Imulumbe Ngotweelede Kwaambilizya

“LEMEKA LEZA AKUBAMBA MILAZYO YAKWE”

IKAINDI kacitanasika ciindi ca Bunakristo, Jehova wakaambila Abrahamu musyomesi zyabubambe oomo “zisi zyoonse zyaansi” mozyakali kuyoolongezyegwa. (Matl. 22:18) Alakwe Solomoni wakamusololela amuuya kulemba kaambo kayandika kapati bantu boonse nkobeelede kutobela kakuti: “Lemeka Leza akubamba milazyo yakwe, nkaambo kucita obo nceelelo coonse camuntu.” (Muk. 12:13) Pele ino mbuti bantu zisi zyoonse mbobakali kukonzya kwiiya zintu eezyi?

Nokuba kuti lyoonse kwali bantu bali kulisyoma jwi lya Leza, Ibbaibbele litondezya kuti imulimo mupati wabukambausi walo wakali kuya kusikila masi oonse amakani mabotu, wakali kuyoocitwa “kubuzuba bwa-Mwami.” Eeci cakatalika mu 1914. (Ciy. 1:10) Ikujatikizya ciindi eeci, Ciyubunuzyo 14:6, 7 cakasinsima kuti kwaambilizya kuyandika kapati kwiinda mubusolozi bwabangelo kwakali kuzoocitwa kuli “bamasi boonse akumisyobo yoonse akumyaambo yoonse akumikowa yoonse.” Bakali kuzyooambilwa kuti: “Amuyoowe Leza akumupa bulemu, nkaambo casika ciindi calubeteko lwakwe. Amukombe oyo iwakalenga ijulu anyika alwizi atusensa twamaanzi.” Nkuyanda kwa Leza kuti imulumbe ooyu waambilizyigwe. Tulijisi coolwe citaliboteli cakutola lubazu mumulimo ooyo.

“Leza [Mwini-Mwini].” Jehova naakaamba kuti, “Ndinywe bakamboni bangu,” cakali ciindi nokwakali kaambo kakukazyanya zyamakani aa Buleza. (Is. 43:10) Imulumbe iweelede kwaambilizyigwa tauli wakwaambila buyo bantu kuti beelede kuba acikombelo naa kusyoma muli leza. Muciindi caboobo, beelede kupegwa ciindi cakuzyiba kuti Mulengi wajulu anyika ngo Leza mwini-mwini alikke. (Is. 45:5, 18, 21, 22; Joh. 17:3) Alikke Leza mwini-mwini nguukonzya kusinsima camasimpe zintu zili kumbele. Nciindi cesu cakutondezya kuti ikuzuzikizyigwa kwajwi lya Jehova musyule kupa kaambo ncotweelede kusyoma kuti zyoonse nzyaakasyomezya zyakumbele ziyoocitika ncobeni.—Jos. 23:14; Is. 55:10, 11.

Ee, banji mbotukambaukila bakomba baleza bambi naa baamba kuti tabakombi leza uuli woonse. Ikutegwa batuswiilile, tulakonzya kutalika amakani aatujatikizya toonse. Tulakonzya kugwasyigwa acikozyanyo cilembedwe ku Incito 17:22-31. Amubone kuti nokuba kuti mwaapostolo Paulo wakabelesya bupampu, wakabandika cakusalazya imukuli bantu boonse ngobajisi kuli Leza Imulengi wajulu anyika.

Ikwaambilizya Zina lya Leza. Mutaleki ikumubanda zina Leza mwini-mwini. Jehova ulaliyanda izina lyakwe. (Kul. 3:15; Is. 42:8) Uyanda kuti bantu balizyibe izina eelo. Wakacita kuti izina lyakwe litaliboteli libikkilizyigwe mu Bbaibbele iziindi ziinda ku 7,000. Mmukuli wesu ikuzyibya bantu izina eeli.—Dt. 4:35.

Ibulangizi bwabuumi bwakumbele bwabantu boonse buyeeme akuzyiba Jehova akumukomba calusyomo. (Joel. 2:32; Malk. 3:16; 2 Tes. 1:8) Pele ibunji bwabantu tabamuzyi pe Jehova. Eeci cibikkilizya banji ibalyaamba kuti bakomba Leza wamu Bbaibbele. Nokuba kuti balijisi Bbaibbele alimwi balalibala, inga tabakonzyi kulizyiba zina lya Leza limugeme akaambo kakuti lyakagusyigwa mubusanduluzi bwama Bbaibbele manji aasunu. Cilikke bantu bamwi ncobazyi kumakani aazina lyakuti Jehova ncakuti, ibasololi babo bazikombelo babaambila kuti kabatalibelesyi.

