Kupa Jehova Zipaizyo Camoyo Woonse
“Kufwumbwa ncomucita, amucicite camoyo woonse mbuli kuti mubelekela Jehova, ikutali bantu pe.”—KOL. 3:23.
1-3. (a) Sena kufwa kwa Jesu acisamu cakupenzyezya caamba kuti kufwumbwa musyobo wacipaizyo cizwa kulindiswe Jehova taciyandi? Amupandulule. (b) Mibuzyo nzi iibuzyigwa kujatikizya zipaizyo mazuba aano?
MUMWAANDA wamyaka wakusaanguna C.E., Jehova wakayubunwida bantu bakwe kuti Mulawo wa Musa wakamana Jesu naakapa buumi bwakwe kacili cipaizyo cacinunuzyo. Zipaizyo zyoonse nzyobakali kupa ba Juda kwamyaka minji tiizyakacili kuyandika alimwi zyakanyina mulimo. Mulawo wakauzuzikizya mulimo nguwakajisi wakuba “musolozi wesu uututola kuli Kilisito.”—Gal. 3:24.
2 Eeco tacaambi kuti Banakristo tabacibikkili maano kuzipaizyo pe. Kulubazu lumwi, mwaapostolo Petro wakaamba mbociyandika ‘kutuula zipaizyo zyakumuuya zizuminwa kuli Leza kwiinda muli Jesu Kilisito.’ (1 Pe. 2:5) Kunze lyaboobo, mwaapostolo Paulo wakacisalazya kuti buumi boonse bwa Munakristo uulyaabide bulakonzya kubonwa kuti “[n]cipaizyo.”—Lom. 12:1.
3 Aboobo, Munakristo ulatuula kuli Jehova kwiinda mukupa zyintu zimwi kulinguwe naa kuleka zyintu zimwi akaambo kanguwe. Kweelana azyintu nzyotuzyi kujatikizya izyakali kuyandika kubana Israyeli, mbuti mbotukonzya kusinizya kuti zipaizyo zyesu zilatambulwa kuli Jehova mazuba aano?
MUBUUMI BWABUZUBA ABUZUBA
4. Ncinzi ncotweelede kuyeeya kujatikizya milimo njotucita mubuumi bwesu bwabuzuba abuzuba?
4 Mubukkale bwesu bwabuzuba abuzuba, cilakonzya kukatazya kweendelanya milimo yesu akupa zipaizyo kuli Jehova. Mulimo waaŋanda, mulimo wakucikolo, mulimo wakulembwa, kuula zyintu alimwi azimwi, kulakonzya kubonwa kuti taakwe mboziswaangene azyintu zyakumuuya. Nokuba boobo, ikuti mwakalyaaba kuli Jehova naa mulangila kucita oobo kumbele, nkokuti muyandika kubikkila maano mbomucita zyintu. Tuli Banakristo buzuba boonse. Njiisyo zyamu Magwalo ziyandika kuzitobela mumbazu zyabuumi bwesu boonse. Aboobo, Paulo utukulwaizya kuti: “Kufwumbwa ncomucita, amucicite camoyo woonse mbuli kuti mubelekela Jehova, ikutali bantu pe.”—Amubale Bakolose 3:18-24.
5, 6. Nzyintu nzi nzyotweelede kuyeeya izijatikizya mbotusama akulilemeka buzuba abuzuba?
5 Milimo njacita Munakristo buzuba abuzuba taili cibeela camulimo uusetekene. Pele kaambo nkatukulwaizya Paulo kakubeleka “camoyo woonse mbuli kuti mubelekela Jehova” katupa kuyeeya kujatikizya buumi bwesu boonse. Aboobo mbuti mbotukonzya kucibelesya eeci mubuumi bwesu kutugama? Sena mbotucita zyintu alimwi akusama zitondezya bulemu lyoonse? Sena notucita milimo yabuzuba abuzuba tulamvwa nsoni kulizyibya kuti tuli Bakamboni ba Jehova ambweni akaambo kambotulilemeka naa mbotusama? Eeco taceelede kucitika pe. Bantu ba Jehova taakwe nobanga bayanda kucita cintu cili coonse cikonzya kupa kuti zyina lya Leza lisampaulwe.—Is. 43:10; 2 Ko. 6:3, 4, 9.
6 Atulange-lange mbuli kubeleka “camoyo woonse mbuli kuti mubelekela Jehova” mbokujatikizya mbazu ziindene-indene zyabuumi. Notucita boobo atuyeeye kuti zipaizyo zyoonse bana Israyeli nzyobakali kupa kuli Jehova zyakeelede kuba zyintu ziinda kubota.—Kul. 23:19.
