Kukongwa Tiikwakabalesya Kubelekela Jehova

Bakwesu abacizyi tiibakayoowa, alimwi bakazumanana kuswaangana antoomwe. Baalu bakabikka bubambe kutegwa bakwabilile basikumwaya. Mukwesu André Carbonneau, loya wakucisi ca Canada iwakakwabilila bakwesu mumyaka eeyo wakati: “Kanji-kanji mukwesu wakali kwaambilwa kwiima afwaafwi abusena bwakuswaanganina kajisi fooni. Kuti wabona nkamu yabasimanyongwe, cakufwambaana wakali kucenjezya baalu kujatikizya ntenda iyakali kulangilwa.”

Kufwumbwa ciindi basimanyongwe nobakali kubanyonganya, baiminizi bobilo bazwa kuofesi yamutabi bakali kuswaya bakwesu kutegwa babayumye-yumye. Ba André bakati: “Cakali kugambya kuti baiminizi bamutabi kanji-kanji bakali kujana kuti busena bwakuswaanganina buzwide bakwesu abacizyi bakkomene alimwi bamweta-mweta.”

Aabo batakajatikizyigwa cacigaminina amanyongwe aayo, kubikkilizya abasikwiiya Bbaibbele, abalo bakali kutondezya makanze aali boobu. Ba André balayeeya mbobakabandika amukaintu umwi iwakali afwaafwi kuba sikumwaya uutanabbapatizyigwa. Mukaintu ooyo wakabaambila kuti: “Ciindi nondakabona a TV mbobakali kuumwa, ndakabona kwiindana kuliko akati ka Banakristo bakasimpe abakubeja, alimwi ndiyanda kuti ndibe Munakristo wakasimpe.”

Cabusicamba Bakakwabilila Basyominyina

Mumyaka eeyo iikatazya, basikumwaya bakatondezya lusyomo luyumu abusicamba kwiinda mukuzumanana mumulimo wakukambauka. Aabo ibakali kwiiminina basyominyina munkuta abalo bakatondezya lusyomo luli boobu.

Kanji-kanji Bakamboni bakali kubejelezyegwa abasikapepele kuti mbantu ibanyonganya mikwasyi, ibatayandi busilisi, alimwi akuti babukila mfwulumende. Aabo ibakali kubaiminina bakali kubikka mpuwo yabo alimwi amulimo wabo muntenda.

Ba John Burns, baloya ibakazwa kumutabi wakucisi ca Canada ibakali kugwasya bakwesu bakucisi ca Georgia mumyaka eeyo, balayeeya kuti: “Bakwesu abacizyi banyenzi ibakali kubeleka mulimo wabuloya bakalisungula kuti bagwasye. Nokuba kuti mulimo wabo wakali kukonzya kuba muntenda, tiibakali kuyoowa kuunka kunkuta akulizyibya kuti Mbaakamboni ba Jehova.” Bakamboni aaba basicamba bakagwasyilizya ‘kukwabilila akusitikizya makani mabotu mumulawo.’—Flp. 1:7.

Bantu Bamucisi ca Georgia Batongooka Kujatikizya Kupenzyegwa kwa Bakamboni

Aciindi eeci kupenzya Bakamboni kwakazumanana. Aboobo kutalikila mu January 8, 2001, Bakamboni bakatondezya bantu bamucisi eeci cipepa icakali kutondezya kulomba kwabo kunkuta kuti bakwabililwe kubantu ibakali kubalwana akuti bapegwe mulandu bantu aabo ibakali kunyonganya basicisi basiluumuno.

Mukwesu Burns iwakapandulula makanze aakulomba ooku kunkuta, wakati: “Makanze eesu akali akuti tutondezye kuti bantu banji bamucisi ca Georgia bakali kubijilwa akulwanwa nkobakali kulwanwa Bakamboni ba Jehova akuti kabunga buyo kasyoonto kabantu basikubukila bukombi mbabakali kucita boobo.”

Munsondo buyo zyobilo, bantu bapati-pati ibali 133,375 kuzwa muzyooko zyoonse zyacisi ca Georgia—alimwi bunji bwabo ibakali kuzulilwa mucikombelo ca Orthodox, bakalisaina pepa eeli. Nokuba kuti Pulezidenti Shevardnadze, wakapegwa pepa eeli lisainidwe, kupenzya Bakamboni kwakazumanana. Basikubukila bukombi bakazumanana kulwana Bakamboni acaali.

