Sena Mulasika Aciimo ca Kristo?

1, 2. Nimbaakani nzi Munakristo umwi aumwi njayelede kuba aanjiyo? Amupe cikozyanyo.

INO ncinzi mukaintu ncabikkila kapati maano ciindi nasala mucelo wakuula kumusika? Kanji-kanji, inga talangi mbouli mupati naa mboutaduli mucelo ooyo. Muciindi caboobo, ulangaula mucelo uununkila kabotu alimwi uulibonya kabotu, alimwi uukonzya kuligwa. Uyanda kuti mucelo ooyo kaubizidwe, nkokuti kausimide.

² Ciindi muntu amana kwiiya makani kujatikizya Jehova alimwi akusala kubbapatizyigwa, cilongwe cakwe a Leza cilazumanana kukomena. Mbaakani yakwe njakuba Munakristo uusimide. Kusima ooku takwaambi kukomena mumyaka pe. Kwaamba kukomena kumuuya, nkokuti kuba aacilongwe ciyumu a Jehova. Mwaapostolo Paulo wakali kuyanda kuti Banakristo baku Efeso bakomene kumuuya. Wakabakulwaizya kukamantana mulusyomo alimwi akuzumanana kwiiya makani aajatikizya Jesu kutegwa ‘babe bantu bapati akusika aciimo cizulide ica Kristo.’—Ef. 4:13.

3. Mbuti mbungano yabana Efeso mboikozyene abantu ba Jehova mazuba aano?

³ Mbungano yabana Efeso yakaliko kale kwaciindi cilamfwu ciindi Paulo naakabalembela lugwalo lwakwe. Bantu banji mumbungano eeyo bakalijisi kale luzyibo, bakali Banakristo basimide. Nokuba boobo, kwakali bamwi ibakali kuyandika kuyumya cilongwe cabo a Jehova. Ncimwi buyo amazuba aano, kuli bakwesu abacizyi banji ibamubelekela Jehova ciindi cilamfwu alimwi baba Banakristo basimide. Nokuba boobo, bamwi mumbungano tabanasima pe. Mucikozyanyo, bantu banji balabbapatizyigwa mwaka amwaka, aboobo bamwi baciyandika kukomena kutegwa basime. Mbuti kujatikizya ndinywe?—Kol. 2:6, 7.

MBUTI MUNAKRISTO MBWAKONZYA KUKOMENA?

4, 5. Mbuti Banakristo basimide mbobaindene, pele ino ncinzi boonse ncobajisi? (Amubone cifwanikiso icili kumatalikilo aacibalo.)

⁴ Ikuti mwalanga micelo iibizidwe iisambalwa kumusika mulabona kuti yoonse taikozyene cakumaninina. Nokuba boobo, inga ilikozyene munzila zimwi izitondezya kuti ilibizidwe. Ncimwi buyo akusima kwa Banakristo. Tabakozyene cakumaninina pe. Bazwa muzisi ziindene-indene alimwi baliindene-indene mbobakakomezyegwa. Mbamisela yiindene-indene alimwi zintu nzyobayanda anzyobatayandi ziliindene-indene. Nokuba boobo, Banakristo basimide boonse balijisi bube bumwi bukozyene butondezya kuti balisimide. Ino mbube nzi bumwi akati kabube oobo?

⁵ Munakristo uusimide wiiya Jesu alimwi ‘akwiitobelesya mikondo yakwe.’ (1Pet. 2:21) Jesu wakaamba kuti cilayandika kapati kuyanda Jehova amoyo woonse, muuya woonse, alimwi amizeezo yoonse alimwi akuyanda basimukoboma. (Mt. 22:37-39) Munakristo uusimide ulasolekesya canguzu kumvwida lulayo oolu. Buumi mbwapona butondezya kuti cilongwe cakwe a Jehova alimwi aluyando ndwajisi kuli bamwi nzyezintu ziyandika kapati kulinguwe.

6, 7. (a) Mbube nzi bumbi mbwatondezya Munakristo uusimide? (b) Mibuzyo nzi njotweelede kulibuzya?

