Ino bali bongaye Bakamboni ba Jehova mbomuzyi? Andiza tobamwi tuli basimukobonyoko, babelesinyoko, naa basicikolonyoko. Ambweni twakabandika kale Bbaibbele andinywe. Ino mubwini ndiswe bani, alimwi nkaambo nzi ncotwaambila bantu nzyotusyoma?

Tuli bantu buyo. Tuzwa mubukkale bwiindene-indene. Tobamwi twakali muzikombelo zimbi, alimwi bamwi tiibakali kusyoma muli Leza. Katutanaba Bakamboni, toonse twakasaanguna kuvwuntauzya cakulomya njiisyo zyamu Bbaibbele. (Milimo 17:11) Twakazizumina nzyotwakaiya, mpoonya twakalisalila kukomba Jehova Leza.

Tulagwasyigwa kwiinda mukwiiya Bbaibbele. Mbubwenya mbuli bantu boonse, andiswe tulajana mapenzi alimwi tulalezya. Pele akaambo kakusolekesya kutobela njiisyo zyamu Bbaibbele, twagwasyigwa mubuumi bwesu. (Intembauzyo 128:1, 2) Aaka nkakaambo kamwi kapa kuti katwaambila bantu zintu zibotu nzyotwaiya mu Bbaibbele.

Tulapona kweelana anjiisyo zyamu Bbaibbele. Njiisyo eezyi izili mu Bbaibbele zipa kuti katulimvwa kabotu akulemeka bamwi, katusyomeka akuba alubomba. Zigwasya bantu kupona buumi buli kabotu akubeleka canguzu, alimwi zikulwaizya mikwasyi kukamantana akulilemeka kabotu. Mbwaanga tulisinizyide kuti “Leza tasalululi,” tulimvwa kuti tuli bamukwasyi wanyika yoonse uukamantene akaambo kazintu nzyotusyoma. Nokuba kuti tuli bantu buyo, tuli nkamu iilibedelede.—Milimo 4:13; 10:34, 35.

• Ino muunzila nzi Bakamboni ba Jehova mobakozyenye abantu bambi?

• Ino ninjiisyo nzi Bakamboni nzyobaiya kwiinda mukwiiya Bbaibbele?

Bantu banji bayeeya kuti izina lyakuti Bakamboni ba Jehova ndizina lyacikombelo cipya. Pele myaka iinda ku 2,700 yainda, babelesi ba Leza wakasimpe alikke bakali kwaambwa kuti ‘mbaakamboni’ bakwe. (Isaya 43:10-12) Kaindi twakali kwiitwa kuti Basikwiiya Bbaibbele kusikila mu 1931. Nkaambo nzi ncotwakatalika kwiitwa kuti Bakamboni ba Jehova?

Izina eeli lizyibya Leza wesu. Kweelana amabbuku aakaindi, izina lya Leza lyakuti Jehova, lilajanika ziindi zinji mu Bbaibbele. Muma Bbaibbele manji izina eeli bakaligwisya akutalika kubelesya mabala aabulemu mbuli aakuti Mwami naa Leza. Pele Leza wakasimpe wakamwaambila Musa zina lyakwe limugeme, lyakuti Jehova, kaamba kuti: “Eeli ndezina lyangu lyoonse alyoonse.” (Kulonga 3:15) Munzila eeyi, wakalyaandaanya kubaleza bakubeja boonse. Tulikkomene kwiitwa azina lya Leza lisalala.

Izina eeli lizyibya mulimo ngotucita. Kutalikila kuli Abelo mwaalumi mululami, bantu banji bakaindi bakapa bumboni kujatikizya lusyomo lwabo muli Jehova. Mumyaanda yamyaka yainda, Nowa, Abrahamu, Sara, Musa, Davida, alimwi abamwi bakaba akati ‘kankamu mpati yabakamboni.’ (Bahebrayo 11:4–12:1) Mbubwenya muntu umwi munkuta mbwakonzya kuba kamboni wamuntu wabejekezyegwa mulandu, aswebo tulikanzide kuzyibya kasimpe kujatikizya Leza wesu.

Twiiya Jesu. Bbaibbele limwiita kuti “kamboni uusyomeka alimwi wamasimpe.” (Ciyubunuzyo 3:14) Jesu lwakwe mwini wakaamba kuti ‘wakalizyibya zina lya Leza’ akuzumanana ‘kupa bumboni kujatikizya kasimpe’ kajatikizya Leza. (Johane 17:26; 18:37) Aboobo, basikutobela Kristo beni-beni beelede kwiitwa azina lya Jehova alimwi akulizyibya zina eelyo. Eeci ncencico Bakamboni ba Jehova ncobacita.

• Nkaambo nzi Basikwiiya Bbaibbele ncobakatalika kwiitwa kuti Bakamboni ba Jehova?

• Nciindi cilamfwu buti Jehova ncaajisi bakamboni anyika?

• Nguni Kamboni wa Jehova mupati kwiinda?

Bbaibbele lyakaambila limwi kuti aakufwa Kristo, kuyoobuka bamayi bakubeja akati ka Banakristo bakusaanguna akunyonganya kasimpe kamu Bbaibbele. (Milimo 20:29, 30) Mukuya kwaciindi, eeci ncicakacitika ncobeni. Bakavwelanya njiisyo zya Jesu amizeezo yabukombi iitaluzi, alimwi akutalisya Bunakristo bwakubeja. (2 Timoteyo 4:3, 4) Ino inga twasyoma buti kuti mazuba aano tulacimvwisya cini Bbaibbele ncoliyiisya?

