Cibeela 2—Kupona Buumi bwa Bunakristo

Kwiinda muciiyo canu ca Bbaibbele, mwazyiba ncayanda Jehova kulindinywe alimwi ambomukonzya kupona kweelana azyeelelo zyakwe ziluleme. Kutegwa mutobele nzyomwaiya, kweelede kuti mwakacinca mumbazu ziindene-indene zyabukkale bwanu alimwi ambomububona buumi. Lino mbwaanga mukanzide kupona kweelana azyeelelo zya Jehova ziluleme, mulakonzya kumubelekela Leza munzila iitambulika kamuli mukambausi wamakani mabotu.

Ikwiinduluka mibuzyo iitobela kulamugwasya kuzibikka mumizeezo zyeelelo zya Jehova ziluleme alimwi akumuyeezya zintu zimwi nzyomukonzya kucita kutegwa mweelele kuba umwi wababelesi bakwe mbakkomanina. Imakani aaya alamupa kubona mbociyandika kapati kucita zintu zyoonse kamujisi manjezyeezya mabotu alimwi akumulemeka Jehova.—2Kor. 1:12; 1Tim. 1:19; 1Pet. 3:16, 21.

Mbomwasika waawa mukwiiya Bbaibbele, tacidoonekwi buya kuti muliyandide kulibombya kubweendelezi bwa Jehova alimwi akuba cibeela cambunga yakwe. Mibuzyo alimwi a Magwalo aabikkidwe zilamugwasya kulilingula akubona ncomuzyi kujatikizya kulibombya kububambe bwa Jehova, mube mumbungano, mumukwasyi, naa kujatikizya bweendelezi bwamfwulumende zyamunyika eeyi. Cakutadooneka eeci cilamupa kumulumba kapati Jehova akaambo kabubambe bwakwe bwakuyiisya akuyumya bantu bakwe kumuuya. Bubambe oobu bubikkilizya miswaangano yambungano ooko nkomukonzya kujanika akutola lubazu kweelana abukkale bwanu.

Kuyungizya waawo, cibeela eeci cibandika mbociyandika kutola lubazu lyoonse mumulimo wakukambauka Bwami, nkokuti ikugwasya bamwi kumuzyiba Jehova alimwi ancali mukucitila bantu. (Mt. 24:14; 28:19, 20) Kumane cilamugwasya kubona kulyaaba kwanu kuli Jehova Leza alimwi alubbapatizyo lwanu mbwaali makani mapati. Mulakonzya kusyoma kuti Jehova ulalumba kuti mwalutambula camoyo woonse luzyalo ndwaamutondezya.

1. Ino Banakristo batobela ceelelo nzi caboola kumakani aacikwati? Ino nkaambo nzi kalikke kamu Magwalo ikazumizya kulekana?

• “Sena tiimwakabala kuti ooyo wakabalenga kuzwa kumatalikilo, wakalenga mwaalumi amukaintu alimwi wakati: ‘Akaambo kaceeci mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe’? Nkokuti tabacili bobilo, pele baba mubili omwe. Aboobo aabo Leza mbaaswaanganya kutabi muntu uubaandaanya. . . . Kufwumbwa uuleka mukaintu wakwe ikutali akaambo kabwaamu, akukwata umbi, wacita bumambe.”—Mt. 19:4-6, 9.

2. Nkaambo nzi aabo ibakkala antoomwe kabali mulumi amukaintu ncobeelede kuti kabakwetene mumulawo? Ikuti naa mulikwete naa mulikwetwe, sena muli masimpe kuti cikwati canu ncamumulawo alimwi cilizyibidwe kumfwulumende?

• “Kozumanana kubayeezya kuti kabalibombya akuti kabazimvwida mfwulumende abaabo bajisi nguzu zyabweendelezi.”—Tit. 3:1.

• “Cikwati acilemekwe abantu boonse, alimwi bulo bwacikwati butasofwaazyigwi pe, nkaambo Leza uyoobabeteka basibwaamu abasimamambe.”—Heb. 13:4.