Ino mbuti mbotukonzya kuzyibya bantu izina lya Leza? Kunyina cimbi cibeleka kabotu mbuli kubatondezya buya mu Bbaibbele—Ibbaibbele lyabo ikuti kacikonzyeka. Mubusanduluzi bwamu myaambo imbi, izina eelo lilajanika kwaziindi zili zyuulu. Mubusanduluzi bumwi, lilakonzya kalijanwa buyo ku Intembauzyo 83:18 naa ku Kulonga 6:3-6, ndiza mubupanduluzi buyungizyidwe ku Kulonga 3:14, 15 naa 6:3. Mubusanduluzi buli mbobubede, imabala ambi aabelesyedwe mbuli lya “Mwami” a “Leza,” alilembedwe mubulembo bulibedelede aawo mumwaambo mutaanzi aakali izina lya Leza limugeme. Oomo basanduluzi bamazuba aano mobakali gusyilalyo izina lya Leza limugeme, inga mwayandika kubelesya busanduluzi bwa Bbaibbele bwakaindi ikutegwa mubatondezye bantu cakacitwa. Mumasi amwi, mulakonzya kutondezya izina lya Leza munyimbo zyabukombi naa mubulembo buzekaudwe mumayake.

Nokuba kuli baabo ibakomba baleza bambi, Jeremiya 10:10-13 ilakonzya kubelesyegwa. Talyaambi buyo izina lya Leza, pele alimwi lilapandulula kabotu-kabotu mbwabede.

Mutalisisi pe zina lyakuti Jehova kwiinda mukubelesya mabala aakuti “Leza” naa “Mwami,” mbuli bucita Bunakristo Bwanyika. Eeci tacaambi kuti mwelede kulibelesya nomutalisya mubandi uuli woonse. Akaambo kamizeezo mibi njobajisi bamwi, balakonzya kuutyokezya mubandi. Pele mwajana kaambo kakubandika, mutayoowi pe ikubelesya izina lya Leza.

Cilayandika kuzyiba kuti Ibbaibbele libelesya zina lya Leza limugeme ziindi zinji kwiinda mbolibelesya mabala aakuti “Mwami” a “Leza” kwaabikka antoomwe. Nokuba kuti cili boobo, balembi ba Bbaibbele kunyina nobakabikka zina lya Leza mukaambo kali koonse nkobakalemba. Bakacita oobo mbokweelede, cakutayoowa acabulemu. Eeco ncilengwa cibotu ncotweelede kutobela.

Imuntu Uujisi Zina Eelyo. Nokuba kuti ikaambo kakuti Leza ulijisi zina limugeme nkasimpe kayandika, ikucita boobo mmatalikilo buyo aakumuzyiba.

Ikutegwa bamuyande Jehova akumukomba calusyomo, bantu beelede kumuzyiba Leza mbwabede. Jehova naakaamba zina lyakwe kuli Musa ku Cilundu ca Sinai, nzinji nzyaakacita kunze lyakwiinduluka kwaamba bbala lyakuti, “Jehova.” Wakatondezya bube Bwakwe bumwi bulibedelede. (Kul. 34:6, 7) Eeco ncikozyanyo ncotweelede kwiiya.

Kunyina makani naa mukambaukila bantu bayandisya kumvwa naa mwaamba makani mumbungano, nomwaamba zilongezyo zya Bwami, amutondezye ncozyaamba eezyi kuli Leza ooyo uuzisyomezya. Nomubandika zyamilawo yakwe, amukankaizye busongo aluyando nzyoitondezya. Amucisalazye kuti nzyayanda Leza kuti tucite tuuli mukuli uuminya, pele muciindi caboobo zyakabambilwa kutugwasya. (Is. 48:17, 18; Mik. 6:8) Amutondezye mbuli citondezyo acimwi canguzu zya Jehova mbocitondezya mbwabede, zyeelelo zyakwe amakanze aakwe. Amutondezye nzila Jehova mbwatondezya bube bwakwe. Abamumvwe bantu kwaamba mbomulimvwa kujatikizya Jehova. Iluyando ndomujisi kuli Jehova lulakonzya kupa kuti abamwi bamuyande.

Imulumbe ooyu uuyandika kapati ukulwaizya bantu boonse kuyoowa Leza. Kwiinda muli nzyotwaamba, tweelede kukulwaizya bamwi kuyoowa Leza munzila iili boobo. Ooku nkuyoowa Jehova munzila yeelede. (Int. 89:7) Kulabikkilizya akuzyiba kuti Jehova Mmubetesi wiinda boonse alimwi akuti ibulangizi bwesu bwabuumi bwakumbele buyeeme akuyandwa anguwe. (Lk. 12:5; Rom. 14:12) Ikuyoowa kuli boobo kulisangenyi aluyando lwini-lwini kulinguwe akuyandisya kumukkomanisya. (Dt. 10:12, 13) Alimwi ikuyoowa Leza kutupa kusula zintu zibyaabi, ikutobela milawo ya Leza akumukomba camoyo woonse. (Dt. 5:29; 1 Mak. 28:9; Tus. 8:13) Kulatukwabilila ikutabelekela Leza kumwi katuyandisya zintu zyamunyika.—1 Joh. 2:15-17.

