonse?

[Cifwanikiso icili apeeji 60]

Ino ncinzi cinga cacitika ikuti katweebelela balwana aacipekupeku?

[Cifwanikiso icili apeeji 61]

Ino ncinzi cikonzya kutugwasya ncotweelede kucita?