Sena Leza Ulajanika Kuli Koonse?
Bantu banji mbobaingula:
◼ “Ulajanika kuli koonse amuzyintu zyoonse. Uli mbuli muya.”
◼ “Tali muntu mwini-mwini, ninguzu buyo zitalibonyi.”
Ino ncinzi Jesu ncaakaamba?
◼ “Muŋanda ya-Taata mwaali makalilo manji.” (Johane 14:2) Mucikozyanyo, Jesu wakaamba kuti Leza ulijisi ŋanda naa busena bwakukkala.
◼ “Ndakazwa kuli-Taata, ndakeza ansi. Alimwi ndiisia nyika, ndilaya kuli-Taata.” (Johane 16:28) Jesu wakali kusyoma kuti Leza Muntu mwini-mwini alimwi kuli nkwakkala.
JESU kunyina naakaamba kuti Leza ninguzu buyo zitalibonyi. Muciindi caboobo, wakali kwaambaula a Leza akupaila kuli nguwe. Bunji bwaziindi wakali kwaamba Jehova kuti Mbausyi bakujulu, ibbala litondezya kuti wakali kumvwana a Leza.—Matayo 6:14, 26, 32.
Masimpe kuti “takukwe muntu uwakabona Leza” alimwi akuti “Leza ngo-Muuya.” (Johane 1:18; 4:24) Pele eeci tacaambi kuti tajisi mubili uuli woonse pe. Ibbaibbele litwaambila kuti: “Kuti naa mpuuli mubili wabuntunsi, nkokuti mpuuli amubili wamuuya.” (1 Bakolinti 15:44, BT) Aboobo, sena Jehova ulaamubili wamuuya?
Inzya. Jesu naakabusyigwa, “wakanjila kujulu kwini buya, kuti akapompe kubusyu bwa-Leza, nkaambo kandiswe.” (Ba-Hebrayo 9:24) Eeci cituyiisya twaambo tobilo tuyandika kapati kujatikizya Leza. Cakusaanguna, kuli nkwakkala. Cabili ncakuti Leza Muntu mwini-mwini, tazyili buyo nguzu zitalibonyi zijanika koonse-koonse.
Aboobo, ino mbuti Leza mbwakonzya kweendelezya zyintu zyoonse? Leza ulakonzya kutuma muuya wakwe kubusena buli boonse. Mbweena usyi bana mbwakonzya kujatilila mwanaakwe nobaya bweenda, Leza ubelesya muuya uusalala kuzuzikizya makanze aakwe.—Intembauzyo 104:30; 139:7.
Akaambo kakuti Leza Muntu, kuli zyintu nzyayanda anzyatayandi. Aboobo, ulakonzya kukkomana naa kucimwa. Ibbaibbele litwaambila kuti ulabayanda bantu bakwe, ulaikkomanina milimo njacita, tayandi kuti bantu kabakomba mituni alimwi tabuyandi bubi. (Matalikilo 6:6; Deuteronomo 16:22; 1 Bami 10:9; Intembauzyo 104:31) Kulugwalo lwa 1 Timoteo 1:11 kweelana a New World Translation waambwa kuti ngu “Leza uukkomene.” Nkakaambo kaako Jesu ncaakaamba kuti tweelede kumuyanda Leza amoyo wesu woonse.—Marko 12:30.a
Bupanduluzi buyungizidwe
a Ikuti kamuyanda twaambo atumwi kujatikizya makani aaya, amubone cibalo 1 mubbuku lyakuti, Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.
Majwi aakwelelezya sikubala aali apeeji 5]
Mbweena usyi bana mbwakonzya kujatilila mwanaakwe nobaya bweenda, Leza ubelesya muuya uusalala kuzuzikizya makanze aakwe