3. Ino mujisi lubazu nzi mumukwasyi?

• “Mwanaangu, swiilila lulayo lwabauso, alimwi utaubyi-ubyi mulawo wabanyoko.”—Tus. 1:8.

• “Mulumi ngomutwe wamukaintu wakwe mbubonya Kristo mbwali mutwe wambungano . . . Nobalumi, amuzumanane kubayanda bakaintu banu, mbubonya awalo Kristo mbwaakayanda mbungano.”—Ef. 5:23, 25.

• “Nomausyi, mutanoobanyemyi bana banu pe, pele amuzumanane kubalela mululayo alwiiyo lwa Jehova.”—Ef. 6:4.

• “Nywebo nobana, amubamvwide bazyali banu muzintu zyoonse, nkaambo eeci cilakkomanisya mu Mwami.”—Kol. 3:20.

• “Anywebo nobakaintu, amulibombye kubalumi banu.”—1Pet. 3:1.

4. Ino nkaambo nzi ncotweelede kubulemeka buumi?

• “Walo [Leza] mwini nguupa bantu boonse buumi, muya alimwi azintu zyoonse. . . . Nkaambo walo nguutupa buumi, kweenda akupona.”—Mil. 17:25, 28.

5. Nkaambo nzi ncotuteelede kujaya muntu, kubikkilizya amwana uuli mwida?

• “Ikuti baalumi balwana akucisa mukaintu uulaada . . . ikuti naa kwacitika ntenda, nkokuti uyoolunga buumi kubuumi.”—Kul. 21:22, 23.

• “Meso aako akandibona nindakacili nsalalila; zizo zyangu zyoonse zyakalilembedwe mubbuku lyako amazuba nozyakabambwa, kakutanaba cizo nociba comwe akati kazyo.”—Int. 139:16.

• ‘Jehova ulaasulaika maanza aatila bulowa bwabantu banyina mulandu.’—Tus. 6:16, 17.

6. Mulawo nzi ngwabikkide Leza kujatikizya bulowa?

• ‘Amuzumanane kutantamuka bulowa azintu zisinidwe.’—Mil. 15:29.

7. Nkaambo nzi ncotweelede kubayanda bakwesu alimwi abacizyi Banakristo?

• “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo. Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Joh. 13:34, 35.

8. Kutegwa bambi bataciswi bulwazi butambukila ibukonzya kujaya bamwi: (a) Ino nkaambo nzi muntu uuciswa bulwazi oobo ncateelede kuba nguwe uutalika kutondezya zitondezyo zyabulongwe, mbuli kukumbata bamwi naa kubamyonta? (b) Nkaambo nzi ncateelede kunyema ikuti naa bamwi basala kuti batamutambi kumaanda aabo? (c) Nkaambo nzi muntu uulangilwa kuti wakali mubukkale bukonzya kumupa kuba abulwazi butambukila ncayelede kulisungula kuyoopimwa katanatalika kweebana? (d) Nkaambo nzi muntu uuciswa bulwazi butambukila ncayelede kuzyibya sicuuno wakabunga kabaalu makani aayo katanabbapatizyigwa?

• “Mutabi acikwelete nociba comwe kumuntu uuli woonse, ccita buyo cikwelete cakuyandana. . . . ‘Weelede kuyanda simukobonyoko mbubonya mbuli mboliyanda omwini.’ Uuyanda simukobonyina takonzyi kumubisizya.”—Rom. 13:8-10.

• “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Flp. 2:4.

9. Nkaambo nzi Jehova ncayanda kuti katulekelelana?

• “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo.”—Kol. 3:13.

10. Ncinzi ncomweelede kucita ikuti Munakristonyoko wamubejekezya naa kumuunina?

• “Ikuti munyoko wakubisizya, koya ukamwaambile ncaalubizya kamuli nyobilo. Ikuti wakuswiilila, nkokuti wamupilusya munyoko. Pele kuti takuswiilili, utolelezye muntu omwe naa bobilo, kutegwa kubumboni bwabakamboni bobilo naa botatwe makani oonse akasinizyigwe. Ikuti naa tabaswiilili, ambila mbungano. Ikuti naa taiswiilili noiba mbungano, aabe kulinduwe mbubonya mbuli muntu wamasi alimwi ambuli simutelo.”—Mt. 18:15-17.