Izina lya Leza—“Ningazi Injumu.” Ibantu bamuzyiba ncobeni Jehova balakwabililwa kapati. Eeci tacili akaambo kakuti balalibelesya izina lyakwe limugeme naa kubandauka bube bwakwe bumwi. Nkaambo kakuti babikka lusyomo lwabo muli Jehova kumugama. Ikujatikizya mbabo, Tusimpi 18:10 twaamba kuti: “Izina lya-Jehova ningazi injumu; mululami ulacijila kulinjiyo, aboobo ulafutuka.”

Amucibelesye kabotu ciindi ikukulwaizya bantu ikusyoma muli Jehova. (Int. 37:3; Tus. 3:5, 6) Kusyoma kuli boobo kutondezya lusyomo muli Jehova amuzisyomezyo zyakwe. (Heb. 11:6) Ibantu ‘nobalilila izina lya Jehova’ akaambo kakuti balizyi kuti Mmwami Wakujulu Aansi, balaziyanda nzila zyakwe akusyoma cakumaninina kuti ilufwutuko lwini-lwini lulakonzya kuzwa kulinguwe alikke, ee—Jwi lya Leza lilatusyomezya kuti bayoofwutulwa. (Rom. 10:13, 14) Nomuyiisya bantu, amubagwasye kuba alusyomo luli boobo mumbazu zyoonse zyabuumi bwabo.

Ibantu banji balijisi mapenzi aabakatazyide. Balakonzya kabataibwene nzila iigwasya. Amubakulwaizye kwiiya nzila zya Jehova, kusyoma mulinguwe akucita nzyobaiya. (Int. 25:5) Amubakulwaizye kupaila camoyo omwe kulomba lugwasyo lwa Leza akumulumba kuzilongezyo zyakwe. (Flp. 4:6, 7) Nobamuzyiba Jehova, kutali buyo kwiinda mukubala twaambo tumwi mu Bbaibbele pele alimwi akwiinda mukubona kuzuzikizyigwa kwazisyomezyo zyakwe mubuumi bwabo, bayootalika kubona lukwabililo iluboola akaambo kakuliteelela kabotu izina lya Jehova ncoliiminina.—Int. 34:8; Jer. 17:7, 8.

Amucibelesye kabotu ciindi coonse ncomujana ikugwasya bantu kubona ncocili cabusongo kuyoowa Leza mwini-mwini, Jehova alimwi akuccilila milawo yakwe.

‘IKUPA BUMBONI BWA JESU’

NAAKABUKA alimwi katana kupiluka kujulu, Jesu Kristo wakapa malailile kuli basikwiiya bakwe, naakati: “Muyooba bakamboni bangu . . . mane kusikila kumamanino aanyika.” (Inc. 1:8) Babelesi ba Leza basyomeka mazuba aano baambwa kuti mbabaabo ‘ibajisi mulimo wakupa bumboni bwa Jesu.’ (Ciy. 12:17) Ino mbuti mbomusungweede mukupa bumboni oobo?

Ibantu banji ibaamba kuti basyoma muli Jesu, kunyina ancobazyi kujatikizya buumi bwakwe katanaba muntunsi. Tabazyi kuti ncobeni wakali muntunsi naakali anyika. Tabaciteeleli ncocaamba naambwa kuti Mmwana a Leza. Nzisyoonto nzyobazyi kujatikizya mulimo ngwajisi mukuzuzikizyigwa kwamakanze aa Leza. Tabacizyi ncacita lino, alimwi kunyina ancobazyi mbuli maumi aabo mbwaaya kujatikizyigwa azintu nzyayoocita kumbele. Alimwi balakonzya kuyeeya kuti Bakamboni ba Jehova tabasyomi muli Jesu. Ncoolwe cesu cakuti tubeleke canguzu ikwaamba bwini kujatikizya kasimpe kumakani aaya.

Kuli abambi bantu ibatasyomi kuti muntu uuli mbuli Jesu waambwa mu Bbaibbele wakapona ncobeni. Ibamwi babona Jesu kuti wakali muntu buyo umwi ulaampuwo. Ibanji balaukaka muzeezo wakuti Mwana a Leza. ‘Ikupa bumboni bwa Jesu’ akati kabantu bali boobo kuyandika kusolekesya kapati, ikukkazyika moyo alimwi abupampu.

