JOSUÉ

1 Akxni xninita kskujni Jehová, Moisés, Jehová wanilh Josué* xkgawasa Nun, xmakgtayana Moisés: 2 «Kiskujni Moisés ninita. Katakaxti, kapatakutti kgalhtuchokgo Jordán, wix chu putum uma kachikin, chu katanu ktiyat nema nakkamaxki israelitas. 3 Nakkamaxkiyan tiyat niku nachipinatit, chuna la kmalaknunilh Moisés. 4 Minkachikinkan natalakgatumi lata kxakaskakni tiyat asta kLíbano chu asta klanka kgalhtuchokgo, kgalhtuchokgo Éufrates, kxtiyatkan hititas, chu asta kxalanka pupunu,* niku tsankga chichini. 5 Putum kilhtamaku la nalatapaya niti katimakgatlajan. Chuna la kmakgtayalh Moisés nachuna nakmakgtayayan. Ni ktimakgxtakgni chu ni ktiʼakgxtakgwilin. 6 Tliwakga kawanti chu ni kapekuanti, xlakata wix tiku natlawa pi uma kachikin namakgamakglhtinan tiyat nema kkamalaknunilh pi nakkamaxki xalakgmakgan xnatlatnikan.

7 »Kajwatiya tliwakga kawanti chu ni kapekuanti, chu liwana kakgalhakgaxpatti putum Limapakgsin nema kiskujni Moisés maxkin. Ni napataxtutayaya, nipara kmimpakgastakat* nipara kmimpakgxwiki,* xlakata nalimasiyaya liskgalala kaniwa niku napina. 8 Tuku wan uma Limapakgsin ni katapanulh kminkilhni, chu xlilat nalikgalhtawakgaya chu nalilakpuwana* kakuwani chu katsisni, xlakata liwana nakgalhakgaxpata putum tuku tatsokgtawilanit anta. Komo chuna natlawaya, tlan nakitaxtuniyan kmilatamat chu nalimasiyaya liskgalala. 9 ¿Ni akit klimapakgsinitan pi tliwakga kawanti chu ni kapekuanti? Ni kapekuanti chu ni kalhpipi,* xlakata Jehová miDios tawilan kaniwa niku napina».

10 Alistalh Josué kalimapakgsilh xnapuxkun kachikin: 11 «Katitaxtutit niku wilakgolh kachikin chu kakamaxkitit uma limapakgsin: “Kaj akgtutu kilhtamaku tsankga napatakutatit Jordán xlakata natanuyatit chu naʼakgchipayatit tiyat nema Jehová miDioskan nakamaxkiyan, wa xlakata kamakaxtit tuku namaklakaskinatit”».

12 Josué kawanilh xtribu Rubén, Gad chu itat xtribu Manasés: 13 «Kalakapastaktit tuku Moisés, kskujni Jehová, kalimapakgsin: “Jehová miDioskan kamaxkiman tajaxni chu kamaxkinitan uma tiyat. 14 Milakpuskatinkan, minkamanankan chu miʼanimaleskan nalatamakgo ktiyat nema Moisés kamaxkinitan kʼuma xkilhtun Jordán, pero putum wixin xalakgtliwakgan soldados katakaxtit xlakata napatakutatit uma kgalhtuchokgo kxlakatinkan minatalankan. Talakaskin pi wixin nakamakgtayayatit 15 asta akxni Jehová nakamaxki tajaxni minatalankan, chuna la kamaxkinitan wixin, chu xlakan na naʼakgchipakgo tiyat nema Jehová miDioskan kamaxkima. Alistalh kataspittit ktiyat nema kamaxkikanitantit chu anta kalatapatit, tiyat nema Moisés, kskujni Jehová, kamaxkin kʼuma xkilhtun Jordán”».

16 Xlakan wanikgolh Josué: «Naktlawayaw putum tuku kilalimapakgsinitaw chu nakanaw kaniwa niku nakilamalakgachayaw. 17 Chuna la kkgalhakgaxmatwi putum tuku Moisés kinkawanin, nachuna nakkakgalhakgaxmatniyan. Chu, tuku tlakg xlakaskinka, Jehová miDios kamakgtayan chuna la makgtayalh Moisés. 18 Putum tiku nalakataki milimapakgsin chu ni nakgalhakgaxmata putum tuku wix nalimapakgsiya, namakgnikan. Kajwatiya tliwakga kawanti chu ni kapekuanti».

2 Alistalh Josué, xkgawasa Nun tsekg kamalakgachalh chatiy lakchixkuwin lata kSitim xlakata naskgalanankgo. Kawanilh: «Kapitit, kaʼakxilhtit tiyat chu tlakg liwaka kaʼakxilhtit la wi Jericó». Wa xlakata xlakan ankgolh chu chankgolh kxchik chatum puskat tiku ksta xmakni xwanikan Rahab, chu anta tamakgxtakgkgolh. 2 Mapakgsina xalak Jericó wanika pi chatiy israelitas xʼankgonit ama katsisni xlakata kskgalakgolh tiyat. 3 Akxni mapakgsina xalak Jericó kgaxmatli uma, limapakgsinalh pi xwanika Rahab: «Kakatamakxtu lakchixkuwin tiku tamakgxtakgmakgo kminchik, xlakata kaj minkgonit skgalakgo putum kachikin».

4 Pero Rahab kamatsekgli chatiy lakchixkuwin. Alistalh kawanilh: «Xlikana, lakchixkuwin kilakgapaxialhnankgolh pero akit ni xakkatsi niku xalanin xwankgonit. 5 Chu akxni xʼamaja tsiswan, akxni xʼamakaja malakchuwakan xmalakcha kachikin, lakchixkuwin taxtukgolh. Ni kkatsi niku ankgolh. Komo lakapala nakastalaniyatit, nakamataxtukatit». 6 (Pero xla xkalinit kxʼakgstin chiki chu xkamatsekgnit niku tistum xkawilikanit xakiwi lino). 7 Wa xlakata lakchixkuwin tiku kamalakgachalh mapakgsina kastalanikgolh chu ankgolh kJordán, niku xʼamakgolh titaxtukgo. Chu akxni lakchixkuwin xalak Jericó taxtukgolh, talakchuwalh xmalakcha kachikin.

8 Akxni skgalananin xʼamakgolha lhtatakgo, xla tawakalh* kxʼakgstin chiki, niku xlakan xwilakgolh. 9 Chu xla kawanilh: «Akit kkatsi pi Jehová nakamaxkiyan uma tiyat, chu tapekua nema kkakgalhiniyan kinkaʼakgchipanitan. Putum latamanin xalak uma kachikin lakgaputsamakgo kaj mimpalakatakan. 10 Xlakata kkgaxmatnitaw la Jehová maskakalh xaSpinini pupunu kmilakatinkan akxni taxtupitit kʼEgipto, chu tuku katlawanitit chatiy xmapakgsinanin amorreos, Sehón chu Og, tiku kamakgnitit* kxakilhtutu* Jordán. 11 Akxni kkgaxmatwi lu kpekuaw,* chu niti kgalhi litliwakga xlakata nakalakatitayayan, xlakata Jehová miDioskan wa Dios xalak akgapun chu xalak katiyatni. 12 Chu katlawatit litlan, kakilamalaknuniw kxtukuwani Jehová pi xlakata akit kkalimasiyanin tapaxkit nema ni makgxtakgnan, wixin na nakalimasiyaniyatit tapaxkit nema ni makgxtakgnan putum tiku makgtapakgsikgo kxchik kintlat; chu wi tuku nakilalimasiyaniyaw pi chuna natlawayatit.* 13 Tlan nakatapatiyatit xlatamatkan kintlat, kintse, kinatalan chu putum tiku xlakan katatapakgsikgo chu nakilalakgmaxtuniyaw kilatamatkan».

14 Wa xlakata lakchixkuwin wanikgolh: «¡Nakmastayaw kilatamatkan mimpalakatakan! Komo ni nawanatit tuku naktlawayaw, nakkalimasiyaniyan tapaxkit nema ni makgxtakgnan chu nakmakgantaxtiyaw tuku kkawaninitan akxni Jehová nakinkamaxkiyan uma tiyat». 15 Alistalh Rahab limaklakaskilh kgantum tasiw chu kventana kalakmaktilh, xlakata xchik xya kxʼakgspun* patsaps nema xmakgstiliwilinit kachikin. 16 Alistalh kawanilh: «Kapitit kkasipijni chu akgtutu kilhtamaku anta katatsekgtit, xlakata ni nakatekgskgoyan tiku kaputsastalanimakgon. Chu akxni xlakan nataspitkgo wixin tlan napinatit».

17 Lakchixkuwin wanikgolh: «Kajwatiya nakmakgantaxtiyaw uma tuku wix kinkawani pi xakmalaknuw 18 komo akxni naktanuyaw kʼuma tiyat wix nachiya uma xaspinini tasiw kventana niku kilalakmaktimaw. Xlilat nakatatamakxtumiya kminchik mintlat, mintse, minatalan, chu putum tiku xalak xchik mintlat. 19 Chu komo wi tiku nataxtu kminchik, wa nalin kuenta komo naniy, chu akinin ni kaktiliw kuenta. Pero komo naʼakgspula tuku nitlan katiwa tiku natatamakgxtakgan kminchik, akinin naklinaw kuenta komo naniy. 20 Pero, komo wi tiku nalitachuwinana tuku xlakata kmiw, nialh kaktimakgantaxtiw tuku kinkawani pi xakmalaknuw». 21 Xla kgalhtinalh: «Kalalh chuna la wanatit».

Alistalh xla kamalakgachalh chu xlakan ankgolh. Chu Rahab chilh xaspinini tasiw kventana. 22 Xlakan ankgolh kkasipijni chu anta tamakgxtakgkgolh akgtutu kilhtamaku asta akxni taspitkgolh tiku xkaputsastalanimakgo. Maski umakgolh lakchixkuwin kaputsakgolh kputum katijin, ni katekgskgolh. 23 Alistalh, umakgolh chatiy lakchixkuwin taktakgocha kkasipijni, patakutkgolh kgalhtuchokgo, chu lakgankgolh Josué xkgawasa Nun xlakata nalitachuwinankgo putum tuku xkaʼakgspulanit. 24 Chu wanikgolh Josué: «Jehová kinkamaxkinitan putum uma tiyat. Chu putum latamanin lakgaputsamakgo kaj kimpalakatakan».

3 Alistalh Josué tsisa takilh, xla chu putum israelitas* taxtukgocha kSitim chu chankgolh kJordán. Anta lhtatakgolh ama katsisni akxni nina xpatakutkgo.

2 Akgtutu kilhtamaku alistalh, napuxkun titaxtukgolh niku xwilakgolh israelitas 3 chu kalimapakgsikgolh: «Akxni naʼakxilhatit pi sacerdotes levitas limakgolh arca xla talakkaxlan nema tapakgsini Jehová miDioskan, katakaxtit chu kastalanitit. 4 Pero atsinu ni takgatsi akgnajatsa ciento metros* xlilakgamakgat katayatit; nialh lu natalakatsuwiyatit, chuna nakatsiyatit niku napinatit, xlakata nikxni titaxtunitantit kʼuma tiji».

5 Alistalh Josué kawanilh israelitas: «Katakaxtit, xlakata chali Jehová natlawa tuku lu kaks malakawaninan kmilakgstipankan».

6 Alistalh Josué kawanilh sacerdotes: «Kachaxtit arca xla talakkaxlan chu kapitit kxlakatinkan putum israelitas». Wa xlakata xlakan chaxkgolh arca xla talakkaxlan chu ankgolh kxlakatinkan putum israelitas.

7 Alistalh Jehová wanilh Josué: «Uma kilhtamaku naktsuku kmalankiyan kxlakatinkan putum israelitas xlakata nakatsikgo pi akit nakmakgtayayan chuna la kmakgtayalh Moisés. 8 Nakamaxkiya uma limapakgsin sacerdotes tiku limakgolh arca xla talakkaxlan: “Akxni nachipinatit kxkilhtun kgalhtuchokgo Jordán anta katayatit kJordán”».

9 Chu Josué kawanilh israelitas: «Katantit* chu kakgaxpattit xtachuwin Jehová miDioskan». 10 Alistalh Josué wa: «Chuna wixin nakatsiyatit pi anan chatum xastakna Dios kmilakgstipankan chu pi nakamapanu kmilakatinkan cananeos, hititas, heveos, perizitas, guirgaseos, amorreos chu jebuseos. 11 ¡Kaʼakxilhtit! Arca xla talakkaxlan nema tapakgsini xMalana putum katiyatni nalinkan kxlakʼitat Jordán kmilakatinkan. 12 La uku kakalaksaktit kgalhkutiy lakchixkuwin xla akgatunu tribus xalak Israel, chatum chixku xla akgatunu tribu, 13 chu akxni sacerdotes tiku linkgo xʼarca Jehová, xMalana putum katiyatni, natatujukgoyacha kJordán, xchuchut Jordán nema taktamachi, natachokgo chuna la niku lakatum tawila chuchut».*

14 Wa xlakata, akxni israelitas taxtukgocha niku xwilakgolh, akxni nina xpatakutkgo kgalhtuchokgo Jordán, sacerdotes tiku xlinkgo arca xla talakkaxlan xʼankgo kxlakatin kachikin. 15 (Putum kilhtamaku akxni xmakgalanankan, kgalhtuchokgo Jordán lu kstaka). Akxni tiku xlinkgo Arca xla talakkaxlan chankgolh kJordán chu sacerdotes tiku xlinkgo Arca tatujukgolh kxkilhtun kgalhtuchokgo, 16 chuchut nema xtaktamachi tachokgolh. Makgat tachokgolh chuna la niku lakatum tawila chuchut* anta kkachikin Adán, lakatsu kZaretán, chu skakkgolh chuchut nema xtaktama kpupunu xla Arabá, xaSkgokgo pupunu.* Chuchut malakgachokgoka chu israelitas patakutkgolh kxakilhtutu, kxlakatin Jericó. 17 Akxni sacerdotes tiku xlimakgolh arca xla talakkaxlan nema xtapakgsini Jehová xyakgolh niku xakaskakni kxlakʼitat Jordán, putum israelitas patakutkgolh kxakaskakni tiyat chu chankgolh kxakilhtutu, asta akxni putum kachikin patakutkgolh Jordán.