BUUMI BWANU MBOBUJATIKIZYIDWE
7. Ncinzi cijatikizyidwe mukulyaaba kwa Bunakristo?
7 Nomwakalyaaba kuli Jehova, mwakacita oobo camoyo woonse. Munzila imwi mwakali kwaamba kuti mubuumi bwanu boonse munoobikka Jehova kumbele. (Amubale Bahebulayo 10:7.) Eeco cakali cakusala cibotu. Cakutadooneka mwabona kuti kuzyiba makanze aa Leza muzyintu nzyotucita alimwi akusolekesya kwaazuzikizya kulagwasya kapati. (Is. 48:17, 18) Bantu ba Leza balasalala alimwi balikkomene akaambo kakuti batondezya bube bwayooyo uubayiisya.—Lev. 11:44; 1 Ti. 1:11.
8. Nkaambo nzi ncociyandika kuzyiba kuti zipaizyo nzyobakali kutuula kaindi zyakali kusalala mumeso aa Jehova?
8 Zipaizyo nzyobakali kupa bana Israyeli kuli Jehova, zyakali zyakwe buyo alikke naa zyakaabidwe buyo kulinguwe. (Lev. 6:25; 7:1) Kutegwa zipaizyo zyesu zitambulwe a Jehova, tazyeelede kuba amuuya wanyika naa kusofwaazyigwa anjiyo. Tatweelede kuyanda zyintu zili zyoonse nzyatayandi Jehova. (Amubale 1 Johane 2:15-17.) Cilisalede kuti tweelede kweeleba balongwe naa zyintu zili zyoonse zikonzya kutusofwaazya kweelana ambwazilanga zyintu Jehova. (Is. 2:4; Ciy. 18:4) Alimwi eeci caamba kuti tatweelede kunoolanga zyintu zitasalali naa kuzumizya mizeezo yesu kuyeeya zyintu zili boobu.—Kol. 3:5, 6.
9. Ino kulilemeka kabotu notuli abamwi ciyandika buti, alimwi nkaambo nzi?
9 Paulo wakakulwaizya basyominyina kuti: “Mutalubi kucita zibotu akwaabana zyintu nzyomujisi abamwi, nkaambo Leza ulabotelwa azipaizyo zili boobo.” (Heb. 13:16) Aboobo, kuti lyoonse katucita zyintu zibotu alimwi akugwasya bamwi, Jehova uyoobona zyintu nzyotucita kuti ncipaizyo citambulika kulinguwe. Kubabikkila maano bamwi ncitondezyo cakuti tuli Banakristo bakasimpe.—Joh. 13:34, 35; Kol. 1:10.
ZIPAIZYO ZIJATIKIZYA BUKOMBI
10, 11. Ino Jehova uubona buti mulimo wesu wakukambauka alimwi abukombi bwesu, alimwi ino eeci ceelede kutukulwaizya kucita nzi?
10 Nzila yomwe njotukonzya kucitila bamwi zyintu zibotu nkwiinda “[mu]kwaambilizya bulangizi bwesu antangalala.” Sena mulacibelesya coolwe cilicoonse ncomujana kupa bumboni? Paulo wakaamba mulimo ooyu uuyandika kapati wa Bunakristo kuti “[n]cipaizyo cantembauzyo, nkokuti, micelo yamilomo yesu iyaambilizya zyina lyakwe antangalala.” (Heb. 10:23; 13:15; Hos. 14:2) Tulakonzya kwaamba zinji kujatikizya ciindi ncotubelesya mumulimo alimwi zibeela zinji zya muswaangano wamulimo zibambilwa kutugwasya mumakani aaya. Nokuba boobo, mubufwaafwi tulakonzya kwaamba kuti, mbwaanga mulimo wesu wamumuunda alimwi abukambausi bwamukwiizya “[n]cipaizyo cantembauzyo,” alimwi ncibeela cabukombi bwesu, nkokuti cipaizyo eeco ceelede kubota kwiinda zilizyoonse nzyotukonzya kutuula. Nokuba kuti bukkale buliindene, ciindi ncotubelesya kwaambilizya makani mabotu kanji-kanji citondezya kuti tulalumba zyintu zyakumuuya naa pe.
11 Banakristo lyoonse balajana ciindi cakukomba kabali balikke naa mukabunga. Jehova mbwayanda kuti katucita. Masimpe kuti tatucitobeli mulawo wa Sabata wakulyookezya naa ciindi aciindi kuya ku Jerusalemu kumapobwe. Nokuba boobo, mbuli Banakristo kuli ncotukonzya kwiiya. Buzuba abuzuba tulijisi zyintu zinji zyakucita, pele Leza ulangila kuti katubelesya ciindi cimwi kubala Bbaibbele, kupaila alimwi akujanika kumiswaangano ya Bunakristo. Alimwi mutwe wamukwasyi ujisi mukuli wakwiiya Bbaibbele abamukwasyi wakwe. (1 Te. 5:17; Heb. 10:24, 25) Kujatikizya zyintu zyakumuuya, inga twacita kabotu kulibuzya kuti, ‘Sena ndilakonzya kusmpula bukombi bwangu kuli Leza?’