⁶ Luyando mbube buyo bumwi mbwatondezya Munakristo uusimide. (Gal. 5:22, 23) Alimwi ulatondezya kuti mubombe moyo, ulalilesya, alimwi ulakkazika moyo. Bube oobu bulakonzya kumugwasya kuliyumya mubukkale bukatazya kakunyina kukalala alimwi akumugwasya kuliyumya kukutyompwa kakunyina kucileka kuba abulangizi. Ciindi caciiyo cakwe mwini, Munakristo uusimide ulazumanana kuyandaula njiisyo zyamu Bbaibbele izikonzya kumugwasya kuzyiba cibotu acibi. Kumane, ciindi nabelesya manjezyeezya aakwe ayiisyidwe njiisyo zyamu Bbaibbele, ulakonzya kusala cabusongo. Munakristo uusimide ulalicesya, aboobo usyoma kuti nzila zya Jehova alimwi azyeelelo zyakwe nzibotu kwiinda zyakwe mwini.a (Amubone bupanduluzi buyungizyidwe.) Musungu kukambauka makani mabotu alimwi ulacita cili coonse ncakonzya kutegwa mbungano izumanane kukamantana.

⁷ Tacikwe makani naa twamubelekela Jehova kwaciindi cilamfwu buti, umwi aumwi wesu inga walibuzya kuti: ‘Sena kuli mondiyandika kucinca kutegwa ndiiye Jesu cakulomya? Sena kuli mondiyandika kubambulula?’

“CAKULYA CIYUMU NCABANTU BASIMIDE”

8. Ino Jesu wakaazyi buti Magwalo alimwi wakali kwaamvwisya buti?

⁸ Jesu Kristo wakalaazyi alimwi wakali kwaamvwisya kabotu Magwalo. Noliba leelyo naakajisi buyo myaka yakuzyalwa iili 12, wakabelesya Magwalo ciindi naakali kubandika abamayi mutempele. “Boonse aabo ibakali kumuswiilila bakali kwiile kulijata kumulomo akaambo kabusongo mbwaakajisi alimwi ambwaakali kwiingula.” (Lk. 2:46, 47) Kuzwa waawo, ciindi naakali kukambauka, wakabelesya Jwi lya Leza cabusongo kutegwa azule basinkondonyina.—Mt. 22:41-46.

9. (a) Ino Munakristo uusimide ujisi mulongo wakubala uuli buti? (b) Nkaambo nzi ncotweelede kubala Bbaibbele?

⁹ Muntu uuyanda kuba Munakristo uusimide wiiya cikozyanyo ca Jesu alimwi ulasolekesya kusikila mpagolela kutegwa alimvwisye Bbaibbele. Ulazumanana kuyandaula kasimpe ikali mu Magwalo, nkaambo ulizyi kuti “cakulya ciyumu ncabantu basimide.” (Heb. 5:14) Munakristo uusimide ulayanda kuba ‘aluzyibo lwini-lwini’ iluli mu Bbaibbele. (Ef. 4:13) Aboobo, amulibuzye kuti: ‘Sena ndilabala Bbaibbele buzuba abuzuba? Sena ndilijisi mulongo waciiyo cangu ndemwini? Sena tulacita ciiyo cakukomba mumukwasyi nsondo ansondo?’ Ciindi nomubala Bbaibbele, amuyandaule njiisyo izikonzya kumugwasya kuzyiba Jehova mbwayeeya alimwi ambwalimvwa. Kumane amubelesye njiisyo eezyo ciindi nomusala cakucita. Eeci ciyoomugwasya kuba aacilongwe ciyumu a Jehova.

10. Mbuti Banakristo basimide mbobalimvwa kujatikizya lulayo lwa Leza alimwi anjiisyo zyakwe?

¹⁰ Munakristo tayelede buyo kuzyiba Bbaibbele ncolyaamba. Pele weelede kuyandisya lulayo lwa Leza anjiisyo zyakwe. Mpoonya luyando oolo ulalutondezya kwiinda mukuyandisya kucita kuyanda kwa Jehova muciindi cakucita zintu nzyayanda mwini. Alimwi ulacinca mbwapona, mbwayeeya alimwi amicito yakwe. Mucikozyanyo, wiiya Jesu alimwi akuba abuntu bupya, bwalo ‘ibulengwa kweelana akuyanda kwa Leza mubululami bwini-bwini alimwi amukusyomeka.’ (Amubale Baefeso 4:22-24.) Cilayandika kapati kuzyiba kuti Leza wakabelesya muuya wakwe uusalala kusololela balembi ba Bbaibbele. Aboobo, ciindi Munakristo nabala Bbaibbele, muuya uusalala wa Leza ulamugwasya kuyungizya luzyibo, kukomezya luyando lwakwe, alimwi akuyumya cilongwe cakwe a Jehova.

