LEVÍTICO

1 Chu Jehová tasanilh Moisés chu tachuwinalh lata ktabernáculo.* Wanilh: 2 «Kakatachuwinanti israelitas* chu kakawani: “Komo wi tiku namakamaxki Jehová tantum animal nema makgastakkanit kchiki, xlimakamaxkit wakax o toro, borrego o cabra.

3 »”Komo wi tiku namakamasta tantum wakax o tantum toro chuna la xalhkun tamakamastan, uma animal ni xatatatla xliwanat. Xatapaxuwan namakamasta kxlakatin Jehová, lakatsu niku laktanukan ktabernáculo. 4 Nawili xmakan kxʼakgxakga animal nema xalhkun namakamastakan, chu Dios namakgamakglhtinan xtamakamastan chu natapati xtalakgalhin.

5 »”Chu xakgawasa toro xlitamakgnit kxlakatin Jehová. Chu xlakgkgawasan Aarón, tiku sacerdotes litaxtukgo, namakamastakgo kgalhni chu nalitsakglhmanikgo xlakpanin pumakamastan, nema wi lakatsu niku laktanukan ktabernáculo. 6 Animal nema namakamastakan naxukan chu laktsu laktsu nalakchukukan. 7 Xlakgkgawasan Aarón, tiku sacerdotes litaxtukgo, xlimapasitkan lhkuyat kpumakamastan chu nakgalhmawakakgo kiwi. 8 Xlakgkgawasan Aarón, tiku sacerdotes litaxtukgo, nawilikgo xatalakchuku tamakamastan, xʼakgxakga chu xmanteca* kxkgalhni kiwi nema lhkuma kpumakamastan. 9 Nakalichakgekan chuchut xpaluwa chu xtantunin, chu sacerdote namajini putum uma kxkgalhni pumakamastan. Uma tamakamastan putuminika nalhkuyukan chu Jehová lu muksun nakgankgawanan.*

10 »”Komo wi tiku namakamasta tantum xakgawasa borrego o xakgawasa cabra chuna la xalhkun tamakamastan, uma animal ni xatatatla xliwanat. 11 Chu xlitamakgnit kxlakatin Jehová, kxnorte pumakamastan. Chu xlakgkgawasan Aarón, tiku sacerdotes litaxtukgo, nalitsakglhmanikgo kgalhni xlakpanin pumakamastan. 12 Laktsu laktsu nalakchukukan, chu sacerdote nawili xatalakchuku, xʼakgxakga chu xmanteca,* kxkgalhni kiwi nema lhkuma kpumakamastan. 13 Nakalichakgekan chuchut xpaluwa chu xtantunin, chu sacerdote putum namakamasta chu namajini kxʼakpun pumakamastan. Uma tamakamastan putuminika nalhkuyukan chu Jehová lu muksun nakgankgawanan.

14 »”Chu komo wi tiku namakamaxki Jehová tantum tsiktsi chuna la xalhkun tamakamastan, xlimastat xalakstakni paloma* o xalakgskgata paloma. 15 Sacerdote namakamasta tantunu tsiktsi kpumakamastan, napixkiklhmakgni chu namajini kxʼakpun pumakamastan. Pero nastajmakgani xkgalhni kxlakpan pumakamastan. 16 Namakpulhu chu namakglhti niku tajuyacha xliwat,* chu namakan kxlakpan pumakamastan, kxʼeste, niku makgankan lhkaka.* 17 Nalakgxwakga lakatsu niku wi xpakganin pero ni akgputiy nawan. Chu sacerdote namajini kxʼakpun pumakamastan, kxkgalhni kiwi nema lhkuma kpumakamastan. Uma tamakamastan putuminika nalhkuyukan chu Jehová lu muksun nakgankgawanan.

2 »”Komo wi tiku namakamaxki Jehová tamakamastan xla talhtsi, xatlan harina xliwanat. Xla nakgalhmawaka aceite chu na nakgalhwili olíbano.* 2 Alistalh nakalini xlakgkgawasan Aarón, tiku sacerdotes litaxtukgo, chu sacerdote nalitiya akgtum xmakgxtampun xatlan harina nema kgalhi aceite chu olíbano, xlakata Dios nalakapastaka putuminika tamakamastan. Uma tamakamastan nalhkuyukan chu Jehová lu muksun nakgankgawanan. 3 Chu tuku naʼakgataxtu wa nakatamakgxtakgni Aarón chu xlakgkgawasan. Uma lu xasanto xlakata anta tiyakan tuku lhkuyunikan Jehová.

4 »”Komo namakamastaya kaxtalanchu nema makchakanit kʼhorno, xlitamaklakaskinat xatlan harina. Roscas xliwanat nema kgalhi aceite chu ni kgalhi limaxkutin o lakstakaka galletas nema kgalhi aceite chu ni kgalhi limaxkutin.

5 »”Komo namakamastaya kaxtalanchu nema kaxtlawakanit k’akgtum sartén, xlitamaklakaskinat xatlan harina nema ni kgalhi limaxkutin chu natalakgtlawakan aceite. 6 Xlitalakgchakgat* chu nakgalhmawakaya aceite. Uma akgtum tamakamastan xla talhtsi.

7 »”Komo namakamastaya kaxtalanchu nema tlawakanit k’akgtum cacerola, xlitamaklakaskinat xatlan harina chu aceite. 8 Nalipiniya Jehová kaxtalanchu nema kalitlawakanit putum umakgolh chu nalipina kxlakatin sacerdote, chu xla nalin kpumakamastan. 9 Chu sacerdote natiya tsinu tamakamastan xla talhtsi, namajini kxʼakpun pumakamastan xlakata Dios nalakapastaka putuminika tamakamastan. Uma tamakamastan nalhkuyukan chu Jehová lu muksun nakgankgawanan. 10 Chu tuku naʼakgataxtu wa nakatamakgxtakgni Aarón chu xlakgkgawasan. Uma lu xasanto xlakata anta tiyakan tuku lhkuyunikan Jehová.

11 »”Ni namakamaxkiyatit Jehová tamakamastan xla talhtsi nema kgalhi limaxkutin, xlakata ni xlitamajinit xaxkuta skitit* nipara ksakgsi cera,* chuna la akgtum tamakamastan nema lhkuyunikan Jehová.

12 »”Tlan namakamaxkiyatit Jehová chuna la xapulana tamakgalan, pero ni xlitamakamastat kpumakamastan chuna la tuku xamuksun takgankgawanan.

13 »”Putum tamakamastan xla talhtsi nema natlawaya milimaskgokget. Ni natlawaya pi mintamakamastan xla talhtsi natsankgani matsat nema limasiya talakkaxlan nema Dios tatlawanitan. Akxni natlawaya akgtum tamakamastan, namakamastaya matsat.

14 »”Chu komo namakamaxkiya Jehová xapulana talhtsi nema namakgalaya, xasasti xliwanat nema chuchukanit, xasasti talhtsi nema xatalakgswakgani. Akgtum tamakamastan xla talhtsi nema xapulana namakgalaya. 15 Nakgalhmawakaya aceite chu nakgalhwiliya olíbano. Akgtum tamakamastan xla talhtsi. 16 Chu sacerdote natiya tsinu tamakamastan chu namajini, uma wamputun, tsinu xatalakgswakgani talhtsi nema kgalhi aceite chu olíbano, chuna Dios nalakapastaka putum tamakamastan. Uma tamakamastan nalhkuyunikan Jehová.

3 »”Komo wi tiku namakamasta tamakamastan xla takaksni, tantum wakax o tantum toro, xlimakamastat kxlakatin Jehová tantum animal nema ni xatatatla. 2 Xla xliwilit xmakan kxʼakgxakga animal nema namakamasta, chu xlitamakgnit lakatsu niku laktanukan ktabernáculo.* Chu xlakgkgawasan Aarón, tiku sacerdotes litaxtukgo, nalitsakglhmanikgo xkgalhni xlakpanin pumakamastan. 3 Xla namakamasta tsinu tamakamastan xla takaksni chuna la tamakamastan nema lhkuyunikan Jehová. Namakamasta manteca nema makwaka chu chawaka xpaluwa, 4 nachuna akgtiy xpastapu chu manteca nema kamakwaka chu wi lakatsu kxtapanin. Akxni namakglhti xpastapu na namaktini xmanteca klhwakaka. 5 Chu xlakgkgawasan Aarón namajinikgo putum uma kxʼakpun pumakamastan, xkgalhni xalhkun tamakamastan nema waka kxʼakpun kiwi nema lhkuma. Uma tamakamastan putuminika nalhkuyukan chu Jehová lu muksun nakgankgawanan.

6 »”Komo wi tiku namakamaxki Jehová tantum borrego o tantum cabra chuna la tamakamastan xla takaksni, animal ni xatatatla xliwanat, chu tlan namakamasta xakgawasa o xatsumat. 7 Komo namakamasta tantum xakgawasa borrego, nalin kxlakatin Jehová. 8 Xla nawili xmakan kxʼakgxakga animal nema namakamasta chu xlitamakgnit kxlakatin tabernáculo. Chu xlakgkgawasan Aarón nalitsakglhmanikgo xkgalhni xlakpanin pumakamastan. 9 Xla namakamasta xmanteca tamakamastan xla takaksni chuna la akgtum tamakamastan nema lhkuyunikan Jehová. Nachukuktini xmanteca kstajan* niku tsuku xtankilhalukut, manteca nema makwaka chu chawaka xpaluwa, 10 nachuna akgtiy xpastapu chu manteca nema kamakwaka chu wi lakatsu kxtapanin. Akxni namakglhti xpastapu na namaktini xmanteca klhwakaka. 11 Chu sacerdote namajini putum uma kxʼakpun pumakamastan chuna la liwat, akgtum tamakamastan nema lhkuyunikan Jehová.

12 »”Komo wi tiku namakamasta tantum cabra, namakamasta kxlakatin Jehová. 13 Xla nawili xmakan kxʼakgxakga animal nema namakamasta, chu xlitamakgnit kxlakatin tabernáculo. Chu xlakgkgawasan Aarón nalitsakglhmanikgo xkgalhni xlakpanin pumakamastan. 14 Tuku namakamasta chuna la akgtum tamakamastan nema lhkuyunikan Jehová, wa manteca nema makwaka chu chawaka xpaluwa, 15 nachuna akgtiy xpastapu chu manteca nema kamakwaka chu wi lakatsu kxtapanin. Akxni namakglhti xpastapu na namaktini xmanteca klhwakaka. 16 Chu sacerdote namajini putum uma kxʼakpun pumakamastan chuna la liwat, uma akgtum tamakamastan nema lhkuyukan chu lu muksun takgankgawanan. Putum manteca wa tapakgsini Jehová.

17 »”Uma akgtum limapakgsin nema lhuwa kilhtamaku namakgapala mimpalakata, xpalakata minkamanan chu tiku aku nalakachintilhakgo* maski kaniwa niku nalatamakgo: nikxni xliwatkan manteca nipara kgalhni”».

4 Chu Jehová wanipa Moisés: 2 «Kakawani israelitas: “Komo wi tiku natlawa akgtum talakgalhin maski nichuna xtlawaputun chu natlawa tuku Jehová wan pi ni xlitatlawat, wa uma tuku natlawakan:

3 »”Komo chatum sacerdote tiku laksakkanit natlawa akgtum talakgalhin chu naliwili kuenta kachikin, namakamaxki Jehová tantum toro nema xaʼaktsujku chuna la akgtum tamakamastan xpalakata talakgalhin nema tlawalh. 4 Chu xla nalin toro kxlakatin Jehová, lakatsu niku laktanukan ktabernáculo, nawili xmakan kxʼakgxakga toro chu namakgni kxlakatin Jehová. 5 Chu sacerdote tiku laksakkanit, nalin tsinu xkgalhni toro kxpulakni tabernáculo. 6 Sacerdote nalitamakgaju xaʼaktsu xmakan kkgalhi chu makgtujun natsakglhmakan kxlakatin Jehová, kxlakatin cortina nema waka niku xasanto. 7 Sacerdote na nalitlawa tsinu kgalhni x’akgalokgot pumakamastan niku lhkuyukan xamuksun incienso, nema wi kxlakatin Jehová anta ktabernáculo. Chu naxtakgamakgan xkgalhni toro nema na’akgataxtu kxtantun niku makamastakan xalhkun tamakamastan, nema wi lakatsu niku laktanukan ktabernáculo.

8 »”Alistalh namakglhti putum xmanteca toro nema makamastakan xpalakata talakgalhin: manteca nema makwaka chu chawaka xpaluwa, 9 nachuna akgtiy xpastapu chu manteca nema kamakwaka chu wi lakatsu kxtapanin. Akxni namakglhti xpastapu na namaktini xmanteca klhwakaka. 10 Na watiya namakglhtikan tuku makglhtikan toro nema mastakan chuna la tamakamastan xla takaksni. Chu sacerdote putum namajini kxʼakpun niku makamastakan xalhkun tamakamastan.

11 »”Pero xmakgxuwa toro, putum xliwa, xʼakgxakga, xtantunin, xpaluwa chu xkgatsasa,* 12 uma wamputun, toro nema akgataxtulh, sacerdote natlawa pi putum uma nalinkan kxkilhtin kachikin, niku* makgankan lhkaka.* Chu putum nalhkuyu kxʼakpun kiwi nema lakgpasama. Xlitalhkuyut niku makgankan lhkaka.

13 »”Nachuna, komo putum kachikin Israel litawila kuenta xlakata tlawalh akgtum talakgalhin maski nichuna xtlawaputun chu xlakan* ni xkatsikgo pi tlawakgolh tuku Jehová wan pi ni xlitatlawat 14 chu alistalh nakatsikan xtalakgalhinkan, xlakan* nalinkgo tantum toro nema xaʼaktsujku chuna la akgtum tamakamastan xpalakata talakgalhin chu nalinkgo kxlakatin tabernáculo. 15 Lakgkgolotsin xalak kachikin nawilikgo xmakankan kxʼakgxakga toro kxlakatin Jehová chu namakgnikan toro kxlakatin Jehová.

16 »”Chu sacerdote tiku laksakkanit, nalin tsinu xkgalhni toro kxpulakni tabernáculo. 17 Sacerdote naʼakmawaka kgalhni xaʼaktsu xmakan chu makgtujun natsakglhmakan kxlakatin Jehová, kxlakatin cortina nema waka kxasanto. 18 Alistalh nalitlawa tsinu kgalhni x’akgalokgot pumakamastan nema wi kxlakatin Jehová, anta ktabernáculo. Chu naxtakgamakgan xkgalhni nema na’akgataxtu kxtantun niku makamastakan xalhkun tamakamastan, nema wi lakatsu niku laktanukan ktabernáculo. 19 Namaktini toro putum xmanteca chu namajini kxʼakpun pumakamastan. 20 Uma toro na namakamasta chuna la makamastakan toro xpalakata talakgalhin. Chuna xlitlawat sacerdote xlakata israelitas tlan nakatapatikan xtalakgalhinkan. 21 Xla nalimapakgsinan pi kalinka toro kxkilhtin kachikin chu kalhkuyuka, chuna la lhkuyuka xapulana toro. Akgtum tamakamastan xpalakata talakgalhin nema tlawakgolh putum kachikin Israel.

22 »”Komo chatum puxku xalak kachikin natlawa akgtum talakgalhin maski ni chuna xtlawaputun chu nalitawila kuenta xlakata tlawalh tuku Jehová xDios wan pi ni xlitatlawat 23 o komo nakatsi pi tlawanit akgtum talakgalhin, xlakata kgalhakgaxmatmakgalh akgtum limapakgsin, xlimakamastat tantum xaʼaktsu cabra nema ni xatatatla. 24 Nawili xmakan kxʼakgxakga xaʼaktsu cabra chu namakgni niku kamakgnikan animales nema xalhkun kamakamastakan kxlakatin Jehová. Uma akgtum tamakamastan xpalakata talakgalhin. 25 Sacerdote naʼakmawaka xaʼaktsu xmakan xkgalhni tamakamastan xpalakata talakgalhin, chu nakalitlawa xʼakgalokgot pumakamastan niku makamastakan xalhkun tamakamastan chu naxtakgamakgan kgalhni nema na’akgataxtu kxtantun pumakamastan niku makamastakan xalhkun tamakamastan. 26 Namajini putum xmanteca tamakamastan kxʼakpun pumakamastan, chuna la tlawalh xmanteca tamakamastan xla takaksni. Wa uma tuku xlitlawat sacerdote xlakata lataman natapatikan xtalakgalhin.

27 »”Komo chatum lataman natlawa akgtum talakgalhin maski nichuna xtlawaputun chu nalitawila kuenta xlakata tlawalh tuku Jehová wan pi ni xlitatlawat 28 o komo nakatsi pi tlawanit akgtum talakgalhin, xlimakamastat tantum xatsumat xaʼaktsu cabra nema ni xatatatla xpalakata talakgalhin nema tlawanit. 29 Nawili xmakan kxʼakgxakga animal nema makamastamaka xpalakata talakgalhin chu namakgni niku kamakgnikan animales nema xalhkun kamakamastakan. 30 Sacerdote naʼakmawaka xaʼaktsu xmakan xkgalhni tamakamastan chu nakalitlawa xʼakgalokgot pumakamastan niku makamastakan xalhkun tamakamastan chu naxtakgamakgan kgalhni nema naʼakgataxtu kxtantun pumakamastan. 31 Namaktini tamakamastan putum xmanteca, chuna la maktinikan xmanteca tamakamastan xla takaksni. Chu sacerdote namajini kxʼakpun pumakamastan chuna la akgtum tamakamastan nema Jehová lu muksun nakgankgawanan. Wa uma tuku xlitlawat sacerdote xlakata lataman natapatikan xtalakgalhin.

32 »”Pero komo lataman namakamasta tantum xaʼaktsu borrego xpalakata talakgalhin, xatsumat xliwanat chu ni xatatatla xliwanat. 33 Nawili xmakan kxʼakgxakga animal xpalakata talakgalhin chu namakgni niku kamakgnikan animales nema xalhkun kamakamastakan. 34 Sacerdote naʼakmawaka xaʼaktsu xmakan xkgalhni tamakamastan xpalakata talakgalhin, chu nakalitlawa xʼakgalokgot pumakamastan niku makamastakan xalhkun tamakamastan chu naxtakgamakgan kgalhni nema naʼakgataxtu kxtantun pumakamastan. 35 Namaktini putum xmanteca chuna la maktinikan xmanteca xaʼaktsujku borrego nema makamastakan chuna la tamakamastan xla takaksni. Chu sacerdote namajini kxʼakpun pumakamastan, kxʼakpun tamakamastan nema lhkuyunikan Jehová. Wa uma tuku xlitlawat sacerdote xlakata lataman natapatikan xtalakgalhin.

5 »”Komo wi tiku akxilhli o katsilh pi tlawaka akgtum talakgalhin chu kgaxmata pi katasanimaka* tiku katsikgo xlakata talakgalhin nema tlawaka, pero xla ni an makatsininan, uma akgtum talakgalhin chu xla nalakgaxokgo xpalakata xtalakgalhin.

2 »”O komo chatum lataman naxama tuku lixkajni, max tantum xanin animal xalak kakiwin, xanin animal nema makgastakkanit kchiki o xanin tantum aktsu animal,* uma lataman xataxkajwani wi chu lin kuenta, maski ni katsi pi xkajwananit. 3 O komo wi tiku naxama tiku xataxkajwani wi, max chatum lataman o atanu tuku namaxkajwi, chu maski xla ni katsi pi tuku xamalh xataxkajwani xwanit chu asta alistalh nakatsi, xla lina kuenta.

4 »”O komo wi tiku lakapala nalitaya pi wi tuku natlawa, max tuku tlan o tuku nitlan, chu alistalh nakatsi pi lakapala wi tuku litayalh, xla lina kuenta.*

5 »”Komo wi tiku nalitawila kuenta xpalakata putum uma, xliwanat talakgalhin nema tlawanit. 6 Na nalini Jehová tamakamastan xlakata tlawalh tuku nitlan, tantum xatsumat aktsu borrego o xatsumat aktsu cabra, chuna la tamakamastan xpalakata talakgalhin. Chu sacerdote namakamasta uma animal xlakata lataman natapatikan xtalakgalhin.

7 »”Pero komo xla ni kgalhi tuku nalitamawa tantum borrego, namakamaxki Jehová tantiy xalakstakni paloma* o tantiy xalakgskgata paloma chuna la tamakamastan xpalakata tlawalh tuku nitlan, namakamasta tantum paloma xpalakata talakgalhin chu atantum chuna la xalhkun tamakamastan. 8 Xla nakalini paloma sacerdote, chu sacerdote pulana namakamasta tamakamastan xpalakata talakgalhin. Napixkiklhmakgni pero ni namaktini xʼakgxakga. 9 Chu nalitsakglhmani xkgalhni tamakamastan xpalakata talakgalhin kxlakpan pumakamastan, pero kgalhni nema naʼakgataxtu naxtakgamakgan kxtantun pumakamastan. Uma akgtum tamakamastan xpalakata talakgalhin. 10 Sacerdote namakamasta atanu paloma chuna la xalhkun tamakamastan, xlimakamastat chuna la wan limapakgsin. Sacerdote chuna namakamasta xlakata lataman natapatikan xtalakgalhin.

11 »”Pero komo xla ni kgalhi tuku nalitamawa tantiy xalakstakni paloma o tantiy xalakgskgata paloma, xlimakamastat akgtum kilo* xatlan harina xpalakata xtalakgalhin. Ni nakgalhmawaka aceite nipara olíbano, xlakata uma akgtum tamakamastan xpalakata talakgalhin. 12 Xla nalini sacerdote tamakamastan chu sacerdote nalitiya harina akgtum xmakgxtampun xlakata namajini kxʼakpun pumakamastan, kxʼakpun tamakamastan nema lhkuyunikan Jehová, xlakata xla nalakapastaka putuminika tamakamastan. Uma akgtum tamakamastan xpalakata talakgalhin. 13 Sacerdote chuna namakamasta xlakata lataman natapatikan xtalakgalhin. Tuku naʼakgataxtu wa natapakgsini sacerdote, chuna la tatamakgxtakga tamakamastan xla talhtsi”».

14 Jehová wanipa Moisés: 15 «Komo wi tiku nitlan maklakaskin tuku xasanto akxilha Jehová,* xla kgalhakgaxmatmakgan limapakgsin maski nichuna xtlawaputun chu tlawanit akgtum talakgalhin, xla namakamaxki Jehová tantum ni xatatatla borrego xpalakata talakgalhin nema tlawalh. Sacerdote nawan la xlilhuwa plata nalixokgokan borrego. Xla namaklakaskin chiwix* nema maklakaskinkan niku xasanto xlakata nalipulhkakan plata. 16 Chixku naxokgo xlakata talakgalhin nema tlawalh anta niku xasanto chu namaliwakani tsinu xtapalh.* Putum namakamaxki sacerdote chu lataman natapatikan xtalakgalhin xlakata borrego nema makamastalh xpalakata talakgalhin nema tlawalh.