Ciindi cakasika cakuti Jehova ayubunune kasimpe. Wakaambila limwi kuti ‘kuciindi cakumamanino luzyibo lwini-lwini luyoovwula kapati.’ (Daniele 12:4) Mu 1870, kabunga kasyoonto kabasikuyandaula kasimpe kakazyiba kuti njiisyo zinji zyabukombi tiizyakali kweendelana ancaamba Magwalo. Aboobo, bakatalika kuvwuntauzya kutegwa bamvwisye njiisyo zyakusaanguna zyamu Bbaibbele, alimwi Jehova wakabagwasya kwaamvwisya Magwalo.

Baalumi basyomeka bakaliiya Bbaibbele cakubikkila maano. Basikwiiya Bbaibbele aaba, ibakatusaangunina, bakatalisya nzila imwi yakwiiya Bbaibbele yalo njotucibelesya mazuba aano. Bakali kubandika makani aamu Bbaibbele mutwe wamakani ngobasala. Kuti bajana cibalo camu Bbaibbele cimwi cikatazya kumvwa, bakali kulangaula tupango tumwi tupandulula cibalo eeco. Mpoonya bajana bupanduluzi bweendelana a Magwalo oonse, bakali kubulemba. Aboobo, kwiinda mukuzumizya Bbaibbele kuti lilipandulule lilikke, bakakajana alimwi kasimpe kajatikizya zina lya Leza a Bwami bwakwe, makanze aakwe kujatikizya nyika abantu, ciimo cabantu bafwide, alimwi abulangizi bwabubuke. Buvwuntauzi bwabo bwakabaangununa kuzintu zyakubeja nzyobakali kusyoma azilengwa nzyobakali kutobela.—Johane 8:31, 32.

Kuzoosika mu 1879 Basikwiiya Bbaibbele bakazyiba kuti ciindi casika cakumwaya kasimpe nyika yoonse. Aboobo, mumwaka ooyo bakatalika kumwaya magazini ya Ngazi Yamulindizi Yaambilizya Bwami bwa Jehova njotucimwaya asunu. Lino tulakambauka kasimpe kamu Bbaibbele muzisi zili 240 amumyaambo iinda ku 750. Kunyina nilwakavwulide boobu luzyibo lwini-lwini!

• Naakafwa Kristo, ncinzi cakacitika kukasimpe kamu Bbaibbele?

• Ncinzi catugwasya kukajana alimwi kasimpe kali mu Jwi lya Leza?

Kwamyaka minji, Bakamboni ba Jehova bakali kubelesya, kusimba, akumwaya ma Bbaibbele aabusanduluzi bwiindene-indene. Pele twakabona kuti kuyandika kumwaya Bbaibbele lyabusanduluzi bupya likonzya kubagwasya kapati bantu kuba “aluzyibo lwini-lwini lwakasimpe,” kwalo kuli nkuyanda kwa Leza kubantu boonse. (1 Timoteyo 2: 3, 4) Aboobo, mu 1950 twakatalika kumwaya zibeela zya Bbaibbele lyamwaambo wamazuba aano, Busanduluzi Bwanyika Mpya. Ibbaibbele eeli lyasandululwa kabotu mumyaambo iinda ku 130 cakuti lililuzi alimwi lilasyomeka.

Kwakali kuyandika Bbaibbele litakatazyi kumvwa. Mukuya kwaciindi, myaambo ilacinca alimwi ma Bbaibbele manji ajisi mwaambo wakaindi uukatazya kumvwa. Alimwi, mabbuku aakaindi aamba ziluzi kweelana amabbuku aakusaanguna akajanika, calo icapa kuti bamvwisye cini cakali kwaambwa mu Chihebrayo, Chiaramu, a Chigiriki camu Bbaibbele.

Kwakali kuyandika busanduluzi busyomeka kujwi lya Leza. Muciindi cakucinca malembe aa Leza aakasololelwa amuuya, basanduluzi ba Bbaibbele beelede kulemba zyeendelana amagwalo aakusaanguna. Nokuba boobo, muma Bbaibbele manji, zina lya Leza lyakuti Jehova, tiibakalibikka mu Magwalo Aasalala.

Kwakali kuyandika Bbaibbele litembaula Wakalyaanza. (2 Samuele 23:2) Mu Bbaibbele lya Busanduluzi Bwanyika Mpya, izina lya Jehova lyalembwa molijanika ziindi zili 7,000 muma Bbaibbele aakaindi mbubwenya mbokutondezyedwe ansi aawa. (Intembauzyo 83:18) Cakatola myaka minji kuvwuntauzya kutegwa Bbaibbele eeli lilembwe, aboobo lilanonezya kubala akaambo kakuti lilasalazya kwaamba mbwayeeya Leza. Kufwumbwa naa mulilijisi Bbaibbele lya Busanduluzi Bwanyika Mpya mumwaambo wanu naa pe, tumukulwaizya kuba acilengwa cakubala Jwi lya Jehova buzuba abuzuba.—Joshua 1:8; Intembauzyo 1:2, 3.

• Nkaambo nzi ncotwakayandika busanduluzi bupya bwa Bbaibbele?

• Ncilengwa nzi ncayelede kuba ancico buzuba abuzuba muntu uuyanda kuzyiba kuyanda kwa Leza?