Bantu banji bacileka kuunka kuzikombelo akaambo kakuti tabajani busolozi bwakumuuya naa luumbulizyo. Pele, nkaambo nzi ncomweelede kujanika kumiswaangano ya Bunakristo ya Bakamboni ba Jehova? Ncinzi ncomuyoojana ooko?

Lukkomano lwakuba akati kabantu bajisi luyando alimwi balanganya. Mumwaanda wamyaka wakusaanguna, Banakristo bakali kupanga mbungano, alimwi bakali kuswaangana kutegwa bakombe Leza, baiye Magwalo, alimwi akukulwaizyanya. (Bahebrayo 10:24, 25) Akaambo kakuswaangana abantu bajisi luyando, bakali kulimvwa kuti bakali akati kabalongwe beni-beni—ibanyina bakumuuya. (2 Batesalonika 1:3; 3 Johane 14) Tutobela cikozyanyo ca Banakristo bamumwaanda wamyaka wakusaanguna alimwi tulajana lukkomano.

Bubotu bwakwiiya mbotukonzya kubelesya njiisyo zyamu Bbaibbele. Mbubwenya mbobakali kucita kaindi, baalumi, bamakaintu, alimwi abana, boonse balaswaangana antoomwe. Bamayi bacibwene babelesya Bbaibbele kutugwasya kubona mbotukonzya kubelesya njiisyo zili mumo mubuumi bwesu buzuba abuzuba. (Deuteronomo 31:12; Nehemiya 8:8) Baswiilizi balakonzya kutola lubazu mumibandi alimwi akwiimba, calo citupa kutondezya bulangizi bwesu bwa Bunakristo.—Bahebrayo 10:23.

Bubotu bwakuyumya lusyomo lwanu muli Leza. Mwaapostolo Paulo wakaambila mbungano imwi kuti: “Ndilayandisisya kumubona, . . . kutegwa kube kuyumizyanya kwiinda mulusyomo lwaumwi amweenzinyina, nkokuti lwanu alwangu.” (Baroma 1:11, 12) Kumiswaangano, ikuyanzana lyoonse abakombima kuyumya lusyomo lwesu alimwi akutugwasya kuzumanana kupona buumi bwa Bunakristo.

Twamutamba kuti mukajanike kumuswaangano wambungano uutobela kutegwa mukalibonene zintu eezyi. Muyootambulwa amaanza obilo. Miswaangano yoonse tiibbadelelwi—kunyina milumbo iibwezyegwa.

• Ino tutobela cikozyanyo cani notucita miswaangano yesu yambungano?

• Mbuti mbotukonzya kugwasyigwa kwiinda mukujanika kumiswaangano ya Bunakristo?

Nokuba kuti tulakonzya kwiinda muzyoonde ziyoosya naa kweenda muzuba lipya kapati naa mumpeyo, tulajanika kumiswaangano ya Bunakristo lyoonse. Nokuba kuti kuli buyumuyumu mubuumi alimwi akukatala akaambo kamilimo yabuzuba abuzuba, nkaambo nzi Bakamboni ba Jehova ncobasolekesya kuyanzana abakombinyina?

Kupa kuti katulimvwa kabotu. Kujatikizya baabo mbotuyanzana limwi mumbungano, Paulo wakalemba kuti: “Katubikkilana maano.” (Bahebrayo 10:24) Majwi aaya aamba kuti tweelede kuzyibana kabotu. Aboobo, majwi amwaapostolo atukulwaizya kuti tweelede kubabikkila maano bamwi. Kwiinda mukuzyiba mikwasyi imwi ya Banakristo, tuyoojana kuti bamwi bakabuzunda buyumuyumu bukozyenye ambotujisi, aboobo balakonzya kutugwasya kuliyumya.