17 »Komo wi tiku tlawa tuku Jehová wan pi ni xlitatlawat, uma lataman tlawanit talakgalhin, maski ni katsi pi chuna tlawanit, xla lin kuenta chu nalakgaxokgo xpalakata xtalakgalhin. 18 Nalini sacerdote tantum ni xatatatla borrego nema kgalhi xtapalh chuna la lakkaxwilinit sacerdote, xlakata uma akgtum tamakamastan xpalakata tiku tlawalh tuku nitlan. Wa uma tuku xlitlawat sacerdote xlakata lataman natapatikan xtalakgalhin nema tlawalh maski ni xkatsi chu nichuna xtlawaputun. 19 Uma akgtum tamakamastan xpalakata tiku tlawalh tuku nitlan. Litawilanit kuenta xlakata tlawalh akgtum talakgalhin kxlakatin Jehová».

6 Chu Jehová wanilh Moisés: 2 «Komo wi tiku kgalhakgaxmatmakgan Jehová akxni tlawa umakgolh talakgalhin: akgskgawi xtalataman xlakata tuku makuentajlika, makgkgalhanan, xafuerza makglhti tuku tapakgsini xtalataman, 3 natekgsa tuku tsankganit pero ni nawan, chu litaya tuku ni xaxlikana akxni wan pi xla ni tlawanit pulaktum umakgolh talakgalhin, wa uma tuku xlitlawat: 4 komo tlawanit talakgalhin chu lin kuenta, xlimaspitat tuku kgalhalh, tuku xafuerza makglhtinalh chu akgskgawimakglhtinalh, tuku makuentajlika, tuku tekgsli nema xtsankganit 5 o komo nalitaya tuku ni xaxlikana xlakata nakgalhi tuku tapakgsini xtalataman, xlilakgxokgot chu namaliwakani tsinu xtapalh.* Akxni nalimasiyakan pi wa lin kuenta, namakamaxki uma tiku tapakgsini. 6 Nalini sacerdote tantum borrego nema ni xatatatla chuna la akgtum tamakamastan nema namakamaxki Jehová xpalakata talakgalhin nema tlawalh. Uma borrego xlikgalhit xtapalh nema kgalhi tamakamastan xpalakata tiku tlawalh tuku nitlan, chuna la lakkaxwilinit sacerdote. 7 Sacerdote namakamasta kxlakatin Jehová xpalakata xtalakgalhin lataman, chu chuna natapatikan katuwa talakgalhin nema tlawanit».

8 Jehová wanipa Moisés: 9 «Kakamaxki uma limapakgsin Aarón chu xlakgkgawasan chu kakawani: “Wa uma limapakgsin xlakata xalhkun tamakamastan. Xalhkun tamakamastan natamakgxtakga tantaskaka asta lichali tsisa kxʼakpun pumakamastan, chu lhkuyat ni xliʼakgmixat kxʼakpun pumakamastan. 10 Chu tsisa sacerdote nalhakga xlakaskinka lhakgat nema litlawakanit lino, chu xlakata ni xalhtantala* natasiya kxtampin klhakgat, xliwilit xtatanu xalino. Nachuna, namapanu klhkaka* xalhkun tamakamastan nema lhkulh kxʼakpun pumakamastan chu anta kxlakpan nawili. 11 Alistalh nalakgpali* klhakgat chu tanu nalhakga, chu nalin lhkaka kxkilhtin kachikin niku* ankan makgankan. 12 Lhkuyat ankgalhin napasa kpumakamastan. Ni xlimixat. Chali chali tsisa, sacerdote nalhkuyu kiwi kpumakamastan, tamakamastan nalhkuyu kxkgalhni kiwi, chu namajini xmanteca tamakamastan xla takaksni kxʼakpun pumakamastan. 13 Lhkuyat ankgalhin napasa kpumakamastan. Ni xlimixat.

14 »”Wa uma limapakgsin xlakata tamakamastan xla talhtsi: xlakgkgawasan Aarón namakamaxkikgo Jehová kxlakatin pumakamastan. 15 Chatum nalitiya akgtum xmakgxtampun xatlan harina tuku kgalhi aceite chu putum olíbano nema wi kxʼakpun tamakamastan xla talhtsi, namajini kxʼakpun pumakamastan xlakata Dios nalakapastaka putuminika tamakamastan. Uma tamakamastan nalhkuyukan chu Jehová lu muksun nakgankgawanan. 16 Aarón chu xlakgkgawasan nawakgo tamakamastan nema naʼakgataxtu. Nawakgo chuna la kaxtalanchu nema ni kgalhi limaxkutin anta niku xasanto. Nawakgo kxkilhtin tabernáculo.* 17 Ni natamakchakan tuku kgalhi limaxkutin. Xlakata tuku akgataxtu xla tamakamastan nema kilhkuyunikan wa kkamaxkinit xlakata wa katapakgsini. Uma lu xasanto, chuna la tamakamastan xpalakata talakgalhin chu tamakamastan xpalakata tiku tlawalh tuku nitlan. 18 Nawakgo putum lakgkgawasan tiku xalak xfamilia Aarón. Tuku akgataxtu xla tamakamastan nema lhkuyunikan Jehová wa katapakgsini, uma limapakgsin lhuwa kilhtamaku namakgapala. Putum tuku namaklakaskinkan kʼuma tamakamastan, xasanto nawan”».

19 Jehová tachuwinampa Moisés chu wanilh: 20 «Wa uma tuku Aarón chu xlakgkgawasan namakamaxkikgo Jehová akxni xla* nalaksakkan: ankgalhin namakamastakan akgtum kilo* xatlan harina chuna la tamakamastan xla talhtsi, itat namakamastakan tsisa chu kakgotanun* namakamastakan aitat. 21 Natlawaya kaxtalanchu kʼakgtum sartén chu natalakgtlawaya aceite. Akxni nalipina, liwana talakgkaxtlawakanit nawan aceite chu laktsu laktsu namakamastaya tamakamastan xla talhtsi nema makchakanit chuna la akgtum tamakamastan nema lu muksun nakgankgawanan Jehová. 22 Xkgawasa Aarón tiku naskuja xlakgxokgo chuna la sacerdote nema laksakkanit natlawa tamakamastan. Uma akgtum limapakgsin nema lhuwa kilhtamaku namakgapala: namajinikan putum tamakamastan xlakata namakamaxkikan Jehová. 23 Tamakamastan xla talhtsi nema mastakan xpalakata sacerdote putuminika xlitamakamastat. Uma niti xliwat».

24 Jehová tachuwinampa Moisés chu wanilh: 25 «Kawani Aarón chu xlakgkgawasan: “Wa uma limapakgsin xlakata tamakamastan xpalakata talakgalhin. Animal nema namakamastakan xpalakata talakgalhin namakgnikan kxlakatin Jehová, anta niku makgnikan animal nema xalhkun makamastakan. Uma lu xasanto. 26 Nawa sacerdote tiku namakamasta xpalakata talakgalhin. Nawa anta niku xasanto, kxkilhtin tabernáculo.

27 »”Putum tuku namaklakaskinkan kʼuma tamakamastan, xasanto nawan, chu komo wi tiku namakpasa xkgalhni uma animal, xlitachakget lhakgat nema pasalh kgalhni anta niku xasanto. 28 Komo xaliwa makchaka kʼakgtum tlamink,* uma xlitalakgpakglhat. Pero komo niku makchaka xacobre, liwana naxakgakan chu nalichakgekan chuchut.

29 »”Nawakgo putum tiku sacerdotes litaxtukgo. Uma lu xasanto. 30 Pero ni xlitawat tamakamastan xpalakata talakgalhin komo nalinkan tsinu xkgalhni kxpulakni tabernáculo xlakata naxapakan talakgalhin anta niku xasanto. Uma xlitalhkuyut.

7 »”Uma wa limapakgsin xpalakata tamakamastan nema namasta tiku tlawalh tuku nitlan. Uma lu xasanto. 2 Animal nema makamastakan xpalakata tiku tlawalh tuku nitlan, namakgnikan niku makgnikan animal nema xalhkun makamastakan, chu xkgalhni nalitsakglhmanikan xlakpanin pumakamastan. 3 Xla namakamasta putum xmanteca: xmanteca kstajan,* xmanteca nema makwaka xpaluwa 4 chu akgtiy xpastapu chu manteca nema kamakwaka chu wi lakatsu kxtapanin. Akxni namakglhti xpastapu na namaktini xmanteca klhwakaka. 5 Sacerdote namajini putum kxʼakpun pumakamastan chuna la akgtum tamakamastan nema lhkuyunikan Jehová. Uma akgtum tamakamastan xpalakata tiku tlawalh tuku nitlan. 6 Nawakgo putum tiku sacerdotes litaxtukgo. Xliwatkan anta niku xasanto. Uma lu xasanto. 7 Uma limapakgsin namaklakaskinkan akxni namakamastakan tamakamastan xpalakata talakgalhin chu tamakamastan xpalakata tiku tlawalh tuku nitlan. Xaliwa tamakamastan wa natapakgsini sacerdote tiku nalixapa talakgalhin.

8 »”Akxni sacerdote namakamasta xalhkun tamakamastan xpalakata chatum lataman, kxuwa animal nema makamastalh chuna la xalhkun tamakamastan wa natatamakgxtakga.

9 »”Putum kaxtalanchu nema makchakanit kʼhorno o kaxtlawakanit kʼakgtum cacerola o kʼakgtum sartén wa natapakgsini sacerdote tiku namakamasta. Wa natatamakgxtakga. 10 Pero putum tamakamastan xla talhtsi nema talakgtlawakanit aceite o nema ni talakgtlawakanit aceite wa nakatapakgsini putum xlakgkgawasan Aarón; xchatunukan watiya xlilhuwa nakalakgchan.

11 »”Chu wa uma limapakgsin xpalakata tamakamastan xla takaksni nema wi tiku tlan namakamaxki Jehová. 12 Komo namakamasta uma xlakata paxtikatsininan, xtamakamastan natamakamasta roscas nema litlawakanit aceite chu ni kgalhi limaxkutin, lakstakaka galletas nema kgalhi aceite chu ni kgalhi limaxkutin chu roscas nema litlawakanit xatlan harina chu tatlawakanit lhuwa aceite. 13 Nachuna, natamakamasta roscas nema kgalhi limaxkutin xtamakamastan xla takaksni xlakata nalimasiya tapaxtikatsinit. 14 Akxni natlawa uma tamakamastan natiya makatunu kaxtalanchu nema anan xlakata xasanto* akxilha Jehová. Sacerdote tiku natsakglhmakgan xkgalhni tamakamastan xla takaksni, wa natatamakgxtakga uma. 15 Xaliwa tamakamastan xla takaksni nema namasta xlakata nalimasiya tapaxtikatsinit, watiya kilhtamaku nawakan akxni namakamastakan. Xla ni xlimakit tuku na’akgataxtu xlakata namaklakaskin lichali.

16 »”Komo natlawa akgtum tamakamastan xlakata wi tuku nalitaya o kaj xatapaxuwan namakamasta, watiya kilhtamaku nawakan akxni namakamasta xtamakamastan, chu lichali tlan nawakan tuku naʼakgataxtu. 17 Pero xliʼakgtutu kilhtamaku nalhkuyukan liwa nema naʼakgataxtu xla tamakamastan. 18 Komo wi tiku nawa liwa nema tlawakan xpalakata tamakamastan xla takaksni kxliʼakgtutu kilhtamaku, tiku makamastalh ni ktimakgamakglhtinalh. Xtamakamastan ni katilitamakgtayalh. Uma lu lixkajni, chu lataman tiku nawa nalakgaxokgo xpalakata xtalakgalhin. 19 Komo liwa nalixkajwan tuku ni xasanto, niti xliwat. Xlitalhkuyut. Putum tiku xaskulunku tlan nawa liwa nema xaskulunku.

20 »”Pero putum tiku xkajwananit chu nawa xliwa tamakamastan xla takaksni, nema tapakgsini Jehová, namakgnikan. 21 Komo wi tiku naxama tuku ni xaskulunku, max tuku lixkajwanan chatum lataman o tantum animal xataxkajwani o putum tuku lixkajni o ni xaskulunku, chu nawa liwa nema makamastakan ktamakamastan xla takaksni, nema tapakgsini Jehová, namakgnikan”».

22 Jehová chuntiya tachuwinalh Moisés. Chu wanilh: 23 «Kakawani israelitas: “Ni nawayatit xmanteca toro nipara xmanteca xaʼaktsujku borrego chu cabra. 24 Xmanteca tantum animal nema xanin tekgskanit o nema makgninit atanu animal tlan atanu la namaklakaskinkan, pero nikxni nawayatit. 25 Putum tiku nawa xmanteca animal nema namakamasta chuna la tamakamastan nema lhkuyunikan Jehová, namakgnikan.

26 »”Kaniwa niku nalatapayatit ni nawayatit kgalhni, nipara xkgalhni tantum tsiktsi* o atanu animal. 27 Putum tiku nawa kgalhni, namakgnikan”».

28 Jehová wanipa Moisés: 29 «Kakawani israelitas: “Putum tiku nalini Jehová tamakamastan xla takaksni, tsinu namakamaxki Jehová uma xtamakamastan. 30 Xmakan nalilin xmanteca chu xkuxmun animal chuna la tamakamastan nema lhkuyunikan Jehová. Anu anu nalimakan chuna la tamakamastan nema lakchikimikan* kxlakatin Jehová. 31 Sacerdote namajini manteca kxʼakpun pumakamastan, pero kuxmun wa natapakgsini Aarón chu xlakgkgawasan.

32 »”Wixin namaxkiyatit sacerdote xtantun xalak xpakgastakat* mintamakamastankan xla takaksni, xlakata uma xasanto. 33 Xkgawasa Aarón tiku namakamasta xkgalhni tamakamastan xla takaksni chu xmanteca, natatamakgxtakga xtantun xalak xpakgastakat xlakata wa tapakgsini. 34 Xkuxmun tamakamastan nema lakchikimikan chu xtantun tamakamastan xla takaksni nema xasanto litaxtu chu makamastakgo israelitas, nakmaxki sacerdote Aarón chu xlakgkgawasan, uma akgtum limapakgsin xpalakatakan israelitas nema lhuwa kilhtamaku namakgapala.

35 »”Uma tamakamastan nema klhkuyunikan Jehová wa tuku xkama’akgataxtinikan sacerdotes, Aarón chu xlakgkgawasan, kilhtamaku akxni kalaksakka xlakata ksacerdotes Jehová xlitaxtukgolh. 36 Kilhtamaku akxni kalaksakka, Jehová kalimapakgsilh israelitas pi wa uma tuku xʼama katapakgsini Aarón chu xlakgkgawasan. Uma akgtum limapakgsin nema xlakan chu tiku aku nalakachintilhakgo namakgantaxtikgo”».

37 Wa uma limapakgsin xpalakata xalhkun tamakamastan, tamakamastan xla talhtsi, tamakamastan xpalakata talakgalhin, tamakamastan xpalakata tiku tlawalh tuku nitlan, tamakamastan nema tlawakan akxni kalaksakkan sacerdotes chu tamakamastan xla takaksni, 38 chuna la Jehová limapakgsilh Moisés ksipi Sinaí kilhtamaku akxni kalimapakgsilh israelitas pi xlinikgolh tamakamastan Jehová kxakaskakni xtiyat Sinaí.

8 Jehová chuntiya tachuwinalh Moisés chu wanilh: 2 «Kakalita Aarón chu xlakgkgawasan, klhakgatkan, aceite nema lilaksaknankan, toro nema namakamastakan xpalakata talakgalhin, tantiy borregos chu canasta niku tajumakgolh kaxtalanchu nema ni kgalhi limaxkutin, 3 chu katlawa pi putum kachikin natamakxtumikgo lakatsu niku laktanukan ktabernáculo».*

4 Wa xlakata Moisés tlawalh chuna la Jehová xlimapakgsinit, chu kachikin tamakxtumilh lakatsu niku laktanukan ktabernáculo. 5 Alistalh Moisés wanilh kachikin: «Wa uma tuku Jehová kinkalimapakgsinitan». 6 Wa xlakata Moisés tlawalh pi Aarón chu xlakgkgawasan xtalakatsuwikgolh, chu kalituchakgelh chuchut. 7 Alistalh malhakgelh Aarón xlakaskinka lhakgat, litampulakgchilh xlitatampulakgchin xlakaskinka lhakgat,* malhakgelh xapakgaxtuluwa lhakgat chu efod, chu litampulakgchilh xatastaw xlitatampulakgchin efod. 8 Alistalh mawakanilh kuxmutawaka chu kuxmutawaka mawakanilh Urim chu Tumim. 9 Akwililh xlakaskinka litakgchin chu kxlakatin litakgchin mawakanilh akgtum placa xaʼoro nema lu xlakgskgo, xasanto placa xaʼoro,* chuna la Jehová xlimapakgsinit Moisés.

10 Chu Moisés maklakaskilh aceite nema lilaksaknankan xlakata xlitsakglhmanilh tabernáculo chu putum tuku xmaklakaskinkan anta, chuna xasanto litaxtukgolh. 11 Alistalh makgtujun litsakglhmanilh aceite pumakamastan, laksakli pumakamastan chu putum tuku xtamaklakaskin anta, nachuna tlawalh niku xmakgachakgankan chu xlaktawilh, chuna xasanto litaxtukgolh. 12 Xaʼawatiya, akmawakalh Aarón tsinu aceite nema lilaksaknankan, chuna laksakli xlakata xasanto xlitaxtulh.

13 Wa xlakata Moisés tlawalh pi xlakgkgawasan Aarón xtalakatsuwikgolh, kamalhakgenilh xlakaskinka lhakgat, kalitampulakgchilh xlitatampulakgchin xlakaskinka lhakgat chu kaʼakwililh* xlakaskinka litakgchin, chuna la Jehová xlimapakgsinit Moisés.

14 Alistalh limapakgsinalh pi xlinika toro nema xʼamaka makamastakan xpalakata talakgalhin, chu Aarón chu xlakgkgawasan wilikgolh xmakankan kxʼakgxakga toro nema xʼamaka makamastakan xpalakata talakgalhin. 15 Moisés makgnilh toro, akmawakalh xa’aktsu xmakan xkgalhni tamakamastan chu kalitlawalh xʼakgalokgot pumakamastan, chu maskulunkilh pumakamastan xlakata xtalakgalhinkan. Kgalhni nema akgataxtulh xtakgamakgalh kxtantun pumakamastan, chuna maskulunkilh xlakata tlan xtlawaka tamakamastan xpalakata talakgalhin kxʼakpun pumakamastan. 16 Alistalh xla tiyalh xmanteca nema xmakwaka paluwa, xmanteca klhwakaka, akgtiy xpastapu chu xmanteca nema xkgalhi, chu Moisés kamajinilh kxʼakpun pumakamastan. 17 Chu tlawalh pi toro nema akgataxtulh, kxuwa, xliwa chu xkgatsasa,* klhkuyuka kxkilhtin kachikin, chuna la Jehová xlimapakgsinit Moisés.

18 Alistalh tlawalh pi xmalakatsuwinika borrego nema xalhkun xʼamaka makamastakan, chu Aarón chu xlakgkgawasan wilikgolh xmakankan kxʼakgxakga borrego. 19 Chu Moisés makgnilh borrego chu litsakglhmanilh xkgalhni xlakpanin pumakamastan. 20 Xla laktsu laktsu lakchukulh borrego, chu Moisés majinilh xʼakgxakga, xliwa nema laktsu laktsu xkalakchukukanit chu xmanteca.* 21 Chu kalichakgelh chuchut xpaluwa chu xtantunin, chu majinilh putuminika borrego kxʼakpun pumakamastan. Akgtum xalhkun tamakamastan xwanit chu lu muksun xtakgankgawanan. Uma akgtum tamakamastan nema klhkuyunikan Jehová, chuna la Jehová xlimapakgsinit Moisés.

22 Alistalh Moisés tlawalh pi xlinika xlitantiy borrego, borrego nema xʼamaka maklakaskinkan xlakata xlaksakka sacerdote, chu Aarón chu xlakgkgawasan wilikgolh xmakankan kxʼakgxakga borrego. 23 Moisés makgnilh borrego chu litlawalh tsinu kgalhni xtakgen Aarón xalak xpakgastakat, nachuna xakgelanka xmakan xalak xpakgastakat* chu xakgelanka xtantun xalak xpakgastakat. 24 Alistalh Moisés tlawalh pi xlakgkgawasan Aarón xtalakatsuwikgolh chu kalitlawanilh tsinu kgalhni xtakgenkan xalak xpakgastakatkan, nachuna xakgelanka xmakankan xalak xpakgastakatkan chu xakgelanka xtantunkan xalak xpakgastakatkan. Chu kgalhni nema akgataxtulh, Moisés litsakglhmanilh xlakpanin pumakamastan.

25 Alistalh tiyalh xmanteca, xmanteca kstajan,* putum manteca nema xmakwaka xpaluwa, xmanteca klhwakaka, akgtiy xpastapu chu manteca nema xkamakwaka, chu xtantun xalak xpakgastakat. 26 Chu kcanasta niku xmujukan kaxtalanchu nema ni kgalhi limaxkutin chu xwi kxlakatin Jehová, makutulh maktum rosca nema ni xkgalhi limaxkutin, maktum rosca nema xkgalhi aceite chu maktum xastakaka galleta. Alistalh, putum uma mawakalh kxʼakpun xatalakchukun manteca chu xtantun xalak xpakgastakat. 27 Alistalh kamakgxtampuwililh Aarón chu xlakgkgawasan putum uma, chu xlakan* anu anu tsukukgolh limakankgo chuna la akgtum tamakamastan nema lakchikimikan* kxlakatin Jehová. 28 Alistalh Moisés kamakglhtilh chu tsukulh kamajini kxʼakpun pumakamastan, kxʼakpun xalhkun tamakamastan. Uma akgtum tamakamastan nema xtlawakan akxni xlaksakkan sacerdote chu lu muksun xtakgankgawanan. Akgtum tamakamastan nema klhkuyunikan Jehová.

29 Alistalh Moisés tiyalh xkuxmun animal chu anu anu tsukulh limakan chuna la tamakamastan nema lakchikimikan kxlakatin Jehová. Uma xkuxmun borrego nema maklakaskinka akxni laksaka sacerdote wa tamakgxtakgnilh Moisés, chuna la Jehová xlimapakgsinit Moisés.

30 Moisés litsakglhmanilh Aarón chu klhakgat chu xlakgkgawasan chu klhakgatkan tsinu aceite nema lilaksaknankan chu tsinu kgalhni nema xwi kxʼakpun pumakamastan. Chuna xasanto limaxtulh Aarón chu klhakgat, chu xlakgkgawasan chu klhakgatkan.