Kunyina makani ambobazilanga zintu bamuswiilila, beelede kumuzyiba Jesu Kristo ikuti kabayanda kugwasyigwa abubambe bwabuumi butamani mbwabikkide Leza. (Joh. 17:3) Ikuyanda kwa Leza nkwakuti bantu boonse ibapona beelede ‘kuzumina kuti Jesu Kristo Mmwami,’ alimwi beelede kulibombya kubweendelezi bwakwe. (Flp. 2:9-11) Aboobo, tatukonzyi kwaaleka buyo makani notuswaanganya bantu ibakakatila kumizeezo yabo iitaluzi. Nokuba kuti zimwi ziindi tulakonzya kukanana cakuliiba kujatikizya Jesu Kristo—neliba notuswaya ciindi cakusaanguna—kuli bamwi inga twayandika kucenjela akwaamba twaambo tugwasya baswiilizi ikutalika kuyeeya munzila iiluzi kujatikizya nguwe. Alimwi tulakonzya kuyeeya mbotunga twabikkilizya atumbi twaambo mumakani aayo mukuswaya kutobela. Aboobo, inga tacikonzyeki ikubandika zyoonse ziyandika aciindi eeco, ccita twaakutalika kweendelezya ciiyo ca Bbaibbele caaŋanda.—1 Tim. 2:3-7.

Imulimo wa Jesu Mupati Mumakanze aa Leza. Tweelede kugwasya bantu kuteelela kuti mbwaanga Jesu ‘nenzila’ alimwi ‘taakwe muntu uunka kuli Taata pele kwiinda mulinguwe,’ nciyumu ikuba acilongwe a Leza kakunyina ikuba alusyomo muli Jesu Kristo. (Joh. 14:6) Ccita kuti muntu wauzyiba mulimo uuyandika Jehova ngwaakapa ku Mwanaakwe mutaanzi, nciyumu ikuliteelela Bbaibbele. Nkaambo nzi? Nkaambo Jehova wakabikka Mwanaakwe kuba musemo mukuzuzikizyigwa kwamakanze Aakwe oonse. (Kol. 1:17-20) Ibusinsimi bwa Bbaibbele buyeeme akaambo aaka. (Ciy. 19:10) Jesu Kristo ngonguwe uuyoomanizya mapenzi oonse aakaletwa akaambo kakuzanga kwa Saatani acibi ca Adamu.—Heb. 2:5-9, 14, 15.

Ikutegwa uteelelwe mulimo wa Kristo, muntu weelede kuzyiba kuti bantunsi bali mubukkale bweetezya oomo mobatakonzyi kulinununa. Toonse twakazyalwa mucibi. Eeci cilakonzya kutukatazya munzila ziindene-indene mubuumi. Pele mukaindi kasyoonto naa kwainda ciindi cipa kufwa. (Rom. 323; 512) Amwaakanane makani aaya abaabo mbomukambaukila. Mpoonya amutondezye kuti kwiinda mucituuzyo cacinunuzyo ca Jesu Kristo, caluyando Jehova wacita bubambe bwakuti kukonzyeke kufwutuka kucibi alufwu kuli baabo ibajisi lusyomo mucipego eeco cacinunuzyo. (Mk. 10:45; Heb. 2:9) Eeci cibapa coolwe cakuba abuumi butamani ibulondokede. (Joh. 3:16, 36) Tacikonzyeki munzila imbi iili yoonse. (Inc. 4:12) Mbomuli baiyi, kunyina makani naa muuŋanda naa muumbungano, mutayiili buyo akwaamba twaambo ootu twakasimpe. Calubomba acakukkazyika moyo amubakulwaizye baswiilizi ikutondezya kulumba kumulimo ngwajisi Kristo kali Mufwutuli wesu. Ikulumba cipego eeci kulakonzya kupa kuti muntu acince mbwazilanga zintu, bukkale ambaakani nzyajisi mubuumi.—2 Kor. 5:14, 15.