12. (a) Kutuula tununkilizyo mukukomba nkobakali kucita kaindi kulakonzya kukozyanisyigwa anzi? (b) Ino kukozyana ooku kweelede kuzijatikizya buti nzyotwaamba mumipailo yesu?
12 Mwami Davida wakaimbila Jehova kuti: “Cikombyo cangu cibe mbuli tununkilizyo kubusyu bwako.” (Int. 141:2) Amuyeeye kujatikizya mipailo yanu, ino mupaila ziindi zinji buti alimwi nzyintu nzi nzyomupailila? Bbuku lya Ciyubunuzyo likozyanisya “mipailo yabasalali” kutununkilizyo nkaambo mipailo iitambulika ilaunka kuli Jehova mbuli bweema bubotu. (Ciy. 5:8) Mu Israyeli kaindi, tununkilizyo twakali kutuulwa lyoonse aacipaililo ca Jehova twakali kubambwa kabotu-kabotu kweelana ambokwakali kuyandika. Cakali kutambulwa a Jehova kuti catuulwa kweelana amalailile ngaakabapede. (Kul. 30:34-37; Lev. 10:1, 2) Mbubwenya buyo, kuti twapaila munzila njayanda Jehova, tulakonzya kuba masimpe kuti Jehova ulaitambula mipailo yesu.
KUPA AKUTAMBULA
13, 14. (a) Ncinzi Epafrodita ambungano yaku Filipi ncobakamucitila Paulo, alimwi mwaapostolo wakalimvwa buti? (b) Mbuti mbotukonzya kwiiya cikozyanyo ca Epafrodita ambungano yaku Filipi?
13 Mali aasangwa kugwasilizya mulimo wanyika yoonse alakonzya kukozyanisyigwa kucipaizyo, kufwumbwa naa twasanga manji naa masyoonto. (Mk. 12:41-44) Mumwaanda wamwaka wakusaanguna C.E., mbungano yaku Filipi yakatuma Epafrodita ku Roma kutegwa akalanganye nzyaakali kuyandika Paulo kumubili. Kuboneka kuti Epafrodita wakatolelezya amali aazwa kumbungano. Eeci tiicakali ciindi cakusaanguna kubana Filipi kutondezya bwaabi kuli Paulo. Muluzyalo lwabo, bakamutumina mali Paulo kutegwa katalibiliki kujatikizya mali alimwi akuti abikkile maano kumulimo wakukambauka. Ino Paulo wakacibona buti cipego eeci? Paulo wakacaamba kuti “[m]bweema bubotu, cipaizyo cizuminwa, alimwi cimukkomanisya Leza.” (Amubale Bafilipi 4:15-19.) Paulo wakalumba ncobeni kucipego cabana Filipi, alimwi awalo Jehova wakalumba.
14 Mbubwenya buyo amazuba aano, Jehova ulalumba kapati zyakusanga zyesu kumulimo wanyika yoonse. Kuyungizya waawo, utusyomezya kuti naa twazumanana kubikka ambele zyintu zya Bwami mubuumi bwesu, uyootupa nzyotuyandika kumuuya akumubili.—Mt. 6:33; Lk. 6:38.
AMUTONDEZYE KUTI MULALUMBA
15. Nzyintu nzi zimwi izimupa kuti kamumulumba Jehova?
15 Cilakonzya kutola ciindi cinji kubala twaambo ntotujisi ncotweelede kumulumba Jehova. Masimpe kuti abuzuba tweelede kumulumba akaambo kacipego cabuumi. Ulatupa zyoonse nzyotuyandika kutegwa tuzumanane kupona—zyakulya, zyakusama amaanda aakukkala kubikkilizya amuya ngotuyoya ciindi coonse. Kuyungizya waawo, lusyomo lwesu, iluyeeme aaluzyibo lwini-lwini lulatupa bulangizi. Aboobo, cileelela kuti katumukomba Jehova alimwi akumupa zipaizyo zyantembauzyo, nkaambo kambwabede alimwi azyintu nzyaatucitila.—Amubale Ciyubunuzyo 4:11.