31 Chu kawanilh Aarón chu xlakgkgawasan: «Kamakchatit liwa lakatsu niku laktanukan ktabernáculo. Anta natawayatit kaxtalanchu nema tajuma kcanasta,* chuna la kilimapakgsika: “Aarón chu xlakgkgawasan nawakgo”. 32 Chu liwa chu kaxtalanchu nema naʼakgataxtu nalhkuyukan. 33 Akgtujun kilhtamaku ni natamakgatliyatit lakatsu niku laktanukan ktabernáculo, asta akxni nasputa kilhtamaku nema nalimaxtukan xlakata nakalaksakkanatit chuna la sacerdote,* xlakata akgtujun kilhtamaku namakgapala uma. 34 Jehová limapakgsinalh pi xtlawaw tuku tlawaw la uku xlakata xkaxapanikantit mintalakgalhinkan. 35 Wixin natamakgxtakgatit kxkilhtin tabernáculo akgtujun kilhtamaku, kakuwani chu katsisni, chu xlakata ni naniyatit, namakgantaxtiyatit tuku Jehová kalakgayawanitan; xlakata chuna kilimapakgsika».

36 Chu Aarón chu xlakgkgawasan tlawakgolh putum tuku Jehová limapakgsilh Moisés pi xtlawaka.

9 Xliʼakgtsayan kilhtamaku, Moisés tasanilh Aarón chu xlakgkgawasan chu lakgkgolotsin xalak Israel. 2 Chu wanilh Aarón: «Katiya tantum xaskgata toro nema ni xatatatla chu kamakamasta xpalakata talakgalhin chu tantum ni xatatatla borrego nema namakamastaya chuna la xalhkun tamakamastan, chu kakalipi kxlakatin Jehová. 3 Pero israelitas nakawaniya: “Katiyatit tantum xakgawasa cabra nema namakamastayatit xpalakata talakgalhin, tantum toro chu tantum borrego nema akgtum kata kgalhikgo chu ni tatatlakgo, chu namakamastayatit chuna la xalhkun tamakamastan 4 chu tantum toro chu tantum borrego chuna la tamakamastan xla takaksni chu nakamakgniya kxlakatin Jehová, nachuna tamakamastan xla talhtsi nema talakgwilhakanit aceite, xlakata la uku nakatasiyaniyan Jehová”».

5 Wa xlakata linka kxlakatin tabernáculo* putum tuku Moisés limapakgsinalh. Alistalh putum kachikin talakatsuwikgolh chu tayakgolh kxlakatin Jehová. 6 Chu Moisés wa: «Wa uma tuku Jehová kalimapakgsinitan natlawayatit xlakata nakatasiyaniyan xlilanka Jehová». 7 Wa xlakata Moisés wanilh Aarón: «Katalakatsuwi kpumakamastan chu kamakamasta mintamakamastan xpalakata talakgalhin chu xalhkun tamakamastan, chuna natapatikana mintalakgalhin chu xtalakgalhin mifamilia; alistalh namakamastaya xtamakamastankan israelitas xlakata tlan nakatapatikan xtalakgalhinkan, chuna la Jehová limapakgsinanit».

8 Aarón tunkun talakatsuwilh kpumakamastan chu makgnilh xaskgata toro xpalakata xtalakgalhin. 9 Chu xlakgkgawasan Aarón malakatsuwinikgolh kgalhni, chu Aarón litamakgajulh xaʼaktsu xmakan kkgalhni chu kali’aktlawalh xʼakgalokgot pumakamastan. Alistalh kgalhni nema akgataxtulh xtakgamakgalh kxtantun pumakamastan. 10 Alistalh xmanteca, xpastapu chu xmanteca klhwakaka animal nema makamastaka xpalakata talakgalhin majinilh kxʼakpun pumakamastan, chuna la Jehová xlimapakgsinit Moisés. 11 Chu kxkilhtin kachikin lhkuyulh xliwa chu xmakgxuwa.

12 Alistalh makgnilh borrego nema xʼama makamasta chuna la xalhkun tamakamastan. Xlakgkgawasan Aarón maxkikgolh kgalhni chu Aarón litsakglhmanilh xlakpanin pumakamastan. 13 Xlakan maxkikgolh xalhkun tamakamastan nema laktsu laktsu xlakchukukanit, nachuna xʼakgxakga, chu xla kamajinilh kxʼakpun pumakamastan. 14 Nachuna, kachakgelh xpaluwa chu xtantunin chu kamajinilh kxkgalhni xalhkun tamakamastan, kxʼakpun pumakamastan.

15 Chu makamastalh xtamakamastan kachikin: tiyalh xakgawasa cabra nema makamastaka xpalakata xtalakgalhinkan kachikin, makgnilh chu makamastalh chuna la tamakamastan xpalakata talakgalhin chuna la tlawalh xapulana animal. 16 Na makamastalh xalhkun tamakamastan, chu tlawalh chuna la wan limapakgsin.

17 Nachuna, makamastalh tamakamastan xla talhtsi: litiyalh akgtum xmakgxtampun chu kxʼakpun pumakamastan tamajinilh xalhkun tamakamastan nema makamastaka tsisa.

18 Alistalh kamakgnilh toro chu borrego, uma wamputun, tamakamastan xla takaksni, nema makamastaka xpalakata kachikin. Xlakgkgawasan Aarón maxkikgolh kgalhni chu Aarón litsakglhmanilh xlakpanin pumakamastan. 19 Xatalakchukun xmanteca toro chu xmanteca kstajan* borrego, nachuna manteca nema xmakwaka xpaluwa, xpastapu chu xmanteca klhwakaka, 20 xlakan kgalhmawakakgolh putum uma kxkuxmun animal, alistalh xla tsukulh majini xatalakchukun manteca kxʼakpun pumakamastan. 21 Pero xkuxmunkan chu xtantunkan xalak xpakgastakatkan animales, Aarón anu anu tsukulh kalimakan chuna la akgtum tamakamastan nema lakchikimikan* kxlakatin Jehová, chuna la Moisés xlimapakgsinanit.

22 Akxni xmakamastanita tamakamastan xpalakata talakgalhin, xalhkun tamakamastan chu tamakamastan xla takaksni, Aarón limakalh xmakan niku wi kachikin, sikulunatlawalh chu alistalh taktalh niku tlawalh tamakamastan. 23 Xaʼawatiya, Moisés chu Aarón tanukgolh ktabernáculo;* alistalh taxtukgolh chu sikulunatlawakgolh kachikin.

Chu xlilanka Jehová katasiyanilh putum kachikin, 24 chu Jehová makamilh lhkuyat chu lhkuyukgolh xalhkun tamakamastan chu xatalakchukun manteca nema xwi kxʼakpun pumakamastan. Akxni kachikin akxilhli uma, xlakan pixlanka tsukukgolh katasakgo* xlakata xpaxuwamakgo chu talakgatsokgostakgolh asta kkatiyatni.

10 Alistalh, Nadab chu Abihú, xlakgkgawasan Aarón, tiyakgolh niku xmujukan jalanat, mapasikgolh, mujunikgolh incienso chu tsukukgolh tlawakgo tamakamastan* kxlakatin Jehová nema ni xkalakgchan, nema xla ni xkalimapakgsinit namakamastakgo. 2 Wa xlakata Jehová makamilh lhkuyat chu kalhkuyulh, chu nikgolh kxlakatin Jehová. 3 Chu Moisés wanilh Aarón: «Wa uma tuku wanit Jehová: “Tiku lakatsu kintawilakgo xlilakapastakatkan pi akit xasanto chu nakimalankikan xlakatin putum kachikin”». Chu Aarón nialhtu wa.

4 Wa xlakata, Moisés tasanilh Misael chu Elzafán, xlakgkgawasan Uziel, xkuku Aarón, chu kawanilh: «Katantit unu. Kakatamakxtutit minatalan niku xasanto chu kakalipitit kxkilhtin kachikin». 5 Xlakan ankgolh chu kakitiyakgolh tiku xnikgonit, klhakgakgonit xlakaskinka klhakgatkan akxni katamakxtuka kxkilhtin kachikin, chuna la Moisés xkawaninit.

6 Alistalh Moisés kawanilh Aarón chu amakgapitsi xlakgkgawasan, Eleazar chu Itamar: «Ni lhtimpuk* naʼakwanatit chu ni naxtitatit milhakgatkan, xlakata ni naniyatit chu xlakata Dios ni nasitsini kachikin. Minatalan xalak Israel nakalakgtasakgo tiku Jehová kalimakgnilh lhkuyat. 7 Ni natamakgatliniyatit niku laktanukan ktabernáculo.* Komo chuna natlawayatit, naniyatit, xlakata Jehová kalilaksaknitan aceite». Wa xlakata xlakan tlawakgolh tuku Moisés kawanilh.

8 Alistalh Jehová wanilh Aarón: 9 «Wix chu milakgkgawasan ni miliwatkan vino chu atanu tuku likgachikan akxni natanuyatit ktabernáculo,* xlakata ni naniyatit. Uma akgtum limapakgsin nema lhuwa kilhtamaku namakgapala chu xlikgalhakgaxmatatkan minkamanankan. 10 Chuna nakatsiyatit tuku xasanto chu tuku ni xasanto, tuku xaskulunku chu tuku ni xaskulunku, 11 chu nakamasiyaniyatit israelitas putum limapakgsin nema Jehová maxkilh Moisés».

12 Wa xlakata Moisés kawanilh Aarón chu xlakgkgawasan, Eleazar chu Itamar, xlakgkgawasan tiku xlamakgolhku: «Katiyatit tuku naʼakgataxtu tamakamastan xla talhtsi nema lhkuyunikan Jehová chu kalitlawatit kaxtalanchu nema ni kgalhi limaxkutin chu kawatit lakatsu kpumakamastan, xlakata lu xasanto litaxtu. 13 Miliwatkan niku xasanto, xlakata tamakamastan nema lhkuyunikan Jehová wa tuku lakgchanan chu wa tuku kalakgchan minkamanan, wa uma tuku kilimapakgsikanit. 14 Xkuxmun tamakamastan nema lakchikimikanit chu xtantun tamakamastan nema xasanto litaxtu na nawayatit anta niku xasanto, wix, milakgkgawasan chu milaktsuman, xlakata uma tamakamastan xla takaksni nema israelitas makamastakgo wa tuku lakgchanan, wix chu minkamanan. 15 Xtantun chu xkuxmun animal akxtum nataliminkgo xmanteca tamakamastan xlakata nalhkuyukan. Chuna natlawakan xlakata tlan namakamastakan tamakamastan nema lakchikimikan* kxlakatin Jehová. Xtantun chu xkuxmun animal wix nalakgchanan chu milakgkgawasan, uma namakgapala lhuwa kilhtamaku, chuna la Jehová limapakgsinanit».

16 Chu Moisés putsalh xakgawasa cabra nema xmakamastakanit chuna la tamakamastan xpalakata talakgalhin chu katsilh pi klhkuyukanit. Wa xlakata lu sitsinilh Eleazar chu Itamar, xlakgkgawasan Aarón, xlakgkgawasan tiku xlamakgolhku chu kawanilh: 17 «Tamakamastan xpalakata talakgalhin lu xasanto, ¿tuku xlakata ni watit anta niku xasanto? Dios kamaxkinitan xlakata nalipinatit xtalakgalhinkan israelitas chu chuna xlakan tlan nakatapatikan kxlakatin Jehová. 18 ¡Kaʼakxilhtit! Xkgalhni tamakamastan ni linka xpulakni niku xasanto. Miliwatkan xwanit tamakamastan niku xasanto, chuna la kilimapakgsika». 19 Aarón wanilh Moisés: «La uku xlakan makamastakgolh kxlakatin Jehová tamakamastan xpalakata xtalakgalhinkan chu xalhkun xtamakamastankan, pero xlakata putum tuku kiʼakgspulalh, komo akit xakwalh la uku tamakamastan xpalakata talakgalhin, ¿xlakgatilh Jehová?». 20 Akxni Moisés kgaxmatli uma, tlan akxilhli.

11 Chu Jehová wanilh Moisés chu Aarón: 2 «Kakawanitit israelitas: “Wa umakgolh animales xalak katiyatni nema tlan nawayatit: 3 tlan nawayatit animales nema putuminika tapitsinit xmakasiyankan* chu nema makgtiy lakgtsakgakgo xliwatkan.*

4 »”Pero animales nema makgtiy lakgtsakgakgo xliwatkan o tapitsinit xmakasiyankan nema ni miliwatkan wa umakgolh. Ni miliwatkan camello, xlakata makgtiy lakgtsakga xliwat pero ni putuminika tapitsinit xmakasiyan. Uma animal xataxkajwani. 5 Na ni miliwatkan damán,* xlakata makgtiy lakgtsakga xliwat pero ni putuminika tapitsinit xmakasiyan. Uma animal xataxkajwani. 6 Na ni nawayatit liebre,* xlakata makgtiy lakgtsakga xliwat pero ni putuminika tapitsinit xmakasiyan. Uma animal xataxkajwani. 7 Na ni nawayatit paxni, xlakata putuminika tapitsinit xmakasiyan pero ni makgtiy lakgtsakga xliwat. Uma animal xataxkajwani. 8 Nipara tsinu nawayatit xaliwa umakgolh animales, na ni naxamayatit xanin. Umakgolh animales xataxkajwani litaxtukgo.

9 »”Wa umakgolh skiti* nema tlan nawayatit: tlan nawayatit putum tuku anankgo kpupunu o kkgalhtuchokgo nema kgalhikgo xpakgankan* chu xmakgpipekgxkan. 10 Pero putum tuku anankgo kpupunu o kkgalhtuchokgo nema ni kgalhi xpakgan chu xmakgpipekgx, chuna la nema makxtum latajukgo kchuchut o atanu animales nema anankgo kchuchut, lu lixkajni litaxtukgo. 11 Chuna, umakgolh lu lixkajni litaxtukgo. Nipara tsinu nawayatit xaliwa umakgolh animales chu naxkajniyatit xanin. 12 Putum tuku anan kchuchut nema ni kgalhi xpakgan chu xmakgpipekgx lu lixkajni litaxtu.

13 »”Wa umakgolh animales nema kgoskgo chu nakaxkajniyatit. Ni nawayatit umakgolh animales, xlakata lu laklixkajni: águila, águila nema chipa skiti, xatsitsakga chun, 14 milano real, nipara atanu xatsitsakga milano,* 15 nipara tantum cuervo nema anankgo, 16 avestruz, lechuza, gaviota, nipara tantum halcón nema anankgo, 17 mochuelo, cuervo xalak pupunu, xaʼaktsu monkgxnu, 18 cisne, pelícano, chun, 19 cigüeña, nipara tantum garza,* abubilla chu nipara xkita. 20 Putum laktsu animales nema kgalhikgo xpakgankan chu makxtum latapulikgo chu xtantutatikan litlawankgo, lu lixkajni litaxtukgo.

21 »”Xliputum animales nema kgalhikgo xpakgankan chu makxtum latapulikgo kkatiyatni chu nema xtantutati litlawankgo, kajwatiya tlan nawayatit animales nema kgalhikgo kgantiy tlakg xalaklhman xtantunkan chu tlan lilinkxkgo* kkatiyatni. 22 Wa uma tuku tlan nawayatit: putum xtuki* nema anankgo chu putum silenkgni nema anankgo. 23 Putum animales nema kgalhikgo xpakgankan chu makxtum latapulikgo kkatiyatni chu kgalhikgo kgantati xtantunkan, lu lixkajni litaxtukgo. 24 Komo nawayatit umakgolh, wixin xataxkajwani nawanatit. Putum tiku naxama xanin umakgolh animales xataxkajwani nawan asta kakgotanun. 25 Putum tiku nasaka xanin umakgolh animales nachakge klhakgat, chu xataxkajwani nawan asta kakgotanun.

26 »”Putum animal nema tapitsinit xmakasiyan pero ni makgtiy lakgtsakga xliwat xataxkajwani litaxtu. Putum tiku naxama xataxkajwani nawan. 27 Animales nema xtantutatikan litlawankgo, putum animales nema litlawankgo xtuxtakgakan* xataxkajwani litaxtukgo. Putum tiku naxama xanin, xataxkajwani nawan asta kakgotanun. 28 Putum tiku nasaka xanin umakgolh animales nachakge klhakgat, chu xataxkajwani nawan asta kakgotanun. Umakgolh animales xataxkajwani litaxtukgo.

29 »”Putum animales nema makxtum latapulikgo kkatiyatni, wa umakgolh: saka,* tsiya, chu putum lagarto,* 30 geco, xalanka lagarto, salamandra xalak chuchut, sluluk chu camaleón. 31 Umakgolh animales nema makxtum latapulikgo kkatiyatni xataxkajwani litaxtukgo. Putum tiku naxama xanin umakgolh animales xataxkajwani nawan asta kakgotanun.

32 »”Akxni nani tantum umakgolh animales, tuku nalaktamayacha xataxkajwani nawan, chuna la tuku litlawakanit kiwi, maktum lhakgat, maktum xuwa o tuku litlawakan kuxtalh. Putum umakgolh nema maklakaskinkan nalichakgekan chuchut chu xataxkajwani nawan asta kakgotanun. Chu alistalh skulunku nawampara. 33 Komo xanin natajuyacha kpatum xalu, xlitapakglhat uma, chu tuku tajuma anta xataxkajwani nawan. 34 Putum liwat xataxkajwani nawan komo nalakgtaju chuchut nema tajuma kxalu, chu putum tuku likgotnankan nema tajuma kxalu xataxkajwani nawan. 35 Putum niku xanin natamakgoyacha umakgolh animales xataxkajwani nawan. Kʼakgtum horno o kʼakgtum pumalhku, xlitalakgpakglhat. Xataxkajwani, chu chuntiya xataxkajwani nalitaxtukgo. 36 Kajwatiya taxtunu* chu cisternas niku makgstokgwilikan chuchut ni xataxkajwani katiwankgolh, pero putum tiku naxama xanin umakgolh animales xataxkajwani nawan. 37 Komo xanin umakgolh animales nalaktamayacha talhtsi nema nachankan, talhtsi ni xataxkajwani katiwa. 38 Pero komo tuku likgatsi xmakni xanin animal natawakaniyacha talhtsi nema lakgmakankanit chuchut, talhtsi xataxkajwani nawan.

39 »”Komo nani tantum animal nema tlan wakan, putum tiku naxama xanin uma animal xataxkajwani nawan asta kakgotanun. 40 Putum tiku nawa xliwa uma animal xlichakget klhakgat chu xataxkajwani nawan asta kakgotanun. Putum tiku nasaka chu nalin xanin uma animal xlichakget klhakgat chu xataxkajwani nawan asta kakgotanun. 41 Putum animales nema makxtum latamakgo kkatiyatni xataxkajwani. Ni miliwatkan. 42 Ni nawayatit animal nema litaxwata’an xpan, nipara tantum animal nema xtantutati litlawan, nipara tantum animal nema makxtum latapulikgo kkatiyatni chu animal nema lhuwa xtantun kgalhi, xlakata xataxkajwani litaxtukgo. 43 Ni kalixkajwanantit xpalakata umakgolh animales nema makxtum latapulikgo kkatiyatni; ni xataxkajwani kawantit xpalakata umakgolh animales. 44 Xlakata akit Jehová miDioskan, chu wixin xaskulunku chu xasanto miliwanatkan xlakata akit xasanto. Wa xlakata ni nalixkajwananatit tantum animal nema makxtum latapulikgo kkatiyatni chu tatsuwikgo kkatiyatni. 45 Xlakata akit Jehová, tiku katamakxtun kxtiyat Egipto xlakata miDioskan xaklitaxtulh, chu wixin xasanto miliwanatkan xlakata akit xasanto.

46 »”Wa uma limapakgsin xpalakata animales,* animales nema kgoskgo, animales nema latajumakgo kchuchut chu animales nema makxtum latamakgo kkatiyatni, 47 xlakata nakatsiyatit tuku xaskulunku chu tuku ni xaskulunku chu tuku animal tlan wakan chu tuku ni”».

12 Jehová wanilh Moisés: 2 «Kakawani israelitas: “Komo chatum puskat ama kgalhi kskgata chu namalakachini chatum kgawasa, xataxkajwani nawan akgtujun kilhtamaku, chuna la akxni xataxkajwani tawila akgatunu papa’. 3 Aktsu skgata naʼakstilichukunikan kxuwa xlichixku* kxliʼakgtsayan kilhtamaku. 4 Puskat chuntiya natamakgxtakga kxchik puxamakututu kilhtamaku asta akxni nialh xataxkajwani nawan. Ni xlixamat tuku xasanto chu na ni xlitanut niku xasanto asta akxni nialh xataxkajwani natawila.

5 »”Komo namalakachini chatum tsumat, akgkutati kilhtamaku xataxkajwani natawila, chuna la akxni xataxkajwani tawila akgatunu papa’. Xla chuntiya natamakgxtakga kxchik tutumpuxamachaxan kilhtamaku asta akxni nialh xataxkajwani nawan. 6 Akxni namakgatsi kilhtamaku xlakata nialh xataxkajwani natawila xlakata malakachinilh chatum kgawasa o chatum tsumat, lakatsu niku laktanukan ktabernáculo,* nalini sacerdote tantum xakgawasa borrego nema kgalhi akgtum kata, xlakata namakamastakan chuna la xalhkun tamakamastan chu tantum xaskgata paloma* o xastakni paloma xpalakata xtalakgalhin. 7 Sacerdote namakamasta putum uma kxlakatin Jehová chu naxapani xtalakgalhin, chu xla skulunku natawila kxlakatin Dios xlakata kgalhni nema makgalh akxni malakachininalh. Wa uma limapakgsin xpalakata puskat tiku malakachini chatum kgawasa o chatum tsumat. 8 Pero komo ni akchani xlakata natamawa tantum borrego, nalin tantiy xalakstakni paloma chu tantiy xalakgskgata paloma, tantum namakamasta chuna la xalhkun tamakamastan chu atantum xpalakata xtalakgalhin, chu sacerdote namakamasta uma xlakata tlan natapatikan xtalakgalhin chu xla xaskulunku natawila”».

13 Jehová chuntiya katachuwinalh Moisés chu Aarón. Kawanilh: 2 «Komo chatum chixku nataxtuni kunut kxmakni, pipekgx* o xintat,* tuku taxtuninitanchi kxmakni max lepra,* uma chixku nalinkan kxlakatin sacerdote Aarón o kxlakatin chatum xkgawasa, tiku na sacerdote litaxtu. 3 Sacerdote liwana naʼakxilhni niku tsitsin xmakni. Komo anta niku tsitsin snapapa tasiya xchixit chu tlakg pulhman xtsitsi, lepra tuku kgalhi. Sacerdote liwana naʼakxilha chu nawan pi ni xaskulunku. 4 Pero komo xintat nema taxtuninit kxmakni ni snapapa chu ni pulhman xtsitsi chu xchixit ni snapapa, sacerdote nalimapakgsi pi ni nataxtu akgtujun kilhtamaku. 5 Xliʼakgtujun kilhtamaku, sacerdote naʼakxilhpara. Komo xtsitsi ni talakgatuminit kxmakni, sacerdote nalimapakgsipara pi ni nataxtu aʼakgtujun kilhtamaku.

