Ndibikka Jehova Mubusena Bwakusaanguna Muzintu Zyoonse Nzyondisala

Ndakazyalwa mu May 19, 1940, mudolopo lya Amioûn, ku Lebanon. Nokwakainda myaka misyoonto, twakalongela kudolopo lya Tripoli, kwalo nkondakakomezyegwa mumukwasyi uukkomene iwakamuzyi alimwi akumuyanda Jehova Leza. Ndime keela akati kabana bosanwe, basimbi botatwe abasankwa bobilo. Kubazyali bangu, kujana mali tiicakali cintu ciyandika kapati kulimbabo. Mumukwasyi wesu, cintu cakali kuyandika kapati nkwiiya Bbaibbele, miswaangano ya Bunakristo alimwi akugwasya bantu kuzyiba Leza.

Mumbungano yesu kwakali Banakristo bananike banji. Bamwi babo bakali ba Michel Aboud, ibakali kusololela ciiyo cabbuku. Bakaiya kasimpe ku New York akutalika mulimo wabupainiya ku Lebanon mu 1921. Ndilayeeya mbobakali kubalemeka alimwi akubagwasyilizya basikumanizya Cikolo ca Gileadi bobilo, ba Anne aba Gwen Beavor. Bakaba balongwe besu. Nokwakainda myaka minji, ndakakkomana kapati kubonana aba Anne ku United States. Mpoonya, ndakabonana aba Gwen, ibakakwatwa kuli ba Wilfred Gooch, alimwi bakali kubelekela a Beteli kuofesi yamutabi waku London, ku England.

MULIMO WESU WAKUKAMBAUKA MU LEBANON

Nondakacili mwana, kwakali Bakamboni basyoonto mu Lebanon. Pele twakabeleka cabunkutwe kuyiisya bantu Bbaibbele. Twakacita oobo nokuba kuti twakali kukazyigwa abasololi bazikombelo bamwi. Zintu zimwi izyakacitika ndiciziyeeya.

Bumwi buzuba, mebo amucizyi wangu Sana twakali kukambauka muŋanda imwi. Mupaizi wakaboola ooko nkotwakabede. Kuboneka kuti kuli wakamwiita. Mupaizi ooyo wakatalika kutukila mucizyi wangu. Wakamutontela ansi mucizyi wangu, mpoonya wakalicisa. Kumane muntu umwi wakatumina bakapokola, ibakaboola akubona kuti umwi wabagwasyilizya ba Sana. Bakamutola kupolisi mupaizi, kwalo nkobakajana kuti ujisi ntobolo. Mpoonya mupati wabakapokola wakamubuzya kuti: “Ino nduwe ni? Musololi wacikombelo naa musololi wazigwebenga?”

Cintu cimwi cakacitika ncondiyeeya kabotu-kabotu nciindi mbungano yesu noyakabbukiŋa bbaasi kuti itutole kudolopo ilyakali kulamfwu kapati kuyookambauka makani mabotu. Twakalikkomene kapati kusikila ciindi mupaizi wakubusena ooko naakamvwa kuti twakali kukambauka, mpoonya wakabunganya bantu banji kuti batulwane. Bakatufwubaazya, mane buya akutufwusa mabwe, bataata bakalicisa ankumo. Ndilabuyeeya busyu bwabo kabuzwide bulowa. Bakajokela kubbaasi abamaama, aboobo toonse twakabatobela kumwi katuyoowede. Nokuba boobo, tandikaalubi majwi ngobakaamba bamaama ciindi nobakali kubapukuta bulowa bataata, bakaamba kuti: “Akaka Jehova, kobalekelela. Nkaambo kunyina ncobazyi.”

