Mbotwakalanganizyigwa Tubwa Twangu
BA NICK ibakkala ku Oregon, U.S.A, bakaamba kuti: “Kumatalikilo aamwaka wa 2014, ndakali kuyaabweendeenda atubwa twangu mudolopo. Kanji-kanji mudolopo kwakali kujanika Bakamboni bobilo ibasamide cabulemu kabaimwi kumbali aatwakubikkila mabbuku twakukuba, alimwi boonse ibakali kwiinda bakali kubajuzya calukkomano.
Bakamboni aabo tiibakali kutondezya buyo luzyalo kubantu, pele bakali kulutondezya akutubwa twangu. Bumwi buzuba ba Elaine, balo ibakaimvwi munsi-munsi akakubikkila mabbuku kakukuba, bakapa tubwa twangu mabbisiketi. Kuzwa buzuba oobo, lyoonse mebo atubwa twangu twainda munsi-munsi ambabo, tubwa twangu twakali kubazuzila.
Kwamyezi minji, tubwa twangu twakali kwaakkomanina mabbisiketi alimwi andime ndakali kukkomana kubandika a Bakamboni aabo. Pele ndakali kuwayawaya kupanga cilongwe ambabo. Ndakajisi myaka yakuzyalwa iinda ku 70, nokuba boobo, tiindakazizyi nzyobakali kusyoma Bakamboni. Akaambo kakuti zikombelo zinji zyakandityompya, ndakabona kuti inga cainda kubota kuti kandilibaIila buyo Bbaibbele ndemwini.
Aciindi eeci, ndakali kubona Bakamboni bamwi mumasena amwi aamudolopo kabaimvwi munsi-munsi aatwakubikkila mabbuku twakukuba. Abalo bakali kubandlika cabulongwe. Bakalilyaabide kwiingula mibuzyo yangu yamu Bbaibbele, eeci cakapa kuti ndibasyome.
Bumwi buzuba, ba Elaine bakandibuzya kuti: Sena mulasyoma kuti banyama nzipego kuzwa kuli Leza?’ Ndakaingula kuti, ‘Inzya, ndilasyoma oobo!’ Mpoonya bakandibalila Isaya 11:6-9. Ndakakabona kaambo, nokuba boobo ndakacili kuwayawaya kutambula mabbuku aabo.
Mumazuba aakatobela, ndakali kukkomana kuba amibandi mifwaafwi pele iikkomanisya aba Elaine abalumi babo ba Brent. Mpoonya bakandikulwaizya kubala bbuku lya Matayo kusikila ku Milimo kutegwa ndimvwisye zijatikizyidwe mukuba Munakristo wakasimpe. Ndakacita oobo. Tiilyakalampa, ndakazumina kwiiya Bbaibbele aba Brent alimwi aba Elaine. Eeci cakacitika akati-kati kamwaka wa 2016.
“Nsondo ansondo ndakali kukulangila kwiiya Bbaibbele alimwi akujanika kumiswaangano ku Ŋanda ya Bwami. Ndakakkomana kwiiya akuzyiba cini Bbaibbele ncoliyiisya, cakuti nikwakainda mwaka omwe amyezi misyoonto ndakaba Kamboni uubbapatizyidwe. Lino ndijisi myaka 79, alimwi ndilikkomene kuti ndakacijana cikombelo cakasimpe. Jehova wandilongezya kwiinda mukundipa coolwe cakuba mumukwasyi wababelesi bakwe balyaabide.”