4 Akxni putum israelitas patakutkgolh Jordán, Jehová wanilh Josué: 2 «Kakalaksaktit kgalhkutiy lakchixkuwin xalak kachikin, chatum chixku xalak akgatunu tribu, 3 chu kakalimapakgsitit: “Kasakkitit akgkutiy chiwix kxlakʼitat kgalhtuchokgo Jordán, anta niku tayakgolh sacerdotes, kakalipitit chu kakawilitit anta niku nalhtatayatit”».

4 Wa xlakata Josué katasanilh kgalhkutiy lakchixkuwin tiku xkalaksakkgonit israelitas, chatum chixku xalak akgatunu tribu, 5 chu Josué kawanilh: «Kapitit kxlakʼitat kgalhtuchokgo Jordán kxlakatin xʼarca Jehová miDioskan, chu chatunu kapakgxtutawakalh akgtum chiwix, chuna la xlilhuwa xtribuskan israelitas, 6 xlakata wi tuku nalikatsiyatit. Komo alistalh minkamanankan nakakgalhskinkgoyan “¿Tuku xlakata umakgolh chiwix unu wilakgolh?”, 7 wixin nakawaniyatit “Xlakata xchuchut kgalhtuchokgo Jordán machokgoka kxlakatin arca xla talakkaxlan nema tapakgsini Jehová. Xchuchut Jordán tachokgolh akxni sacerdotes linkgolh arca xla talakkaxlan kxlakʼitat kgalhtuchokgo. Umakgolh chiwix putum kilhtamaku nakamalakapastakakgo israelitas tuku lalh unu”».

8 Wa xlakata israelitas tlawakgolh chuna la Josué xkalimapakgsinit. Sakkikgolh akgkutiy chiwix kxlakʼitat kgalhtuchokgo Jordán, chuna la Jehová xlimapakgsinit Josué, akgtum chiwix xpalakata akgatunu tribu xalak Israel. Kalinkgolh chu kawilikgolh niku israelitas xʼamakgolh lhtatakgo.

9 Josué na wililh akgkutiy chiwix kxlakʼitat kgalhtuchokgo Jordán, niku tayakgolh sacerdotes tiku xlimakgolh arca xla talakkaxlan, chu chiwix anta wilakgolhku asta la uku.

10 Sacerdotes tiku xlimakgolh arca xla talakkaxlan anta tayakgolh kxlakʼitat Jordán asta akxni tlawakgoka putum tuku Jehová xlimapakgsinit Josué pi xkawanilh israelitas. Tlawakgolh chuna la Moisés xlimapakgsinit Josué. Chu kachikin lakapala patakutkgolh kgalhtuchokgo. 11 Akxni putum israelitas xpatakutkgonita kgalhtuchokgo, xʼarca Jehová chu sacerdotes patakutkgolh akxni xkaʼakxilhmakgo israelitas. 12 Chu akxni rubenitas, gaditas, chu itat xtribu Manasés patakutkgolh kgalhtuchokgo kxlakatinkan amakgapitsin, israelitas tistum xyakgo chuna la xtayakgo soldados, chuna la Moisés xkalimapakgsinit. 13 Max tipuxam mil soldados tiku tistum xyakgo xlakata natlawakgo guerra patakutkgolh kgalhtuchokgo kxlakatin Jehová xlakata xʼankgolh kxakaskakni tiyat nema xwi lakatsu kJericó.

14 Amacha kilhtamaku Jehová malankilh Josué kxlakatin putum israelitas, chu xlakan lu maxkikgolh kakni* putum kxlatamat chuna la xmaxkikgonit kakni Moisés.

15 Chu Jehová wanilh Josué: 16 «Kakalimapakgsi sacerdotes tiku limakgolh arca xla talakkaxlan pi katakutkgolh kJordán». 17 Wa xlakata Josué kalimapakgsilh sacerdotes: «Katakuttit kJordán». 18 Akxni sacerdotes tiku xlimakgolh arca xla talakkaxlan nema tapakgsini Jehová takutkgolh kJordán chu tayakgolh kxakaskakni tiyat, xchuchut Jordán tsukupa tlawan chuna la xapulana chu tatsamapa.

19 Israelitas patakutkgolh Jordán xliʼakgkaw kilhtamaku kxapulana papaʼ chu tamakgxtakgkgolh kʼGuilgal, kxʼeste niku xkitapakgta Jericó.

20 Chu akgkutiy chiwix nema xkaliminkanitancha kJordán, Josué katsapswililh anta kʼGuilgal. 21 Chu kawanilh israelitas: «Akxni minkamanankan nakakgalhskinkgoyan kkilhtamaku nema aku mima “¿Tuku kilhchanimakgo umakgolh chiwix?”, 22 wixin nakawaniyatit pi xkamanan “Israel patakutkgolh Jordán niku kaskakni 23 akxni Jehová kiDioskan maskakalh xchuchut Jordán kkilakatinkan asta akxni kpatakutkgow, chuna la Jehová kiDioskan maskakalh xaSpinini pupunu kkilakatinkan asta akxni kpatakutkgow. 24 Chuna tlawalh xlakata putum kachikinin xalak katiyatni nakatsikgo la xlilhuwa litliwakga kgalhi Jehová chu xlakata wixin ankgalhin napekuaniyatit Jehová miDioskan”».

5 Putum xmapakgsinanin amorreos tiku xwilakgolh kxʼoeste* Jordán chu putum xmapakgsinanin cananeos tiku xwilakgolh lakatsu kpupunu kgaxmatkgolh pi Jehová xmaskakanit kgalhtuchokgo Jordán kxlakatinkan israelitas asta akxni patakutkgolh. Chu tunkun pekuankgolh chu taxlajwanikgolh xpalakatakan israelitas.

2 Amacha kilhtamaku Jehová wanilh Josué: «Katlawa cuchillos xachiwix xlakata nakaʼakstilichukuniparaya kxuwa xlichixkukan lakchixkuwin xalak Israel». 3 Wa xlakata Josué tlawalh cuchillos xachiwix chu kaʼakstilichukunilh kxuwa xlichixkukan lakchixkuwin xalak Israel anta kʼGuibeat-Haaralot.* 4 Josué kaʼakstilichukunilh kxuwa xlichixkukan xlakata putum lakchixkuwin tiku taxtukgocha kʼEgipto, lakchixkuwin tiku soldados xwankgonit,* nikgolh chuna la tipuntaxtukgolh kxakaskakni tiyat, akxni xtaxtukgonitancha kʼEgipto. 5 Putum tiku taxtukgocha kʼEgipto xkaʼakstilichukunikanit kxuwa xlichixkukan, pero tiku lakachinkgolh chuna la xtipuntaxtumakgo kxakaskakni tiyat, akxni xtaxtukgonitancha kʼEgipto, niti xʼakstilichukunikanit kxuwa xlichixku. 6 Israelitas xtlawankgonit tipuxam kata kxakaskakni tiyat asta akxni lakgsputli putum kachikin, uma wamputun, lakchixkuwin tiku soldados xwankgonit nema xtaxtukgonitancha kʼEgipto chu ni xkgalhakgaxmatkgonit Jehová. Jehová kamalaknunilh pi nikxni xʼama kamaxki talakaskin naʼakxilhkgo tiyat nema Jehová xkamalaknuninit xalakgmakgan xnatlatnikan pi xʼama kinkamaxkiyan, akgtum tiyat niku lhuwa anan leche chu ksakgsi cera.* 7 Wa xlakata ni makglhtinankgolh tiyat tiku taxtukgocha kʼEgipto, wata xkamanankan tiku Josué kaʼakstilichukunilh kxuwa xlichixkukan; xlakan ni xkaʼakstilichukunikanit kxuwa xlichixkukan ktiji.

8 Akxni kaʼakstilichukunikgoka kxuwa xlichixkukan lakchixkuwin xalak Israel, israelitas tamakgxtakgkgolh niku xwilakgolh asta akxni lakchixkuwin pakskgolh.

9 Alistalh Jehová wanilh Josué: «La uku ktlawanit pi egipcios nialh nakalikgalhkgamanankgoyan». Wa xlakata anta niku kaʼakstilichukunika kxuwa xlichixkukan wanikan Guilgal asta la uku.

10 Israelitas chuntiya tamakgxtakgkgolh kʼGuilgal chu kakgotanun tlawakgolh Pascua, xlikgalhkutati kilhtamaku xla uma papaʼ, anta kxakaskakni tiyat nema xwi lakatsu kJericó. 11 Lichali chuna la xtlawakgonit Pascua, watiya uma kilhtamaku, tsukukgolh wakgo tuku makgalakan: kaxtalanchu nema ni kgalhi limaxkutin chu xatachuchu talhtsi. 12 Chu lichali, akxni tsukukgolh wakgo tuku makgala katiyatni, nialh analh maná, pero maski israelitas nialh xkgalhikgo maná, ama kata tsukukgolh wakgo tuku xmakgala xtiyat Canaán.

13 Akxni Josué lakatsu xwi kJericó, talakayawalh chu akxilhli chatum chixku nema xya kxlakatin chu xchipanit xʼespada. Josué lakgalh chu kgalhskilh: «¿Kilatatayayaw akinin o katatayaya kintalamakgasitsinkan?». 14 Xla kgalhtilh: «Ni, akit kminit la xpuxkukan ksoldados Jehová». Akxni kgaxmatli uma, Josué lakgtakilhputalh chu wanilh: «Malana, ¿tuku miliwanit miskujni?». 15 Xpuxkukan ksoldados Jehová kgalhtilh Josué: «Katatuxtu mintatunu, xlakata xasanto niku yat». Chu Josué tunkun chuna tlawalh.

6 Ama kilhtamaku, Jericó liwana xtalakchuwanit xlakata xkapekuanikgo israelitas, niti xtaxtu chu niti xtanu.

2 Alistalh Jehová wanilh Josué: «Kaʼakxilhti, kmakamaxkinitan Jericó, xmapakgsina chu xalakgtliwakga ksoldados. 3 Putum wixin tiku soldados litaxtuyatit, makgtum namakgstilitlawanatit putum kachikin. Chuna militlawatkan akgchaxan kilhtamaku. 4 Kxlakatin Arca kaʼankgolh kgalhtujun sacerdotes tiku nalinkgo kgantujun akgalokgot,* pero xliʼakgtujun kilhtamaku wixin makgtujun namakgstilitlawanatit kachikin chu sacerdotes namatasikgo akgalokgot. 5 Akxni wixin nakgaxpatatit pi kamatasimaka* akgalokgot putum kachikin pixlanka nakatasakgo* chuna la tiku wilakgo kʼguerra. Alistalh, xpatsaps kachikin natalaktilhkgo, chu israelitas titum xliʼanatkan chu xlitanutkan kkachikin».

6 Wa xlakata Josué xkgawasa Nun kamamakxtumilh sacerdotes chu kawanilh: «Kachaxtit arca xla talakkaxlan chu kgalhtujun sacerdotes kaʼankgolh kxlakatin xʼarca Jehová chu kalinkgolh akgtujun akgalokgot». 7 Alistalh kawanilh israelitas: «Kapitit chu kamakgstilitlawantit kachikin, chu kxlakatin xʼarca Jehová kaʼankgolh soldados tiku tistum yakgolh xlakata natlawakgo guerra». 8 Chuna la Josué xkawaninit israelitas, kgalhtujun sacerdotes tiku xlinkgo akgtujun akgalokgot nema xʼankgo kxlakatin Jehová titum ankgolh chu matasikgolh akgalokgot, chu xkastalanitilha arca xla talakkaxlan nema tapakgsini Jehová. 9 Soldados tiku tistum xyakgolh xlakata xtlawakgolh guerra xʼankgo kxlakatinkan sacerdotes tiku xmatasimakgolh akgalokgot, chu amakgapitsi soldados kstalanitilhamakgo Arca chuna la makgas xkamatasimaka akgalokgot.

10 Ama kilhtamaku, Josué xkalimapakgsinit israelitas: «Ni pixlanka kachuwinantit chu kaks katayatit. Nipara tsinu kachuwinantit asta akxni akit nakkawaniyan “¡Kakatasatit!” chu ama kilhtamaku nakatasayatit». 11 Josué tlawalh pi sacerdotes xlinkgolh xʼarca Jehová chu makgtum xmakgstilitlawankgolh kachikin. Alistalh taspitparakgolh anta niku xwilakgolh israelitas chu anta lhtatakgolh.

12 Lichali tsisa, Josué sokg takilh chu sacerdotes chaxkgolh xʼarca Jehová, 13 chu kgalhtujun sacerdotes tiku xʼankgo kxlakatin xʼarca Jehová xlinkgo akgtujun akgalokgot chu chuntiya xmatasimakgo. Soldados tiku xlinkgo tuku xlitlawakgo guerra xʼankgo kxlakatinkan, chu amakgapitsi soldados kstalanitilhamakgo xʼarca Jehová chuna la makgas xkamatasimaka akgalokgot. 14 Xliʼakgtiy kilhtamaku makgtum makgstilitlawankgolh kachikin chu alistalh taspitparakgolh niku xtamakgxtakgmakgolh. Chuna tlawakgolh akgchaxan kilhtamaku.