11. Mbuti Jehova mbwazibona zibi eezyi?

▪ Bwaamu

▪ Kukomba mituni

▪ Baalumi boona baaluminyina

▪ Kubba

▪ Kubbeja

▪ Kukolwa

• “Mutalyeeni pe. Basibwaamu, basikukomba mituni, basimamambe, baalumi boonwa abaaluminyina, baalumi boona baaluminyina, babbi, basyaacivwulemwangu, bakolwi, basimatusi alimwi azigwebenga, tabakanjili mu Bwami bwa Leza.”—1Kor. 6:9, 10.

12. Kujatikizya bwaamu, kwalo ikubikkilizya amicito iindene-indene yakoonana ikutali kwamumulawo, ino mujisi makanze nzi?

• “Amubutije bwaamu!”—1Kor. 6:18.

13. Nkaambo nzi ncotweelede kutantamuka kubelesya misamu yoonse iikola naa iinyonganya mizeezo iitali yabusilisi?

• “Mutuule mibili yanu kaili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano. Alimwi amuleke kutobela ziyanza zyabweende bwazintu obuno, pele amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.”—Rom. 12:1, 2.

14. Micito nzi yamadaimona njakasya Leza?

• “Takweelede kujanwa akati kanu . . . muŋanga, simasalamuzi, sibusangu, mulozi, simabibo, muntu uubuzya makani kubaŋanga, simaloto naa muntu uubuzya makani kubafwu.”—Dt. 18:10, 11.

15. Ikuti umwi wacita cibi cipati, pele uyanda kugwasyigwa kubukulusya cilongwe cakwe a Jehova, ncinzi ncayelede kucita cakufwambaana?

• “Ndakalyaambilila cibi cangu kulinduwe; tiindakausisa mulandu wangu. Ndakati: ‘Ndilalyaambilila nsotoko zyangu kuli Jehova.’”—Int. 32:5.

• “Sena kuli uuciswa akati kanu? Aite baalu bambungano, eelyo abamupailile akumunanika mafwuta muzina lya Jehova. Eelyo mupailo walusyomo ulamuponya ooyo uucisidwe, alimwi Jehova ulamubusya. Kunze lyaboobo, ikuti naa wakacita zibi, ulalekelelwa.”—Jak. 5:14, 15.

16. Ikuti mulijisi bumboni bwakuti Munakristonyoko wakacita cibi cipati, ino ncinzi ncomweelede kucita?

• “Ikuti muntu wabisya mukuti tanaamba cibi ncaakacita muntu umwi, ciindi naamvwa kwaambilizya kubuleya kwakuti muntu umwi acitile bumboni kukaambo aaka, kakuli mubwini walo ngukamboni naa wakalibonena ameso naa kuli ncazyi kujatikizya cibi eeco, nkokuti uyoosubulwa akaambo kamulandu wakwe.”—Lev. 5:1.

17. Ikuti naa kwaambilizyigwa kuti muntu umwi tacili umwi wa Bakamboni ba Jehova, ino tweelede kucita buti kujatikizya muntu ooyo?

• “Muleke kuyanzana amuntu uuli woonse uutegwa mukwesu pele sibwaamu, syaacivwulemwangu, sikukomba mituni, simatusi, mukolwi, naa cigwebenga, alimwi mutasoli nokuba kulya amuntu uuli boobo.”—1Kor. 5:11.

• “Ikuti umwi waboola kulindinywe alimwi kataleti njiisyo eeyi, mutasoli pe kumutambula mumaanda aanu naa kumwaanzya.”—2Joh. 10.

18. Nkaambo nzi ncomweelede kusala balongwe ibamuyanda Jehova?

• “Ooyo weenda abasongo ulaba musongo, pele ooyo uuyanzana abafwubafwuba ulajana mapenzi.”—Tus. 13:20.

• “Muteenwi pe. Kuyanzana abantu babyaabi kunyonganya zilengwa zibotu.”—1Kor. 15:33.