Jesu wakaaba buumi bwakwe mucituuzyo ciindi comwe buyo. (Heb. 9:28) Nokuba boobo, ulabeleka kali Mupaizi Mupati lino. Amubagwasye bamwi ikuteelela ncocaamba eeco. Sena balikopenyi mumoyo, balityompedwe, balapenga naa kuli mapenzi ambi akaambo kalunya lwabantu mbocikkala limwi? Jesu naakali muntunsi zyoonse eezyi zyakamucitikila. Ulizyi mbotulimvwa. Akaambo kakutalondoka, sena tulimvwa kuti tuyandika lubomba lwa Leza? Ikuti twapaila kuli Leza katulomba kulekelelwa kwiinda mucituuzyo ca Jesu, Jesu ulabeleka kali “Mugwasyi uutwaambilila kuli Taata.” Calubomba, ‘ulatukombelezezya.’ (1 Joni 2:1, 2; Balo. 8:34) Kwiinda mucituuzyo ca Jesu amumilimo njacita kali Mupaizi Mupati, tulakonzya kusika ‘kucuuno ca Jehova caluzyalo’ kuti tupegwe lugwasyo aciindi ceelede. (Heb. 4:15, 16) Nokuba kuti tatulondokede, ilugwasyo Jesu ndwapa kali Mupaizi Mupati, lulatugwasya kubelekela Leza amanjezyeezya aasalala.—Heb. 9:13, 14.

Kunze lyaboobo, Jesu ulijisi nguzu zipati kali ooyo uubikkidwe a Leza kuba Silutwe wambungano ya Banakristo. (Mt. 28:18; Ef. 1:22, 23) Aboobo, ulapa busolozi buyandika kweelana akuyanda kwa Leza. Nomuyiisya bamwi, amubagwasye kuteelela kuti Jesu Kristo, ikutali muntunsi uuli woonse, ngo Silutwe wambungano. (Mt. 23:10) Nomwaswaangana ciindi cakusaanguna abantu bajisi luyandisyo, amubatambe kumiswaangano yambungano ooko nkotwiiya Bbaibbele kwiinda mukugwasyigwa amakani aapegwa kwiinda mu “muzike musyomesi uucenjede.” Mutabapanduludi buyo “muzike” pele a Simalelo ikutegwa bazyibe busilutwe bwa Jesu. (Mt. 24:45-47) Amubazyibye kubaalu alimwi amupandulule zyeelelo zyamu Magwalo nzyobazuzikizya baalu. (1 Tim. 3:1-7; Tit. 1:5-9) Amupandulule kuti imbungano taili yabaalu pe, pele balatugwasya kweenda mumikondo ya Jesu Kristo. (Inc. 20:28; Ef. 4:16; 1 Pet. 5:2, 3) Amubagwasye aaba bapya ikuzyiba kuti kuli ciinga cabantu canyika yoonse icibeleka mubusilutwe bwa Kristo.

Mumabbuku aa Makani Mabotu, twiiya kuti Jesu naakanjila mu Jerusalemu kakusyeede ciindi cisyoonto kuti afwe, basikwiiya bakwe bakamutembaula kuti wakali yooyo “uuboola kali Mwami muzina lya Jehova!” (Lk. 19:38) Ibantu mbobaya cisitikila kwiiya Bbaibbele, balaiya kuti Jehova lino wapa Jesu nguzu zyabweendelezi izijatikizya bantu bamumasi oonse. (Dan. 7:13, 14) Nomubandika makani mumbungano naa kweendelezya ziiyo, amubagwasye bantu kuzyiba ibweendelezi bwa Jesu ncobweelede kwaamba kulindiswe toonse.

Amukankaizye kuti ibukkale bwesu bulatondezya naa tulasyoma ncobeni kuti Jesu Kristo Mmwami alimwi naa tulalibombya cakutasinikizyigwa kubweendelezi bwakwe. Amubikkile maano kumulimo Jesu naakazwa kunanikwa kuba Mwami ngwaakapa basikumutobela bakwe kucita. (Mt. 24:14; 28:18-20) Amubandike eeco Jesu walo Sinkuta Uugambya ncaakaamba kujatikizya zintu zyeelede kubonwa kuti nzyeziyandika kapati mubuumi. (Is. 9:6, 7; Mt. 6:19-34) Amwaambe muuya ooyo Mwami wa Luumuno ngwaakaamba kuti nguwakeelede kunootondezyegwa abasikumutobela bakwe. (Mt. 20:25-27; Joh. 13:35) Amucenjele ikutalipa mukuli wakubeteka akukosola makani akuti naa bantu balacita mbuli mbobakonzya naa pe, pele amubakulwaizye kulanga-langa eeco milimo yabo ncoitondezya kukulibombya kwabo kubweendelezi bwa Kristo. Nomucita boobo, amubaambile kuti anywebo mweelede kucita mbubwenya.

Ikubikka Kristo Kali Ntalisyo. Ibbaibbele likozyanisya mulimo wakugwasya muntu kuba sikwiiya Munakristo kukuyaka mayake ali Jesu Kristo kali ntalisyo. (1 Kor. 3:10-15) Ikutegwa eeci cikonzyeke, amubagwasye bantu ikumuzyiba Jesu mbubwenya mbwapanduludwe mu Bbaibbele. Amucenjele kuti batabikkili maano kulindinywe akuba ndinywe mweelede kutobelwa. (1 Kor. 3:4-7) Amubagwasye kubikkila maano kuli Jesu Kristo.

