Bantu Baku Myanmar Bakajatikizyigwa Aguwo Pati Bakagwasyigwa
MU MAY 2, 2008 nguwo lipati liitwa kuti Nargis lyakabasikila bantu baku Myanmar alimwi lyakanyonyoona kapati cakuti makani akamvwugwa munyika yoonse.a Bantu batandila ku 140,000 bakafwa naa kusweeka inguwo eeli nolyakaungila nkowaandanina mulonga wa Irrawaddy kuya mulwizi.
Cikkomanisya ncakuti mumasena aaya mwakali nguwo eeli Bakamboni ba Jehova banji kunyina nobakalicisa. Bakafwutuka akaambo kakuti bakaccijila mu Maanda aabo aa Bwami aayakidwe kabotu. Kubusena bumwi Bakamboni bali 20 abasimunzi bamwi bali 80 bakalikkede aciluli ca Ŋanda ya Bwami kwamawoola aali 9 meenda naakasika amamita aali 4 acisela kuya mujulu. Boonse bakafwutuka. Mukubula coolwe, bantu bali 300 bakafwa mumunzi ooyu. Maanda akamwaika muminzi minji, kwakasyaala buyo Maanda aa Bwami.
Nokwakainda mazuba obilo kalili lyacitika kale nguwo eeli, bakuofesi yamutabi ya Bakamboni ba Jehova ku Yangon bakatuma bantu kutegwa bakagwasye mbungano yaku Bothingone iili kunkomwe yalwizi. Nobakali kuunka ku Bothingone bakainda nzila iitali kabotu. Bakali kujana mitunta yabantu alimwi bakali kuyaabuyuba bakabwalala. Nokuba boobo bakasika azyintu nzyobakajisi mbuli mupunga, meenda amakkendulo. Bakali bakusaanguna kusika kubusena oobu. Nibakabapa zyintu nzyobakatoleezya, bakapa makani aa Bbaibbele akubakulwaizya. Kumane bakabasiila mabbuku ama Bbaibbele mbwaanga zyintu zyoonse nzyobakajisi zyakaunka ameenda.
Cikkomanisya ncakuti, Bakamboni aaba nibakasweekelwa zyintu zyabo tiibakatyompwa pe. Kamboni umwi mumbungano iili ku Irrawaddy wakaamba kuti: “Zyintu zyesu zyoonse zyaunka ameenda. Maanda eesu oonse amwaika. Zisyango zyoonse zyaloba. Meenda aakunywa aba atombe. Nokuba boobo, bakwesu abacizyi tabalibilikide mbuli bantu bamwi. Balamusyoma Jehova ambunga yakwe. Tulilibambide kutobela malailile oonse ngobalaatupe, abe aakutwaambila kukkala mumunzi naa kuzwa.”
Inkamu ya Bakamboni bali 30 ibakasweekelwa zyintu zyoonse, bakali kwiimba nyimbo zya Bwami nibakali kweenda musinzo wamawoola aali kkumi kwaakubweza zyakulya, zyakusama amatente ngobakaleta basikugwasyilizya. Kabatanasika nkubakali kuunka, bakamvwa kuti muswaangano wabbazu wa Bakamboni ba Jehova ulacitwa mudolopo lili afwaafwi. Bakayeeya kuti anzyina baswaangane kutegwa bakulwaizyigwe akuyanzana a Banakristonyina.
Mucooko coonse cakajatikizyidwe aguwo pati eeli, maanda aali 35 a Bakamboni ba Jehova ngaakamwaika, aali 125 akanyonyooka buyo asyoonto alimwi Maanda aa Bwami aali 8 ngaakali kuyandika kubambululwa buyo aniini. Mucoolwe, maanda aamutabi tanaakamwaika.
Nolyakamana guwo, kunyina wakali kukonzya kusika kumutabi naa kuzwa akaambo kakuti masamu aakali kuwa akajala nzila. Nokwakainda buyo mawoola masyoonto, bantu bakkala amutabi bainda ku 30 bakatalika kugusya masamu aakali munzila. Nobakali kubeleka, bantu bakali kweebelela bakagambwa. Muciindi buyo cisyoonto, nkaamu yabamakaintu Bakamboni bakaleta zyakunywaanywa amicelo kuli baabo bakali kubeleka abasimukobonyina ibakali kweebelela. Simubweza twaambo umwi naakabona cakali kucitika, wakabuzya kuti, “Mbaani aaba babeleka cabunkutwe?” Nibakamwaambila kuti Mbaakamboni, wakaamba kuti: “Nicali cibotu ikuti bantu boonse nibali kubelekela antoomwe mbuli Bakamboni ba Jehova.”
