ÉXODO

1 Wa umakgolh xtukuwanikan xlakgkgawasan Israel tiku katachalh kʼEgipto, chatunu lakchixkuwin chu xfamiliajkan:* 2 Rubén, Simeón, Leví chu Judá; 3 Isacar, Zabulón chu Benjamín; 4 Dan chu Neftalí, Gad chu Aser. 5 Xliputum xkamanan Jacob tutumpuxamakaw xwankgonit. Chu José xlamaja kʼEgipto. 6 Titaxtulh kilhtamaku, nilh José chu na nikgolh putum xnatalan chu putum tiku latamakgolh kxkilhtamaku. 7 Israelitas* kgalhikgolh lhuwa kamanan chu tsukukgolh lhuwankgo, lakapala lhuwankgolh chu uma kachikin lu tliwakga litaxtulh, wa xlakata lakapala talakgatumikgolh niku xwilakgo.

8 Titaxtulh kilhtamaku tsukulh mapakgsinan kʼEgipto chatum mapakgsina tiku ni xlakgapasa José. 9 Chu kawanilh xkachikin: «¡Kaʼakxilhtit! Xkachikin Israel tlakg lhuwa chu tlakg tliwakga nixawa akinin. 10 Wi tuku katlawaw xlakata nialh nalhuwankgo. Komo nichuna natlawayaw, akxni nala akgtum guerra akxtum nakatalakgo kintalamakgasitsinkan, nakinkatalatlawakgoyan chu nataxtukgo kpaís».

11 Wa xlakata tsukuka kamaskujukan chu kalakgayawaka xnapuxkun skujnin tiku xafuerza xkamaskujukgo, chu xafuerza kamakaxtlawika kachikinin Pitom chu Raamsés, kachikinin niku faraón wi tuku xmaki. 12 Pero akxni tlakg nitlan xkalikatsinikan, tlakg klhuwankgo chu xtalakgatumikgo. Wa xlakata egipcios lu tsukukgolh kapekuanikgo israelitas. 13 Chu egipcios skujnin kalimaxtukgolh israelitas chu tlakg palha tsukukgolh kamaskujukgo 14 Xlakata xafuerza chu palha xkamaskujukan, nialh xlipaxuwakgo xlatamatkan: xkamatlawikan mezcla xatiyat* chu ladrillos, chu na xkamatlawikan tipalhuwa taskujut kkapukuxtun. Chuna, lu nitlan kalikatsinika chu kamatlawika lakpalha taskujut.

15 Alistalh, mapakgsina xalak Egipto katachuwinalh Sifrá chu Pua, chatiy hebreas tiku xkamakgtayakgo lakpuskatin akxni xmalakachininankgo.* 16 Kawanilh: «Akxni hebreas namalakachininankgo chu nakamakgtayayatit, wa uma tuku militlawatkan: komo namalakachinikgo chatum kgawasa, namakgniyatit, pero komo namalakachinikgo chatum tsumat, ni namakgniyatit». 17 Pero umakgolh lakpuskatin xpekuanikgo xaxlikana Dios. Wa xlakata ni xtlawakgo tuku mapakgsina xalak Egipto xkalimapakgsinit, ni xkamakgnikgo laktsu lakgkgawasan. 18 Titaxtulh kilhtamaku, mapakgsina xalak Egipto kamatasaninalh umakgolh chatiy lakpuskatin chu kawanilh: «¿Tuku xlakata ni kamakgninitantit laktsu lakgkgawasan?». 19 Umakgolh lakpuskatin kgalhtikgolh faraón: «Hebreas ni xtachuna la egipcias. Xlakan lu lakgtliwakgan, chu akxni nina chan tiku nakamakgtaya namalakachininankgo, xlakan malakachininankgonita».

20 Wa xlakata Dios kasikulunatlawalh umakgolh chatiy lakpuskatin, chu kachikin chuntiya stakli chu lu tliwakga wa. 21 Titaxtulh kilhtamaku, xaxlikana Dios kamaxkilh kamanan umakgolh lakpuskatin xlakata xpekuanikgonit. 22 Alistalh, faraón kalimapakgsilh putum kachikin: «Kakamakapitit kkgalhtuchokgo Nilo putum lakgkgawasan hebreos tiku aku lakachinkgonit, pero ni kakamakgnitit laktsuman».

2 Uma kilhtamaku chatum chixku xalak xfamilia Leví tatamakgaxtokgli chatum xtsumat Leví. 2 Uma puskat xʼama kgalhi kskgata, chu malakachinilh chatum kgawasa. Akxni akxilhli pi lu lilakgatit xwanit matsekgli akgtutu papaʼ. 3 Akxni nialhla xmatsekga, tiyalh canasta* nema xlitlawakanit papiro, limaktlawalh alquitrán chu brea,* anta mujulh skgata chu wililh xlakgstipan kgatit* nema xyakgo kxkilhtun kgalhtuchokgo Nilo. 4 Pero xtala tsumat aktsu skgata ni lu makgat tayalh xlakata tlan xʼakxilhli tuku xʼama kitaxtuni skgata.

5 Uma kilhtamaku xtsumat faraón alh paxa kkgalhtuchokgo Nilo. Akxni kskujnin lakpuskatin xtlawamakgo kxkilhtun kgalhtuchokgo, xla akxilhli canasta kxlakgstipan kgatit chu limapakgsilh chatum kskujni pi xliminilh. 6 Akxni makgalhkgelh, akxilhli skgata chu xtasama. Xla lakgalhamalh chu wa: «Uma kskgata chatum hebreo». 7 Wa xlakata xtala uma aktsu skgata kgalhskilh xtsumat faraón: «¿Lakaskina pi nakan putsa chatum hebrea xlakata namatsiki* uma skgata?». 8 Xtsumat faraón kgalhtilh: «¡Chuna, kapit!». Wa xlakata uma tsumat tunkun alh putsa xtse skgata. 9 Xtsumat faraón wanilh puskat: «Kalipi uma skgata, kamatsiki chu akit nakxokgoniyan». Wa xlakata puskat lilh skgata chu matsikilh. 10 Akxni skgata stakli, makamaxkilh xtsumat faraón chu xkgawasa litaxtulh. Xla limapakuwilh Moisés* chu wa: «Xlakata kchuchut kmakutulh».

11 Titaxtulh kilhtamaku, akxni Moisés kstaknita,* alh kalakgapaxialhnan xnatalan hebreos xlakata x’akxilhli chuna la palha xkamaskujukan, chu akxilhli chatum egipcio pi ksnokgma chatum hebreo. 12 Wa xlakata anu anu lakaʼalh, chu komo niti akxilhli, makgnilh egipcio chu matsekgli kmuntsaya.

13 Lichali akxni taxtulh, akxilhli chatiy hebreos pi xlatalatlawama. Wa xlakata wanilh tiku xlin kuenta: «¿Tuku xlakata wilinipat mintala?». 14 Xla kgalhtilh: «¿Tiku lakgayawan kimpríncipekan chu kijuezkan nalitaxtuya? ¿Na nakimakgniya chuna la makgni egipcio?». Wa xlakata Moisés pekualh chu lakpuwa: «¡Katsikaja tuku ktlawalh!».

15 Akxni faraón katsilh, xmakgniputun Moisés. Pero xla tsalanilh faraón chu alh latama kxtiyat Madián. Akxni chalh anta, tawi lakatsu kpozo. 16 Sacerdote xalak Madián xkgalhi kgalhtujun laktsuman. Chu xlakan chankgolh xlakata namakutukgo chuchut chu namatsamakgo niku xkgotnankgo xborregos xtlatkan. 17 Pero chankgolh makgapitsi mapuchwayaninanin chu chuna la xlismanikgo tlawakgo, ni kamaxkikgolh talakaskin namakutukgo chuchut. Akxni Moisés akxilhli uma, tayalh xlakata nakamakgtaya* lakpuskatin chu kamakgotnilh borregos. 18 Akxni chankgolh kxchik Reuel,* xtlatkan, xla kakgalhskilh: «¿Tuku xlakata sokg taspittit?». 19 Xlakan kgalhtikgolh: «Chatum egipcio kinkamakgtayan xlakata mapuchwayaninanin ni xkinkamapanukgon. Asta kinkamakutunin chuchut chu kamakgotnilh borregos». 20 Wa xlakata xla kawanilh xlaktsuman: «¿Chu niku wi? ¿Tuku xlakata anta makgxtakgpitit? Katasanitit, xlakata natawayanaw». 21 Alistalh, Moisés tamakgxtakgli kxchik Reuel, chu xla makamaxkilh Ziporá, xtsumat, xlakata xpuskat xlitaxtulh. 22 Titaxtulh kilhtamaku, Ziporá kgalhilh chatum kgawasa, chu Moisés limapakuwilh Guersom,* xlakata wa: «Klitaxtunit chuna la tiku xalak atanu país kʼuma tiyat».

23 Titaxtulh lhuwa kilhtamaku mapakgsina xalak Egipto nilh. Pero xkamanan Israel chuntiya xjalhpanikgo xlakata skujnin xlitaxtukgo. Wa xlakata, chali chali xtasakgo xlakata xtalipuwankan chu chuntiya xtasaskinikgo tamakgtay xaxlikana Dios. 24 Titaxtulh kilhtamaku, Dios kgaxmatli xtajalhpanitkan chu lakapastakli* talakkaxlan nema xkatatlawanit Abrahán, Isaac chu Jacob. 25 Wa xlakata, Dios akxilhli tuku xtitaxtumakgo israelitas chu akxilhli xtapatinkan.

3 Moisés xkamapuchwayani xborregos Jetró, xputiatlat,* sacerdote xalak Madián. Akgtum kilhtamaku, akxni xkalima borregos kxʼoeste xakaskakni tiyat, chalh kʼHoreb, ksipi xaxlikana Dios. 2 Uma kilhtamaku xʼángel Jehová tasiyanilh kʼakgtum lhkuyat kxʼitat kgantum aktsu kiwi.* Chu Moisés akxilhli pi xlakgpasama aktsu kiwi pero nitu klhkuma. 3 Wa xlakata Moisés wa: «Naktalakatsuwi xlakata liwana nakakxilha tuku lama chu nakkatsi tuku xlakata ni lhkuma uma aktsu kiwi». 4 Jehová akxilhli pi Moisés xtalakatsuwima xlakata naʼakxilha tuku xlama. Wa xlakata Dios chuwinalh lata niku xya aktsu kiwi chu wanilh: «¡Moisés! ¡Moisés!». Chu xla kgalhtilh: «Unu kwi». 5 Dios wanilh: «Nialh katalakatsuwi. Katatuxtu mintatunu, xlakata niku yat xasanto».

6 Alistalh wanilh: «Akit xDios mintlat, xDios Abrahán, xDios Isaac chu xDios Jacob». Wa xlakata Moisés talakgatlapalh xlakata xpekuan naʼakxilha xaxlikana Dios. 7 Jehová wanipa: «Kakxilhnit xtapatin kinkachikin kʼEgipto chu kkgaxmatnit pi tasaskimakgo tamakgtay xlakata egipcios palha kamaskujumakgo. Liwana klakgapasa xtapatinkan. 8 Wa xlakata nakan kalakgmaxtu kxmakankan egipcios xlakata nakkalin kxatilanka chu kxatlan tiyat, ktiyat niku anan lhuwa leche chu ksakgsi cera,* kxtiyatkan cananeos, hititas, amorreos, perizitas, heveos chu jebuseos. 9 Kaʼakxilhti, asta unu kilakgchinit chuna la tasaskimakgo tamakgtay kachikin Israel. Na kakxilhnit chuna la egipcios kamakgapatinamakgo. 10 La uku, nakmalakgachayan kxlakatin faraón. Wix nakalakgmaxtuya kinkachikin Israel kʼEgipto».

11 Pero Moisés wanilh xaxlikana Dios: «¿Tiku akit xlakata nakan kxlakatin faraón chu nakkalakgmaxtu israelitas kʼEgipto?». 12 Xla kgalhtilh: «Akit nakmakgtayayan. Wa uma tuku nalikatsiya pi akit tiku kmalakgachaman: akxni nakamaxtuya kʼEgipto kinkachikin, putum wixin natanatit kʼuma sipi, chu akit, xaxlikana Dios, nakiskujnaniyatit».*

13 Pero Moisés wanilh xaxlikana Dios: «Kalilakpuwaw pi nakkalakgan israelitas chu nakkawani: “Kimalakgachanit xDioskan xalakgmakgan minatlatnikan”. Chu komo xlakan nakinkgalhskinkgo “¿Tuku wanikan?”, ¿tuku nakkawani?». 14 Wa xlakata Dios kgalhtilh Moisés: «Akit Naklitaxtu tuku Akit Naklitaxtuputun».* Chu wampa: «Wa uma tuku nakawaniya israelitas: “Akit Naklitaxtu kimalakgachanit”». 15 Alistalh Dios wanipa Moisés:

«Wa uma tuku nakawaniya israelitas: “Jehová, xDioskan xalakgmakgan minatlatnikan, xDios Abrahán, xDios Isaac chu xDios Jacob, kimalakgachanit”. Wa uma kintukuwani putum kilhtamaku, chu chuna nakililakgapaskgo tiku nalatamakgo kkilhtamaku nema aku mima. 16 La uku kapit, kakamamakxtupi lakgkgolotsin xalak Israel chu kakawani: “Jehová, xDioskan xalakgmakgan minatlatnikan, xDios Abrahán, Isaac chu Jacob, kintasiyaninit chu kiwanilh: «Akit xlikana kkaʼakxilhman chu kakxilhnit tuku katlawanipakantit kʼEgipto. 17 Wa xlakata kkalitayaniyan pi nakkalakgmaxtuyan kxmakankan egipcios tiku lu kamakgapatinamakgon chu nakkalinan kxtiyatkan cananeos, hititas, amorreos, perizitas, heveos chu jebuseos, ktiyat niku anan lhuwa leche chu ksakgsi cera»”.

18 »Xlakan nakgalhakgaxmatkgoyan. Wix nakatapina lakgkgolotsin xalak Israel kxlakatin mapakgsina xalak Egipto, chu miliwanitkan: “Jehová, xDioskan hebreos, kinkatachuwinan. Wa xlakata, katlawa litlan, kakinkamaxki talakaskin nakanaw akgtutu kilhtamaku kxakaskakni tiyat xlakata nakmakamaxkiyaw tamakamastan Jehová kiDioskan”. 19 Pero akit liwana kkatsi pi komo ni ktimaklakaskilh xatliwakga kimakan, mapakgsina xalak Egipto ni katikamaxkin talakaskin napinatit. 20 Wa xlakata nakmaklakaskin kilitliwakga xlakata naklimalakgaxokge Egipto putum tuku kaks malakawaninan nema naktlawa anta. Alistalh, faraón nakamaxkiyan talakaskin nataxtuyatit. 21 Na naktlawa pi egipcios tlan nakalikatsinikgoyan. Chu akxni wixin napinatit, lhuwa tuku nalipinatit. 22 Chatunu lakpuskatin naskini xtalakatsu* tuku litatlawanit plata, tuku litatlawanit oro chu lhakgat, chu puskat* tiku wi kxchik na naskini putum uma. Wixin nakalimalhakgeyatit milakgkgawasankan chu milaktsumankan. Nakamakglhtiyatit egipcios tuku kgalhikgo».

4 Pero Moisés kgalhtilh: «¿Chu tuku naktlawa komo ni nakinkanajlanikgo chu ni nakinkgaxmatnikgo?, xlakata nawankgo “Jehová ni tasiyanin”». 2 Wa xlakata Jehová kgalhskilh: «¿Tuku chipanita?». Moisés kgalhtilh: «Kgantum lixtokgo». 3 Dios wanilh: «Kamakapi kkatutsu». Chu akxni makalh kkatutsu, lixtokgo luwa litaxtulh. Wa xlakata Moisés tunkun tamakgatlinilh. 4 Jehová wanilh Moisés: «Katamakgastonkgti chu kalichipa kstajan». Wa xlakata xla stonkgli xmakan chu chipalh, chu luwa lixtokgo litaxtulh. 5 Wa xlakata Dios wanilh: «Chuna nakatsikgo pi tasiyaninitan Jehová, xDioskan xalakgmakgan xnatlatnikan, xDios Abrahán, xDios Isaac chu xDios Jacob».

6 Nachuna, Jehová wanilh: «Katlawa litlan, kamanu mimakan kmilhakgat». Wa xlakata Moisés manulh xmakan klhakgat chu akxni maxtulh, ¡xmakan xlitsama lepra! ¡Lu snapapa xwanit chuna la miki! 7 Alistalh, Dios wanilh: «Kamanupara mimakan kmilhakgat». Wa xlakata Moisés manupa xmakan klhakgat. Akxni maxtulh xmakan, ¡xpaksnita, chu xtasiya chuna la putuminika xmakni! 8 Dios wanilh: «Komo ni nakanajlanikgoyan o ni kuenta natlawanikgo xapulana milagro, max kuenta natlawakgo xliʼakgtiy milagro. 9 Komo chuntiya ni nakanajlanikgo umakgolh akgtiy milagro chu ni nakgaxmatniputunkgoyan, namakutuya chuchut kkgalhtuchokgo Nilo chu napuxtakgamakgana ktiyat. Chuchut nema namakutuya kNilo kgalhni nalitaxtu ktiyat».

10 Chu Moisés wanilh Jehová: «Kintapati, Jehová, pero akit tuwa kmakgkatsi kchuwinan, lata makgasa chu lata akxni tsuku kintachuwinana. Nila lakapala kchuwinan chu kkgalhchakgxa akxni kchuwinan». 11 Jehová kgalhskilh: «¿Tiku tlawalh pi chixku tlan xchuwinalh?* ¿Tiku tlan tlawa pi wi tiku nila nachuwinan o naʼakgatapa? ¿Tiku tlan tlawa pi wi tiku tlan nalakawanan o lakgaxokgo nawan? ¿Ni akit, Jehová, tiku chuna tlawa? 12 Wa xlakata la uku kapit. Akit nakmakgtayayan akxni nachuwinana* chu akit nakmasiyaniyan tuku miliwanat». 13 Pero xla kgalhtilh: «Kintapati, Jehová, pero atanu tiku kamalakgacha, tiku wix lakaskina, katlawa litlan». 14 Wa xlakata Jehová lu sitsinilh Moisés chu wanilh: «Kgalhiya mintala Aarón tiku levita. Kkatsi pi xla lu tlan chuwinan. Mimaja unu xlakata natatanokglhan, chu xla* lu napaxuwa akxni naʼakxilhan. 15 Kalitachuwinanti tuku kwaninitan chu kawani tuku nawan. Akit nakkamakgtayayan akxni nachuwinanatit chu nakkamasiyaniyan tuku militlawatkan. 16 Wa nakatachuwinan kachikin chu xla napalakachuwinanan. Chu wix nalitaxtuya chuna la xDios.* 17 Nachuna, nalipina uma lixtokgo chu wa nalitlawaya milagros».

18 Wa xlakata Moisés taspitli niku xwi Jetró, xputiatlat* chu wanilh: «Katlawa litlan, kakimaxki talakaskin nakan. Ktaspitputun kʼEgipto xlakata nakakxilha komo lamakgolhku kinatalan». Jetró wanilh Moisés: «Kapit, tlan kakitaxtunin». 19 Alistalh, Jehová wanilh Moisés kMadián: «Kapit, katastpitti kʼEgipto, xlakata nikgonita putum lakchixkuwin tiku xmakgniputunkgoyan».

20 Wa xlakata Moisés kamawakalh xpuskat chu xkamanan ktantum burro, chu ankgolh kxtiyat Egipto. Na lilh xlixtokgo xaxlikana Dios. 21 Chu Jehová wanilh Moisés: «Akxni nachipina kʼEgipto, kamaklakaskinti litliwakga nema kmaxkin xlakata natlawaya milagros kxlakatin faraón. Maski chuna, nakmasta talakaskin pi xnaku xatsakat nawan, chu xla ni katimastalh talakaskin pi kachikin nataxtu. 22 Chu miliwanit faraón: “Wa uma tuku wan Jehová: «Israel wa kinkgawasa, xapuxku kinkgawasa. 23 Wa xlakata kwaniyan: kamaxki talakaskin kinkgawasa nataxtu unu xlakata tlan nakinkakninani.* Pero komo ni namaxkiya talakaskin nataxtu, nakmakgni minkgawasa, xapuxku minkgawasa»”».

24 Akxni xʼamakgo ktiji nema linan niku xʼamakgo tamakgxtakgkgo katsisni, Jehová tatanokglhli chu xʼama makgni. 25 Wa xlakata, Ziporá tiyalh akgtum xastakaka chiwix* chu akstilichukunilh kxuwa xlichixku xkgawasa. Alistalh tlawalh pi xtutawakacha* kxuwa xlichixku chu wa: «Uma chuna ktlawanit xlakata wix kinchixku litaxtuya xlakata uma kgalhni». 26 Wa xlakata Dios maxkilh talakaskin naʼan. Uma kilhtamaku xla wa: «Wix kinchixku litaxtuya xlakata uma kgalhni».

27 Alistalh, Jehová wanilh Aarón: «Kapit tatanokglha Moisés kxakaskakni tiyat». Wa xlakata, Aarón alh tatanokglha Moisés ksipi xaxlikana Dios chu akxni tatanokglhli lakatsukli. 28 Chu Moisés wanilh Aarón putum tuku xwaninit Jehová, tiku xmalakgachanit. Na litachuwinalh putum milagros nema xlimapakgsinit natlawa. 29 Alistalh, Moisés chu Aarón ankgolh katatamakxtumikgo lakgkgolotsin xalak Israel. 30 Aarón kalitachuwinalh putum tuku Jehová xwaninit Moisés, chu xla tlawalh milagros kxlakatin kachikin. 31 Wa xlakata kachikin kanajlanikgolh. Akxni israelitas katsikgolh pi Jehová xkamakgtayaputun chu xʼakxilhnit xtapatinkan, tatsokgostakgolh chu takilhputakgolh.

5 Alistalh, Moisés chu Aarón ankgolh kxlakatin faraón chu wanikgolh: «Wa uma tuku wan Jehová, xDios Israel: “Kamaxki talakaskin nataxtu kinkachikin xlakata nakintlawanikgo akgtum fiesta kxakaskakni tiyat”». 2 Pero faraón kgalhtinalh: «¿Tiku Jehová xlakata nakkgalhakgaxmata chu nakmaxki talakaskin Israel nataxtu? Ni klakgapasa Jehová chu ni ktimaxkilh talakaskin nataxtu Israel». 3 Xlakan wanikgolh: «Kinkatachuwinanitan xDioskan hebreos. Katlawa litlan, kakinkamaxki talakaskin nakanaw akgtutu kilhtamaku kxakaskakni tiyat xlakata naktlawaniyaw tamakamastan kiDioskan Jehová. Komo nichuna naktlawayaw, nakinkalimalakgaxokgeyan tajatat o espada». 4 Pero mapakgsina xalak Egipto kakgalhtilh: «Moisés chu Aarón, ¿tuku xlakata lakaskinatit pi kachikin namakgxtakgkgo xtaskujutkan? ¡Kapitit skujatit!». 5 Chu faraón wampa: «Kaʼakxilhtit, lhuwa xalak minkachikinkan wilakgo unu. ¿Chu wixin laktlawaputunatit xtaskujutkan?».

6 Watiya uma kilhtamaku, faraón kalimapakgsilh xnapuxkun skujnin chu xmakgtayananin:* 7 «Nialh nakamaxkiyatit paja* nema litlawakgo ladrillos. Xlakan kaʼankgolh sakkikgo. 8 Chu chuntiya xlilhuwa kakamatlawitit ladrillos chuna la xapulana. Xalaklhkititni,* chu wa xlakata kilhwamakgo: “¡Kamputunaw! ¡Ktlawaniputunaw tamakamastan kiDioskan!”. 9 Tlakg palha kakamaskujutit chu tlakg lhuwa tuku kakamatlawitit xlakata ni nakgaxmatkgo taʼakgsanin».

10 Wa xlakata xnapuxkun skujnin chu xmakgtayananin* ankgolh wanikgo kachikin: «Wa uma tuku wan faraón: “Nialh ktikamaxkin paja. 11 Wata wixin kapitit putsayatit, chu ni ktikalimaktinin taskujut nema tlawayatit”». 12 Wa xlakata kachikin alh putsa kxlikalanka Egipto xaskakni tuwan* xlakata xmaklakaskinkgolh chuna la paja. 13 Chu xnapuxkun skujnin lu xkamalakapalikgo chu xkawanikgo: «Putum wixin milimakgatsitkan mintaskujtkan chali chali chuna la xtlawayatit akxni xkamaxkikanatit paja». 14 Nachuna, xnapuxkun skujnin, tsukukgolh kawilinikgo xmakgtayananin tiku israelitas xwankgonit, chu kakgalhskinkgolh: «¿Tuku xlakata nialh lhuwa ladrillos tlawanitantit chuna la xtlawayatit xapulana?».

15 Alistalh, tiku xkalakgayawakanit israelitas lakgankgolh faraón. Wanikgolh: «¿Tuku xlakata chuna kalikatsiniya miskujnin? 16 Ni kinkamaxkikanan paja, pero chuntiya kinkawanimakan: “¡Katlawatit ladrillos!”. Chu kinkasnokgkanan, maski wa minkachikin tiku lin kuenta». 17 Pero xla kakgalhtilh: «¡Laklhkititni!* ¡Wixin laklhkititni!* Wa xlakata wanatit: “Kamputunaw. Ktlawaniputunaw tamakamastan Jehová”. 18 ¡Kapitit skujatit! Ni katikamaxkikantit paja, pero chuntiya xlilhuwa natlawayatit ladrillos».

19 Wa xlakata umakgolh lakchixkuwin israelitas nialh xkatsikgo tuku natlawakgo, xlakata kalimapakgsika: «Chuntiya xlilhuwa ladrillos natlawayatit chali chali». 20 Alistalh katatamakxtumikgolh Moisés chu Aarón, xlakan xkgalhkgalhimakgo akxni xtaxtukgolh niku xwi faraón. 21 Tunkun tsukukgolh wanikgo Moisés chu Aarón: «Jehová kaʼakxilhli tuku tlawapatit chu kakalakputsananin, xlakata wixin tlawanitantit pi faraón chu kskujnin ni nakinkaʼakxilhputunkgoyan,* xtachuna la xkamaxkitit kgantum espada xlakata nakinkamakgnikgoyan». 22 Wa xlakata Moisés wanilh Jehová: «Jehová, ¿tuku xlakata lu mapatinipat uma kachikin? ¿Tuku xlakata kimalakgacha? 23 Lata akxni kchalh kxlakatin faraón xlakata nakpalakachuwinanan, xla tlakg nitlan kalikatsininit uma kachikin, chu wix nitu tlawanita xlakata nalakgmaxtuya minkachikin».

6 Wa xlakata Jehová kgalhtilh Moisés: «La uku naʼakxilha tuku naktlawani faraón. Kilitliwakga natlawa pi nakamakgxtakgan, chu akxni xla na’akxilha kilitliwakga nakawaniyan pi kataxtutit kxkachikin».

2 Chu Dios wanilh Moisés: «Akit Jehová. 3 Akit xakkatasiyani Abrahán, Isaac chu Jacob chuna la Dios Tiku kgalhi putum litliwakga, pero xpalakata kintukuwani, Jehová, ni liwana kkamalakgapasnilh.* 4 Na kkatatlawalh akgtum talakkaxlan xlakata nakkamaxki xtiyat Canaán, tiyat niku latamakgolh chuna la xalak atanu país. 5 Akit kkgaxmatnit xtajalhpanitkan israelitas, nema egipcios skujnin kalimaxtukgonit, chu klakapastaka kintalakkaxlan.

6 »Wa xlakata, kakawani israelitas: “Akit Jehová, chu nakkalakgmaxtuyan kpalha taskujut nema kamatlawikgoyan egipcios chu xlakata skujnin kalimaxtukgonitan. Nakkalilakgmaxtuyan kilitliwakga chu lhuwa tuku nakkalimalakgaxokge egipcios. 7 Chu nakkamakgamakglhtinanan xlakata kinkachikin nalitaxtuyatit chu miDioskan naklitaxtu. Wixin liwana nakatsiyatit pi akit Jehová miDioskan, tiku kalakgmaxtuman kʼEgipto, niku tlawayatit palha taskujut. 8 Chu nakkalinan ktiyat nema kkalitayanilh nakkamaxki Abrahán, Isaac chu Jacob, chu wixin nakkamaxkiyan xlakata nakatapakgsiniyan. Akit Jehová”».

9 Alistalh, Moisés kamaxkilh uma tamakatsinin israelitas, pero xlakan ni kgalhakgaxmatkgolh Moisés xlakata xtaxlajwanikgonit chu xpatinamakgo xlakata palha xkamaskujukan.

10 Wa xlakata Jehová wanilh Moisés: 11 «Kapit waniya faraón, mapakgsina xalak Egipto, pi kakatamakxtulh israelitas kxkachikin». 12 Pero Moisés kgalhtilh Jehová: «Komo israelitas ni kinkgalhakgaxmatkgonit, ¡faraón nikxni kintikgalhakgaxmatli!, xlakata tuwa kmakgkatsi kchuwinan». 13 Maski chuna, Jehová kawanipa Moisés chu Aarón tuku xkaliwanitkan xwanit israelitas chu faraón, mapakgsina xalak Egipto, xlakata tlan xkatamakxtukgolh israelitas kxtiyat Egipto.

14 Wa umakgolh xtukuwanikan napuxkun tiku xtapakgsikgo k’akgatunu familia. Xapuxku xkgawasa Israel wa Rubén, chu xlakgkgawasan wa Hanok, Palú, Hezrón chu Carmí. Wa umakgolh xfamilia Rubén.

15 Xlakgkgawasan Simeón wa Jemuel, Jamín, Ohad, Jakín, Zóhar chu Shaúl, xkgawasa chatum cananea. Wa umakgolh xfamilia Simeón.

16 Xtukuwanikan xlakgkgawasan Leví, chuna la pulakatunu xfamiliajkan, wa umakgolh: Guersón, Cohat chu Merarí. Leví latamalh 137 kata.

17 Xlakgkgawasan Guersón, wa Libní chu Simeí, chuna la pulakatunu xfamiliajkan.

18 Xlakgkgawasan Cohat wa Amram, Izhar, Hebrón chu Uziel. Cohat latamalh 133 kata.

19 Xlakgkgawasan Merarí wa Mahlí chu Musí.

Putum umakgolh wa xfamiliajkan levitas, chuna la pulakatunu xfamiliajkan.

20 Chu Amram tatamakgaxtokgli Jokébed, xtala xtlat. Alistalh, xla takgalhilh umakgolh lakgkgawasan: Aarón chu Moisés. Amram latamalh 137 kata.

21 Xlakgkgawasan Izhar wa Coré, Néfeg chu Zicrí.

22 Xlakgkgawasan Uziel wa Misael, Elzafán chu Sitrí.

23 Chu Aarón tatamakgaxtokgli Eliseba, tiku xtsumat xwanit Aminadab chu xtala Nahsón. Alistalh, xla takgalhilh umakgolh kamanan: Nadab, Abihú, Eleazar chu Itamar.

24 Xlakgkgawasan Coré wa Asir, Elcaná chu Abiasaf. Wa umakgolh xfamiliajkan coreítas.

25 Chu Eleazar, xkgawasa Aarón, tatamakgaxtokgli chatum xtsumat Putiel. Alistalh, xla takgalhilh chatum kgawasa tiku limapakuwilh Finehás.

