Twamujana Mesiya”!

Nokwakainda myaka iili 400 kuzwa ciindi nolyakalembwa bbuku lyamamanino lya Chihebrayo lyamu Bbaibbele, businsimi bwa Mika bujatikizya Mesiya bwakazuzikizyigwa: Jesu wakazyalwa ku Betelehemu. Nokwakainda myaka iisika ku 30, mu 29 C.E., cibeela cakusaanguna cabusinsimi bwa Daniele cijatikizya kuboola kwa Mesiya, cakazuzikizyigwa. Jesu wakabbapatizyigwa alimwi Leza wakamunanika amuuya uusalala. Mesiya, walo iwakali lunyungu lwakali kulindilwa kwaciindi cilamfwu wakasika aciindi cibikkidwe.

Kakunyina kusowa ciindi, Jesu wakatalika mulimo wakwe ‘wakwaambilizya makani mabotu aa Bwami bwa Leza.’ (Luka 8:1) Mbubwenya mbokwakasinsimwa, Jesu wakatondezya kuti wakali aluzyalo, wakali mutete moyo, alimwi akuti wakali kubabikkila maano bantu. Wakali kuyiisya caluyando alimwi munzila iigwasya, alimwi wakaponya bantu “kumalwazi aamisyobo yoonse,” kutondezya kuti Leza wakali anguwe. (Matayo 4:23) Bantu bamisela iinde-indene bakaunka kuli Jesu, eelyo bakaamba kuti: “Twamujana Mesiya”! —Johane 1:41.

Jesu wakasinsima kuti Bwami bwakwe kabutanatalika kulela koonse-koonse, nkondo, mizuzumo yanyika, alimwi amakatazyo manji aamwi ayooba munyika. Wakakulwaizya bantu boonse ‘kulangila.’ —Maako 13:37.

Jesu wakalilondokede alimwi wakazumanana kumvwida Leza, nokuba boobo, wakalijisi basinkondonyina balo mukuya kwaciindi ibakamujaya. Lufwu lwakwe lwakapa cituuzyo cilondokede calo icakaula cintu ncobakasweekelwa ba Adamu a Eva, nkokuti bulangizi bwakupona buumi butamani mu Paradaiso.

Lufwu lwa Jesu alimwi akubusyigwa nkwaakabusyigwa a Leza kuti abe cilenge camuuya canguzu nokwakainda mazuba otatwe, zyakazuzikizya businsimi. Mpoonya Jesu wakalibonya kuli basikwiiya bakwe ibainda ku 500. Katanaunka kujulu, Jesu wakapa basikwiiya bakwe mulimo wakukambauka makani mabotu aajatikizya nguwe alimwi a Bwami bwakwe ‘kubantu bamisyobo yoonse.’ (Matayo 28:19) Ino bakasika aali mukubeleka mulimo ooyu?

—Cibalo eeci ciyeeme amagwalo aaya: Matayo, Maako, Luka, Johane, 1 Bakolinto.