Kupa kuti tuyumye zilongwe nzyotujisi. Kumiswaangano yesu, tulabungana abalongwe beni-beni. Zimwi ziindi, tulajana ciindi cakuyanzana antoomwe muzyakulikondelezya zili kabotu. Ino kuyanzana kuli boobu kutugwasya buti? Kutuyiisya kubona umwi aumwi munzila iili kabotu, alimwi eeci cipa kuti katuyandana kapati. Ciindi bakombima nobajisi mapenzi, tulalyaaba kubagwasya akaambo kakuti cilongwe cesu nciyumu. (Tusimpi 17:17) Kwiinda mukuyanzana abantu boonse mumbungano, tutondezya kuti ‘tulabikkilana maano.’—1 Bakorinto 12:25, 26.

Tumukulwaizya kuba abalongwe aabo bacita kuyanda kwa Leza. Muyoobajana balongwe bali boobu akati ka Bakamboni ba Jehova. Mwalombwa kuti mutalekeli cintu cili coonse kumukasya kuyanzana andiswe.

• Nkaambo nzi ncocitugwasya kuyanzana antoomwe kumiswaangano?

• Ino ndilili nomuyanda kuyakwiizyiba mbungano yesu?

Miswaangano njobakali kucita Banakristo bakusaanguna yakali kubikkilizya nyimbo, mipailo, kubala alimwi akubandika Magwalo, pele tiiyakali kubikkilizya tunsiyansiya. (1 Bakorinto 14:26) Muyoojana cikozyenye aceeci kumiswaangano yesu.

Malailile azwa mu Bbaibbele alimwi alagwasya. Kumamanino aansondo, ibamumbungano imwi aimwi balabungana kuswiilila Makani aa Bbaibbele aamaminiti aali 30, aatuyiisya kuzyiba mbwaatugwasya Magwalo mubuumi bwesu alimwi azintu zicitika muziindi nzyotupona. Toonse tukulwaizyigwa kutobelezya mu Bbaibbele lyesu. Amana makani aaya, kulaba Ciiyo ca “Ngazi Yamulindizi,” cicitwa muwoola lyomwe alimwi basimbungano balaangulukide kutola lubazu mumubandi uuzwa mucibalo ciyiigwa cili mu Ngazi Yamulindizi yakwiiya. Ooyu mubandi utugwasya kutobela busolozi bwamu Bbaibbele mubuumi bwesu. Cibalo ncoona eeci cilayiigwa mumbungano ziinda ku 110,000 nyika yoonse.

Tulagwasyigwa kuba bamayi bacibwene kuyiisya. Alimwi tulaswaangana mukati kansondo mupulogilamu iijisi zibeela zyotatwe iitwa kuti Buumi Amulimo Wesu wa Bunakristo, iiyeeme amakani aapegwa amwezi mu Kabbuku Kamuswaangano Wabuumi Amulimo Wesu wa Bunakristo. Cibeela cakusaanguna ca Mbono Izili mu Jwi lya Leza citugwasya kucizyiba kabotu cibeela camu Bbaibbele basimbungano ncobakabala kakucili ciindi. Mpoonya, cibeela cakuti Amusungwaale Mumulimo Wamumuunda cilabikkilizya azitondezyo izitondezya mbotukonzya kubandika makani aamu Bbaibbele abantu. Sikupa lulayo ulabikkila maano mumbazu oomo motuyandika lugwasyo kutegwa tuyaambele mukubala alimwi akukanana kabotu. (1 Timoteyo 4:13) Cibeela camamanino, icakuti Kupona Buumi bwa Bunakristo, cilanga-langa mbotukonzya kuzibelesya njiisyo zyamu Bbaibbele mubuumi bwesu. Cibeela eeci cilabikkilizya amubandi wakubuzya akwiingula uutugwasya kulimvwisya Bbaibbele.

Mwaakujanika kumiswaangano yesu, cakutadooneka muyookkomana anzyomuyakwiiya kuzwa mu Bbaibbele.—Isaya 54:13.

• Ncinzi ncomulangila kuyoomvwa kumiswaangano ya Bakamboni ba Jehova?