19. Nkaambo nzi Bakamboni ba Jehova ncobatatoli lubazu mutwaambo twacisi?

• “Tabali banyika mbubonya andime [Jesu] mbonditali wanyika.”—Joh. 17:16.

20. Nkaambo nzi ncotweelede kumvwida mfwulumende?

• “Muntu uuli woonse kalibombya kubeendelezi, nkaambo kunyina bweendelezi bukonzya kuba ccita kuti bwazumizyigwa a Leza; ibeendelezi aabo ibali muzyuuno zyaandeene-andeene balizumizyidwe a Leza.”—Rom. 13:1.

21. Ikuti naa kwaba kuteendelana akati kamilawo ya Leza alimwi amilawo yabantu, ino ncinzi ncomukonzya kucita?

• “Tweelede kumvwida Leza mbwali mweendelezi kutali bantu.”—Mil. 5:29.

22. Magwalo nzi aakonzya kumugwasya kuzumanana kulyaandaanya anyika ciindi nomusala mulimo?

• “Cisi tacikanyamuni panga kulwana cisinyina, alimwi tabakaiyi limbi nkondo pe.”—Mik. 4:3.

• “Amuzwe mulinguwe [Babuloni Mupati], nobantu bangu, ikuti kamutayandi kujatikizyigwa azibi zyakwe, alimwi ikuti kamutayandi kusikilwa zipenzyo zyakwe zimwi.”—Ciy. 18:4.

23. Nzyakulikondelezya zili buti nzyomweelede kusala alimwi anzyomweelede kutantamuka?

• ‘Kufwumbwa muntu uuyanda nkondo Jehova ulimusulide.’—Int. 11:5.

• “Amusesemwe acintu cibi; amukakatile kucibotu.”—Rom. 12:9.

• “Kufwumbwa zintu zyamasimpe, kufwumbwa zintu ziyandika kapati, kufwumbwa zintu ziluleme, kufwumbwa zintu zisalala, kufwumbwa zintu ziyandwa, kufwumbwa zintu zilaampuwo mbotu, kufwumbwa zintu zili kabotu, alimwi kufwumbwa zintu zyeelela kutembaulwa, kamuzumanana kuziyeeyesya zintu eezyi.”—Flp. 4:8.

24. Nkaambo nzi Bakamboni ba Jehova ncobatakombi azikombelo zimbi?

• “Tamukonzyi kunoolida ‘atebulu lya Jehova’ alimwi aatebulu lyamadaimona.”—1Kor. 10:21.

• “‘Amulyaandaanye,’ mbwaamba Jehova, ‘alimwi amuleke kuguma cintu cisofweede’; ‘eelyo ndiyoomutambula.’”—2Kor. 6:17.

25. Ninjiisyo nzi izikonzya kumugwasya kubona naa muleelede kutola lubazu mukusekelela pobwe limwi?

• “Bakayanzana abamasi akutalika kutobela zilengwa zyabo. Bakali kubelekela mituni yabo, eelyo eeyi yakababeda kakole.”—Int. 106:35, 36.

• “Bafwide tabazyi cintu nociba comwe.”—Muk. 9:5.

• “Tabali banyika mbubonya andime mbonditali wanyika.”—Joh. 17:16.

• “Musyule oomu mwakajisi ciindi cinji cakucita kuyanda kwabamasi nimwakali kweenda mubukkale busesemya, muluunyaunya lwakutalijata, mukuciindizya kunywa makoko, mumapobwe aateendelezyeki, mukuzundana kunywa makoko amukukomba mituni kukasyidwe amulawo.”—1Pet. 4:3.

26. Mbuti zikozyanyo zyamu Bbaibbele mbozikonzya kumugwasya kubona naa muleelede kusekelela mazuba aakuzyalwa?

• “Buzuba bwatatu bwakali buzuba bwakusekelela kuzyalwa kwa Farao alimwi wakabacitila pobwe babelesi bakwe boonse, eelyo wakaangununa silutwe uutola zyakunywa kumwami asilutwe uupanga zinkwa kabalangilila babelesi bakwe. Aboobo wakapilusya silutwe uutola zyakunywa kumwami acuuno cakwe cakutola zyakunywa . . . Pele silutwe uupanga zinkwa wakamwaanzika acisamu.”—Matl. 40:20-22.