Wa umakgolh xtukuwanikan napuxkun tiku xtapakgsikgo kxfamiliajkan levitas, chuna la pulakatunu xfamiliajkan.

26 Wa uma Aarón chu Moisés tiku Jehová kawanilh: «Kamaxtutit kxtiyat Egipto kachikin Israel kpulakatunu grupos». 27 Wa uma Moisés chu Aarón tiku tachuwinankgolh faraón, mapakgsina xalak Egipto, xlakata tlan xmaxtukgolh kʼEgipto kachikin Israel.

28 Kilhtamaku akxni Jehová tachuwinalh Moisés kxtiyat Egipto, 29 Jehová wanilh Moisés: «Akit Jehová. Kawani faraón, mapakgsina xalak Egipto, putum tuku kwaniman». 30 Wa xlakata Moisés wanilh Jehová: «¡Faraón nikxni kintikgalhakgaxmatli!, xlakata tuwa kmakgkatsi kchuwinan».

7 Wa xlakata Jehová wanilh Moisés: «Kaʼakxilhti, kxlakatin faraón chuna la Dios klimaxtunitan,* chu mintala Aarón mimpalakachuwina nalitaxtu. 2 Wix nawaniya mintala Aarón putum tuku akit naklimapakgsiyan, chu xla wa tiku natachuwinan faraón. Alistalh, faraón nakatamakxtu israelitas kʼuma tiyat. 3 Chu akit nakmasta talakaskin pi xnaku faraón xatsakat nawan chu naktlawa lhuwa milagros kxtiyat Egipto. 4 Pero faraón ni kuenta katikatlawanin. Wa xlakata naklimaklakaskin xlitliwakga kimakan xlakata naktlawani tuku nitlan Egipto chu chuna nakkatamakxtu xalhuwa kinkachikin,* israelitas. Lhuwa tuku naklimalakgaxokge* Egipto akxni naktamakxtu kinkachikin. 5 Chu egipcios xlikana nakatsikgo pi akit Jehová akxni naklimalakgaxokge Egipto kimakan, chu nakkamaxtu israelitas kxlakgstipankan». 6 Wa xlakata, Moisés chu Aarón tlawakgolh chuna la Jehová xkalimapakgsinit. Tlawakgolh chuna la xla xwanit. 7 Akxni tachuwinankgolh faraón, Moisés xkgalhi tatipuxam kata, chu Aarón xkgalhi tatipuxamatutu.

8 Alistalh, Jehová kawanilh Moisés chu Aarón: 9 «Komo faraón nakawaniyan “Katlawatit akgtum milagro”, wix nawaniya Aarón “Katiya milixtokgo chu lhkgen kamakapi kxlakatin faraón”. Chu lixtokgo tantum lanka luwa nalitaxtu». 10 Wa xlakata Moisés chu Aarón ankgolh kxlakatin faraón chu tlawakgolh tuku xkalimapakgsinit Jehová. Chu Aarón lhkgen makalh xlixtokgo kxlakatin faraón chu kskujnin, chu xlixtokgo lanka luwa litaxtulh. 11 Pero faraón katasanilh lakgskgalalan lakchixkuwin chu skuwananin, chu sacerdotes tiku xtlawakgo magia xalak Egipto na tlawakgolh milagro nema tlawalh Aarón. 12 Xchatunukan makankgolh xlixtokgokan kkatutsu, chu laklanka luwa litaxtukgolh. Pero xlixtokgo Aarón kakgotwalh. 13 Maski chuna, xnaku faraón tsakatlalh chu xla ni kakgalhakgaxmatli Moisés chu Aarón, chuna la xwanit Jehová.

14 Wa xlakata Jehová wanilh Moisés: «Faraón ni maxkiputun talakaskin nataxtu kachikin. Lu xatsakat xnaku. 15 Chali tsisa kapit akxilha faraón. Xla naʼan kkgalhtuchokgo Nilo, wa xlakata kataya kxkilhtun kgalhtuchokgo niku tlan natatanokglha. Chu kalipi lixtokgo nema tantum luwa litaxtulh. 16 Miliwanit faraón: “Jehová, xDioskan hebreos, kimalakgachalh xlakata nakwaniyan: «Kamaxki talakaskin kinkachikin nataxtu xlakata naʼan kinkakninani* kxakaskakni tiyat». Pero asta la uku ni kgaxpatnita. 17 Wa uma tuku wan Jehová: «Nakatsiya pi akit Jehová xlakata uma: naklisnokga kilixtokgo kgalhtuchokgo Nilo chu kgalhni nalitaxtu. 18 Skiti* nanikgo, kgalhtuchokgo Nilo napuksan chu egipcios nila katilikgotnankgolh uma chuchut»”».

19 Alistalh, Jehová limapakgsilh Moisés: «Kawani Aarón: “Katiya milixtokgo chu kastonkgti mimakan kxkgalhni xchuchut Egipto, kxkgalhni laklanka xkgalhtuchokgo, klaktsu xkgalhtuchokgo,* kxmunchulu chu niku makgstokgwilinit xchuchut, xlakata putum chuchut kgalhni nalitaxtu”. Naʼanan kgalhni kxlikalanka xtiyat Egipto, asta niku kamujukan chuchut nema litlawakanit kiwi chu chiwix». 20 Wa xlakata Moisés chu Aarón tunkun tlawakgolh tuku Jehová xkalimapakgsinit. Aarón maktsajli xlixtokgo chu snokgli kgalhtuchokgo Nilo kxlakatin faraón chu xlakskujnin. Wa xlakata kgalhtuchokgo kgalhni litaxtulh. 21 Skiti nikgolh, chuchut tsukulh puksan chu egipcios nialhla likgotnankgolh xchuchut Nilo. Xlikalanka xtiyat Egipto litatsamalh kgalhni.

22 Pero sacerdotes tiku xtlawakgo magia xalak Egipto na tlawakgolh uma milagro. Wa xlakata faraón chuntiya tsakatlalh xnaku chu ni kakgalhakgaxmatli Moisés chu Aarón, chuna la xwanit Jehová. 23 Alistalh faraón taspitli kxchik chu ni kuenta tlawalh tuku xlanit. 24 Xlakata egipcios nila xlikgotnankgo xchuchut Nilo, tsukukgolh puwaxnankgo xlistilili kgalhtuchokgo xlakata xtekgskgolh chuchut nema tlan xlikgotnankgolh. 25 Jehová kgalhni limaxtulh kgalhtuchokgo Nilo chu makgapalalh akgtujun kilhtamaku.

8 Chu Jehová limapakgsilh Moisés: «Kapit niku wi faraón chu kawani: “Wa uma tuku wan Jehová: «Kamaxki talakaskin kinkachikin nataxtu xlakata naʼan kinkakninani.* 2 Komo ni namaxkiya talakaskin nataxtu, naklimatsama chichakg putum Egipto. 3 Kgalhtuchokgo Nilo nalitatsama chichakg, chu natakutkgo kchuchut, natanukgo kminchik, niku lhtataya, kmimputama chu kxchikkan miskujnin, nalitatsamakgo minkachikin, miʼhorno chu niku lakgwilhaya miʼharina. 4 Chu chichakg namapatinikgoyan, namapatinikgo minkachikin chu putum miskujnin»”».

5 Alistalh, Jehová limapakgsilh Moisés: «Kawani Aarón: “Kastonkgti milixtokgo kxkgalhni kgalhtuchokgo, klaktsu xkgalhtuchokgo Nilo chu kmunchulu, chu katlawa pi chichakg katalakgatumikgolh kxtiyat Egipto”». 6 Wa xlakata Aarón stonkgli xmakan kxkgalhni xchuchut Egipto, chu chichakg tsukukgolh takutkgo chu talakgatumikgo kpaís. 7 Pero sacerdotes tiku xtlawakgo magia na tlawakgolh tuku tlawalh Aarón, na tlawakgolh pi xtakutkgolh chichakg kchuchut chu xtalakgatumikgolh kxtiyat Egipto. 8 Pero alistalh faraón katasanilh Moisés chu Aarón, chu wa: «Katasaskinitit Jehová pi kamapanulh chichakg kkinkachikin, nakmaxki talakaskin kachikin nataxtu xlakata naʼan tlawani tamakamastan Jehová». 9 Wa xlakata Moisés wanilh faraón: «Wix tiku lakgchanan nakiwaniya tuku kilhtamaku lakaskina naktasaskiniyaw Dios xlakata wix, miskujnin, minkachikin chu minchik nialh nalitatsamakgo chichakg. Kajwatiya kkgalhtuchokgo Nilo naʼanan chichakg». 10 Faraón kgalhtinalh, «chali». Wa xlakata Moisés wanilh: «Xlakata nakatsiya pi ni anan tiku xtachuna la Jehová kiDioskan, nala tuku wix skimpat. 11 Nialh katiʼanalh chichakg kminchik, wa xlakata wix, miskujnin chu minkachikin nialh katilitatsamakgolh chichakg. Kajwatiya kkgalhtuchokgo Nilo naʼanan chichakg».

12 Wa xlakata Moisés chu Aarón taxtukgolh niku xtachuwinamakgo faraón, chu Moisés tasaskinilh Jehová pi xkamapanulh chichakg nema xmalakgachaninit faraón. 13 Chu Jehová tlawalh tuku skinilh Moisés, chu chichakg tsukukgolh nikgo kchiki, kkilhtin chu kkapukuxtun. 14 Egipcios tsukukgolh sakkikgo chichakg chu lhuwa mamakxtumikgolh. Chu tsukulh kapuksan kxlilakgatum Egipto. 15 Akxni faraón akxilhli pi nialh xʼanankgo chichakg, tsakatlalh chu ni kgalhakgaxmatli Moisés chu Aarón, chuna la xwanit Jehová.

16 Wa xlakata Jehová limapakgsilh Moisés: «Kawani Aarón: “Kalitapakgastonkgti milixtokgo chu kakasnokgti kkatutsu, chu pokgxni laktsu kuxta* nalitaxtukgo kxlikalanka xtiyat Egipto”». 17 Chu chuna tlawakgolh. Aarón litapakgastonkgli xlixtokgo, kasnokgli katutsu chu pokgxni laktsu kuxta litaxtukgolh kxlikalanka xtiyat Egipto. Chu tsukukgolh kaxkakgo* latamanin chu animales. 18 Sacerdotes tiku xtlawakgo magia nachuna xtlawaputunkgo, pokgxni laktsu kuxta xlimaxtuputunkgo, pero ni matlanikgolh. Chu kuxta chuntiya xkaxkamakgo latamanin chu animales. 19 Wa xlakata sacerdotes tiku xtlawakgo magia wanikgolh faraón: «¡Uma xmakan Dios!». Pero xnaku faraón chuntiya tsakatlalh chu ni kakgalhakgaxmatli, chuna la xwanit Jehová.

20 Wa xlakata Jehová limapakgsilh Moisés: «Chali sokg natakiya chu napina tatanokglha faraón. Xla naʼan kkgalhtuchokgo, chu wix miliwanit: “Wa uma tuku wan Jehová: «Kamaxki talakaskin nataxtu kinkachikin xlakata naʼan kinkakninani. 21 Pero komo ni namaxkiya talakaskin nataxtu kinkachikin, nakmalakgachaniyan tábanos,* wix, miskujnin, minkachikin chu kputum minchik. Tábanos nalitatsamakgo xchikkan egipcios chu kputum tiyat niku wilatit.* 22 Pero uma kilhtamaku, kxtiyat Gosén, niku lama kinkachikin, nitu katiʼakgspulalh. Anta ni katiʼanalh tábanos, chu chuna nakatsiya pi akit, Jehová, kwi kʼuma tiyat. 23 Chuna la naklikatsini kinkachikin ni xtachuna ktilikatsinilh minkachikin. Uma milagro nakgantaxtu chali»”».

24 Chu wa uma tuku tlawalh Jehová. Lhuwa tábanos litatsamalh xchik faraón, xchikkan kskujnin chu putum xtiyat Egipto. Tábanos lu kamakgapatikgolh latamanin xalak kʼEgipto. 25 Wa xlakata, faraón tasanilh Moisés chu Aarón chu wa: «Kapitit chu katlawanitit tamakamastan miDioskan kʼuma tiyat». 26 Pero Moisés kgalhtilh: «Nila chuna ktlawayaw. Egipcios xkajnikgo tamakamastan nema ktlawaniputunaw Jehová kiDioskan. Chu komo naktlawayaw kxlakatinkan tamakamastan nema xlakan xkajnikgo, nakinkaʼaktalamikgoyan. 27 Wa xlakata akgtutu kilhtamaku nakanaw kxakaskakni tiyat chu anta naktlawaniyaw tamakamastan Jehová kiDioskan, chuna la xla kinkawaninitan».

28 Wa xlakata faraón wa: «Nakkamaxkiyan talakaskin napinatit tlawaniyatit tamakamastan Jehová miDioskan kxakaskakni tiyat. Pero ni lu makgat kapitit. Chu kakimpalakaskintit». 29 Moisés kgalhtilh: «Nakan tasaskini Jehová xlakata chali nialh nakalitatsamayan tábanos, wix, miskujnin chu minkachikin. Pero nialh nakinkaʼakgskgawiya chu nakinkamaxkiya talakaskin naktaxtuyaw chu nakanaw tlawaniyaw tamakamastan Jehová». 30 Wa xlakata Moisés taxtulh niku xtachuwinama faraón chu tasaskinilh Jehová. 31 Chu Jehová tlawalh tuku skinilh Moisés. Wa xlakata faraón, kskujnin chu xkachikin nialh kamaʼakglhuwikgolh tábanos. Nialh para tantum tábano analh kpaís. 32 Pero faraón chuntiya tsakatlalh chu ni maxkilh talakaskin nataxtu kachikin.

9 Wa xlakata Jehová limapakgsilh Moisés: «Kapit waniya faraón: “Wa uma tuku wan Jehová, xDioskan hebreos: «Kamaxki talakaskin nataxtu kinkachikin xlakata naʼan kinkakninani.* 2 Pero komo ni namaxkiya talakaskin nataxtu chu chuntiya namachokgoya, 3 liwana kakatsi pi xmakan Jehová, nakatlawani tuku nitlan animales nema kgalhiya kkapukuxtun. Kawayu, burros, camellos, wakax chu borregos nalitatatlakgo akgtum tajatat nema makgninan. 4 Pero Jehová nichuna katikalikatsinilh xʼanimaleskan israelitas chuna la nakalikatsini xʼanimaleskan egipcios, nipara tantum xʼanimaleskan israelitas naniy»”». 5 Nachuna, Jehová lakkaxwililh akgtum kilhtamaku akxni wa: «Wa uma tuku Jehová natlawa chali kpaís».

6 Chu lichali wa uma tuku tlawalh Jehová. Tipalhuwa xʼanimaleskan egipcios tsukukgolh nikgo, pero nipara tantum xʼanimaleskan israelitas nilh. 7 Akxni faraón limapakgsinalh pi xʼanka akxilhkan tuku xlanit, akxilhkgolh pi nipara tantum xʼanimaleskan israelitas xninit. Maski chuna, faraón ni kamaxkilh talakaskin kachikin nataxtu, xlakata xnaku chuntiya xatsakat xwanit.

8 Alistalh, Jehová wanilh Moisés chu Aarón: «Kalitiyatit mimakankan lhkaka nema tanuma kʼhorno, chu Moisés kamakgosolh kxlakatin faraón. 9 Lhkaka natalakgatumi kxtiyat Egipto. Wa xlakata, latamanin chu animales tiku nakapasa uma lhkaka, nakataxtuni tsitsi nema kgalhi xchina».*

10 Wa xlakata xlakan tiyakgolh lhkaka kʼakgtum horno chu tayakgolh kxlakatin faraón. Alistalh Moisés makgosolh lhkaka, chu uma tsitsi litaxtulh nema xkgalhi xchina kxmaknikan latamanin chu animales. 11 Sacerdotes tiku xtlawakgo magia nila ankgolh niku xwi Moisés, xlakata xlakan na xkataxtuninit tsitsi chuna la xkataxtuninit putum egipcios. 12 Pero Jehová mastalh talakaskin pi xnaku faraón xatsakat xwampa, chu xla ni kakgalhakgaxmatli, chuna la Jehová xwaninit Moisés.

13 Wa xlakata Jehová wanilh Moisés: «Chali sokg natakiya chu napina tatanokglha faraón. Kawani: “Wa uma tuku wan Jehová, xDioskan hebreos: «Kamaxki talakaskin nataxtu kinkachikin xlakata naʼan kinkakninani. 14 Chu xlakata nakatsiya pi ni anan atanu tiku xtachuna la akit kxlikalanka katiyatni, la uku, wix, miskujnin chu minkachikin, nakkamalakgachaniyan tuku nitlan. 15 Akit tlantiya xaklimaklakaskilh kilitliwakga, xlakata wix chu minkachikin xakkalimalakgaxokgen akgtum xalixkajni tajatat, chu wix nialhti lapat xwa. 16 Pero chuntiya kmaxkinitan talakaskin nalatapaya, xlakata naklimasiyaniyan kilitliwakga chu xlakata namalankikan kintukuwani kxlikalanka katiyatni. 17 Chuntiya lu nitlan likatsinipat kinkachikin chu ni maxkiputuna talakaskin nataxtu. 18 Chali, chuna la uma hora nakmakamin lhuwa chijit, chuna la nikxni ananit kʼEgipto. 19 Wa xlakata, kamamakininanti putum miʼanimales chu putum tuku kgalhiya kkapukuxtun. Komo chatum lataman o tantum animal natamakgxtakga kkapukuxtun, naniy akxni natakta chijit»”».

20 Putum kskujnin faraón tiku pekuanikgolh xtachuwin Jehová tunkun tlawakgolh pi kskujninkan chu xʼanimaleskan ni xtamakgxtakgkgolh kkapukuxtun. 21 Pero tiku ni kuenta tlawakgolh xtachuwin Jehová kamakgxtakgkgolh kskujninkan chu xʼanimaleskan kkapukuxtun.

22 Wa xlakata Jehová wanilh Moisés: «Katamakayawa kʼakgapun chu chuna nataktayachi chijit kxlikalanka xtiyat Egipto. Nakalakgchin latamanin, animales chu putum tachanan nema anankgo kkapukuxtun kxtiyat Egipto». 23 Wa xlakata, Moisés litamakayawalh xlixtokgo kʼakgapun chu Jehová tlawalh pi xjililh, xtaktalh chijit chu xtaktalh lhkuyat* kkatiyatni. Jehová tlawalh pi chuntiya xtaktalh chijit kxlikalanka xtiyat Egipto. 24 Analh chijit chu kxlakʼitat chijit xmakgklipnama. Lata akxni Egipto lakatsukulh, nikxni xtaktanit lhuwa chijit chuna la uma. 25 Chijit masputulh putum tuku xʼanan kxkapukuxtun Egipto, chuna la latamanin chu animales, masputukgolh tuwan* chu kalaktukxyawalh kiwi nema xyakgo kkapukuxtun. 26 Kxtiyat Gosén, niku xlamakgo israelitas, kajwatiya anta ni taktalh chijit.

27 Wa xlakata faraón matasaninalh Moisés chu Aarón, chu kawanilh: «La uku kkatsi pi klakgalhinanit. Jehová xaʼakgstitum, pero kinkachikin chu akit ktlawanitaw tuku nitlan. 28 Katasaskinitit Jehová pi kamachokgolh chijit chu jili. Chuna nakkamaxkiyan talakaskin napinatit, chu nialh natamakgxtakgatit unu». 29 Moisés kgalhtilh: «Akxni naktaxtu kkachikin, naktamakayawa kxlakatin Jehová. Chu xlakata nakatsiya pi tiyat wa tapakgsini Jehová, xla namachokgo chijit chu jili. 30 Pero akit kkatsi pi maski chuna, wix chu miskujnin ni katipekuanitit Jehová Dios».

31 Cebada chu lino sputkgolh, xlakata cebada aku xkatlama chu lino aku kxanama. 32 Pero ni sputkgolh trigo* nema xkachankanit, xlakata ni sokg katlankgo. 33 Akxni Moisés taxtulh kkachikin niku xwi faraón, tamakayawalh kxlakatin Jehová, chu uma kilhtamaku tunkun tachokgolh chijit chu jili, chu nialh senalh. 34 Akxni faraón akxilhli pi nialh ksenama, nialh xtaktama chijit chu nialh xjilima, xla chuntiya lakgalhinalh chu xnaku xatsakat wampa, chu nachuna tlawakgolh kskujnin. 35 Chu xnaku faraón chuntiya xatsakat xwanit, chu ni kamaxkilh talakaskin nataxtukgo israelitas, chuna la xwanit Jehová akxni maklakaskilh Moisés.

10 Wa xlakata, Jehová wanilh Moisés: «Kapit kxlakatin faraón, xlakata kmastanit talakaskin pi xnaku chu xnakujkan kskujnin xatsakat nawankgo chu chuna tlan naktlawa milagros kxlakatin. 2 Na kmastanit talakaskin xlakata wix tlan nakalitachuwinana minkamanan chu minatanatni chuna la kkamalakgaxokgelh egipcios chu milagros nema ktlawalh kxlakatinkan. Chu wixin liwana nakatsiyatit pi akit Jehová».

3 Wa xlakata Moisés chu Aarón ankgolh kxlakatin faraón chu wanikgolh: «Wa uma tuku wan Jehová, xDioskan hebreos: “¿Asta tuku kilhtamaku nakinkgalhakgaxpata? Kamaxki talakaskin nataxtu kinkachikin xlakata naʼan kinkakninani.* 4 Komo ni namaxkiya talakaskin nataxtu kinkachikin, chali naklimin xtuki* kmimpaís. 5 Xlakan natalakgatumikgo kkatiyatni chu nialh katitasiyalh tiyat. Nawakgo tuku akgataxtulh akxni milh chijit chu nawakgo putum kiwi nema stakma kkapukuxtun. 6 Natanukgo kminchik, kxchikkan miskujnin chu kxchikkan putum egipcios. Lata lamakgo minatlatni chu xnatlatni minatlatni kʼuma tiyat, nikxni akxilhkgonit nawan uma tuku nala”». Alistalh talakgspitli chu taxtulh kxlakatin faraón.

7 Alistalh kskujnin faraón wanikgolh: «¿Tuku kilhtamaku nialh katuwa nakinkawiliyan* uma chixku? Kakatamakxtu umakgolh latamanin xlakata naʼankgo kakninanikgo Jehová xDioskan. ¿Nina akxilha pi Egipto lakgsputma?». 8 Wa xlakata, Moisés chu Aarón kalimimparaka kxlakatin faraón. Chu xla kawanilh: «Kapitit kakninaniyatit Jehová miDioskan. Pero kakiwanitit, ¿tiku nakataʼankgoyan?». 9 Chu Moisés wanilh: «Xlakata nakanaw tlawaniyaw akgtum fiesta Jehová, nakkalinaw tiku lakkamananku, tiku linkgoya kata, kilakgkgawasankan, kilaktsumankan, kiborregoskan chu kiwakaxkan». 10 Pero faraón kgalhtilh: «¿Xlikana lakpuwanatit pi nakkamaxkiyan talakaskin nataxtuyatit, wixin chu minkamanankan? Komo chuna xaktlawalh, ¡xlitasiyalh pi Jehová katawilan! Liwana tasiya pi kaj nitlan tuku tlawaputunatit. 11 ¡Nichuna ktitlawalh! Kajwatiya lakchixkuwin tlan naʼankgo kakninanikgo Jehová, xlakata wa tuku xkiskininitantit». Alistalh katamakxtuka niku xwi faraón.

12 Jehová wanilh Moisés: «Kastonkgti mimakan kxkgalhni xtiyat Egipto xlakata xtuki naminkgo kʼuma país chu nawakgo putum tuwan,* chu putum tuku makgxtakgli chijit». 13 Moisés tunkun litamakgastonkgli xlixtokgo kxkgalhni xtiyat Egipto. Wa xlakata Jehová tlawalh pi xmilh un xalak este, chu kakuwani chu katsisni unalh kʼuma país. Lichali tsisa, un xalak este kalimilh xtuki. 14 Chu xtuki talakgatumikgolh kxtiyat Egipto chu litatsamakgolh putum país. Lu lhuwa xwankgonit. Nikxni xʼananit lhuwa xtuki chu nikxni katiʼanampa. 15 Talakgatumikgolh kpaís chu kapukswa tlawakgolh kʼuma tiyat. Wakgolh putum tuwan nema xʼanan kpaís chu putum xtawakat kiwi nema xmaʼakgataxtinit chijit. Nialhpara kgantum kiwi kgalhilh xtuwan chu nachuna lalh kxkapukuxtun Egipto.

16 Faraón tunkun kamatasaninalh Moisés chu Aarón, chu kawanilh: «Klakgalhinanit kxlakatin Jehová miDioskan chu kmilakatinkan. 17 Katlawatit litlan, la uku kintapatitit kintalakgalhin chu katasaskinitit Jehová miDioskan pi kamapanulh uma tuku lu nitlan kinkalimalakgaxokgeman». 18 Wa xlakata xla* taxtulh kxlakatin faraón chu tasaskinilh Jehová. 19 Chu Jehová lakgpalilh niku xʼama un, tlawalh pi tliwakga un xtsukulh an kʼoeste chu kalilh xtuki kxaSpinini pupunu. Nipara tantum xtuki tamakgxtakgli kxlikalanka xtiyat Egipto. 20 Pero Jehová mastalh talakaskin pi xnaku faraón xatsakat xwa, chu ni kamaxkilh talakaskin israelitas nataxtukgo.

21 Alistalh, Jehová wanilh Moisés: «Katamakayawa kʼakgapun xlakata nakapukswan kxtiyat Egipto. Lu kapukswa nawan».* 22 Moisés tunkun tamakayawalh kʼakgapun chu akgtutu kilhtamaku lu kapukswalh kxlikalanka xtiyat Egipto. 23 Egipcios nila xlaʼakxilhkgo, chu akgtutu kilhtamaku nila taxtukgolh kxchikkan. Pero niku xwilakgo israelitas xʼanan xkgakganat. 24 Wa xlakata faraón matasaninalh Moisés chu wanilh: «Kapitit kakninaniyatit Jehová. Chu na tlan nakalipinatit minkamankan. Pero miborregoskan chu miwakaxkan natamakgxtakgkgo unu». 25 Pero Moisés kgalhtilh: «Wix na nakinkamaxkiya* animales xlakata nakkamakgniyaw chu nakkalhkuyuyaw kxlakatin Jehová kiDioskan. 26 Na nakkalinaw kiʼanimaleskan. Nipara tantum ktimakgxtakgwi, xlakata makgapitsi nakkamakamastayaw akxni nakkakninaniyaw Jehová kiDioskan. Chu kajwatiya akxni nakchanaw anta nakkatsiyaw tuku nakmakamaxkiyaw Jehová». 27 Pero Jehová mastalh talakaskin pi xnaku faraón xatsakat xwampa chu ni kamaxkilh talakaskin xtaxtukgolh. 28 Faraón wanilh: «¡Nialh kakxilhputunan! ¡Nialh nakilakgtana!, komo natamparaya nakmakgniyan». 29 Wa xlakata Moisés wa: «Komo chuna lakaskina, nialh ktilakgmin».

11 Alistalh, Jehová wanilh Moisés: «Naklimini apulaktum tuku nitlan faraón chu Egipto. Alistalh xla nakamaxkiyan talakaskin nataxtuyatit unu. Xla nakatlakgaxtuyan. 2 La uku katachuwinanti kachikin, kakawani putum lakchixkuwin chu lakpuskatin pi kakaskinikgolh xtalakatsukan tuku litatlawanit plata chu oro». 3 Jehová tlawalh pi egipcios tlan xkalikatsinikgolh israelitas. Asta Moisés lu xmaxkikan kakni kxlikalanka xtiyat Egipto, xmaxkikgo kakni kskujnin faraón chu israelitas.

4 Moisés wanilh faraón: «Wa uma tuku wan Jehová: “Naktitaxtu putum kxtiyat Egipto itat tsisni. 5 Nanikgo putum xanapuxkun lakgkgawasan kxlikalanka xtiyat Egipto, lata xapuxku xkgawasa mapakgsina faraón asta xapuxku xkgawasa skujni tiku maskuju molino. Na nanikgo putum animales nema pulana lakachinkgonit. 6 Naʼanan akgtum lanka talipuwan kxlikalanka xtiyat Egipto, akgtum lanka talipuwan nema nikxni ananit chu nikxni katiʼanampa. 7 Pero nipara tantum chichi katikaxkaputulh* israelitas chu nipara xʼanimaleskan. Chuna nakatsiyatit pi Jehová ni kalikatsini israelitas chuna la kalikatsini egipcios”. 8 Wa xlakata putum miskujnin nakilakgminkgo, nakilakgtatsokgostakgo chu nawankgo: “Kataxtu chu putum kachikin nema stalanimakgon”. Alistalh akit naktaxtu». Akxni Moisés wankgolh uma, lu ksitsinit akxni taxtulh niku xwi faraón.

9 Alistalh Jehová wanilh Moisés: «Faraón ni katikakgaxmatnin, uma chuna nala xlakata tlan naʼakxilhkan atanu milagros nema naktlawa kxtiyat Egipto». 10 Moisés chu Aarón xtlawakgonit putum umakgolh milagro kxlakatin faraón, pero Jehová mastalh talakaskin pi xnaku faraón xatsakat xwa chu ni xkamaxkilh talakaskin israelitas xtaxtukgolh kʼEgipto.

12 Chu Jehová kawanilh Moisés chu Aarón kxtiyat Egipto: 2 «Uma papaʼ nalitsuku akgatunu papaʼ; akgatunu kata wa uma papaʼ xapulana nalitaxtu mimpalakatakan. 3 Kakatachuwinantit israelitas chu kakawanitit: “Kkilhtamaku akgkaw xla uma papaʼ, kʼakgatunu familia* milichipatkan tantum borrego, tantum borrego kʼakgatunu chiki. 4 Pero komo kmifamiliajkan ni katiwakgotit tantum borrego xlakata ni minchalhuwakan, militasanitkan mintalakatsukan xlakata nakatawayatit. Milimaʼakgpitsitkan chuna la xlilhuwa latamanin wilakgolh chu chuna la xlilhuwa nawayatit minchatunukan. 5 Xakgawasa borrego ni xatatatla xliwanat chu akgtum kata xlikgalhit. Tlan nalaksakatit tantum xakgawasa borrego o tantum xakgawasa cabra. 6 Milimakitkan asta akxni nalakgchan xlikgalhkutati uma papaʼ, chu putum kachikin Israel namakgni akxni natsiswan.* 7 Alistalh, kchiki niku nawayatit, nalitsakglhmaniyatit kgalhni xkilhpanin chu xʼakpun malakcha* niku laktanukan.

8 »”Miliwatkan xaliwa watiya uma katsisni. Naxpupuyatit chu natawayatit kaxtalanchu nema ni kgalhi limaxkutin chu xastakga verduras. 9 Ni nawayatit xastakga nipara xatalapu. Putum milixpuputkan klhkuyat, xʼakgxakga, xtantun chu tuku kgalhi kxpulakni. 10 Liwa nema naʼakgataxtu, ni namakiyatit. Tuku naʼakgataxtu lichali, mililhkuyutkan. 11 Akxni nawayatit uma, wilinitantit nawan militatampulakgchinkan, mintatunukan chu chipanitantit nawan milixtokgokan. Nachuna, lakapala miliwatkan. Uma Pascua wa xla Jehová. 12 Uma katsisni naktitaxtu putum kxtiyat Egipto chu nakkamakgni putum xanapuxkun lakgkgawasan chu animales nema pulana lakachinkgonit. Nakkalakputsanani chu nakkamalakgaxokge putum xdioseskan egipcios. Akit Jehová. 13 Kgalhni nalitasiya chiki niku wixin natawilayatit. Akxni nakakxilha kgalhni nitu ktikatlawanin. Chu akxni naklimalakgaxokge xtiyat Egipto tuku nitlan, wixin ni katinitit.