Ikuti ntalisyo yayakwa kabotu, basikwiiya bayooteelela kuti Kristo wakasiya cikozyanyo cakuti ‘tutobele mumikondo yakwe.’ (1 Pet. 2:21) Ikutegwa bajatisye, amubakulwaizye basikwiiya ikubala mabbuku aa Makani Mabotu ikutali kwaabona buyo ikuba makani aakaindi aakasimpe pele kaali cikozyanyo ceelede kutobelwa. Amubagwasye kwiibaluka akutobela bube mbwaakajisi Jesu. Amubakulwaizye kubikkila maano Jesu mbwaakalimvwa kujatikizya Bausyi, mbwaakaliyumya naakali kusunkwa amumakatazyo, mbwaakalibombya kuli Leza ambwaakabeendelezya bantunsi bakali mubukkale bwiindene-indene. Amukankaizye mulimo ngwaakabikkilide maano Jesu mubuumi bwakwe. Nayandika kusala kumwi alimwi anali mumapenzi, sikwiiya uyoolibuzya kuti: ‘Ino ncinzi ncaakali kunga wacita Jesu mubukkale buli boobu? Sena kusala kwangu kulatondezya kulumba kuzintu nzyaandicitila?’

Nomukananina mbungano, mutayeeyi kuti mbwaanga ibanyoko balijisi kale lusyomo muli Jesu, nkokuti takuyandiki kumubikkila maano munzila iilibedelede. Ncomwaamba cinoojisi mpindu ikuti mwayungizya alusyomo oolo ndobajisi. Nomukanana zyamiswaangano, amubikkilizye amulimo Jesu ngwajisi kali Simutwe wambungano. Nomubandika zyamulimo wamumuunda, amukankaizye muuya ngwaakatondezya Jesu naakali kucita mulimo wakwe, alimwi amutondezye mulimo kweelana aceeco Kristo kali Mwami ncacita kutegwa ayobolole bantu bayoofwutuka kunjila munyika mpya.

Ncamasimpe kuti nzinji ziciyandika kunze buyo lyakwiiya twaambo twantalisyo twaamba Jesu. Ikutegwa babe Banakristo beni-beni, ibantu beelede kuba alusyomo mulinguwe akumuyanda ncobeni. lluyando luli boobo lukulwaizya kucita nzyayanda cakusyomeka. (Joh. 14:15, 21) Lugwasya bantu ikuyuma mulusyomo nobapenga, ikuzumanana kweenda mumikondo ya Kristo mubuumi bwabo boonse, ikulitondezya kuti Mbanakristo basimide ‘ibazyatide baimvwi mulusyomo.’ (Ef. 3:17) Ibukkale buli boobo bupa bulemu kuli Jehova, Leza alimwi Bausyi ba Jesu Kristo.

“AYA MAKANI MABOTU AA-BWAMI”

NAAKALI kupa malailile kujatikizya cizyibyo cakubako kwakwe acamamanino aabweende bwazintu, Jesu wakasinsima kuti: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Mt. 24:14.

Ino mubwini mulumbe nzi ooyu weelede kwaambilizyigwa koonse-koonse? Ujatikizya Bwami Jesu mbwaakatuyiisya kuti katupailila kuli Leza, kuti: “Abuze Bwami bwako.” (Mt. 6:10) Ciyubunuzyo 11:15 cibupandulula kuti ‘mbwami bwa Mwami wesu Jehova abwa Kristo wakwe’ nkaambo inguzu zyabweendelezi zizwa kuli Jehova alimwi zilapegwa kuli Kristo kali Mwami. Pele amubone kuti, imulumbe ooyo Jesu ngwaakati uya kwaambilizyigwa kuciindi cesu, ulainda ali basikumutobela bakwe mpobakakambauka mumwaanda wamyaka wakusaanguna. Bakaambila bantu kuti: “Bwami bwa-Leza buli afwaafwi kulindinywe.” (Lk. 10:9) Jesu ooyo wakananikidwe kuba Mwami, wakali akati kabo aciindi eeco. Pele mbuli mbokulembedwe ku Matayo 24:14, Jesu wakasinsima kuti kuzyooba kwaambilizya anyika yoonse kujatikizya cintu cimwi ciyandika kapati mukuzuzikizyigwa kwamakanze aa Leza.