Aciindi cimwi, twakaunka kuyooswaya bacibbululu kudolopo nkotwakali kuzwa. Notwakasika aŋanda yabasyaanene, twakajana musololi wacikombelo uuzyibidwe kapati, bbisyopu. Bbisyopu ooyo wakalizyi kuti bazyali bangu Mbaakamboni ba Jehova. Nokuba kuti ndakajisi buyo myaka iili cisambomwe, wakandifwubaazya kwiinda mukundibuzya kuti: “Nkaambo nzi ncotabbapatizyidwe?” Ndakaingula kuti ndicili mwana alimwi kutegwa ndibbapatizyigwe ndeelede kuzyiba zinji kujatikizya Bbaibbele akuba alusyomo luyumu. Tanaakakkomana abwiinguzi bwangu, aboobo wakaambila basyaanene kuti mebo tiindakamulemeka.

Nokuba boobo, zintu eezyi zibyaabi izyakacita tiizyakali zinji boobo pe. Mubwini, bantu baku Lebanon balasangalizya alimwi akusamausya. Aboobo twakabandika abantu banji kujatikizya Bbaibbele alimwi akusololela ziiyo zya Bbaibbele zinji.

MUKWASYI WESU WAKASALA KULONGELA KUCISI CIMBI

Kandili sicikolo, mukwesu uucili mwana-mwana waku Venezuela wakaboola kuswaya ku Lebanon. Twakali kuswaangana limwi, mpoonya bakatalika kweebana amucizyi wangu Wafa. Mukuya kwaciindi, bakakwatana akuyookkala ku Venezuela. Mumagwalo ngobakali kulemba, ba Wafa bakasola kukombelezya bataata kuti tulongele ku Venezuela. Ba Wafa bakali kucita oobo akaambo kakuti bakali kutuyeeya kapati. Nokwakainda ciindi, twakabamvwida akulonga.

Twakasika ku Venezuela mu 1953 akukkala mu Caracas, munsi-munsi aŋanda yamuleli wacisi. Mbwaanga ndakacili mwana, ndakali kukkomana kubona muleli wacisi kainda amoota wakwe iweebeka kapati. Pele tiicakali cuuba-uba kubazyali bangu kuzyibila cisi cipya, mwaambo, zilengwa, zyakulya alimwi ambokutontola ambokupya. Mane buya, nobakatalika buyo kubuzyibila buumi bwabo bupya kwakacitika cintu cimwi cibyaabi.

MAPENZI AKABOOLA

Bataata bakatalika kuciswa. Eeci cakatugambya, nkaambo bataata bakali bayumu akuboneka buyo kabotu. Tiitwakazyi kuti bakali kuciswa. Mpoonya bakajanwa abulwazi bwakkansa, aboobo bakaandulwa. Pele mukubula coolwe, bakafwa nokwakainda nsondo yomwe.

Cilakatazya kupandulula mbotwakauside kapati. Ndakajisi buyo myaka iili 13. Tiitwakali kulangila kuti bataata balafwa, twakalimvwa mbuli kuti kunyina notuyookkomana alimwi. Kwaciindi cili mbocibede, bamaama cakabakatazya kusyoma kuti balumi babo bakafwa. Nokuba boobo, twakabona kuti tweelede buyo kuzyibila, alimwi kwiinda mulugwasyo lwa Jehova, twakaliyumya. Nondakakkwanya myaka iili 16, ndakamanizya cikolo ku Caracas, ndakaliyandide kugwasya mukwasyi.

Aciindi eeco, mucizyi wangu Sana wakakwatwa kuli ba Rubén Araujo, ibakamanizya Cikolo ca Gileadi alimwi ibakajokela ku Venezuela. Bakasala kulongela ku New York. Bamukwasyi wangu bakasala kuti nduunke kuyunivesiti ku New York, aboobo ndakaakukkala ambabo. Bacizyi bangu abalumi babo bakandigwasya kuyumya cilongwe cangu a Jehova ciindi ncondakakkala ambabo. Kuyungizya waawo, kwakali bakwesu banji basimide mumbungano yaci Spanish ku Brooklyn. Bakwesu bobilo mbondakazyiba kapati akubalumba, mukwesu Milton Henschel alimwi amukwesu Frederick Franz; boonse bakali kubelekela a Beteli yaku Brooklyn.