Kakunyina akusowa ciindi, Bakamboni bakabamba tubunga tobilo kutegwa tulange-lange zyintu nzyobali kuyandika bantu bakajatikizyigwa aguwo mumasena aaindene-indene. Myaanda-myaanda yabakwesu bakalisungula kubeleka mutubunga ootu. Mumazuba buyo masyoonto, Bakamboni ibakasweekelwa maanda bakayakilwa aambi. Nkamu imwi yabasikugwasya niyakaunka kuya kuyaka ŋanda ya Kamboni umwi, basimukobonyina bakaide kulamwa. Simukobonyina umwi wakati: “Amubone, ooyu mukaintu walo bamuyakila ŋanda bacikombelo cakwe. Pele mebo kunyina naba omwe wakucikombelo cangu ca Buddhist waboola kuzyi kundigwasya. Anu nindakaba buyo Kamboni liya naakandikambaukila.”
Ciindi basikuyaka alimwi abaabo bali mukabunga kabasikugwasyilizya nibakasika kuti balange-lange ŋanda ya Kamboni umwi yakanyonyooka buyo aniini mudolopo lya Thanlyn, bakakulwaizyigwa ciindi bamukwasyi wa Kamboni ooyu nibakabaambila kuti: “Taaku penzi, ŋanda yesu ili buyo kabotu. Inga twakkala mweena muno. Bakamboni bamwi tabajisi amaanda. Aboobo kamuya mukabagwasye.”
Mubusena bumwi ku Yangon, bantu bamwi bakali kuyanda kuyubila mucikombelo cimwi. Pele bakajana kuti cijazyo cakali kkiidwe. Eeci cakabanyemya cakuti bakali kuyanda kucipwaya cijazyo. Mukwiimpana abacikombelo eeci, Bakamboni ba Jehova bakagwasya bantu banji kuyubila mu Maanda aa Bwami nokwakali guwo. Mucikozyanyo, kudolopo lya Dala, Bakamboni bamwi banabukwetene bakanjizya bantu bali 20 mu Ŋanda ya Bwami ibakali kuccija guwo. Nobwakaca, mikwasyi eeyi yakanyina maanda alimwi bakafwa nzala. Mulumi wakajana muntu umwi kasambala mupunga kumane wakaula ukkwana bantu boonse.
Bamukwasyi umwi ku Yangon Mbaakamboni ba Jehova kakuli bamwi baunka kuzikombelo ziindene-indene. Nolyakainda guwo, mukwasyi woonse wakaunka kwaakuswaangana ku Ŋanda ya Bwami. Nkaambo nzi? Umwi wamumukwasyi wakaamba kuti: “Bacikombelo cesu bakaamba kuti baya kuboola kuzyi kutuswaya yaakumana guwo, pesi tiibakaboola. Bakamboni buyo mbabakaboola. Mwakatupa mupunga ameenda. Muliindene abazikombelo zimwi.” Ibamwi bamukwasyi ibatali Bakamboni bakazikkomanina nzyobakamvwa muciiyo ca Ngazi Yamulindizi cakajisi mutwe wakuti, “Jehova Ulamvwa Notukwiila Kulomba Kugwasyigwa” alimwi banji akati kabo mane bakatola lubazu.
Mukaintu umwi iwakali kwiiya Bbaibbele a Bakamboni ba Jehova wakaunka kumiswaangano nokwakainda mvwiki yomwe kalili lyamana kale guwo. Kumuswaangano ooyu, kwakabalwa lugwalo lwakazwa kuofesi yamutabi ilwakali kwaamba mbobakagwasyigwa bantu alimwi azyakuluula zyabaabo bakafwutuka guwo lipati. Lugwalo nolwakali kubalwa, mukaintu ooyu wakatalika kulila. Wakakkomana kumvwa kuti Bakamboni boonse bakabajana alimwi bakali buyo kabotu. Kumane mukaintu ooyu bakamupa zyintu zyakuligwasya akumubikkila tente munsi aŋanda yakwe. Wakaamba kuti Bakamboni bakamubamba kabotu.
Jesu wakaamba kuti: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Johane 13:35) Alimwi sikwiiya Jakobo wakakankaizya kaambo kakuti lusyomo lwini-lwini lweelede kutondezyegwa kwiinda mukucita milimo mibotu. (Jakobo 2:14-17) Bakamboni ba Jehova balaabikkila maano majwi aaya alimwi balasoleka kutondezya luyando luli boobu kwiinda mukugwasya bantu bapengede.
Bupanduluzi buyungizidwe
a Ibbuku lyakuti The Encyclopædia Britannica lyaamba kuti: “Kucooko ca Atlantic aku Caribbean, guwo eeli kanji-kanji balyaamba kuti hurricane kakuli masi aali kumbo kwa America akucisi ca China babelesya bbala lyakuti typhoon.”
Majwi aakwelelezya sikubala aali apeeji 11]
Ibbaibbele lyaamba kuti lusyomo lwiini-lwini lweelede kutondezyegwa kwiinda mukucita milimo mibotu