Imusinsimi Daniele wakapegwa cilengaano cacintu eeci ciyandika. Wakabona “umwi uuli mbuli mwana amuntu,” Jesu Kristo, katambula kuzwa kuli “Sinsiku,” Jehova Leza, “bweendelezi abulemu abwami, kuti bantu bazisi zyoonse abamisyobo yoonse abamyaambo yoonse bamumanine milimo.” (Dan. 7:13, 14) Eeco cintu ciyandika koonse-koonse cakacitika kujulu mumwaka wa 1914. Kuzwa waawo Diabolosi amadaimona aakwe bakawisyigwa ansi. (Ciy. 12:7-10) Ibweende bwazintu bwakanjila kumazuba aakumamanino. Pele kabutana manizyilwa limwi kugusyigwa, ikwaambilizya munyika yoonse kulacitwa ikwakuti, Mwami wa Jehova wabu Mesiya lino uleendelezya kuzwa kucuuno cakwe cabwami kujulu. Bantu koonse-koonse balazyibisyigwa. Mbobaingula ncitondezyo cambobamubona Mupatikampatila kali Mweendelezi “mubwami bwabantu.”—Dan. 4:32.

Ee, nzinji kapati zintu zicilangilwa! Tucipaila kuti, “Abuze Bwami bwako,” pele eeci tacaambi kuti kukkazyikizyigwa kwa Bwami bwa Leza kucili kumbele. Pele mmuzeezo wakuti Bwami bwakujulu buyoobweza ntaamu mpati yakuzuzikizya businsimi mbuli boobo buli kuli Daniele 2:44 a Ciyubunuzyo 21:2-4. Buyoosandula nyika kuba paradaiso iizwide bantu bayanda Leza abantunyina. Mbotukambauka “aya Makani Mabotu aa-Bwami,” twaamba zyabulangizi oobo bwakumbele. Pele alimwi cakusinizya tulaambilizya kuti Jehova wapa kale nguzu zyabweendelezi ku Mwanaakwe. Sena mulaakankaizya aaya makani mabotu nomukambauka Bwami?

Kubupandulula Bwami. Ino mbuti mbotunga twauzuzikizya mulimo wesu wakwaambilizya Bwami bwa Leza? Tulakonzya kubusya luyandisyo kwiinda mukutalisya mibandi iijisi mitwe yamakani iindene-indene, pele ndilyona tweelede kucisalazya kuti mulumbe wesu ngwa Bwami bwa Leza.

Icibeela ciyandika kapati mumulimo ooyu cibikkilizya kubala naa kuzubulula magwalo aabandika zya Bwami. Nomwaamba zya Bwami, amubone kuti aabo mbomwaambila bamvwisya caambwa. Nzinji ziyandika kwaamba muciindi cakwiile kwaamba buyo kuti Bwami bwa Leza nimfwulumende. Ibantu bamwi cilakonzya kubayumina ikusyoma cintu citalibonyi kuba mfwulumende. Mulakonzya kusalazyanya ambabo munzila ziindene-indene. Mucikozyanyo, inguzu zikwelelaansi tazilibonyi pe, pele zilabujatikizya kapati buumi bwesu. Tatukonzyi kumubona Ooyo wakapanga nguzu zikwelelaansi, pele cilisalede kuti ulijisi nguzu zinji. Ibbaibbele limwaamba kuti “Mwami mupati uutamani walyoonse.” (1 Tim. 1:17) Ambweni mulakonzya kwaamba kuti mucisi cipati, ibantu banji kunyina nobaningasika kudolopo lipati nokuba kubonana cakaanzambwene amuleli wabo. Balazizyiba eezyi kwiinda mumakani aamwaigwa. Mbubwenya buyo, Ibbaibbele limwaidwe mumyaambo iinda ku 2,200 lilatwaambila zya Bwami bwa Leza; lilatuzyibya ooyo wakapegwa bweendelezi alimwi a Bwami ncobucita. Imagazini ya Ngazi Yamulindizi, iimwaigwa mumyaambo minji kwiinda bbuku limbi limwaigwa, ibambilidwe kuti ka “Yaambilizya Bwami bwa Jehova,” mbubwenya mboilembedwe acivwumbyo.

Ikutegwa mugwasye bantu kumvwisya Bwami, mulakonzya kwaamba zintu zimwi eezyo nzyobayanda kuti mfwulumende icite: ikumana bucete, kuleta luumuno, kumana milandu, ikutasalululana akati kamisyobo yoonse, lwiiyo abusilisi bubotu. Amutondezye kuti kolikke kwiinda mu Bwami bwa Leza eezyi zintu azimwi zilombozya bantu nozyiya kucitika munzila iikkomanisya.—Int. 145:16.

Amubakulwaizye bantu kuyandisya kuba cibeela cabalelwa ba Bwami oomo Jesu Kristo mwayendelezya kali Mwami. Amwaambe maleele ngaakacita kaali citondezyo buyo cazyeezyo nzyayoocita kali Mwami wakujulu. Lyoonse kamubandika bube bubotu mbwaakatondezya. (Mt. 8:2, 3; 11:28-30) Amupandulule kuti wakatufwida alimwi akuti Leza wakamubusya kuti abe abuumi butafwi kujulu. Uleendelezya nkukwenya ooko kali Mwami.—Inc. 2:29-35.