Nondakali mumwaka wamamanino kuyunivesiti, ndakatalika kuyeeya kujatikizya ncondakali kucita mubuumi bwangu. Ndakabala akuyeeyesya zibalo zyamu Ngazi Yamulindizi izyaamba Banakristo ibakajisi mbaakani mumulimo wa Jehova. Ndakabona bapainiya alimwi abamukwasyi wa Beteli ibakali mumbungano yesu mbobakakkomene, aboobo andime ndakali kuyanda kuba mbuli mbabo. Nokuba boobo, tiindakalinaba Munakristo uubbapatizyidwe. Kakutanainda ciindi, ndakabona kuti ndakeelede kulyaaba kuli Jehova. Ndakacita oobo akubbapatizyigwa mu March 30, 1957.

KUSALA IKUYANDIKIKA KAPATI

Nondakamana kubbapatizyigwa, ndakatalika kuyeeya kujatikizya kuba mupainiya waciindi coonse. Ndakaliyandide kapati kuba mupainiya, pele ndakalizyi kuti kucita boobo kwakali kuyooba buyumu-yumu. Ino inga ndacikonzya buti kucita bupainiya kumwi kandicili kuyunivesiti? Twakatalika kulembelana magwalo abanamukwasyi kubaambila kuti ndiyanda kuleka cikolo, akujokela ku Venezuela kutegwa ndikatalike bupainiya.

Mu June 1957, ndakajokela ku Caracas. Nokuba boobo, ndakabona kuti bukkale bwabanamukwasyi tiibwakali kabotu. Bakali kuyandika muntu uubeleka kutegwa kabagwasyilizya. Aboobo ndakayeeya kuti, ino inga ndabagwasya buti? Ndakajana mulimo kubbanki, pele ndakaliyandide kucita bupainiya. Alimwi eeco ncondakajokela. Ndakalikanzide kuzicita zyoonse zyobilo. Kwamyaka minji, ndakali kubeleka kubbanki kumwi kandili mupainiya. Eelo kaka ndakalikkomene nokuba kuti ndakajisi bubi!

Alimwi ndakakkomana kapati ciindi nondakakwata ba Sylvia, mucizyi mubotu waku German iwakali kumuyanda kapati Jehova. Bakalongela ku Venezuela abazyali babo. Mukuya kwaciindi, twakaba abana bobilo, musankwa, Michel (Mike), musimbi, Samira. Alimwi ndakali kukkomana kulanganya bamaama. Bakaboola kuzookkala andiswe. Nokuba kuti ndakaleka bupainiya kutegwa ndilanganye mukwasyi, ndakazumanana kuba amuuya wabupainiya. Mebo a Sylvia twakali kucita bupainiya bwakugwasyilizya ciindi cakulyookezya.

KUSALA KUMBI KUPATI

Nondakali kupona buumi mbondaambide kumatalikilo aacibalo eeci, bana bakacili kwiiya. Kwaamba masimpe ndakalibukkede, alimwi bantu nkondakali kubeleka kubbanki bakali kundipa bulemu. Nokuba boobo, ncondakali kuyanda kapati nkubonwa kuti ndili mubelesi wa Jehova. Ndakazumanana kuyeeya ncondakali kukonzya kucita kutegwa bantu kabandibona boobo. Aboobo mebo abakaintu bangu twakakkala akubandika makani amali. Ndakati, kuti ndaleka kubeleka, inga bandipa mali manji. Akaambo kakuti twakanyina zikwelete, twakabona kuti ikuti twaubya-ubya buumi bwesu, tunoojisi mali aakubelesya kwaciindi cili mbocibede.

