Sena Leza Ulandibikkila Maano?
Bantu banji mbobaingula:
▪ “Leza muntu uulemekwa kapati aboobo taalanganyi mapenzi aangu.”
▪ “Ndiyeeya kuti tandibikkili maano.”
Ino ncinzi Jesu ncaakaamba?
▪ “Sena tuyuni tosanwe tatuulwa makobili obile? Eno kulintuto taakwe nekaba komwe akalubidwe kuli-Leza. Anu nywebo, aalo masusu aakumitwe yanu alibalidwe oonse. Mutayoowi, mulayandika kwiinda tuyuni tunjitunji.” (Luka 12:6, 7) Cakutadooneka, Jesu wakali kuyiisya kuti Leza ulatubikkila maano.
▪ “Mutalibiliki cakwaamba kuti, Tukalyenzi? Tukanywenzi? Tukasamenzi? Nkaambo nzeezi zyoonse nzibayandaula bamasi, alimwi Usowanu uuli kujulu ulizi kuti zintu ezi zyoonse zilayandwa kulindinywe.” (Matayo 6:31, 32) Jesu wakalizyi kuti Leza ulizyizyi nzyotuyanda.
IBBAIBBELE lyaamba kuti Leza ulatubikkila maano. (Intembauzyo 55:22; 1 Petro 5:7) Ikuti naa ulatubikkila maano, nkaambo nzi ncotupengela boobu mazuba aano? Ikuti Leza ulatuyanda alimwi ulaanguzu kapati, nkaambo nzi ncataamani mapenzi?
Bwiinguzi bujatikizya kaambo kazyibidwe kubantu banji—Saatani Diabolosi ngomweendelezi wanyika eeyi mbyaabi. Naakali kumusunka Jesu, Saatani wakamupa bwami boonse bwamunyika akumwaambila kuti: “Ndakupa bwami obu boonse abulemu bwazyo, nkaambo ndabupegwa, eno kufumbwa ngwenyanda inga ndamupa mbubo. Kuti wandikomba, boonse bulaba bwako.”—Luka 4:5-7.
Nguni wakapa kuti Saatani kaendelezya nyika? Ciindi bazyali besu bakusaanguna ba Adamu a Eva nobakamumvwida Saatani akuunduluzya mulawo wa Leza, bakasala Saatani kuba mweendelezi wabo. Kuzwa ciindi Adamu a Eva nibakazanga, Jehova Leza wamupa ciindi Saatani cakweendelezya, pele waalilwa. Jehova tatusinikizyi kuti katumukomba, nokuba boobo watupa coolwe cakuti katumvwana anguwe.—Ba-Roma 5:10.
Akaambo kakuti Leza ulatubikkila maano, wakapa kuti Jesu atwaangulule kubweendelezi bwa Saatani. Kumbele, Jesu ‘uyakumunyonyoona ooyo uujisi nguzu zyalufwu nkokuti Saatani.’ (Ba-Hebrayo 2:14) Kwiinda mukucita boobo uya ‘kujaya milimo ya Saatani.’—1 Johane 3:8.
Nyika eeyi iyakuba paradaiso alimwi. Kuciindi eeco Leza “uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:4, 5.a
Bupanduluzi buyungizidwe
a Kutegwa mujane twaambo tumwi tuyungizyidwe akuzyiba kaambo Leza ncazumizya kupenga amubone cibalo 11 mubbuku lyakuti, Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.
Majwi aakwelelezya sikubala aali apeeji 8]
Nyika eeyi iyakuba paradaiso alimwi