• “Nobakali kusekelela buzuba bwakuzyalwa kwa Heroda, mwana musimbi wa Herodiya wakabazyanina kabotu beenzu akumukkomanisya kapati Heroda cakuti wakamusyomezya kwiinda mukukonka kuti ulamupa kufwumbwa ncatiilombe. Mpoonya walo mukutobela nzyobakamwaambila banyina wakati: ‘Amundipe lino aawa mutwe wa Johane Mubbapatizi mumutiba.’ Aboobo wakatuma bantu ibakaunka kuyoomukosola mutwe Johane muntolongo.”—Mt. 14:6-8, 10.

27. Nkaambo nzi ncomuyanda kutobela busolozi bwabaalu?

• “Kamubamvwida aabo basololela akati kanu alimwi kamulibombya, nkaambo balanganya ndinywe kabali baabo ibayoobuzyigwa makani, ikutegwa kabacita oobu cakukondwa ikutali cakuusa pe, nkaambo eeci inga camuletela mapenzi.”—Heb. 13:17.

28. Nkaambo nzi ncociyandika kapati kulindinywe alimwi amukwasyi wanu kujana ciindi cakubala alimwi akwiiya Bbaibbele lyoonse?

• “Ukkomanina mulawo wa Jehova, alimwi ulabala mulawo wakwe caansaansi syikati amasiku. Uyooba mbuli cisamu cisimpidwe kumbali aatulonga twamaanzi, icisamu cizyala micelo muciindi ceelede, icijisi matuvwu aataneti. Zyoonse nzyacita ziyoozwidilila.”—Int. 1:2, 3.

29. Nkaambo nzi ncomukukkomanina kujanika kumiswaangano alimwi akutola lubazu?

• “Ndiyakwaambilizya zina lyako kubakwesu; akati kambungano ndiyookutembaula.”—Int. 22:22.

• “Katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe, mbuli bamwi ibajisi ciyanza eeci, pele katukulwaizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.”—Heb. 10:24, 25.

30. Mulimo nzi mupati ngwaakatupa Jesu?

• “Aboobo kamuya mukayiisye bantu bazisi zyoonse kuti babe basikwiiya, akubabbapatizya . . . , mukabayiisye kutobela zintu zyoonse nzyondakamulailila.”—Mt. 28:19, 20.

31. Ciindi notusanga kumulimo wa Bwami naa kugwasyilizya bakwesu abacizyi, muuya nzi uumukkomanisya Jehova ngotweelede kuba anguwo?

• “Kolemeka Jehova azintu zyako ziyandisi.”—Tus. 3:9.

• “Umwi aumwi acite mbuli mbwaasala mumoyo wakwe, ikutali kupa kumoyo kakusiya naa cakusinikizyigwa buya, nkaambo Leza uyanda muntu uupa kumwi kakkomene.”—2Kor. 9:7.

32. Mapenzi nzi Banakristo ngobalangila kujana?

• “Balikkomene aabo bapenzyegwa akaambo kabululami, nkaambo Bwami bwakujulu mbubwabo. Mulikkomene nywebo ciindi bantu nobamusampaula akumupenzya akumubejelezya zintu zibi ziindene-indene akaambo kandime. Amukondwe akusekelela, mbwaanga bulumbu bwanu mbupati kujulu, nkaambo mbubonya oobo mbubakabapenzya basinsimi ibakamusaangunina.”—Mt. 5:10-12.

33. Nkaambo nzi ncocili coolwe cilibedelede kuba umwi wa Bakamboni ba Jehova uubbapatizyidwe?

• “Majwi aako akajanwa, eelyo ndakaalya; Ijwi lyako lyakandipa kusekelela akukondwa mumoyo wangu, nkaambo ndiitwa azina lyako, O Jehova Leza wamakamu.”—Jer. 15:16.