• Muswaangano nzi wesu uucitwa nsondo ansondo ngomuyanda kuyoojanika?

Sena mwabona muzifwanikiso zili mubroshuwa eeyi mbobasamide kabotu Bakamboni ba Jehova nobali kumiswaangano yabo yambungano? Nkaambo nzi ncotubikkila maano kunsamino yesu?

Kutondezya bulemu kuli Leza wesu. Mubwini, Leza tabikkili buyo maano mbotulibonya. (1 Samuele 16:7) Aboobo, ciindi notubungana kuti tumukombe, ncotuyanda kuzwa ansi amoyo nkutondezya bulemu kulinguwe akubakombima. Ikuti twayandika kwiima kumbele lyamubetesi munkuta, tuyoobikkila maano kunsamino yesu kutegwa tumulemeke akaambo kacuuno caatala ncajisi. Mbubwenya buyo, mbotulibonya kumiswaangano citondezya kuti tulamulemeka “Mubetesi wanyika yoonse,” Jehova Leza, alimwi abusena mbotubelesya kumukomba.—Matalikilo 18:25.

Kutondezya njiisyo nzyotutobela mubuumi. Ibbaibbele likulwaizya Banakristo kusama “cabulemu alimwi acakulibatamika” mbuli baabo “balyaabide kuli Leza.” (1 Timoteyo 2:9, 10) Kusama “cabulemu” caamba kutasama zisani zyakuti tubonwe, zibangalala, naa zikonzya kubusya muzeezo wakoonana. Alimwi ‘kubatama’ kutugwasya kusala zisani zili kabotu alimwi akutaciindizya munsamino yesu. Njiisyo eezyi zitondezya kuti tulakonzya kusama zisani ziindene-indene nzyotuyanda. Kakunyina akwaamba majwi, mbotulibonya cilakonzya “kutembaula kuyiisya kwa Mufwutuli wesu” alimwi ‘akulemeka Leza.’ (Tito 2:10; 1 Petro 2:12) Kwiinda mukusama kabotu kumiswaangano, tugwasya bamwi kububona kabotu bukombi bwa Jehova.

Tamweelede kuleka kujanika ku Ŋanda ya Bwami akaambo kakuti tamujisi zisani zyeelela. Tatuyandiki zisani zidula buya kutegwa tulibonye kabotu.

• Nkaambo nzi ncociyandika kubikkila maano kunsamino yesu notukomba Leza?

• Ninjiisyo nzi zitugwasya kusala zisani nzyotweelede kusama?

Ikuti naa mwiiya Bbaibbele a Bakamboni ba Jehova, ambweni mulalibambila cibalo cimwi acimwi kakucili ciindi. Kutegwa mugwasyigwe kapati, mweelede kucita mbubwenya oobu kamutanaunka kumiswaangano yambungano. Bubotu bulakonzya kulibonya ikuti caba cilengwa cesu kucita boobo.

Amuzyibe nkomweelede kubalila alimwi aciindi. Ino ndilili nomukonzya kubikkila maano? Sena mafwumofwumo kamutanatalika milimo yabuzuba abuzuba, naa kumangolezya, ibana baunka kukoona? Nokuba kuti tamukonzyi kubala kwaciindi cilamfwu, amuzandule ciindi ncomukonzya kubala, alimwi mutalekeli cintu cili coonse kumunyonganya. Amuyandaule busena buumwine, alimwi amugwisye zintu zyoonse zikonzya kumusabila mbuli wailesi, cipekupeku, alimwi afooni. Kupaila kamutanatalika kubala kulakonzya kumugwasya kuleka kulibilika kutegwa mubikkile maano ku Jwi lya Leza.—Bafilipi 4:6, 7.