15 Xliʼakgtujun kilhtamaku tsisa takikgolh, akxni xkgakgalh. Chu chuna la xtlawakgonit xapulana, makgtujun makgstilitlawankgolh kachikin. Kajwatiya uma kilhtamaku makgtujun makgstilitlawankgolh kachikin. 16 Akxni xlimakgtujun xmakgstilitlawamakgolh kachikin, sacerdotes matasikgolh akgalokgot chu Josué kawanilh israelitas: «¡Kakatasatit, xlakata Jehová kamakamaxkinitan uma kachikin! 17 Kachikin chu putum tuku anta anan xlilat namalakgsputukan; putum uma Jehová tapakgsini. Kajwatiya Rahab tiku ksta xmakni ni namakgniyatit, xla chu putum tiku akxtum tawilakgolh kxchik, xlakata kamatsekgli skgalananin tiku kamalakgachaw. 18 Pero katamakgatlinitit tuku tanu wilikanit xlakata namalakgsputukan, xlakata ni nakgalhiputunatit, ni natiyayatit chu ni natlawayatit pi putum kachikin nalakgchan namalakgsputukan chu nalitaniyatit taʼakglhuwit. 19 Pero putum plata, oro chu putum tuku litatlawanit cobre chu likan tapakgsini Jehová chu xasanto, xlilat akxtum nakatawilikan tuku lhuwa xtapalh kgalhi Jehová».

20 Wa xlakata akxni matasikgolh akgalokgot, israelitas pixlanka katasakgolh. Akxni kgaxmatkgolh chuna la matasika akgalokgot chu pixlanka katasakgolh chuna la katasakgo tiku tlawakgo guerra, patsaps talaktilhkgolh. Alistalh israelitas tanukgolh kkachikin, xchatunukan titum ankgolh kxlakatinkan chu akgchipakgolh kachikin. 21 Kalimasputuka espada putum tuku xʼanan kkachikin, lakchixkuwin, lakpuskatin, lakgkgawasan chu tiku xlinkgoya kata, nachuna toros, borregos chu burros.

22 Josué kawanilh chatiy lakchixkuwin tiku kiskgalakgolh katiyatni: «Katanutit kxchik Rahab, tiku ksta xmakni chu katamakxtutit xla chu putum tiku xalak xchik chuna la malaknunitit». 23 Wa xlakata skgalananin tamakxtukgolh Rahab, xtlat, xtse, xnatalan chu putum tiku xalak xchik; chuna, katamakxtukgolh putum tiku xalak xfamilia, chu lakgamakgat kalinka niku xwilakgolh israelitas, anta niku nitu xkaʼakgspulalh.

24 Alistalh lhkuyuwilikgolh putum kachikin chu putum tuku xʼanan anta, pero plata, oro chu tuku xlitatlawanit cobre chu likan akxtum katawilika putum tuku lhuwa xtapalh xwi kxchik Jehová. 25 Josué kajwatiya ni kamakgnilh Rahab tiku ksta xmakni, tiku xalak xchik xtlat chu putum xfamilia, chu xla lama asta la uku anta kʼIsrael xlakata kamatsekgli skgalananin tiku Josué kamalakgachalh kJericó.

26 Amacha kilhtamaku Josué tlawalh uma tamalaknun:* «Jehová katlawalh pi kaʼakgspulalh tuku nitlan chixku tiku nakaxtlawapara kachikin xla Jericó. Akxni nawili tuku nalitaya kachikin naniy xapuxku xkgawasa, chu akxni nayawa xmalakcha naniy xaʼaktsujku xkgawasa».

27 Chuna Jehová makgtayalh Josué, chu lu lakgapaska kxlikalanka katiyatni.

7 Israelitas ni kgalhakgaxmatkgolh tuku Dios xkawaninit, pi xtamakgatlinikgolh tuku xʼamaka malakgsputukan, xlakata Acán, xkgawasa Carmí, xkgawasa Zabdí, xkgawasa Zérah, xalak xtribu Judá, tiyalh tuku xʼamaka malakgsputukan. Wa xlakata, Jehová lu kasitsinilh israelitas.

2 Alistalh Josué kamalakgachalh makgapitsi lakchixkuwin lata kJericó asta kHai, nema lakatsu wi kBet-Aven kxʼeste Betel. Kawanilh: «Katakxtutit* chu kaskgalatit Hai». Wa xlakata lakchixkuwin takxtukgolh chu skgalakgolh Hai. 3 Akxni taspitkgolh, wanikgolh Josué: «Ni talakaskin natakxtukgo putum soldados. Kajwatiya talakaskin akgtiy mil o akgtutu mil soldados xlakata namakgatlajayaw Hai. Kaj ni lhuwa wilakgolh anta, wa xlakata ni kakamakgatlakgwanti putum soldados».

4 Wa xlakata takxtukgolh max akgtutu mil, pero katsalanikgolh lakchixkuwin, soldados xalak Hai. 5 Soldados xalak Hai kamakgnikgolh puxamakuchaxan lakchixkuwin; kaputsastalanikgolh israelitas lata kxmalakcha kachikin asta kSebarim, chu chuntiya xkamakgatlajamakgo akxni xtalakaktamakgo. Wa xlakata, latamanin tsukukgolh pekuankgo.*

6 Akxni Josué akxilhli uma, xtitli klhakgat chu takilhputalh kxlakatin xʼArca Jehová. Xla chu lakgkgolotsin xalak Israel chuna tawilakgolh asta akxni kgotanulh, chu chuntiya xkaʼakmawakamaka pokgxni. 7 Josué wa: «¡Ay, Malana Jehová tiku lakgchan namapakgsinan! ¿Tuku xlakata kamapatakutni uma kachikin kgalhtuchokgo Jordán? ¿Xlakata nakilamakamastayaw kxmakankan amorreos chu nakinkamasputukgoyan? ¡Lu tlan xtiwa komo xaktitamakgxtakgchaw kxakilhtutu* Jordán! 8 Kakintapati, Jehová, ¿tuku tlan nakwan la uku? Israel katsalaninit xtalatlawananin. 9 Akxni cananeos chu putum latamanin xalak uma katiyatni nakatsikgo, nakinkastiliwilikgoyan chu naxapakgo kintukuwanikan kkatiyatni. Chu wix ¿tuku natlawaya xpalakata mintukuwani nema lu maxkikan kakni?».

10 Jehová kgalhtilh Josué: «¡Kataya! ¿Tuku xlakata takilhputanita? 11 Israel lakgalhinanit. Xlakan laktlawakgonit kintalakkaxlan, talakkaxlan nema kkalimapakgsilh pi xmakgantaxtikgolh. Tiyakgolh tuku tanu xwilikanit xlakata namalakgsputukan; kgalhankgolh chu akxtum tawilikgolh tuku katapakgsini. 12 Wa xlakata israelitas nila katikamakgatlajakgolh xtalatlawananinkan. Natalakgaspittayakgo chu nakatsalanikgo xtalatlawananinkan, xlakata litaxtukgonit tuku tanu wilikanit xlakata namalakgsputukan. Nialh kaktikamakgtayan komo ni namasputuyatit kmilakgstipankan tuku tanu xwilikanit xlakata xmalakgsputuka. 13 ¡Kataya chu kakawani israelitas pi katakaxkgolh!* Kakawani: “Katakaxtit, xlakata chali napinatit kxlakatin Dios, xlakata wa uma tuku wanit Jehová xDios Israel: «Kakgaxpatti, kachikin Israel, kmilakgstipankan wi tuku xlitamalakgsputut. Nila katikamakgatlajatit mintalatlawananinkan asta akxni namalakgsputuyatit kmilakgstipankan tuku xlitamalakgsputut. 14 Chali tsisa natanatit akgatunu akgatunu tribu. Chu natalakatsuwi akgatunu akgatunu familia nema tapakgsi ktribu nema Jehová nalaksaka. Chu natalakatsuwi akgatunu akgatunu chiki nema tapakgsi kfamilia nema Jehová nalaksaka. Chu natalakatsuwi chatunu chatunu chixku tiku tapakgsi kchiki nema Jehová nalaksaka. 15 Chu tiku natekgsnikan tuku tanu xwilikanit xlakata xmalakgsputuka, nalaklhkuyuwilikan xla chu putum tuku tapakgsini, xlakata laktlawanit xtalakkaxlan Jehová chu tlawanit tuku limaxana kʼIsrael»”».

16 Lichali, Josué tsisa takilh chu tlawalh pi xtalakatsuwikgolh akgatunu akgatunu tribu xalak Israel chu laksakka xtribu Judá. 17 Tlawalh pi xtalakatsuwikgolh xfamilias Judá, chu laksakka xfamiliajkan zerahítas. Alistalh tlawalh pi xtalakatsuwikgolh xfamiliajkan zerahítas, chatunu chatunu chixku, chu laksakka Zabdí. 18 Xaʼawatiya tlawalh pi xtalakatsuwikgolh tiku xalak xchik Zabdí, chatunu chatunu chixku, chu laksakka Acán, xkgawasa Carmí, xkgawasa Zabdí, xkgawasa Zérah, xalak xtribu Judá. 19 Alistalh Josué wanilh Acán: «Katlawa litlan, kinkgawasa, kamaxki kakni Jehová, xDios Israel, chu kawanti tuku nitlan tlawanita kxlakatin. Ni kakimatsekgni».

20 Acán kgalhtilh Josué: «Xlikana, akit klakgalhinanit kxlakatin Jehová, xDios Israel. Wa uma tuku ktlawalh: 21 akxni kakxilhli kxlakgstipan tuku lhuwa xtapalh xʼanan kJericó akgtum lu stlan lhakgat xalak Sinár, akgtiy kilo* xla plata chu itat kilo* xla oro, kkakgalhiputulh, wa xlakata kkalilh. La uku kkaʼakgtapujunit kxlakʼitat kinchik xaxuwa, chu tumin wi kxtampin».

22 Josué tunkun kamalakgachalh makgapitsi soldados; xlakan lakapala ankgolh kxchik xaxuwa, chu anta tekgskgolh lhakgat chu kxtampin tekgskgolh tumin. 23 Wa xlakata katamakxtukgolh, kalinikgolh Josué chu putum israelitas, chu kawilikgolh kxlakatin Jehová. 24 Alistalh Josué chu putum Israel kalinkgolh Acán xkgawasa Zérah, akgtiy kilo plata, lu xastlan lhakgat, itat kilo xla oro, xlakgkgawasan, xlaktsuman, xtoro, xburro, xborregos, xchik xaxuwa chu putum tuku xtapakgsini kxakaxtum Acor. 25 Josué wanilh: «¿Tuku xlakata kilalimininitaw taʼakglhuwit? La uku, Jehová naliminiyan taʼakglhuwit». Wa xlakata putum Israel aktalamakgnikgolh; alistalh kalhkuyuwilikgolh. Xputumkan kaʼaktalamakgnika. 26 Chu liʼakgtapuwilikgolh lhuwa chiwix nema anta wilakgolh asta la uku. Akxni chuna tlawaka takaksli lanka xtasitsi Jehová. Wa xlakata, anta niku aktalamakgnika Acán chuntiya limapakuwikan kxakaxtum Acor* asta la uku.

8 Alistalh Jehová wanilh Josué: «Ni kapekuanti chu ni kalhpipi.* Kakalipi putum soldados chu kapit talatlawaya Hai. Kaʼakxilhti kmakamaxkinitan xmapakgsina Hai, xkachikin, tiku lamakgolh anta chu xtiyat. 2 Chuna la katlawani Jericó chu xmapakgsina nachuna kakatlawani Hai chu xmapakgsina. Pero la uku tlan natatamakgxtakgatit tuku lhuwa xtapalh anan anta chu putum animales. Kxkgen kachikin kakawili tiku tsekg nakalipataxtukgo».

3 Wa xlakata Josué chu putum soldados ankgolh talatlawakgo Hai. Josué kalaksakli puxamakaw mil xalakgtliwakga soldados chu kamalakgachalh katsisni. 4 Kalimapakgsilh: «Kaʼakxilhtit, kakawilitit tiku tsekg nakalipataxtukgo kxkgen kachikin. Ni lu katamakgatlinitit kachikin, chu skgalalh katawilatit. 5 Akit chu putum tiku nakintatamakgxtakgkgo naktalakatsuwiyaw kkachikin chu akxni xlakan nataxtukgo chu nakinkatalachipakgoyan chuna la xapulana, nakkatsalaniyaw. 6 Akxni nakinkaputsastalanikgoyan, naktlawayaw pi katamakgatlinikgolh kachikin, xlakata nawankgo: “Tsalamakgolh chuna la xapulana”. Chu nakkatsalaniyaw. 7 Alistalh wixin nakalipataxtuyatit chu naʼakgchipayatit kachikin; Jehová miDioskan nakamakamaxkiyan. 8 Akxni akgchipanitantit nawan kachikin, kalhkuyuwilitit. Militlawatkan chuna la wa Jehová. Wa uma tuku kkalimapakgsiyan».

9 Alistalh Josué kamalakgachalh chu xlakan ankgolh niku tsekg xʼamakgo tawilakgo; takaxtawilakgolh kxlakgstipan Betel chu Hai, kxʼoeste Hai, chu Josué akxtum katatamakgxtakgli amakgapitsi soldados ama katsisni.

10 Lichali akxni tsisa takikgolh, Josué kamamakxtumilh soldados, xla chu lakgkgolotsin xalak Israel kapulalinkgolh kʼHai. 11 Putum soldados tiku xtaʼankgo Josué takxtukgolh* chu takaxtawilakgolh kxlakatin kachikin. Tamakgxtakgkgolh kxnorte Hai, chu kaj xkamapitsi niku xakaxtum. 12 Ama kilhtamaku, xla tsekg xkawilinit max akgkitsis mil lakchixkuwin kxlakgstipan Betel chu Hai, kxʼoeste kachikin. 13 Wa xlakata atsinu ni putum soldados takaxtawilakgolh kxnorte kachikin chu amakgapitsi soldados kawililh kxʼoeste kachikin, uma katsisni Josué chalh asta kxʼitat niku xakaxtum.