6 »Xliʼakgtujun kilhtamaku, sacerdote naʼakxilhpara. Komo nialh kgalhi xtsitsi chu ni talakgatuminit kxmakni, sacerdote nawan pi xaskulunku. Ni xasnun tsitsi kgalhi. Wa xlakata uma chixku nachakge klhakgat chu xaskulunku nawan. 7 Pero komo taxtunipara tsitsi kxmakni chu talakgatumi, maski sacerdote xwanita pi xaskulunku xwanit, nalakgampara sacerdote. 8 Sacerdote liwana naʼakxilha. Komo xtsitsi talakgatuminit kxmakni, sacerdote nawan pi ni xaskulunku. Kgalhi lepra.

9 »Komo chatum chixku nachipa lepra, nalinkan kxlakatin sacerdote, 10 sacerdote liwana naʼakxilha. Komo kunut nema kgalhi kxmakni xasnapapa chu anta xchixit snapapa chu takilhkinit xkunut, 11 xasnun lepra kgalhi kxmakni, chu sacerdote nawan pi ni xaskulunku. Ni talakaskin lakatum niku namanukan chu naʼakxilhparakan alistalh, xlakata ni xaskulunku. 12 Pero komo lepra natalakgatumi putuminika kxmakni chu uma tajatat nakgalhi lata kxʼakgxakga asta kxtantun, asta niku sacerdote tlan akxilha, 13 chu sacerdote liwana akxilhnit chu akxilha pi lepra talakgatuminit putuminika kxmakni, nawan pi xaskulunku tiku kgalhi tajatat.* Xla xaskulunku xlakata lepra putuminika snapapa wanit. 14 Pero komo wi niku natakilhkini xtsitsi, xla nialh xaskulunku katiwa. 15 Akxni sacerdote naʼakxilha pi takilhkinit xtsisi, nawan pi nialh xaskulunku. Tsitsi nema takilhkinit ni xaskulunku. Kgalhi lepra. 16 Pero komo xatakilhkin xtsitsi snapapa nawampara, xla naʼan kxlakatin sacerdote, 17 chu sacerdote liwana naʼakxilha. Komo niku tsitsin snapapa nawan, sacerdote nawan pi xaskulunku tiku xkgalhi tajatat. Xla xaskulunku.

18 »Komo wi tiku nataxtuniyachi kxmakni xalixkajni tsitsi chu napaksa, 19 pero niku xkgalhi xalixkajni tsitsi nataxtuniyachi xasnapapa kunut o xintat nema spininiwa chu snapapawa tasiya, xla xliʼanat kxlakatin sacerdote. 20 Sacerdote liwana naʼakxilha. Komo tlakg pulhman xtsitsi chu anta xchixit snapapa wa, sacerdote nawan pi ni xaskulunku. Lepra tuku kgalhi anta niku xtaxtuninitanchi xalixkajni tsitsi. 21 Pero komo sacerdote naʼakxilha pi ni snapapa wanit xchixit anta chu ni pulhman xtsitsi chu tasiya pi paksnima, sacerdote nalimapakgsi pi ni nataxtu akgtujun kilhtamaku. 22 Chu komo talakgatuminit kxmakni, sacerdote nawan pi ni xaskulunku. Xla kgalhi lepra. 23 Pero komo xintat chuntiya tamakgxtakgnit chu ni talakgatuminit, kaj kunit niku taxtunichi xalixkajni xtsitsi, chu sacerdote nawan pi xaskulunku.

24 »O komo wi tiku nachichin chu natasiya xliwa, chu anta nataxtuniyachi xintat nema spininiwa o snapapawa, 25 sacerdote liwana naʼakxilha. Komo tlakg pulhman kxintat chu xchixit snapapa wanit anta, lepra tuku taxtuninitanchi niku chichinit, sacerdote nawan pi ni xaskulunku. Lepra tuku kgalhi. 26 Pero komo sacerdote naʼakxilha pi ni pulhman chu ni snapapa wanit xchixit niku kgalhi kxintat chu tsukunita paksa, sacerdote nalimapakgsi pi ni nataxtu akgtujun kilhtamaku. 27 Kxliʼakgtujun kilhtamaku sacerdote naʼakxilhpara, komo xintat talakgatuminit kxmakni, sacerdote nawan pi ni xaskulunku. Lepra tuku kgalhi. 28 Pero komo kxintat chuntiya tamakgxtakgnit chu ni talakgatuminit kxmakni chu tsukunita paksa, kaj kunit niku chichinit, chu sacerdote nawan pi xaskulunku, xlakata kaj kunit niku chichinit.

29 »Komo chatum chixku o chatum puskat kgalhi tsitsi kxʼakgxakga o kxkgalhtsan, 30 sacerdote liwana naʼakxilha xtsitsi. Komo xtsitsi tlakg pulhman chu xchixit smukuku tasiya chu ni lhuwa kgalhi, sacerdote nawan pi ni xaskulunku. Kgalhi tsitsi kxʼakgxakga o kxkgalhtsan. Lepra tuku kgalhi kxʼakgxakga o kxkgalhtsan. 31 Pero komo sacerdote naʼakxilha pi xtsitsi ni pulhman chu ni kgalhi xatsitsakga xchixit anta, sacerdote nalimapakgsi pi ni nataxtu akgtujun kilhtamaku. 32 Kxliʼakgtujun kilhtamaku, sacerdote naʼakxilhnipara xtsitsi. Komo xtsitsi ni talakgatuminit, ni pulhman chu ni kgalhi xasmukuku xchixit anta, 33 uma lataman nataswika, pero ni naswika niku tsitsin. Chu sacerdote nalimapakgsi pi ni nataxtu akgtujun kilhtamaku.

34 »Kxliʼakgtujun kilhtamaku sacerdote naʼakxilhnipara xtsitsi. Komo xtsitsi nema kgalhi kxʼakgxakga chu kxkgalhtsan ni pulhman chu ni talakgatuminit kxmakni, sacerdote nawan pi xaskulunku, chu xla nachakge klhakgat chu xaskulunku nawan. 35 Pero komo xtsitsi natalakgatumi putum kxmakni akxni taskulunkinita, 36 sacerdote liwana naʼakxilha. Komo xtsitsi talakgatuminit putum kxmakni, ni talakaskin pi sacerdote naʼakxilha komo smukuku wanit xchixit: uma lataman ni xaskulunku. 37 Pero komo akxni naʼakxilhkan, xtsitsi ni talakgatuminit chu pulhnit xatsitsakga xchixit anta, xtsitsi paksnita. Xla xaskulunku, chu sacerdote nawan pi xaskulunku.

38 »Komo chatum chixku o chatum puskat nataxtuniyachi xintat kxmakni chu uma xintat snapapa, 39 sacerdote liwana naʼakxilha. Komo xintat nema taxtuninitanchi snapapawa, ni xasnun tuku kgalhi. Uma lataman xaskulunku.

40 »Komo chatum chixku naʼakgyuja chu akglhtantala* nawan, xla xaskulunku. 41 Komo nayuja xchixit kxmuxtin* chu mulhtantala nawan, xla xaskulunku. 42 Pero komo nataxtuniyachi tsitsi nema snapapawa chu spininiwa niku akglhtantala o kxmuxtin, lepra nema aktaxtumachi o mutaxtumachi. 43 Sacerdote liwana naʼakxilha. Komo niku akglhtantala chu mulhtantala taxtuninitanchi kunut nema snapapawa chu spininiwa chu xtachuna la lepra tasiya, 44 xla kgalhi lepra. Ni xaskulunku, chu sacerdote nawan pi ni xaskulunku xlakata taxtuninitanchi lepra kxʼakgxakga. 45 Tiku kgalhi lepra nawili xataxtitni klhakgat chu lhtimpuk* naʼakwan. Nachuna, natakgalhtlapa* chu pixlanka nawan: “¡Ni xaskulunku, ni xaskulunku!”. 46 Ni xaskulunku katiwa putum kilhtamaku nema nakgalhi lepra. Tanu xlitawilat xlakata ni xaskulunku. Xlilatamat kxkilhtin kachikin.

47 »Komo nataxtuniyachi lepra maktum lhakgat xalana o xalino, 48 max xʼhilo maktum xatastaw lhakgat xalana o xalino, o kmaktum xuwa o atanu tuku litatlawanit xuwa, 49 uma wamputun, komo lhakgat, xuwa, xʼhilo maktum xatastaw lhakgat o atanu tuku litlawakanit xuwa taxtuni tuku xtakniwa chu smukukuwa o tuku spininiwa, tuku kgalhi wa lepra, chu xlitamasiyanit sacerdote. 50 Sacerdote liwana naʼakxilha tajatat, chu tuku kgalhi lepra tanu nawili akgtujun kilhtamaku. 51 Xliʼakgtujun kilhtamaku, xla liwana naʼakxilha tajatat. Komo naʼakxilha pi uma talakgatuminit klhakgat, kxʼhilo maktum xatastaw lhakgat o kxuwa (o putum tuku litatlawanit xuwa), uma ni xaskulunku xlakata kgalhi xalixkajni lepra. 52 Xla nalhkuyu lhakgat, xʼhilo xatastaw lhakgat nema litatlawanit lana o lino, o putum tuku litatlawanit xuwa nema taxtunichi uma tajatat, uma xlitalhkuyut xlakata uma xalixkajni lepra.

53 »Pero komo sacerdote naʼakxilha pi uma ni talakgatuminit klhakgat, kxʼhilo xatastaw lhakgat o putum tuku litatlawanit xuwa, 54 sacerdote nalimapakgsinan pi kachakgeka uma tuku pasanit tajatat, chu aʼakgtujun kilhtamaku tanu nawili. 55 Alistalh akxni liwana chakgekanita nawan, sacerdote liwana naʼakxilha uma tuku pasanit tajatat. Komo tuku kgalhi ni talakgpalinit la tasiya, maski ni talakgatuminit, uma ni xaskulunku. Uma mililhkuyut, xlakata kxmakni o kxpulakni nialh tlan.

56 »Pero akxni liwana chakgekanita chu sacerdote naʼakxilha pi uma tuku kgalhi nialh lu tasiya, xla naxtitmaktini lhakgat, xuwa o xʼhilo xatastaw lhakgat niku kgalhi tajatat. 57 Pero komo lhakgat, xʼhilo xatastaw lhakgat o tuku litatlawanit xuwa, alakatanu niku taxtuniyachi tajatat chu uma talakgatumi, nalhkuyuya putum tuku kgalhi tajatat. 58 Pero komo lhakgat, xʼhilo xatastaw lhakgat o putum tuku litatlawanit xuwa nema wix chakgenitata nialh kgalhi tajatat, amakgtum xlitachakget, chu uma xaskulunku nawan.

59 »Wa uma limapakgsin xlakata maktum lhakgat xalana o xalino, xʼhilo xatastaw lhakgat o putum tuku litatlawanit xuwa nema kgalhi lepra, xlakata tlan nawankan pi xaskulunku o ni xaskulunku».

14 Jehová chuntiya wanilh Moisés: 2 «Wa uma limapakgsin nema xlitamakgantaxtit akxni tiku kgalhi lepra nalinkan kxlakatin sacerdote chu xla nawan pi xaskulunku. 3 Sacerdote naʼan kxkilhtin kachikin chu liwana naʼakxilha. Komo tiku kgalhi lepra paksnita, 4 sacerdote nalimapakgsi pi kalilh tantiy xastakna tsiktsi nema xaskulunku, xakiwi puksnankiwi, lu xaspinini hilo chu hisopo* xlakata nalimaskulunkikan. 5 Sacerdote nalimapakgsinan pi kamakgnika tantum tsiktsi kxkgalhni xalu niku tajuma chuchut xalak kgalhtuchokgo. 6 Akxni natiya xastakna tsiktsi na natiya xakiwi puksnankiwi, lu xaspinini hilo chu hisopo, chu nakalimastaja xkgalhni tsiktsi nema talakglalh* chuchut xalak kgalhtuchokgo akxni makgnika. 7 Chu makgtujun nalitsakglhmani kgalhni tiku taskulunkima xpalakata lepra chu sacerdote nawan pi xaskulunku, chu kalakgwan namakgxtakga xastakna tsiktsi.

8 »Tiku taskulunkima nachakge klhakgat, putuminika naswika xʼakgxakga chu xmakni, chuna xaskulunku nawan. Alistalh tlan natanu kkachikin, pero akgtujun kilhtamaku ni katitanulh kxchik xaxuwa. 9 Xliʼakgtujun kilhtamaku nataʼakswika, natakgalhswika chu naswika xlakgatsisit.* Akxni taswiknita nawan, nachakge klhakgat chu napaxa, chuna xaskulunku nawan.

10 »Xliʼakgtsayan kilhtamaku natiya tantiy ni xatatatla chu xaʼaktsujku borrego, tantum xatsumat borrego nema akgtum kata kgalhi, akgtutu kilo aitat* xatlan harina nema talakgwilhakanit aceite chuna la tamakamastan xla talhtsi chu patum taza* aceite. 11 Sacerdote tiku nawan pi uma chixku xaskulunku, nalin chixku chu xtamakamastan kxlakatin Jehová, lakatsu niku laktanukan ktabernáculo. 12 Sacerdote natiya tantum xaʼaktsujku borrego chu namakamasta chuna la tamakamastan xpalakata tiku tlawalh tuku nitlan chu natamakamasta patum taza* aceite, chu anu anu nalimakan chuna la akgtum tamakamastan nema lakchikimikan* kxlakatin Jehová. 13 Alistalh namakgni xaʼaktsujku borrego niku kamakgnikan animales nema kamakamastakan xpalakata talakgalhin chu nema kamakamastakan chuna la xalhkun tamakamastan, anta niku xasanto, xlakata wa sacerdote lakgchan tamakamastan xpalakata tiku tlawalh tuku nitlan, chuna la tamakamastan xpalakata talakgalhin. Uma xasanto.

14 »Chu sacerdote nalitlawa tsinu xkgalhni tamakamastan xpalakata tiku tlawalh tuku nitlan kxtakgen xalak xpakgastakat* tiku maskulunkimaka, nachuna xakgelanka xmakan* xalak xpakgastakat chu xakgelanka xtantun* xalak xpakgastakat. 15 Chu aceite nema tajuma ktaza, sacerdote naxtakgawaka tsinu kxmakgxtampun xalak xpakgxwiki.* 16 Alistalh sacerdote nalitlawa tsinu xmakan xalak xpakgastakat aceite nema wi xmakgxtampun xalak xpakgxwiki, chu xmakan makgtujun nalitsakglhmakan tsinu aceite kxlakatin Jehová. 17 Alistalh, aceite nema akgataxtulh kxmakgxtampun xmakan sacerdote, nalitlawani xtakgen xalak xpakgastakat tiku maskulunkimaka, nachuna xakgelanka xmakan xalak xpakgastakat chu xakgelanka xtantun xalak xpakgastakat, chuna aceite nakgalhmawaka xkgalhni tamakamastan xpalakata tiku tlawalh tuku nitlan. 18 Chu aceite nema akgataxtulh kxmakgxtampun sacerdote, naʼakmawaka tiku maskulunkimaka, wa uma tuku sacerdote natlawa xlakata lataman tlan natapatikan kxlakatin Jehová.

19 »Sacerdote namakgni animal nema namakamastakan xpalakata talakgalhin xlakata chuna tlan natapatikan xtalakgalhin tiku maskulunkimaka, chu alistalh namakgni animal nema namakamastakan chuna la xalhkun tamakamastan. 20 Chu sacerdote namakamasta xalhkun tamakamastan chu tamakamastan xla talhtsi kxʼakpun pumakamastan. Wa uma tuku sacerdote natlawa xlakata lataman tlan natapatikan, chu xla xaskulunku nawan.

21 »Pero komo xla limaxkgen chu ni lhuwa tuku kgalhi, nalin tantum xaʼaktsujku borrego chuna la tamakamastan nema tlawakan akxni wi tiku tlawa tuku nitlan, chu nalakchikimi* xlakata xla tlan natapatikan, na nalin akgtum kilo* xatlan harina nema talakgwilhakanit aceite chuna la tamakamastan xla talhtsi chu patum taza aceite, 22 chu tantiy xalakstakni paloma o tantiy xalakgskgata paloma, chuna la tuku xla tlan masta. Tantum namaklakaskinkan chuna la tamakamastan xpalakata talakgalhin chu atantum chuna la xalhkun tamakamastan. 23 Xliʼakgtsayan kilhtamaku, xla nalini sacerdote putum uma lakatsu niku laktanukan ktabernáculo, kxlakatin Jehová, xlakata namaskulunkikan.

24 »Sacerdote natiya xaʼaktsujku borrego nema makamastamaka xpalakata tiku tlawalh tuku nitlan chu patum taza aceite, chu anu anu nalimakan chuna la tamakamastan nema lakchikimikan kxlakatin Jehová. 25 Alistalh namakgni xaʼaktsujku borrego nema makamastamaka xpalakata tiku tlawalh tuku nitlan. Chu sacerdote nalitlawa tsinu xkgalhni tamakamastan xpalakata tiku lin kuenta kxtakgen xalak xpakgastakat tiku maskulunkimaka, nachuna xakgelanka xmakan xalak xpakgastakat chu xakgelanka xtantun xalak xpakgastakat. 26 Sacerdote naxtakgawaka tsinu aceite kxmakgxtampun xalak xpakgxwiki 27 chu alistalh xmakan xalak xpakgastakat makgtujun nalitsakglhmani tsinu aceite nema wi kxmakgxtampun xalak xpakgxwiki kxlakatin Jehová. 28 Chu sacerdote nalitlawani aceite nema wi xmakgxtampun xtakgen xalak xpakgastakat tiku maskulunkimaka, nachuna xakgelanka xmakan xalak xpakgastakat chu xakgelanka xtantun xalak xpakgastakat, anta niku mawakanilh xkgalhni tamakamastan xpalakata tiku tlawalh tuku nitlan. 29 Alistalh, aceite nema akgataxtulh kxmakgxtampun sacerdote, naʼakmawaka tiku maskulunkimaka, xlakata chuna xla tlan natapatikan kxlakatin Jehová.

30 »Xla namasta tantum xastakni paloma o tantum xaskgata paloma, chuna la tuku xla tlan masta, 31 tsiktsi nema xla tlan natekgsa, namakamasta xpalakata talakgalhin. Atanu tsiktsi namakamasta chuna la xalhkun tamakamastan, natamakamasta tamakamastan xla talhtsi. Wa uma tuku sacerdote natlawa xlakata lataman tlan natapatikan kxlakatin Jehová.

32 »Wa uma limapakgsin xlakata tlan namaskulunkikan tiku xkgalhi lepra pero ni lhuwa tuku kgalhi».

33 Alistalh Jehová wanilh Moisés chu Aarón: 34 «Akxni natanuyatit kxtiyat Canaán nema nakkamakamaxkiyan, chu akit naktlawa pi akgtum chiki xalak uma kachikin nakgalhi lepra, 35 tiku tapakgsini uma chiki nalakgan sacerdote chu nawani: “Kinchik taxtunilh akgtum tajatat”. 36 Sacerdote nalimapakgsinan pi katamakxtuka putum tuku tanuma kchiki akxni xla nina an akxilha tajatat nema taxtunilh chiki; chuna xla ni katiwa pi xataxkajwani putum tuku anan kchiki. Alistalh sacerdote natanu xlakata naʼakxilha chiki. 37 Liwana naʼakxilha niku taxtuninitanchi tajatat, chu komo niku lakalhukunkgo patsaps, xtakniwa, smukukuwa o spininiwa chu lu pulhman tasiyakgo, 38 sacerdote naʼan kxkilhtin chiki chu nalimapakgsininan pi niti natanu kchiki akgtujun kilhtamaku.

39 »Xliʼakgtujun kilhtamaku, sacerdote naʼakxilhpara chiki. Komo niku taxtunit tajatat talakgatuminit kpatsaps, 40 sacerdote nalimapakgsinan pi napakglhxtukan chiwix nema kgalhi tajatat chu namakgankan kxkilhtin kachikin, anta niku ni xakaskulunku. 41 Alistalh nalimapakgsinan pi liwana nalakaxwikkan xpulakni chiki. Yeso chu mezcla* nema namaktinikan namakgankan kxkilhtin kachikin, anta niku ni xakaskulunku. 42 Niku xwilakgo chiwix nema kapakglhxtuka namanuniparakan xasasti chiwix, chu nalimapakgsinan pi namawakaniparakan chiki atanu mezcla.

43 »Pero komo akxni pakglhxtuka chiwix, lakaxwikka chu mawakaniparaka mezcla taxtuniparayachi tajatat, 44 sacerdote natanupara kchiki chu liwana naʼakxilha. Komo tajatat talakgatuminit kchiki, kgalhi xalixkajni lepra. Chiki ni xaskulunku. 45 Xla nalimapakgsinan pi kalaktilhka chiki, xchiwix, xkiwi, xyeso chu xmezcla chiki, chu namakgankan xkilhtin kachikin, anta niku ni xakaskulunku. 46 Pero komo wi tiku natanu kchiki akxni wankanit pi ni natanukan, xataxkajwani natawila asta kakgotanun, 47 putum tiku nalhtata kchiki xlichakget klhakgat chu putum tiku nawayan kchiki xlichakget klhakgat.

48 »Pero komo akxni mawakaniparakanita mezcla, chu sacerdote akxilha pi tajatat ni talakgatuminit, nawan pi chiki xaskulunku xlakata nialh kgalhi tajatat. 49 Xlakata tlan namaskulunki chiki, natiya tantiy tsiktsi, xakiwi puksnankiwi, lu xaspinini hilo chu hisopo. 50 Namakgni tantum tsiktsi kxkgalhni xalu niku tajuma chuchut xalak kgalhtuchokgo. 51 Alistalh natiya xakiwi puksnankiwi, hisopo, lu xaspinini hilo, xastakna tsiktsi, chu nakalimastaja xkgalhni tsiktsi nema talakglalh chuchut xalak kgalhtuchokgo akxni makgnika, chu makgtujun natsakglhmakani chiki uma kgalhni. 52 Chu nalimaskulunki chiki xkgalhni tsiktsi, chuchut xalak kgalhtuchokgo, xastakna tsiktsi, xakiwi puksnankiwi, hisopo chu lu xaspinini hilo. 53 Alistalh namakgxtakga xastakna tsiktsi kxkilhtin kachikin, niku kalakgwan, chu namaskulunki chiki, chu uma nialh xataxkajwani katiwa.