Tiicakali cuuba-uba kuleka mulimo, pele bakaintu bangu alimwi abamaama bakaukkomanina muzeezo ooyo. Aboobo ndakali kunootalika alimwi bupainiya. Ndakalikkomene kapati! Ndakalilibambilide kutalika bupainiya, pele twakatambula makani aatakali kuyeeyelwa.

CINTU NCOTWATAKALI KULANGILA!

Bumwi buzuba badokota bakaamba kuti ba Sylvia balaada. Toonse twakagambwa! Twakakkomana; pele alimwi ndakatalika kuyeeya makanze ngondakajisi aakutalika bupainiya. Sena ndizumanane kuba mupainiya? Tiilyakalampa, twakabuzumina bukkale oobu akutalika kulangila munamukwasyi uumbi. Pele ino mbuti kujatikizya makanze aangu aabupainiya?

Notwakamana kubandika makanze eesu, twakayeeya kuti tuzumanane amakanze eesu aakusaanguna. Mpoonya mu April 1985, Gabriel mwaneesu musankwa wakazyalwa. Nokuba boobo, ndakaleka mulimo wakubbanki akutalika bupainiya alimwi mu June 1985. Mukuya kwaciindi, ndakaba acoolwe cakuba umwi wamu Kkomiti Yamutabi. Pele mutabi tiiwakali mu Caracas, icaamba kuti ndakeelede kunooyenda musinzo uulampa makkilomita aali 80 mazuba obilo naa otatwe ansondo.

KULONGELA KUBUSENA BUMBI

Ofesi yamutabi yakali mudolopo lya La Victoria, aboobo mbuli mukwasyi twakayeeya kulongela ku La Victoria kufwaafwi a Beteli. Ooku kwakali kucinca kupati kulindiswe. Ndilaukkomanina mukwasyi wangu alimwi ndilabalumba kapati. Bube bwabo bwakandigwasya kapati. Mucizyi wangu Baha, wakalilisungwide kubalanganya bamaama. Mike wakalikwete, pele Samira a Gabriel twakacili kukkala limwi. Aboobo kulongela ku La Victoria cakali kwaamba kuti bakeelede kusiya balongwe babo ku Caracas. Abalo ba Sylvia bakeelede kuzyibila kukkala mudolopo nsyoonto. Alimwi toonse twakeelede kuzyibila kukkala mukaanda kasyoonto. Mubwini, nzinji zyakajatikizyidwe mukulonga kuzwa ku Caracas kuya ku La Victoria.

Nokuba boobo, zintu zyakacinca alimwi. Gabriel wakakwata mpoonya Samira wakatalika kulikkalila. Kumane mebo aba Sylvia twakatambwa ku Beteli mu 2007, kwalo nkotubelekela asunu. Mike, mwaneesu wakusaanguna, mwaalu alimwi walo abakaintu bakwe ba Monica, mbapainiya. Awalo Gabriel ulabeleka kali mwaalu, alimwi walo abakaintu bakwe ba Ambra, babelekela ku Italy. Samira, kuyungizya abupainiya, ulabeleka kali sikugwasyilizya ku Beteli uubelekela kuŋanda.

INGA NDASALA ZINTU NZIZYONYA

Mubwini, ndakapanga zyakusala zinji mubuumi bwangu. Pele tanduuside pe. Kuti ndayandika kusala alimwi, inga ndasala zintu nzizyonya. Ndilalumba kapati akaambo kazintu zyoonse nzyondamucitila Jehova. Kwamyaka minji, ndabona mbociyandika kuzumanana kuba acilongwe ciyumu a Jehova. Tacikwe makani tuyandika kusala cakucita muzintu zisyoonto naa zipati, ulakonzya kutupa luumuno oolo “lwiinda maano oonse.” (Flp. 4:6, 7) Mebo aba Sylvia tulikkomene kubelekela a Beteli, alimwi tulimvwa kuti Jehova wakulongezya kusala kwesu nkaambo lyoonse twali kumubikka mubusena bwakusaanguna mubuumi bwesu.