Amundipe Bbodela Limbi Lyabukoko

BA Allen bakatalika kunywa bukoko cakwiindilizya nibakajisi myaka iili 11 yakuzyalwa.a Balo abeenzyinyina bakali kusobanina musyokwe, kabayiya bantu mbobakali kubona mucipekupeku. Bantu mbobakali kweebelela mucipekupeku tiibakali kunywa bukoko bwini-bwini, pele bukoko mbobakali kunywa ba Allen abeenzyinyina bwakali bwini-bwini.

Ba Tony bakali kunywa buyo bbodela lyomwe naa obilo aabukoko kumangolezya, pele nibakakkwanya myaka iili 40 bakayungizya akutalika kunywa mabbodela aali musanu naa cisambomwe abuzuba. Pele mukuya kwaciindi bakali kunywa kapati cakuti tiibakali kukonzya kwaabala mabbodela aabukoko ngobakali kunywa abuzuba.

Ba Allen bakalomba lugwasyo kuti bacileke kuciindizya kunywa bukoko. Ba Tony bakalukaka lugwasyo ndobakapegwa abamukwasyi alimwi abeenzyinyina. Ba Allen nkobacili asunu alimwi balatwaambila zyakabacitikila; ba Tony bakafwa myaka yainda muntenda yamumugwagwa akaambo kakukolwa.

Nokuba kuti muntu inga kali alikke nanywa bukoko, pele ikuciindizya kunywa kulakonzya kupa kuti bantu bamwi bapenge kapati. Kunywa bukoko citaambiki nkokupa kuti bantu kabatukila, kulwana, kuciswa, kujayana, ntenda zyamumugwagwa alimwi antenda zicitikila amulimo amapenzi aamwi. Kuciindizya kunywa bukoko kupa kuti bantu kabasowa mali manji amwaka, abalo basikunywa bukoko balapenga mumizeezo kubikkilizya abamukwasyi.

Ba National Institutes of Health baku United States bakaamba kuti, “tabali boonse bantu ibanywa bukoko lyoonse bakonzya kwaambwa kuti mbaacakolwa alimwi tabali boonse bacakolwa banywa lyoonse.” Bantu banji banywa bukoko balaakunywa citaambiki balo kabatazyi kuti mbaacakolwa. Bamwi tabanywi bukoko lyoonse pesi bayanda kuti banywe, banywa mabbodela aainda kuli osanwe.

Ikuti naa mwasala kunywa bukoko, ino mbunji buti mbomweelede kunywa? Nomunywa bukoko, ino inga mwazyiba buti kuti tamweelede kunywa bbodela limbi lyabukoko? Zibalo zitobela zilatondezya cikonzya kutugwasya kumakani aaya.

Bupanduluzi buyungizidwe