14 »”Uma kilhtamaku wixin mililakapastakatkan. Wixin, minkamanankan chu putum tiku aku nalakachintilhakgo militlawatkan uma akgatunu kata chuna la akgtum fiesta xpalakata Jehová. Uma akgtum limapakgsin nema lhuwa kilhtamaku namakgapala. 15 Akgtujun kilhtamaku miliwatkan kaxtalanchu nema ni kgalhi limaxkutin. Wa xlakata lata xapulana kilhtamaku militamakxtutkan kminchikkan skitit* nema kgalhi limaxkutin. Xlakata putum tiku nawa tuku kgalhi limaxkutin lata kxapulana asta kxliʼakgtujun kilhtamaku, namakgnikan. 16 Xapulana kilhtamaku militlawatkan akgtum xasanto tamakxtumit, chu kilhtamaku akgtujun, militlawatkan atanu xasanto tamakxtumit. Niti xliskujat umakgolh kilhtamaku, kajwatiya xlikaxtlawatkan liwat nema chatunu nawakgo.

17 »”Wixin militlawatkan Fiesta xla Kaxtalanchu nema ni kgalhi Limaxkutin xlakata watiya uma kilhtamaku mimputumkan nakkatamakxtuyan kxtiyat Egipto. Minkamanankan chu putum tiku aku nalakachintilhakgo xlilakapastakatkan uma kilhtamaku. Uma akgtum limapakgsin nema lhuwa kilhtamaku namakgapala. 18 Kxapulana papaʼ, kkilhtamaku akgkutati, kakgotanun miliwatkan kaxtalanchu nema ni kgalhi limaxkutin asta kxkakgotanun kilhtamaku puxamatum 19 Akgtujun kilhtamaku ni xliʼanat kminchikkan skitit nema kgalhi limaxkutin. Komo chatum tiku xalak atanu país o tiku xalak país nawa tuku kgalhi limaxkutin, namakgnikan. 20 Ni nawayatit tuku kgalhi limaxkutin. Kminchikkan kajwatiya nawayatit tuku ni kgalhi limaxkutin”».

21 Wa xlakata Moisés tunkun katasanilh putum lakgkgolotsin xalak Israel chu kawanilh: «Chatunu wixin kapitit chu kalaksaktit tantum xakgawasa animal* nema nakatawayatit mifamiliajkan chu kamakgnitit animal xlakata nawayatit kPascua. 22 Alistalh katiyatit pixtum xatuwan hisopo,* kalimastajatit kgalhni nema mastokgnitantit chu kalitsakglhmanitit xkilhpanin chu xʼakpun malakcha niku laktanukan. Niti xlitaxtut kxchik asta akxni naxkgakga. 23 Akxni Jehová natitaxtu xlakata nakamalakgaxokge egipcios chu naʼakxilha kgalhni kxkilhpanin chu xʼakpun malakcha niku laktanukan, Jehová nakalakatsala umakgolh malakcha. Xla ni katikamakgnilh tiku tanumakgo kʼumakgolh chiki.

24 »Wixin mililakapastakatkan uma kilhtamaku. Uma akgtum limapakgsin mimpalakatakan chu xpalakatakan minkamanankan nema namakgapala lhuwa kilhtamaku. 25 Chu akxni natanuyatit ktiyat nema Jehová kawaninitan pi nakamaxkiyan, chuntiya mililakapastakatkan uma kilhtamaku. 26 Akxni minkamanankan nakakgalhskinkgoyan “¿Tuku kilhchanima uma fiesta?”, 27 wixin nakakgalhtiyatit: “Kmakgniw uma animal xlakata nakwayaw kxPascua Jehová. Xla nitu katlawanilh xchikkan israelitas kʼEgipto chu kalakgmaxtulh kifamiliajkan akxni kamalakgaxokgelh egipcios”».

Wa xlakata israelitas tatsokgostakgolh chu takilhputakgolh. 28 Chu tsukukgolh tlawakgo chuna la Jehová xkalimapakgsinit Moisés chu Aarón. Tlawakgolh chuna la xla xkawaninit.

29 Chu itat tsisni, Jehová kamakgnilh putum xanapuxkun lakgkgawasan nema xwilakgo kʼEgipto. Lata xapuxku xkgawasa mapakgsina faraón asta xapuxku xkgawasa tiku xtanuma kpulachin.* Na kamakgnilh putum animales nema pulana xlakachinkgonit. 30 Uma katsisni takilh faraón, kskujnin chu putum amakgapitsi egipcios, chu analh akgtum lanka talipuwan kxlikalanka Egipto, xlakata ni xʼanan akgtum chiki niku ni xnikanit. 31 Watiya uma katsisni, faraón tunkun kamatasaninalh Moisés chu Aarón chu kawanilh: «¡Kapitita! Katamakgatlinitit kinkachikin, wixin chu amakgapitsi israelitas. Kapitit kakninaniyatit Jehová, chuna la xwanitantit. 32 Na kakalipitit miborregoskan chu miwakaxkan, chuna la wantit. Nachuna, kakisikulunatlawatit».

33 Chu egipcios tsukukgolh kamalakapalikgo israelitas xlakata xtaxtukgolh kpaís chu xwankgo: «¡Komo ni nataxtukgo, kimputumkan naniyaw!». 34 Wa xlakata israelitas tiyakgolh skitit xaʼharina nema ni xkgalhi limaxkutin chu niku xʼamakgo lakgwilhakgo. Xlakan xlimakgswitkgonit klhakgatkan chu kukakgolh. 35 Nachuna, israelitas tlawakgolh tuku Moisés xkawaninit: kaskinikgolh egipcios tuku xlitatlawanit plata, tuku xlitatlawanit oro chu lhakgat. 36 Jehová tlawalh pi egipcios tlan xkalikatsinikgolh israelitas, wa xlakata kamaxkikgolh putum tuku kaskinikgolh. Alistalh israelitas kamakglhtikgolh egipcios tuku xkgalhikgo.

37 Wa xlakata israelitas taxtukgolh kRamesés chu ankgolh kSucot. Akgchaxan ciento mil lakchixkuwin tiku katantun ankgolh chu ni kataputlekgeka laktsu kamanan. 38 Nachuna, katataxtukgolh lhuwa latamanin tiku tanu tanu xkilhtsukutkan.* Na kalinkgolh borregos chu wakax, lhuwa animales kalinkgolh. 39 Skitit nema tamakxtukgolh kʼEgipto litlawakgolh lakstilili kaxtalanchu nema ni xkgalhi limaxkutin. Kaxtalanchu ni xkgalhi limaxkutin xlakata lakapala katlakgaxtuka kʼEgipto chu nila makaxkgolh tuku xʼamakgo maklakaskinkgo.

40 Israelitas latamakgolh kʼEgipto 430 kata. 41 Watiya kilhtamaku akxni takgatsilh 430 kata, putum xkachikin* Jehová taxtulh kxtiyat Egipto. 42 Uma katsisni xlakan xlitlawatkan akgtum fiesta xlakata Jehová katamakxtulh kʼEgipto. Uma katsisni, putum kachikin Israel xlitlawat akgtum fiesta xpalakata Jehová, chu tiku aku nalakachintilhakgo nachuna xlitlawatkan.

43 Wa xlakata Jehová kawanilh Moisés chu Aarón: «Wa uma limapakgsin xla Pascua. Nipara chatum tiku xalak atanu país tlan nawa animal nema namakamastakan kPascua. 44 Komo wi tiku kgalhi chatum skujni nema tamawanit, xliʼakstilichukunit kxuwa xlichixku. Kajwatiya chuna, skujni tlan nawa animal. 45 Ni xliwatkan liwa xla tamakamastan tiku xalak atanu país nema lamakgolh kmilakgstipankan, chu skujnin xalak atanu país tiku kamaskgawikan na ni xliwatkan. 46 Xliwatkan borrego kʼakgtum chiki. Ni xlimaxtutkan xaliwa kxkilhtin chiki chu na ni xlilaktukxnitkan xlukut. 47 Putum israelitas xlitlawatkan uma Pascua. 48 Komo chatum tiku xalak atanu país lama kmilakgstipankan chu na makgtlawaputun xPascua Jehová, putum lakchixkuwin tiku tapakgsikgo kxchikkan xkaliʼakstilichukunitkan kxuwa xlichixkukan. Kajwatiya chuna tlan natalakatsuwikgo chu namakgtlawakgo Pascua, chu nalitaxtu chuna la tiku xalak país. Nipara chatum tiku ni akstilichukunikanit kxuwa xlichixku tlan nawa animal nema makamastakan kPascua. 49 Limapakgsin nema xlimakgantaxtit tiku xalak uma país na xlimakgantaxtit tiku xalak atanu país nema lama kmilakgstipankan».

50 Wa xlakata putum israelitas tlawakgolh chuna la Jehová xkalimapakgsinit Moisés chu Aarón. Tlawakgolh chuna la xla xwanit. 51 Watiya uma kilhtamaku, Jehová katamakxtulh israelitas kxtiyat Egipto.

13 Jehová na wanilh Moisés: 2 «Tanu kakawili chu kakimakamaxki putum xanapuxkun lakgkgawasan israelitas. Xapuxku xkgawasa chatum israelita chu animal nema pulana lakachinit, kila».

3 Alistalh Moisés wanilh kachikin: «Kalakapastaktit uma kilhtamaku, kilhtamaku akxni taxtutit kʼEgipto, ktiyat* niku skujnin xlitaxtuyatit, xlakata Jehová kalitamakxtun anta xatliwakga xmakan. Wa xlakata ni nawayatit tuku kgalhi limaxkutin. 4 Nataxtuyatit uma kilhtamaku, kpapaʼ abib.* 5 Jehová kamalaknunilh xalakgmakgan minatlatni pi xʼaman maxkiyan xtiyatkan cananeos, hititas, amorreos, heveos chu jebuseos, ktiyat niku anan lhuwa leche chu ksakgsi cera.* Akxni nalichanan anta, chuntiya nalakapastaka uma kilhtamaku kʼuma papaʼ. 6 Akgtujun kilhtamaku miliwat kaxtalanchu nema ni kgalhi limaxkutin, chu xliʼakgtujun kilhtamaku natlawaniya Jehová akgtum fiesta. 7 Miliwat kaxtalanchu nema ni kgalhi limaxkutin umakgolh akgtujun kilhtamaku. Ni milikgalhit tuku kgalhi limaxkutin, chu xlilakgatum* tiyat nema natapakgsiniyan ni xliʼanat skitit* nema kgalhi limaxkutin. 8 Chu uma kilhtamaku miliwanit minkgawasa: “Ktlawama uma xlakata naklakapastaka tuku Jehová tlawalh kimpalakata akxni ktaxtulh kʼEgipto”. 9 Uma fiesta namalakapastakayan tuku lanit xtachuna la xtatsokgtawilalh kmimakan chu kmimuxtin.* Chuna xlimapakgsin Jehová ni katitamakgatlinilh minkilhni, xlakata Jehová litamakxtun xatliwakga xmakan kʼEgipto. 10 Akgatunu kata milimakgantaxtit uma limapakgsin kkilhtamaku nema lakkaxwilikanit.

11 »Akxni Jehová nalinan kxtiyatkan cananeos, nema malaknunin pi xʼaman maxkiyan, wix chu xalakgmakgan minatlatni, 12 tanu nawiliniya Jehová xanapuxkun lakgkgawasan israelitas chu putum miʼanimales nema pulana lakachinkgonit. Putum uma wa tapakgsinikgo Jehová. 13 Akxni nalakachin xapulana burro, nalixokgoya tantum borrego xlakata nalakgmaxtuya. Komo ni naxokgoya xpalakata, milipixtukxat. Nachuna milixokgot tuku nakalilakgmaxtuya putum xanapuxkun milakgkgawasan.

14 »Komo namin kilhtamaku minkgawasa nakgalhskinan “¿Tuku kilhchanima uma?”, nawaniya “Jehová kinkalilakgmaxtun xatliwakga xmakan k’Egipto, ktiyat niku skujnin xaklitaxtuyaw. 15 Xlakata faraón ni xkinkatamakxtuputunan, Jehová kamakgnilh putum xanapuxkun lakgkgawasan chu putum animales nema pulana xlakachinkgonit kxtiyat Egipto. Wa xlakata kmakamaxkiyaw Jehová putum xalakgkgawasan animales nema pulana lakachinkgonit chu kxokgoyaw xtapalh xanapuxkun kilakgkgawasankan”. 16 Chu uma namalakapastakayan tuku lanit xtachuna la xtatsokgtawilalh kmimakan chu kmimuxtin, xlakata Jehová kinkalitamakxtun xatliwakga xmakan kʼEgipto».

17 Pero akxni faraón tamakxtulh kachikin Israel, Dios ni kalaklilh ktiji nema xtitaxtu kxtiyatkan filisteos, maski tlakg lakatsu xwanit. Dios chuna tlawalh xlakata wa: «Akxni kachikin natatlawakan guerra, max nalakgpali xtapuwan chu nataspitputun kʼEgipto». 18 Wa xlakata, Dios tlawalh pi kachikin xlakalh kxakaskani xtiyat xaSpinini pupunu. Akxni israelitas taxtukgolh kxtiyat Egipto xkaxyakgo chuna la soldados tiku xʼamakgo talatlawanankgo. 19 Moisés lilh xlukut José. José xtlawanit pi xkamanan Israel wi tuku xlitayanikgolh akxni kawanilh: «Dios xlikana nakamakgtayayan. Nalipinatit kilukut». 20 Wa xlakata, israelitas taxtukgolh kSucot chu yawakgolh xchikkan xaxuwa kʼEzam, niku xtsuku xakaskakni tiyat.

21 Jehová xkapulanitilha. Kakuwani xkalipulalin puklhni,* chu katsisni xkalimakaxkgakgeni lhkuyat.* Chuna tlan xtlawankgo kakuwani chu katsisni. 22 Kakuwani, puklhni ni xtamakgatlini kachikin chu katsisni lhkuyat na ni xkatamakgatlini.

14 Jehová wanilh Moisés: 2 «Kakawani israelitas pi kataspitkgolh chu kayawakgolh xchikkan xaxuwa kxlakatin Pihahirot, kxʼitat Migdol chu pupunu, lata niku tlan naʼakxilhkgo Baal-Zefón. Xchikkan xaxuwa nalakaʼantaya kBaal-Zefón, lakatsu kpupunu. 3 Alistalh, faraón nawan xpalakatakan israelitas: “Akgtsankgatapulikgonit kpaís. Nialhla taxtukgo kxakaskakni tiyat”. 4 Chu akit nakmasta talakaskin pi xnaku faraón xatsakat nawan chu xla nakaputsastalani, pero akit nakimalankikan akxni nakkamakgatlaja faraón chu putum ksoldados. Chuna egipcios nakatsikgo pi akit Jehová». Wa xlakata israelitas tlawakgolh chuna la kawanika.

5 Alistalh mapakgsina xalak Egipto makatsinika pi israelitas xtsalakgonit. Faraón chu kskujnin tunkun nitlan limakgkatsikgolh tuku xtlawakgonit chu wankgolh: «¿Tuku xlakata chuna tlawaw? ¿Tuku xlakata kamakgxtakgwi israelitas, kiskujninkan?». 6 Wa xlakata faraón mamakaxninalh xputlaw nema xmaklakaskin kʼguerra chu kalilh ksoldados. 7 Kalilh akgchaxan ciento tlakg xalaktlan xputlaw chu putum amakgapitsi putlaw xalak Egipto, kʼakgatunu putlaw xwakakgo soldados. 8 Wa xlakata Jehová mastalh talakaskin pi xnaku faraón, mapakgsina xalak Egipto, xatsakat xwa, chu kaputsastalanilh israelitas. Pero akxni israelitas xtaxtumakgo nitu xpekuamakgo. 9 Chu egipcios kaputsastalanikgolh. Akxni israelitas xyawakgonita xchikkan xaxuwa nema xlakaʼayakgo kBaal-Zefón, lakatsu kpupunu, kxpaxtun Pihahirot, putum xkawayu chu xputlaw faraón xtalakatsuwimakgo, nachuna tiku xkgewilakgo xkawayu chu ksoldados.

10 Akxni faraón tlakg talakatsuwilh, israelitas talakayawakgolh chu akxilhkgolh pi egipcios xkaputsastalanimakgo. Israelitas lu pekuankgolh, wa xlakata pixlanka tsukukgolh skinikgo tamakgtay Jehová. 11 Wanikgolh Moisés: «¿Ni anan putaknun kʼEgipto, chu wa xlakata kinkalita kxakaskakni tiyat xlakata unu nakniyaw? ¿Tuku kinkatlawaninita? ¿Tuku xlakata kinkatamakxtu kʼEgipto? 12 ¿Ni wa uma tuku kkawanin akxni xaklamaw kʼEgipto? ¿Ni kkawanin: “Ni kakinkamaʼakglhuwi, kinkamaxki talakaskin chuntiya nakkaskujnaniyaw egipcios”? Tlakg tlan nakkaskujnaniyaw egipcios nixawa nakniyaw kxakaskakni tiyat». 13 Pero Moisés kawanilh israelitas: «Ni kapekuantit. Kaks katayatit chu kaʼakxilhtit chuna la Jehová nakalakgmaxtuyan la uku. Xlakata egipcios nema kaʼakxilhpatit uku nikxni katikaʼakxilhparatit. 14 Jehová natalatlawanan mimpalakatakan, chu wixin kaks natayayatit».

15 Chu Jehová wanilh Moisés: «¿Tuku xlakata chuntiya pixlanka kiskinipat tamakgtay? Kakawani israelitas pi kamakikgolh xchikkan xaxuwa. 16 Chu wix, kalitamakayawa milixtokgo chu kastonkgti mimakan kxkgalhni pupunu xlakata natapitsi. Chu chuna israelitas tlan napatakutkgo pupunu kxaskakni tiyat. 17 Chu akit nakmasta talakaskin pi xnakujkan egipcios xatsakat nawan chu nakaʼakstalakgo* israelitas. Nakimalankikan akxni nakkamakgatlaja faraón, putum ksoldados, xputlaw nema kalin kʼguerra chu tiku kgetawilakgo xkawayu. 18 Chu egipcios liwana nakatsikgo pi akit Jehová akxni nakimalankikan xlakata nakkamakgatlaja faraón, xputlaw nema kalin kʼguerra chu tiku kgetawilakgo xkawayu».

19 Wa xlakata, xʼángel xaxlikana Dios tiku xkapulalima israelitas alh kxchakgenkan, chu puklhni nema xkapulanitilha alh kxchakgenkan chu anta tamakgxtakglhi. 20 Chu puklhni kamapitsilh egipcios chu israelitas. Puklhni tsitsakga xwanit lakatum, pero alakgaputu, xmakaxkgakgema katsisni. Wa xlakata, putuminika katsisni, tiku xwilakgo lakatum nila xtalakatsuwinikgo tiku xwilakgo alakgaputu.

21 Alistalh Moisés stonkgli xmakan kxkgalhni pupunu chu Jehová tlawalh pi tantaskaka, akgtum tliwakga un xalak este xmapitsilh pupunu. Chuchut tapitsilh chu xtampun kaskakli. 22 Chuna, israelitas patakutkgolh pupunu niku xkaskaknit. Chuchut xyakgo chuna la patsaps kxpakgastakatkan* chu kxpakgxwikikan.* 23 Chu egipcios tsukukgolh kaputsastalanikgo israelitas. Putum xkawayu, putlaw nema xmaklakaskin kʼguerra chu tiku xkgewilakgo xkawayu faraón, tajukgolh kpupunu. 24 Akxni xʼamaja xkgakga,* Jehová kaʼakxilhli egipcios lata kxpulakni lhkuyat* chu puklhni,* chu tlawalh pi egipcios lu xpekuankgolh. 25 Tlawalh pi xputlawkan xtaxtunikgolh xllantajkan xlakata chuna tuwa xmatlawanikgolh. Egipcios xwankgo: «¡Kakatsalaniw israelitas, xlakata Jehová katalatlawama egipcios xpalakatakan!».

26 Wa xlakata Jehová wanilh Moisés: «Kastonkgti mimakan kxkgalhni pupunu xlakata chuchut nakamakgtsi egipcios, xputlaw nema kamaklakaskin kʼguerra chu tiku kgewilakgo xkawayu». 27 Moisés tunkun stonkgli xmakan kxkgalhni pupunu, chu akxni xʼamaja xkgakga, chuchut taspitpa chuna la xwi xapulana. Egipcios xtsalaputunkgo, pero Jehová kamakalh kxʼitat pupunu. 28 Chu akxni chuchut taspitpa chuna la xwi xapulana, kamakgtsilh putlaw nema xmaklakaskinkan kʼguerra, tiku xkgewilakgo kawayu chu putum ksoldados faraón, nema xtajukgonit kpupunu xlakata nakaputsastalanikgo israelitas. Nipara chatum lakgtaxtulh.

29 Pero israelitas katantun patakutkgolh pupunu niku xkaskaknit. Chu chuchut xyakgo chuna la akgtum patsaps kxpakgastakatkan chu kxpakgxwikikan. 30 Jehová chuna kalakgmaxtulh israelitas kxmakankan egipcios uma kilhtamaku, chu israelitas akxilhkgolh xanin egipcios kxkilhtun pupunu. 31 Israelitas na akxilhkgolh lhuwa xlitliwakga* Jehová nema maklakaskilh akxni katalatlawalh egipcios. Wa xlakata kachikin tsukulh pekuani Jehová chu na tsukulh kanajlani Jehová chu Moisés, kskujni.

15 Amacha kilhtamaku, Moisés chu israelitas kilhtlinikgolh Jehová uma takilhtlin:

«Nakkilhtlini Jehová xlakata lu lakgapaskanit xlilanka.

Kawayu chu tiku xkgewilakgo kamakalh kpupunu.

 2 Kilitliwakga wa Jehová,* xlakata xla kilakgmaxtuna litaxtunit.

Xla kiDios, chu akit naklichuwinan xlilanka; xla xDios kintlat, chu akit nakmalanki.

 3 Jehová chatum tliwakga soldado. Xtukuwani wa Jehová.

 5 Taʼakgayawana kamakgtsilh chu xtachuna la chiwix lakgtsankgakgolh kxtampun.

 9 Kintalatlawanakan wankgolh: “¡Kakaputsastalaniw chu kakamataxtukwi!

¡Naʼakgchipayaw putum tuku kgalhikgo, nakamakglhtiyaw putum tuku lakaskinaw!

¡Kiʼespadajkan nakalimakgniyaw!”.

11 ¿Tiku Dios xtachuna la wix, oh, Jehová?

Wix lu xasanto, ni anan atanu Dios chuna la wix.

Wix tiku lakgchanan napekuanikana chu nalimalankikana takilhtlin, tiku tlawa tuku kaks malakawaninan.

12 Stonkgti mimpakgastakat, chu tiyat kakgotwalh.

Putum latamanin xalak Canaán napekuankgo.

16 Xlakan lu napekuankgo chu nalhpipikgo.

18 Jehová putum kilhtamaku namapakgsinan.

20 Chu palakachuwina Míriam, xtala Aarón, tiyalh akgtum pandereta, chu putum lakpuskatin stalanikgolh, tsukukgolh tantlikgo chu tlakgkgo pandereta. 21 Míriam xkakgalhti lakchixkuwin akxni xkilhtlima chu xwan:

«Kakilhtlinitit Jehová, xlakata talankinit.

Kawayu chu tiku xkgewilakgo kamakalh kpupunu».

22 Alistalh, Moisés katataxtulh israelitas kxaspinini pupunu. Ankgolh kxakaskakni xtiyat Sur chu akgtutu kilhtamaku tlawankgolh kxakaskakni tiyat chu ni xtekgskgo chuchut. 23 Chu chankgolh kMará,* pero nila xwakgo chuchut nema xwi kMará xlakata xun xwanit. Wa xlakata anta limapakuwilh Mará. 24 Wa xlakata kachikin nitlan tsukukgolh lichuwinankgo Moisés. Xwankgo: «¿Tuku nalikgotnanaw?». 25 Moisés tasaskinilh tamakgtay Jehová, chu Jehová lilh niku xya kgantum kiwi. Wa xlakata Moisés makalh kiwi kchuchut chu chuchut xasakgsi wa.

Anta Dios wililh akgtum limapakgsin chu kamasiyanilh tuku xlitlawatkan xwanit, chu Dios xkatsiputun tuku xwi kxnakujkan. 26 Kawanilh: «Akit Jehová, miDioskan, komo kuenta natlawayatit kintachuwin, chu natlawayatit tuku tlan kakxilha, chu komo kuenta natlawayatit tuku kskin chu nakgalhakgaxpatatit kilimapakgsin, ni ktikamalakgachanin tajatat nema kkamalakgachanilh egipcios; xlakata akit, Jehová, kkamapaksaman».

27 Alistalh chankgolh kʼElim, niku xʼanan akgkutiy taxtunu* chu tutumpuxamakaw mokgot. Wa xlakata anta yawakgolh xchikkan xaxuwa, lakatsu kchuchut.

16 Alistalh taxtukgolh kʼElim, chu titaxtulh kilhtamaku putum kachikin Israel chankgolh kxakaskakni xtiyat Sin, nema wi kxlakgstipan Elim chu Sinaí. Chankgolh anta kxliʼakgtiy papaʼ, kilhtamaku akgkukitsis, lata akxni xtaxtukgonit kxtiyat Egipto.

2 Kxakaskakni tiyat, putum kachikin Israel nitlan tsukukgolh lichuwinankgo Moisés chu Aarón. 3 Israelitas xkawanikgo: «¡Tlakg tlan xtiwa komo xkintikamakgnin Jehová kxtiyat Egipto! Anta lakatsu xaklakgatawilayaw tlamink* niku xmakchakan liwa chu xakwayaw kaxtalanchu asta akxni xakkgalhkgasaw. Pero wixin kilalimiw kxakaskakni tiyat xlakata kimputumkan naktsinksniyaw».

4 Wa xlakata Jehová wanilh Moisés: «Naktlawa pi kataktalh kaxtalanchu kʼakgapun, chu putum kachikin nataxtukgo chu chali chali nasakkikgo tuku nawakgo. Chuna nakkatsi tuku wi kxnakujkan chu nakakxilha komo nakgalhakgaxmatkgo kilimapakgsin o ni. 5 Pero kxliʼakgchaxan kilhtamaku, milisakkitkan tuku namaklakaskinatit akgtiy kilhtamaku chu alisokg nakaxtlawayatit».

6 Wa xlakata Moisés chu Aarón kawanikgolh putum israelitas: «Kakgotanun nakatsiyatit pi Jehová wa tiku katamakxtun kxtiyat Egipto. 7 Chu tsisa naʼakxilhatit xlilanka Jehová, xlakata Jehová kgaxmatnit tuku nitlan lichuwinampatit xpalakata. ¿Tuku klitaxtuyaw akinin xlakata nitlan nakilalichuwinanaw?». 8 Moisés kawanipa: «Akxni Jehová nakamaxkiyan liwa kakgotanun, chu tsisa akxni nakamaxkiyan kaxtalanchu xlakata nakgalhkgasatit, nakatsiyatit pi Jehová kgaxmatnit tuku nitlan wantit xpalakata. ¿Chu tuku klitaxtuyaw akinin? Ni akinin tiku nitlan kilalichuwinamaw. Wa Jehová tiku nitlan lichuwinampatit».

9 Alistalh Moisés wanilh Aarón: «Kawani putum kachikin Israel: “Katantit kxlakatin Jehová, xlakata xla kgaxmatnit tuku nitlan lichuwinampatit”». 10 Akxni Aarón katachuwinankgolh kachikin Israel, israelitas talakgaspitkgolh chu lakankgolh kxakaskakni tiyat, chu xlilanka Jehová tasiyalh kpuklhni.

11 Jehová na wanilh Moisés: 12 «Kkgaxmatnit tuku nitlan lichuwinamakgo israelitas. Kakawani: “Akxni natsiswan* nawakgo liwa, chu tsisa nawayankgo asta nakgalhkgaskgo. Chu xlikana nakatsikgo pi akit Jehová, xDioskan”».

13 Uma kakgotanun minkgolh lhuwa tsiktsi* nema malakgatsamakgolh tiyat niku israelitas xyawakgonit xchikkan xaxuwa, chu lichali tsisa, xlimakgstilili kachikin xʼanan monkganat. 14 Akxni monkganat lakgskupli,* wi tuku tamakgxtakgli kxakaskakni tiyat nema stakaka xwanit, lu stakaka xwanit chu xtasiya chuna la miki. 15 Xlakata israelitas ni xkatsikgo tuku xwanit uma, tsukukgolh lakgalhskinkgo: «¿Tuku uma?». Moisés kawanilh: «Wa liwat nema Jehová kamaxkiman xlakata nawayatit. 16 Wa uma tuku Jehová limapakgsinanit: “Chatunu wixin kasakkilh tuku nawa. Milisakkitkan akgtum omer* xpalakatakan chatunu tiku tapakgsikgo kminchikkan xaxuwa”». 17 Chu wa uma tuku tlawakgolh israelitas. Wi tiku lhuwa sakkikgolh chu makgapitsi ni lhuwa sakkikgolh. 18 Akxni xlipulhkakan omer, tiku lhuwa ksakkinit ni xʼakgataxtuni, chu tiku ni lhuwa ksakkinit xʼakchani. Chatunu chatunu ksakkikgo chuna la tlan xwakgolh.

19 Alistalh Moisés kawanilh: «Nitu namaʼakgataxtiyatit lichali». 20 Pero maski chuna, ni kgalhakgaxmatkgolh Moisés. Akxni makgapitsi lakchixkuwin makikgolh kaxtalanchu asta lichali, takgxli xaluwa chu tsukulh puksan. Wa xlakata Moisés lu kasitsinilh. 21 Chali chali tsisa, chatunu chatunu ksaka tuku xwa. Akxni lu xtsuku chichinan, tuku xʼakgataxtu xlakstalanka.

22 Kxliʼakgchaxan kilhtamaku, sakkikgolh liwat nema xmaklakaskinkgolh akgtiy kilhtamaku, uma wamputun, akgtiy omer xpalakata chatum lataman. Wa xlakata putum napuxkun xalak kachikin minkgolh makatsinikgo Moisés. 23 Chu xla kawanilh: «Wa uma tuku wanit Jehová. Chali mimputumkan milijaxatkan, xlakata chali akgtum xasanto sábado. Namaklakaskinaw xlakata nakakninaniyaw Jehová. Wa xlakata kamakchatit tuku milimakchatkan chu kamapupitit tuku milimapupitkan. Tuku nakaʼakgataxtuniyan, kamakitit xlakata namaklakaskinatit lichali». 24 Chu chuna la Moisés xkalimapakgsinit, makikgolh asta lichali, chu ni taxtunilh xaluwa chu na ni puksalh. 25 Wa xlakata Moisés wa: «Uma kilhtamaku nawayatit, xlakata la uku sábado chu namaklakaskinaw xlakata nakakninaniyaw Jehová. La uku ni katitekgstit kkatutsu. 26 Akgchaxan kilhtamaku nasakkiyatit, pero kxliʼakgtujun kilhtamaku, sábado, nitu katiʼanalh». 27 Maski chuna, kxliʼakgtujun kilhtamaku, makgapitsi tiku xalak kachikin ankgolh putsakgo, pero nitu tekgskgolh.