16. Ncinzi ncotweelede kucita akaambo kacipaizyo cacinunuzyo ca Kristo?
16 Mbubwenya mbotwabona mucibalo cainda, cipego ciyandika kapati Leza ncaapa bantu, ncipaizyo cacinunuzyo ca Kristo. Eeyi ninzila iilibedelede Leza mwaatondezya luyando kulindiswe. (1 Jo. 4:10) Ncinzi ciinda kubota ncotukonzya kucita akaambo kaceeci? Paulo wakaamba kuti: “Luyando ndwajisi Kilisito lulatukulwaizya, nkaambo oobu mbotwasinizya, ikuti muntu omwe wakafwida boonse; . . . alimwi wakafwida boonse kutegwa aabo bapona kabataciliponeni beni, pele kabaponena yooyo iwakabafwida alimwi wakabusyigwa.” (2 Ko. 5:14, 15) Mubwini, Paulo wakali kwaamba kuti naa tulalumba luzyalo lwa Leza, tuyoobelesya buumi bwesu kulemeka Leza alimwi a Mwanaakwe. Luyando lwesu alimwi akulumba Leza a Kristo tulakutondezya kwiinda mukumumvwida alimwi akuyandisisya kukambauka akupanga basikwiiya.—1 Ti. 2:3, 4; 1 Joh. 5:3.
17, 18. Muunzila nzi bamwi mbobacikonzya kuyungizya kupa zipaizyo zyantembauzyo kuli Jehova? Amupe cikozyanyo.
17 Sena inga mwacikonzya kusumpula cipaizyo cantembauzyo ncomupa kuli Leza? Nobabona zyintu zibotu zyoonse Jehova nzyaabacitila, ibanji cabapa kulanga-langa milimo yabo ambobacibelesya ciindi kutegwa bayungizye ciindi cabo mumulimo wakukambauka Bwami naa milimo imwi yakumuuya. Bamwi bacikonzya kucita bupainiya bwakugwasyilizya kwa mwezi omwe naa kwiinda waawo mwaka amwaka, mpoonya bamwi bacikonzya kucita bupainiya bwa ciindi coonse. Alimwi bamwi banjila mulimo wakuyaka Maanda aa Bwami. Sena eezi tazili nzila zibotu zyakutondezya kulumba? Kuti kulumba kwacitwa amakanze mabotu, milimo iisetekene ilatambulwa a Leza.
18 Banakristo banji balimvwa kuba amulandu wakulumba kuli Jehova aboobo bakulwaizyigwa anguwo. Muntu umwi uuli boobo mba Morena. Bakayandaula bwiinguzi kumibuzyo njobakajisi mucikombelo ca Katolika mobakakomenena, alimwi abusongo bwaku Asia. Pele taakwe nobakajana bwiinguzi bumvwika pe. Lilikke buyo nobakatalika kwiiya Bbaibbele a Bakamboni ba Jehova ndendilyo nobakajana bwiinguzi bumvwika kumibuzyo yabo. Ba Morena bakalumba kapati kubwiinguzi bwamu Magwalo kumibuzyo yabo akuti oobo bwiinguzi bwakabapa kuba abuumi bukkomanisya. Aboobo, bakaba amakanze akutondezya kulumba kwabo kuli Jehova kwiinda mukubelesya nguzu zyabo mumulimo wakwe. Ba Morena bakatalika kucita bupainiya bwakugwasyilizya kakutanainda ciindi cilamfwu kuzwa nobakabbapatizyigwa, alimwi bukkale nobwakabazumizya bakatalika bupainiya bwaciindi coonse. Ba Morena bakkwanya myaka iili 30 kabali mumulimo ooyu waciindi coonse.
19. Mbuti mbocikonzyeka kulindinywe kuyungizya zipaizyo zyanu kuli Jehova?
19 Cakutadooneka, kuli babelesi banji ba Jehova basyomeka batacikonzyi kubeleka kabali bapainiya. Kufwumbwa nzyotukonzya kucita mumulimo wa Jehova, toonse buyo tulakonzya kupa zipaizyo zyamuuya zitambulika kuli Leza. Tweelede kutobela njiisyo zyamu Bbaibbele mubukkale bwesu katuzyi kuti tuli baiminizi ba Jehova ciindi coonse. Tweelede kuba alusyomo mumakanze aa Leza. Mumilimo mibotu, tulagwasyilizya mukumwaya makani mabotu. Kwiinda mukucita oobo tulatondezya kuti tulalumba zyintu zyoonse nzyaatucitila Jehova. Aboobo, atuzumanane kupa zipaizyo kuli Jehova camoyo woonse.
AMUSOLE KWIINGULA MIBUZYO EEYI
․․․․․
Mbuti mbotukonzya kumulemeka Jehova mubukkale bwabuzuba abuzuba?
․․․․․
Nzipaizyo nzi nzyotupa kuli Jehova mubukombi bwesu?
․․․․․
Mbuti mbotukonzya kupa lubono lwesu kuli Jehova?
[Majwi aakwelelezya sikubala aali apeeji 25]
Sena bubotu bwa Jehova bulamukulwaizya kuzumanana kupa zipaizyo zyantembauzyo?
[Cifwanikiso icili apeeji 23]
Sena mulacibelesya coolwe cilicoonse ncomujana kupa bumboni?