Amweenge bwiinguzi, alimwi akulibambila kuyootola lubazu. Amusaangune kwaamvwisya makani aali mucibalo. Amulange-lange mutwe wacibalo, amubone tutwe tusyoonto mbotujatene amutwe, alimwi amulange-lange zifwanikiso amibuzyo yakwiinduluka iikankaizya twaambo tupatipati. Mpoonya amubale muncali umwi aumwi, akujana bwiinguzi kumubuzyo uusimbidwe. Amubone akubala magwalo aatazubuludwe, akuyeeya mbwaajatene atwaambo tuli mucibalo. (Milimo 17:11) Mwabujana bwiinguzi, amweenge mabala aayandika mumuncali, aayoomugwasya kuyeeya bwiinguzi lyamiswaangano. Kumane, lyamiswaangano mulakonzya kwiingula mumajwi aanu ikuti kamuyanda.

Kwiinda mukulanga-langa makani aaindene-indene aabandikwa kumiswaangano mvwiki amvwiki, muyakuyungizya mizeezo mipya “muciyobwedo” canu caluzyibo lwamu Bbaibbele.—Matayo 13:51, 52.

• Ncilengwa nzi ncomukonzya kuba ancico cakulibambila miswaangano?

• Mbuti mbomukonzya kulibambila kuyootola, lubazu kumiswaangano?

Kuzwa kaindi, Jehova uyanda kuti mukwasyi umwi aumwi kaujana ciindi cakuba antoomwe, kuyumya cilongwe cabo a Jehova, alimwi akuyumya cilongwe akati kabo. (Deuteronomo 6:6, 7) Nkakaambo kaako Bakamboni ba Jehova ncobakasalila buzuba bomwe mumvwiki kuti mbwakukomba mumukwasyi—kababandika cakulikwaya zintu zyakumuuya ziyandika mumukwasyi. Nokuba kuti mukkala nyolikke, ciindi eeci mulakonzya kucibelesya kuyumya cilongwe canu a Leza kwiinda mukuba aciiyo ca Bbaibbele canu ncomwalisalila.

Nciindi cakuyumya cilongwe a Jehova. “Amuswene kuli Leza, eelyo awalo ulaswena kulindinywe.” (Jakobo 4:8) Tulamuzyiba kabotu Jehova notwiiya zinji kujatikizya bube bwakwe alimwi ambwacita zintu kwiinda mu Jwi lyakwe, Ibbaibbele. Nzila nguba-uba yakutalika kukomba mumukwasyi nkusaanguna kubala Bbaibbele cakupozya antoomwe, ambweni kutobela mulongo wansondo ansondo wa Muswaangano Wabuumi Amulimo. Cibeela cimwi cakubala cilakonzya kupegwa kumunamukwasyi umwi aumwi, mpoonya nyoonse mulakonzya kubandika ncomwaiya kuzwa mu Magwalo.

Nciindi cakuyumya cilongwe akati kabanamukwasyi. Bamalumi abamakaintu, bazyali alimwi abana, balayumya cilongwe cabo nobabala Bbaibbele antoomwe mbuli mukwasyi. Ceelede kuba ciindi cikkomanisya, caluumuno alimwi ncobeelede kulangila boonse ansondo. Kweelana aziimo zyabana babo, bazyali balakonzya kusala zibalo zigwasya ambweni muzibalo zili mu Ngazi Yamulindizi naa Sinsimuka! naa kuzwa awebbusaiti yesu ya jw.org. Mulakonzya kubandika penzi ndyobakajana bana banu kucikolo ambobakonzya kulimana. Ambweni mulakonzya kweebelela pulogilamu iitondezyegwa a JW Broadcasting (tv.jw.org) mpoonya akubandika antoomwe. Mulakonzya kulibambila nyimbo ziyakwiimbwa kumiswaangano, mpoonya mwamana kukomba mumukwasyi mulakonzya kulya twakulya tuuba-uba antoomwe.

Eeci ciindi cilibedelede ncomuba ancico nsondo ansondo kukomba Jehova antoomwe ciyoobagwasya boonse mumukwasyi kukkomanina Jwi lya Leza, alimwi uyookulongezya kapati kusolekesya kwanu.—Intembauzyo 1:1-3.