28 Wa xlakata Jehová wanilh Moisés: «¿Tuku kilhtamaku natlawayatit tuku kkaskiniyan chu nakgalhakgaxpatatit kilimapakgsin? 29 Ni kapatsankgatit* pi akit, Jehová, kkamaxkinitan sábado. Wa xlakata, xliʼakgchaxan kilhtamaku kkamaxkiyan kaxtalanchu nema namaklakaskinatit akgtiy kilhtamaku. Chu xliʼakgtujun kilhtamaku mimputumkan militamakgxtakgatkan niku wilatit, niti xlitaxtut anta». 30 Wa xlakata xliʼakgtujun kilhtamaku, sábado, kachikin jaxli.

31 Kachikin Israel limapakuwilh maná* uma kaxtalanchu. Snapapa xwanit chuna la xtalhtsi kulantu chu xtakgalhwanan chuna la galleta nema xlitlawakanit ksakgsi cera.* 32 Wa xlakata Moisés wa: «Wa uma tuku limapakgsinanit Jehová: “Kapulhkatit maná kʼakgtum omer chu kamakitit xlakata putum minkamanankan naʼakxilhkgo kaxtalanchu nema kkalimawin kxakaskakni tiyat akxni kkatamakxtun kxtiyat Egipto”». 33 Wa xlakata Moisés wanilh Aarón: «Kamuju maná kʼakgtum omer, kaxtakgaju kpatum jarro chu kawili kxlakatin Jehová xlakata naʼakxilhkgo tiku nalakachintilhakgo». 34 Chu chuna la Jehová limapakgsilh Moisés, Aarón wililh kxlakatin akgtum xlakaskinka caja* xlakata anta xmakika. 35 Israelitas wakgolh maná tipuxam kata, asta akxni chankgolh kʼakgtum kachikin. Wakgolh maná asta akxni chankgolh niku xpakgta xtiyat Canaán. 36 Akgkaw omer xlitakgatsi akgtum efá.*

17 Putum kachikin Israel taxtulh kxakaskakni xtiyat Sin. Wi niku xjaxtilhakgo chuna la xkalimapakgsi Jehová. Alistalh yawakgolh xchikkan xaxuwa kRefidim, pero anta ni x’anan chuchut xlakata kachikin tlan xlikgotnankgolh.

2 Wa xlakata israelitas tsukukgolh tataʼakglhuwikgo Moisés chu xwanikgo: «¡Kakilamaxkiw chuchut xlakata nakkgotnanaw!». Pero Moisés kakgalhtilh: «¿Tuku xlakata kintataʼakglhuwipatit? ¿Tuku xlakata chuntiya talalakatawakapatit Jehová?». 3 Pero israelitas lu xkgalhputimakgo* anta. Wa xlakata chuntiya nitlan xlichuwinamakgo Moisés chu xwanimakgo: «¿Tuku xlakata kinkatamakxtu kʼEgipto? Kinkamanankan, kiʼanimaleskan, chu akinin nakkgalhputixniyaw. ¿Wa uma tuku xlakaskina?». 4 Alistalh, Moisés tasaskinilh tamakgtay Jehová chu wanilh: «¿Tuku naktatlawa uma kachikin? ¡Atsinu tsankga nakiʼaktalamakgnikgo!».

5 Wa xlakata Jehová wanilh Moisés: «Kakapulani kachikin chu kakatapi makgapitsi lakgkgolotsin xalak Israel, na kalipi lixtokgo nema lisnokgti kgalhtuchokgo Nilo. Nachipatilhaya milixtokgo chu ni natachokgoya. 6 Akit naktaya kmilakatin, kxʼakpun chiwix, anta kʼHoreb. Wix nasnokga chiwix, chu anta nataxtu chuchut xlakata kachikin tlan nalikgotnan». Wa uma tuku tlawalh Moisés kxlakatinkan lakgkgolotsin xalak Israel. 7 Wa xlakata anta limapakuwilh Masá* chu Meribá,* xlakata anta israelitas xtataʼakglhuwikgonit Moisés chu xtalalakatawakakgonit Jehová akxni xwankgo: «¿Kinkatawilan o ni kinkatawilan Jehová?».

8 Amalequitas ankgolh kRefidim xlakata natalatlawakgo israelitas. 9 Xlakata uma, Moisés wanilh Josué: «Kakalaksakti makgapitsi lakchixkuwin chu kapit katalatlawaya amalequitas. Chali kwi nawan kxʼakpun sipi chu kchipanit nawan xlixtokgo xaxlikana Dios». 10 Wa xlakata Josué tlawalh chuna la wanilh Moisés chu alh katalatlawa amalequitas. Moisés, Aarón chu Hur tawakakgolh kxʼakpun sipi.

11 Akxni Moisés xtamakayawa, xtlajanankgo israelitas; pero akxni xmakti xmakan, xtlajanankgo amalequitas. 12 Akxni Moisés xmakgatlakgwanita, wilinikgolh akgtum chiwix chu xla tawilalh anta. Aarón chu Hur paxtutawilakgolh xlakata xchaxnikgolh xmakan. Chuna xtamakayawanit asta akxni tsankgalh chichini. 13 Chuna, Josué kamakgatlajalh amalequitas chu tiku xkatatayakgo.

14 Wa xlakata Jehová wanilh Moisés: «Katsokgwili uma klibro xlakata nalakapastakkan: “Nakkamalakgsputu putum amalequitas kxtampin akgapun chu nialhti katikalakapastakli”. Chu kawani Josué uma tuku tsokgwili». 15 Alistalh Moisés tlawalh akgtum pumakamastan chu limapakuwilh Jehová-Nisí* 16 akxni wa: «Xlakata talalakatawakakgo xpumapakgsin Jehová,* Jehová nakatatlawa guerras amalequitas chu xkamanankan tiku aku nalakachintilhakgo».

18 Jetró, sacerdote xalak Madián, xputiatlat* Moisés, katsilh putum tuku Dios xtlawanit xpalakata Moisés chu xpalakata Israel, xkachikin. Katsilh chuna la Jehová katamakxtulh kachikin Israel kʼEgipto. 2 Moisés xmalakgachanit Ziporá, xpuskat, kxchik Jetró, xputiatlat Moisés, chu xla xkuentajtlawama Ziporá 3 chu chatiy xkamanan. Moisés limapakuwilh Guersom* chatum xkgawasa, xlakata wa: «Xalak atanu país klitaxtunit kʼuma kachikin». 4 Chu achatum xkgawasa limapakuwilh Eliezer,* xlakata wa: «Kimakgtayana wa xDios kintlat, xla kilakgmaxtulh xlakata ni xkimakgnilh faraón».

5 Wa xlakata Jetró, xputiatlat Moisés, kataʼalh xlakgkgawasan chu xpuskat Moisés, xlakata natatanokglhkgo kxakaskakni tiyat niku xyawanit xchik xaxuwa, lakatsu ksipi xaxlikana Dios. 6 Chu malakgachanilh Moisés uma tamakatsin: «Akit, Jetró, mimputiatlat, kkataʼamacha mimpuskat chu chatiy minkamanan». 7 Moisés tunkun alh paxtokga xputiatlat, lakgtakilhputalh chu tsukli, chu lakgalhskilh la xkakitaxtunima. Alistalh tanukgolh kchiki xaxuwa.

8 Moisés litachuwinalh xputiatlat putum tuku Jehová xtlawaninit faraón chu Egipto xlakata xmakgtayalh Israel. Na litachuwinalh putum taʼakglhuwit nema xtitaxtukgonit ktiji chu la xkalakgmaxtunit Jehová. 9 Jetró lipaxuwalh putum tuku xtlawanit Jehová xpalakata Israel akxni lakgmaxtulh kʼEgipto.* 10 Wa xlakata Jetró wa: «Kamalankika Jehová, tiku kalakgmaxtun kʼEgipto kxmakan faraón, chu tiku lakgmaxtulh kachikin kxmakan Egipto. 11 La uku kkatsi pi Jehová tlakg lanka nixawa amakgapitsi dioses. Kkatsi uma xlakata tuku katlawanilh tiku nitlan kalikatsinikgolh xkachikin». 12 Chu Jetró, xputiatlat Moisés, lilh tantum animal xlakata xmakamastalh chuna la xalhkun tamakamastan chu na kalilh amakgapitsi animales xlakata xmakamaxkilh Dios. Aarón chu putum lakgkgolotsin xalak Israel ankgolh tawayankgo xputiatlat Moisés kxlakatin xaxlikana Dios.

13 Lichali, chuna la Moisés xlismani, tawi xlakata nakaskujnani kachikin chuna la juez. Lata tsisa asta kakgotanun, kachikin chuntiya xlakgankgo Moisés. 14 Akxni xputiatlat Moisés akxilhli putum tuku xtlawa xpalakata kachikin, kgalhskilh: «¿Tuku xlakata palha skujpat? ¿Tuku xlakata miʼakstu tlawapat uma, chu tuku xlakata latamanin chuntiya lakgminkgoyan lata tsisa asta kakgotanun?». 15 Moisés kgalhtilh xputiatlat: «Xlakata kachikin chuntiya kilakgminkgo akxni putsakgo xtapulalit Dios. 16 Akxni chatiy latamanin kgalhikgo taʼakglhuwit, kilakgminkgo chu kimakatsinikgo. Chu akit klakputsanani xtaʼakglhuwitkan, chu kkawani tuku wan xaxlikana Dios chu xlimapakgsin».

17 Xputiatlat Moisés wanilh: «Nitlan tuku tlawapat. 18 Natlakgwana, wix chu putum kachikin. Akgtum lanka takuka mimpalakata chu nila miʼakstu katilipi. 19 Kakinkgaxpatni. Nakmaxkiyan akgtum tastakyaw chu Dios namakgtayayan. Wix palakachuwinana kachikin kxlakatin xaxlikana Dios chu miliwanit xaxlikana Dios xtaʼakglhuwitkan. 20 Chu nakamasiyaniya limapakgsin chu tuku talakkaxtawilanit, tuku tiji xlistalanitkan chu tuku xlitlawatkan. 21 Pero mililaksakat makgapitsi lakchixkuwin xalak kachikin tiku tlan namakgantaxtikgo taskujut, tiku pekuanikgo Dios, tiku tlan kalipawankan chu tiku ni akgskgawimakglhtinankgo tumin. Nakamakuentajliya kachikin, chu nakalimaxtuya napuxkun tiku napulalinkgo akgtum mil, napuxkun tiku napulalinkgo akgtum ciento, napuxkun tiku napulalinkgo tipuxamakaw chu napuxkun tiku napulalinkgo kgalhkaw. 22 Xlakan nalakputsananikgo latamanin akxni nakalitachuwinankgo xtaʼakglhuwitkan.* Wix naliminikgoyan taʼakglhuwit nema laktuwa, pero taʼakglhuwit nema ni laktuwa wa nalakputsananikgo. Chuna natalinkgoyan takuka chu tlakg ni tuwa katimakgkatsi. 23 Komo chuna natlawaya chu komo Dios chuna limapakgsinan, tlan natayaniya takuka, chu putum latamanin xatapaxuwan naʼankgo kxchikkan».

24 Moisés tunkun makglhtinalh xtastakyaw xputiatlat chu tlawalh putum tuku xwaninit. 25 Kxlakgstipan Israel kalaksakli makgapitsi lakchixkuwin tiku tlan xtlawakgolh taskujut chu napuxkun kalimaxtulh tiku xpulalinkgolh kachikin: napuxkun tiku xpulalinkgolh akgtum mil, napuxkun tiku xpulalinkgolh akgtum ciento, napuxkun tiku xpulalinkgolh tipuxamakaw chu napuxkun tiku xpulalinkgolh kgalhkaw. 26 Xlakan xkalakputsananikgo latamanin akxni xkalitachuwinankgo xtaʼakglhuwitkan. Xalaktuwa wa Moisés xliminikgo, pero ni xalaktuwa wa xlakputsanikgo. 27 Alistalh, Jetró, xputiatlat Moisés, taspitli kxkachikin.

19 Akgtutu papaʼ alistalh lata xtaxtukgonit kxtiyat Egipto, watiya uma kilhtamaku, israelitas chankgolh kxakaskakni xtiyat Sinaí. 2 Taxtukgolh kRefidim, chankgolh kxakaskakni xtiyat Sinaí chu anta yawakgolh xchikkan xaxuwa, kxlakatin sipi.

3 Wa xlakata Moisés lakgalh xaxlikana Dios ksipi. Chu lata anta Jehová tsukulh tachuwinan chu wanilh: «Wa uma tuku nakawaniya xchik Jacob chu tuku nakamakatsiniya israelitas: 4 “Wixin liwana akxilhnitantit tuku kkatlawanilh egipcios. Chuna ktlawalh xlakata xakkalin chuna la águilas kalinkgo laktsu kskgatakan chu xakkalimin niku kwi. 5 Chu la uku, komo liwana nakgalhakgaxpatatit kintachuwin chu namakgantaxtiyatit kintalakkaxlan, lu xlakaskinka nakkaliʼakxilhan* nixawa amakgapitsi kachikinin, xlakata putum tiyat akit kintapakgsini. 6 Wixin nakilitaxtuniyatit akgtum xasanto kachikin chu sacerdotes tiku naskujkgo chuna la mapakgsinanin”. Putum uma wa tuku nakawaniya israelitas».

7 Wa xlakata Moisés taktalh, kamamakxtumilh putum lakgkgolotsin xalak kachikin chu kawanilh putum tuku Jehová xlimapakgsinit. 8 Alistalh, putum kachikin kgalhtinalh: «Naktlawayaw putum tuku Jehová wanit». Moisés tunkun alh wani Jehová tuku xkgalhtinanit kachikin. 9 Chu Jehová wanilh Moisés: «Kaʼakxilhti, naklakgminan kʼakgtum xatsitsakga puklhni xlakata kachikin nakgaxmata akxni naktachuwinanan chu xlakata na ankgalhin nakanajlanikgoyan». Wa xlakata Moisés makatsinilh Jehová tuku xwanit kachikin.

10 Alistalh Jehová wanilh: «Kapit niku wi kachikin chu kakamakaxti* la uku chu chali, chu xlakan xlichakgetkan klhakgatkan. 11 Kxliʼakgtutu kilhtamaku takaxnitantita nawan, xlakata kxliʼakgtutu kilhtamaku Jehová nataktayachi ksipi Sinaí kxlakatin putum kachikin. 12 Kxlimakgstilili sipi wi tuku miliwilit chu nawaniya kachikin: “Ni natawakayatit ksipi, ni natayayatit kxtantun. Putum tiku naxama sipi, xlinit. 13 Pero ni milixamatkan tiku chuna natlawa, wata naʼaktalamakgniyatit o nalitalayatit flecha.* Xlinit, maski uma chatum chixku o tantum animal”. Pero akxni namakasanan xʼakgalokgot tantum borrego tlan natalakatsuwiyatit ksipi».

14 Alistalh, Moisés taktalh ksipi chu tsukulh kamakaxa kachikin, chu xlakan tsukukgolh chakgekgo klhakgatkan. 15 Moisés kawanilh: «Katakaxtit umakgolh akgtutu kilhtamaku. Ni natalakgxtumiyatit».

16 Kxliʼakgtutu kilhtamaku, tsisa, tsukulh jili chu makglipnan. Xʼanan akgtum tsitsakga puklhni kxʼakgspun* sipi chu pixlanka xtakgaxmata akgtum akgalokgot. Wa xlakata putum latamanin tiku xwilakgo kxchikkan xaxuwa tsukukgolh lhpipikgo. 17 Chu Moisés tlawalh pi kachikin xtaxtukgolh kxchikkan xaxuwa xlakata tlan xtamakxtumikgolh kxlakatin xaxlikana Dios, chu xlakan tsukukgolh tayakgo kxtantun sipi. 18 Sipi Sinaí lakalhuwa niku xtaxtunima jini xlakata Jehová xtaktanit anta, kxlakgstipan lhkuyat. Jini xtachayawama chuna la xjini akgtum horno, chu putuminika sipi tliwakga xtachikima. 19 Akxni akgalokgot tlakg pixlanka xtakgaxmata, Moisés xchuwinan chu xaxlikana Dios xkgalhti.

20 Chu Jehová taktalh ksipi Sinaí, kxʼakgspun sipi. Wa xlakata Jehová wanilh Moisés pi xtawakalh kxʼakgspun sipi, chu Moisés tawakalh. 21 Jehová limapakgsilh Moisés: «Katakta chu kakawani kachikin pi ni nalakatsalakgo tuku wilinita kxlimakgstilili sipi xlakata nakiʼakxilhputunkgo, komo chuna natlawakgo lhuwa tiku nanikgo, akit Jehová. 22 Nachuna, sacerdotes, tiku ankgalhin kintalakatsuwinikgo, akit, Jehová, xlitaskulunkitkan xlakata uma xlakaskinka tamakxtumit, chu chuna akit, Jehová, ni nakkamakgni». 23 Moisés wanilh Jehová: «Kachikin nila tawaka ksipi Sinaí xlakata wix wanti: “Wi tuku kawili kxlimakgstilili sipi chu xasanto kalimaxtu”». 24 Chu Jehová wanilh: «Kapit, katakgalhu chu alistalh natatana Aarón. Pero sacerdotes chu kachikin ni xlilakatsalatkan tuku wilinita kxlimakgstilili sipi xlakata natalakatsuwiputunkgo niku kwi, chu chuna, akit, Jehová, ni nakkamakgni». 25 Wa xlakata Moisés takgalhulh niku xwi kachikin chu kawanilh tuku wanika.

20 Alistalh Dios mastalh umakgolh limapakgsin:

2 «Akit Jehová miDios, tiku tamakxtun kʼEgipto, ktiyat niku skujni xlitaxtuya. 3 Ni milikgalhit atanu dioses, kajwatiya akit.*

4 »Ni militlawat akgtum tatlawamakgxtu* nipara tuku xtachuna nema anan kʼakgapun, kkatiyatni o kchuchut. 5 Ni nakalakgtakilhputaya chu ni namastaya talakaskin pi wi tuku natlawa nakaskujnaniya, xlakata akit, Jehová mi Dios, chatum Dios tiku skini xkachikin pi kajwatiya akit nakinkakninani. Akit kmasta talakaskin pi tuku nitlan tlawakgo natlatni tiku ni kiʼakxilhputunkgo nalipatinankgo xkamanankan, xnatanatnikan chu kxunatanatkan, 6 pero tiku kimpaxkikgo chu kgalhakgaxmatkgo tuku kkaskini chuntiya kkalimasiyani tapaxkit nema ni makgxtakgnan, xlakan chu xkamanankan tiku aku nalakachintilhakgo, maski lhuwa kata natitaxtu.

7 »Ni lixkajni kamaklakaskinti xtukuwani Jehová miDios, xlakata Jehová namalakgaxokge tiku lixkajni maklakaskin xtukuwani.

8 »Kalakapastakti sábado xlakata chuntiya santo nalitaxtu. 9 Akgchaxan kilhtamaku kgalhiya xlakata naskuja chu natlawaya putum tuku militlawat, 10 pero xliʼakgtujun kilhtamaku, akgtum sábado nema namaklakaskina xlakata nakakninaniya Jehová miDios. Ni miliskujat, wix, milakgkgawasan, milaktsuman, chixku chu puskat tiku miskujnin litaxtukgo, nipara miʼanimales chu nipara tiku xalak atanu país nema lama kminkachikin. 11 Xlakata Jehová akgchaxan kilhtamaku litlawakgolh akgapun, katiyatni, pupunu chu putum tuku anankgo anta, pero xliʼakgtujun kilhtamaku tsukulh jaxa. Wa xlakata Jehová sikulunatlawalh sábado chu xasanto limaxtulh.

12 »Namaxkiya kakni mintlat chu mintse, xlakata chuna lhuwa kilhtamaku nalatapaya ktiyat nema Jehová miDios namaxkiyan.

13 »Ni namakgninana.

14 »Ni natatalakgxtupiya tiku ni tamakgaxtokga.

15 »Ni nakgalhanana.

16 »Ni nalimawakaya mintalataman tuku ni xlikana akxni naskinikana pi kawanti tuku tlawalh.

17 »Ni nakgalhiputuna xchik mintalataman. Ni nakgalhiputuna xpuskat mintalataman, nipara chixku chu puskat tiku kskujni litaxtu, nipara xtoro, nipara xburro, nipara atanu tuku tapakgsini mintalataman».

18 Putum kachikin akxilhli makglipni chu jili chu chuna la xmakasanama akgalokgot, na akxilhli pi sipi xtaxtunima jini. Akxni akxilhkgolh chu kgaxmatkgolh uma, tsukukgolh lhpipikgo chu tsinu lakgamakgat tayakgolh. 19 Wa xlakata wanikgolh Moisés: «Wix kakinkatachuwinanti chu akinin nakkakgaxmatniyan, pero ni kakinkatachuwinan Dios, xlakata ni nakniyaw». 20 Chu Moisés kawanilh kachikin: «Ni kapekuantit, xlakata xaxlikana Dios minit akxilha komo nakgalhakgaxpatatit, xlakata putum kilhtamaku napekuaniyatit chu ni natlawayatit tuku nitlan». 21 Wa xlakata kachikin lakgamakgat tayacha, chu Moisés talakatsuwilh niku xwi xatsitsakga puklhni anta niku xwi xaxlikana Dios.

22 Wa xlakata Jehová wanilh Moisés: «Wa uma tuku nakawaniya israelitas: “Wixin liwana akxilhnitantit pi kkatachuwinanitan lata kʼakgapun. 23 Ni katlawatit dioses xaplata xlakata nakakninaniyatit chuna la kinkakninaniyatit. Na ni katlawatit dioses xaʼoro. 24 Kakintlawani akgtum pumakamastan xatiyat. Anta nakimakamaxkiya xalhkun tamakamastan, tamakamastan xla takaksni,* miborregos chu miwakax. Niku akit klakaskin pi kalakapastakka kintukuwani,* naklakganan anta chu naksikulunatlawayan. 25 Komo nakintlawaniya akgtum pumakamastan xachiwix, ni namaklakaskina chiwix nema lichukukanit akgtum liskujni. Xlakata komo namaklakaskina cincel, nialh xasanto katilitaxtulh. 26 Na ni natlawaniya kimpumakamastan niku laktawakakan, xlakata akxni natawakaya ni natasiyaya* kxtampin milhakgat”.

21 »Nachuna, nakawaniya umakgolh limapakgsin:

2 »Komo natamawaya chatum skujni hebreo, xla naskujnaniyan akgchaxan kata, pero xliʼakgtujun kata nialh skujni katilitaxtulh chu nitu katixokgolh. 3 Komo xʼakstu chilh, xʼakstu nataspita. Pero komo tachilh xpuskat, natataspita xpuskat. 4 Komo xmalana namaxki chatum puskat chu xla natakgalhi lakgkgawasan chu laktsuman, puskat chu xkamanan nakatapakgsini xmalana, chu chixku xʼakstu nataspita. 5 Pero komo uma skujni nawan “Chuntiya skujni kwamputun xlakata kpaxki kimalana, kimpuskat chu kinkamanan”, 6 xmalana nalin kxlakatin xaxlikana Dios. Namakgenuyawa kmalakcha* o kxkilhpan malakcha chu naʼakgaxtokgo. Chuna skujni nalitaxtu putum kilhtamaku.

7 »Komo chatum chixku nasta xtsumat chuna la chatum skujni, xla ni katimakgxtakgka chuna la makgxtakgkan chatum chixku tiku skujni litaxtu. 8 Komo xmalana ni xpuskat katilimaxtulh xlakata ni chuna lakpuwani chu natekgsa tiku natamawaputun, ni lakgchan nastamaxki tiku xalak atanu país, xlakata akgskgawinit. 9 Chu komo wa xkgawasa namakamaxki, xla xlikatsinit chuna la xtsumat. 10 Komo xla* naputsapara atanu puskat, chuntiya namaxki xapulana xpuskat liwat, lhakgat chu chuntiya natatalakgxtumi. 11 Komo xla ni maxkiputun umakgolh pulaktutu, puskat nialh skujni katilitaxtulh chu nitu katixokgolh.

12 »Putum tiku natlawani tuku nitlan chatum chixku chu namakgni, xla na xlinit. 13 Pero komo xla nichuna xtlawaputun chu xaxlikana Dios ni malakgachokgolh uma, xla tlan natsala chu naʼan niku akit nakwaniyan. 14 Komo chatum chixku nasitsini xtalataman chu namakgni, uma chixku xlinit asta maski kkimpumakamastan napina tiyaya. 15 Tiku nawilini xtlat o xtse, xlinit.

16 »Komo wi tiku nakgalhan chatum xtalataman chu nasta o namanokglhukan pi wa chipanit, uma lataman xlinit.

17 »Putum tiku lixkajni nawani xtlat o xtse, xlinit.

18 »Komo makgapitsi lakchixkuwin latalatlawamakgo chu chatum nalitlawani tuku nitlan xtalataman akgtum chiwix o xmakan* chu uma ni katinilh, pero nila katitakilh, wa uma tuku xlitatlawat: 19 komo tlan taki chu maklakaskin xlixtokgo xlakata natlawan, chixku tiku tlawanilh tuku nitlan, ni katimalakgaxokgeka; kajwatiya naxokgoni tiku masipanilh* kilhtamaku nema ni katiskujli asta akxni natatlani.

20 »Komo chatum chixku nalinika kiwi kskujni chixku o kskujni puskat chu xla nani, tiku makgninalh xlitamalakgaxokget. 21 Pero komo tiku tlawanika tuku nitlan ni tunkun nilh xliʼakgtum o xliʼakgtiy kilhtamaku, tiku tlawanilh tuku nitlan ni katimalakgaxokgeka, xlakata litamawalh xtumin.

22 »Komo chatiy lakchixkuwin latalatlawamakgo chu natlawanikgo tuku nitlan chatum puskat tiku ama malakachininan, chu xla namalakachininan akxni nina lakgchan, pero xla chu kskgata ni nanikgo,* tiku lin kuenta xlixokgot tuku xchixku puskat naskini maski niti nani. Xlixokgot tuku nalakkaxwilikgo jueces. 23 Pero komo wi tiku* nani, tiku makgninalh na xlinit, 24 komo wi tiku nakgaxi xtalataman chu nalaktlawani xlakgastapu, natukxni xtatsan, xmakan, xtantun, nachuna natlawakan, 25 nachuna natlawakan tiku namachichi, namasipani o nakgaxi xtalataman.

26 »Komo chatum chixku nalaktlawani xlakgastapu kskujni chixku o kskujni puskat chu xla nialh nalakawanan, xlimakgxtakgat kskujni xlakata chuna nalixokgoni xlakgastapu. 27 Chu komo akxni nakgaxi namakgalhyuju kskujni chixku o puskat, xlimakgxtakgat kskujni xlakata chuna nalixokgoni xtatsan.

28 »Komo tantum toro nalhtuku chatum chixku o puskat chu namakgni, toro naʼaktalamakgnikan chu xliwa niti katiwalh. Pero xmalana uma toro ni katimalakgaxokgeka. 29 Chu komo toro lhtukunanita xapulana chu xmalana ni kuenta tlawa maski makatsinikanita, chu toro makgni chatum chixku o puskat, xlitaʼaktalamakgnit toro chu nachuna xmalana. 30 Komo xmalana toro naskinikan pi kaxokgolh xlakata xla ni namakgnikan, xlixokgot putum tuku naskinikan. 31 Komo toro nalhtuku chatum aktsu kgawasa o chatum aktsu tsumat, xmalana toro na nalilakputsananikan uma limapakgsin. 32 Chu komo toro nalhtuku chatum skujni chixku o chatum skujni puskat, xmalana toro naxokgoni xmalana uma skujni puxamakaw siclo* xla plata chu toro naʼaktalamakgnikan.

33 »Komo chatum chixku namakgalhkge akgtum tawaxni o napuwaxnan chu alistalh ni namakgalhchuwa, chu anta natajuyacha tantum toro o tantum burro, 34 tiku tapakgsini tawaxni, naxokgo tuku nilh. Naxokgoni xmalana uma animal, chu xanin animal wa natamakgxtakgni. 35 Komo xtoro chatum chixku natlawani tuku nitlan xtoro atanu chixku, xlakan xlistatkan xastakna toro chu natapapitsikgo tumin nema naxokgokan. Na xlitapapitsitkan xanin animal. 36 Chu komo xkatsikana pi toro klhtukunanita xapulana, pero xmalana ni kuentajtlawalh, nalixokgo xastakna tantum toro, chu xanin toro xla nawan.

22 »Komo chatum chixku nakgalhan tantum toro o tantum borrego chu alistalh namakgni o nasta, toro nema kgalhalh nalilakgxokgo tankitsis toro chu borrego nema kgalhalh nalilakgxokgo tantati borrego.

2 »(Komo chatum kgalhana namanokglhukan katsisni pi tanuputun kʼakgtum chiki, chu namasipanikan* chu namakgnikan, tiku chuna natlawa ni katilitawi kuenta xlakata makgninalh. 3 Pero komo uma chuna nala akxni xkgakganita, tiku namakgninan nalitawila kuenta).

»Kgalhana naxokgo tuku kgalhanit. Komo nitu kgalhi, wa xlitastat xlakata chuna naxokgo tuku kgalhanit. 4 Komo nakatsikan pi tuku kgalhankanit, max tantum toro, tantum burro, tantum borrego, ni makgnikanit chu wa chipanit, kgalhana xlimastat tantiy animal xlakata nalakgxokgo animal nema kgalhanit.

5 »Komo wi tiku naʼan kamapuchwayani xʼanimales kxpukuxtu o niku chanit xʼuva, chu masta talakaskin pi xʼanimales naʼankgo puchwayankgo kʼatanu pukuxtu, xla nalilakgxokgo tuku tlakg tlan kgalhi kxpukuxtu o tlakg xatlan xʼuva.

6 »Komo nalhkunanan chu natalakgatumi niku yakgolh lhtukun chu nakalhkuyu xatapachin talhtsi, talhtsi nema nina makikan o putum pukuxtu, tiku mapasilh lhkuyat xlilakgxokgot putum tuku lhkulh.

7 »Komo chatum chixku namamakini xtalataman xtumin o atanu tuku kgalhi, pero xla ankan makgkgalhankan kxchik, komo natekgskan kgalhana, xla pulaktiy xlimastat xlakata nalakgxokgo tuku kgalhalh. 8 Pero, komo ni natekgskan kgalhana, xmalana chiki nalinkan kxlakatin xaxlikana Dios xlakata nakatsikan komo wa tatamakgxtakgli o ni wa tatamakgxtakgli tuku tapakgsini xtalataman. 9 Akxni nalimawakakan chatum lataman pi kgalhi tuku ni xla, max tantun toro, tantum borrego, maktum lhakgat o atanu tuku tsankganit, chu wi tiku nawan «¡Uma kila!», tiku makgtanumakgo kʼuma taʼakglhuwit nalinkgo xtaʼakglhuwitkan kxlakatin xaxlikana Dios. Chu Dios namasiya tiku lin kuenta, chu tiku lin kuenta pulaktiy namaxki xtalataman chuna la xtapalh tuku kgalhanit.