AMUKULWAIZYE MUUYA WALUUMUNO

11. Ino Jesu wakali mubukkale buli buti ciindi naakali anyika?

¹¹ Jesu wakali muntu uulondokede. Nokuba boobo, ciindi Jesu naakali anyika, wakazingulukidwe abantu batalondokede. Bazyali bakwe alimwi abanabokwabo tiibakalondokede pe. Nobaba basikumutobela bakwe mbaakali kuyandisya bakali kutondezya bube mbuli kulisumpula alimwi akuliyanda. Mucikozyanyo, kumangolezya katanajaigwa, basikwiiya bakwe bakatalika kukazyanya “kujatikizya wakali kubonwa kuti ngomupati kwiinda boonse.” (Lk. 22:24) Nokuba kuti bakalijisi mizeezo eeyi akaambo kakutalondoka, Jesu wakalizyi kuti basikumutobela bakali kuyooba Banakristo basimide akupanga mbungano iikamantene. Busiku mbubwenya oobo, Jesu wakabapailila kuti kabakamantene. Wakalomba Usyi wakujulu kuti bazumanane kukamantana, wakati: “Mbubonya yebo Taata andime mbotukamantene, ikuti abalo kabakamantene andiswe.” Wakayungizya kuti: “Ikutegwa babe bamwi mbubonya swebo mbotuli bamwi.”—Joh. 17:21, 22.

12, 13. (a) Ino tweelede kuba ambaakani nzi mbotuli Banakristo? (b) Mbuti mukwesu umwi mbwaakaiya kukulwaizya muuya walukamantano?

¹² Munakristo uusimide ukulwaizya muuya walukamantano mumbungano. (Amubale Baefeso 4:1-6, 15, 16.) Mbotuli Banakristo, tujisi mbaakani ‘yakuswaanganizyigwa kabotu-kabotu akubelekela antoomwe,’ calo icaamba kubeleka mulukamantano. Kutegwa kube lukamantano luli boobu, Munakristo weelede kulicesya. Aboobo, nokuba kuti wajatikizyigwa akutalondoka kwabamwi, Munakristo uusimide ulabeleka canguzu kutegwa mbungano izumanane kukamantana kapati. Aboobo, amulibuzye kuti: ‘Ino ndilimvwa buti ikuti mukwesu naa mucizyi walubizya? Ino ndilimvwa buti ikuti umwi wandicisizya moyo? Sena ndijisi cilengwa cakucileka kwaambauzyanya amuntu ooyo? Sena ndilasola kubambulula cilongwe amuntu ooyo?’ Munakristo uusimide ulayandisya kumana penzi ikutali kuti abe ngonguwe uuletela bamwi mapenzi.

¹³ Amubone cikozyanyo caba Uwe. Musyule, bakali kunyema ikuti mukwesu naa mucizyi umwi wabalubizyila. Mpoonya bakasala kubelesya Bbaibbele alimwi abbuku lya Insight on the Scriptures akubala makani aajatikizya Davida. Nkaambo nzi ncobakasala Davida? Akaambo kakuti babelesi ba Leza bamwi bakali kumupenzya Davida. Mucikozyanyo, Mwami Saulo wakasoleka kuyandaula nzila yakujaya Davida, bamwi bantu bakali kuyanda kumupwaya mabwe, alimwi naba mukaintu wakwe wakamuseka. (1Sam. 19:9-11; 30:1-6; 2Sam. 6:14-22) Pele nokuba kuti bamwi bakali kumucitila zintu mbuli zyeezyi, Davida wakali kumuyanda Jehova alimwi wakali kumusyoma. Davida alimwi wakali kutondezya luse. Ba Uwe bakazyiba kuti abalo mbobakali kuyandika kucita. Kwiinda mukubala Bbaibbele, bakazyiba kuti bakali kuyandika kucinca mbobakali kulimvwa kujatikizya kulubizya kwa Banakristonyina. Bakeelede kucileka kuyeeya kulubizya kwa Banakristonyina mpoonya akukulwaizya muuya walukamantano mumbungano. Sena andinywe nembaakani yanu?