14 Akxni mapakgsina xalak Hai akxilhli uma, xla chu soldados xalak kachikin lakapalakgolh chu tsisa taxtukgolh xlakata xkatalatlawakgolh israelitas lakatsu kxakaskakni tiyat. Pero xla ni xkatsi pi tsekg xʼamaka kalipataxtukan kxkgen kachikin. 15 Akxni soldados xalak Hai tsukukgolh talatlawanankgo, Josué chu putum Israel tsukukgolh tsalakgo chu ankgolh kxakaskakni tiyat. 16 Wa xlakata putum kamamakxtumika tiku xwilakgolh kkachikin, xlakata xkaputsastalanikgolh chu tamakgatlinikgolh kachikin akxni xputsastalanimakgo Josué. 17 Putum lakchixkuwin xalak Hai chu xalak Betel kaputsastalanikgolh israelitas. Malakkiyawakgolh kachikin chu kaputsastalanikgolh israelitas.

18 Alistalh Jehová wanilh Josué: «Kalitamakgastonkgti milanza nema chipanita chu kalimakapi kʼHai xlakata nakmakamaxkiyan». Wa xlakata Josué limakanilh xlanza kachikin. 19 Akxni stonkgli xmakxpan, tiku tsekg xwilakgo tayakgolh, lakapala ankgolh kkachikin chu akgchipakgolh. Chu tunkun lhkuyuwilikgolh.

20 Akxni soldados xalak Hai talakgaspitkgolh, akxilhkgolh pi kkachikin xtaxtuma jini chu nialh kgalhikgolh litliwakga xlakata wi niku naʼankgo. Alistalh tiku xtsalamakgo kxakaskakni tiyat kalakgtaspitkgolh tiku xkaputsastalanimakgo. 21 Akxni Josué chu putum Israel akxilhkgolh pi tiku tsekg xwilakgolh xʼakgchipakgonit kachikin chu pi kkachikin xtaxtuma jini, talakgaspitkgolh chu katalachipakgolh ksoldados Hai. 22 Chu amakgapitsi soldados taxtukgocha kkachikin xlakata xkalakgapaxtokgkgolh; chu soldados xalak Hai kxlakʼitat tamakgxtakgkgolh, xwilakgolh israelitas kxchakgenkan chu kxlakatinkan, chu israelitas putum kamakgnikgolh asta nialh tamakgxtakgli chatum tiku tlan xtsalalh. 23 Pero chipaka mapakgsina xalak Hai chu linka kxlakatin Josué.

24 Akxni israelitas xkamakgnikgonita putum latamanin xalak Hai kkapukuxtun, kxakaskakni tiyat niku xkaputsastalanikgonit, chu xmakgnikgonit asta xaʼawatiya lataman, israelitas taspitkgolh kʼHai chu kalimasputukgolh espada tiku xwilakgolh anta. 25 Xliputum tiku nikgolh ama kilhtamaku, akgkutiy mil xwankgonit, chuna la lakchixkuwin chu lakpuskatin, putum latamanin xalak Hai. 26 Josué ni maktilh xmakxpan chuna la xlitamakgastonkgnit xlanza asta akxni xkamasputukgonit putum latamanin xalak Hai. 27 Pero israelitas tatamakgxtakgolh putum animales chu tuku lhuwa xtapalh xʼanan kʼuma kachikin chuna la Jehová xlimapakgsinit Josué.

28 Alistalh Josué lhkuyuwililh Hai chu kaj xatalaktilhni makgxtakgli, chu chuntiya wi asta la uku. 29 Mawakalh kkgantum kiwi xmakni mapakgsina xalak Hai asta akxni kgotanulh. Chu akxni xʼamaja tatsekga chichini, Josué limapakgsinalh pi xmaktika. Alistalh lhkgen makanka niku xlaktanukan kkachikin chu liʼakgtapuwilika lhuwa chiwix, chu chuntiya wi asta la uku.

30 Ama kilhtamaku Josué tlawanilh Jehová xDios Israel akgtum pumakamastan anta ksipi Ebal, 31 chuna la Moisés kskujni Jehová, xkalimapakgsinit israelitas chu chuna la tatsokgtawilanit kxLimapakgsin Moisés: «Akgtum pumakamastan nema xlitatlawanit chiwix nema ni xkalimaklhpitkanit liskujni xalikan». Chu anta makamaxkika Jehová xalhkun tamakamastan chu tamakamastan xla takaksni.

32 Chu anta kchiwix amakgtum tsokgwilipa Limapakgsin nema Moisés xtsokgwilinit kxlakatinkan israelitas. 33 Putum israelitas, lakgkgolotsin, xpulalinanin kachikin chu jueces xpaxtuyakgolh Arca, kxlakatinkan levitas tiku sacerdotes xwankgonit chu xlimakgolh arca xla talakkaxlan nema xtapakgsini Jehová. Na anta xwilakgolh latamanin tiku xalak alakatanu xwankgonit chu israelitas. Itat kachikin xyakgolh kxlakatin sipi Guerizim chu aitat kachikin xyakgolh kxlakatin sipi Ebal (chuna la xlimapakgsinanit Moisés, kskujni Jehová), xlakata ksikulunatlawaka kachikin Israel. 34 Alistalh Josué pixlanka likgalhtawakgalh putum tuku xwan Limapakgsin, chuna la tasikulunalin nema xʼamakgo kgalhikgo chu tuku max nitlan xkaʼakgspulalh, chuna la xtatsokgtawilanit kLimapakgsin. 35 Xliputum xLimapakgsin Moisés, Josué pixlanka kalikgalhtawakganilh putum israelitas akgatunu tachuwin nema xmin anta, na anta xwilakgolh lakpuskatin, kamanan chu tiku xalak atanu kachikin xwankgonit chu akxtum xkatalamakgolh.*

9 Akxni kgaxmatkgolh uma, mapakgsinanin tiku xwilakgolh kxʼoeste Jordán, tiku xwilakgolh kkasipijni, kSefelá, kxkilhtun xaLanka pupunu* chu kxlakatin Líbano, hititas, amorreos, cananeos, perizitas, heveos chu jebuseos, 2 makxtum lakgolh xlakata xkatalatlawakgolh Josué chu Israel.

3 Latamanin xalak Gabaón na kgaxmatkgolh tuku Josué xkatlawaninit Jericó chu Hai. 4 Wa xlakata xlakan limasiyakgolh liskgalala chu kamakukikgolh xburroskan xliwatkan, kxalakgwan xkuxtalhkan, chu kxuwakan niku xmujukgonit xvinojkan xalakgwan xwankgonit, xtaxtitkgonit chu xkalaktsapakanit. 5 Nachuna xtatunukan xalakgwan xwankgonit chu xkalaktsapakanit, chu klhakgatkan na xalakgwan xwankgonit. Putum xkaxtilanchujkan skawawa xwankgonit chu xtalakxpulamikgonit. 6 Alistalh, lakgankgolh Josué, niku xwilakgolh israelitas, anta kʼGuilgal, chu kawanikgolh xla chu lakchixkuwin xalak Israel: «Kachikin niku kminitanchaw lu makgat. Kakilatatlawaw akgtum talakkaxlan». 7 Pero lakchixkuwin xalak Israel kawanikgolh heveos: «Max lakatsu wilatit. ¿Tuku xlakata nakkatatlawayan akgtum talakkaxlan?». 8 Xlakan kgalhtikgolh Josué: «Akinin milakskujnin».

Alistalh Josué kakgalhskilh: «¿Tiku wixin chu niku minkachikinkan?». 9 Xlakan wanikgolh: «Milakskujnin lakgamakgat niku minkgonitancha kaj xlakata xtukuwani Jehová miDios, xlakata kkgaxmatnitaw putum tuku tlawalh kʼEgipto chu pi xla kgalhi lhuwa litliwakga 10 chu putum tuku katlawanilh chatiy mapakgsinanin amorreos tiku xwilakgolh kxakilhtutu Jordán,* mapakgsina Sehón xalak Hesbón chu mapakgsina Og xalak Basán, nema xwi kʼAstarot. 11 Wa xlakata lakgkgolotsin chu latamanin xalak kinkachikinkan kinkawanikgon “Kalipitit tuku nawayatit ktiji chu kakalakgpitit. Kakawanitit «Milakskujnin naklitaxtuyaw; kakilatatlawaw akgtum talakkaxlan»”. 12 Uma kaxtalanchu nema klimiw xlakata nakkalakgminan unu, chichiku xwanit akxni ktaxtuchaw kkinchikkan. Chu, kaʼakxilhtit, skawawa chu talakxpulamaja. 13 Chu uma xuwa nema pumujukan vino xalaksasti xwankgonit akxni kkamatsamaw, pero la uku taxtitkgonit. Chu kilhakgatkan chu kintatunukan lakgwankgonit xlakata makgat niku kminchaw».

14 Akxni chuna kawanika, lakchixkuwin xalak Israel lakputsananikgolh tuku xlakan xliminkgonit, pero ni kgalhskinkgolh Jehová. 15 Wa xlakata Josué kawanilh pi nitu xʼama katlawani, chu katatlawalh akgtum talakkaxlan xlakata xkamakatsinilh pi ni xʼama kamakgni chu wa uma tuku kamalaknunikgolh napuxkun xalak kachikin.*

16 Xlituxama chuna la xkatatlawakgonit talakkaxlan, katsikgolh pi anta lakatsu xlamakgolh, pi xtalakatsuninkan xwankgonit. 17 Wa xlakata israelitas ankgolh chu chankgolh kxkachikinkan xlituxama, xkachikinkan xwankgonit Gabaón, Kefirá, Beerot chu Quiryat-Jearim. 18 Pero israelitas nitu katlawanikgolh, xlakata napuxkun xalak kachikin xkamalaknunikgonit gabaonitas kxtukuwani Jehová, xDios Israel, pi ni xʼamakgo kamakgnikgo. Chu putum israelitas nitlan tsukukgolh kalichuwinankgo xnapuxkun kachikin. 19 Wa xlakata, putum napuxkun kawanikgolh israelitas: «Wi tuku kkamalaknuniw kxtukuwani Jehová, xDios Israel, wa xlakata nila kkatlawaniyaw tuku nitlan. 20 Wa uma tuku naktlawayaw: ni kaktikamakgniw xlakata Dios ni nakinkasitsiniyan kaj xlakata tamalaknun nema kkatlawaniw». 21 Chu wamparakgolh: «Ni kaktikamakgniw, pero xlakan nasakgnankgo chu naputsakgo chuchut xpalakata putum israelitas». Wa uma tuku kamalaknunikgolh napuxkun xalak kachikin.

22 Josué katasanilh chu kawanilh: «¿Tuku xlakata kilaʼakgskgawiw akxni wantit “Makgat niku kminitanchaw” maski kintalakatsuninkan wixin? 23 Wa uma tuku nakalimalakgaxokgekanatit, lata uma kilhtamaku wixin ankgalhin skujnin nalitaxtuyatit, nasakgnanatit chu naputsayatit chuchut xpalakata xchik kiDios». 24 Xlakan kgalhtikgolh Josué: «Umakgolh milakskujnin liwana kawanika pi Jehová miDios limapakgsilh kskujni Moisés pi xkamakamaxkin wixin putum uma tiyat chu xkamalakgsputukgolh kmilakatinkan putum tiku wilakgolh anta. Wa xlakata klakgmaxtuputuw kilatamatkan chu ktlawaw uma. 25 La uku kmimakan kwilaw. Kakilatlawaniw tuku tlan chu tuku xaʼakgstitum akxilha». 26 Chu wa uma tuku Josué tlawalh xpalakatakan; kalakgmaxtulh kxmakankan israelitas chu ni kamakgnika. 27 Pero ama kilhtamaku Josué kalakgayawalh nasakgnankgo chu naputsakgo chuchut xpalakata kachikin chu xpalakata xpumakamastan Jehová anta niku xla* xlaksakli, chu wa uma tuku tlawamakgolhku asta la uku.

10 Akxni mapakgsina Adoni-Zédec xalak Jerusalén kgaxmatli pi Josué xʼakgchipanit Hai chu xmalakgsputunit, chu xkatlawaninit Hai chu xmapakgsina chuna la xkatlawaninit Jericó chu xmapakgsina, chu gabaonitas xkatatlawakgonit akgtum talakkaxlan Israel chu pi akxtum xkatalamakgolhku, 2 lu lakgaputsalh xlakata Gabaón akgtum lu lanka kachikin xwanit xtachuna la akgtum kachikin niku xwi chatum mapakgsina. Tlakg lanka kachikin xwanit nixawa Hai, chu anta putum lakchixkuwin soldados xwankgonit. 3 Wa xlakata Adoni-Zédec, mapakgsina xalak Jerusalén kamalakgachanilh uma tamakatsin Hoham, mapakgsina xalak Hebrón, Piram, mapakgsina xalak Jarmut, Jafía, mapakgsnina xalak Lakís, chu Debir, mapakgsina xalak Eglón: 4 «Kakilamakgtayaw chu kakatalatlawaw gabaonitas, xlakata katatlawakgonit talakkaxlan xla takaksni Josué chu israelitas». 5 Wa xlakata kgalhkitsis mapakgsinanin amorreos, xalak Jerusalén, xalak Hebrón, xalak Jarmut, xalak Lakís chu xalak Eglón, tamakxtumikgolh chu nachuna ksoldadoskan. Ankgolh chu takaxtawilakgolh xlakata xtalatlawakgolh Gabaón.

6 Gabaonitas malakgachanikgolh Josué uma tamakatsin niku xtamakgxtakgmakgolh kʼGuilgal: «Ni kakaʼakgxtakgmakganti* umakgolh milakskujnin. ¡Lakapala katat! ¡Kakilalakgmaxtuw chu kakilamakgtayaw! Putum mapakgsinanin amorreos tiku wilakgocha kkasipijni makxtum lakgonit xlakata nakinkatalatlawakgoyan». 7 Wa xlakata Josué katataxtucha kʼGuilgal putum ksoldados chu tiku tlakg xalakgtliwakga xwankgonit.