Amukankaizye kuti Bwami bwa Leza bulalela lino kuzwa kujulu. Nokuba boobo, amuzyibe kuti ibunji bwabantu tabaziboni zintu nzyobayeeyela kuti nzyezinga zyaba bumboni bwabweendelezi oobo. Amuzuminizye oobo, alimwi amubuzye naa balizizyi zintu Jesu Kristo nzyaakaamba kuti nzyezyakali kuzooba bumboni. Amutondezye zibeela zyacitondezyo cijatikizya zintu zinji izili muzyaandaano zya Matayo 24, Marko 13 naa Luka 21. Mpoonya amubuzye kubikkwa kwa Kristo acuuno cabwami kujulu ncokwakali kuyooleta bukkale buli boobo anyika. Amubandike zili ku Ciyubunuzyo 12:7-10, 12.

Kabuli bumboni bwa Bwami bwa Leza ncobucita, amubale Matayo 24:14 akupandulula bubambe bwakuyiisya Bbaibbele ibucitwa nyika yoonse lino. (Is. 54:13) Amubaambile bantu zikolo ziindene-indene Bakamboni ba Jehova nkobagwasyigwa—zyalo iziyeeme aa Bbaibbele alimwi zicitwa kakunyina kubbadala. Amupandulule kuti kunze lyamulimo wesu ngotucita wakuŋanda aŋanda, tulaiya Ibbaibbele abantu alimwi amikwasyi ziiyo zitabbadalwi zyaaŋanda muzisi ziinda ku 230. Nimfwulumende nzi yabantunsi iikonzya kubamba bubambe bupati boobu bwakuyiisya ikutali buyo kubalelwa bayo pele kubantu boonse nyika mboizulwa? Amubatambe bantu kuboola ku Ŋanda ya Bwami, kujanika kumiswaangano misyoonto amipati ya Bakamboni ba Jehova ikutegwa balibonene bumboni bwambuli lwiiyo oolu mbolugwasya bantu.—Is. 2:2-4; 32:1, 17; Joh. 13:35.

Pele sena mwiniŋanda uyoozyiba mbuli buumi bwakwe mbobujatikizyidwe? Cabupampu mulakonzya kutondezya kuti imakanze aakuswaya kwanu ngakuti mubandike coolwe cipegwa bantu boonse cakulisalila buumi kabali balelwa ba Bwami bwa Leza. Munzila nzi? Kwiinda mukwiiya ncayanda Leza akupona kweelana akuyanda kwakwe lino.—Dt. 30:19, 20; Ciy. 22:17.

Ikugwasya Bantu Kubikka Bwami Mubusena Bwakusaanguna. Nokuba kuti muntu wazumina mulumbe wa Bwami, kuli zyakusala nzyeelede kucita. Ino unoobuyanda buti Bwami bwa Leza mubuumi bwakwe? Jesu wakakulwaizya basikwiiya bakwe kuti, “amusaangune kuyandaula Bwami.” (Mt. 6:33) Ino inga twabagwasya buti Banakristoma ikucita boobo? Nkwiinda mukuba cikozyanyo cibotu swebo akubandika zyoolwe ziliko mukucita boobo. Zimwi ziindi, nkwiinda mukubuzya muntu naa wakalanga-langa mbocinga cakonzyeka kucita zintu zimwi alimwi akwaambilana zyakuluula kutondezya bamwi nzyobacita. Kwiinda mukubandika zibalo zyamu Bbaibbele munzila iikonzya kuyumya luyando kuli Jehova. Kwiinda mukukankaizya kuti Bwami nkobuli ncobeni. Kwiinda mukukankaizya mbouyandika ncobeni mulimo wakwaambilizya Bwami. Ibantu kanji-kanji balagwasyigwa, ikutali kwiinda mukubaambila nzyobeelede kucita, pele kwiinda mukubakulwaizya kulombozya kuzicita.

Kakunyina kudooneka, imulumbe uuyandika kapati ooyo toonse ngotweelede kwaambilizya uyeeme kapati ali Jehova Leza, Jesu Kristo a Bwami. Imakani aayandika kapati akasimpe mumbazu eezyi, ayelede kukankaizyigwa mumulimo wesu wakubuleya, mumbungano zyesu amubukkale bwesu. Twacita oobo, tutondezya kuti ncobeni tulagwasyigwa alwiiyo lujanwa mu Cikolo Camulimo Weendelezyegwa a Leza.