10 »Komo chatum chixku naskini xtalataman pi kakuentajtlawanilh xburro, xtoro, xborrego o atanu xʼanimal chu uma animal nani, nialhla natlawan o nakgalhankan chu niti naʼakxilha, 11 tiku xmakuentajlimaka animal nalitaya kxlakatin Jehová pi xla ni tlawanilh animal tuku nitlan. Xmalana animal nakanajla tuku litayalh xtalataman chu xla nitu katilakgxokgolh. 12 Pero komo makgkgalhanka* animal, xlilakgxokgot tuku makgkgalhanka. 13 Chu komo tantum xaluku animal laktsu laktsu tlawalh, xliliminat tuku nalimasiya pi xlikana chuna lalh. Ni talakaskin nalakgxokgo tuku xaluku animal laktsu laktsu tlawalh.

14 »Komo chatum chixku namakgsakua xtalataman tantum animal, chu animal nialhla natlawan o nani akxni xmalana ni anta wi, chixku tiku sakualh animal xlilakgxokgot uma. 15 Pero komo xmalana animal anta wi, chixku nitu xlilakgxokgot. Komo animal rentarlikanit, tumin nema lirentarlika wa nalilakgxokgokan.

16 »Komo chatum chixku nalimasiyani pi lakgati chatum tsumat tiku nina skinkan chu natatama, xla xlixokgot xtapalh uma tsumat xlakata xpuskat nalimaxtu. 17 Komo xatlat ni namakamastaputun xtsumat, chixku xlixokgot xtapalh uma tsumat.

18 »Ni milimastat talakaskin nalatama chatum skuwana.*

19 »Putum tiku natatalakgxtumi tantum animal, xlinit.

20 »Putum tiku natlawani tamakamastan atanu dioses chu ni kajwatiya Jehová, xlinit.

21 »Ni lixkajni nalikatsiniya chu ni namakgapatinana tiku xalak atanu país, xlakata wixin xalak atanu país xlitaxtuyatit kʼEgipto.

22 »Ni lixkajni nakalikatsiniyatit tiku nikgonita xchixkukan o kamanan tiku ni kgalhikgo xtlatkan. 23 Komo nitlan nakalikatsiniyatit chu xlakan nakintasaskinikgo tamakgtay, akit xlikana nakkakgaxmatni. 24 Chu akit lu nakkasitsiniyan chu nakkalimakgniyan espada. Milakpuskatinkan xʼakstukan natamakgxtakgkgo chu minkamanankan nialh katikgalhikgolh xtlatkan.

25 »Komo namasakuaniya tumin chatum limaxkgen xalak kinkachikin o atanu tiku katalaman kmilakgstipankan, ni nalikatsiniya chuna la likatsikgo tiku masakuaninankgo tumin. Ni namatajiya xaskgata.

26 »Komo namakgxtakgniyan klhakgat mintalataman xlakata makgsakuan tumin, namaspitniya klhakgat akxni nina tsankga chichini. 27 Xlakata kajwatiya uma tuku kgalhi nema nalitatlapa. ¿Tuku nalitatlapa akxni nalhtata? Akxni nakintasaskini tamakgtay, akit nakkgaxmatni xlakata akit xalakgalhamana.

28 »Ni lixkajni kalichuwinanti miDios chu ni kawanti pi kakaʼakgspulalh tuku nitlan napuxkun xalak minkachikin.

29 »Ni makgtiy nalakpuwana akxni namastaya tuku lhuwa namakgalaya, chuna la xatalakgchitni miʼuva chu miʼaceite. Nakimakamaxkiya xapuxku minkgawasa. 30 Wa uma tuku natlawaya xpalakata mintoro chu mi borrego: xapulana nema nalakachin akgtujun kilhtamaku natatamakgxtakga xtse, pero xliʼakgtsayan kilhtamaku nakimakamaxkiya.

31 »Milimasiyatkan pi wixin xasanto kinkachikin, chu komo kpukuxtu natekgsatit tantun animal nema laktsu laktsu tlawanit tantum xaluku animal, ni nawayatit xliwa, chichi nakamaxkiyatit.

23 »Ni namalakgatumiya ni xaxlikana tamakatsin. Ni namakgtayaya tiku lixkajni likatsi akxni nawana tuku ni xlikana xlakata achatum nitlan nakitaxtuni. 2 Ni kakastalani lhuwa latamanin xlakata natlawaya tuku nitlan, chu ni natlawaya pi wi tiku ni liwana nalakputsananikan akxni nawana tuku ni xaxlikana kaj xlakata nakatatayaya lhuwa latamanin.* 3 Ni nalaksakpaxkinana akxni nalakputsananikan chatum limaxkgen.

4 »Komo natekgsa xtoro o xburro mintalamakgasitsin, milimaspitnit. 5 Komo naʼakxilha pi xburro tiku sitsiniyan laktamanit xtakuka, nichuna namakgxtakga. Namakgtayaya mintalataman xlakata nataki xʼanimal.

6 »Akxni nalakputsananikan chatum limaxkgen tiku lama kmilakgstipankan ni nalakgpaliya tuku nalaksakkan.

7 »Ni akxtum kakatala tiku limawakanankgo tuku ni xaxlikana chu ni katlawa pi namakgnikan tiku ni lin kuenta chu tiku xaʼakgstitum, xlakata ni xaʼakgstitum ktiliʼakxilhli* tiku nitlan likatsi.

8 »Ni kamasta talakaskin nakgalhxokgokana, xlakata uma tlawa pi tiku xaskgalala ni liwana nalakputsanan. Asta tlawa pi tiku xaʼakgstitum, nalakgpali tuku laksaknit.

9 »Ni kakamapatini tiku xalak atanu país. Wixin katsiyatit tuku kilhchanima xalak atanu país litaxtukan, xlakata xalak atanu país xlitaxtuyatit kxtiyat Egipto.

10 »Akgchaxan kata nachananana chu namakgalanana kmimpukuxtu. 11 Pero xliʼaktujun kata ni nachananana, wata namajaxaya tiyat. Limaxkgenin xalak minkachikin nawakgo tuku namakgala, chu tuku namaʼakgataxtikgo nawakgo animales xalak kakiwin. Nachuna natlawaya niku chanita miʼuva chu miʼolivo.

12 »Akgchaxan kilhtamaku naskuja, pero xliʼakgtujun kilhtamaku ni naskuja xlakata mintoro chu miburro najaxkgo, chu xlakata xkgawasa miskujni chu tiku xalak atanu país natatliwakglhparakgo.

13 »Kuenta natlawayatit xlakata namakgantaxtiyatit tuku kkawaninitan. Ni namapakuwiyatit xtukuwanikan atanu dioses: xtukuwanikan ni nataxtu kminkilhnikan.

14 »Nakintlawaniya akgtutu fiesta akgatunu kata. 15 Natlawaya Fiesta xla Kaxtalanchu nema ni kgalhi Limaxkutin. Chuna la klimapakgsin, kilhtamaku nema klakkaxwililh papaʼ xla abib nawaya kaxtalanchu nema ni kgalhi limaxkutin akgtujun kilhtamaku, xlakata uma kilhtamaku taxtupi kʼEgipto. Niti nakilakgmin komo nitu nalimin. 16 Na natlawaya Fiesta xla Tamakgalan* akxni nasaka tuku xapulana namakgalaya kmimpukuxtu. Na natlawaya Fiesta akxni Makikan Tachanan* ksputat kata, akxni nasaka tuku namakgalaya. 17 Putum lakchixkuwin naminkgo kxlakatin Jehová, xaxlikana Malana, makgtutu akgtum kata.

18 »Akxni nakimakamaxkiya xkgalhni mintamakamastan, ni nakintamakamaxkiya tuku kgalhi limaxkutin. Chu ni namakiya asta lichali xmanteca animal nema nakimakamaxkiya kkifiesta.

19 »Nalitana kxchik Jehová miDios tuku tlakg xatlan chu tuku pulana namakgalaya.

»Ni namakchaya aktsu cabra kxleche xtse.

20 »Nakmalakgachaniyan chatum ángel kmilakatin xlakata namakgtayayan ktiji chu nalinan niku akit klakkaxwilinit. 21 Kuenta katlawani chu kakgalhakgaxpatti xtachuwin. Ni nalakatakiya xlakata ni katitapatin mintalakgalhin, xlakata xla tataya kintukuwani. 22 Pero komo nakgalhakgaxpata putum xtachuwin chu natlawaya putum tuku kwaniyan, kintalamakgasitsin nakliʼakxilha mintalamakgasitsin chu nakkatalatlawa tiku talatlawakgoyan. 23 Xlakata kiʼángel naʼan kmilakatin chu xla nalinan niku wilakgolh amorreos, hititas, perizitas, cananeos, heveos chu jebuseos, chu akit nakkamasputu. 24 Ni nakalakgtakilhputaya xdioseskan chu ni namastaya talakaskin pi wi tuku natlawa nakaskujnaniya, chu na ni natlawaya xtalismaninkan. Wata nakalakgpakglha xtatlawamakgxtukan chu nakalakxtlawaya xasanto xtalayawkan* xachiwix. 25 Akit, Jehová miDioskan, nakiskujnaniyatit, chu nakkalisikulunatlawayan liwat chu chuchut. Akit nakkakuentajtlawayan xlakata ni natatatlayatit. 26 Lakpuskatin xalak minkachikin ni katimakganankgolh chu tlan nakgalhikgo kamanan. Chu akit naktlawa pi makgas nalatapaya.*

27 »Akxni nina kalakgchipina nawan mintalamakgasitsin, xlakan nakgaxmatkgo kimpalakata chu nalhpipikgo, chu naktlawa pi putum kachikinin niku nachipina ni nakatsikgo tuku natlawakgo chu pi putum mintalamakgasitsin natsalakgo.* 28 Chu naktlawa pi putum mintalamakgasitsin napekuanikgoyan, chu uma natlawa pi heveos, cananeos chu hititas natsalataxtukgo. 29 Ni kaj akgtum kata ktikalitamakxtulh kmilakatin, xlakata tiyat ni xʼakstu natamakgxtakga chu animales xalak kakiwin ni nalhuwankgo chu ni natlawanikgoyan tuku nitlan. 30 Tsinu tsinu nakkatamakxtu kmilakatin, asta akxni nalhuwana chu naʼakgchipaya tiyat.

31 »Naktlawa pi tiyat nema tapakgsiniyan nakichan lata kxaSpinini pupunu asta kpupunu nema katapakgsini filisteos chu lata kxakaskakni tiyat asta kkgalhtuchokgo Éufrates, xlakata nakmakamaxkiyan latamanin xalak país, chu wix nakatamakxtuya kmilakatin. 32 Ni nakatatlawaya akgtum talakkaxlan latamanin xalak país nipara xdioseskan. 33 Ni nalatamakgo kminkachikin, xlakata ni namatlawikgoyan talakgalhin kkilakatin. Komo nakakninaniya* xdioseskan, uma akgtum liʼakgsiyat nalitaxtu mimpalakata».

24 Alistalh wanilh Moisés: «Katawaka niku wi Jehová chu kakatata Aarón, Nadab, Abihú chu tutumpuxamakaw lakgkgolotsin xalak Israel, chu lata lakgamakgat kakilakgtakilhputatit. 2 Kajwatiya Moisés natalakatsuwini Jehová. Amakgapitsi ni xlitalakatsuwitkan, chu kachikin ni nastalani».

3 Wa xlakata Moisés alh wani kachikin putum xtachuwin Jehová chu putum xlimapakgsin. Chu putum kachikin kgalhtinalh: «Nakkgalhakgaxmataw putum tuku Jehová wanit». 4 Wa xlakata Moisés tsokgwililh putum xtachuwin Jehová. Alistalh sokg takilh chu kxtantun sipi tlawalh akgtum pumakamastan chu kayawalh kgankutiy talayaw nema xkilhchanima akgkutiy tribus xalak Israel. 5 Alistalh kalaksakli lakgkgawasan xalak Israel, chu xlakan makamastakgolh xalhkun tamakamastan chu makgnikgolh toro xlakata xmakamastakgolh chuna la tamakamastan xla takaksni xpalakata Jehová. 6 Chu Moisés pulaktiy mapitsilh kgalhni nema xtastokgnit, pulaktum, mujulh kmakgapitsi tazones, chu apulaktu, litsakglhmanilh pumakamastan. 7 Xaʼawatiya, tiyalh libro xla talakkaxlan chu pixlanka kalikgalhtawakganilh kachikin. Alistalh xlakan wankgolh: «Naktlawayaw putum tuku Jehová wanit chu nakkgalhakgaxmataw». 8 Wa xlakata Moisés litsakglhmanilh kgalhni kachikin chu wanilh: «Uma kgalhni limasiya talakkaxlan nema Jehová katatlawan chuna la wan libro xla talakkaxlan».

9 Chu Moisés, Aarón, Nadab, Abihú chu tutumpuxamakaw lakgkgolotsin xalak Israel tawakakgolh ksipi 10 chu akxilhkgolh xDios Israel. Tuku xlakya, xtasiya pi xlitatlawanit chiwix xla zafiro, lu xaskulunku xwanit xtachuna la akgapun. 11 Chu xla nitu katlawanilh umakgolh xlakaskinka lakchixkuwin xalak Israel. Xlakan akxilhkgolh xaxlikana Dios kʼakgtum talakawan akxni xwayamakgo chu xkgotnamakgo.

12 Alistalh Jehová wanilh Moisés: «Katawaka niku kwi, ksipi, chu anta katamakgxtakgti. Nakmaxkiyan xalakgxtakgala chiwix chu anta naktsokgwili limapakgsin chu tuku nakkaskini kachikin pi xlitlawatkan». 13 Wa xlakata Moisés chu Josué, xmakgtayana, takaxkgolh. Chu Moisés tawakalh ksipi xaxlikana Dios. 14 Pero xapulana xkawaninit lakgkgolotsin: «Kilakgalhkgalhiw unu asta akxni naktaspitaw. Aarón chu Hur nakatatamakgxtakgkgoyan, chu putum tiku nakgalhi akgtum taʼakglhuwit wa nakawaniyatit». 15 Alistalh, Moisés tawakalh ksipi, chu puklhni xmatsekgma xʼakgspun* sipi.

16 Xlilanka Jehová tamakgxtakgli kxʼakgspun sipi Sinaí chu sipi litatsamalh puklhni akgchaxan kilhtamaku. Kxliʼakgtujun kilhtamaku, xla tasanilh Moisés lata kpuklhni. 17 Israelitas xʼakxilhmakgo xlilanka Jehová chuna la akgtum lanka lhkuyat kxʼakgspun sipi. 18 Alistalh Moisés tanulh kxlakni puklhni chu tawakalh ksipi, anta tamakgxtakgli tipuxam kilhtamaku chu tipuxam tsisni.

25 Chu Jehová wanilh Moisés: 2 «Kawani kachikin Israel pi kamastokgkgolh tuku tlan nakimakamaxkikgo. Kamakgamakglhtinantit putum tuku xatapaxuwan nakimakamaxkikgo chatunu latamanin. 3 Wa uma tuku namakgamakglhtinanatit: oro, plata, cobre, 4 xaspupuku hilo, lana nema xamantajwa* manikanit, lu xaspinini hilo, xatlan lino, xmakchixit cabra, 5 xmakgxuwa borrego nema xaspinini manikanit, xmakgxuwa foca, xakiwa acacia, 6 aceite nema mujunikan makgskgot, bálsamo* xlakata nalitlawakan aceite nema lilaksaknankan chu xlakata nalitlawakan xamuksun incienso, 7 nachuna chiwix xla ónice chu amakgapitsi chiwix nema namawakanikan efod chu kuxmutawaka. 8 Xlakan nakintlawanikgo niku nakinkakninanikan, chu akit naktawila kxlakgstipankan. 9 Natlawayatit tabernáculo chu putum tuku na’anan anta chuna la nakmasiyaniyan.

10 »Militlawatkan akgtum Arca* nema xlikgalhit akgtiy codo* aitat xlilhman, akgtum codo aitat xlitilanka chu akgtum codo aitat xlitalhman, nalitlawaya xakiwi acacia. 11 Alistalh nalimaktlawaya chu nalipulaktlawaya xatlan oro. Chu natlawaniya xkilhpan xaʼoro. 12 Namastalankiya oro chu natlawaniya akgtati anillo chu nakawiliniya kxpaʼakxtu xtantunin: akgtiy anillo lakgpatu chu akgtiy anillo alakgpatu. 13 Na militlawat laklhman kiwi xla acacia chu nakalichatlawaya oro. 14 Nakatamaknuya xalaklhman kiwi kʼanillo nema wilakgo kxlakpan Arca xlakata tlan nalimalakxijkan. 15 Laklhman kiwi natamakgxtakgkgo kxʼanillo Arca. Ni natamakxtuniyatit. 16 Kxpulakni Arca namujuya lakgxtakgala chiwix niku min kilimapakgsin.

17 »Nachuna, militlawat xkgalhtawilh xaʼoro. Akgtiy codo aitat xlilhman chu akgtum codo aitat xlitilanka. 18 Militlawat chatiy querubines xaʼoro. Martillo nakalitlawaya, chatum nataya kxpakgxwiki* chu achatum nataya kxpakgastakat* kxʼakpun kgalhtawilh. 19 Nakatlawaya querubines kkgalhtawilh, chatum nataya lakatum chu achatum nataya alakatum. 20 Querubines nastonkgkgo xpakgankan chu nalitlapakgo xkgalhtawilh Arca. Natalakgaxtokgtayakgo chu nakgalhakxilhkgo kgalhtawilh. 21 Wix nakgalhwiliya xkgalhtawilh Arca, chu anta namujuya lakgxtakgala chiwix niku min kilimapakgsin. 22 Anta naktawila chu naktachuwinanan lata kxʼakpun kgalhtawilh. Chu lata anta, kxlakgstipan querubines nema natayakgo kxʼakpun arca xla talakkaxlan, nakwaniyan putum tuku klakaskin pi xlitlawatkan israelitas chu wix nakamakatsiniya.

23 »Na militlawat akgtum mesa, nalitlawaya kiwi xla acacia nema xlikgalhit akgtiy codo xlilhman, akgtum codo xlitilanka chu akgtum codo aitat xlitalhman. 24 Nalimaktlawaya xatlan oro chu natlawaniya xkilhpanin xaʼoro. 25 Xkilhpan namawakaniya titsu kiwi* nema kgantati laktsu makan* xlitilanka xliwanat chu uma kiwi natlawaniya xkilhpan xaʼoro. 26 Na natlawaniya akgtati anillo xaʼoro chu nakawiliniya lakatati kxchastunin, anta niku lakgnukgo xtantun. 27 Anillos xliʼanat lakatsu niku naʼan xatitsu kiwi chu anta nakatamaknuya xalaklhman kiwi xlakata tlan nalimalakxijkan mesa. 28 Milikaxtlawat laklhman kiwi xla acacia, nakalichatlawaya oro chu wa nalimalakxija mesa.

29 »Na natlawaniya pulatu chu copas, nachuna jarras chu xapulhman pulatu nema nakamaklakaskinkan akxni namakamastakan xachuchutwa tamakamastan.* Oro nakalitlawaya. 30 Chu kkilakatin, ankgalhin nawiliya kmesa kaxtalanchu nema nakimakamaxkikgo.

31 »Natlawaya akgtum candelabro xaʼoro. Nalitlawakan martillo chu ni xlikgalhit niku natalakgnu. Nakgalhi tuku nalaktaya, nakgalhi xakiwi, xpakganin, xtuwan,* xakululu* chu kxanat. 32 Xkiwi candelabro nakgalhi kganchaxan xpakganin: kgantutu lakatum chu kgantutu alakatum. 33 Lakatum, akgatunu xpakgan nakgalhi akgtutu tuwan xtachuna la kxanat almendro, akgtutu xakululu, chu akgtutu xanat nema nalalakgstipatanutilha. Nachuna nawan alakatum. Kganchaxan xpakganin nema nataxtukgo kxakiwi candelabro watiya tuku nakgalhikgo. 34 Chu xakiwi candelabro xlikgalhit akgtati tuwan nema xtachuna la kxanat almendro, na nakgalhi akgtati xakululu chu akgtati xanat nema nalalakgstipatanutilha. 35 Nakgalhi akgtum xakululu kxtampin niku natsukukgo xapulana xpakganin, na naʼanan atanu xakululu kxtampin niku natsukukgo xlikgantiy xpakganin chu atanu xakululu kxtampin niku natsukukgo xlikgantutu xpakganin. Chuna nawan kganchaxan xpakganin nema nataxtukgo kxakiwi. 36 Xakululu, xpakganin chu putum candelabro ni xlikgalhit niku natalakgnu, xaʼoro xliwanat chu nalitlawakan martillo. 37 Natlawaniya akgtujun limakgskgon. Akxni napasakgo makgskgot, namaxkgakge tuku wi kxlakatin. 38 Xpinzas chu niku nataju xjalanat xaʼoro xliwanat. 39 Namaklakaskinkan akgtum talento* xla oro xlakata nalitlawakan candelabro chu putum tuku kgalhi. 40 Kuenta katlawa xlakata natlawaya chuna la kmasiyanin ksipi.

26 »Tabernáculo nalitlawaya makkaw lhakgat, nalitlawaya xatlan lino, xaspupuku hilo, lana nema xamantajwa* manikanit, lu xaspinini hilo, chu nakatsapaniya* querubines. 2 Makatunu lhakgat xlikgalhit puxamatsayan codo* xlilhman chu akgtati codo xlitilanka. Putum umakgolh lhakgat watiya xlilhman chu xlitilanka xliwanat. 3 Natsapatistokga makkitsis lhakgat xlakata maktum nawan chu na natsapatistokga amakkitsis xlakata na maktum nawan. 4 Kxaʼawatiya lhakgat nema katsapatistokgti, nakgalhi kxkilhpan niku natakgalhnukgo chu nalitlawaya xaspupuku hilo, chu nachuna natlawaya kxkilhpan atanu lhakgat nema katsapatistokgti, chu anta, uma maktiy lhakgat natalakgnukgo. 5 Kxkilhpan maktum lhakgat nema katsapatistokgti xlikgalhit tipuxamakaw niku natakgalhnu, chu kxkilhpan atanu lhakgat nema na katsapatistokgti xlikgalhit tipuxamakaw niku natakgalhnu, niku uma maktiy lhakgat xatalakgtsapani natalakgnukgo. 6 Natlawaya tipuxamakaw gancho xaʼoro chu wa nakalimalakgnuya maktiy lhakgat nema nakalakgtsapaya. Chuna tabernáculo akgtum nawan.

7 »Nachuna, namaklakaskina xmakchixit cabra xlakata nakatlawaya lhakgat nema nalitamakgtlapa tabernáculo. Makkawitu lhakgat xliwanat. 8 Makatunu lhakgat xlikgalhit puxamakaw codo xlilhman chu akgtati codo xlitilanka. Umakgolh makkawitu lhakgat watiya xlilhman chu xlitilanka xliwanat. 9 Nalalakgtsapatistokga makkitsis lhakgat, chu atanu nalalakgtsapatistokga makchaxan lhakgat, chu nakgapsa xlimakchaxan lhakgat nema natawaka kxlakatin tabernáculo. 10 Kxkilhpan maktum lhakgat nema katsapatistokgti, natlawaniya tipuxamakaw niku natakgalhnu chu kxkilhpan atanu lhakgat nema na katsapatistokgti, na xlikgalhit tipuxamakaw niku natakgalhnu, anta niku uma maktiy lhakgat nema katsapatistokgti natalakgnukgo. 11 Natlawaya tipuxamakaw ganchos xacobre chu nakatamaknuya niku natakgalhnu makgtiy lhakgat nema katsapatistokgti; chuna, umakgolh lhakgat kaj maktum nawan. 12 Lhakgat nema naʼakgataxtu kaj nalatawaka. Kxchakgen tabernáculo nalatawaka aitat lhakgat nema naʼakgataxtu. 13 Kxkilhpanin, akgtum codo xlilhman naʼakgataxtu lhakgat chu kaj nalatawaka xlakata nalitatlapa tabernáculo.

14 »Na naliʼakgtlapaya kxuwa borrego nema xaspinini manikanit. Chu na nakgalhmawakaya kxuwa foca.

15 »Natlawaniya tabernáculo laklhman armazones.* Nakalitlawaya kiwi xla acacia chu kaj natayakgo. 16 Akgatunu armazón xlikgalhit akgkaw codo xlilhman chu akgtum codo aitat xlitilanka. 17 Akgatunu armazón nakgalhi akgtiy xkinkan niku natalakgnu. Chuna militlawat putum xʼarmazón tabernáculo. 18 Natlawaya akgpuxam armazones nema natayakgo kxlakpan tabernáculo, anta kxsur, chu nalakaʼantayakgo ksur.

19 »Na natlawaya tipuxam tuku nalaktaya* akgpuxam armazones, xaplata xliwanat: kxtampin akgatunu armazón nakgalhi akgtiy tuku nalaktaya xlakata anta natanukgo akgtiy xkinkan armazón, chu kxtampin amakgapitsi armazones na nakgalhikgo akgatiyun tuku nalaktayakgo xlakata anta natanukgo akgtiy xkinkanin armazones. 20 Natlawaya akgpuxam armazones nema natayakgo kʼatanu xlakpan tabernáculo, anta kxnorte. 21 Na natlawaya tipuxam tuku nalaktaya, xaplata xliwanat: kxtampin akgtum armazón nakgalhi akgtiy tuku nalaktaya, chu kxtampin amakgapitsi armazones na nakgalhikgo akgatiyun tuku nalaktayakgo. 22 Kxchakgen tabernáculo, nema lakaʼaya kʼoeste, natlawaniya akgchaxan armazones. 23 Nachuna, natlawaya akgtiy armazones nema natayakgo kxchastunin, kxchakgen tabernáculo. 24 Kxʼakpun uma armazón kaj akgtum nakgalhi xchastun, lata kxtantun natsuku kgantiy chu nalachipa kxʼakpun, anta niku naʼan xapulana anillo. Chuna nakatlawaya uma akgtiy armazones, chu natayakgo kxchastun. 25 Chu natlawaya akgtsayan armazones nema nakgalhi akgkuchaxan tuku nalaktaya, xaplata xliwanat: kxtampin akgtum armazón nakgalhi akgtiy tuku nalaktaya, chu kxtampin amakgapitsi armazones na nakgalhikgo akgatiyun tuku nalaktayakgo.

26 »Natlawaya laklhman kiwi xla acacia: namaklakaskina kgankitsis xlakata nalimalakgnuya armazones kxlakpan tabernáculo, 27 namaklakaskina kgankitsis xlakata nalimalakgnuya armazones kʼatanu xlakpan tabernáculo chu atanu kgankitsis xlakata nalimalakgnuya armazones kxʼoeste tabernáculo, uma wamputun, kxchakgen. 28 Xalhman kiwi nema naʼan kxʼitat armazones natsuku kxkilhpan chu nakichan kʼatanu xkilhpan.

29 »Armazones nakalimaktlawaya oro chu nakatlawaniya anillos xaʼoro niku natanukgo xalaklhman kiwi. Xalaklhman kiwi na nakalichatlawaya oro. 30 Militlawat tabernáculo chuna la kmasiyanin ksipi.

31 »Natlawaya maktum cortina, nalitlawaya xaspupuku hilo, lana nema xamantajwa manikanit, lu xaspinini hilo chu xatlan lino. Anta nakatsapaniya querubines. 32 Nakamawakaya kkgantati talayaw xla acacia nema nakalichatlawakan oro. Xganchos xaʼoro xliwanat, chu akgtati tuku nalaktaya talayaw, xaplata xliwanat. 33 Nakamakgalhnuya cortina kʼgancho, chu nalipina arca xla talakkaxlan kxchakgen cortina. Cortina namapitsi xaSanto chu niku tlakg xaSanto. 34 Nakgalhwiliya xkgalhtawilh arca xla talakkaxlan, nema natawila niku tlakg xaSanto.

35 »Kxaʼalakgaputu cortina nayawaya mesa. Kxlakatin mesa nayawaya candelabro. Mesa nataya kxpakgastakat* tabernáculo chu candelabro nataya kxpakgxwiki.* 36 Natlawaya maktum cortina nema natawaka niku laktanukan ktabernáculo, nalitlawaya xaspupuku hilo, lana nema xamantajwa manikanit, lu xaspinini hilo chu xatlan lino. 37 Chu uma cortina nakatlawaniya kgankitsis xtalayaw chu nakalichatlawaya oro. Nakatlawaniya ganchos xaʼoro chu natlawaniya akgkitsis tuku nalaktaya, xacobre xliwanat.

27 »Natlawaya pumakamastan, nalitlawaya kiwi xla acacia. Statijwa* xliwanat, nakgalhi akgkitsis codo* xlilhman, akgkitsis codo xlitilanka, chu nakgalhi akgtutu codo xlitalhman. 2 Nachuna, natlawaniya akgatunu akgalokgot klakatati xchastunin. Pumakamastan chu xʼakgalokgot akgtuma xliwanat.* Chu pumakamastan nalimaktlawaya cobre. 3 Na nakatlawaya cubeta xlakata nasaka lhkaka,* nakatlawaya pala, xapulhman pulatu, lanka tenedor chu niku natajukgo jalanat. Putum umakgolh xacobre xliwanat. 4 Natlawaniya pumakamastan akgtum puskuyun xacobre, nema xtachuna la tsalh xliwanat. Chu miliwilinit akgtati anillo klakatati xchastunin puskuyun. 5 Natamaknuya uma puskuyun kxlakʼitat pumakamastan, kxpakgalhu xkilhpan. 6 Nachuna, nakatlawaniya pumakamastan laklhman kiwi xla acacia chu nakalichatlawaya cobre. 7 Laklhman kiwi nakatamaknukan kʼanillos chu anta natamakgxtakgkgo kxlakpanin pumakamastan, xlakata chuna tlan nalimalakxijkan. 8 Pumakamastan pulakgxokgokgo nawan xtachuna la akgtum caja chu nalitlawakan tablones. Natlawakan chuna la kmasiyanin ksipi.

9 »Kxlistilili tabernáculo na natlawaniya xkilhtin. Xkilhtin nema wi ksur, nakgalhi cortinas nema nalitlawakan xatlan lino, chu anta nakgalhi akgtum ciento codo xlilhman. 10 Nakgalhi kgampuxam talayaw chu akgpuxam tuku nalaktaya* nema xacobre xliwanat. Xganchos talayaw chu xʼanillos xaplata xliwanat. 11 Kxnorte na nakgalhi cortinas chu akgtum ciento codo xlilhman nakgalhi. Nakgalhi kgampuxam talayaw chu akgpuxam tuku nalaktaya nema xacobre xliwanat, xganchos talayaw chu xʼanillos xaplata xliwanat. 12 Kxʼoeste na naʼanan cortinas nema nalitatlapa tipuxamakaw codo xlitilanka xkilhtin, nakgalhi kgankaw xtalayaw chu akgkaw tuku nalaktayakgo. 13 Chu kxʼeste, anta niku taxtu chichini, xkilhtin nakgalhi tipuxamakaw codo xlitilanka. 14 Kxpakgastakat* niku laktanukan, xcortina nakgalhi akgkukitsis codo, na nakgalhi kgantutu talayaw chu akgtutu tuku nalaktayakgo. 15 Chu kxpakgxwiki,* cortina na nakgalhi akgkukitsis codo, kgantutu talayaw chu akgtutu tuku nalaktayakgo.