Aciindi eeci, Jehova wakazumanana kubalongezya bantu bakwe. Ciindi basikubukila bukombi nobakali kupenzya bantu ba Leza, Jehova wakali kwiita bantu banji babombe myoyo kuzwa mubukombi bwakubeja.

Kwaangununwa Kubukombi Bwakubeja

Kwamyaka minji yabuumi bwabo, ba Babilina Kharatishvili bakalilyaabide kucikombelo ca Georgian Orthodox. Nobakajisi myaka yakuma 30, bakali kuswaya madolopo aminzi iindene-indene, kabayiisya bantu kujatikizya buumi mbobakali kupona basaante.

Pele ba Babilina bakali kuyanda kuzyiba zinji kujatikizya Leza. Aboobo bakayeeya kuti bakajanike kucikolo cacikombelo ca Georgian Orthodox. Ciindi cimwi, mupati wacikombelo wakabatondezya baswiilizi bakwe bbuku litegwa Luzyibo Lusololela Kubuumi Butamani alimwi wakabakulwaizya kuti bakajane bbuku eelyo kuli Bakamboni ba Jehova. Wakabaambila kuti: “Bbuku eeli lilakonzya kumuyiisya zinji kujatikizya Bbaibbele.”

Ba Babilina bakagambwa kapati. Lyoonse tiibakali kuyanda kubandika a Bakamboni, pele lino mupati wacikombelo wakali kukulwaizya kubala mabbuku aabo! Bakalyaambauzya mumoyo kuti: ‘Kuti kandiyandika kwiiya kujatikizya Leza kuli Bakamboni ba Jehova, ino ncinzi ncondicita ookuno?’ Cakufwambaana bakabayandaula Bakamboni mudolopo litegwa Poti mpoonya bakatalika kwiiya Bbaibbele.

Ba Babilina nobakali kuyaabwiiya zinji zyamu Bbaibbele, bakacinca kapati mubuumi bwabo. Cimwi ciindi bakaamba kuti: “Ciindi nondakalibalila kuti Bbaibbele lyaamba kuti ncibi kukomba zikozyanyo, ndakaleka kukomba misyobo yoonse yamituni. Ndakalisinizyide ncobeni kuti ncecakali cintu ciluzi kucita.” Aciindi eeco nobakajisi myaka yakuma 70, bakasala kuti babe umwi wa Bakamboni ba Jehova.

Cuusisya ncakuti, mu 2001, ba Babilina bakaciswa akufwa kabatanabbapatizyigwa. Pele muzyukulu wabo musimbi, Izabela, wakazoobbapatizyigwa alimwi lino ubelekela Jehova cakusyomeka.

Bakali Kuyanda Kuba Siite

Ba Eliso Dzidzishvili bakajisi myaka iili 28 ciindi nobakayanda kuba siite. Akaambo kakuti kwakanyina cikolo cakuyiisya bamasiite afwaafwi adolopo lya Tkibuli mobakali kukkala, bakalongela ku Tbilisi mu 2001. Nobakacili kulindila kwiitwa kucikolo cabasiite, bakatalika kubeleka mulimo wakuyiisya uutabelekwi mawoola manji. Umwi wabasicikolo mbobakali kuyiisya wakali mwana wamucizyi uutegwa Nunu.

Ba Eliso bakati: “Kanji-kanji twakali kubandika makani aamu Bbaibbele. Cabukali ndakali kwiiminina cikombelo ca Orthodox, kakuli ba Nunu cakukkazika moyo bakali kunditondezya kapango kamwi akamwi. Bumwi buzuba, bakandibalila broshuwa yakuti Ncinzi Leza Ncayanda Kulindiswe? Notwakali kuyaabubala mincali akubala magwalo mu Bbaibbele, ndakazyiba kuti kukomba zikozyanyo kulakazyanya amulawo wa Leza.”

Mukuya kwaciindi, ba Eliso bakaunka kucikombelo cakubusena oobo akubuzya mupati wacikombelo mibuzyo imwi. Kwiinda mubwiinguzi bwakwe cakalibonya kuti njiisyo zyacikombelo tiizyakali kweendelana ancolyaamba Bbaibbele. (Mk. 7:7, 8) Kabasinizyide kuti bakajana kasimpe, cakufwambaana bakatalika kwiiya Bbaibbele a Bakamboni ba Jehova, mpoonya tiilyakalampa bakabbapatizyigwa.