• Nkaambo nzi ncotuba aciindi cakukomba mumukwasyi?

• Mbuti bazyali mbobakonzya kupa kuti ciindi eeci kacikkomanisya kuli boonse mumukwasyi?

Nkaambo nzi bantu aaba ncobalibonya kukkomana? Bali kumuswaangano wesu umwi mupati. Mbubwenya mbuli babelesi ba Leza kaindi, bakalailidwe kuswaangana ziindi zyotatwe mumwaka, andiswe tulakulangila kuswaangana antoomwe munkamu mpati. (Deuteronomo 16:16) Mwaka amwaka, tulaakuba amiswaangano yotatwe: miswaangano yabbazu yobilo yabuzuba bomwe, alimwi amuswaangano wacooko wamazuba otatwe. Mbuti mbotugwasyigwa amiswaangano eeyi?

Iyumya bunyina bwesu bwa Bunakristo. Mbubwenya mbuli bana Israyeli mbobakali kukkomana kutembaula Jehova “mumbungano mpati” andiswe tulakkomana kumukomba antoomwe kumiswaangano yaalubazu. (Intembauzyo 26:12; 111:1) Miswaangano eeyi ipa coolwe cakuyanzana a Bakamboni bazwa kumbungano zimbi naa kumasi aambi. Aciindi cakulyookezya, tulakkomana kulida antoomwe mubusena buswaanganinwa, calo cipa kuti kube muuya waluyando kumiswaangano eeyi. (Milimo 2:42) Ooku nkotubonena luyando ndobajisi ‘baciinga coonse cabakwesu’ munyika.—1 Petro 2:17.

Ilatugwasya kuyaambele kumuuya. Bana Israyeli alimwi bakagwasyigwa nkaambo “bakaamvwisya majwi” aamu Magwalo ngobakapandulwidwa. (Nehemiya 8:8, 12) Andiswe tulalumba akaambo kamalailile aamu Bbaibbele ngotutambula kumiswaangano yesu mipati. Pulogilamu imwi aimwi inga iyeeme amutwe wamu Magwalo. Kwiinda mumakani aakondelezya, makani aakusiilana, alimwi azitondezyo, tulaiya mbotukonzya kucita kuyanda kwa Leza mubuumi bwesu. Tulakulwaizyigwa notumvwa zyakuluula zyabaabo ibakaliyumya mubuyumuyumu mbobakajana akaambo kakuba Banakristo muziindi eezyi zikatazya. Kumiswaangano yacooko, zisobano zilatugwasya kuzimvwisya zibalo zili mu Bbaibbele alimwi akutuyiisya ziiyo zigwasya. Kumiswaangano mipati yoonse, kulaba kubbapatizyigwa kwabaabo bayanda kutondezya kulyaaba kwabo kuli Leza.

• Nkaambo nzi miswaangano mipati ncoikkomanisya?

• Mbuti mbomukonzya kugwasyigwa kwiinda mukujanika kumuswaangano mupati?

Kali afwaafwi kufwa, Jesu wakaambilizya kuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.” (Matayo 24:14) Pele mbuti mulimo ooyu wanyika yoonse mbowakali kuyoobelekwa? Kwiinda mukutobela cikozyanyo ncaakatusiila Jesu naakali anyika.—Luka 8:1.

Tulabaunkila bantu mumaanda aabo. Jesu wakayiisya basikwiiya bakwe kukambauka makani mabotu kuŋanda aŋanda. (Matayo 10:11-13; Milimo 5:42; 20:20) Bakambausi aaba bamumwaanda wamyaka wakusaanguna bakapedwe zilawo zigaminide zyakukambaukila. (Matayo 10:5, 6; 2 Bakorinto 10:13) Mbubwenya buyo amazuba aano, mulimo wesu wakukambauka ubambidwe kabotu, alimwi mbungano imwi aimwi ilipedwe cilawo cakubelekela. Eeci citugwasya kuzuzikizya mulawo wa Jesu ‘wakukambaukila bantu akupa bumboni cakulomya.’—Milimo 10:42.