54 »Wa uma limapakgsin xlakata lepra, tiku kgalhi tsitsi kxʼakgxakga o kxkgalhtsan, 55 lepra nema kgalhi lhakgat o chiki, 56 chu xlakata kunut, pipekgx* chu xintat,* 57 xlakata tlan nawankan komo wi tuku xaskulunku o ni xaskulunku. Wa uma limapakgsin xlakata lepra».

15 Jehová chuntiya katachuwinalh Moisés chu Aarón, chu kawanilh: 2 «Kakatachuwinantit israelitas chu kakawanitit: “Komo chatum chixku wi tuku natsuku makgan* kxlichixku, uma natlawa pi ni xaskulunku nawan. 3 Xla ni xaskulunku xlakata tuku makgama; komo uma chuntiya namakgan o komo uma natlawa pi xlichixku natalakchuwani, xla chuntiya ni xaskulunku katiwa.

4 »”Kputama niku natama tiku wi tuku makgama kxlichixku ni xaskulunku katiwa, chu anta niku natawila na ni xaskulunku katiwa. 5 Putum tiku naxama uma putama xlichakget klhakgat chu xlipaxat, chu ni xaskulunku katiwa asta kakgotanun. 6 Putum tiku natawila niku tawilalh tiku wi tuku makgama kxlichixku, xlichakget klhakgat chu xlipaxat, chu anta niku natawila na ni xaskulunku katiwa. 7 Putum tiku naxama tiku wi tuku makgama kxlichixku xlichakget klhakgat chu xlipaxat, chu ni xaskulunku katiwa asta kakgotanun. 8 Komo chatum chixku wi tuku makgama kxlichixku nachujmani tiku xaskulunku, tiku chujmanika xlichakget klhakgat chu xlipaxat, chu ni xaskulunku katiwa asta kakgotanun. 9 Akxni chixku wi tuku makgama kxlichixku nakgetawila tantum animal, tuku nalaktawila ni xaskulunku katiwa. 10 Putum tiku naxama niku xla tawi xataxkajwani nawan asta kakgotanun chu putum tiku nachaxa niku tawilalh, xlichakget klhakgat chu xlipaxat, chu ni xaskulunku katiwa asta kakgotanun. 11 Komo chatum chixku wi tuku makgama kxlichixku nina makgachakgan chu wi tiku naxama, tiku naxamakan xlichakget klhakgat chu xlipaxat, chu ni xaskulunku katiwa asta kakgotanun. 12 Xalu nema naxama uma chixku xlitapakglhat, chu komo naxama tuku litlawakanit kiwi, xlitachakget.

13 »”Akxni chixku nialh makgama nawan tuku xmakgama kxlichixku chu paksnita nawan, naputlekge akgtujun kilhtamaku xlakata tlan nataskulunki, chu xla xlichakget klhakgat chu nalipaxa chuchut xalak kgalhtuchokgo, chu chuna xaskulunku nawan. 14 Xliʼakgtsayan kilhtamaku natiya tantiy xalakstakni paloma o tantiy xalakgskgata paloma, nalin kxlakatin Jehová lakatsu niku laktanukan ktabernáculo chu namakamaxki sacerdote. 15 Sacerdote nakamakamasta tsiktsi, tantum xpalakata talakgalhin chu atantum namakamasta chuna la xalhkun tamakamastan. Wa uma tuku sacerdote natlawa xlakata lataman tlan namaskulunkikan kxlakatin Jehová xpalakata xtajatat.

16 »”Nachuna, komo chatum chixku namakgan ksemen, putuminika xlipaxat, chu ni xaskulunku katiwa asta kakgotanun. 17 Nachakge klhakgat o putum tuku litatlawanit xuwa nema pasanit semen, chu uma ni xaskulunku katiwa asta kakgotanun.

18 »”Akxni chatum chixku natatalakgxtumi chatum puskat chu chixku taxtuni ksemen, xchatiykan napaxkgo, chu ni xaskulunku katiwankgolh asta kakgotanun.

19 »”Komo chatum puskat lakgstaja xlakata tuku titaxtu akgatunu papaʼ, ni xaskulunku katiwa akgtujun kilhtamaku. Putum tuku naxama ni xaskulunku katiwa asta kakgotanun. 20 Putum tuku nalaktama akxni ni xaskulunku wi xlakata lakgstajma, ni xaskulunku katiwa, chu putum tuku nalaktawila ni xaskulunku katiwa. 21 Putum tiku naxama xputama xlichakget klhakgat chu xlipaxat, chu ni xaskulunku katiwa asta kakgotanun. 22 Putum tiku naxama tuku xla nalaktawila, xlichakget klhakgat chu xlipaxat, chu ni xaskulunku katiwa asta kakgotanun. 23 Komo wi tiku naxama xputama o niku xla tawi, tiku xamalh uma ni xaskulunku katiwa asta kakgotanun. 24 Komo chatum chixku natatalakgxtumi uma puskat chu napasa xkgalhni, chixku ni xaskulunku katiwa akgtujun kilhtamaku, chu kputama niku xla natama ni xaskulunku katiwa.

25 »”Komo puskat lakgstaja lhuwa kilhtamaku chu ni xkilhtamaku tuku titaxtu akgatunu papaʼ o tlakg lhuwa kilhtamaku makgapala akxni lakgstaja, kilhtamaku nema nalakgstaja ni xaskulunku katiwa, chuna la akxni lakgstaja akgatunu papaʼ. 26 Putama niku natama akxni lakgstajma ni xaskulunku katiwa, chuna la xputama ni xaskulunku wan akxni lakgstaja akgatunu papaʼ, chu putum tuku nalaktawila ni xaskulunku katiwa, chuna la akxni lakgstaja akgatunu papaʼ. 27 Putum tiku naxama umakgolh ni xaskulunku katiwa. Xlichakget klhakgat chu xlipaxat, chu ni xaskulunku katiwa asta kakgotanun.

28 »”Pero akxni nialh nalakgstaja, xla naputlekge akgtujun kilhtamaku chu alistalh xaskulunku nawan. 29 Xliʼakgtsayan kilhtamaku natiya tantiy xalakstakni paloma o tantiy xalakgskgata paloma, chu nalini sacerdote lakatsu niku laktanukan ktabernáculo. 30 Sacerdote namakamasta tantum tsiktsi xpalakata talakgalhin chu atantum namakamasta chuna la xalhkun tamakamastan. Wa uma tuku sacerdote natlawa xlakata puskat tiku lakgstaja tlan namaskulunkikan kxlakatin Jehová.

31 »”Nakamakgtayayatit israelitas xlakata xaskulunku nawankgo. Komo xlakan ni xaskulunku natawilakgo, kintabernáculo nema wi kxlakgstipankan, ni xaskulunku katitawi chu xlakan nanikgo.

32 »”Wa uma limapakgsin nema xlimakgantaxtit chixku tiku wi tuku makgan kxlichixku, chixku tiku ni xaskulunku xlakata makgan ksemen, 33 puskat tiku ni xaskulunku tawila xlakata tuku titaxtu akgatunu papaʼ, putum tiku wi tuku namakgan kxlichixku o kxlipuskat, chu chixku tiku tatalakgxtumi chatum puskat tiku ni xaskulunku wi”».

16 Jehová tachuwinalh Moisés akxni xnikgonita chatiy xlakgkgawasan Aarón xlakata ni maxkikgolh kakni Jehová akxni talakatsuwinikgolh. 2 Jehová wanilh Moisés: «Kawani mintala Aarón pi ni xlitanut akxni xla nalakaskin kxaʼalakgaputu cortina nema waka niku xasanto, kxlakatin xkgalhtawilh Arca, chuna ni nani, xlakata akit naktasiya kʼakgtum puklhni kxkgalhtawilh Arca.

3 »Wa uma tuku nalin Aarón akxni naʼan niku xasanto: tantum xaʼaktsujku toro nema namakamasta xpalakata talakgalhin chu tantum borrego nema namakamasta chuna la xalhkun tamakamastan. 4 Nalhakga xlakaskinka lhakgat nema litatlawanit lino chu nawili xlitatampulakgchin, na nawili xtatanu xalino xlakata ni xalhtantala* natasiya kxtampin klhakgat chu naʼaktawila xlakaskinka litakgchin. Putum uma lhakgat, xasanto. Xla napaxa chu nakalhakga.

5 »Israelitas namaxkikgo Aarón tantiy xalaktsujku cabras chuna la tamakamastan xpalakata talakgalhin chu tantum borrego chuna la xalhkun tamakamastan.

6 »Chu Aarón namalakatsuwi toro nema namakamasta xpalakata xtalakgalhin, chuna natapatikan xtalakgalhin chu xtalakgalhinkan tiku tapakgsikgo kxchik.

7 »Chu nakatiya tantiy xalaktsujku cabra chu nakawili kxlakatin Jehová lakatsu niku laktanukan ktabernáculo. 8 Aarón nakalimakan suerte tantiy xalaktsujku cabra xlakata nakatsi tuku nalakgchan Jehová chu tuku xla Azazel.* 9 Aarón namalakatsuwi xaʼaktsujku cabra nema lakgchalh Jehová chu namakamasta chuna la tamakamastan xpalakata talakgalhin. 10 Pero xaʼaktsujku cabra nema lakgchalh Azazel xastakna nalinkan kxlakatin Jehová xlakata chuna tlan namalakgachanikan Azazel kxakaskakni tiyat chu chuna tlan natapatikan xtalakgalhin kachikin Israel.

11 »Aarón namalakatsuwi toro nema namakamasta xpalakata xtalakgalhin, xlakata natapatikan xtalakgalhin chu xtalakgalhinkan tiku tapakgsikgo kxchik. Chu namakgni uma toro xpalakata xtalakgalhin.

12 »Alistalh natiya niku mujukan jalanat chu nalimatsama xalakgpasan jalanat nema wi kpumakamastan kxlakatin Jehová, chu alistalh makgtiy nalitiya xmakgxtampun xaxtapokgo xamuksun incienso, chu nakalin kxchakgen cortina. 13 Na namakan incienso klhkuyat kxlakatin Jehová, chu xjini incienso nalitatsama xkgalhtawilh arca xla talakkaxlan, Aarón chuna natlawa xlakata ni nani.

14 »Xmakan nalitsakglhmakan tsinu xkgalhni toro kxlakatin xkgalhtawilh Arca, anta kxʼeste. Makgtujun nalitsakglhmani kgalhni kxlakatin xkgalhtawilh Arca.

15 »Alistalh namakgni xaʼaktsujku cabra nema namakamasta xpalakata xtalakgalhin kachikin. Nalin xkgalhni kxaʼalakgaputu cortina, chu uma kgalhni namaklakaskin chuna la maklaskilh xkgalhni toro. Natsakglhmakan kxlakatin kgalhtawilh.

16 »Wa uma tuku xlitlawat xlakata Dios tlan namakgamakglhtinan niku xasanto, xlakata israelitas nitlan tuku tlawakgonit, xlakata lakatsalakgonit limapakgsin chu xlakata xtalakgalhinkan. Nachuna xlitlawat xpalakata tabernáculo, nema wi kxlakgstipankan israelitas, tiku ni xaskulunku wilakgo.

17 »Niti xlitanut ktabernáculo lata akxni Aarón natanu xlakata naxapa talakgalhin anta niku xasanto asta akxni nataxtu. Xla naskin xlakata natapatikan xtalakgalhin, xtalakgalhinkan tiku tapakgsikgo kxchik chu xtalakgalhin kachikin Israel.

18 »Chu Aarón naʼan niku wi pumakamastan, nema wi kxlakatin Jehová, chu namaskulunki, chu xʼakgalokgot pumakamastan nakalitlawa tsinu xkgalhni toro chu xkgalhni xaʼaktsujku cabra. 19 Chu xmakan makgtujun nalitsakgalhmani tsinu kgalhni xʼakpun pumakamastan, chuna namaskulunki chu namasantujli xlakata tuku nitlan tlawakgonit israelitas.

20 »Akxni maskulunkinita nawan niku xasanto, tabernáculo* chu pumakamastan, na namakamasta xastakna xaʼaktsujku cabra. 21 Aarón xmakgatiy nawili xmakan kxʼakgxakga xastakna xaʼaktsujku cabra chu nawan putum tuku nitlan tlawakgonit israelitas, chuna la lakatsalakgonit limapakgsin chu putum xtalakgalhinkan, xtachuna la komo xwililh putum xtalakgalhinkan kxʼakgxakga xaʼaktsujku cabra chu chatum chixku tiku laksakkanit nalin kxakaskakni tiyat. 22 Xaʼaktsujku cabra nalin putum xtalakgalhinkan, nalin kxakaskakni tiyat, chu xla namalakgacha xaʼaktsujku cabra kxakaskakni tiyat.

23 »Alistalh Aarón natanu ktabernáculo, nalakgpali* klhakgat xalino nema lhakgalh akxni tanulh niku xasanto, chu anta namakgxtakga. 24 Napaxa anta niku xasanto chu nalhakga klhakgat. Alistalh nataxtu chu namakamasta xalhkun xtamakamastan chu xalhkun xtamakamastan kachikin, chu naskin xlakata natapatikan xtalakgalhin chu xtalakgalhin kachikin. 25 Namajini kxʼakpun pumakamastan xmanteca tamakamastan xpalakata talakgalhin.

26 »Chixku tiku malakgachalh xaʼaktsujku cabra xla Azazel, xlichakget klhakgat chu xlipaxat; alistalh tlan natanupara kkachikin.

27 »Chu tuku akgataxtunilh toro chu xaʼaktsujku cabra nema kamakamastaka xpalakata talakgalhin, nema xkgalhnikan kalinka niku xasanto xlakata lixapaka talakgalhin, nakalinkan kxkilhtin kachikin, chu nakalhkuyukan xmakgxuwakan, xliwakan chu xkgatsasakan.* 28 Chixku tiku nakalhkuyu, xlichakget klhakgat chu xlipaxat; alistalh tlan natanu kkachikin.

29 »Uma akgtum limapakgsin mimpalakatakan nema lhuwa kilhtamaku namakgapala: kilhtamaku akgkaw, xliʼakgtujun papaʼ, milimasiyatkan pi lilipuwanatit mintalakgalhinkan,* chu nipara tipatum taskujut natlawayatit, wixin tiku xalak uma país chu tiku xalak atanu país nema lama kmilakgstipankan. 30 Uma kilhtamaku nakatapatikanatit mintalakgalhinkan xlakata xaskulunku nawanatit. Xaskulunku nawanatit kxlakatin Jehová. 31 Milijaxatkan, xlakata akgtum sábado mimpalakatakan, chu milimasiyatkan pi lilipuwanatit mintalakgalhinkan. Uma akgtum limapakgsin nema lhuwa kilhtamaku namakgapala.

32 »Sacerdote tiku nalaksakkan chu natawila xlakgxokgo xtlat, natlawa tamakamastan xlakata naxapa talakgalhin chu xliwilit klhakgat nema kalitlawakanit lino, lhakgat nema xasanto litaxtukgo. 33 Naxapa talakgalhin xpalakata niku xasanto, xpalakata tabernáculo, xpalakata pumakamastan, xpalakata sacerdotes chu xpalakatakan putum israelitas. 34 Uma akgtum limapakgsin nema lhuwa kilhtamaku namakgapala mimpalakatakan, chuna tlan nakaxapaniyatit xtalakgalhinkan israelitas makgtum akgatunu kata xlakata putum talakgalhin nema tlawakgo».

Chu xla tlawalh chuna la Jehová xlimapakgsinit Moisés.

17 Jehová chuntiya wanilh Moisés: 2 «Kakatachuwinanti Aarón chu xlakgkgawasan chu putum israelitas. Kakawani: “Wa uma tuku Jehová limapakgsinanit:

3 »”«Chatum chixku xalak Israel ni xlimakgnit tantum toro, tantum xaʼaktsujku borrego o tantum cabra kxpulakni o kxkilhtin kachikin, 4 wata nalimin lakatsu niku laktanukan kxtabernáculo* Jehová, xlakata namakamaxki Jehová. Komo xla namakgni animal kxpulakni o kxkilhtin kachikin, nalitawila kuenta xlakata stajmakgalh kgalhni. Xlakata stajmakgalh kgalhni, uma chixku namakgnikan. 5 Wa xlakata israelitas nalinikgo tamakamastan Jehová lakatsu niku laktanukan ktabernáculo, nema la uku kalakgwan makamastamakgo, chu namakamaxkikgo sacerdote. Xlakan namakamaxkikgo Jehová chuna la tamakamastan xla takaksni. 6 Chu sacerdote nalitsakglhmani kgalhni xpumakamastan Jehová lakatsu niku laktanukan ktabernáculo, chu namajini manteca chuna la akgtum tamakamastan nema Jehová lu muksun nakgankgawanan. 7 Wa xlakata nialh nakatlawanikgo tamakamastan demonios nema tasiyakgo xtachuna la cabras* chu nema xlakan kakninanikgo.* Wa uma akgtum limapakgsin nema lhuwa kilhtamaku namakgapala chu milimakgantaxtitkan wixin, minkamanankan chu putum tiku aku nalakachintilhakgo»”.

8 »Na nakawaniya: “Komo chatum chixku tiku tapakgsi kʼIsrael o tiku xalak atanu país nema lama kmilakgstipankan natlawa akgtum xalhkun tamakamastan o atanu tamakamastan 9 chu ni nalin lakatsu niku laktanukan ktabernáculo xlakata namakamaxki Jehová, namakgnikan.

10 »”Komo chatum chixku tiku tapakgsi kʼIsrael o tiku xalak atanu país nema lama kmilakgstipankan nawa kgalhni, naklakgmakgan chu nakmalakgsputu. 11 Xlakata xlatamat tuku staknan wi kkgalhni, chu akit kwilinit kx’akpun pumakamastan mimpalakatakan, chuna tlan nakatapatikanatit mintalakgalhinkan, xlakata kgalhni wa tuku xapa talakgalhin xpalakata latamat nema wi kkgalhni. 12 Wa xlakata kkawaninit israelitas: «Nipara chatum nawa kgalhni, chu na ni xliwat kgalhni tiku xalak atanu país nema lama kmilakgstipankan».

13 »”Komo chatum israelita o chatum tiku xalak atanu país nema lama kmilakgstipankan anit talatnan chu chipa tantum animal o tantum tsiktsi nema tlan wakan, xla xlistajmakganit xkgalhni chu nali’akgtapu pokgxni. 14 Xlakata xlatamat putum tuku staknan wi kxkgalhni, kkgalhni wi latamat. Wa xlakata akit kkawanilh israelitas: «Ni nawayatit kgalhni, xlakata xlatamat putum tuku staknan wi kxkgalhni. Putum tiku nawa namakgnikan». 15 Komo chatum lataman, chatum israelita o chatum tiku xalak atanu país, nawa tantum xanin animal nema xla natekgsa o nema laktsu laktsu tlawanit tantum xaluku animal, xlichakget klhakgat chu xlipaxat, chu ni xaskulunku nawan asta kakgotanun. Alistalh xaskulunku nawampara. 16 Pero komo ni nachakge klhakgat chu ni napaxa, xla nalakgaxokgo xlakata xtalakgalhin”».

18 Jehová chuntiya tachuwinalh Moisés chu wanilh: 2 «Kakawani israelitas: “Akit Jehová miDioskan. 3 Ni nalikatsiyatit chuna la likatsikgo tiku xalak Egipto, niku wixin xlapatit. Na ni natlawayatit tuku tlawakgo tiku xalak Canaán, niku kkaliman. Chu ni nalilatapayatit tuku lakkaxwilikgonit pi xlitatlawat. 4 Kamakgantaxtitit kilimapakgsin, kalilatapatit tuku klakkaxwilinit pi xlitatlawat chu kakgalhakgaxpattit. Akit Jehová miDioskan. 5 Nakgalhakgaxpatatit tuku klakkaxwilinit pi xlitatlawat chu kilimapakgsin. Tiku namakgantaxti putum uma, nalatama. Akit Jehová.

6 »”Nipara chatum wixin natatalakgxtumi xtalilakgapasni. Akit Jehová. 7 Ni natatalakgxtupiya mintlat na ni natatalakgxtupiya mintse. Xla mintse; ni natatalakgxtupiya.

8 »”Ni natatalakgxtupiya xpuskat mintlat. Xlakata uma namamaxani mintlat.

9 »”Ni natatalakgxtupiya mintala tsumat, maski xtsumat mintlat litaxtu o xtsumat mintse litaxtu, maski watiya kchiki lakachitantit o ni.

10 »”Ni natatalakgxtupiya xtsumat minkgawasa o xtsumat mintsumat, xlakata uma namamaxaniyan.

11 »”Ni natatalakgxtupiya xtsumat xpuskat mintlat, xtsumat mintlat, xlakata xla mintala tsumat.

12 »”Ni natatalakgxtupiya xtala tsumat mintlat, xlakata xla lin xkgalhni mintlat.

13 »”Ni natatalakgxtupiya xtala tsumat mintse, xlakata xla lin xkgalhni mintse.

14 »”Ni natatalakgxtupiya xpuskat xtala mintlat, xlakata namamaxaniya minkuku. Xla minapa.

15 »”Ni natatalakgxtupiya mimpuwiti,* xlakata xla xpuskat minkgawasa; ni natatalakgxtupiya.

16 »”Ni natatalakgxtupiya xpuskat mintala, xlakata uma namamaxani mintala.

17 »”Ni natatalakgxtupiya chatum puskat chu xtsumat. Ni natatamakgaxtokga xtsumat xkgawasa nipara xtsumat xtsumat xlakata natatalakgxtupiya. Xlakan familias litaxtukgo. Uma tayat lu nitlan.*

18 »”Ni natatamakgaxtokga xtala tsumat mimpuskat, xlakata natalamakgasitsi, na ni natatalakgxtupiya komo lamajku mimpuskat.

19 »”Ni natatalakgxtupiya chatum puskat akxni ni xaskulunku wi xlakata titaxtuma tuku titaxtu akgatunu papaʼ.

20 »”Ni natatalakgxtupiya xpuskat mintalakatsu,* xlakata uma natlawa pi ni xaskulunku nawana.

21 »”Ni namastaya talakaskin pi minkamanan nakamakamaxkikan Mólek. Komo chuna natlawaya namaxkajwiya xtukuwani miDios. Akit Jehová.

22 »”Ni natatalakgxtupiya chatum chixku chuna la tatalakgxtupiya chatum puskat. Uma lu lixkajni.

23 »”Nipara chatum chixku xlitatalakgxtumit tantum animal, xlakata ni xaskulunku nalitaxtu. Chu nipara chatum puskat xlitatalakgxtumit tantum animal. Uma lakatsala tuku xlilat.