16 »Niku laktanukan xlikgalhit maktum cortina nema akgpuxam codo xlilhman xliwanat, chu nalitlawakan xaspupuku hilo, lana nema xamantajwa* manikanit, lu xaspinini hilo chu xatlan lino. Xlikgalhit kgantati talayaw chu akgtati tuku nalaktayakgo. 17 Putum talayaw nema nalitastili kilhtin nakgalhikgo anillo xaplata chu gancho xaplata, pero tuku nalaktayakgo xacobre xliwanat. 18 Xkilhtin xlikgalhit akgtum ciento codo xlilhman, tipuxamakaw codo xlitilanka chu akgkitsis codo xlitalhman. Xlipakan nalitlawakan xatlan lino chu xlaktay xacobre xliwanat. 19 Putum tuku namaskujukan chu namaklakaskinkan ktabernáculo xacobre xliwanat, nachuna laklanka clavo niku nakichiyawakan tabernáculo chu niku nakichiyawakan lipakan.

20 »Nachuna, nakalimapakgsiya israelitas pi naliminkgo lu xatlan aceite xla oliva* xlakata nalimakaxkgakgenankan, chu makgskgot ankgalhin napasakgo. 21 Aarón chu xkamanan kuenta natlawakgo pi makgskgot xalak tabernáculo,* nema ya kxaʼalakgaputu cortina niku wi arca xla talakkaxlan* ankgalhin napasakgo kxlakatin Jehová lata tsisa asta kakgotanun. Uma akgtum limapakgsin nema israelitas, xkamanankan chu putum tiku aku nalakachintilhakgo xlimakgantaxtitkan.

28 »Chu wix, natasaniya mintala Aarón kxlakatinkan israelitas, nachuna xlakgkgawasan: Nadab, Abihú, Eleazar chu Itamar, xlakata kisacerdotes nalitaxtukgo. 2 Natlawaniya mintala Aarón xasanto lhakgat chu xalilakgatit xlakata chuna nakgalhi lilanka. 3 Nakatachuwinana putum tiku lu tlan katsinikgo liskujkgo xmakankan,* tiku akit kkamaxkinit liskgalala, chu nakawaniya pi katlawanikgolh Aarón maktum lhakgat nema namaklakaskin akxni nalaksakkan, chu chuna xla tlan kisacerdote nawan.

4 »Wa uma lhakgat* nema natlawakgo: maktum kuxmutawaka, maktum efod, maktum xapakgaxtuluwa lhakgat, maktum xlakaskinka xatastaw lhakgat,* akgtum xlakaskinka litakgchin chu xlitatampulakgchin xlakaskinka lhakgat.* Nakatlawaniya Aarón chu xkamanan umakgolh lhakgat nema namaklakaskinkgo sacerdotes xlakata tlan kisacerdotes nalitaxtukgo. 5 Umakgolh tiku lu tlan katsinikgo liskujkgo xmakankan namaklakaskinkgo oro, xaspupuku hilo, lana nema xamantajwa* manikanit, lu xaspinini hilo chu xatlan lino.

6 »Efod nalistawakan xaspupuku hilo, lana nema xamantajwa manikanit, lu xaspinini hilo chu xatlan lino. Chu na nalitsapakan xaʼoro hilo. 7 Efod nakgalhi maktiy lhakgat. Xalak xlakatin chu xalak xchakgen natalakgnukgo kxpakgxtun.* 8 Xatastaw litatampulakgchin nema natatatsapa efod xlakata ni natakta, na watiya tuku nalitlawakan: oro, xaspupuku hilo, lana nema xamantajwa manikanit, lu xaspinini hilo chu xatlan lino.

9 »Natiyaya akgtiy chiwix xla ónice chu anta nakalhkawiliya xtukuwanikan xlakgkgawasan Israel. 10 Kʼakgtum chiwix nakalhkawiliya akgchaxan tukuwani chu kʼatanu chiwix na nakalhkawiliya atanu akgchaxan tukuwani chuna la lakachintilhakgolh. 11 Tiku liskuja chiwix nakalhkawili xtukuwanikan xlakgkgawasan Israel kʼakgtiy chiwix, xtachuna la xwililh akgtum sello. Alistalh natlawaniya tuku nalaktawila chu xaʼoro xliwanat. 12 Nakawiliya uma akgtiy chiwix kxpakgxtunin efod xlakata israelitas nakalakapastakkan. Kxpakgxtun Aarón nalin xtukuwanikan kxlakatin Jehová xlakata nakalakapastakkan. 13 Natlawaya tuku nalaktawilakgo chiwix chu xaʼoro xliwanat 14 chu kgantiy cadena xaʼoro nema xtachuna la tasiw. Chu uma cadena nakimakgalhnuya niku natawilakgo chiwix.

15 »Tsapana natlawa kuxmutawaka nema nalilakputsanankan. Na watiya nalitlawakan tuku nalitlawakan efod: oro, xaspupuku hilo, xamantajwa hilo, lu xaspinini hilo chu xatlan lino. 16 Akxni namakpustuka chastutati nawan chu nakgalhi akgtum cuarta* xlilhman chu akgtum cuarta xlitilanka. 17 Namawakaniya akgstitati* chiwix chu nakgalhikgo tuku nalaktawilakgo. Xliʼakgstitum* natawakani rubí, topacio chu esmeralda. 18 Xliʼakgstitiy* natawakani turquesa, zafiro chu jaspe. 19 Xliʼakgstitutu* natawakani léshem,* ágata chu amatista. 20 Chu xliʼakgstitati* natawakani crisólito, ónice chu jade. Putum chiwix nakgalhikgo tuku nalaktawilakgo chu xaʼoro xliwanat. 21 Chiwix nakgalhikgo xtukuwanikan kgalhkutiy xlakgkgawasan Israel. Akgatunu tukuwani nakilhchani akgtum tribu. Chu akgatunu chiwix nalin akgtum tukuwani chuna la akgtum sello.

22 »Kuxmutawaka na natlawaniya xatakgonkgxni cadena. Xtachuna la tasiw chu xaʼoro xliwanat. 23 Kuxmutawaka natlawaniya akgtiy anillo xaʼoro chu namawakaniya kuxmutawaka lakatiy kxchastunin.* 24 Chu nakatamaknuya kgantiy tasiw xaʼoro kʼanillos nema wilakgolh kxchastunin kuxmutawaka. 25 Kganatunu tasiw nakamakgankganuya kʼakgatunu xlaktawilh chiwix chu nakamawakaya kxlakatin xpakgxtunin efod. 26 Nachuna, natlawaniya akgtiy anillo xaʼoro chu nakamawakaya klakatiy xchastunin, kxtampin kuxmutawaka, nakgalhtawaka efod. 27 Na natlawaniya akgtiy anillo xaʼoro kxlakatin efod, tlakg pakgalhu natawilakgo chuna la natawilakgo akgtiy xpakgxtunin, lakatsu niku efod natatatsapa litatampulakgchin, kxpaʼakxtu xatastaw litatampulakgchin. 28 Xlakata kuxmutawaka ni natalakxija, namaklakaskinkan xaspupuku tasiw xlakata anillos nema natawilakgo kxtampin kuxmutawaka nakichikan kʼanillos nema natawilakgo kxtapan efod. Chuna kuxmutawaka ni natalakxija kxkgalhni efod, chu natamakgxtakga kxpaʼakxtu xatastaw litatampulakgchin.

29 »Akxni Aarón natanu kxaSanto, nakalin xtukuwanikan xlakgkgawasan Israel kkuxmutawaka nema nalilakputsanankan. Nalin kxkuxmun,* xlakata Jehová ankgalhin nakalakapastaka. 30 Kxpulakni kuxmutawaka nema lilakputsanankan nalin Urim chu Tumim.* Kxnaku Aarón natawilakgo akxni natanu kxlakatin Jehová. Aarón ankgalhin nalin kuxmutawaka nema nakalilakputsanani israelitas akxni nataya kxlakatin Jehová.

31 »Natlawaya xapakgaxtuluwa lhakgat nema nalin efod, nalitlawaya xaspupuku hilo. 32 Natakuxmulakki kxpixni,* chu chatum stawana nakilhpatsapa xlistilili xpixni. Xtachuna nawan chuna la xpixni litakuxmumakgtay xlakata ni nataxtita. 33 Natlawaya granadas, nalitlawaya xaspupuku hilo, lana nema xamantajwa manikanit, lu xaspinini hilo chu nakilhpamawakaya xkilhpan lhakgat, granada nalakgstipatanutilhakgo laktsu campana xaʼoro. 34 Xlistilili xkilhpan xapakgaxtuluwa lhakgat nakamawakanitilhaya akgtum aktsu campana xaʼoro, akgtum granada, akgtum aktsu campana xaʼoro, akgtum granada... 35 Aarón nawili xlakata tlan naskuja chuna la sacerdote.* Chu xlimakasanat akxni natanu ktabernáculo kxlakatin Jehová chu akxni nataxtu, xlakata ni nani.

36 »Na natlawaya akgtum placa xaʼoro nema lu naskgo, chu chuna la tlawakan akgtum sello, wix nalhkawiliya anta: “Taskulunkit wa lakgchan Jehová”. 37 Namaklakaskina xaspupuku tasiw xlakata nachiya placa kxlakaskinka litakgchin chu natawaka kxlakatin xlakaskinka litakgchin. 38 Chu Aarón wa napalakachuwinan tiku namaxkajwi tuku xasanto, nema israelitas tanu nawilikgo akxni namakamastakgo chuna la xasanto tamaskiwin.* Placa ankgalhin natamakgxtakga kxmuxtin,* xlakata tlan nakamakgamakglhtinan Jehová.

39 »Nachuna, natlawaya maktum xlakaskinka xatastaw lhakgat,* nalitlawaya xatlan lino, na natlawaya maktum xlakaskinka litakgchin nema nalitlawakan xatlan lino chu xlitatampulakgchin xlakaskinka lhakgat.

40 »Na nakatlawaniya xlakgkgawasan Aarón xalilakgatit lhakgat, xlitatampulakgchin xlakaskinka lhakgat chu litakgchin xlakata chuna nakgalhikgo lilanka. 41 Nalaksaka mintala Aarón chu xlakgkgawasan chu nakamalhakgeya uma lhakgat, sacerdotes nakalimaxtuya* chu tanu nakawiliya. Xlakan kisacerdotes nalitaxtukgo. 42 Nachuna, nakalitlawaniya lino xtatanukan xlakata ni xalaklhtantala* natasiyakgo kxtampin klhakgatkan. Chu nakatlapa lata kxtankilhankan* asta kxtanchaspinkan. 43 Aarón chu xlakgkgawasan xliwilitkan uma tatanu akxni natanukgo ktabernáculo* o akxni natalakatsuwikgo niku wi pumakamastan xlakata natlawakgo taskujut niku xasanto. Chuna xlakan ni katilinkgolh kuenta chu ni katinikgolh. Uma akgtum talakkaxlan nema ktatlawama xla chu putum xkamanan.

29 »Xlakata xlakan tlan kisacerdotes nalitaxtukgo, wa uma tuku natlawaya xlakata nakamaskulunkiya. Nalaksaka tantum xakgawasa toro chu tantiy borregos nema ni tatatlakgo. 2 Natlawaya kaxtalanchu nema ni kgalhi limaxkutin, chu namaklakaskina xatlan harina xla trigo, na natlawaya rosca nema kgalhi aceite chu ni kgalhi limaxkutin chu lakstakaka galletas nema kgalhi aceite chu ni kgalhi limaxkutin. 3 Nakamujuya kʼakgtum canasta chu nakatamakamastaya toro chu tantiy borregos.

4 »Nalipina Aarón chu xlakgkgawasan lakatsu niku laktanukan ktabernáculo chu nakalimapakgsiya xlakata napaxkgo. 5 Alistalh namalhakgeya Aarón xlakaskinka xatastaw lhakgat, xapakgaxtuluwa lhakgat, efod chu kuxmutawaka. Chu xatastaw litatampulakgchin nema lin efod liwana nalitampulakgchiya. 6 Naʼakwiliya xlakaskinka litakgchin, chu litakgchin namawakaniya xasanto placa xaʼoro.* 7 Alistalh naʼakmawakaya aceite nema lilaksaknankan xlakata nalaksaka.

8 »Nakamalakatsuwiya xlakgkgawasan chu nakamalhakgeya lhakgat 9 chu nakalitampulakgchiya Aarón chu xlakgkgawasan xlitatampulakgchin xlakaskinka lhakgat* chu na nakaʼakwiliya litakgchin. Xlakan kalakgchan sacerdotes nalitaxtukgo. Uma akgtum limapakgsin nema lhuwa kilhtamaku namakgapala.* Wa uma tuku natlawaya xlakata Aarón chu xlakgkgawasan kisacerdotes nalitaxtukgo.*

10 »Alistalh nalipina toro kxlakatin tabernáculo,* chu Aarón chu xlakgkgawasan nawilikgo xmakankan kxʼakgxakga toro. 11 Namakgniya toro kxlakatin Jehová, lakatsu niku laktanukan ktabernáculo. 12 Naʼakmawakaya xaʼaktsu mimakan xkgalhni toro chu nalitlawaya akgalokgot nema yakgo kpumakamastan. Alistalh naxtakgamakgana kxtantun pumakamastan kgalhni nema naʼakgataxtu. 13 Tanu nawiliya xmanteca xpaluwa chu xmanteca klhwakaka, nachuna akgtiy xpastapu chu manteca nema kamakwaka. Putum uma nakalhkuyuya xlakata xjini natachayawa lata kpumakamastan, 14 pero xliwa toro, xmakxuwa chu xkgatsasa* nakalhkuyuya kxkilhtin kachikin. Uma akgtum tamakamastan xla talakgalhin.

15 »Natiyaya tantum borrego, chu Aarón chu xlakgkgawasan nawilikgo xmakankan kxʼakgxakga uma borrego. 16 Namakgniya borrego chu nalitsakglhmaniya xkgalhni putum xlakpanin pumakamastan. 17 Alistalh borrego laktsu laktsu natlawaya, nachakgeya xpaluwa chu xtantun,* chu tistum nakawiliya xatalakchuku chu na anta nawiliya xʼakgxakga. 18 Chu putuminika nalhkuyuya borrego xlakata xjini natachayawa lata kpumakamastan. Putuminika nalhkuyuya xlakata namakamaxkiya Jehová, chu Jehová lu muksun nakgankgawanan.*

19 »Alistalh natiyaya atanu borrego, chu Aarón chu xlakgkgawasan nawilikgo xmakankan kxʼakgxakga borrego. 20 Namakgniya borrego chu nalitlawaya tsinu kgalhni xtakgen* Aarón xalak xpakgastakat,* na nakalitlawaniya xtakgenkan xlakgkgawasan, nachuna xakgelanka xmakankan* xalak xpakgastakatkan chu xakgelanka xtantunkan* xalak xpakgastakatkan. Na nalitsakglhmaniya kgalhni putum xlakpanin pumakamastan. 21 Chu natiyaya tsinu kgalhni nema wi kxʼakpun pumakamastan chu aceite nema lilaksaknankan xlakata nalitsakglhmaniya Aarón, xlakgkgawasan chu klhakgatkan. Chuna Aarón, xlakgkgawasan chu klhakgatkan, xasanto nawankgo.

22 »Alistalh namaktiniya borrego xmanteca, xmanteca kstajan* xmanteca xpaluwa, xmanteca klhwakaka, akgtiy xpastapu chu manteca nema kamakwaka, na namaktiniya xtantun nema kgalhi kxpakgastakat, xlakata uma borrego namakamastakan akxni nalaksakkan chatum sacerdote. 23 Nachuna, natiyaya maktum xastilili kaxtalanchu, maktum rosca nema kgalhi aceite chu maktum xastakaka galleta nema tajumakgo kcanasta niku kamujukan kaxtalanchu nema ni kgalhi limaxkutin chu wi kxlakatin Jehová. 24 Putum uma nakamachipiya Aarón chu xlakgkgawasan chu anu anu nalimakapina chuna la akgtum tamakamastan nema lakchikimikanit* kxlakatin Jehová. 25 Chu nakamakglhtiya tuku chipakgonit chu nakalhkuyuya kpumakamastan, kxkgalhni xalhkun tamakamastan. Akgtum tamakamastan nema lhkuyunikan Jehová, xlakata Jehová lu muksun nakgankgawanan.

26 »Alistalh natiyaya xkuxmun borrego nema namakamastakan xlakata Aarón sacerdote nalimaxtukan, chu anu anu nalimakapina chuna la akgtum tamakamastan nema lakchikimikanit kxlakatin Jehová. Uma, wix natapakgsiniyan. 27 Borrego nema namakamastakan xlakata sacerdotes nakalimaxtukan Aarón chu xlakgkgawasan, milimasantujlit xkuxmun tamakamastan nema lakchikimikanit, xtantun tamakamastan nema xasanto* litaxtu chu lakchikimikanit. 28 Uma nakalakgchan Aarón chu xlakgkgawasan. Uma akgtum limapakgsin nema lhuwa kilhtamaku namakgapala chu israelitas ankgalhin xlikgalhakgaxmatatkan, xlakata uma xasanto, chu xasanto nalitaxtu nema namakamastakgo israelitas. Wa uma xasanto tamakamastan nema israelitas namakamaxkikgo Jehová.

29 »Xasanto lhakgat nema tapakgsini Aarón namaklakaskinkgo xlakgkgawasan akxni natawilakgo kxlakgxokgo chu nakalaksakkan xlakata sacerdotes nalitaxtukgo. 30 Xkgawasa Aarón tiku natawila kxlakgxokgo chu natanu ktabernáculo xlakata naskuja niku xasanto, akgtujun kilhtamaku namaklakaskin uma lhakgat.

31 »Natiyaya borrego nema namaklakaskinkan akxni nalaksakkan chatum sacerdote chu namapupiya xaliwa anta niku xasanto. 32 Lakatsu niku laktanukan ktabernáculo Aarón chu xlakgkgawasan nawakgo xaliwa borrego chu kaxtalanchu nema tajuma kcanasta. 33 Wa uma tuku namakamastakan xlakata nakatapatikan xtalakgalhinkan akxni sacerdotes nakalimaxtukan* chu tanu nakawilikan xpalakata Dios. Xlakan nawakgo uma. Pero tiku ni maxkikanit talakaskin nawa,* ni xliwat, xlakata uma xasanto. 34 Komo lichali naʼakgataxtu liwa chu kaxtalanchu nema namakamastakan akxni nalaksakkan chatum sacerdote, mililhkuyut. Niti xliwat, xlakata uma xasanto.

35 »Militlawat xpalakata Aarón chu xlakgkgawasan chuna la klimapakgsin. Nalimaxtuya akgtujun kilhtamaku xlakata sacerdotes nakalimaxtuya.* 36 Akgatunu kilhtamaku namakgniya chu namakamastaya tantum toro xlakata talakgalhin. Chu chuna naskinikan Dios pi katapatinalh talakgalhin chu namaskulunkikan pumakamastan xlakata xtalakgalhinkan. Nachuna, naxtakgamakgana aceite kxʼakpun* pumakamastan, chuna nalitasiya pi tanu wilikanit xlakata nalikakninanikan Dios. 37 Akgtujun kilhtamaku nalimaxtuya xlakata namaskulunkiya pumakamastan xpalakata xtalakgalhinkan, chu namakamaxkiya Dios xlakata pumakamastan lu xasanto nalitaxtu. Putum tiku naxama pumakamastan xasanto xliwanat.

38 »Wa uma tuku namakamastaya kpumakamastan. Akgatunu kilhtamaku, ankgalhin namakamastaya tantiy borregos nema akgtum kata kgalhikgo. 39 Tantum borrego namakamastaya tsisa, chu atantum namakamastaya akxni natsiswan.* 40 Xapulana borrego natamakamastaya akgtum kilo* xatlan harina nema talakgwilhakanit akgtum litro* aceite xla oliva.* Na namakamastaya akgtum litro vino. 41 Xlitantiy borrego namakamastaya akxni natsiswan,* natamakamastaya tamakamastan xla talhtsi chu xachuchutwa tamakamastan nema xtachuna tuku namakamastakan tsisa. Putum uma akgtum tamakamastan nema lu muksun takgankgawanan, akgtum tamakamastan nema lhkuyunikan Jehová. 42 Uma xalhkun tamakamastan chali chali namakamastayatit lakatsu niku laktanukan ktabernáculo kxlakatin Jehová. Lata uma kilhtamaku, wixin, minkamanankan chu tiku aku nalakachintilhakgo chuna militlawatkan. Anta naktaya kmilakatinkan xlakata tlan naktachuwinanan.

43 »Anta nakkatasiyani israelitas, chu anta kililanka namasantujli. 44 Nakmaskulunki tabernáculo chu pumakamastan, chu naktlawa pi Aarón chu xlakgkgawasan xasantos nawankgo xlakata kisacerdotes nalitaxtukgo. 45 Akit naktawila kxlakgstipankan israelitas chu xDioskan naklitaxtu. 46 Chu xlakan xlikana nakatsikgo pi akit Jehová xDioskan, tiku kalakgmaxtulh kxtiyat Egipto xlakata naktawila kxlakgstipankan. Akit Jehová xDioskan.

30 »Natlawaya akgtum pumakamastan xakiwi xla acacia xlakata anta nalhkuyukan incienso. 2 Statijwa* nawan, nakgalhi akgtum codo* xlilhman, akgtum codo xlitilanka chu akgtiy codo xlitalhman. Pumakamastan chu xʼakgalokgot akgtuma nawan. 3 Naliʼakputlawaya xatlan oro, nalitlawaya kxlakpanin chu kxʼakgalokgot. Natlawaniya xkilhpan xaʼoro. 4 Kxpakgalhu xkilhpanin pumakamastan nakawiliniya anillos xaʼoro klakatati xchastunin. Anta nakatamaknukan kgantiy xalaklhman kiwi xlakata nakalimalakxijkan. 5 Natlawaya laklhman kiwi xla acacia chu nakalichatlawaya oro. 6 Nawiliya pumakamastan niku xaSanto, lakatsu niku waka cortina nema wi kxlakatin arca xla talakkaxlan chu xkgalhtawilh, anta niku akit naktasiyaniyan.

7 »Aarón nalhkuyu xamuksun incienso kxʼakpun pumakamastan akxni nakamakaxa makgskgot akgatunu tsisa. 8 Chu akxni Aarón nakamapasi makgskgot akxni natsiswan,* na nalhkuyu incienso. Akgtum tamakamastan xla incienso nema natlawakan kxlakatin Jehová, uma akgtum limapakgsin nema lhuwa kilhtamaku namakgapala. 9 Ni milimakamastatkan kxʼakpun pumakamastan incienso nema ni xlitamastat, nipara xalhkun tamakamastan, nipara tamakamastan xla talhtsi. Na ni naxtakgawakayatit xachuchutwa tamakamastan. 10 Aarón namaskulunki pumakamastan, chuna natlawa akxni natiya tsinu kgalhni xla tamakamastan xpalakata talakgalhin chu nalitlawa tsinu xʼakgalokgot pumakamastan, chuna naxapa talakgalhin. Lata uma kilhtamaku chuna xlitatlawat makgtum akgatunu kata. Pumakamastan lu xasanto xpalakata Jehová».

11 Wa xlakata Jehová wanilh Moisés: 12 «Ankgalhin akxni natlawaya akgtum censo chu nakaputlekgeya lakchixkuwin israelitas, chatunu xlakan xlixokgonitkan Jehová xtapalh xlatamatkan akxni natlawakan censo. Chuna ni ktikamalakgaxokgelh akxni nakalhkawilikan. 13 Wa uma tuku xlimastatkan putum tiku nakalhkawilikan: akgchaxan gramo* xla plata. Napulhkaya plata chuna la pulhkanankan niku xasanto. Akgchaxan gramo xla plata wa tuku namaxkikan Jehová. 14 Putum tiku nalhkawilikan chu kgalhi akgpuxam kata o liwaka, xlimaxkitkan Jehová tuku kalakgchan xchatunukan. 15 Tiku kgalhikgo lhuwa tumin chu tiku lakglimaxkgenin kajwatiya xlimastatkan akgchaxan gramo xla plata nema kalakgchan namaxkikgo Jehová xlakata nalakgmaxtukgo xlatamatkan. 16 Chu namakglhtinana tumin* nema israelitas namastakgo xlakata nakalakgmaxtukan chu namastaya xlakata namaklakaskinkan ktaskujut nema natlawakan ktabernáculo. Uma tumin namakgtayanan xlakata Jehová nakalakapastaka israelitas chu nakalakgmaxtu».

17 Nachuna, Jehová wanilh Moisés: 18 «Katlawa niku namakgachakgankan chu tuku nalaktawila. Cobre nakalitlawaya. Kawili kxlakʼitat tabernáculo* chu pumakamastan, chu kalimatsama chuchut. 19 Aarón chu xlakgkgawasan anta namakgachakgankgo chu natuchakgankgo. 20 Akxni nina tanukgo ktabernáculo o akxni natalakatsuwikgo kpumakamastan xlakata nalhkuyukgo tamakamastan chu xjini nalakgchan Jehová, nalichakgankgo chuchut xlakata ni nanikgo. 21 Namakgachakgankgo chu natuchakgankgo xlakata ni nanikgo. Lata uku, uma akgtum limapakgsin nema lhuwa kilhtamaku namakgapala xpalakata Aarón, xkamanan chu putum tiku aku nalakachintilhakgo».

22 Jehová wanipa Moisés: 23 «Alistalh nakamamakxtumiya uma tuku tlakg muksunkgo: akgchaxan kilo xalakpalha kstajat mirra, akgtutu kilo xasakgsi canela chu akgtutu kilo xasakgsi cálamo, 24 akgchaxan kilo casia* nema pulhkakanit chuna la pulhkanankan niku xasanto chu akgtutu litro aitat* aceite xla oliva. 25 Putum uma nalitlawaya akgtum xasanto aceite nema nalilaksaknankan. Liwana xlitalakgkaxtlawat.* Xasanto aceite xliwanat xlakata nalilaksaknankan.

26 »Nalimaklakaskina xlakata nalitsakglhmaniya tabernáculo chu arca xla talakkaxlan, 27 mesa chu putum tuku maklakaskinkan anta, candelabro chu putum tuku maklakaskinkan anta, xpumakamastan incienso, 28 niku makamastakan xalhkun tamakamastan chu putum tuku tamaklakaskin anta, nachuna niku namakgachakgankan chu xlaktawilh. 29 Chuna lu xasantos nalitaxtukgo, wa xlakata tanu nakawiliya xlakata akit kintapakgsinikgo. Putum tiku naxama xasanto xliwanat. 30 Nalaksaka Aarón chu xlakgkgawasan, chu nakamaskulunkiya xlakata kisacerdotes nalitaxtukgo.

31 »Na nakawaniya israelitas: “Lata uma kilhtamaku, uma kiʼaceite xasanto nawan xlakata nalilaksaknankan. 32 Niti nalimaktlawakan, chu niti natlawa tuku xtachuna uma aceite. Uma xasanto chu ankgalhin xasanto nalitaxtu mimpalakatakan. 33 Putum tiku natlawa tuku xtachuna uma chu nalimaktlawa tiku ni lakgchan,* namakgnikan”».

34 Wa xlakata Jehová wanilh Moisés: «Lakxtum xlilhuwa nakamamakxtumiya uma tuku muksun: kstajat estacte,* xamuksun incienso,* xamuksun gálbano* chu xatlan olíbano.* 35 Putum uma nalitlawaya incienso. Liwana xlitalakgkaxtlawat,* nakgalhi matsat, ni xlikgalhit tuku atanu chu xasanto xliwanat. 36 Natiyaya tsinu chu naswakgaya xlakata chuna la pokgxni nawan chu nawiliya tsinu kxlakatin arca xla talakkaxlan nema wi ktabernáculo,* anta niku naktasiyaniyan. Uma incienso lu xasanto xliwanat mimpalakatakan. 37 Ni nalakgkaxtlawayatit uma incienso xlakata wixin namaklakaskinatit. Ankgalhin naliʼakxilhatit xtachuna la tuku xasanto xpalakata Jehová. 38 Putum tiku natlawa incienso xtachuna la uma xlakata nalipaxuwa xlimuksun, namakgnikan».

31 Wa xlakata Jehová wanilh Moisés: 2 «Kaʼakxilhti, klaksaknit Bezalel, xkgawasa Urí, xkgawasa Hur, xalak xtribu Judá. 3 Nakmaxki kiʼespíritu santo xlakata nakgalhi liskgalala, taʼakgatekgsni chu xlakata nakatsini tlawa tipalhuwa taskujut, 4 chu chuna tlan nalakkaxwili la natlawa taskujut chu lu tlan nakatlawa, naliskuja oro, plata chu cobre, 5 tlan nakalakchuku chu nakakaxwili lakglilakgatit chiwix chu nakaxwaka kiwi xlakata tipalhuwa taskujut nalitlawa. 6 Na klaksaknit Oholiab xkgawasa Ahisamac xalak xtribu Dan, xlakata namakgtaya. Chu nakkamaxki liskgalala putum tiku lu katsinikgo liskujkgo xmakankan* xlakata natlawakgo putum tuku klimapakgsinitan: 7 tabernáculo,* arca xla talakkaxlan chu xkgalhtawilh, putum tuku namaklakaskinkan ktabernáculo, 8 mesa chu putum tuku namaklakaskinkan anta, candelabro xaʼoro chu putum tuku namaklakaskinkan anta, niku namakamastakan incienso, 9 niku namakamastakan xalhkun tamakamastan chu putum tuku namaklakaskinkan anta, niku namujukan chuchut chu xlaktawilh, 10 na nastawakgo xlakaskinka lhakgat, xasanto lhakgat nema namaklakaskin sacerdote Aarón chu lhakgat nema namaklakaskinkgo xlakgkgawasan, xlakata kisacerdotes nalitaxtukgo, 11 aceite nema nalilaksaknankan chu xamuksun incienso nema namaklakaskinkan ktabernáculo. Xlakan natlawakgo putum tuku klimapakgsinitan».

12 Chu Jehová wanipa Moisés: 13 «Kakatachuwinanti israelitas chu kakawani: “Lu kuenta natlawayatit xlakata namaxkiyatit kakni kisábados, xlakata uma nalimasiya talakkaxlan nema kkatatlawanitan wixin chu putum tiku aku nalakachintilhakgo, chuna nakatsikan pi akit, Jehová, kkalaksaknitan xlakata nakiskujnaniyatit. 14 Namaxkiyatit kakni sábado, xlakata xasanto nalitaxtu mimpalakatakan. Chu putum tiku namaxkajwi, xlinit. Komo wi tiku naskuja uma kilhtamaku, namakgnikan. 15 Tlan naskujatit akgchaxan kilhtamaku, pero xliʼaktujun kilhtamaku, sábado, milijaxatkan. Xasanto litaxtu xpalakata Jehová. Komo wi tiku naskuja sábado, xlinit. 16 Israelitas xlimaxkitkan kakni chu xlilakapastakatkan sábado. Uma akgtum talakkaxlan nema lhuwa kilhtamaku namakgapala. 17 Sábado nalimasiya talakkaxlan nema kkatatlawanit israelitas, chu uma lhuwa kilhtamaku namakgapala, xlakata Jehová akgchaxan kilhtamaku litlawalh akgapun chu katiyatni, chu xliʼakgtujun kilhtamaku nialh skujli chu jaxli”».

18 Akxni Dios tachuwinankgolh Moisés ksipi Sinaí, maxkilh maktiy xalakgxtakgala chiwix xla Talakkaxlan, niku Dios xlitsokgnanit xmakan.

