Sena Mulizyi?

Ciindi Jesu naakali anyika, mitelo nzi njobakeelede kutela bantu?

KUZWA kaindi, bana Israyeli bakalizyibide kusanga mali aakugwasyilizya bukombi bwakasimpe. Pele makani aakutela mitelo akatalika kukatazya alimwi akuba mukuli uuminya kuba Juda ciindi Jesu naakali anyika.

Kutegwa bagwasyilizye kuzintu zyakali kuyandika kutente lyakukombela kumbele lyakazooba tempele, ba Juda boonse bapati bakeelede kubbadela cisela casyekeli naa madirakima obilo. Mumwaanda wamyaka wakusaanguna, mali aayo akali kubelesyegwa kuula ziyandika alimwi azituuzyo atempele ndyaakayaka Heroda. Ba Juda bamwi bakamubuzya Petro kujatikizya mbwaakali kwaabona Jesu makani aaya, aboobo Jesu wakabaambila kuti kunyina cakalubide kubbadela mutelo. Alimwi buya, wakaambila Petro nkwaakeelede kujana kkobili kutegwa atele mutelo ooyo.—Mt. 17:24-27.

Bantu ba Leza kuciindi eeco alimwi bakeelede kupa cakkumi, nkokuti cipaanzi cakkumi camicelo yabo naa mali ngobakali kuvwola. (Lev. 27:30-32; My. 18:26-28) Basololi babukombi bakaamba kuti bantu bakeelede kubikkila maano kapati kutela mutelo ooyu nokuba kuzisyumani zili zyoonse, kubikkilizya ‘azyaluyuni abboonko.’ Jesu tanaakaamba kuti cakalilubide kupa cakkumi, pele wakayubununa bube bwakuupaupa ameso bwabalembi aba Farisi.—Mt. 23:23.

Pele kuciindi eeco, ba Juda alimwi bakeelede kutela mitelo minji kubana Roma ibakali kubeendelezya. Mucikozyanyo, aabo ibakajisi nyika bakeelede kutela kubelesya mali naa zintu. Kuyeeyelwa kuti bakali kutelesyegwa 20 kusikila ku 25 pesenti yazintu nzyobakali kutebula. Kuyungizya waawo, kwakali mutelo ngwaakeelede kutela mu Juda umwi aumwi. Ooyu ngomutelo ba Farisi ngobakamubuzya Jesu. Wakatondezya mbotweelede kwaabona makani aakutela ciindi naakaamba kuti: “Aboobo amupe Kaisara zintu zya Kaisara, pele zintu zya Leza amupe Leza.”—Mt. 22:15-22.

Alimwi kwakali mali aakeelede kubbadelwa kuzintu zyakusambala izyakali kunjila naa kuzwa mudolopo. Mutelo ooyo wakali kutelwa kuzito, mumabbiliji, mpozyaandaanina nzila, kumanjililo aadolopo naa aamusika.

Mitelo yoonse bantu njobakeelede kutela mubulelo bwaba Roma, wakali mukuli uuminya kapati. Kweelana asyaazibwene mumakani aakaindi muna Roma wazina lya Tacitus, mubulelo bwa Mweendelezi muna Roma Tiberiyo, ciindi Jesu naakali anyika, “bantu bakkala mu Siriya amu Judaya bakalomba kuti mitelo icesyegwe nkaambo yakabaminya.”

Nzila mboyakali kubwezyegwa mitelo eeyo yakapa kuti mukuli wiindile kuminya. Mulimo wakubweza mutelo wakali kupegwa kumuntu iwakali kukonzya kupa mali manji kutegwa anjile mulimo ooyo. Bantu aabo ibakali kunoojana mpindu kumali ngobakali kutelesya, bakali kubeleka abamwi ibakali kubweza mitelo cacigaminina, akulijanina mpindu. Kweelede kuti Zakeyo wakalijisi babelesi bali boobo ibakali kubwezelela mutelo. (Lk. 19:1, 2) Tacidoonekwi buya kuti bantu cakali kubanyemya eeci alimwi tiibakali kubayanda naaceya aabo mbobakali kulangana limwi cacigaminina ciindi nobakali kutela.