Tulasola kuunkila bantu kufwumbwa nkobakonzya kujanika. Alimwi Jesu wakatupa cikozyanyo kwiinda mukukambaukila bantu mumasena aabuleya, mbuli kumbali aalwizi naa kumugoti nkobakali kuteka maanzi. (Marko 4:1; Johane 4:5-15) Andiswe tulabandika abantu kujatikizya Bbaibbele kufwumbwa nkotukonzya kubajana—mumigwagwa, mumasena aamakwebo, naa mumasena aakulyookezyela, alimwi aafooni. Alimwi tulakambauka kuli basimukoboma, babelesima, basicikoloma, alimwi abasazima ikuti bukkale kabuzumizya. Kubelesya nzila eezyi ziindene-indene kwapa kuti mamiliyoni aabantu nyika yoonse bamvwe “makani mabotu aalufwutuko.”—Intembauzyo 96:2.

Sena kuli muntu ngomuyeeya ngomuyanda kukambaukila makani mabotu aa Bwami bwa Leza alimwi amakani aayo ncaamba kujatikizya bulangizi bwabo bwakumbele? Amubaambile bamwi mulumbe wabulangizi mbomwaumvwida buyo!

• Ino ‘makani nzi mabotu’ aayelede kukambaukwa?

• Mbuti Bakamboni ba Jehova mbobaiya nzila zya Jesu zyakukambauka?

Bbala lyakuti “painiya” ziindi zinji lyaamba baabo bayandaula zilawo zipya akujalula nzila yakuti bamwi batobele. Jesu wakali mbuli mupainiya, wakatumwa anyika kuzikubeleka mulimo uupa buumi alimwi akujalula nzila yalufwutuko. (Matayo 20:28) Mazuba aano, basikumutobela balamwiiya kwiinda mukubelesya ciindi cabo cinji ‘kugwasya bantu kuba basikwiiya.’ (Matayo 28:19, 20) Ibamwi basala kutola lubazu mumulimo ngotwiita kuti mulimo wabupainiya.

Mupainiya muntu uukambauka ciindi coonse. Boonse Bakamboni ba Jehova mbaasikumwaya bamakani mabotu. Pele bamwi babambulula bukkale bwabo kutegwa babeleke kabali bapainiya baciindi coonse, kubeleka mawoola aali 70 mumulimo wakukambauka mwezi amwezi. Kutegwa bacikonzye kucita oobo, banji bacesya ciindi cakubeleka mulimo wabo wakumubili. Bamwi balasalwa kutegwa babeleke kabali bapainiya baalubazu kumasena kuyandika bakambausi ba Bwami. Balabeleka mawoola aali 130 naa kwiinda waawo mumulimo wakukambauka mwezi amwezi. Bapainiya balakkutila abuumi bwabo, kabajisi lusyomo lwakuti Jehova uyoobapa nzyobayandika mubuumi. (Matayo 6:31-33; 1 Timoteyo 6:6-8) Aabo batakonzyi kucita bupainiya bwaciindi coonse balabeleka kabali bapainiya bakugwasyilizya ciindi nobakonzya, alimwi balabeleka mawoola aali 30 naa 50 amwezi.

Mupainiya muntu uukulwaizyigwa aluyando ndwajisi kuli Leza akubantu. Mbubwenya mbuli Jesu, tujana kuti bantu banji mazuba aano balayandisya kuzyiba Leza alimwi amakanze aakwe. (Marko 6:34) Pele tulijisi luzyibo lukonzya kubagwasya neliba lino, kubapa bulangizi buyumu bwakumbele. Ikuyanda basimukobonyina nkokupa kuti mupainiya aabe ciindi cakwe anguzu mukugwasya bamwi kuzyiba makani mabotu. (Matayo 22:39; 1 Batesalonika 2:8) Kwiinda mukucita oobo, lusyomo lwakwe lulayumizyigwa, ulaba acilongwe ciyumu a Leza, alimwi ulakkomana kapati.—Milimo 20:35.