32 Akxni kachikin akxilhli pi Moisés nina xtakta chu lu xtamakgapalima ksipi, lakgtalakatsuwikgolh Aarón chu wanikgolh: «Kakilatlawaniw chatum dios tiku nakinkapulalinan, xlakata ni kkatsiyaw tuku akgspulalh Moisés, chixku tiku kinkatamakxtun kxtiyat Egipto». 2 Wa xlakata, Aarón kawanilh: «Kakamakglhtitit milakpuskatinkan, milakgkgawasankan, chu milaktsumankan xta’akganukan xaʼoro chu kakilitanitit». 3 Wa xlakata xputumkan tsukukgolh taʼakgaxtukgo xaʼoro xta’akganukan chu linikgolh Aarón. 4 Xla tiyalh oro chu limaklakaskilh akgtum cincel xlakata xtlawalh tantum aktsu toro. Chu tsukukgolh wankgo: «Wa uma miDios, oh, Israel. Xla tamakxtun kʼEgipto».

5 Akxni Aarón akxilhli uma, tlawalh akgtum pumakamastan kxlakatin aktsu toro, alistalh wa: «Chali natlawaniyaw akgtum fiesta Jehová». 6 Chu lichali lu tsisa takikgolh chu tsukukgolh makamastakgo xalhkun tamakamastan chu tamakamastan xla takaksni. Alistalh, israelitas tsukukgolh wayankgo, kgotnankgo chu tsukukgolh paxuwakgo.

7 Wa xlakata Jehová wanilh Moisés: «Katakta, xlakata minkachikin nema maxtu kxtiyat Egipto, tlawakgonit akgtum lanka talakgalhin. 8 ¡Lakapala makgxtakgkgonit tiji nema kkalimapakgsilh nastalanikgo! Tlawakgonit akgtum tatlawamakgxtu* xla aktsu toro chu lakgtakilhputamakgo, tlawanimakgo tamakamastan chu kilhwamakgo: “Wa uma miDios, oh, Israel. Wa tiku tamakxtun kxtiyat Egipto”». 9 Nachuna, Jehová wanipa Moisés: «Kakxilhnit pi uma kachikin lu xatsakat. 10 Kimaxki talakaskin nakkamasputu, xlakata lu kkasitsininit, chu wix akgtum lanka kachikin naklimaxtuyan».

11 Wa xlakata Moisés tasaskinilh Jehová: «Oh, Jehová, wix limasiya lhuwa militliwakga akxni litamakxtu minkachikin xatliwakga mimakan kxtiyat Egipto, ¿tuku xlakata mastapat talakaskin pi mintasitsi natlawa pi namasputuputuna? 12 Komo chuna natlawaya, egipcios nawankgo: “Dios tiku kakninanikgo katamakxtulh xlakata xkatlawaniputun tuku nitlan. Kaj xkamakgniputun kkasipijni chu xkamasputuputun kkatiyatni”. Katlawa litlan kamachokgo mintasitsi chu kalakgpali tuku lakpuwanita natlawaniya minkachikin. 13 Kakalakapastakti miskujni Abrahán, Isaac chu Israel, tiku kalitayani kmintukuwani: “Naktlawa pi minkamanankan lhuwa nawankgo chuna la staku xalak akgapun chu xkamanankan nakkamaxki putum umakgolh tiyat nema klaksakli, xlakata wa nakatapakgsini putum kilhtamaku”».

14 Chu Jehová lakgpalilh tuku xlakpuwanit namalakgachani xkachikin nema xlichuwinanit.

15 Alistalh, Moisés taktalh ksipi chu xchipatilha maktiy xalakgxtakgala chiwix xla Talakkaxlan. Xalakgxtakgala chiwix lakgaputiy xtatsokgnit: kxlakatin chu kxchakgen. 16 Wa Dios tlawalh xalakgxtakgala chiwix, chu tuku xtatsokgtawilanit anta wa Dios tsokgwililh. 17 Chu Josué tsukulh kgaxmata pi lu xtachilimaka* kkachikin, wa xlakata wanilh Moisés: «Takgaxmata pi latalatlawamaka kkachikin». 18 Pero Moisés kgalhtilh:

19 Akxni Moisés talakatsuwilh kkachikin chu akxilhli tantum aktsu toro chu pi xtantlimakgolh,* lu sitsilh, likasnokgli xalakgxtakgala chiwix nema xchipanit chu laktsu laktsu wa kxtantun sipi. 20 Alistalh tiyalh aktsu toro nema xtlawakgonit chu lhkuyulh, chu laktsu laktsu tlawalh asta pokgxni wa. Makalh uma pokgxni kchuchut chu tlawalh pi israelitas xlikgotnankgolh. 21 Chu Moisés wanilh Aarón: «¿Tuku tlawanin uma kachikin xlakata xmatlawi akgtum lanka talakgalhin?». 22 Aarón kgalhtilh: «Ni kasitsi, kimalana. Wix katsiya pi uma kachikin ankgalhin tlawa tuku nitlan. 23 Xlakan kiwanikgolh: “Kakilatlawaniw chatum dios tiku nakinkapulalinan, xlakata ni kkatsiyaw tuku akgspulalh Moisés, chixku tiku kinkatamakxtun kxtiyat Egipto”. 24 Wa xlakata kkawanilh: “Putum tiku maklakaskin tuku kgalhi oro, kakiliminilh”. Alistalh kmakalh oro klhkuyat chu taxtucha uma aktsu toro».

25 Moisés akxilhli pi kachikin xmalakatsalimakgo tuku xtlawamakgo xlakata Aarón xmastanit talakaskin pi chuna xlalh, wa xlakata tamamaxanikgolh kxlakatinkan xtalamakgasitsinkan. 26 Chu Moisés tayalh niku laktanukan kkachikin chu wa: «Tiku tataya Jehová, ¡kakilakgmilh!». Chu putum levitas lakgankgolh. 27 Alistalh kawanilh: «Wa uma tuku wan Jehová, xDios Israel: “Chatunu chatunu katiyalh xʼespada, katanulh kxlilakgatum kachikin chu kamakgnilh xtala, xtalakatsu chu xʼamigo”». 28 Levitas tlawakgolh tuku Moisés wa, chu uma kilhtamaku nikgolh akgtutu mil lakchixkuwin. 29 Alistalh Moisés kalimapakgsilh: «Lata uma kilhtamaku, tanu militawilatkan xlakata naskujnaniyatit Jehová. Xlakata kgalhakgaxpattit akxni kamakgnitit milakgkgawasankan chu minatalankan, la uku, xla nakasikulunatlawayan».

30 Lichali, Moisés kawanilh israelitas: «Wixin tlawatit akgtum lanka talakgalhin. Chu la uku nakan tachuwinan Jehová ksipi xlakata nakakxilha komo wi tuku tlan naktlawa chu nakatapatiyan mintalakgalhinkan». 31 Wa xlakata, Moisés tawakapa ksipi chu wanilh Jehová: «¡Uma kachikin tlawanit lanka talakgalhin! ¡Tlawakgolh chatum dios xaʼoro! 32 Komo lakaskina, kakatapati xtalakgalhinkan. Pero komo ni lakaskina, katlawa litlan, kaxapaxtu kintukuwani klibro nema tsokgwilinita». 33 Chu Jehová kgalhtilh Moisés: «Nakxapaxtu kkilibro xtukuwani tiku tlawanit talakgalhin kkilakatin. 34 La uku kapit, chu kalipi kachikin anta niku klitachuwinanitan. Kaʼakxilhti, kiʼángel napulanitilhayan, chu kilhtamaku akxni nakkaskini kuenta nakkamalakgaxokge xlakata xtalakgalhinkan». 35 Chu Jehová tsukulh kamalakgaxokge kachikin xpalakata aktsu toro nema xmatlawikgonit Aarón.

33 Jehová na wanipa Moisés: «Chuntiya kakalipi kachikin nema katamakxtu kxtiyat Egipto. Kapit ktiyat nema kkalitayanilh Abrahán, Isaac chu Jacob akxni kkawanilh: “Nakkamaxki minkamanan”. 2 Nakmalakgachaniyan chatum ángel tiku napulanitilhayan chu nakkatamakxtu cananeos, amorreos, hititas, perizitas, heveos chu jebuseos. 3 Kapit ktiyat niku anan lhuwa leche chu ksakgsi cera.* Pero akit ni ktikataʼan, xlakata wixin akgtum lu xatsakat kachikin chu tlan nakkamasputuyan ktiji».

4 Akxni israelitas kgaxmatkgolh umakgolh tachuwin, lu lipuwankgolh, chu nipara chatum maklakaskilh xlitakaxtay. 5 Chu Jehová wanilh Moisés: «Kakawani israelitas: “Wixin akgtum lu xatsakat kachikin. Tlan lakapala xaktitaxtulh kmilakgstipankan chu xakkamasputun. Wa xlakata ni kamaklakaskintit militakaxtaykan xlakata aku klilakpuwama tuku nakkatatlawayan”». 6 Chu lata ksipi Horeb israelitas nialh maklakaskinkgolh xlitakaxtaykan.

7 Alistalh Moisés yawalh xchik xaxuwa tsinu lakgamakgat niku xwi kachikin chu limapakuwilh chiki niku tamakxtumikan. Putum tiku wi tuku xkgalhskimputun Jehová xʼan kchiki niku xtamakxtumikan, nema xya kxkilhtin kachikin. 8 Makgatunu akxni Moisés xʼan kchiki niku xtamakxtumikan, putum israelitas xtayakgo niku xlaktanukan kxchikkan xaxuwa, chu chuntiya xʼakxilhkgo Moisés asta akxni xtanuyacha kchiki. 9 Akxni Moisés xtanuyacha chu Dios xtachuwinan, puklhni xtakta chu xtamakgxtakga niku xlaktanukan kchiki. 10 Akxni israelitas xʼakxilhkgo puklhni niku xlaktanukan kchiki niku xtamakxtumikan, putum xtakilhputakgo niku xlaktanukan kxchikkan. 11 Chu Jehová xtachuwinan Moisés chuna la kgalhchuwinankgo chatiy lakchixkuwin. Akxni Moisés xtaspita niku xwilakgo israelitas, Josué, xkgawasa Nun tiku xmakgtayana chu kskujni xlitaxtu, ni xtapanu kchiki niku xtamakxtumikan.

12 Wa xlakata Moisés wanilh Jehová: «Wix kiwanipat “Kapulalipi uma kachikin”. Pero nina kiwaniya tiku nakintamalakgachaya. Nachuna, kiwaninita “Liwana klakgapasan* chu kimakgapaxuwaya”. 13 Komo kmakgapaxuwayan, katlawa litlan, kakimasiyani mintiji xlakata tlan naklakgapasan chu chuntiya nakmakgapaxuwayan. Kalakapastakti pi uma kachikin, minkachikin». 14 Wa xlakata xla kgalhtilh: «Akit naktaʼanan chu nakmajaxayan». 15 Chu Moisés wanilh: «Komo wix ni nakinkatapina, ni katlawa pi naktaxtuyaw unu. 16 ¿Tuku nalitasiya pi akit chu minkachikin kkamakgapaxuwayan? Komo nakinkatapina, minkachikin chu akit ni xtachuna ktilitaxtuw chuna la amakgapitsi kachikinin nema anankgo kkatiyatni».

17 Jehová wanilh Moisés: «Na naktlawa uma tuku kiskinipat, xlakata kimakgapaxuwaya chu liwana klakgapasan». 18 Xla kgalhtilh: «Katlawa litlan, kakimaʼakxilhni mililanka». 19 Xla wanilh: «Naktitaxtu kmilakatin chu naʼakxilha pi lu tlan klikatsi, chu naklitachuwinanan kintukuwani, Jehová. Chu tlan naklikatsini tiku tlan naklikatsiniputun, chu naklimasiyani talakgalhaman tiku naklimasiyaniputun talakgalhaman». 20 Chu wanipa: «Nila kintilakaʼakxilhti, xlakata lataman tiku nakiʼakxilha, nani».

21 Nachuna, Jehová wanilh: «Unu lakatsu niku kwi, wi akgtum chiwix, kataya kxkgalhni 22 chu akxni titaxtuma nawan kililanka, nakmatsekgan niku taskganit chiwix chu naklimatsekgan kimakan asta akxni akit ktitaxtunit nawan. 23 Alistalh nakmapanu kimakan chu naʼakxilha kiʼakglhchan. Pero nila kintilakaʼakxilhti».

34 Alistalh Jehová wanilh Moisés: «Katlawa maktiy xalakgxtakgala chiwix chuna la xtasiyakgo xapulana. Naktsokgwili anta tuku xtatsokgtawilanit kxapulana xalakgxtakgala chiwix, nema wix laktsu laktsu katlawa. 2 Katakaxti xlakata chali tsisa natawakaya ksipi Sinaí chu natayaya kkilakatin kxʼakgspun* sipi. 3 Niti natatawakayan chu niti nalatapuli kxlilakgatum sipi. Nipara borregos chu wakax tlan napuchwayankgo kxlakatin».

4 Wa xlakata Moisés tlawalh maktiy xalakgxtakgala chiwix chuna la xtasiyakgo xapulana. Lichali lu tsisa takilh chu tawakalh ksipi Sinaí, chuna la xlimapakgsinit Jehová. Xchipatilha maktiy xalakgxtakgala chiwix. 5 Alistalh Jehová taktalh kpuklhni chu anta tamakgxtakgli lakatsu niku xya Moisés, chu Jehová lichuwinalh xtukuwani.* 6 Jehová titaxtulh kxlakatin chu wa: «Jehová, Jehová, chatum Dios xalakgalhamana chu tlan likatsi, xakgalhkgalhina* chu litsama tapaxkit nema ni makgxtakgnan chu putum tuku wan xlikana,* 7 tiku kalimasiyani tapaxkit nema ni makgxtakgnan lhuwa mil latamanin, tiku tapatinan talakgalhin, akxni tlawakan tuku nitlan chu akxni ni kgalhakgaxmatnankan, pero ankgalhin malakgaxokge tiku nitlan likatsi. Chu tlawa pi tuku nitlan tlawakgo natlatni nalipatinankgo xkamanankan, xnatanatnikan chu kxunatanatkan».

8 Moisés tunkun tatsokgostalh chu takilhputalh asta kkatiyatni. 9 Chu wa: «Jehová, komo kmakgapaxuwayan,* kakinkatapi. Jehová, katlawa litlan, kakinkatapi maski akinin akgtum kachikin nema lu xatsakat, kakinkatapati tuku nitlan ktlawayaw chu kintalakgalhinkan chu kinkamakgamakglhtinanti». 10 Xla kgalhtinalh: «Nakkatatlawayan akgtum talakkaxlan: naktlawa tuku kaks malakawaninan kxlakatin kachikin, tuku nikxni tatlawanit* kxlikalanka katiyatni o kxlakgstipankan kachikinin, chu putum kachikinin nema nakalakgstipalatapayatit naʼakxilhkgo tuku natlawa Jehová, xlakata naktlawa mimpalakatakan tuku kaks malakawaninan.

11 »Kuenta katlawa putum limapakgsin nema nakmaxkiyan la uku. Kmilakatin nakkamaxtu amorreos, cananeos, hititas, perizitas, heveos chu jebuseos. 12 Kuenta natlawaya xlakata ni nakatatlawaya akgtum talakkaxlan tiku lamakgo ktiyat niku pimpat, nixawa uma nalitaxtu akgtum liʼakgsiyat mimpalakata. 13 Wata wixin, namakgpuspitatit xpumakamastankan, nakalakgpakglhatit xasanto xtalayawkan* xachiwix chu nakakayatit xasanto xtalayawkan xakiwi. 14 Ni nalakgtakilhputaya atanu dios, xlakata akit, Jehová, kililakgapaskan chuna la chatum Dios tiku skin pi kajwatiya akit nakinkakninanikan. Chuna, chatum Dios tiku skin pi kajwatiya akit nakinkakninanikan. 15 Kuenta natlawayatit xlakata ni nakatatlawayatit talakkaxlan tiku lamakgolh kʼuma tiyat, xlakata akxni xlakan nakimakgxtakgkgo xlakata nakakninanikgo* xdioseskan chu natlawanikgo tamakamastan, wi tiku nakawaniyan pi kawatit tamakamastan chu wixin nawayatit. 16 Chu alistalh milakgkgawasankan nakatamamakgaxtokgatit xlaktsumankan tiku lamakgo kʼuma tiyat, chu xlakpuskatinkan nakakninanikgo* xdioseskan chu natlawakgo pi milakgkgawasankan na nakimakgxtakgkgo akxni nakakninanikgo xdioseskan xlakpuskatinkan.

17 »Ni nalitlawaya dioses likan nema mastalankikanit.

18 »Natlawaya Fiesta xla Kaxtalanchu nema ni kgalhi Limaxkutin. Nawaya kaxtalanchu nema ni kgalhi limaxkutin chuna la klimapakgsinitan. Akgtujun kilhtamaku chuna natlawaya, kilhtamaku nema klakkaxwilinit, papaʼ xla abib,* xlakata papaʼ xla abib taxtupi kʼEgipto.

19 »Putum xanapuxkun lakgkgawasan kintapakgsini. Nachuna xalakgkgawasan animales nema pulana lakachinkgonit, chuna la toro chu borrego, akit kintapakgsinikgo. 20 Pero xapulana burro nema nalakachin nalixokgoya tantum borrego xlakata nalakgmaxtuya. Pero komo ni naxokgoya, milipixtukxat. Nachuna, milixokgot tuku nakalilakgmaxtuya putum xanapuxkun milakgkgawasan. Niti nakilakgmin komo nitu nalimin.

21 »Akgchaxan kilhtamaku naskuja, pero xliʼakgtujun kilhtamaku najaxa,* nachuna natlawaya akxni nalakgwaxkan tiyat chu akxni namakikan tachanan.

22 »Na natlawaya Fiesta xla Tamakgalan* niku namakamastaya xapulana xtawakat trigo, chu Fiesta akxni Makikan Tachanan* ksputat kata.

23 »Putum lakchixkuwin makgtutu akgatunu kata naminkgo kxlakatin xaxlikana Malana, Jehová, xDios Israel. 24 Nakkatamakxtu kmilakatin kachikinin chu nakmatilanki tiyat nema tapakgsiniyan. Niti katiʼakgchipaputulh mintiyat akxni napina kakninaniya Jehová miDios makgtutu akgtum kata.

25 »Akxni nakimakamaxkiya xkgalhni mintamakamastan, ni nakintamakamaxkiya tuku kgalhi limaxkutin. Tuku namakamastaya kfiesta xla Pascua ni namakiya asta lichali.

26 »Nalitana kxchik Jehová miDios tuku tlakg xatlan chu tuku pulana namakgalaya.

»Ni namakchaya aktsu cabra kxleche xtse».

27 Chu Jehová chuntiya wanilh Moisés: «Katsokgwili umakgolh tachuwin xlakata wix chu Israel kkatatlawaman akgtum talakkaxlan chuna la wan umakgolh tachuwin». 28 Chu Moisés tatamakgxtakgli Jehová anta, tipuxam kilhtamaku chu tipuxam tsisni. Ni wayalh chu ni kgotnalh. Chu xla* tsokgwililh kxalakgxtakgala chiwix tachuwin xla talakkaxlan, uma wamputun, Akgkaw Limapakgsin.*

29 Alistalh, Moisés tataktalh maktiy xalakgxtakgala chiwix xla Talakkaxlan ksipi kSinaí. Xlakata xtachuwinanit Dios, xlakan xlakgskgoma, pero xla ni xkatsi. 30 Akxni Aarón chu putum israelitas akxilhkgolh pi xlakan Moisés lu xlakgskgoma, pekuankgolh chu ni xlakgtalakatsuwiputunkgo.

31 Pero Moisés katasanilh, wa xlakata Aarón chu putum napuxkun xalak kachikin talakatsuwikgolh. Chu xla katachuwinalh. 32 Alistalh na lakgtalakatsuwikgolh putum israelitas, chu xla kalitachuwinalh putum limapakgsin nema Jehová xmaxkinit ksipi Sinaí. 33 Akxni Moisés xkatachuwinankgo, xlitalakgatlapa maktum lhakgat. 34 Pero akxni xʼan kxlakatin Jehová xlakata natachuwinan, ni xtalakgatlapa asta akxni xtaxtu. Akxni xtaxtu, xkalitachuwinan israelitas limapakgsin nema xmaxkikanit. 35 Chu israelitas xʼakxilhkgo pi xlakan Moisés lu xlakgskgo. Alistalh, akxni Moisés xlapula kkachikin xlitalakgatlapapara lhakgat, chu chuna xtamakgxtakga asta akxni xʼan tachuwinan Dios.

35 Alistalh, Moisés kamamakxtumilh putum kachikin Israel chu wa: «Wa uma tuku Jehová limapakgsinanit natlawayatit: 2 tlan naskujatit akgchaxan kilhtamaku, pero xliʼakgtujun kilhtamaku xasanto nalitaxtu mimpalakatakan; uma sábado milijaxatkan, namaklakaskinatit xlakata nakakninaniyatit Jehová. Komo wi tiku naskuja sábado, xlinit. 3 Ni namapasiyatit lhkuyat kminchikkan sábado».

4 Alistalh Moisés wanilh putum kachikin Israel: «Wa uma tuku Jehová limapakgsinanit: 5 “Kamamakxtupitit tuku namakamaxkiyatit Jehová. Putum tiku xatapaxuwan wi tuku mastaputun, kamastokgli chu kaliminilh Jehová oro, plata, cobre, 6 xaspupuku hilo, lana nema xamantajwa* manikanit, lu xaspinini hilo, xatlan lino, xmakchixit cabra, 7 xmakgxuwa borrego nema xaspinini manikanit, xmakgxuwa foca, xakiwi acacia, 8 aceite nema mujunikan makgskgot, bálsamo* xlakata nalitlawakan aceite nema lilaksaknankan chu xlakata nalitlawakan xamuksun incienso, 9 nachuna chiwix xla ónice chu amakgapitsi chiwix nema namawakanikan efod chu kuxmutawaka.

10 »”Kaminkgolh putum tiku katsinikgo liskujkgo xmakankan* nema wilakgo kmilakgstipankan chu katlawakgolh putum tuku Jehová limapakgsinanit: 11 tabernáculo chu putum tuku nalitakgatsi* chu tuku nalitaʼakgtlapa, xganchos chu xalaklhman xʼarmazones,* xalaklhman xkiwi, xtalayaw chu tuku nalaktayakgo;* 12 Arca, xalaklhman xkiwi chu xkgalhtawilh, chu cortina nema waka kxlakatin; 13 mesa, xalaklhman xkiwi, putum tuku namaklakaskinkan anta chu kaxtalanchu nema nakimakamaxkikgo; 14 candelabro nema namakaxkgakgenan chu tuku namaklakaskinkan anta, xmakgskgot chu aceite xlakata nalimapasikan makgskgot; 15 pumakamastan niku nalhkuyukan incienso chu xalaklhman xkiwi; aceite nema nalilaksaknankan chu xamuksun incienso; cortina nema natawaka niku nalaktanukan ktabernáculo; 16 pumakamastan niku nalhkuyukan tamakamastan, xpuskuyun xacobre, xalaklhman xkiwi chu putum tuku namaklakaskinkan anta; niku namakgachakgankan chu tuku nalaktawila; 17 cortinas nema natawakakgo kkilhtin, xtalayaw chu tuku nalaktayakgo; cortina nema natawaka niku nalaktanukanacha kkilhtin; 18 laklanka clavo niku nakichiyawakan tabernáculo, laklanka clavo niku nakichiyawakan lipakan chu xtasiw, 19 na kastawakgolh xlakaskinka lhakgat nema namaklakaskinkan ktabernáculo, xasanto lhakgat nema namaklakaskin sacerdote Aarón chu lhakgat nema namaklakaskinkgo xlakgkgawasan xlakata kisacerdotes nalitaxtukgo”».

20 Wa xlakata putum israelitas tapanukgolh niku xtachuwinamakgo Moisés. 21 Alistalh putum tiku xatapaxuwan xmakgtayanamputunkgo* tsukukgolh linkgo tuku namakamaxkikgo Jehová. Xʼamaka maklakaskinkan xlakata natlawakan tabernáculo, chu putum tuku xʼama tamaklakaskin anta xlakata xkakninanika Dios chu xlakata xkalitlawaka xasanto lhakgat. 22 Lakchixkuwin chu lakpuskatin chuntiya xlimakgo broches,* taʼakganu, anillos chu amakgapitsi litakaxtay, chu putum tuku xlitatlawanit oro. Putum tuku makamaxkikgolh* Jehová xaʼoro xwanit. 23 Na linkgolh putum tiku xkgalhikgo xaspupuku hilo, lana nema xamantajwa xmanikanit, lu xaspinini hilo, xatlan lino, xmakchixit cabra, kxuwa borrego nema xaspinini xmanikanit chu kxuwa foca. 24 Putum tiku xatapaxuwan xmakamastaputunkgo plata chu cobre makamaxkikgolh Jehová, putum tiku xkgalhikgo kiwi xla acacia na linkgolh.

25 Putum lakpuskatin tiku xkatsinikgo tlawakgo hilo, linkgolh tuku xtlawakgonit: xaspupuku hilo, lana nema xamantajwa xmanikanit, lu xaspinini hilo chu xatlan lino. 26 Chu putum lakpuskatin tiku xatapaxuwan xmakgtayanamputunkgo, tlawakgolh hilo, litlawakgolh xmakchixit cabra.

27 Nachuna, napuxkun xalak kachikin linkgolh chiwix xla ónice chu amakgapitsi chiwix nema xmawakanika efod chu kuxmutawaka. 28 Na linkgolh aceite xlakata xlimapasika makgskgot chu bálsamo* xlakata xlitlawaka aceite nema lilaksaknankan chu xlakata xlitlawaka xamuksun incienso. 29 Putum lakchixkuwin chu lakpuskatin tiku xatapaxuwan xmakgtayanamputunkgo, wi tuku linkgolh xlakata xlimakgtayanankgolh ktaskujut nema Jehová limapakgsilh Moisés pi xtlawaka. Putum tuku israelitas linkgolh xatapaxuwan makamaxkikgolh Jehová.

30 Wa xlakata Moisés kawanilh israelitas: «Kaʼakxilhtit, Jehová laksaknit Bezalel, xkgawasa Urí, xkgawasa Hur, xalak xtribu Judá. 31 Dios maxkinit xʼespíritu xlakata nakgalhi liskgalala, taʼakgatekgsni chu xlakata nakatsini tlawa tipalhuwa taskujut 32 chu chuna tlan nalakkaxwili la natlawa taskujut chu lu tlan nakatlawa, naliskuja oro, plata chu cobre, 33 nakalakchuku chu nakakaxwili lakglilakgatit chiwix, chu nakaxwaka kiwi xlakata tipalhuwa taskujut nalitlawa. 34 Chu kamaxkinit liskgalala Bezalel chu Oholiab xkgawasa Ahisamac, xalak xtribu Dan, xlakata tlan nakamasiyanikgo amakgapitsin. 35 Kamaxkinit liskgalala* xlakata tlan natlawakgo tipalhuwa taskujut, nalaklhkawilikgo tuku natlawakan, tlan nalitsapanankgo chu nalistawanankgo xaspupuku hilo, lana nema xamantajwa manikanit, lu xaspinini hilo chu xatlan lino. Umakgolh lakchixkuwin natlawakgo tipalhuwa taskujut chu nalaklhkawilikgo chuna la xlitatlawat.

36 «Bezalel nataskuja Oholiab chu putum lakchixkuwin tiku lu katsinikgo liskujkgo xmakankan,* tiku Jehová kamaxkinit liskgalala chu taʼakgatekgsni xlakata tlan natlawakgo putum tuku natalakaskin ktabernáculo, chuna la Jehová limapakgsinanit».

2 Wa xlakata Moisés tasanilh Bezalel, Oholiab chu putum lakchixkuwin tiku Jehová xkamaxkinit liskgalala, putum tiku xatapaxuwan talaknukgolh xlakata natlawakgo taskujut. 3 Chu Moisés kamaxkilh putum tuku israelitas xmakamastakgonit nema xʼama tamaklakaskin ktabernáculo. Pero israelitas chuntiya xlinkgo tamakamastan chali chali tsisa.

4 Akxni xtsukukanita katlawakan tuku xʼama tamaklakaskin ktabernáculo, putum skujnin tiku lu xkatsinikgo liskujkgo xmakankan chatunu chatunu xlakgankgo 5 Moisés chu xwanikgo: «Latamanin tlakg lhuwa tuku limimakgo nixawa tuku natamaklakaskin ktaskujut nema Jehová limapakgsinanit natatlawa». 6 Wa xlakata Moisés limapakgsinalh pi kxlilakgatum kachikin xmastaka uma tamakatsin: «Lakchixkuwin chu lakpuskatin, nialh kalitantit tuku natamaklakaskin ktabernáculo». Chuna kamalakgachokgoka latamanin xlakata nialhtu xlinkgolh. 7 Lhuwa xwanit liskujni, tlakg lhuwa xwanit nixawa tuku xʼamaka maklakaskinkan ktaskujut.

8 Chu putum tiku lu xkatsinikgo liskujkgo xmakankan litlawakgolh tabernáculo makkaw lhakgat: litlawakgolh xatlan lino, xaspupuku hilo, lana nema xamantajwa* xmanikanit chu lu xaspinini hilo. Chu xla* katsapawakanilh querubines. 9 Makatunu lhakgat xkgalhi akgkutiy metro aitat* xlilhman chu akgtiy metro xlitilanka. Putum lhakgat watiya xlilhman chu xlitilanka xkgalhikgo. 10 Wa xlakata katsapatistokgli makkitsis lhakgat chu atanu makgkitsis lhakgat na katsapatistokgli. 11 Alistalh xapulana lhakgat nema katsapatistokgli litlawanilh xaspupuku hilo xkilhpan niku xʼama tatalakgnu xlimaktiy lhakgat nema na katsapatistokgli. Nachuna tlawalh kxkilhpan xlimaktiy lhakgat nema na katsapatistokgli niku xʼama tatalakgnu xapulana lhakgat nema katsapatistokgli. 12 Kxkilhpan maktum lhakgat nema katsapatistokgli tlawanilh tipuxamakaw niku xʼama takgalhnu chu kxkilhpan atanu lhakgat nema na katsapatistokgli na tlawanilh tipuxamakaw niku xʼama takgalhnu, xlakata umakgolh maktiy lhakgat xtalakgnukgolh. 13 Alistalh tlawalh tipuxamakaw ganchos xʼoro chu uma kalimalakgnulh maktiy lhakgat nema xkatsapatistokgkanit, chuna uma lhakgat nema litaʼakgtlapalh tabernáculo kaj maktum wa.

14 Nachuna, maklakaskilh xmakchixit cabra xlakata xkatlawalh lhakgat nema limakgtlapakan tabernáculo. Tlawalh makkawitu lhakgat. 15 Makatunu lhakgat xkgalhi tsinu liwaka akgkututu metro xlilhman chu akgtiy metro xlitilanka. Makkawitu lhakgat watiya xlilhman chu xlitilanka xkgalhikgo. 16 Wa xlakata kalakgtsapatistokgli makkitsis lhakgat chu atanu kalakgtsapatistokgli makchaxan lhakgat. 17 Alistalh kxkilhpan xapulana lhakgat nema kalakgtsapatistokgli tlawanilh tipuxamakaw niku xʼama takgalhnu xlimaktiy lhakgat. Nachuna, xkilhpan xlimaktiy lhakgat tlawanilh tipuxamakaw niku xʼama tatakgalhnu xapulana lhakgat. 18 Tlawalh tipuxamakaw ganchos xacobre xlakata xkamalakgnulh lhakgat chu chuna umakgolh makgtiy lhakgat kaj maktum wa.

19 Maklakaskilh kxuwa borrego nema xaspinini xmanikanit xlakata xliʼakgtlapalh tabernáculo chu na maklakaskilh kxuwa foca xlakata xkgalhmawakalh.