8 Alistalh Jehová wanilh Josué: «Ni kakapekuani, xlakata kkamakamaxkinitan. Nipara chatum tlan namakgatlajayan». 9 Lata taxtukgocha kʼGuilgal chu tantaskaka xtlawankgonit, Josué kaj xalan katalatlawalh. 10 Jehová tlawalh pi amorreos ni xkatsikgolh tuku natlawakgo kxlakatinkan israelitas, chu israelitas kamakgnikgolh lhuwa amorreos anta kʼGabaón; kaputsastalanikgolh ktiji nema xtakxtu kBet-Horón chu kamakgnitilhakgolh asta kʼAzecá chu kMaquedá. 11 Akxni xkatsalanimakgolh israelitas chu xtaktamakgolh kBet-Horón, Jehová lata kʼakgapun kamakaminicha laklanka chijit asta kʼAzecá, chu xlakan nikgolh. Tlakg lhuwa latamanin nikgolh xlakata chijit nixawa tiku kamakgnikgolh israelitas.

12 Wa uma kilhtamaku akxni Josué tachuwinalh Jehová, kilhtamaku akxni Jehová kamakamastalh amorreos kxmakankan Israel, chu Josué wa kxlakatinkan israelitas:

13 Wa xlakata chichini kaks tawi chu papaʼ ni tatsuwilh asta akxni israelitas kamakgatlajakgolh xtalatlawananinkan. ¿Ni tatsokgtawilanit uma kxlibro Jasar? Chichini kaks tawi kxlakʼitat akgapun chu max akgtum kilhtamaku ni tatsekgli. 14 Nikxni xʼananit akgtum kilhtamaku la uma chu nikxni anampa, akxni Jehová kgaxmatnilh chatum chixku, xlakata Jehová xtalatlawanama xpalakata Israel.

15 Alistalh Josué katataspitli putum soldados anta niku xwilakgolh, kʼGuilgal.

16 Ama kilhtamaku, kgalhkitsis mapakgsinanin tsalakgolh chu tatsekgkgolh klhuku nema xwi kMaquedá. 17 Alistalh makatsinika Josué: «Katekgska kgalhkitsis mapakgsinanin tiku xtatsekgkgonit klhuku nema xwi kMaquedá». 18 Chu Josué wa: «Kakamakgolutit laklanka chiwix niku laktanukan klhuku chu kakayawatit lakchixkuwin xlakata nakaskgalakgo. 19 Pero putum wixin ni katachokgotit, kakaputsastalanitit mintalamakgasitsinkan chu kakamakgnitit. Ni kakamaxkitit talakaskin natanukgo kxkachikinkan, xlakata Jehová, miDioskan, kamakamaxkikgonitan».

20 Josué chu israelitas kamakgatlajakgolh xtalatlawananinkan, asta atsinu ni xkamasputukgonit, kaj ni chalhuwa tiku tsalakgolh chu tatsekgkgolh kkachikinin nema xkgalhikgo xpatsapskan. 21 Alistalh putum soldados taspitkgolh anta niku xwi Josué, niku xtamakgxtakgmakgo kMaquedá. Nipara chatum chixku wa* tuku nitlan xpalakatakan israelitas. 22 Chu Josué wa: «Kamalakkitit niku laktanukan klhuku, kakatamakxtutit kgalhkitsis mapakgsinanin chu kakilaliminiw». 23 Wa xlakata katamakxtuka klhuku kgalhkitsis mapakgsinanin: xalak Jerusalén, xalak Hebrón, xalak Jarmut, xalak Lakís chu xalak Eglón, chu kalinka kxlakatin Josué. 24 Akxni kaliminika umakgolh mapakgsinanin, Josué kamamakxtumilh putum lakchixkuwin xalak Israel chu kawanilh xnapuxkun soldados tiku xtaʼankgonit: «Katalakatsuwitit chu kawilitit mintantunkan kxʼakglhtampixnikan umakgolh mapakgsinanin». Wa xlakata xlakan talakatsuwikgolh chu wilikgolh xtantunkan kxʼakglhtampixnikan. 25 Chu Josué kawanilh: «Ni kapekuantit chu ni kalhpipitit.* Lakgtliwakgan kawantit chu ni kapekuantit, xlakata wa uma tuku Jehová nakatlawani putum mintalamakgasitsinkan tiku nakatalatlawakgoyatit».

26 Alistalh Josué kamakgnilh chu kamawakalh kkgankitsis kiwi, niku tawakakgolh asta akxni kgotanulh. 27 Akxni xtatsekgmaja chichini, Josué limapakgsinalh pi xkamaktika kkiwi chu xkamakanka klhuku niku xtatsekgkgonit. Alistalh wilikgolh laklanka chiwix niku xlaktanukan kʼuma lhuku, chu anta wilakgolhku asta la uku.

28 Ama kilhtamaku, Josué akgchipalh Maquedá chu putum tiku xwilakgolh anta kalimakgnilh espada. Makgnilh xmapakgsina chu putum latamanin tiku xlamakgolh anta, niti lakgtaxtulh. Tlawanilh mapakgsina xalak Maquedá chuna la xtlawaninit mapakgsina xalak Jericó.

29 Alistalh Josué katataxtucha putum soldados kMaquedá chu ankgolh kLibná chu katalatlawakgolh tiku xwilakgolh kLibna. 30 Jehová na kamakamaxkilh israelitas uma kachikin chu xmapakgsina. Kalimasputukgolh xʼespadajkan putum latamanin tiku anta xwilakgolh. Wa xlakata xmapakgsinakan tlawanikgolh chuna la tlawanikgolh xmapakgsina Jericó.

31 Alistalh Josué katataxtucha putum soldados kLibná chu ankgolh kLakís. Anta tamakgxtakgkgolh chu katalatlawakgolh tiku xwilakgolh anta. 32 Jehová makamastalh Lakís kxmakankan israelitas, chu akgchipakgolh xliʼakgtiy kilhtamaku. Masputukgolh kachikin chu kalimasputukgolh espada putum tiku xwilakgolh anta chuna la xtlawanikgonit Libná.

33 Wa xlakata Horam, mapakgsina xalak Guézer, alh makgtaya Lakís. Pero Josué masputulh xla chu putum xkachikin chu niti lakgtaxtulh.

34 Alistalh Josué kataʼalh putum soldados lata kLakís asta kʼEglón. Anta tamakgxtakgkgolh chu katalatlawakgolh tiku xwilakgolh anta. 35 Ama kilhtamaku akgchipakgolh kachikin chu limasputukgolh espada. Na kamakgnikgolh putum latamanin tiku xwilakgolh anta chuna la tlawakgolh kLakís.

36 Alistalh Josué kataʼalh putum soldados lata kʼEglón asta kʼHebrón chu katalatlawakgolh tiku xwilakgolh anta. 37 Akgchipakgolh chu limasputukgolh espada xmapakgsina, laktsu xkachikinin chu putum latamanin tiku xwilakgolh anta, niti lakgtaxtulh. Chuna la xtlawaninit Eglón, na katamalakgsputukgolh putum latamanin.

38 Xaʼawatiya, Josué talakgspitli chu kataʼalh israelitas kDebir chu katalatlawakgolh tiku xwilakgolh anta. 39 Akgchipakgolh xkachikin, xmapakgsina chu putum laktsu xkachikinin, chu kalimasputukgolh espada; kamakgnikgolh putum latamanin tiku xwilakgolh anta, niti lakgtaxtulh. Tlawanikgolh Debir chu xmapakgsina tuku katlawanikgolh Hebrón, Libná chu xmapakgsinakan.

40 Josué akgchipalh putum kasipijni, Négueb, Sefelá chu putum xlakpanin kasipijni, chuna la putum xmapakgsinaninkan chu niti lakgtaxtulh. Masputulh putum tuku xjaxanan, chuna la xlimapakgsinanit Jehová, xDios Israel. 41 Josué akgchipalh putum tiyat lata kCadés-Barnea asta kʼGaza chu putum tiyat xla Gosén chu asta kʼGabaón. 42 Josué kachipalh putum umakgolh mapakgsinanin chu akgchipalh xkachikinkan chu kaj makgtum chuna tlawalh, xlakata wa Jehová, xDios Israel, xtalatlawanama xpalakata Israel. 43 Alistalh Josué katataspitli putum soldados anta niku xwilakgolh, kʼGuilgal.

11 Akxni Jabín, mapakgsina xalak Hazor, katsilh uma, kamalakgachanilh makatsininanin Jobab, mapakgsina xalak Madón, nachuna mapakgsina xalak Simrón, mapakgsina xalak Acsaf, 2 mapakgsinanin xalak kasipijni nema xwilakgolh knorte, mapakgsinanin nema xwilakgolh kxakaxtum* ksur Kinéret, tiku xwilakgolh kSefelá chu xalak Dor xlakpanin kasipijni nema xwilakgolh kʼoeste, 3 cananeos tiku xwilakgolh kʼeste chu kʼoeste, amorreos, hititas, perizitas, jebuseos tiku xwilakgolh kkasipijni chu heveos tiku xwilakgolh kxtantun ksipi Hermón, ktiyat xla Mizpá. 4 Wa xlakata akxtum katataxtukgocha putum ksoldadoskan, lu lhuwa xwankgonit chuna la muntsaya* nema anan kxkilhtun pupunu, na katataxtukgocha xkawayujkan chu xputlawkan nema litlawakgo guerra. 5 Putum umakgolh mapakgsinanin lakkaxwilikgolh makxtum nalakgo, ankgolh chu makxtum tawilakgolh kxkgalhtuchokgo Merom xlakata nakatalatlawakgo israelitas.

6 Alistalh Jehová wanilh Josué: «Ni kakapekuani, xlakata chali watiya uma hora, xanin nakkamakamaxki israelitas. Xalakluntu nakamakgxtakga* xkawayujkan chu nakalhkuyuwiliya xputlawkan nema litlawakgo guerra». 7 Josué chu putum ksoldados kaj xalan kalipataxtukgolh lakatsu kxkgalhtuchokgo Merom. 8 Jehová kamakamaxkilh Israel, kamakgatlajakgolh chu kaputsastalanikgolh asta kxaLanka Sidón, kMisrefot-Maim, chu kʼeste kxakaxtum Mizpé; kamakgnikgolh chu niti lakgtaxtulh. 9 Chu Josué tlawalh chuna la Jehová xwaninit: xalakluntu kamakgxtakgli xkawayujkan chu kalhkuyuwilinilh xputlawkan nema xlitlawakgo guerra.

10 Nachuna, Josué taspitli, akgchipalh Hazor chu limakgnilh espada xmapakgsina, xlakata Hazor tlakg xlakaskinka kachikin xwanit xliputum umakgolh kachikinin. 11 Kalimakgnikgolh espada putum latamanin tiku xwilakgolh anta chu chuna kamalakgsputukgolh. Niti lakgtaxtulh. Alistalh Josué lhkuyuwililh Hazor. 12 Josué kaʼakgchipalh putum xkachikinin umakgolh mapakgsinanin chu kalimakgnilh espada putum xmapakgsinanin. Kamasputukgolh chuna la xlimapakgsinanit Moisés, kskujni Jehová. 13 Pero israelitas ni kalhkuyukgolh kachikinin nema xwilakgolh klaktsu sipi, kajwatiya Hazor, nema Josué lhkuyuwililh. 14 Israelitas tatamakgxtakgkgolh putum tuku xʼanan kʼumakgolh kachikinin, tuku lhuwa xtapalh chu putum xʼanimaleskan. Pero kalimakgnikgolh espada putum latamanin. Niti lakgtaxtulh. 15 Tuku Jehová xlimapakgsinit kskujni Moisés, wa uma tuku Moisés limapakgsilh Josué, chu Josué chuna tlawalh. Makgantaxtilh putum tuku Jehová xlimapakgsinit Moisés.

16 Josué akgchipalh putum uma tiyat, xkasipijni Judá, Négueb, putum xtiyat Gosén, Sefelá,* Arabá, xkasipijni Israel chu laktsu ksipi,* 17 lata ksipi Halac, nema wi lakatsu kSeír, chu asta kBaal-Gad, nema wi kxakaxtum Líbano, kxtantun sipi Hermón, chu kachipalh putum xmapakgsinanin, kamakgatlajalh chu kamakgnilh. 18 Josué lu makgas la katalatlawalh putum umakgolh mapakgsinanin. 19 Ni analh akgtum kachikin nema israelitas tlan xtalalinkgolh, kajwatiya heveos tiku xlamakgolh kʼGabaón. Putum amakgapitsin katalatlawakgolh chu kaʼakgchipakgolh. 20 Wa Jehová tiku tlawalh pi xatsakat xwa xnakujkan xlakata xtatlawakgolh guerra Israel chu ni xkalimasiyanilh talakgalhaman akxni xkamasputulh. Xtalakaskin pi nakamasputukan chuna la Jehová xlimapakgsinit Moisés.

21 Amacha kilhtamaku, Josué kamasputulh anaquim kkasipijni, kʼHebrón, kDebir, kʼAnab chu putum kxkasipijni Judá chu Israel. Josué akxtum katamasputulh xkachikinin. 22 Nialh anankgolh anaquim kxtiyatkan israelitas. Kajwatiya kʼGaza, kʼGat chu kʼAsdod. 23 Chuna Josué akgchipalh putum uma tiyat, chuna la Jehová xmalaknuninit Moisés. Wa xlakata Josué kamakgpitsinilh israelitas chuna la xkalakgchan akgatunu akgatunu tribu. Chu nialh analh guerra kʼumakgolh kachikinin.