• Ino mupainiya inga mwamupandulula buti?

• Ncinzi cipa kuti bamwi bacite bupainiya bwaciindi coonse?

Kuzwa kaindi, lwiiyo luzwa kuli Leza ncintu cipati kapati akati ka Bakamboni ba Jehova. Lwiiyo lwaalubazu lulapegwa kuli baabo balyaaba mumulimo wa Bwami waciindi coonse kutegwa ‘bauzuzikizye cakumaninina mulimo wabo.’—2 Timoteyo 4:5.

Cikolo Camulimo Wabupainiya. Kumamanino aamwaka wamulimo wakusaanguna wamupainiya, mupainiya ulalembwa kunjila cikolo camazuba aali cisambomwe, calo cikonzya kucitilwa a Ŋanda ya Bwami iili afwaafwi. Makanze aacikolo eeci ngakugwasya bapainiya kuba acilongwe ciyumu a Jehova, akuba basungu mumbazu zyoonse zyamulimo, akuzumanana kuubeleka cakusyomeka mulimo.

Cikolo Cabakambausi ba Bwami. Cikolo eeci icitola myezi yobilo cakapangilwa kugwasya bapainiya bacibwene balibambilide kusiya munzi wabo akuyoobelekela kubusena buli boonse bubulide. Baamba kuti “Ndime aano! Kondituma!” ikwiiya Mukambausi mupati wakabeleka anyika, Jesu Kristo. (Isaya 6:8; Johane 7:29) Kusiya munzi wanu kutegwa mukabelekele kulaale kuyandika kucinca akutalika kupona buumi buuba-uba. Zilengwa, kucinca kwamboyuunga myuwo, alimwi azyakulya inga kazisiyene anzyomuzyibide. Ambweni inga kwayandika kwiiya mwaambo mupya. Cikolo eeci cigwasya bakwesu batakwete abacizyi batakwetwe alimwi abanabukwetene bajisi myaka iili 23 kusika ku 65, kuba abube bubotu bwakumuuya mbobayooyandika mumulimo wabo uuyakupa kuti babelesyegwe cakumaninina a Jehova alimwi ambunga yakwe.

Cikolo ca Gileadi. Mu Chihebrayo, ibbala lyakuti “Gileadi” lyaamba “Mulwi wa Bumboni.” Kuzwa ciindi nocakatalika cikolo ca Gileadi mu 1943, basicikolo ibakanjila cikolo eeci ibali 8,000 bakatumwa kabali bamisyinali kuyookambauka “kusikila kumagolelo aanyika” alimwi bazwidilila. (Milimo 13:47) Ciindi basicikolo ibakanjila cikolo eeci nobakasika ku Peru ciindi cakusaanguna, kwakanyina mbungano mucisi eeci. Lino kuli mbungano ziinda ku 1,000. Ciindi bamamisyinali nobakatalika kubelekela ku Japan, Bakamboni ibakaliko mucisi eeci tiibakali kusika ku 10. Pele lino balainda ku 200,000. Lwiiyo lwacikolo ca Gileadi ilutola myezi yosanwe lulabikkilizya kwiiya Ijwi lya Leza cakulomya. Aabo babeleka kabali bapainiya baalubazu, bamamisyinali, ibabelekela mumaofesi aamitabi, naa ibali mumulimo wabbazu balatambwa kucikolo eeci kutegwa bayiisyigwe cakulomya mbobakonzya kugwasya alimwi akuyumya mulimo ooyu wanyika yoonse.

• Ino Cikolo Camulimo Wabupainiya cijisi makanze nzi?

• Ino mbaani beelede kunjila Cikolo Cabakambausi ba Bwami?