24 »”Ni nalixkajwananatit putum umakgolh, xlakata wa uma tuku lixkajwanankgonit kachikinin nema nakkatamakxtu kmilakatinkan. 25 Wa xlakata, tiyat ni xaskulunku, nakkamalakgaxokge tiku lamakgolh anta xlakata xtalakgalhinkan, tiku lamakgolh kʼuma tiyat nakatamakxtukan. 26 Pero wixin nakgalhakgaxpatatit tuku klakkaxwilinit pi xlitatlawat chu kilimapakgsin, chu ni natlawayatit uma tuku lu lixkajni, nipara tiku xalak uma país chu tiku xalak atanu país nema lama kmilakgstipankan. 27 Xlakata tiku latamakgolh anta tlawakgolh uma tuku lu lixkajni, chu wa xlakata tiyat ni xaskulunku. 28 Chuna ni nakatamakxtukanatit kʼuma tiyat chuna la katamakxtumaka kachikinin nema xlamakgolh anta, xlakata limaxkajwikgonit tuku nitlan. 29 Komo wi tiku natlawa pulaktum uma tuku lu lixkajni, xlinit. 30 Wixin milimakgantaxtitkan tuku kkaskiniyan chu ni natlawayatit xalixkajni talismanin nema xtlawakan akxni nina xchitanatit, xlakata ni nalixkajwananatit umakgolh talismanin. Akit Jehová miDioskan”».

19 Jehová tachuwinampa Moisés. Wanilh: 2 «Kakatachuwinanti putum israelitas chu kakawani: “Xasanto miliwanatkan, xlakata akit, Jehová miDioskan, xasanto.

3 »”Chatunu wixin milimaxkitkan kakni* mintsekan chu mintlatkan, chu na namaxkiyatit kakni kisábado. Akit Jehová miDioskan. 4 Ni naputsayatit dioses nema nitu litaxtukgo chu na ni natlawayatit dioses xalikan.* Akit Jehová miDioskan.

5 »”Komo natlawaniyatit Jehová akgtum tamakamastan xla takaksni, namakamastayatit chuna la xlilat xlakata xla namakgamakglhtinan. 6 Uma nawakan kilhtamaku akxni namakamastakan chu lichali, pero tuku na’akgataxtu xlitalhkuyut kxli’akgtutu kilhtamaku. 7 Komo wi tiku nawa tuku akgataxtulh kxli’akgtutu kilhtamaku, uma lu lixkajni. Ni katimakgamakglhtinanka. 8 Tiku nawa nalakgaxokgo xlakata xtalakgalhin, xlakata maxkajwinit tuku xasanto akxilha Jehová; uma lataman namakgnikan.

9 »”Akxni namakiya mintachanan, ni namakiya putum tuku ya kxkilhpanin mimpukuxtu chu na ni nasaka tuku naʼakgataxtu. 10 Ni namakiya tuku akgataxtulh niku yakgo mi’uva, chu na ni namakiya nema yujkgonit. Uma nakamakgxtakgniya tiku lakglimaxkgenin* chu tiku xalak atanu país. Akit Jehová, miDioskan.

11 »”Ni nakgalhananatit, ni naʼakgskgawinanatit chu ni naʼakgskgawiyatit tiku tatlawayatit negocio. 12 Ni nalitayayatit kkintukuwani tuku ni xaxlikana, xlakata namaxkajwiyatit xtukuwani miDioskan. Akit Jehová. 13 Ni xafuerza namakglhtiya tuku tapakgsini mintalataman chu ni nakgalhanana. Namaxkiya xtaskgaw chatum skujni watiya kilhtamaku, ni natatamakgxtakga xtaskgaw asta lichali.

14 »”Ni nawana pi kaʼakgspulalh tuku nitlan tiku akgatapa, na ni nawiliya tuku naliʼakgchakgxa chatum lakgaxokgo,* chu napekuaniya miDios. Akit Jehová.

15 »”Xaʼakgstitum kalikatsitit akxni nalakputsananiyatit akgtum taʼakglhuwit. Ni nalaksakpaxkiyatit tiku limaxkgen chu ni tlakg tlan nalikatsiniyatit chatum chixku kaj xlakata kgalhi lhuwa tumin. Xaʼakgstitum kalakputsananitit mintalatamankan.

16 »”Ni namalakgatumiya taʼakgsanin kminkachikin xlakata nalimawakaya tuku nitlan achatum. Ni katuwa nawiliya xlatamat* mintalataman.* Akit Jehová.

17 »”Ni nasitsiniya mintala kminaku. Kawani tuku nitlan tlawanit mintalataman, xlakata ni nalitawilaya talakgalhin chuna la xla.

18 »”Ni nakamalakgaxokgeya mintalataman chu ni nakasitsiniya, chu milipaxkit mintalataman chuna la miʼakstu paxkikana. Akit Jehová.

19 »”Kakgalhakgaxpattit tuku klakkaxwilinit pi xlitatlawat: ni namalakgxtupiyatit tipatiy animales xalak chiki; ni nachanatit tipatiy talhtsi kmimpukuxtukan chu na ni nalhakgayatit lhakgat nema tipatiy hilo litlawakanit.

20 »”Komo chatum chixku natatama chatum puskat chu natatalakgxtumi, chu xla chatum skujni nema malaknukanit xlakata natatamakgaxtokga atanu chixku, pero nina tamawakan* chu tapakgsiniku xmalana, xchatiykan nakamalakgaxokgekan. Pero ni katikamakgnika xlakata uma puskat tapakgsiniku xmalana. 21 Chixku nalini Jehová tamakamastan nema makamasta tiku tlawalh tuku nitlan lakatsu niku laktanukan ktabernáculo: nalin tantum borrego chuna la tamakamastan xpalakata tiku tlawalh tuku nitlan. 22 Chu sacerdote namakamasta uma borrego kxlakatin Jehová xlakata xtalakgalhin uma chixku, chu chuna natapatikan talakgalhin nema xla tlawanit.

23 »”Akxni natanuyatit ktiyat nema nakkamaxkiyan chu nachanatit putum kiwi nema masta xtawakat, ni xaskulunku naʼakxilhatit chu ni namaklakaskinatit xtawakat. Akgtutu kata ni namaklakaskinatit. Ni nawayatit. 24 Pero xliʼakgtati kata putum xtawakat xaskulunku nawan chu naʼanan tapaxuwan kxlakatin Jehová. 25 Chu xliʼakgkitsis kata tlan nawayatit xtawakat; chuna nalhuwan tuku namakgalayatit. Akit Jehová miDioskan.

26 »”Ni nawayatit tuku kgalhi kgalhni.

»”Ni naputsayatit tiku wan tuku aku nala chu na ni natlawayatit magia.

27 »”Ni naswikatit milakgxtichixitkan chu na ni nasitatit minkgalhchixitkan chuna la nitlan natasiya.

28 »”Ni nakachukukanatit kmimaknikan xpalakata chatum nin, na ni natlawayatit tatuaje kmimaknikan. Akit Jehová.

29 »”Ni katlawa pi mintsumat nasta xmakni, uma namamaxani. Komo chuna natlawaya, niku lapat nalitatsama tiku stakgo xmaknikan chu xalixkajni tayat.

30 »”Kamaxkitit kakni kisábado chu lu kamaxkitit kakni* niku xasanto. Akit Jehová.

31 »”Ni nakalakgpinatit tiku wankgo pi katachuwinankgo tiku nikgonita chu tiku wankgo tuku aku nala, xlakata ni xaskulunku katiwantit xpalakatakan. Akit Jehová miDioskan.

32 »”Nalimasiyaniya kakni tiku aktsasawa. Chuna, milimaxkit kakni tiku lina kata chu milipekuanit miDios. Akit Jehová.

33 »”Komo chatum lataman tiku xalak atanu país akxtum katalaman ktiyat niku lapatit, ni lixkajni kalikatsinitit. 34 Tiku xalak atanu país nema akxtum katalaman, kaliʼakxilhtit chuna la tiku xalak mimpaískan chu kapaxkitit chuna la miʼakstukan kapaxkikanatit, xlakata wixin latapatit kʼEgipto chuna la tiku xalak atanu país. Akit Jehová miDioskan.

35 »”Ni naʼakgskgawinanatit akxni wi tuku nalhkayatit chuna la xlilhman, akxni wi tuku napulhkayatit o akxni pulhkayatit tuku chuchutwa. 36 Kamaklakaskintit xaʼakchan pupulhkan, xaʼakchan pesas, xaʼakchan tuku napupulhkayatit xaskakni talhtsi* chu xakchan tuku napupulhkayatit tuku chuchutwa.* Akit Jehová miDioskan, tiku katamakxtun kxtiyat Egipto. 37 Kakgalhakgaxpattit putum tuku klakkaxwilinit pi xlitatlawat chu putum kilimapakgsin, chu kalilatapatit. Akit Jehová”».

20 Jehová chuntiya wanilh Moisés: 2 «Nakawaniya israelitas: “Komo chatum tiku xalak Israel chu tiku xalak atanu país nema lama kʼIsrael namakamaxki dios Mólek xkamanankan, xlinit. Kachikin* naʼaktalamakgni. 3 Akit naklakgmakgan uma chixku chu nakmalakgsputu, xlakata makamaxkinit dios Mólek chatum xkgawasa, maxkajwinit niku santo chu maxkajwinit xasanto kintukuwani. 4 Komo akxni uma chixku namakamaxki dios Mólek chatum xkgawasa, chu kachikin* nitu natlawa chu ni namakgni, 5 akit naklakgmakgan uma chixku chu xfamilia. Nakmalakgsputu uma chixku chu putum tiku akxtum takakninanikgo* dios Mólek.

6 »”Lataman tiku nalakgan tiku wan pi katachuwinan tiku nikgonita chu tiku wankgo tuku aku nala, uma lataman nakimakgxtakga, chu akit naklakgmakgan chu nakmalakgsputu.

7 »”Wixin xaskulunku chu xasanto miliwanatkan, xlakata akit Jehová miDioskan. 8 Milikgalhakgaxmatatkan tuku klakkaxwilinit pi xlitatlawat chu milimakgantaxtitkan. Akit Jehová, tiku kalaksakman chuna la akgtum kachikin xasanto.

9 »”Komo chatum chixku nawan pi nitlan kakitaxtunilh xtlat o xtse, uma chixku xlinit. Lakgchan namakgnikan xlakata wan pi nitlan kakitaxtunilh xtlat o xtse.

10 »”Chu komo chatum chixku natatalakgxtumi xpuskat atanu chixku, komo natatalakgxtumi xpuskat xtalataman, uma chixku xlinit. Xlinit chixku chu puskat. 11 Chixku tiku natatama xpuskat xtlat namamaxani xtlat. Chixku chu puskat, xlinitkan. Kalakgchan nakamakgnikan. 12 Komo chatum chixku natatama xpuwiti,* xchatiykan xlinitkan. Lakatsalakgonit tuku xlilat. Kalakgchan nakamakgnikan.

13 »”Komo chatum chixku natatalakgxtumi xtachixku chuna la tatalakgxtumi chatum puskat, xchatiykan tlawakgonit tuku lu lixkajni. Xlinitkan. Kalakgchan nakamakgnikan.

14 »”Komo chatum chixku natatalakgxtumi chatum puskat chu xtse puskat, uma tayat lu nitlan.* Namakgniyatit chixku, puskat chu xtse puskat, chu alistalh nakalhkuyuyatit xlakata nialh naʼanan xalaklixkajni tayat kmilakgstipankan.

15 »”Komo chatum chixku natatalakgxtumi tantum animal, uma chixku namakgniyatit, chu animal na namakgniyatit. 16 Komo chatum puskat natatalakgxtumi tantum animal, namakgniya puskat chu animal. Xlinitkan. Kalakgchan nakamakgnikan.

17 »”Komo chatum chixku natatalakgxtumi xtala tsumat, max xtsumat xtlat o xtsumat xtse, uma lu limaxana. Nakamakgnikan kxlakatin kachikin. Xla mamaxaninit xtala tsumat. Xla nalakgaxokgo xlakata xtalakgalhin.

18 »”Komo chatum chixku natatama chu natatalakgxtumi chatum puskat tiku titaxtuma tuku titaxtukgo lakpuskatin akgatunu papaʼ, limasiyakgonit pi uma kgalhni ni xasanto litaxtu xpalakatakan. Xchatiykan nakamakgnikan.

19 »”Ni natatalakgxtupiya xtala tsumat mintse nipara xtala tsumat mintlat, xlakata uma namamaxani mintalilakgapasni. Minchatiykan nalakgaxokgoyatit xlakata mintalakgalhinkan. 20 Chixku tiku natatalakgxtumi xpuskat xkuku namamaxani xkuku. Xchatiykan nalakgaxokgokgo xlakata xtalakgalhinkan. Xlinitkan, ni katikgalhikgolh kamanan. 21 Komo chatum chixku natatamakgaxtokga xpuskat xtala kgawasa, uma lu lixkajni.* Xla mamaxaninit xtala. Ni katikgalhikgolh kamanan.

22 »”Kakgalhakgaxpattit chu kamakgantaxtitit putum tuku klakkaxwilinit pi xlitatlawat chu putum kilimapakgsin, chuna ni nakatamakxtukanatit ktiyat niku kkaliman xlakata anta nalatapayatit. 23 Ni nalilatapayatit xtalismaninkan kachikinin nema nakkatamakxtu kmilakatinkan, xlakata xlakan tlawakgonit putum uma nema lu kxkajni. 24 Wa xlakata kkawanin: «Wixin nakatatamakgxtakgatit tiyat nema katapakgsini umakgolh kachikinin, chu nakkamaxkiyan xlakata nakatapakgsiniyan, ktiyat niku anan lhuwa leche chu ksakgsi cera.* Akit Jehová miDioskan, tiku kalaksakni kxlakgstipankan kachikinin». 25 Wixin milikatsitkan tuku animal xaskulunku chu tuku ni xaskulunku chu tsiktsi nema xaskulunku chu nema ni xaskulunku. Ni kalixkajwanantit xpalakata tantum animal, tantum tsiktsi o tantum animal nema taxwataʼan, nema tanu kkawilinit xlakata ni xaskulunku nakaliʼakxilhatit. 26 Wixin xasantos miliwanatkan xlakata akit, Jehová, xasanto. Tanu kkawiliman kxlakgstipankan kachikinin xlakata nakintapakgsiniyatit.

27 »”Chixku o puskat tiku wan pi katachuwinan tiku nikgonita o wan tuku aku nala, xlinit. Kachikin naʼaktalamakgni. Kalakgchan nakamakgnikan”».

21 Jehová wanipa Moisés: «Kakawani sacerdotes, xlakgkgawasan Aarón: “Nipara chatum sacerdote nalixkajwanan* chatum nin kminkachikinkan. 2 Pero tlan nalixkajwanan komo xtalilakgapasni tiku nani, chuna la xtse, xtlat, xkgawasa, xtsumat, xtala kgawasa, 3 chu xtala tsumat komo nina tatalakgxtumi chatum chixku, komo lakatsu tawi chu komo nina tamakgaxtokga. 4 Skulunku xliwanat chu ni nalixkajwanan xpuskat chatum chixku xalak xkachikin. 5 Xlakan ni nataʼakswikkgo, ni naswikkgo xkilhpan xkgalhchixitkan chu na ni nachukukgo xmaknikan. 6 Xasantos xliwanatkan xpalakata xDioskan chu ni namaxkajwikgo xtukuwani xDioskan, xlakata xlakan wa makamastakgo tamakamastan nema lhkuyunikan Jehová, tamakamastan* xpalakata xDioskan. Xasantos xliwanatkan. 7 Ni natatamakgaxtokgkgo puskat tiku sta xmakni o puskat tiku mamaxanikanit,* nipara chatum puskat tiku lakxtlawanit xtamakgaxtokgat, xlakata sacerdotes xasanto litaxtukgo kxlakatin Dios. 8 Wixin, israelitas, xasanto miliʼakxilhatkan sacerdote, xlakata wa tlawani tamakamastan miDioskan. Wixin xasanto naliʼakxilhatit, xlakata xasanto kachikin kkalimaxtuman, akit Jehová, xasanto.

9 »”Komo xtsumat chatum sacerdote nasta xmakni ni xaskulunku katiwa, xla natlawa pi ni xaskulunku katiwa xtlat. Milimakgnitkan chu alistalh nalhkuyuyatit.

10 »”Chu sacerdote tiku tlakg kgalhi limapakgsin, xtalakan, tiku akmawakakan aceite nema lilaksaknankan chu laksakkanit* xlakata nawili lhakgat nema wili sacerdote, ni lhtimpuk* naʼakwan chu ni naxtita klhakgat. 11 Ni nalakgtalakatsuwi tiku ninit. Ni nalixkajwanan tiku ninit maski xtlat o xtse. 12 Ni nataxtu niku xasanto* chu ni namaxkajwi xasanto xchik xDios, xlakata akmawakakanit xʼaceite Dios nema lilaksaknankan, tuku litasiya pi tamakamastanit. Akit Jehová.

13 »”Xla natatamakgaxtokga chatum tsumat tiku nina tatalakgxtumi chatum chixku. 14 Ni natatamakgaxtokga tiku ninita xchixku, chatum puskat tiku lakxtlawanit xtamakgaxtokat, tiku mamaxanikanit* o tiku sta xmakni, wata xlitatamakgaxtokgat chatum tsumat tiku xalak xkachikin chu nina tatalakgxtumi chatum chixku. 15 Ni natlawa pi xkamanan ni xaskulunku nawankgo kxlakgstipan xkachikin, xlakata akit Jehová, tiku kmasantujlima”».

16 Jehová chuntiya tachuwinalh Moisés chu wanilh: 17 «Kawani Aarón: “Komo chatum minkgawasa chu xkamanan tiku aku nalakachintilhakgo nakgalhi tuku nitlan kxmakni, ni xlitalakatsuwit xlakata natlawani tamakamastan xDios. 18 Ni xlitalakatsuwit chixku tiku kgalhi tuku nitlan kxmakni: chixku tiku lakgaxokgo* o nila tlawan, tiku talakachuntanit* o tlakg lhman xmakan o xtantun, 19 chixku tiku tamakgatlakganit o tatantutlakganit, 20 tiku akglhchakgonutwa o tiku ni stakli,* o chatum chixku tiku nitlan xlakgastapu, tiku kgalhi tsitsi, tiku makxilawa* o tasipanilh* kxlichixku. 21 Putum xkamanan sacerdote Aarón tiku kgalhi tuku nitlan kxmakni, ni xlitalakatsuwit xlakata natlawa tamakamastan nema lhkuyunikan Jehová. Xlakata kgalhi tuku nitlan kxmakni, xla ni xlitalakatsuwit xlakata natlawani tamakamastan xDios. 22 Tlan nawa tamakamastan nema tlawanikan xDios tuku tlakg xasanto chu tuku xasanto litaxtukgo. 23 Pero ni xlitalakatsuwit niku waka cortina chu ni xlitalakatsuwit niku wi pumakamastan, xlakata kgalhi tuku nitlan kxmakni. Ni namaxkajwi niku xasanto, xlakata akit Jehová, tiku kamasantujlima”».

24 Wa xlakata Moisés tachuwinalh Aarón, xkamanan Aarón chu putum israelitas.

22 Jehová tachuwinampa Moisés. Wanilh: 2 «Kakawani Aarón chu xlakgkgawasan pi kuenta natlawakgo chuna la namaklakaskinkgo tuku xasanto nema kimakamaxkikgo israelitas chu chuna ni namaxkajwikgo xasanto kintukuwani. Akit Jehová. 3 Kakawani: “Wixin chu minkamanankan tiku aku nalakachintilhakgo chu ni xaskulunku natawila chu natalakatsuwi niku wi tuku xasanto nema israelitas makamaxkikgo Jehová, uma lataman namakgnikan kkilakatin. Akit Jehová. 4 Putum xkamanan Aarón tiku kgalhi lepra o wi tuku makgama kxlichixku,* ni xliwat tuku xasanto asta akxni xaskulunku nawan. Nachuna chixku tiku naxama tiku lixkajwananit chatum nin o tiku makgama ksemen, ni xliwat tuku xasanto, 5 nipara chixku tiku naxama tantum ni xaskulunku animal nema makxtum latapulikgo kkatiyatni o naxama chatum chixku tiku wi tuku lixkajwananit nema natlawa pi ni xaskulunku nawan. 6 Tiku naxama putum uma ni xaskulunku katiwa asta kakgotanun chu nila katiwalh tuku xasanto asta akxni xla napaxa. 7 Akxni tsankganita nawan chichini xaskulunku nawampara, chu alistalh tlan nawa tuku xasanto xlakata wa xliwat. 8 Na ni nawa tantum animal nema xanin natekgsa o tuku laktsu laktsu tlawanit xaluku animal, xlakata uma natlawa pi ni xaskulunku nawan. Akit Jehová.

9 »”Xlakan xlimakgantaxtitkan tuku kkalimapakgsinit pi xlitlawatkan, komo ni natlawakgo nalakgalhinankgo chu nanikgo xlakata namaxkajwikgo tuku xasanto. Akit Jehová, tiku kkamasantujlima.

10 »”Nipara chatum lataman* xliwat tuku xasanto komo ni maxkikanit talakaskin nawa. Na ni xliwat tuku xasanto chatum chixku tiku xalak atanu país chu makgwi kxchik sacerdote chu nipara chatum skujni tiku maskgawikan. 11 Pero komo chatum sacerdote natamawa chatum lataman, uma lataman tlan nawa tuku xasanto. Skujnin tiku nalakachinkgo kxchik tlan nawakgo liwat. 12 Komo chatum xtsumat sacerdote natatamakgaxtokga tiku ni sacerdote, xla ni xliwat tuku xasanto makamastakanit. 13 Komo xtsumat chatum sacerdote nani xchixku o nalakxtlawa xtamakgaxtokgat, ni nakgalhi kamanan, chu nataspita kxchik xtlat, chuna la akxni nina xtamakgaxtokga, xla tlan nawa xasanto liwat nema way xtlat. Pero putum tiku* ni maxkikanit talakaskin nawa, ni xliwat.

14 »”Komo chatum chixku ni katsi chu nawa xasanto liwat, xla nalakgxokgoni sacerdote uma xasanto tamakamastan chu namaliwakani tsinu xtapalh.* 15 Wa xlakata sacerdotes ni xlimaxkajwitkan tuku israelitas xasanto makamaxkikgo Jehová 16 chu xlakan nakalimalakgaxokgekan xlakata nawakgo tuku xasanto, xlakata akit Jehová, tiku kkamasantujlima”».

17 Jehová chuntiya tachuwinalh Moisés, wanilh: 18 «Katachuwinanti Aarón chu xlakgkgawasan, nachuna putum israelitas chu kakawani: “Akxni chatum israelita o tiku xalak atanu país nema lama kʼIsrael namakamaxki Jehová akgtum xalhkun tamakamastan xlakata makgantaxtinit tuku xlitayanit o kaj xatapaxuwan natlawa tamakamastan, 19 xla xlimakamastat tantum toro nema ni tatatla, xaʼaktsujku borrego o xaʼaktsujku cabra xlakata tlan namakgamakglhtinankan. 20 Ni namakamastayatit nema xatatatla, xlakata ni katikamakgamakglhtinankantit.

