Prólogo

XaSanto Tatsokgni wa tamakatsin nema Dios matsokgninalh kimpalakatakan. Talakaskin nalikgalhtawakgayaw xlakata nalakgapasaw tiku matsokgninalh (Juan 17:3; 2 Timoteo 3:16). Kʼuma tatsokgni, Jehová Dios masiya tuku lakapastaknit natlawa xpalakatakan latamanin chu xpalakata katiyatni (Génesis 3:15; Apocalipsis 21:3, 4).

Ni anan atanu libro nema lu kamakgtaya latamanin. Biblia kinkamakgpuwantiniyan nalimasiyayaw xtayat Jehová, chuna la tapaxkit chu talakgalhaman. Nachuna, masta takgalhkgalhin nema kamakgtaya latamanin natayanikgo tuku lu tuwa titaxtukgo. Na masiya tuku anan kʼuma kakilhtamaku nema ni tatalakxtumi xtalakaskin Dios (Salmo 119:105; Hebreos 4:12; 1 Juan 2:15-17).

Dios malakpuwaninalh natsokgwilikan Biblia ktachuwin hebreo, arameo chu griego. Matitaxtikanit xamaktuminika o ni xamaktuminika kliwaka akgtutu mil tanu tanu tachuwin. Wa libro nema tlakg matitaxtikanit kʼatanu tachuwin chu tlakg maʼakgpitsikanit. Uma ni kaks malakawaninan, xlakata Biblia xlichuwinanita uma: «Uma xatlan tamakatsinin xla Tamapakgsin natalichuwinan kxlilakgatum katiyatni xlakata natamakatsininan kputum laklanka kachikinin, chu alistalh namin lisputni» (Mateo 24:14).

Xlakata kkatsiyaw pi tamakatsinin nema min kBiblia lu xlakaskinka, kʼuma traducción kmaklakaskinitaw tachuwin nema ni tuwa akgatekgskan chu ni tuwa likgalhtawakgakan, nachuna ni klakgpalinitaw tuku xmin ktatsokgni hebreo, arameo chu griego. Makgapitsi artículos nema minkgo kʼapéndice («Tuku kuenta tlawaka akxni matitaxtika Biblia kʼatanu tachuwin», «Tuku limin uma edición» chu «Tuku tlawaka xlakata xkgalhiw Biblia asta la uku») lichuwinankgo tuku kuenta tlawaka akxni matitaxtika kʼatanu tachuwin, na lichuwinankgo tuku limin uma edición.

Tiku paxkikgo Jehová Dios kgalhiputunkgo maktum Biblia nema xaʼakchan chu nema taʼakgatekgsa kxtachuwinkan (1 Timoteo 2:4). Wa xlakata ktlawanitaw uma Biblia kxatotonaco chu klakaskinaw pi katamatitaxtilh klhuwa amakgapitsi tachuwin. Wix tiku putsapat Dios, kskiniyaw kintlatkan xalak akgapun xlakata uma Biblia namakgtayayan nalakgapasa (Hechos 17:27).