20 Alistalh tlawanilh tabernáculo laklhman armazones,* kalitlawalh kiwi xla acacia chu kaj xyakgo. 21 Akgatunu armazón xkgalhi akgtati metro aitat xlilhman chu tutumpuxamatujun centimetro xlitilanka. 22 Akgatunu armazón xkgalhi akgtiy xkinkanin niku xtalakgnu. Chuna katlawalh putum xʼarmazón tabernáculo. 23 Wa xlakata tlawalh armazones nema tayakgolh kxlakpan tabernáculo, anta ksur, akgpuxam armazones lakaʼantayakgolh ksur. 24 Na tlawalh tipuxam tuku xʼama laktaya* akgpuxam armazones, xaplata xwanit: kxtampin akgatunu armazón xkgalhi akgtiy tuku xlaktaya xlakata anta xtanukgolh akgtiy xkinkanin armazón. Chu kxtampin amakgapitsi armazones na xkgalhikgo akgatiyun tuku xlaktayakgo xlakata anta xtanukgolh akgtiy xkinkanin armazones. 25 Chu kʼatanu xlakpan tabernáculo, anta knorte, tlawanilh akgpuxam armazones. 26 Na katlawanilh tipuxam tuku xlaktaya, xaplata xwanit: kxtampin akgtum armazón xkgalhi akgtiy tuku xlaktaya, chu kxtampin amakgapitsi armazones na xkgalhikgo akgatiyun tuku xlaktayakgo.

27 Kxchakgen tabernáculo, nema lakaʼaya kʼoeste, tlawanilh akgchaxan armazones. 28 Nachuna, tlawalh akgtiy armazones nema tayakgolh kxchastunin, kxchakgen tabernáculo. 29 Kxʼakpun uma armazón kaj akgtum xkgalhi xchastun, lata kxtantun xtsuku kgantiy chu xlachipa kxʼakpun, anta niku xʼan xapulana anillo. Chuna katlawalh uma akgtiy armazones nema tayakgolh kxchastunin. 30 Wa xlakata xʼanan akgtsayan armazones chu akgkuchaxan tuku xlaktaya, xaplata xwanit: kxtampin akgatunu armazón xkgalhi akgtiy tuku xlaktaya.

31 Na katlawalh laklhman kiwi xla acacia: maklakaskilh kgankitsis xlakata xlimalakgnulh armazones kxlakpan tabernáculo, 32 maklakaskilh kgankitsis xlakata xlimalakgnulh armazones kʼatanu xlakpan tabernáculo chu atanu kgankitsis xlakata xlimalakgnulh armazones kxʼoeste tabernáculo, uma wamputun, kxchakgen. 33 Mawakalh xalhman kiwi kxʼitat armazones, tsukulh kxkilhpan chu kichalh kʼatanu xkilhpan. 34 Armazones kalimaktlawalh oro chu katlawanilh anillos xaʼoro niku xtanukgo xalaklhman kiwi. Chu xalaklhman kiwi na kalichatlawalh oro.

35 Tlawalh maktum cortina, litlawalh xaspupuku hilo, lana nema xamantajwa xmanikanit, lu xaspinini hilo chu xatlan lino. Katsapanilh lhakgat querubines. 36 Chu katlawanilh kgantati talayaw xla acacia nema kalichatlawalh oro. Na tlawalh ganchos xaʼoro chu akgtati tuku xlaktayalh talayaw, plata litlawalh. 37 Alistalh tlawalh maktum cortina nema xtawakalh niku xlaktanukan ktabernáculo, litlawalh xaspupuku hilo, lana nema xamantajwa xmanikanit, lu xaspinini hilo chu xatlan lino. 38 Nachuna, tlawalh kgankitsis talayaw chu xganchos. Kaliʼakputlawalh oro chu nachuna xʼanillos, pero akgkitsis tuku laktayakgolh talayaw, cobre kalitlawalh.

37 Alistalh, Bezalel tlawalh Arca, maklakaskilh xakiwi acacia. Xkgalhi akgtum metro* xlilhman, tutumpuxamatujun centímetro xlitilanka chu tutumpuxamatujun centímetro xlitalhman. 2 Xla limaktlawalh chu lipulaktlawalh xatlan oro, chu tlawanilh xkilhpan xaʼoro. 3 Alistalh mastalankilh oro chu tlawanilh akgtati anillo, xlakata xkawilinilh kxpaʼakxtu xtantunin: akgtiy anillo lakgpatu chu akgtiy anillo alakgpatu. 4 Na katlawalh xalaklhman kiwi xla acacia chu kalichatlawalh oro. 5 Alistalh katamaknulh xalaklhman kiwi kʼanillos nema xwilakgo kxlakpan Arca xlakata tlan xlimalakxijka.

6 Nachuna, tlawanilh xkgalhtawilh xaʼoro. Xkgalhi akgtum metro xlilhman chu tutumpuxamatujun centímetro xlitilanka. 7 Na tlawalh chatiy querubines xaʼoro, martillo kalitlawalh, chatum tayalh kxpakgxwiki chu achatum kxpakgastakat kxʼakpun kgalhtawilh. 8 Chatum querubín tayalh lakatum chu achatum tayalh alakatum. Querubines nema katlawalh, chatum tayalh kxpakgxwiki chu achatum kxpakgastakat kxʼakpun kgalhtawilh. 9 Querubines kstonkgkgonit xpakgankan* chu xlitlapakgonit xkgalhtawilh Arca. Xlakgaxtokgyakgo chu xkgalhakxilhmakgo kgalhtawilh.

10 Alistalh tlawalh mesa, litlawalh kiwi xla acacia. Xkgalhi tatipuxamanajatsa centímetro xlilhman, tipuxamakitsis centímetro xlitilanka chu tutumpuxamatujun centímetro xlitalhman. 11 Na limaktlawalh xatlan oro chu tlawanilh xkilhpan xaʼoro. 12 Xlistilili mawakanilh titsu kiwi nema kgantati laktsu makan* xlitilanka xwanit chu uma kiwi na tlawanilh xkilhpan xaʼoro. 13 Na katlawanilh akgtati anillo xaʼoro chu kawilinilh lakatati kxchastunin anta niku xlakgnukgo xtantun. 14 Anillos xwakakgo lakatsu niku xʼan xatitsu kiwi chu anta xkatamaknukan xalaklhman kiwi xlakata tlan xlimalakxijka mesa. 15 Xlakata tlan xmalakxijka mesa katlawalh xalaklhman kiwi xla acacia chu kalichatlawalh oro. 16 Alistalh maklakaskilh oro xlakata xkatlawalh putum tuku xʼamakgo tawilakgo kxʼakpun mesa: pulatu, copas, xalakpulhman pulatu chu jarras nema xʼamaka kamaklakaskinkan akxni xmakamastaka xachuchutwa tamakamastan.

17 Alistalh tlawalh akgtum candelabro xaʼoro. Litlawalh martillo chu ni xkgalhi niku xtalakgnu. Xkgalhi tuku xlaktaya, xakiwi, xpakganin, xtuwan,* xakululu* chu kxanat. 18 Xkiwi candelabro xkgalhi kganchaxan xpakganin: kgantutu lakatum chu kgantutu alakatum. 19 Lakatum, akgatunu xpakgan xkgalhi akgtutu tuwan xtachuna la kxanat almendro, akgtutu xakululu chu akgtutu xanat nema xlalakgstipatanutilha. Nachuna xwanit alakatum. Kganchaxan xpakganin candelabro nema xtaxtukgo kxakiwi watiya tuku xkgalhikgo. 20 Chu xakiwi candelabro xkgalhi akgtati tuwan nema xtachuna la kxanat almendro, na xkgalhi akgtati xakululu chu akgtati xanat nema xlalakgstipatanutilha. 21 Xkgalhi akgtum xakululu kxtampin niku xtsukukgo xapulana xpakganin, na xaʼanan atanu xakululu kxtampin niku xtsukukgo xlikgantiy xpakganin chu atanu xakululu kxtampin niku xtsukukgo xlikgantutu xpakganin. Chuna xwanit kganchaxan xpakganin nema xtaxtukgo kxakiwi candelabro. 22 Xakululu, xpakganin chu putum candelabro ni xkgalhi niku xtalakgnu, xaʼoro xwanit chu xlitlawakanit martillo. 23 Alistalh, na tlawanilh akgtujun xlimakgskgon, xpinzas chu niku xtajukgo xjalanat, putum umakgolh xaʼoro xwankgonit. 24 Maklakaskilh puxamakutati kilo* xla oro xlakata xlitlawalh candelabro chu putum tuku xkgalhi.

25 Na tlawalh pumakamastan niku klhkuyukan incienso, litlawalh kiwi xla acacia. Statijwa* xwanit, xkgalhi tipuxamakitsis centímetro xlilhman, tipuxamakitsis centímetro xlitilanka chu tatipuxamanajatsa centímetro xlitalhman. Pumakamastan chu xʼakgalokgot akgtuma xwanit. 26 Na liʼakputlawalh xatlan oro, litlawalh kxlakpanin chu xʼakgalokgot. Chu kxlistilili tlawanilh xkilhpan xaʼoro. 27 Kxpakgalhu xkilhpanin kawilinilh anillos xaʼoro klakatati xchastunin xlakata anta xkamanuka xalaklhman kiwi nema xlimalakxijka. 28 Alistalh katlawalh xalaklhman kiwi xla acacia chu kalichatlawalh oro. 29 Na tlawalh xasanto aceite nema xlilaksaknankan chu xamuksun incienso. Liwana xkalakgkaxtlawakanit.*

38 Nachuna, tlawalh niku klhkuyukan tamakamastan, litlawalh kiwi xla acacia. Statijwa* xwanit, xkgalhi tsinu liwaka akgtiy metro* xlilhman, tsinu liwaka akgtiy metro xlitilanka, chu xlitalhman tsinu liwaka akgtum metro. 2 Tlawanilh akgalokgot lakatati kxchastunin. Pumakamastan chu xʼakgalokgot akgtuma xwanit. Alistalh pumakamastan limaktlawalh cobre. 3 Na katlawalh putum tuku xʼama tamaklakaskin kpumakamastan: cubeta xlakata ksakka lhkaka, pala, xalakpulhman pulatu, laklanka tenedor chu niku xtajukgo jalanat. Putum umakgolh xacobre xwankgonit. 4 Na tlawanilh pumakamastan akgtum puskuyun xacobre, xtachuna la tsalh xwanit, tamaknulh uma puskuyun kxlakʼitat pumakamastan, kxpakgalhu xkilhpan. 5 Mastalankilh likan xlakata nakatlawa akgtati anillos chu kawilinilh klakatati xchastunin lakatsu niku xwaka puskuyun xacobre xlakata anta xkatamaknulh xalaklhman kiwi. 6 Na katlawalh xalaklhman kiwi chu kalichatlawalh cobre. 7 Alistalh katamaknulh xalaklhman kiwi kʼanillos nema xwilakgo kxlakpanin pumakamastan xlakata tlan xlimalakxijka. Pumakamastan pulakglhokgokgo xwanit xtachuna la akgtum caja chu xlitlawakanit tablones.

8 Na tlawalh niku xmakgachakgankan chu xlaktawilh, cobre kalitlawalh. Maklakaskilh espejos xacobre nema xliminkgonit lakpuskatin tiku kskujkgo lakatsu niku xlaktanukan ktabernáculo.

9 Nachuna tlawanilh xkilhtin. Xkilhtin nema xwi ksur tlawanilh cortinas, litlawalh xatlan lino chu xkgalhi tipuxamatati metro aitat xlilhman. 10 Xkgalhi kgampuxam talayaw chu akgpuxam tuku xlaktaya* nema xacobre xwankgonit. Xganchos talayaw chu xʼanillos xaplata xwankgonit. 11 Kxnorte na xkgalhi cortinas chu tipuxamatati metro aitat xlilhman xwanit. Kgampuxan xtalayaw chu akgpuxam tuku xlaktaya xacobre xwankgonit. Xganchos talayaw chu xʼanillos xaplata xwankgonit. 12 Pero kʼoeste, xkgalhi cortinas nema puxamatiy metro xlilhman xwanit. Xkgalhi kgankaw talayaw chu akgkaw tuku xlaktayakgo. Xganchos talayaw chu xʼanillos xaplata xwankgonit. 13 Chu kxʼeste, anta niku taxtu chichini, xkgalhi puxamatiy metro xlitilanka. 14 Kxpakgastakat niku xlaktanukan, xcortinas xkgalhi tsinu liwaka akgchaxan metro aitat, xkgalhi kgantutu talayaw chu akgtutu tuku xlaktayakgo. 15 Chu kxpakgxwiki, cortinas na xkgalhi tsinu liwaka akgchaxan metro aitat, na xkgalhi kgantutu talayaw chu akgtutu tuku xlaktayakgo. 16 Putum cortinas nema xlistilikanit kilhtin, xlitlawakanit xatlan lino. 17 Tuku xlaktayakgo talayaw xacobre xwanit chu xkaliʼakputlawakanit plata; xganchos chu xʼanillos xaplata xwankgonit. Putum talayaw nema xyakgo kkilhtin xkgalhikgo anillo xaplata.

18 Cortina nema xwaka niku laktanukan xlitatlawanit xaspupuku hilo, lana nema xamantajwa* xmanikanit, lu xaspinini hilo chu xatlan lino. Xkgalhi akgnajatsa metro xlilhman chu tsinu liwaka akgtiy metro xlitalhman. Watiya xlitalhman xkgalhi chuna la cortinas xalak kilhtin. 19 Kgantati xtalayaw chu akgtati tuku xlaktayakgo xacobre xwankgonit chu xkaliʼakputlawakanit plata. Xganchos chu xʼanillos xaplata xwankgonit. 20 Laklanka xclavo tabernáculo chu laklanka xclavo kilhtin xacobre xwankgonit.

21 Uma akgtum lista nema masiya tuku tamaklakaskilh xlakata xtlawaka tabernáculo, tabernáculo niku xwi arca xla talakkaxlan. Moisés matlawinalh uma lista chu levitas makgantaxtikgolh uma taskujut, tiku kapulalilh wa Itamar, xkgawasa sacerdote Aarón. 22 Bezalel, xtlat xwanikan Urí, xkgawasa Hur, xalak xtribu Judá, tlawalh putum tuku Jehová xlimapakgsinit Moisés. 23 Makgtayalh Oholiab xkgawasa Ahisamac, xalak xtribu Dan. Xla xtlawa tipalhuwa taskujut, xlitsapanan chu xlistawanan xaspupuku hilo, lana nema xamantajwa xmanikanit, lu xaspinini hilo chu xatlan lino.

24 Oro nema maklakaskinka xlakata xtlawaka tabernáculo wa oro nema makamastaka chuna la xatalakchikini* tamakamastan, uma xtsinkan akgtum mil kilo,* chuna la xpulhkanankan niku xasanto. 25 Xlilhuwa plata nema linkgolh lakchixkuwin tiku xkalhkawilikanit, wa uma: 3,440 kilos,* chuna la xpulhkanankan niku xasanto. 26 Chatunu lakchixkuwin tiku xkalhkawilikanit chu xkgalhikgo akgpuxam kata o liwaka, linkgolh akgchaxan gramo plata, chuna la xpulhkanankan niku xasanto. Xliputum lakchixkuwin 603,550 xwankgonit.

27 Mastalankika 3,420 kilos xla plata xlakata xlitlawaka xlaktay tabernáculo chu xlaktay cortina* nema xmapitsi; maklakaskinka 3,420 kilos xlakata xtlawaka akgtum ciento xlaktay, uma wamputun, pi akgatunu xlaktay litlawaka puxamakutati kilo chu akgtiy gramo. 28 Chu maklakaskilh akgpuxam kilo xla plata xlakata xkalitlawalh xkganchos talayaw, kaliʼakputlawalh talayaw chu kamalakgnulh.

29 Cobre nema makamastaka* xtsinkan 2,420 kilos.* 30 Putum uma litlawalh xlaktay niku xlaktanukan ktabernáculo, pumakamastan xacobre, xpuskuyun xacobre chu putum tuku xtamaklakaskilh kpumakamastan, 31 xlaktay nema xwilakgo xlistilili kilhtin chu xlaktay nema xwilakgo niku xlaktanukan kkilhtin, xalaklhman xclavo tabernáculo chu xalaklhman clavo nema xwilakgo kxlistilili kilhtin.

39 Maklakaskinkgolh xaspupuku hilo, lana nema xamantajwa* xmanikanit chu lu xaspinini hilo xlakata kstawakgolh xlakaskinka lhakgat, nema xmaklakaskinka ktabernáculo. Na tlawakgolh xasanto lhakgat nema xmaklakaskin Aarón, chuna la Jehová xlimapakgsinit Moisés.

2 Bezalel litlawalh efod xaspupuku hilo, lana nema xamantajwa xmanikanit, lu xaspinini hilo chu xatlan lino. Chu na litsapalh xaʼoro hilo. 3 Martillo lakstakaka litlawakgolh oro. Alistalh Bezalel laktitsu kalakchukulh xlakata xkalakgstipamanulh xaspupuku hilo, lana nema xamantajwa xmanikanit, lu xaspinini hilo chu xatlan lino, chuna tlawaka efod. 4 Efod litlawakgolh maktiy lhakgat. Xalak xlakatin chu xalak xchakgen xtalakgnukgo kxpakgxtun.* 5 Xatastaw litatampulakgchin nema xtatsapakanit efod xlakata ni xtaktalh, na watiya tuku litlawaka: oro, xaspupuku hilo, lana nema xamantajwa xmanikanit, lu xaspinini hilo chu xatlan lino, chuna la Jehová xlimapakgsinit Moisés.

6 Alistalh wilikgolh chiwix xla ónice kxlaktawilh xaʼoro chu kʼumakgolh chiwix lhkawilikgolh xtukuwanikan xlakgkgawasan Israel xtachuna la xwilikgolh akgtum sello. 7 Chu Bezalel kawililh umakgolh chiwix kxpakgxtun efod xlakata israelitas xkalakapastakka, chuna la Jehová xlimapakgsinit Moisés. 8 Alistalh tlawalh kuxmutawaka. Na watiya litlawaka tuku litlawaka efod: oro, xaspupuku hilo, lana nema xamantajwa xmanikanit, lu xaspinini hilo chu xatlan lino. 9 Akxni xmakpustukkan kuxmutawaka chastutati xwan chu xkgalhi akgtum cuarta* xlilhman chu akgtum cuarta xlitilanka. 10 Mawakanikgolh akgstitati* chiwix. Xliʼakgstitum* mawakanika rubí, topacio chu esmeralda. 11 Xliʼakgstitiy* mawakanika turquesa, zafiro chu jaspe. 12 Xliʼakgstitutu* mawakanika léshem,* ágata chu amatista. 13 Chu xliʼakgstitati* mawakanika crisólito, ónice chu jade. Putum chiwix xkgalhikgo tuku xlaktawilakgo chu xaʼoro xwanit. 14 Chiwix xkgalhikgo xtukuwanikan kgalhkutiy xlakgkgawasan Israel. Akgatunu tukuwani xkilhchani akgtum tribu chu klhkawilikanit chuna la akgtum sello.

15 Alistalh kuxmutawaka tlawanika xatakgonkxni cadena. Xtasiya chuna la tasiw nema xaʼoro xwanit. 16 Na katlawanika chiwix akgtiy xlaktawilh xaʼoro chu akgtiy anillo xaʼoro. Chu uma akgtiy anillo kamawakaka klakatiy xchastunin* kuxmutawaka. 17 Alistalh katamaknuka kgantiy tasiw xaʼoro kʼanillos nema xwilakgo kxchastunin kuxmutawaka. 18 Chu kganatunu tasiw kamakgankganuka kʼakgatunu xlaktawilh chiwix chu kamawakaka klakatiy xlakatin xpakgxtunin efod. 19 Na tlawanikgolh akgtiy anillo xaʼoro chu kamawakanikgolh klakatiy xchastunin, kxtampin kuxmutawaka, kgalhtawakalh efod. 20 Nachuna, tlawakgolh akgtiy anillo xaʼoro kxlakatin efod, tlakg pakgalhu wilinikgolh chuna la xwilakgo akgtiy xpakgxtunin, lakatsu niku efod xtatatsapanit litatampulakgchin, xpaʼakxtu xatastaw litatampulakgchin. 21 Alistalh, maklakaskinka xaspupuku tasiw xlakata anillos nema xwilakgo kxtampin kuxmutawaka xkichika kʼanillos nema xwilakgo kxtapan efod. Chuna kuxmutawaka ni xtalakxija kxkgalhni efod, chu tamakgxtakgli kxpaʼakxtu xatastaw litatampulakgchin, chuna la Jehová xlimapakgsinit Moisés.

22 Bezalel na tlawalh xapakgaxtuluwa lhakgat nema xlin efod chu litlawalh xaspupuku hilo, tlawalh chuna la xtlawalh chatum stawana.* 23 Xapakgaxtuluwa lhakgat xtakuxmulakkinit kxpixni, xtachuna la xpixni litakuxmumakgtay. Xtakilhpatsapanit xlistilili xpixni xlakata ni xtaxtitli. 24 Kxkilhpan xapakgaxtuluwa lhakgat tlawanikgolh granadas, litlawakgolh xaspupuku hilo, lana nema xamantajwa xmanikanit chu lu xaspinini hilo. 25 Nachuna, tlawakgolh laktsu campana xaʼoro chu xlistilili xkilhpan xapakgaxtuluwa lhakgat lakgstipamanukgolh granada: akgtum aktsu campana xlakgstipatanu akgtum granada. 26 Kamawakanitilhakgolh akgtum aktsu campana, akgtum granada, akgtum aktsu campana, akgtum granada... Chu chuna tlawakgolh kxlistilili xkilhpan xapakgaxtuluwa lhakgat nema xmaklakaskin sacerdote, chuna la Jehová xlimapakgsinit Moisés.

27 Na katlawanikgolh Aarón chu xlakgkgawasan xatastaw lhakgat, litlawakgolh xatlan lino, 28 nachuna tlawakgolh xlakaskinka litakgchin xlakata xmaklakaskilh Aarón chu xlakgkgawasan, xtatanukan 29 chu xlitatampulakgchin xlakaskinka lhakgat* nema xlitatlawanit xatlan lino, xaspupuku hilo, lana nema xamantajwa xmanikanit chu lu xaspinini hilo, chuna la Jehová xlimapakgsinit Moisés.

30 Na tlawakgolh akgtum placa xaʼoro nema lu xlakgskgo, xasanto placa xaʼoro,* chu chuna la tlawakan akgtum sello, lhkawilikgolh uma: «Taskulunkit wa lakgchan Jehová». 31 Alistalh maklakaskinkgolh xaspupuku tasiw xlakata xkichikgolh placa kxlakaskinka litakgchin, chuna la Jehová xlimapakgsinit Moisés.

32 Chuna tlawakgoka putum tuku xʼama tamaklakaskin ktabernáculo, uma wamputun, chiki niku xtamakxtumikan. Israelitas tlawakgolh putum tuku Jehová xlimapakgsinit Moisés. Tlawakgolh chuna la xla xkawaninit.

33 Alistalh linikgolh tabernáculo Moisés, tuku xlitaʼakgtlapa chu putum tuku xlitakgatsi: xganchos, xʼarmazones,* xalaklhman xkiwi, xtalayaw chu tuku xlaktayakgo;* 34 tuku xliʼakgtlapakan nema xlitlawakanit kxuwa borrego chu xaspinini xmanikanit, kxuwa foca chu cortina nema xtawaka kxlakatin Arca; 35 arca xla talakkaxlan, xalaklhman xkiwi chu xkgalhtawilh; 36 mesa chu putum tuku xtamaklakaskin anta, chu kaxtalanchu nema xmakamaxkikan Dios; 37 candelabro xaʼoro, xmakgskgot nema akgstitum xwaka, chu aceite xlakata xlimapasika makgskgot; 38 pumakamastan xaʼoro, aceite nema xlilaksaknankan, xamuksun incienso chu cortina nema xtawaka niku xlaktanukan ktabernáculo; 39 pumakamastan xacobre chu xpuskuyun, xalaklhman xkiwi chu putum tuku xtamaklakaskin anta, nachuna niku xmakgachakgankan chu tuku xlaktawila; 40 cortinas nema xtawakakgolh kkilhtin, xtalayaw chu xlaktay, cortina nema xtawakakgolh niku xlaktanukancha kkilhtin, xtasiw, laklanka xclavos chu putum tuku xʼama tamaklakaskin xlakata xtlawaka taskujut ktabernáculo, kchiki niku xtamakxtumikan; 41 xlakaskinka xatastaw lhakgat nema xʼamaka maklakaskinkan ktabernáculo, xasanto lhakgat nema xʼama maklakaskin sacerdote Aarón chu lhakgat nema xʼamakgo maklakaskinkgo xlakgkgawasan xlakata sacerdotes xlitaxtukgolh.

42 Israelitas tlawakgolh taskujut chuna la Jehová xlimapakgsinit Moisés. 43 Akxni Moisés akxilhli putum taskujut nema tlawakgolh, akxilhli pi xtlawakgonit chuna la Jehová xlimapakgsinanit. Chu Moisés kasikulunatlawalh.

40 Wa xlakata Jehová wanilh Moisés: 2 «Xapulana kilhtamaku akxni natsuku xapulana papaʼ namalakgnuya tabernáculo, uma wamputun, chiki niku natamakxtumikan. 3 Anta natamaknuya arca xla talakkaxlan chu namatsekga kxchakgen cortina. 4 Na natamaknuya mesa, nakaxwiliya tuku na’an kxʼakpun, natamaknuya candelabro chu namapasiya xmakgskgot. 5 Alistalh nawiliya pumakamastan xaʼoro niku xasanto, lakatsu niku waka cortina nema wi kxlakatin arca xla talakkaxlan chu namawakaya cortina niku laktanukan ktabernáculo.

6 »Niku nalhkuyukan tamakamastan, nawiliya lakatsu niku nalaktanukan ktabernáculo, uma wamputun, kchiki niku natamakxtumikan. 7 Chu niku namakgachakgankan nawiliya kxlakʼitat tabernáculo chu pumakamastan, chu nalimatsamaya chuchut. 8 Na napakawiliya kilhtin chu namawakaya cortina niku nalaktanukanacha kkilhtin. 9 Alistalh namaklakaskina aceite nema lilaksaknankan xlakata natsakglhmaniya tabernáculo chu putum tuku anan anta. Chu milimaskulunkit tabernáculo chu putum tuku tamaklakaskin anta xlakata xasanto nawan. 10 Na nalitsakglhmaniya aceite niku namakamastakan xalhkun tamakamastan chu putum tuku natamaklakaskin anta. Chu tanu miliwilit pumakamastan xlakata lu xasanto nalitaxtu. 11 Na nalitsakglhmaniya aceite niku namakgachakgankan chu xlaktawilh, chu namaskulunkiya.

12 »Nakamalakatsuwiya Aarón chu xlakgkgawasan lakatsu niku laktanukan ktabernáculo chu nakalimapakgsiya napaxkgo. 13 Namalhakgeniya Aarón xasanto lhakgat, nalaksaka chu tanu nawiliya, chuna kisacerdote nalitaxtu. 14 Alistalh nakamalakatsuwiya xlakgkgawasan chu nakamalhakgeya lhakgat. 15 Nakaʼakmawakaya aceite chuna la akmawaka xtlatkan. Chu uma nalimasiya pi xlakan chu xlakgkgawasankan tiku aku nalakachintilhakgo kisacerdotes nalitaxtukgo lhuwa kilhtamaku».

16 Moisés tlawalh putum tuku Jehová xlimapakgsinit. Tlawalh chuna la xla xwanit.

17 Xapulana kilhtamaku akxni tsukulh xapulana papaʼ, xliʼakgtiy kata malakgnuka tabernáculo. 18 Xlakata xmalakgnulh tabernáculo, Moisés kawililh laktay chu anta kayawalh armazones. Katamaknulh xalaklhman xkiwi niku xliʼanat xwanit chu kayawalh talayaw. 19 Kxʼakpun tabernáculo mawakalh lhakgat nema xlitlawanit xmakchixit cabra chu kgalhmawakalh kxuwa borrego nema xaspinini xmanikanit chu kxuwa foca, chuna la Jehová xlimapakgsinit.

20 Alistalh tiyalh xalakgxtakgala chiwix niku xmin xlimapakgsin Dios chu kamakilh kʼArca. Katamaknunilh Arca xalaklhman kiwi chu na wilinilh xkgalhtawilh. 21 Na tamaknulh Arca ktabernáculo, mawakalh cortina* nema xmapitsi, chu chuna cortina matsekgli arca xla talakkaxlan, chuna la Jehová xlimapakgsinit.

22 Alistalh tamaknulh mesa kchiki niku xtamakxtumikan, kxpakgastakat kxpulakni tabernáculo, niku xasanto, 23 chu kmesa kakaxwililh kaxtalanchu kxlakatin Jehová, chuna la Jehová xlimapakgsinit.

24 Tamaknulh candelabro kchiki niku xtamakxtumikan chu yawalh kxlakatin mesa, kxpakgxwiki* tabernáculo. 25 Na kamapasilh makgskgot kxlakatin Jehová, chuna la Jehová xlimapakgsinit.

26 Alistalh yawalh pumakamastan xaʼoro kchiki niku xtamakxtumikan, kxlakatin cortina nema xmapitsi tabernáculo, 27 xlakata anta klhkuyuka xamuksun incienso, chuna la Jehová xlimapakgsinit.

28 Chu mawakalh cortina niku xlaktanukan ktabernáculo.

29 Na wililh niku xʼamaka makamastakan xalhkun tamakamastan kxlakatin niku xlaktanukan ktabernáculo, uma wamputun, kchiki niku xtamakxtumikan, xlakata xalhkun tamakamastan chu tamakamastan xla talhtsi tlan xmakamastaka anta, chuna la Jehová xlimapakgsinit.

30 Alistalh wililh niku xmakgachakgankan kxlakʼitat tabernáculo chu pumakamastan, chu limatsamalh chuchut xlakata sacerdotes xlimakgachakgankgolh chu xlituchakgankgolh. 31 Chu Moisés, Aarón chu xlakgkgawasan makgachakgankgolh chu tuchakgankgolh anta. 32 Akxni xtanukgo kchiki niku xtamakxtumikan o niku xwi pumakamastan, xmakgachakgankgo chu xtuchakgankgo, chuna la Jehová xlimapakgsinit Moisés.

33 Alistalh pakawililh xlistilili xkilhtin tabernáculo chu pumakamastan chu mawakalh cortina niku xlaktanukanacha kkilhtin.

Chuna Moisés masputulh taskujut. 34 Wa xlakata puklhni tsukulh matsekga chiki niku xtamakxtumikan, chu tabernáculo litatsamalh xlilanka Jehová. 35 Moisés nila xtanu kchiki niku xtamakxtumikan xlakata puklhni anta xtamakgxtakga, chu tabernáculo xlitatsama xlilanka Jehová.

36 Makgatunu akxni puklhni xtachayawa, israelitas xmakikgo xchikkan xaxuwa. Chuna tlawakgolh putum kilhtamaku nema latamakgolh kxakaskakni tiyat. 37 Pero komo puklhni ni xtachayawa, ni xmakikgo xchikkan xaxuwa chu xkgalhkgalhikgo asta akxni puklhni xtachayawalh. 38 Putum kilhtamaku nema israelitas latamakgolh kxakaskakni tiyat, xʼakxilhkgo pi kakuwani xpuklhni Jehová xtawila kxʼakpun tabernáculo chu katsisni xtawila lhkuyat kxʼakpun.