12 Mapakgsinanin tiku israelitas kamakgatlajakgolh chu tiku kamakglhtikgolh xtiyatkan kxʼeste Jordán, lata kxakaxtum Arnón asta ksipi Hermón chu putum Arabá asta kʼeste, wa umakgolh. 2 Sehón xmapakgsinakan amorreos, tiku xlama kʼHesbón chu xmapakgsinan kkachikinin nema xwilakgolh lata kʼAroer, nema xwi kxkilhpan niku xkisputa xakaxtum Arnón, chu lata kxlakʼitat xakaxtum, kxʼitat Galaad, asta kxakaxtum Jaboc, niku xtatapakgta xkachikinkan ammonitas. 3 Na xmapakgsinan kʼArabá asta kpupunu Kinéret* pakganacha kʼeste chu asta kpupunu Arabá, xaSkgokgo pupunu,* pakganacha kʼeste niku lakankan kBet-Jesimot, chu pakganacha ksur lakatsu kxlakpanin sipi xalak Pisgá.

4 Nachuna, xwi niku xmapakgsinan mapakgsina Og xalak Basán, tiku xlitaxtu chatum refaím tiku na xlakgtaxtunit chu xlama kʼAstarot chu kʼEdréi. 5 Niku xmapakgsinan xkichan lata ksipi Hermón, Salecá chu putum Basán asta niku xtatapakgta xkachikinin guesuritas chu maacatitas, chu nachuna itat xtiyat Galaad asta niku xmapakgsinan mapakgsina Sehón xalak Hesbón.

6 Moisés, kskujni Jehová, chu israelitas kamakgatlajakgolh, alistalh Moisés, kskujni Jehová, kamakamaxkilh umakgolh tiyat rubenitas, gaditas chu itat xtribu Manasés xlakata xkatapakgsinilh.

7 Wa umakgolh mapakgsinanin tiku Josué chu israelitas kamakgatlajakgolh kxʼoeste Jordán, lata kBaal-Gad, nema wi kxakaxtum Líbano, chu asta ksipi Halac, nema wi lakatsu kSeír, chu alistalh kamaxkilh umakgolh tiyat tribus xalak Israel xlakata xkatapakgsinilh chuna la xkalakgchan akgatunu tribu, 8 kkasipijni, kSefelá, kʼArabá, kxlakpanin kasipijni, kxakaskakni tiyat chu kNégueb, uma wamputun, kxkachikinin hititas, amorreos, cananeos, perizitas, heveos chu jebuseos:

13 Pero Josué xkgolonita chu xlina kata. Wa xlakata Jehová wanilh: «Kgolonitata chu lipinata kata, pero lhuwaku wi tiyat nema xlitaʼakgchipat. 2 Wa umakgolh tiyat nema wilakgolhku: putum xkachikinin filisteos chu putum xkachikinin guesuritas 3 (lata kgantum xmakxpan kgalhtuchokgo Nilo* nema wi kxʼeste* Egipto asta niku kitapakgta Ecrón, asta kxnorte, niku xlakpuwankan pi xkatapakgsini cananeos), nachuna xkachikinin kgalhkitsis mapakgsinanin filisteos: gazeos, asdoditas, asquelonitas, guititas chu ecronitas; chu xkachikinin avim, 4 ksur; putum xkachikinin cananeos; Meará, nema katapakgsini sidonios, asta kʼAfec, asta niku xkitapakgta xtiyatkan amorreos; 5 xtiyatkan guebalitas chu putum Líbano nema wi kʼeste, lata kBaal-Gad, kxtantun sipi Hermón, asta kLebó-Hamat;* 6 putum latamanin tiku wilakgo kkasipijni lata kLíbano asta kMisrefot-Maim, chu putum sidonios. Akit nakkatamakxtu kxlakatinkan israelitas. Wix kajwatiya nakamakgpitsiniya tiyat israelitas xlakata nakatapakgsini chuna la klimapakgsin. 7 La uku kakamakgpitsini xtiyatkan akgnajatsa tribus chu itat xtribu Manasés».

8 Rubenitas, gaditas chu atanu itat xtribu Manasés makgamakglhtinankgolh xtiyatkan nema Moisés kamaxkilh kxʼeste Jordán, chuna la xkamakamaxkinita Moisés, kskujni Jehová: 9 lata kʼAroer, nema wi kxkilhpan xakaxtum Arnón, chu kachikin nema wi kxʼitat xakaxtum chu putum kxakaxtum sipi xla Medebá asta kDibón; 10 chu putum xkachikinin mapakgsina Sehón, xmapakgsinakan amorreos, tiku xmapakgsinan kʼHesbón, asta niku xkitapakgta xkachikinin ammonitas; 11 nachuna Galaad chu xtiyatkan guesuritas chu maacatitas, putum sipi Hermón chu putum Basán asta kSalecá; 12 putum xtamapakgsin Og xalak Basán, tiku xmapakgsinan kʼAstarot chu kʼEdréi. (Xla xlitaxtu chatum refaím tiku na xlakgtaxtunit). Moisés kamakgatlajalh chu katamakxtulh. 13 Pero israelitas ni katamakxtukgolh guesuritas chu maacatitas, xlakata Guesur chu Maacat lamakgolhku kxlakgstipankan Israel asta la uku.

14 Kajwatiya xtribujkan levitas, Moisés ni kamaxkilh xtiyatkan nema xkatapakgsinilh. Xlakan kalakgchan namakgamakglhtinankgo xalhkun tamakamastan nema tlawanikan Jehová, xDios Israel, chuna la xla kamalaknunilh.

15 Alistalh Moisés kamaxkilh xtribujkan rubenitas, chuna la xkalakgchan akgatunu familias tiyat nema xkatapakgsinilh. 16 Chu xtiyatkan xtsuku lata kʼAroer, nema wi kxkilhpan xakaxtum Arnón, chu na xmakgtanuma kachikin nema xwi kxʼitat niku xakaxtum chu putum kxakaxtum sipi nema wi kxpaxtun Medebá; 17 Hesbón chu putum xkachikinin, nema wilakgolh kxakaxtum sipi, Dibón, Bamot-Baal, Bet-Baal-Meón, 18 Jáhaz, Quedemot, Mefaat, 19 Quiryataim, Sibmá, Zéret-Sáhar, ksipi nema xwi kxakaxtum, 20 Bet-Peor, xlakpanin sipi xalak Pisgá, Bet-Jesimot, 21 putum kachikinin nema xwilakgolh kxakaxtum sipi chu putum xtamapakgsin Sehón, xmapakgsinakan amorreos, tiku xmapakgsinan kʼHesbón. Moisés kamakgatlajalh xla chu putum xpuxkukan madianitas Eví, Réquem, Zur, Hur chu Reba, tiku xtatayakgo Sehón* chu xlamakgolh kʼuma tiyat. 22 Israelitas na makgnikgolh Balaam xkgawasa Beor, tiku xwan tuku aku nala. 23 Xtiyatkan rubenitas xkitapakgta kJordán; umakgolh tiyat, laklanka xkachikinin chu laktsu xkachikinin, wa tuku kamaxkika nema xkatapakgsinilh rubenitas, chuna la xkalakgchan akgatunu familias.

24 Nachuna, Moisés kamaxkilh tiyat xlakata xkatapakgsinilh xtribujkan gaditas, akgatunu xfamilias, 25 chu kxtiyatkan xmakgtanuma Jazer, putum xkachikinin Galaad chu itat xtiyatkan ammonitas asta kʼAroer, nema wi kxlakatin Rabá; 26 chu lata kHesbón asta kRamat-Mizpé chu kBetonim, chu lata kMahanaim asta niku kitapakgta Debir; 27 chu kxakaxtum Bet-Haram, Bet-Nimrá, Sucot chu Zafón, tuku xʼakgataxtu xla xtamapakgsin mapakgsina Sehón xalak Hesbón, chu anta kJordán xkitapakgta lata ksur pupunu Kinéret,* kxʼeste Jordán. 28 Wa umakgolh tiyat nema kamaxkika gaditas, laklanka xkachikinin chu laktsu xkachikinin, chuna la xkalakgchan akgatunu xfamilias.

29 Nachuna, Moisés maxkilh tuku xlakgchan itat xtribu Manasés, chuna la xkalakgchan akgatunu familias. 30 Chu xtiyat xtsuku lata kMahanaim, xmakgtanuma putum Basán, putum xtamapakgsin mapakgsina Og xalak Basán chu putum laktsu kachikinin niku wilakgolh laktsu chiki xaxuwa nema katapakgsini Jaír, kBasán, tutumpuxam kachikinin. 31 Chu itat Galaad, chuna la Astarot chu Edreí, chu kachikinin xalak xtamapakgsin Og xalak Basán, kamaxkika xlakgkgawasan Makir xkgawasa Manasés, chuna xkalakgchan akgatunu familias.

32 Wa umakgolh tiyat nema Moisés kamaxkilh kxakaskakni tiyat nema wi kMoab, kxakilhtutu Jordán, kxʼeste Jericó.

33 Pero Moisés ni kamaxkilh levitas tiyat nema xkatapakgsinilh. Jehová, xDios Israel, wa tuku xkalakgchan namakglhtinankgo, chuna la xla kamalaknunilh.

14 Wa uma tuku israelitas makgamakglhtinankgolh kxtiyat Canaán, tuku sacerdote Eleazar, Josué xkgawasa Nun chu xnapuxkun xalak akgatunu tribu xalak Israel kamaxkikgolh xlakata xkatapakgsinilh. 2 Kamakgpitsinikgolh tiyat nema xkalakgchan chuna la Dios kamakatsinilh.* Wa uma tuku Jehová limapakgsilh Moisés pi xtlawalh xlakata xkamaxkilh akgnajatsa tribus aitat tuku xkalakgchan. 3 Moisés xkamaxkinita tuku xkatapakgsinilh akgtiy tribus aitat kxakilhtutu* Jordán, chu levitas ni kamaxkilh tiyat nema xkatapakgsinilh. 4 Xkamanan José akgtiy tribus kaliʼakxilhka: Manasés chu Efraín; levitas ni kamaxkika tiyat nema xkatapakgsinilh, kajwatiya kachikinin xlakata anta xlatamakgolh chu kapukuxtun niku xʼanan sekget xlakata xwayankgolh xʼanimaleskan chu niku xmakikgolh tuku lhuwa xtapalh xkgalhikgo. 5 Wa xlakata israelitas makgpitsikgolh tiyat chuna la Jehová xlimapakgsinit Moisés.

6 Alistalh lakchixkuwin xalak Judá, lakgtalakatsuwikgolh Josué kʼGuilgal, chu Caleb xkgawasa Jefuné tiku quenizita wanilh: «Wix katsiya tuku Jehová wanilh Moisés, tiku xkakninani xaxlikana Dios, mimpalakata chu kimpalakata kCadés-Barnea. 7 Akit xakkgalhi tipuxam kata akxni Moisés, kskujni Jehová kimalakgachalh akxni xwilaw kCadés-Barnea xlakata nakskgala tiyat, chu akxni ktaspitli liwana kwa tuku xlikana xakakxilhnit. 8 Chu maski kinatalan tiku kintaʼankgolh tlawakgolh pi kachikin xpekuankgolh,* akit xliputum kinaku* kstalanilh Jehová kiDios. 9 Amacha kilhtamaku Moisés malaknulh: “Tiyat niku laktlawanti namakglhtinana xlakata putum kilhtamaku natapakgsiniyan wix chu minkamanan, xlakata xliputum minaku stalaninita Jehová miDios”. 10 Chu la uku Jehová, chuna la malaknulh, kimaxkinit talakaskin naklatama umakgolh tipuxamakitsis kata lata akxni Jehová tlawanilh uma tamalaknun Moisés akxni kachikin Israel xlapulakgo kxakaskakni tiyat; chu la uku chuntiya klama, kkgalhi tatipuxamakitsis kata. 11 Chu la uku chuntiya kkgalhi litliwakga chuna la akxni Moisés kimalakgachalh. Chuntiya kkgalhi litliwakga chuna la amacha kilhtamaku, xlakata nakmakgtlawa guerra o atanu tuku tlan naktlawa. 12 Wa xlakata, kakimaxki uma kasipijni nema Jehová kimalaknunilh amacha kilhtamaku. Maski amacha kilhtamaku wix kgaxpatti pi xwilakgolh anaquim chu laklanka xkachikinkan, liwana kkatsi pi Jehová nakimakgtaya chu nakkatamakxtu,* chuna la Jehová malaknulh».

13 Wa xlakata Josué sikulunatlawalh Caleb xkgawasa Jefuné chu maxkilh kachikin Hebrón xlakata xtapakgsinilh. 14 Wa xlakata Hebrón asta la uku tapakgsini Caleb xkgawasa Jefuné, tiku quenizita, xlakata xliputum xnaku stalanilh Jehová, xDios Israel. 15 Xapulana Hebrón xwanikan Quiryat-Arbá (xliputum anaquim, Arbá wa tiku tlakg xlakaskinka chixku xlitaxtu). Chu nialh analh guerra kʼumakgolh kachikinin.

15 Wa umakgolh tiyat nema kalakgchalh familias xalak xtribu Judá, xtsuku lata niku xkitapakgta Edom, kxakaskakni tiyat xalak Zin, asta ksur Négueb. 2 Anta niku xkitapakgta xtiyatkan ksur, xtsuku kxkilhpan xaSkgokgo pupunu,* nema wi ksur. 3 Xchan asta ksur niku laktakxtukan kʼAcrabim, xtitaxtu asta kZin, alistalh xtalakakxtu lata ksur Cadés-Barnea, xchan asta kʼHezrón, xtakxtu asta kʼAddar chu xtalakgspita kCarcá. 4 Alistalh xʼan asta kʼAzmón chu xchan asta kxakaxtum nema xwi kʼEgipto chu xkitapakgta anta kpupunu.* Wa uma niku xkitapakgta xtiyatkan, ksur.