21 »”Komo chatum lataman natlawani Jehová tamakamastan xla takaksni xlakata makgantaxtinit tuku xlitayanit o kaj xatapaxuwan natlawa tamakamastan, xlimakamastat tantum toro o tantum wakax o tantum borrego o tantum cabra xlakata namakgamakglhtinankan. Ni xatatatla xliwanat. 22 Ni xlitamakamastat tantum animal nema lakgaxokgo,* nema tatlakganit, tachukunit, kgalhi pixi,* pipekgx o nema makxilawa.* Ni nalipiniyatit Jehová animales nema chuna tatekgskgo, na ni namakamaxkiyatit uma Jehová kxpumakamastan. 23 Tlan namakamastayatit tantum toro o tantum borrego nema lhman o aktsu xtantun komo natlawayatit akgtum tamakamastan nema xatapaxuwan makamastakan, pero ni katimakgamakglhtinanka komo natlawayatit tamakamastan xlakata wi tuku nalitayayatit. 24 Ni namakamaxkiyatit Jehová tantun animal nema tasipaninit* kxkgalhwat, talakxkitinit o tamaxtukanit xkgalhwat. Ni namakamastayatit umakgolh animales. 25 Chu ni nakamakgamakglhtiyatit umakgolh animales tiku xalak atanu país xlakata namakamaxkiyatit miDioskan. Xlakata umakgolh animales ni xatakgatsin xmaknikan o tatatlakgo. Dios ni katikamakgamakglhtinan akxni namakamastayatit”».

26 Jehová tachuwinampa Moisés, chu wanilh: 27 «Akxni nalakachin tantum toro, tantum borrego o tantum cabra, natatamakgxtakga xtse akgtujun kilhtamaku, pero kxliʼakgtsayan kilhtamaku tlan namakamastakan, namakamastakan chuna la tamakamastan nema lhkuyunikan Jehová. 28 Ni namakgniyatit tantum toro chu kskgata watiya kilhtamaku o tantum borrego chu kskgata watiya kilhtamaku.

29 »Komo natlawaniyatit Jehová akgtum tamakamastan xlakata nalimasiyayatit tapaxtikatsinit, militlawatkan chuna la xla namakgamakglhtinan. 30 Watiya uma kilhtamaku nawakan. Ni nama’akgataxtiyatit xlakata namaklakaskinatit lichali. Akit Jehová.

31 »Milikgalhakgaxmatatkan kilimapakgsin chu milimakgantaxtitkan. Akit Jehová. 32 Ni namaxkajwiyatit xasanto kintukuwani; wata naktasantujli kxlakgstipankan israelitas. Akit Jehová, tiku kkamasantujliman, 33 tiku katamakxtun kxtiyat Egipto xlakata miDioskan naklitaxtu. Akit Jehová».

23 Jehová tachuwinampa Moisés, chu wanilh: 2 «Kakatachuwinanti israelitas chu kakawani: “Fiestas nema natlawanikan Jehová niku wixin nakamastokgatit kachikin, xasanto tamakxtumit litaxtukgo. Wa uma kifiestas nema natlawayatit:

3 »”Tlan naskujkan akgchaxan kilhtamaku, pero kxliʼakgtujun kilhtamaku, sábado, milijaxatkan, xasanto tamakxtumit litaxtu. Ni miliskujatkan. Akgtum sábado nema namaklakaskinatit xlakata nakakninaniyatit Jehová kaniwa niku nalatapayatit.

4 »”Wa umakgolh fiestas nema natlawaniyatit Jehová, xasanto tamakxtumit nema wixin namakatsininanatit xlakata natlawayatit kkilhtamaku nema lakkaxwilikanit. 5 Xapulana papa’, kxliʼakgkutati kilhtamaku, akxni natsiswan, natlawaniyatit Pascua Jehová.

6 »”Kxliʼakgkukitsis kilhtamaku xla uma papaʼ natlawaniyatit Jehová Fiesta xla Kaxtalanchu nema ni kgalhi Limaxkutin. Nawayatit kaxtalanchu nema ni kgalhi limaxkutin akgtujun kilhtamaku. 7 Kxapulana kilhtamaku natlawayatit akgtum xasanto tamakxtumit. Ni miliskujatkan uma kilhtamaku. 8 Wata natlawayatit tamakamastan nema lhkuyunikan Jehová akgtujun kilhtamaku, akgtum akgatunu kilhtamaku. Kxliʼakgtujun kilhtamaku natlawayatit xasanto tamakxtumit. Ni miliskujatkan uma kilhtamaku”».

9 Jehová chuntiya wanilh Moisés: 10 «Kakatachuwinanti israelitas chu kakawani: “Akxni natanuyatit ktiyat nema nakkamaxkiyan chu makinitantit nawan mintachanankan, nalipiniyatit sacerdote pixtum xatapachin tuku xapulana namakgalayatit. 11 Chu pixtum xatapachin nema nalinikan, sacerdote anu anu nalimakan kxlakatin Jehová xlakata tlan nakamakgamakglhtinankan. Sacerdote nalakchikimi* akxni titaxtunita sábado. 12 Kilhtamaku akxni nalakchikimikan pixtum xatapachin tamakamastan, wixin namakamastayatit tantum borrego nema ni xatatatla chu nema kgalhi akgtum kata chuna la tamakamastan nema lhkuyunikan Jehová. 13 Namakamastayatit akgtati litro aitat* xatlan harina nema talakgtlawakanit aceite chuna la tamakamastan xla talhtsi, akgtum tamakamastan nema lhkuyunikan Jehová chu lu muksun nakgankgawanan. Namakamastayatit akgtum litro* vino chuna la xachuchutwa tamakamastan. 14 Ni nawayatit kaxtalanchu, nipara xatachuchu talhtsi, nipara xasasti talhtsi asta uma kilhtamaku, asta akxni nalipiniyatit tamakamastan miDioskan. Uma akgtum limapakgsin nema lhuwa kilhtamaku namakgapala mimpalakatakan chu putum tiku aku nalakachintilhakgo maski kaniwa niku nalatamakgo.

15 »”Akxni titaxtunita nawan sábado, lata akxni nalipinatit xatapachin tamakamastan nema lakchikimikan, wixin naputlekgeyatit akgtujun sábado. Xatakgatsin semanas xliwanat. 16 Naputlekgeyatit tipuxamakaw kilhtamaku, asta akxni titaxtunita nawan xliʼakgtujun sábado chu lichali namakamaxkiyatit Jehová tamakamastan xla talhtsi, xasasti talhtsi. 17 Lata niku wilatit nalipinatit maktiy kaxtalanchu chuna la tamakamastan nema lakchikimikan. Nalikaxtlawayatit akgtati litro aitat* xatlan harina chu natamakchayatit limaxkutin. Uma xapulana trigo nema namakgalakan chu namakamaxkikan Jehová. 18 Chu kaxtalanchu natamakamastayatit tantujun borrego nema ni tatatlakgo chu nema kgalhikgo akgtum kata, tantum xaʼaktsujku toro chu tantiy borrego. Nakamaklakaskinkan chuna la tamakamastan nema lhkuyunikan Jehová chu natamakamastakan tamakamastan xla talhtsi chu xachuchutwa tamakamastan, uma tamakamastan putuminika nalhkuyukan chu Jehová lu muksun nakgankgawanan. 19 Chu namakamastayatit tantum xaʼaktsujku cabra chuna la tamakamastan xpalakata talakgalhin chu tantiy borrego nema kgalhikgo akgtum kata chuna la tamakamastan xla takaksni. 20 Sacerdote natiya tantiy borrego, kaxtalanchu nema litlawaka xapulana talhtsi chu anu anu nalimakan chuna la tamakamastan nema lakchikimikan kxlakatin Jehová. Uma xasanto litaxtu xpalakata Jehová, tuku lakgchan sacerdote. 21 Watiya uma kilhtamaku namakatsininanatit xlakata natlawakan xasanto tamakxtumit. Ni miliskujatkan uma kilhtamaku. Uma akgtum limapakgsin nema lhuwa kilhtamaku namakgapala mimpalakatakan chu putum tiku aku nalakachintilhakgo kaniwa niku nalatamakgo.

22 »”Akxni namakiyatit mintachanankan, ni namakiyatit putum tuku ya kxkilhpanin mimpukuxtukan chu na ni nasakkiyatit tuku naʼakgataxtu. Nakamakgxtakgniyatit tiku lakglimaxkgenin chu tiku xalak atanu país nema lamakgo kminkachikinkan. Akit Jehová miDioskan”».

23 Jehová chuntiya wanilh Moisés: 24 «Kakawani israelitas: “Xapulana kilhtamaku kxliʼakgtujun papaʼ, ni miliskujatkan, milijaxatkan, uma kilhtamaku nalimakatsininankan trompeta xlakata nalakapastakatit pi uma akgtum xasanto tamakxtumit. 25 Nila katiskujtit, chu natlawayatit akgtum tamakamastan nema lhkuyunikan Jehová”».

26 Jehová wanipa Moisés: 27 «Kilhtamaku akxni xapakan Talakgalhin nalakgchan kilhtamaku akgkaw kxliʼakgtujun papaʼ. Militlawatkan akgtum xasanto tamakxtumit, chu milimasiyatkan pi lilipuwanatit mintalakgalhinkan, natlawayatit akgtum tamakamastan nema lhkuyunikan Jehová. 28 Ni miliskujatkan uma kilhtamaku xlakata akxni xapakan talakgalhin, xlakata uma kilhtamaku nakatapatikanatit mintalakgalhinkan kxlakatin Jehová miDioskan. 29 Putum tiku ni nalimasiya uma kilhtamaku pi ni lilipuwan xtalakgalhin, namakgnikan. 30 Chu akit nakmalakgsputu kminkachikinkan putum tiku naskuja uma kilhtamaku. 31 Ni miliskujatkan. Uma akgtum limapakgsin nema lhuwa kilhtamaku namakgapala mimpalakatakan chu putum tiku aku nalakachintilhakgo maski kaniwa niku nalatamakgo. 32 Milijaxatkan, xlakata akgtum sábado mimpalakatakan, chu kakgotanun nalimasiyayatit pi lilipuwanatit mintalakgalhinkan kxliʼakgnajatsa kilhtamaku xla uma papaʼ. Lu xlakaskinka naʼakxilhatit sábado lata kakgotanun asta lichali kakgotanun».

33 Jehová chuntiya tachuwinalh Moisés, chu wanilh: 34 «Kakawani israelitas: “Kilhtamaku akgkukitsis kxliʼakgtujun papaʼ natsuku Fiesta xla Laktsu Chiki* nema natlawanikan Jehová, chu namakgapala akgtujun kilhtamaku. 35 Kxapulana kilhtamaku natlawakan akgtum xasanto tamakxtumit, chu ni miliskujatkan. 36 Natlawayatit tamakamastan nema lhkuyunikan Jehová akgtujun kilhtamaku, akgtum akgatunu kilhtamaku. Xliʼakgtsayan kilhtamaku natlawayatit akgtum xasanto tamakxtumit chu natlawayatit akgtum tamakamastan nema lhkuyunikan Jehová. Uma tamakxtumit lu xlakaskinka. Ni miliskujatkan uma kilhtamaku.

37 »”Wa umakgolh fiestas nema natlawaniyatit Jehová chu nema namakatsininanatit pi xasanto tamakxtumit litaxtukgo, xlakata natlawayatit akgtum tamakamastan nema lhkuyunikan Jehová: xalhkun tamakamastan, tamakamastan xla talhtsi nema tamakamastakan animal chu xachuchutwa tamakamastan chuna la lakkaxwilikanit chali chali. 38 Umakgolh tamakamastan na natamakamastakan tamakamastan nema tlawakan ksábados Jehová chu xasanto tamaskiwin,* nachuna tamakamastan akxni wi tuku litayakan chu tamakamastan nema xatapaxuwan mastakan, nema wixin namaxkiyatit Jehová. 39 Nachuna, kkilhtamaku akgkukitsis kxliʼakgtujun papaʼ, akxni makinitantita nawan mintachanankan, natlawaniyatit xfiesta Jehová akgtujun kilhtamaku. Kxapulana kilhtamaku tantaku milijaxatkan, chu kxli’akgtsayan kilhtamaku tantaku milijaxatkan. 40 Xapulana kilhtamaku nasakkiyatit xtawakat xalakglilakgatit kiwi, xpakganin mokgot, xpakganin laklanka kiwi, xpakganin álamos nema stakkgo kkapuskan,* chu lu napaxuwayatit kxlakatin Jehová miDioskan akgtujun kilhtamaku. 41 Natlawaniyatit fiesta Jehová akgtujun kilhtamaku akgatunu kata. Natlawayatit uma fiesta kxliʼakgtujun papa’. Uma akgtum limapakgsin nema lhuwa kilhtamaku namakgapala mimpalakatakan chu putum tiku aku nalakachintilhakgo. 42 Wixin natawilayatit klaktsu chiki akgtujun kilhtamaku. Putum israelitas xlitawilatkan klaktsu chiki, 43 xlakata tiku aku nalakachintilhakgo nakatsikgo pi akit ktlawalh pi israelitas xtawilakgolh klaktsu chiki akxni kkatamakxtulh kxtiyat Egipto. Akit Jehová miDioskan”».

44 Wa xlakata Moisés kalitachuwinalh israelitas fiestas nema tlawanikan Jehová.

24 Jehová tachuwinampa Moisés chu wanilh: 2 «Kakalimapakgsi israelitas pi naliminkgo lu xatlan aceite xla oliva* xlakata nalimakaxkgakgenankan chu makgskgot ankgalhin napasakgo. 3 Aarón kuenta natlawa pi makgskgot nema yakgo kxkilhtin cortina niku lu xasanto ankgalhin napasakgo lata kakgotanun asta tsisa kxlakatin Jehová. Uma akgtum limapakgsin nema lhuwa kilhtamaku namakgapala mimpalakatakan chu putum tiku aku nalakachintilhakgo. 4 Xla ankgalhin nakamakaxa xmakgskgot candelabro xaʼoro kxlakatin Jehová.

5 »Natiyaya xatlan harina chu nakalitlawaya makkutiy rosca, makatunu nakalitlawaya akgtati litro aitat* xatlan harina. 6 Pulaktiy nakatsapswiliya, pulakatunu makchaxan rosca natawila kxʼakpun mesa xaʼoro kxlakatin Jehová. 7 Kxʼakpun pulakatunu rosca nakgalhwiliya xatlan olíbano, uma namakamastaya xlakgxokgo kaxtalanchu, akgtum tamakamastan nema lhkuyunikan Jehová. 8 Akgatunu sábado, xla ankgalhin xliwilit kaxtalanchu kxlakatin Jehová. Uma akgtum talakkaxlan nema lhuwa kilhtamaku namakgapala xpalakatakan israelitas. 9 Wa nakatapakgsini Aarón chu xlakgkgawasan chu nawakgo niku xasanto, xlakata uma tamakamastan nema lhkuyunikan Jehová lu xasanto xpalakata sacerdote. Uma akgtum limapakgsin nema lhuwa kilhtamaku namakgapala».

10 Kxlakgstipankan israelitas xlama chatum kgawasa tiku xtse israelita xwanit chu xtlat egipcio xwanit; uma kgawasa chu chatum israelita tsukukgolh latalatlawakgo kkachikin. 11 Xkgawasa puskat israelita lixkajni tsukulh lichuwinan xtukuwani Dios* chu wa pi xʼakgspulalh tuku nitlan. Wa xlakata linka niku xwi Moisés. Xtse uma kgawasa xwanikan Selomit, xtsumat Dibrí, xalak xtribu Dan. 12 Chu kgawasa chuntiya xchipakanit asta akxni xkatsika tuku xʼama tlawa Jehová.

13 Alistalh Jehová wanilh Moisés: 14 «Kalipi kxkilhtin kachikin tiku lixkajni lichuwinalh kintukuwani, chu putum tiku kgaxmatnikgolh nawilikgo xmakankan kxʼakgxakga uma kgawasa chu alistalh putum kachikin naʼaktalamakgni. 15 Chu nakawaniya israelitas: “Komo chatum chixku nitlan nalichuwinan xDios, xla nalakgaxokgo xpalakata xtalakgalhin. 16 Tiku nitlan nalichuwinan xtukuwani Jehová, xlinit. Putum kachikin naʼaktalamakgni. Maski xla chatum israelita o xalak atanu país, xlinit xlakata nitlan lichuwinalh xtukuwani Dios.

17 »”Komo chatum chixku namakgni chatum lataman, na xlinit. 18 Putum tiku namasipani* chu namakgni tantum animal xalak chiki, nalilakgxokgo tantum xastakna animal. 19 Komo chatum chixku namasipani xtalataman, na namasipanikan chuna la tlawalh xtalataman. 20 Komo chatum chixku natukxni xlukut chatum xtalataman, nalaktlawani xlakgastapu, natukxni xtatsan, nachuna natlawakan. 21 Tiku namasipani chu namakgni tantum animal xlilakgxokgot, pero tiku namasipani chu namakgni chatum chixku, na xlinit.

22 »”Uma limapakgsin nakalilakputsananiyatit tiku xalak Israel chu tiku xalak atanu país, xlakata akit Jehová miDioskan”».

23 Wa xlakata Moisés katachuwinalh israelitas, chu xlakan linkgolh kxkilhtin kachikin tiku lixkajni xlichuwinanit xtukuwani Dios chu aktalamakgnikgolh. Chuna israelitas tlawakgolh tuku Jehová xlimapakgsinit Moisés.

25 Jehová tachuwinampa Moisés ksipi Sinaí, chu wanilh: 2 «Kakawani israelitas: “Akxni natanuyatit ktiyat nema akit nakkamaxkiyan, nalimaxtuyatit akgtum sábado xpalakata Jehová chu ni napuskujatit tiyat. 3 Akgchaxan kata nachananana kmimpukuxtu chu nakachukuniya xtuwan* miʼuvas, chu namakiya mintachanan. 4 Pero kxliʼakgtujun kata, sábado xliwanat, ni napuskujatit tiyat, akgtum sábado nema namaklakaskinatit xlakata nakakninaniyatit Jehová. Ni nachananana kmimpukuxtu chu ni nakachukuniya xtuwan miʼuva. 5 Ni nasaka xtawakat talhtsi nema tamakgxtakgkgolh akxni maki mintachanan, na ni namakiya xtawakat miʼuvas nema ni kakgalhchuku. Ni napuskujkan tiyat akgtum kata. 6 Pero wixin tlan nawayatit tuku nastaka kilhtamaku sábado; wix, miskujnin lakchixkuwin, miskujnin lakpuskatin, miskujnin tiku kamaskgawiya chu tiku kaj makgwi, tlan nawakgo. 7 Animales xalak chiki chu animales xalak kakiwin nema lamakgo kmimpukuxtu, na tlan nawakgo. Putum tuku tiyat namakgala, tlan nawakan.

8 »”Naputlekgeya akgtujun kata, akgatunu kata akgtum sábado litaxtu, makgtujun akgtujun kata, chuna tipuxamanajatsa kata nakitaxtu. 9 Kilhtamaku akgkaw kxliʼakgtujun papaʼ, pixlanka namamakasaniya akgalokgot; Kilhtamaku akxni xapakan Talakgalhin, natlawayatit pi akgalokgot natakgaxmata kputum minkachikinkan. 10 Kata tipuxamakaw xasanto nawan chu namakatsininanatit pi nialhti skujni katilitaxtulh kputum minkachikinkan. Uma kilhtamaku Kata xla Lakgtaxtut nalitaxtu mimpalakatakan, chu chatunu wixin tlan namakglhtinamparayatit mintiyatkan chu tlan nakalakgtaspitparayatit mifamiliajkan. 11 Kata tipuxamakaw, Kata xla Lakgtaxtut nalitaxtu mimpalakatakan. Ni nachanatit chu ni nasakkiyatit xtawakat talhtsi nema tamakgxtakgkgolh akxni makitit mintachanankan, na ni namakiyatit xtawakat miʼuvaskan nema ni kachukunitit xtuwan. 12 Xlakata uma Kata xla Lakgtaxtut. Xasanto nalitaxtu mimpalakatakan. Kajwatiya tlan nawayatit tuku xʼakstu makgala tiyat.

13 »”Uma Kata xla Lakgtaxtut chatunu wixin xlimakglhtinat xtiyat. 14 Komo wi tuku nastamaxkiyatit o namakgtamawayatit chatum mintalatamankan, ni naʼakgskgawiyatit. 15 Tiku namakgtamawa tiyat xtalataman, naputlekge kata nema titaxtukgonit lata kKata xla Lakgtaxtut, chu tiku nasta, naputlekge kata nema tsankgaku xlakata namakgalanan. 16 Komo lhuwaku kata tsankga xla tlan namaliwaka xtapalh, pero komo nialh lhuwa kata tsankga xla namakti xtapalh, xlakata stama la xlilhuwa namakgalanan. 17 Nipara chatum wixin naʼakgskgawiyatit mintalatamankan, chu napekuaniyatit miDioskan, xlakata akit Jehová miDioskan. 18 Akxni namakgantaxtiyatit tuku klakkaxwilinit pi xlitatlawat chu nakgalhakgaxpatatit kilimapakgsin, nitu katikaʼakgspulan ktiyat niku nalatapayatit. 19 Tiyat namasta xtawakat chu wixin tlan nawayatit asta nakgalhkgasatit chu nitu katikamakgapekuan.

20 »”Pero komo wixin nawanatit «¿Tuku nakwayaw komo kxliʼakgtujun kata nila ktichaw chu nila ktimakiw kintachanankan?», 21 kakatsitit pi akit nakkamalakgachaniyan kintasikulunalin kxliʼakgchaxan kata chu tiyat lhuwa namakgala xtawakat nema namaklakaskinatit akgtutu kata. 22 Kxliʼakgtsayan kata tlan nachanananatit chu chuntiya nawayatit xamakgan tawakat kxliʼakgnajatsa kata. Chuntiya nawayatit xamakgan tawakat asta akxni namakiyatit mintachanankan.

23 »”Tiyat ni xlitastat xlakata wi tiku natatamakgxtakga putum kilhtamaku, xlakata tiyat akit kintapakgsini. Kimpalakata, wixin litaxtuyatit chuna la tiku xalak atanu país chu tiku kaj makgwi. 24 Putum tiyat nema nakatapakgsiniyan namastayatit talakaskin pi tiku stalh tlan natamawapara.

25 »”Komo mintachiki natalimaxkge chu nasta aktsu xpukuxtu, chatum xtalilakgapasni namin chu natamawaxtu tuku stalh xtala. 26 Komo ni anan tiku natamawaxtu xpukuxtu pero xla tsuku kgalhi lhuwa tumin chu tlan natamawaxtu xpukuxtu, 27 naputlekge kata nema titaxtukgonit lata akxni stalh xpukuxtu xlakata nakatsi xtapalh nema namaspitni chixku tiku stamaxkinit. Chu xla tlan natamawaxtu xpukuxtu.

