CIIYO 36
Amusyomeke Muzintu Zyoonse
Toonse tuyanda balongwe basyomeka. Awalo Jehova ulayanda kuti balongwe bakwe kabasyomeka. Pele eeci tacili cuuba-uba munyika mwalo bantu banji mobatasyomeki. Mbubotu nzi buboola akaambo kakusyomeka muzintu zyoonse?
1. Nkaambo nzi kayandika kapati ncotweelede kusyomeka?
Ciindi notusyomeka kuli bamwi, tutondezya Jehova kuti tulamuyanda alimwi akumulemeka. Amubone kaambo aaka: Jehova ulizizyi zintu zyoonse nzyotuyeeya alimwi azyeezyo nzyotucita. (Bahebrayo 4:13) Ulabona ciindi notusala kusyomeka alimwi ulakkomana. Ijwi lyakwe lyaamba kuti: “Nkaambo muntu mumpelenge ncisesemyo kuli Jehova, pele balulami mbabajisi cilongwe ciyumu anguwe.”—Tusimpi 3:32.
2. Muunzila nzi motweelede kusyomeka buzuba abuzuba?
Jehova uyanda kuti ‘katwaambilana zyamasimpe kuli umwi amweenzinyina.’ (Zekariya 8:16, 17) Ino eeci caamba nzi? Caamba kuti, kufwumbwa naa twaambaula aabanamukwasyi, babelesima, Banakristoma naa beendelezi bamfwulumende, tatweelede kubaambila makani aakubeja. Bantu basyomeka tabababbidi bamwi naa kubacenga. (Amubale Tusimpi 24:28 alimwi a Baefeso 4:28.) Alimwi balatela mitelo yoonse njobeelede kutela. (Baroma 13:5-7) Munzila eezyi alimwi azimwi, ‘tulasyomeka muzintu zyoonse.’—Bahebrayo 13:18.
3. Mbubotu nzi buboola akaambo kakusyomeka?
Kuti katujisi mpuwo yakusyomeka, bantu banootusyoma. Mbubwenya mbuli mukwasyi ulaaluyando, tugwasyilizya bantu boonse mumbungano kulimvwa kukwabililwa. Tulaba amanjezeezya aasalala. Alimwi kusyomeka kwesu kulakonzya ‘kutembaula kuyiisya kwa Mufwutuli wesu, Leza’ alimwi akukwelelezya bamwi kubukombi bwakasimpe.—Tito 2:10.
AMWIIYE ZINJI
Amubone kusyomeka mbokumujatikizya Jehova alimwi andinywe, akwiiya mbomukonzya kusyomeka mubukkale bwiindene-indene.
4. Kusyomeka kulamukkomanisya Jehova
Amubale Intembauzyo 44:21 alimwi a Malaki 3:16, akubandika mibuzyo eeyi:
Nkaambo nzi ncomuyeeya kuti tacili camaano kusyoma kuti tulakonzya kusisa makani aamasimpe?
Ino muyeeya kuti Jehova ulimvwa buti kuti twasala kwaamba masimpe, nociba ciindi nocikatazya kucita boobo?
Ciindi bana nobaamba masimpe, balabakkomanisya bazyali babo. Ciindi andiswe notwaamba masimpe, tulamukkomanisya Jehova
5. Amusyomeke ciindi coonse
Banji bayeeya kuti tacikonzyeki kusyomeka lyoonse. Pele amubone kaambo ncotweelede kusyomeka lyoonse. Atweebelele VIDIYO.
Amubale Bahebrayo 13:18, akubandika mbotukonzya kusyomeka . . .
kumukwasyi wesu.
kumulimo naa kucikolo.
mubukkale bumbi.
6. Kusyomeka kulatugwasya
Kumatalikilo, cilakonzya kulibonya mbuli kuti kusyomeka kunjizya mumapenzi. Pele ncecintu ciinda kubota ncomukonzya kucita. Amubale Intembauzyo 34:12-16, akubandika mubuzyo ooyu:
Mbuti kusyomeka mbokumupa kuba abuumi buli kabotu?
Balumi abamakaintu basyomeka bayumya cikwati cabo
Babelesi basyomeka balasyomwa abasikubalemba mulimo
Balelwa ibasyomeka baba ampuwo mbotu kubeendelezi bamfwulumende
BAMWI BAAMBA KUTI: “Kubeja kumwi nkusyoonto kapati cakuti taaku ambokubede.”
Nkaambo nzi ncomusyoma kuti Jehova takuyandi kubeja?
MUBUFWAAFWI
Jehova uyanda kuti balongwe bakwe kabasyomeka muzintu zyoonse nzyobaamba akucita.
Ncinzi Ncomwaiya?
Muunzila nzi motukonzya kusyomeka?
Nkaambo nzi ncocitali camaano kuyeeya kuti inga twasisa makani aamasimpe?
Nkaambo nzi ncomuyanda kusyomeka lyoonse?
AMUZYIBE ZINJI
Mbuti bazyali mbobakonzya kuyiisya bana babo kusyomeka?
Mbubotu nzi buboola kwiinda mukuzuzikizya zisyomezyo zyesu?
Atubone naa tuleelede kutela mitelo nokuba kuti taibelesyegwi kabotu.
“Mitelo—Sena Mweelede Kwiitela?” (Ngazi Yamulindizi, September 1, 2011)
Ncinzi cakagwasya mwaalumi umwi iwatakali kusyomeka kucinca bukkale bwakwe akutalika kusyomeka?
“Ndakaiya Kuti Jehova Ulaaluse Alimwi Ulalekelela” (Ngazi Yamulindizi, May 1, 2015)