5 Anta niku xkitapakgta xtiyatkan kʼeste xwi xaSkgokgo pupunu* asta niku ksputa kgalhtuchokgo Jordán, chu anta niku xkitapakgta knorte xwi xkilhtun pupunu, niku sputa kgalhtuchokgo Jordán. 6 Anta niku xkitapakgta xtiyatkan xtakxtu lata kBet-Hoglá chu xtitaxtu kxnorte Bet-Arabá, chu niku xkitapakgta xtakxtu asta kxchiwix Bohán xkgawasa Rubén. 7 Niku xkitapakgta xtiyatkan xtakxtu kDebir, kxakaxtum Acor, chu xʼan knorte niku wi Guilgal, nema wi kxlakatin niku laktakxtukan kʼAdumim, nema wi ksur kxakaxtum, chu xʼan asta niku taxtu chuchut xalak En-Semes chu ksputa kʼEn-Roguel. 8 Anta niku xkitapakgta xtiyatkan xtakxtu kxakaxtum xKgawasa Hinón, xlakpanin* xkasipijnikan Jebuseos, ksur, uma wamputun, Jerusalén, chu anta niku xkitapakgta xtakxtu kxʼakgspun* sipi, kʼoeste, niku lakankan kxakaxtum Hinón, kxkilhpan xnorte kxakaxtum Refaím. 9 Chu niku xkitapakgta xtiyatkan klhkawilikanit lata kxʼakgspun sipi asta niku xtaxtu chuchut xalak Neftóah chu xtitaxtu asta kkachikinin nema xwilakgolh ksipi Efrón; chu niku xkitapakgta klhkawilikanit asta kBaalá, uma wamputun, Quiryat-Jearim. 10 Niku xkitapakgta xtiyatkan xtamakgspita lata kBaalá chu xʼan kʼoeste ksipi Seír, chuntiya xʼan asta xlakpan* sipi Jearim, knorte, uma wamputun, Kesalón, chu xtakta kBet-Semes chu chuntiya xʼan asta kTimná.* 11 Chu anta niku xkitapakgta xtiyatkan xchan asta xlakpan sipi xalak Ecrón, knorte, chu xlaklhkawilikanit asta kSikerón chu chuntiya xʼan asta ksipi Baalá chu xchan asta kJabneel; chu kpupunu xkitapakgta.

12 Anta kʼoeste xkitapakgta kxkilhtun xaLanka pupunu.* Wa umakgolh kachikinin nema xmakgstilikgo tiyat nema kamakamaxkika xkamanan Judá.

13 Chuna la Jehová limapakgsilh, Josué na maxkilh Caleb xkgawasa Jefuné pulaktum tuku xkalakgchan xkamanan Judá: Quiryat-Arbá, uma wamputun, Hebrón (Arbá xtlat Anac xlitaxtu). 14 Wa xlakata Caleb katamakxtucha kʼHebrón kgalhtutu xlakgkgawasan Anac: Sesái, Ahimán chu Talmái, xkamanan Anac. 15 Alistalh talakakxtulh xlakata nakatalatlawa tiku xwilakgolh kDebir (xapulana Debir xwanikan Quiryat-Séfer). 16 Alistalh Caleb wa: «Chixku tiku natalatlawa chu naʼakgchipa Quiryat-Séfer nakmakamaxki kintsumat Acsá xlakata xpuskat nawan». 17 Chu Otniel xkgawasa Quenaz, xtala Caleb, akgchipalh kachikin. Wa xlakata Caleb maxkilh xtsumat, Acsá, xlakata xpuskat xlitaxtulh. 18 Akxni xʼamakgolh kxchikkan, Acsá tasaskinilh Otniel pi kskinilh xtlat akgtum putawilh. Wa xlakata Acsá taktalh kxburro,* chu Caleb kgalhskilh: «¿Tuku lakaskina?». 19 Acsá wa: «Katlawa litlan, kakintlawani akgtum tamaskiwin* nema nalimasiya pi kilakgalhamana. Kimaxkinitata akgtum putawilh ksur,* pero na kakimaxki Gulot-Maim».* Wa xlakata xla maxkilh Gulot xalak Sipi chu Gulot xalak Pakgalhu.

20 Wa uma tiyat nema kamaxkika familias xalak xtribu Judá.

21 Wa umakgolh kachikinin nema xwilakgolh ksur tiyat nema makglhtinalh xtribu Judá anta niku xkitapakgta Edom: Cabzeel, Éder, Jagur, 22 Quiná, Dimoná, Adadá, 23 Quedes, Hazor, Itnán, 24 Zif, Télem, Bealot, 25 Hazor-Hadatá chu Queriyot-Hezrón, uma wamputun, Hazor, 26 Amam, Sema, Moladá, 27 Hazar-Gadá, Hesmón, Bet-Pélet, 28 Hazar-Sual, Beer-Seba, Biziotías, 29 Baalá, Iyim, Ézem, 30 Eltolad, Kesil, Hormá, 31 Ziclag, Madmaná, Sansaná, 32 Lebaot, Silhim, Ain chu Rimón: xliputum umakgolh litakgatsikgo puxamanajatsa kachikinin chu laktsu xkachikinin.

33 Wa umakgolh kachikinin nema xwilakgolh kSefelá: Estaol, Zorá, Asná,* 34 Zanóah, En-Ganim, Tapúah, Enam, 35 Jarmut, Adulam, Socó,* Azecá, 36 Saaraim, Aditaim chu Guederá chu Guederotaim:* akgkutati kachikinin chu laktsu xkachikinin.

37 Zenán, Hadasá, Migdal-Gad, 38 Dileán, Mizpé, Jocteel, 39 Lakís, Bozcat, Eglón, 40 Cabón, Lahmam, Kitlís, 41 Guederot, Bet-Dagón, Naamá chu Maquedá: akgkuchaxan kachikinin chu laktsu xkachikinin.

42 Libná, Éter, Asán, 43 Iftá, Asná,* Nezib, 44 Queilá, Aczib chu Maresá:* akgnajatsa kachikinin chu laktsu xkachikinin.

45 Ecrón, kachikinin nema lakatsu xwilanikgolh chu laktsu xkachikinin; 46 lata kʼEcrón asta kʼoeste, putum tiyat nema wi kxpaxtun Asdod chu laktsu xkachikinin.

47 Asdod, kachikinin nema lakatsu xwilanikgolh chu laktsu xkachikinin; Gaza, kachikinin nema lakatsu xwilanikgolh chu laktsu xkachikinin, asta kxakaxtum Egipto, xaLanka pupunu* chu tiyat nema xwi kxkilhtun.

48 Chu, kachikinin nema xwilakgolh kkasipijni, Samir, Jatir, Socó,* 49 Daná, Quiryat-Saná, uma wamputun, Debir, 50 Anab, Estemó, Anim, 51 Gosén, Holón chu Guiló: akgkawitu kachikinin chu laktsu xkachikinin.

52 Arab, Dumá, Esán, 53 Janim, Bet-Tapúah, Afecá, 54 Humtá, Quiryat-Arbá, uma wamputun, Hebrón chu Zior: akgnajatsa kachikinin chu laktsu xkachikinin.

55 Maón, Carmelo, Zif, Jutá, 56 Jezreel, Jocdeam, Zanóah, 57 Cayín, Guibeá* chu Timná: akgkaw kachikinin chu laktsu xkachikinin.

58 Halhul, Bet-Zur, Guedor, 59 Maarat, Bet-Anot chu Eltecón: akgchaxan kachikinin chu laktsu xkachikinin.

60 Quiryat-Baal, uma wamputun, Quiryat-Jearim, chu Rabá: akgtiy kachikinin chu laktsu xkachikinin.

61 Kxakaskakni tiyat, Bet-Arabá, Midín, Secacá, 62 Nibsán, xKachikin Matsat chu En-Guedí: akgchaxan kachikinin chu laktsu xkachikinin.

63 Pero lakchixkuwin xalak Judá nila katamakxtukgolh jebuseos tiku xlamakgolh kJerusalén, wa xlakata jebuseos chuntiya katalamakgolh kachikin Judá anta kJerusalén asta la uku.

16 Chu tiyat nema kalakgchalh xkamanan José xtsuku lata kJordán, anta kJericó, asta kpuxkga nema xwi kxʼeste Jericó, xtitaxtu kxakaskakni tiyat chu xtalakakxtu* kJericó asta kxkasipijni Betel. 2 Xtalakgatuminit lata kBetel, nema xtapakgsini Luz, chu chuntiya xʼan asta niku xkitapakgta xtiyatkan arkitas kʼAtarot, 3 alistalh xtakta kxʼoeste niku xkitapakgta xtiyatkan jafletitas asta niku xkitapakgta Bet-Horón xalak Pakgalhu chu Guézer, chu xkitapakgta kpupunu.

4 Chuna xkamanan José, Manasés chu Efraín, makglhtinankgolh xtiyatkan nema xkatapakgsinilh. 5 Anta unu niku xkitapakgta xtiyatkan nema xkamaxkikanit xkamanan Efraín, chuna la xkamaxkikanit akgatunu familias: anta kʼeste xtiyatkan xkitapakgta kʼAtarot-Addar, asta kBet-Horón xalak Sipi, 6 chu niku xkitapakgta xtiyatkan xchan asta kpupunu. Micmetat xwi knorte, chu niku xkitapakgta xtamakgspita kʼeste asta kTaanat-Siló, chu xtitaxtu kʼeste asta kJanóah. 7 Chu xtakta lata kJanóah asta kʼAtarot chu asta kNaará, xchan asta kJericó chu xkitapakgta asta kJordán. 8 Lata kTapúah, niku xkitapakgta xtiyatkan chuntiya xʼan asta kʼoeste kxakaxtum Caná* chu xkitapakgta kpupunu. Wa uma tuku katapakgsinilh xkamanan Efraín, chuna la xkalakgchan akgatunu familias, 9 chu ktiyat nema xmaxkikanit Manasés, xkamanan Efraín na kamaxkika atanu kachikinin chu laktsu xkachikinin.

10 Pero ni katamakxtukgolh cananeos tiku xlamakgolh kʼGuézer; cananeos akxtum katalamakgolhku tiku xalak xtribu Efraín asta la uku chu kaj kskujni kalimaxtukgonit.

17 Alistalh, akxni kamakgpitsinika, lakgchalh xtiyat xtribu Manasés, tiku xapuxku xkgawasa José xwanit. Xlakata Makir, xapuxku xkgawasa Manasés chu xtlat Galaad, xlitaxtu chatum chixku tiku xtlawa guerra, makgamakglhtinalh Galaad chu Basán. 2 Chu amakgapitsi xkamanan Manasés na kamaxkika xtiyatkan chuna la xkalakgchan akgatunu familias: xkamanan Abí-Ézer, xkamanan Hélec, xkamanan Asriel, xkamanan Siquem, xkamanan Héfer chu xkamanan Semidá. Wa umakgolh xkamanan Manasés xkgawasa José, chuna la akgatunu familias. 3 Pero Zelofehad, xkgawasa Héfer, xkgawasa Galaad, xkgawasa Makir, xkgawasa Manasés, ni kgalhilh lakgkgawasan, kajwatiya laktsuman. Wa umakgolh xtukuwanikan xlaktsuman: Mahlá, Noá, Hoglá, Milcá chu Tirzá. 4 Xlakan ankgolh kxlakatin sacerdote Eleazar, Josué xkgawasa Nun chu napuxkun, chu kawanikgolh: «Wa Jehová tiku limapakgsilh Moisés pi xkinkamaxkikan tuku kinkalakgchanan kxlakgstipankan kinatalankan». Chu xlakata Jehová chuna limapakgsinalh, kamaxkika tuku xkalakgchan kxlakgstipankan xnatalan xtlatkan.

5 Maski xmaxkikanita Manasés tiyat xla Galaad chu Basán nema xwilakgolh kxakilhtutu* Jordán, na maxkika apulakkaw tiyat, 6 xlakata xlaktsuman Manasés chu xlakgkgawasan akxtum makgamakglhtinankgolh tuku xkatapakgsinilh, chu tiyat xla Galaad katapakgsinilh amakgapitsi xkamanan Manasés.

7 Chu niku xkitapakgta xtiyat Manasés xʼan lata kʼAser asta kMicmetat, nema xkichan kSiquem, chu niku xkitapakgta xchan asta ksur,* tiyat nema xkatapakgsini latamanin xalak En-Tapúah. 8 Tiyat xla Tapúah tapakgsinilh Manasés, pero kachikin Tapúah niku xkitapakgta xtiyat Manasés, xkatapakgsini xkamanan Efraín. 9 Chu niku xkitapakgta xtiyat xtakta ksur kxakaxtum Caná.* Xkachikinin Efraín xwilakgolh kxʼitat xkachikinin Manasés chu niku xkitapakgta xtiyat Manasés xwi knorte niku kxakaxtum chu xkitapakgta kpupunu. 10 Tiyat nema xwi ksur xtapakgsini Efraín, chu tiyat nema xwi knorte xtapakgsini Manasés, chu anta kpupunu xkitapakgta xtiyatkan. Lata knorte, xtiyat Manasés xkichan* asta kxtiyat Aser chu kʼeste, xkichan asta kxtiyat Isacar.

11 Kxtiyat Isacar chu Aser, Manasés makglhtinalh Bet-Seán chu xkachikinin nema lakatsu xwilanikgolh, Ibleam chu xkachikinin nema lakatsu xwilanikgolh, latamanin xalak Dor chu xkachikinin nema lakatsu xwilanikgolh, latamanin xalak En-Dor chu xkachikinin nema lakatsu xwilanikgolh, latamanin xalak Taanac chu xkachikinin nema lakatsu xwilanikgolh, latamanin xalak Meguidó chu xkachikinin nema lakatsu xwilanikgolh, akgtutu kachikinin xalak kasipijni.