28 Pero komo xla ni kgalhi tuku nalitamawaxtu, tiku tamawalh pukuxtu, natatamakgxtakga asta kKata xla Lakgtaxtut. Xla nawampara pukuxtu kKata xla Lakgtaxtut; wa natapakgsinipara xpukuxtu.

29 »”Komo chatum chixku nasta akgtum chiki nema ya kʼakgtum lanka kachikin niku limakgstili patsaps, namaxkikan talakaskin xlakata tlan natamawaxtu asta akxni natakgatsi akgtum kata lata akxni stalh xchik; akgtum kata namaxkikan talakaskin xlakata tlan natamawaxtu. 30 Pero komo chiki nema ya kʼakgtum lanka kachikin niku limakgstili patsaps niti natamawaxtu akgtum kata, putum kilhtamaku xla nawan tiku tamawanit. Ni katimaspitka kKata xla Lakgtaxtut. 31 Pero chiki nema yakgo kkachikinin niku ni limakgstilikgo patsaps naliʼakxilhkan chuna la tuku tapakgsini pukuxtu. Tlan natamawaxtukan chu namaspitparakan kKata xla Lakgtaxtut.

32 »”Xchikkan levitas nema yakgo kxkachikinkan, xlakan tlan natamawaxtukgo kilhtamaku akxni nalakaskinkgo. 33 Komo tuku katapakgsinikgo levitas ni natamawaxtukan, chiki nema stakanit kkachikin namaspitkan kKata xla Lakgtaxtut, xlakata chiki nema yakgo kxkachikinkan levitas, wa katapakgsini kxtiyatkan israelitas. 34 Nachuna, kapukuxtun niku anan sekget nema limakgstilikgo xkachikinkan ni xlitastat, xlakata wa katapakgsini putum kilhtamaku.

35 »”Komo mintachiki tiku lakatsu tawilan natalimaxkge chu nialh nakgalhi tuku maklakaskin, namaxkiya tuku maklakaskin chuna la xmaxki chatum tiku xalak atanu país o tiku kaj makgwi, xlakata chuntiya tlan natalatamayan. 36 Ni namatajiya xaskgata tuku namasakuaniya. Napekuaniya miDios, chu mintala chuntiya natalatamayan. 37 Ni namasakuaniya mintumin xlakata namatajiya xaskgata chu na ni namaxkiya miliwat kaj xlakata wi tuku namakglhtiya. 38 Akit Jehová miDioskan, tiku katamakxtun kxtiyat Egipto xlakata nakkamaxkiyan xtiyat Canaán chu xlakata miDioskan xaklitaxtulh.

39 »”Komo chatum israelita tiku lakatsu tawilan natalimaxkge chu nawaniyan pi katamawa, ni namafuerzajliya xlakata natlawa taskujut nema tlawa chatum skujni. 40 Nalikatsiniya chuna la chatum skujni tiku maskgawikan, chuna la likatsiniya chatum tiku kaj makgwi. Chuntiya naskujnaniyan asta kKata xla Lakgtaxtut. 41 Alistalh namakgxtakgan. Xla chu xlakgkgawasan nalakgtaspitkgo xfamiliajkan, chu xla tlan natamawaxtu pukuxtu nema xkatapakgsini xalakgmakgan xnatlatni. 42 Xlakata xlakan kiskujnin, tiku kkatamakxtulh kxtiyat Egipto. Xlakan ni xlitastatkan chuna la stakan chatum skujni. 43 Ni lixkajni nalikatsiniya, chu napekuaniya miDios. 44 Miskujni chixku chu miskujni puskat naminkgoyacha kkachikinin nema listilikgoyan; tiku xalak uma kachikinin tlan natamawayatit chatum skujni chixku chu chatum skujni puskat. 45 Xkamanankan tiku xalak atanu país nema katalamakgon tlan nakatamawayatit chuna la skujnin chu xfamiliaskan tiku lakachinkgolh kminkachikinkan, xlakan nakatapakgsinikgoyan. 46 Akxni naniyatit, minkamanankan tlan nakatatamakgxtakgkgo chu xlakan kskujnin minkamanankan nalitaxtukgo. Wa katapakgsiniyan. Pero ni lixkajni nakalikatsiniyatit minatalankan israelitas.

47 »”Komo tiku xalak atanu país o tiku kaj makgwi nema lakatsu tawilan tsuku kgalhi lhuwa tumin chu mintala tiku lakatsu tawi natalimaxkge chu xla natasta xlakata kskujni nawan tiku xalak atanu país, o tiku kaj makgwi o kxfamilia tiku xalak atanu país, 48 xla namaxkikan talakaskin xlakata tlan natamawaxtukan akxni tastanita nawan. Chatum xtala tlan natamawaxtu. 49 Na tlan natamawaxtu xkuku, xkgawasa xkuku, xtalilakgapasni* o chatum tiku xalak xfamilia.

»”Na tlan xʼakstu natamawaxtukan komo natsuku kgalhi lhuwa tumin. 50 Xla nataputlekge xtamawana, kata nema titaxtukgonit lata akxni tastalh asta kKata xla Lakgtaxtut, chu naxokgo kata nema tsankgajku xlakgtaxtut. Xtapalh xtaskujut nema xʼama tlawa umakgolh kilhtamaku naxokgo chuna la maskgawikan chatum skujni. 51 Komo lhuwaku kata tsankga, xla naxokgo xtapalh nema tsankgaku xlakgtaxtut. 52 Pero komo nialh lhuwa kata tsankga xlakata nachin Kata xla Lakgtaxtut, naputlekge kata nema tsankgaku chu wa tuku naxokgo xlakata natamawaxtukan. 53 Xla naskujni xtamawana kata kata chuna la chatum skujni tiku maskgawikan, chu chatunu wixin kuenta militlawatkan pi xmalana ni lixkajni nalikatsini. 54 Pero komo xla nila natamawaxtukan chuna la wan tuku talakkaxtawilanit, xla chu xkamanan nakamakgxtakgkan kKata xla Lakgtaxtut.

55 »”Xlakata israelitas kiskujnin. Kiskujnin tiku kkatamakxtulh kxtiyat Egipto. Akit Jehová miDioskan.

26 »”Ni natlawayatit dioses nema nitu litaxtukgo, na ni natlawayatit akgtum tatlawamakgxtu,* nipara kgantum xasanto talayaw* xachiwix, na ni nawiliyatit akgtum tatlawamakgxtu xachiwix kminkachikinkan xlakata nalakgtakilhputayatit; xlakata akit Jehová miDioskan. 2 Namaxkiyatit kakni kisábado chu na lu namaxkiyatit kakni niku xasanto. Akit Jehová.

3 »”Komo chuntiya nalilatapayatit tuku klakkaxwilinit pi xlitatlawat chu nakgalhakgaxpatatit kilimapakgsin chu namakgantaxtiyatit, 4 akit nakkamakaminiyan sen kxkilhtamaku, chu tiyat namakgala xtawakat chu kiwi namastakgo xtawakat. 5 Lu lhuwa namakgalananatit chu lakpajpatitku nawan mintalhtsikan akxni namakiyatit miʼuvaskan, chu akxni makipatitku nawan miʼuvaskan nalakgchan kilhtamaku nachananamparayatit. Nawayanatit asta nakgalhkgasatit chu nitu katikamakgapekuan niku nalatapayatit. 6 Akit naktlawa pi naʼanan takaksni kpaís, chu akxni natapayatit niti katikamakgapekuan. Naktlawa pi kpaís ni naʼanankgo xalakluku animales, chu niti katikalitalatlawan espada. 7 Wixin nakaputsastalaniyatit mintalamakgasitsinkan chu wixin nakalimakgatlajayatit espada. 8 Kgalhkitsis wixin nakaputsastalaniyatit akgtum ciento, chu akgtum ciento wixin nakaputsastalaniyatit akgkaw mil, chu nakalimakgatlajayatit espada mintalamakgasitsinkan.

9 »”Akit nakkasikulunatlawayan chu naktlawa pi nakgalhiyatit lhuwa kamanan, nalhuwanatit, chu nakmakgantaxti talakkaxlan nema kkatatlawan. 10 Akxni wapatitku nawan tuku makgalatit kata nema titaxtulh, namaxtuyatit xamakgan mintamakgalankan xlakata namakiyatit xasasti. 11 Chu nakwili kintabernáculo kmilakgstipankan chu ni ktikalakgmakgan. 12 Akit naklatama kmilakgstipankan chu miDioskan naklitaxtu, chu wixin kinkachikin nalitaxtuyatit. 13 Akit Jehová miDioskan, tiku katamakxtun kxtiyat Egipto xlakata nialh skujnin xlitaxtutit, klaktukxli mimukiwikan* chu ktlawalh pi nialh kilhputa xtlawantit.

14 »”Pero komo wixin ni nakinkgaxpatniyatit chu ni nakgalhakgaxpatatit putum umakgolh limapakgsin, 15 komo nalakgmakganatit tuku klakkaxwilinit pi xlitatlawat, nalakgmakganatit kilimapakgsin chu ni namakgantaxtiyatit tuku klimapakgsinan chu nalaktlawayatit kintalakkaxlan, 16 akit, wa uma tuku nakkatlawaniyan: nakkalimalakgaxokgeyan tuku lu nalilakgaputsayatit, tuberculosis* chu palha lhkuyat, nema natlawakgo pi nialh lu tlan nalakawananatit chu nialh nakgalhiyatit litliwakga. Nachanananatit pero nitu katilitaxtulh mintaskujutkan, xlakata mintalatlawanakan nawakgo mintachanankan. 17 Akit nakkatalalakatawakayan chu mintalamakgasitsinkan nakamakgatlajakgoyan. Tiku kasitsinikgoyan nakalaktayamikgoyan, chu wixin natsalayatit akxni niti kaputsastalaniman nawan.

18 »”Komo chuntiya ni nakinkgalhakgaxpatatit, nakmaliwaka makgtujun chuna la nakkamalakgaxokgeyan xpalakata mintalakgalhinkan. 19 Naktlawa pi nialh tlankajwa chu nialh xatsakat nawanatit chu naktlawa pi akgapun xtachuna la hierro nawan chu katiyatni xtachuna la cobre nawan. 20 Kaj paxkat nawan militliwakgakan, xlakata katiyatni chu kiwi nema yakgo kkapukuxtun ni katimastakgolh xtawakatkan.

21 »”Pero komo chuntiya nakintalalakatawakayatit chu ni nakinkgaxpatniyatit, nakmaliwaka makgtujun chuna la nakkamalakgaxokgeyan xpalakata mintalakgalhinkan. 22 Nakkamalakgachaniyan xalakluku animales xalak kakiwin nema namasputukgo minkamanankan, namasputukgo miʼanimaleskan, nialh lhuwa katiwantit chu nialhti lu katitlawalh kmintijikan.

23 »”Pero komo chuntiya ni namastayatit talakaskin nakkastakyawayan chu chuntiya nakintalalakatawakayatit, 24 akit na nakkatalalakatawakayan, chu makgtujun nakkamalakgaxokgeyan xpalakata mintalakgalhinkan. 25 Xlakata ni makgantaxtitit kintalakkaxlan, naktlawa pi mintalamakgasitsinkan nakalitalatlawakgoyan espada xlakata nakkamalakgaxokgeyan. Komo wixin natatsekgatit kminkachikinkan, nakkamalakgachaniyan akgtum tajatat, chu mintalamakgasitsinkan nakamakgatlajakgoyan. 26 Akxni klaktlawanita nawan niku makiyatit* miliwatkan, kgalhkaw lakpuskatin nakamakchanikgoyan kaxtalanchu kʼakgtum horno chu xatapulhkan nakamaʼakgpitsinikgoyan. Wixin nawayanatit pero ni katikgalhkgastit.

27 »”Komo chuntiya ni nakinkgaxpatniyatit chu chuntiya nakintalalakatawakayatit, 28 akit tlakg palha nakkatalalakatawakayan, chu makgtujun nakkamalakgaxokgeyan xpalakata mintalakgalhinkan. 29 Wa xlakata nakawayatit milakgkgawasankan chu nakawayatit milaktsumankan. 30 Nakkamasputu niku kakninaniyatit ni xaxlikana midioseskan, nakkalaktlawa niku lhkuyuyatit incienso, xanin mimaknikan lakxtum nakkatawili xalixkajni* mitatlawamakgxtukan nema ni staknankgo, nakkatamakgatliniyan chu lu nakkaxkajniyan. 31 Nakmasputu minkachikinkan chu naktlawa pi nialhti katiʼanalh niku kakninaniyatit midioseskan, chu ni ktikgankgawanalh xamuksun mitamakamastankan. 32 Naktlawa pi nialhti nalatama kpaís, chu mintalamakgasitsinkan tiku anta nalatamakgo kaks nalilakawankgo. 33 Akit nakkamalakgatumiyan kkachikinin, chu nakmaxtu kiʼespada nema nakaʼakstalayan;* ktiyat niku lapatit nialhti katilatamalh chu namalakgsputukan minkachikinkan.

34 »”Akxni lapatit nawan kxtiyat mintalamakgasitsinkan, ktiyat niti katilatamalh chu najaxa xlakata ni jaxli akgatujunan kata. 35 Tiyat chali chali najaxa akxni niti lama nawan, xlakata wixin ni majaxatit ksábado, akxni xlapatit anta.

36 »”Tiku naʼakgataxtukgo nakkalimatsamani tapekua xnakujkan kxtiyatkan xtalamakgasitsinkan. Akxni un namamakasani maktum tuwan,* natsalakgo. Natsalakgo chuna la tiku kaliʼakstalakan espada chu nalhtujkgo maski niti nakaputsastalani. 37 Natsalakgo chu nalaliʼakgchakgxkgo xchatunukan chuna la tiku kaliʼakstalakan espada, maski niti nakaputsastalani. Nila katikatalatlawakgolh xtalamakgasitsinkan. 38 Naniyatit kxlakgstipan kachikinin, chu nasputatit kxtiyatkan mintalamakgasitsinkan. 39 Tiku naʼakgataxtukgo namaskgo kxtiyatkan xtalamakgasitsinkan xpalakata xtalakgalhinkan. Chuna, namaskgo xlakata tuku nitlan tlawakgolh xnatlatnikan. 40 Chu xlakan nawankgo pi kintalalakatawakakgolh, kimakgxtakgkgolh chu lakgalhinankgolh kkilakatin chuna la tlawakgolh xnatlatnikan. 41 Uma kilhtamaku akit na kkatalalakatawakanit nawan chu kkalinit nawan kxtiyatkan xtalamakgasitsinkan.

»”Max chuna nataktuju xatsakat xnakujkan, chu chuna xlakan naxokgokgo xtalakgalhinkan. 42 Chu naklakapastaka talakkaxlan nema ktatlawalh Jacob, talakkaxlan nema ktatlawalh Isaac, talakkaxlan nema ktatlawalh Abrahán, chu naklakapastaka tiyat. 43 Akxni niti lama nawan kʼuma tiyat, tiyat najaxa chu niti katilatamalh, xlakan lakgaxokgomakgo nawan xtalakgalhinkan xlakata lakgmakgankgolh kilimapakgsin chu tuku klakkaxwilinit pi xlitatlawat. 44 Maski chuna, akxni lamakgo nawan kxtiyatkan xtalamakgasitsinkan, ni putum kilhtamaku ktikalakgmakgalh chu ni putum kilhtamaku ktikasitsinilh, xlakata uma ni natlawa pi nakkamasputuputun, komo chuna xaktlawalh ni xakmakgantaxtilh kintalakkaxlan nema kkatatlawalh, akit Jehová miDioskan. 45 Xlakata tlan nakakitaxtuni, naklakapastaka talakkaxlan nema kkatatlawalh xalakgmakgan xnatlatnikan, tiku kkatamakxtulh kxtiyat Egipto kxlakatinkan putum kachikinin, xlakata xDioskan xaklitaxtulh. Akit Jehová”».

46 Wa umakgolh limapakgsin tuku Jehová lakkaxwililh chu tuku skilh pi xmakgantaxtikgolh israelitas chu nema matitaxtinilh Moisés ksipi Sinaí.

27 Jehová tachuwinampa Moisés, chu wanilh: 2 «Kakatachuwinanti israelitas chu kakawani: “Komo wi tiku namaxki Jehová xtapalh chatum lataman xlakata chuna namakgantaxti tuku litayanilh, wa uma xtapalh: 3 Chixku tiku kgalhi akgpuxam kata asta tutumpuxam kata, 570 gramos* xla plata xtapalh, napulhkakan plata chuna la pulhkanankan niku xasanto. 4 Chu xtapalh chatum puskat 342 gramos* xla plata. 5 Komo lataman kgalhi akgkitsis kata asta akgpuxam kata, xtapalh kgawasa 228 gramos* xla plata xliwanat, chu xtapalh tsumat 114 gramos* xla plata xliwanat. 6 Komo kgalhi akgtum papaʼ asta akgkitsis kata, xtapalh uma aktsu kgawasa tipuxamakutujun gramo xla plata, chu xtapalh aktsu tsumat puxamakutati gramo xla plata.

7 »”Komo kgalhi tutumpuxam kata o liwaka, xtapalh chixku 171 gramos* xla plata, chu xtapalh puskat 114 gramos* xla plata. 8 Komo chixku tiku litayalh namasta xtapalh chatum lataman, lu limaxkgen, chu ni akchani xlakata naxokgo, uma lataman nalakgan sacerdote chu xla nawani xtapalh. Sacerdote nawani la xlilhuwa xlixokgot uma lataman.

9 »”Komo wi tiku nawan pi namakamaxki Jehová tantum xaskulunku animal, uma animal tanu nawilikan xlakata wa Jehová tapakgsini. 10 Nila katililakgpalika tantum xatlan animal nema nixatlan, chu tantum nixatlan nema xatlan. Pero komo nalilakgpalikan atanu animal, xapulana animal nema xmastakanit chu tuku nalilakgpalikan xasanto nawankgo. 11 Komo animal xataxkajwani chu nila makamaxkikan Jehová, uma animal nalinkan kxlakatin sacerdote. 12 Chu sacerdote nawilini xtapalh uma animal chuna la tasiya. Sacerdote nawan xtapalh uma animal. 13 Pero komo namin kilhtamaku tiku litayalh namasta xtapalh tantum animal, natamawaputumpara uma animal, namaliwakani tsinu xtapalh.*

14 »”Chu komo chatum chixku nalitaya pi namakamaxki Jehová xchik chuna la tuku xasanto, sacerdote nawilini xtapalh uma chiki chuna la tasiya. Tuku nalakkaxwili sacerdote wa xtapalh nawan. 15 Pero komo tiku makamastalh chiki natamawaputumpara, namaliwakani tsinu xtapalh,* chu chiki wa natapakgsinipara.

16 »”Komo wi tiku makamaxkiputun Jehová titsu xpukuxtu chuna la tuku xasanto, nakatsikan xtapalh chuna la xlilhuwa talhtsi talakaskin xlakata nachananankan kʼuma pukuxtu: 130 kilos* xla cebada xtapalh 570 gramos* xla plata. 17 Komo namakamasta xpukuxtu kKata xla Lakgtaxtut, xtapalh ni talakgpali. 18 Pero komo namakamasta xpukuxtu akxni titaxtunita nawan Kata xla Lakgtaxtut, sacerdote nalimaktini xtapalh, xla naputlekge la xlilhuwa kata tsankga asta nalakgchampara Kata xla Lakgtaxtut xlakata nakatsi xtapalh. 19 Pero komo tiku makamastalh pukuxtu natamawaputumpara, namaliwakani tsinu xtapalh* chu pukuxtu xla nawampara. 20 Pero komo xla nialh natamawa pukuxtu chu atanu tiku nastamaxkikan, nialhla katitamawalh uma pukuxtu. 21 Akxni pukuxtu namaspitkan kKata xla Lakgtaxtut, xasanto nalitaxtu xpalakata Jehová, akgtum pukuxtu nema wa makamaxkikanit. Wa sacerdotes nakatapakgsini.

22 »”Komo wi tiku namakamaxki Jehová akgtum pukuxtu nema tamawalh chu ni wa tatapakgsi pukuxtu nema makgxtakgnikgolh xnatlatni, 23 sacerdote naputlekge la xlilhuwa kata tsankga asta kKata xla Lakgtaxtut xlakata nakatsi xtapalh, chu watiya uma kilhtamaku nawani xtapalh. Uma xasanto litaxtu xpalakata Jehová. 24 Kkata xla Lakgtaxtut, pukuxtu namaspitnikan tiku makgtamawaka, lataman tiku tapakgsini tiyat.

25 »”Namaklakaskinatit chuna la pulhkanankan niku xasanto xlakata nakatsiyatit xtapalh putum umakgolh. Akgatunu siclo tsinkan akgkutiy gramo.*

26 »”Pero niti xlimakamastat tantum xakgawasa animal nema pulana nalakachin chuna la tuku xasanto, xlakata tuku pulana lakachin wa tapakgsini Jehová. Max uma tantum toro o tantum borrego, wa tapakgsini Jehová. 27 Pero komo animal xataxkajwani chu xla naxokgo chuna la lakkaxwilikanit xlakata nalakgmaxtu, namaliwakani tsinu xtapalh.* Pero komo ni nalakgmaxtukan, nalistakan chuna la lakkaxwilikanit xtapalh.

28 »”Komo wi tiku namakamaxki Jehová chatum lataman, tantum animal o akgtum pukuxtu, xasanto nalitaxtu putum kilhtamaku,* lataman, animal o pukuxtu, nila katistaka chu nila katitamawaparaka. Putum umakgolh lu xasanto litaxtukgo, wa tapakgsinikgo Jehová. 29 Nachuna, nila katilakgmaxtuka chatum lataman tiku makamastaka xlakata namalakgsputukan. Uma lataman xlinit.

30 »”Putum tuku namakgala tiyat, tuku namakikan kpukuxtu o xtawakat kiwi, namakamaxkiyatit tsinu Jehová: tuku pulakkaw namakiyatit pulaktum namakamaxkiyatit. Uma xasanto litaxtu xpalakata Jehová. 31 Komo wi tiku natamawaxtuputun tuku makamastalh, namaliwakani tsinu xtapalh.* 32 Tankawin umakgolh animales: toro, wakax, borrego chu cabra, tantum namaxki Jehová. Xlakata tlan chuna natlawa, akxni nakaputlekge xʼanimales,* xlitankaw namaʼakgataxtini Dios. Xlitankaw animal xasanto litaxtu. 33 Ni katiʼakxilhka komo animal tlan o ni tlan; na ni xlitalakgpalit. Pero komo namin kilhtamaku wi tiku nalakgpaliputun, xapulana animal nema xmastakanit chu animal nema nalilakgpalikan xasanto nawankgo. Nialhla katitamawaxtuka”».

34 Wa umakgolh limapakgsin nema Jehová maxkilh Moisés ksipi Sinaí xpalakatakan israelitas.