Muswaangano wacooko mu 1919 wakapa bumboni bupati bwakuti bantu ba Leza lino bakaangununwa kuzwa ku Babuloni Mupati
TUBBOKESI TWAKUYIISYA 9B
Nkaambo Nzi Mu 1919?
Ino nkaambo nzi ncotwaambila kuti bantu ba Leza bakaangununwa kuzwa mubuzike ku Babuloni Mupati mu 1919? Businsimi bwiindene-indene bwamu Bbaibbele alimwi azintu zicitika kuzwa kaindi zilatugwasya kusika antaamu yakwaamba boobu.
Businsimi bwamu Bbaibbele alimwi azintu zicitika kuzwa kaindi zilatondezya kuti Jesu wakatalika kulela mbuli Mwami kujulu mu 1914, kutondezya matalikilo amazuba aamamanino abweende bwazintu bwa Saatani aano anyika. Ino ncinzi Jesu ncaakacita mbwaakabeda buyo Mwami? Sena campoonya-mpoonya wakabaangununa babelesi bakwe baanyika kuzwa mubuzike ku Babuloni Mupati? Sena wakasala “muzike uusyomeka alimwi uucenjede” mu 1914 alimwi akutalika mulimo mupati wakutebula?—Mt. 24:45.
Cakutadooneka tiicakali boobo pe. Amuyeeye kuti mwaapostolo Petro wakasololelwa amuuya kulemba kuti lubeta lwakali ‘kuyootalikila aŋanda ya Leza.’ (1Pet. 4:17) Mbubwenya buyo, musinsimi Malaki awalo wakasinsima kujatikizya ciindi Jehova naakali kuyooboola kuŋanda yakwe yakukombela kali ‘amutumwa wacizuminano,’ Mwana wa Leza. (Malk. 3:1-5) Eeci cakali kuyooba ciindi cakusalazyigwa akusunkwa. Sena zintu zyakacitika kuzwa kaindi zileendelana azitondezyo zyabusinsimi eezyi?
Inzya zileendelana! Kuzwa mu 1914 kusikila kumatalikilo aa 1919, eeci cakali ciindi cikatazya camasunko akusalazyigwa kuli Basikwiiya Bbaibbele, kweelana ambobakazyibidwe Bakamboni ba Jehova kuciindi eeco. Mu 1914, bantu ba Leza banji anyika bakatyompwa ciindi mamanino aabweende bwazintu oobu naatakasika kweelana ambobakali kulangila. Kutyompwa ooko kwakakomena kapati mu 1916 ciindi naakafwa Charles T. Russell, ooyo iwakali kusololela cabusungu akati kabantu ba Leza. Ibamwi ibakaciindizya kapati kusyoma Mukwesu Russell bakabukazya caantangalala busolozi bwa Joseph F. Rutherford, ooyo iwakanjila mubusena bwa Russell. Kwakaba kwaandaana alimwi kwakasyeede buyo asyoonto kuti mbunga yaandaane mu 1917. Mpoonya mu 1918, kulibonya kuti kwiinda mukuyunga kwabasololi babukombi, Mukwesu Rutherford alimwi abali ciloba mbaakali limwi bakabetekwa, bakajaninwa mulandu akutolwa kuntolongo. Maofesi mapati ku Brooklyn akajalwa. Cilisalede kuti, bantu ba Leza tiibakaninga kwaangununwa kuzwa mu Babuloni Mupati!
Nokuba boobo, ino ncinzi cakacitika mu 1919? Zintu zyakaile kucinca mukulaba kwaliso! Kumatalikilo aamwaka, Rutherford ambaakali limwi bakaangununwa muntolongo. Mpoonya cakufwambaana bakazumanana amulimo! Kalitanalampa, kwakabikkwa bubambe bwamuswaangano wacooko, alimwi magazini mpya iitegwa The Golden Age, (mazuba aano iitwa kuti Sinsimuka!) yakali kulangilwa kumwaigwa. Magazini mpya eeyi yakabambidwe kusumpula bukambausi mumulimo wakubuleya. Kuyungizya waawo, mumbungano imwi aimwi mulangizi wakasalwa kutegwa ayendelezye akusumpula mulimo. Mwaka nguwenya ooyo, pepa litegwa Bulletin (mazuba aano litegwa Buumi Amulimo Wesu wa Bunakristo—Kabbuku Kamuswaangano) lyakamwaigwa kutegwa ligwasye mumulimo wakukambauka.
Ino ncinzi cakacitika? Cakutadooneka, Kristo wakabaangulula bantu bakwe kuzwa mubuzike ku Babuloni Mupati. Wakasala muzike wakwe uusyomeka alimwi uucenjede. Mulimo wakutebula wakalitalikide. Kuzwa buyo mumwaka uuyandika kapati ooyo mu 1919, mulimo ooyu wazumanana kuyaambele munzila iikondelezya kapati.