Kuyaka Maanda aa Bwami Nokuba Kuti Bakali Kukazyigwa

Kuzikusika mu 2001, mbungano zinji zyakali kuyandika masena aali kabotu mwakuswaanganina kukomba Leza. Kweelana abuvwuntauzi bumwi, Maanda aa Bwami aali 70 akali kuyandika. Aboobo, bubambe bwakuyaka Maanda aa Bwami bwakatalisyigwa nokuba kuti kwakali kukazyigwa mucisi.—Ezr. 3:3.

Cakufwambaana kakamu kabasikuyaka kakatalika kubambulula ŋanda iyakali kubelesyegwa ambungano zili mbozibede mu Tbilisi. Mpoonya Maanda aa Bwami obilo akazikuyakwa—yomwe mu Tbilisi imwi mu Chiatura, cisi ca Georgia nkocili kumbo.

Mukwesu Tamazi Khutsishvili, iwakatola lubazu mumayake aaku Chiatura, wakaamba kuti: “Swebo notuli 15 twakali kubelekela abusena bwamayake buzuba abuzuba. Tiilyakalampa bantu boonse mudolopo bakazyiba kuti twakali kuyaka Ŋanda ya Bwami mpya. Zimwi ziindi twakalikumvwa maŋunuŋunu aakuti basikutukazya bakali kuyanda kusika kutegwa banyonyoone Ŋanda ya Bwami.”

Ino mulimo wakuyaka wakali kuyoozwidilila buti akukazyigwa kuli boobu? Ba Tamazi bakaamba kuti: “Twakazumanana kuubeleka mulimo wesu akumanizya kuyaka Ŋanda ya Bwami mumyezi yotatwe. Nokuba kuti twakali kukongwa, kunyina basikukazya bakaboola.”a

Lugwasyo Ilwakali Kulindilwa Kwaciindi Cilamfwu Lwasika

Mu October 2003, mayake akatalika mudolopo lya Samtredia. Basikubukila bukombi alimwi bakatalika kubakonga bakwesu banyenzi. Bwaanda bwa Ŋanda ya Bwami bwakazwide aakuyakwa alimwi daka lyakacili litete ciindi basikukazya nobakasika akwiimwaya ŋanda.

Nokuba boobo, mu November 2003, zintu zipya izyakacitika mucisi ca Georgia zyakapa kuti bakwesu abacizyi bakatalukwe. Kucinca kwamfwulumende iyakali kulela kwakapa kuti kube lwaanguluko lwabukombi lunji. Akaambo kaceeci, bantu banji bakaangwa ibakali kuzulilwa mukabunga ka Orthodox kabasikubukila bukombi ibakali kuuma Bakamboni ba Jehova.

Bantu ba Leza Balongezyegwa

Kupenzyegwa mbokwakamanina buyo, bantu ba Jehova mucisi ca Georgia bakatambula zilongezyo zinji zyakumuuya. Lyamuswaangano wacooko mu 2004, Bbaibbele lya Busanduluzi Bwanyika Mpya bwa Magwalo aa Banakristo aa Chigiriki lyamumwaambo waci Georgian, lyakamwaigwa.

Mpoonya lya Muswaangano Wacooko mu 2006 wakuti “Lufwutuko Luli Afwaafwi!,” kwakacitika acimbi cintu icitakalubwi. Basimuswaangano bakakkomana kapati ciindi nobakamvwa kuti mukwesu Geoffrey Jackson, wamu Kabunga Keendelezya, wakali kuyoopa makani kubaswiilizi. Alimwi cakakkomanisya kapati ciindi Mukwesu Jackson naakaambilizya kumwaigwa kwa Bbaibbele lya Busanduluzi Bwanyika Mpya lyoonse mbolizulwa mumwaambo waci Georgian!

Yakabeenda misozi banji ibakajanika kumuswaangano akaambo kakukkomana. Mucizyi umwi wakati: “Tandikonzyi kulupandulula lukkomano ndondakajisi ciindi notwakatambula Bbaibbele lyoonse mbolizulwa. . . . Ncobeni cakali cintu citakalubwi.” Bantu bainda ku 17,000 bakakkomana apobwe eeli lyakumuuya ilitakalubwi mumakani aakaindi aajatikizya bantu ba Jehova mucisi ca Georgia.