AMUSALE BALONGWE AKATI KABANTU BACITA KUYANDA KWA LEZA

14. Ino Jesu wakali kusala balongwe bali buti?

¹⁴ Jesu Kristo wakali kumvwana abantu. Baalumi, bamakaintu, bakubusi, bacembeede, alimwi nobaba bana baniini, bakali kulikwaya kuba aa Jesu. Pele wakasala kabotu balongwe bakwe. Wakaambila baapostolo bakwe kuti: “Munooli beenzuma ikuti kamucita nzyondimulailila.” (Joh. 15:14) Jesu wakasala balongwe akati kabantu ibakali kumutobela cakusyomeka alimwi ibakali kuyanda kubelekela Jehova. Sena musala balongwe bayanda Jehova amoyo woonse? Ino nkaambo nzi ncociyandika?

15. Mbuti bakubusi mbobakonzya kugwasyigwa ikuti baba acilongwe a Banakristo basimide?

¹⁵ Micelo imwi ibizwa kabotu ikuti kakuli mumuni wazuba uukasaala. Mbubwenya buyo, luyando lwabakwesu abacizyi lulakonzya kumugwasya kuba Munakristo uusimide. Sena muli mukubusi uuyandaula cakucita mubuumi? Ikuti naa mboobo, ncamaano kusala balongwe ibabelekela Jehova kwaciindi cili mbocibede alimwi ibakulwaizya muuya walukamantano mumbungano. Ambweni bakajisi mapenzi amwi mubuumi bwabo alimwi ambweni bakaliyumya mubuyumuyumu bumwi mukubelekela Jehova. Balakonzya kumugwasya kusala nzila yiinda kubota mubuumi. Ciindi nomujanika ambabo, balakonzya kumugwasya kusala cabusongo alimwi akuzumanana kukomena kumuuya mbomuli Munakristo.—Amubale Bahebrayo 5:14.

16. Mbuti bacembeede mumbungano imwi mbobakagwasya mucizyi umwi ciindi naakacili mukubusi?

¹⁶ Ba Helga balayeeya kuti kakuceede buyo mwaka omwe kuti bamanizye cikolo, basicikolonyina banji bakali kubandika kapati makani aajatikizya mbaakani zyabo zyakumbele. Banji bakali kuyandisya kuunka kuyunivesiti kutegwa bakaiye mulimo mubotu. Nokuba boobo, ba Helga bakabandika abalongwe basimide mumbungano yabo. Bakaamba kuti: “Banji bakali bapati kwiinda ndime, alimwi bakandigwasya kapati. Bakandikulwaizya kutalika mulimo waciindi coonse. Kuzwa waawo, ndakacikonzya kucita bupainiya myaka yosanwe. Lino ndilikkomene akaambo kakuti ndakabelesya myaka yabukubusi bwangu mumulimo wa Jehova. Tanduuside pe kujatikizya kusala kwangu.”

17, 18. Mbuti mbotukonzya kumubelekela Jehova munzila yiinda kubota?

¹⁷ Ciindi notwiiya Jesu, tuyoozumanana kukomena akuba Banakristo basimide. Tuyooba acilongwe ciyumu kapati a Jehova, alimwi luyando lwesu lwakumubelekela luyookomena kapati alwalo. Muntu kuti kasimide, ulakonzya kumubelekela Jehova munzila yiinda kubota. Jesu wakakulwaizya basikumutobela kuti: “Aumunike mumuni wanu kubantu kutegwa babone milimo yanu mibotu akupa bulemu kuli Uso uuli kujulu.”—Mt. 5:16.

¹⁸ Mucibalo eeci, twaiya Munakristo uusimide mbwakonzya kwiigwasyilizya kapati mbungano. Munakristo ulatondezya kuti ulisimide kwiinda munzila njabelesya manjezyeezya aakwe. Mbuti manjezyeezya eesu mbwaakonzya kutugwasya kusala cabusongo? Alimwi mbuti mbotukonzya kwaalemeka manjezyeezya aabamwi? Mibuzyo eeyi iyooyingulwa mucibalo citobela.