12 Pero xkamanan Manasés nila akgchipakgolh umakgolh kachikinin; cananeos ni taxtuputunkgolh kʼuma tiyat. 13 Akxni israelitas lakgtliwakga wankgolh, skujni kalimaxtukgolh cananeos, pero ni putum katamakxtukgolh.*

14 Xkamanan José wanikgolh Josué: «¿Tuku xlakata kaj aktsu kilamaxkiw* tuku xkinkalakgchanan chu kaj aktsu kilamaxkiw tiyat? Akinin akgtum lu lanka kachikin xlakata Jehová kinkasikulunatlawanitan asta la uku». 15 Josué kakgalhtilh: «Komo wixin milhuwakan, kapitit kxtiyatkan perizitas chu refaím, anta kkakiwin chu kakatankapitit kiwi xlakata anta natawilayatit, xlakata xkasipijni Efraín ni kaʼakchaniyan». 16 Alistalh xkamanan José wankgolh: «Ni kinkaʼakchaniyan tiyat xalak kasipijni. Chu putum cananeos tiku lamakgolh niku xakaxtum kgalhikgo xputlawkan tuku litlawakgo guerra nema kgalhikgo laklhman cuchillos kxllantaskan,* nachuna kBet-Seán chu kachikinin nema lakatsu xwilanikgolh chu tiku xwilakgolh kxakaxtum Jezreel». 17 Wa xlakata Josué kawanilh tiku xalak xchik José, Efraín chu Manasés: «Wixin milhuwakan chu kgalhiyatit lhuwa litliwakga. Ni kaj aktsu tiyat katikalakgchan, 18 wata na putum kasipijni milakan nawan. Maski lanka kakiwin, nakatankapiyatit kiwi chu anta nakitapakgta mintiyatkan. Nakatamakxtuyatit cananeos maski xlakan lakgtliwakgan chu kgalhikgo xputlawkan tuku litlawakgo guerra nema kgalhikgo laklhman cuchillos kxllantaskan».*

18 Alistalh putum kachikin* Israel tamakxtumikgolh kSiló, chu anta wilikgolh tabernáculo, xlakata xʼakgchipakgonita uma tiyat. 2 Pero xwilakgolhku akgtujun tribus xalak Israel nema nina xkamakgpitsinikan tuku xkalakgchan. 3 Wa xlakata Josué kawanilh israelitas: «¿La xlilhuwa kilhtamaku nakgalhkgalhiyatit xlakata napinatit tawilayatit ktiyat nema Jehová, xDioskan xalakgmakgan minatlatnikan, kamaxkinitan? 4 Kakilaliminiw kgalhtutu lakchixkuwin xalak akgatunu tribu. Nakkamalakgacha xlakata nalakgatsalakgo tiyat, chu nalhkawilikgo la tapitsinit tiyat nema kalakgchanan. Chu alistalh kakilakgtaspitparakgolh. 5 Xlakan pulaktujun xlimapapitsitkan tiyat. Judá natamakgxtakga kxtiyat ksur, chu tiku xalak xchik José natamakgxtakgkgo kxtiyatkan, knorte. 6 Chu wixin kalaklhkawilitit tiyat chu pulaktujun kamapapitsitit. Alistalh kakilaliminiw tuku nalhkawiliyatit chu akit nakkamakgpitsiniyan tiyat nema kalakgchanan chuna la Jehová kiDioskan nakimakatsini. 7 Pero levitas ni katimakglhtinankgolh tiyat kmilakgstipankan, xlakata tuku kalakgchan wa ksacerdotes Jehová nalitaxtukgo; chu Gad, Rubén chu itat xtribu Manasés makgamakglhtinankgonita tuku xkalakgchan kxʼeste Jordán, tuku kamaxkilh Moisés, kskujni Jehová».

8 Lakchixkuwin takaxkgolh xlakata naʼankgo, chu Josué kalimapakgsilh tiku xʼamakgolh lhkawilikgo tiyat: «Kapitit, kalakgatsalatit chu kalaklhkawilitit tiyat, kakilakgtaspittit, chu akit nakkamakgpitsiniyan tiyat chuna la Jehová nakimakatsini unu kSiló». 9 Wa xlakata lakchixkuwin ankgolh, lakgatsalakgolh chu laklhkawilikgolh tiyat chu pulaktujun mapapitsikgolh chuna la xwilakgolh kachikinin, chu tsokgwilikgolh kmaktum libro. Alistalh lakgtaspitkgolh Josué anta niku xwi, kSiló. 10 Alistalh, Josué kamakgpitsinilh xtiyatkan israelitas chuna la xkalakgchan, chuna la Jehová makatsinilh kSiló.

11 Akxni makgpitsika tiyat, xtribu Benjamín, lakgchalh tiyat nema xtapakgsini chuna la akgatunu xfamilias, chu tiyat nema kalakgchalh xwi kxlakʼitat xtiyatkan xkamanan Judá chu xkamanan José. 12 Anta knorte, niku xkitapakgta xtiyatkan xtsuku kkgalhtuchokgo Jordán chu xtakxtu kxlakpanin kasipijni xalak Jericó, knorte. Chu xtakxtu ksipi chu xʼan kʼoeste chu xtalakgatumi asta kxakaskakni tiyat xalak Bet-Aven. 13 Niku xkitapakgta xtiyatkan xʼan asta kkachikin Luz, kxlakpan sur, uma wamputun, Betel; niku xkitapakgta xtakta kʼAtarot-Addar ksipi nema wi ksur xalak Bet-Horón xalak Pakgalhu. 14 Chu niku xkitapakgta xlaklhkawilikanit kʼoeste chu xkitamakgspita ksur lata ksipi nema lakatsu xwi kBet-Horón, ksur; ksputa kQuiryat-Baal, uma wamputun, Quiryat-Jearim, akgtum kachikin xalak Judá. Wa uma niku xkitapakgta kʼoeste.

15 Niku xkitapakgta xtiyat ksur, xtsuku kxmakgstan* kachikin Quiryat-Jearim, chu xtalakgatumi kʼoeste; xʼan asta niku xtaxtu chuchut kNeftóah. 16 Niku xkitapakgta xtakta kxmakgstan sipi niku xlakankan kxakaxtum xKgawasa Hinón, nema wi knorte, kxakaxtum Refaím, chu xtakta kxakaxtum Hinón, xlakpanin xkasipijnikan jebuseos, ksur chu xtakta asta kʼEn-Roguel. 17 Chu xlaklhkawilikanit asta knorte chu xtalakgatumi asta kʼEn-Semes chu alistalh asta kʼGuelilot, nema wi kxlakatin niku laktakxtukan kʼAdumim, chu xtakta kxchiwix Bohán xkgawasa Rubén. 18 Chu chuntiya xʼan kxlakpan sipi nema xwi knorte kxlakatin Arabá chu xtakta kʼArabá. 19 Chu anta niku xkitapakgta xtiyatkan chuntiya xʼan kxlakpan sipi nema xwi kxnorte Bet-Hoglá chu xkisputa anta kxkilhtun xaSkgokgo pupunu* knorte, kxmakgstan kgalhtuchokgo Jordán, ksur. Wa uma niku xkitapakgta xtiyatkan ksur. 20 Chu anta kʼeste, kJordán xkitapakgta kxtiyatkan. Wa umakgolh tuku xkatapakgsini xkamanan Benjamín chuna la xkalakgachan akgatunu xfamilias chu niku xkitapakgta xtiyatkan.

21 Wa umakgolh kachikinin nema xkatapakgsini xtribu Benjamín chuna la akgatunu xfamilias: Jericó, Bet-Hoglá, Émec-Queziz, 22 Bet-Arabá, Zemaraim, Betel, 23 Avim, Pará, Ofrá, 24 Kefar-Amoní, Ofní chu Gueba: akgkutiy kachikinin chu laktsu xkachikinin.

25 Gabaón, Ramá, Beerot, 26 Mizpé, Kefirá, Mozá,* 27 Réquem, Irpeel, Taralá, 28 Zelá,* Ha-Élef, Jebusí, uma wamputun, Jerusalén, Guibeá* chu Quiryat: akgkutati kachikinin chu laktsu xkachikinin.

Wa uma tuku katapakgsinilh xkamanan Benjamín, chuna la kalakgchalh akgatunu xfamilias.

19 Akxni xlimakgtiy makatsininalh Dios,* lakgchalh Simeón, xtribu Simeón chuna la akgatunu xfamilias. Chu tuku xkalakgchan xmakgtanuma niku xtapakgsini Judá. 2 Tuku xkatapakgsini wa Beer-Seba chu Seba, Moladá, 3 Hazar-Sual, Balá, Ézem, 4 Eltolad, Betul, Hormá, 5 Ziclag, Bet-Marcabot, Hazar-Susá, 6 Bet-Lebaot chu Saruhén: akgkututu kachikinin chu laktsu xkachikinin; 7 Ain, Rimón, Éter chu Asán: akgtati kachikinin chu laktsu xkachikinin; 8 chuna la putum laktsu kachikinin nema xwilakgolh kʼumakgolh kachikinin asta kBaalat-Beer, Ramá xalak sur. Wa uma tuku katapakgsinilh xtribu Simeón chuna la akgatunu akgatunu xfamilias. 9 Tiyat nema katapakgsinilh xkamanan Simeón tamakxtuka ktiyat nema kalakgchalh xtribu Judá, xlakata tiyat nema xtapakgsini Judá lu lanka xwanit. Wa xlakata xkamanan Simeón makgamakglhtinankgolh xtiyatkan nema xkalakgchan ktiyat nema xtapakgsini Judá.

10 Akxni xlimakgtutu makatsininalh Dios, lakgchalh xkamanan Zabulón chuna la akgatunu akgatunu xfamilias, chu niku xkitapakgta niku xkatapakgsini xchan asta kSarid. 11 Niku xkitapakgta xtakxtu kʼoeste asta kMareal chu xchan kDabéset alistalh kxakaxtum kxlakatin Jocneam. 12 Chu lata kSarid xʼan kʼeste niku xtaxtu chichini, asta niku xkitapakgta Kislot-Tabor chu taxtuyacha kDaberat chu alistalh xtakxtu kJafía. 13 Chu lata anta xʼan kʼeste, niku xtaxtu chichini, asta kʼGat-Héfer, asta kʼEt-Cazín, chu xtaxtuyacha kRimón, chu xtalakgatumi asta kNeá. 14 Chu niku xkitapakgta xtamakgspita knorte, xʼan asta kʼHanatón chu xkisputa kxakaxtum kʼIftá-El, 15 na xmakgtanuma Catat, Nahalal, Simrón, Idalá chu Belén: akgkutiy kachikinin chu laktsu xkachikinin. 16 Wa uma tuku katapakgsinilh xkamanan Zabulón chuna la akgatunu xfamilias. Wa umakgolh kachikinin chu laktsu xkachikinin.

17 Xlimakgtati la makatsininalh Dios, lakgchalh Isacar, xtribu Isacar chuna la akgatunu akgatunu xfamilias. 18 Chu niku xkitapakgta xtiyatkan xchan asta kJezreel, Kesulot, Sunem, 19 Hafaraim, Shion, Anaharat, 20 Rabit, Quisión, Ébez, 21 Rémet, En-Ganim, En-Hadá chu Bet-Pazez. 22 Chu niku xkitapakgta xtiyatkan xchan kTabor asta kSahazuma chu kBet-Semes, chu xkisputa kkgalhtuchokgo Jordán: akgkuchaxan kachikinin chu laktsu xkachikinin. 23 Wa uma tuku katapakgsinilh xtribu Isacar chuna la akgatunu akgatunu xfamilias; umakgolh kachikinin chu laktsu xkachikinin.

24 Alistalh xlimakgkitsis la makatsininalh Dios, lakgchalh xtribu Aser chuna la akgatunu akgatunu xfamilias. 25 Chu niku xkitapakgta xtiyatkan wa Helcat, Halí, Beten, Acsaf, 26 Alamélec, Amad chu Misal. Kʼoeste niku xkitapakgta xchan asta kCarmelo chu asta kSihor-Libnat, 27 chu xtaspita asta kxʼeste Bet-Dagón chu xchan asta kZabulón chu kxnorte niku xakaxtum Iftá-El, asta kBet-Émec chu kNeiel, chu xtalakgatumi asta xpakgxwiki kachikin Cabul, 28 chu asta kʼEbrón, kʼRehob, kʼHamón chu kCaná* asta kSidón xaLanka. 29 Chu niku xkitapakgta xtiyatkan xtaspita asta kRamá chu xchan asta lanka kachikin Tiro. Alistalh xtaspita kʼHosá chu ksputa kpupunu, kkachikin Aczib, 30 Umá, Afec chu Rehob: puxamatiy kachikinin chu laktsu xkachikinin. 31 Wa uma tuku katapakgsinilh xtribu Aser chuna la akgatunu akgatunu xfamilias. Wa umakgolh kachikinin chu laktsu xkachikinin.

32 Xlimakgchaxan la makatsininalh Dios, lakgchalh Neftalí, xtribu Neftalí chuna la akgatunu akgatunu xfamilias. 33 Niku xkitapakgta xtiyatkan xʼan lata kʼHélef, asta klanka kiwi xalak Zaananim, xtitaxtu kʼAdamí-Néqueb chu Jabneel asta xchan kLacum, chu xkisputa kkgalhtuchokgo Jordán. 34 Niku xkitapakgta xtiyatkan xtaspita lata kʼoeste asta kʼAznot-Tabor chu anta xtalakgatumi asta kʼHucoc* chu xchan asta kZabulón, ksur, chu asta kʼAser, kʼoeste chu asta kJudá, kkgalhtuchokgo Jordán, kʼeste. 35 Chu laklanka kachikinin xwankgonit Zidim, Zer, Hammat, Racat, Kinéret, 36 Adamá, Ramá, Hazor, 37 Quedes, Edréi, En-Hazor, 38 Yirón, Migdal-El, Horem, Bet-Anat chu Bet-Semes: akgkunajatsa kachikinin chu laktsu xkachikinin. 39 Wa uma tuku katapakgsinilh xtribu Neftalí chuna la akgatunu akgatunu xfamilias; umakgolh xkachikinin chu laktsu xkachikinin.

40 Xlimakgtujun la makatsininalh Dios, lakgchalh xtribu Dan chuna la akgatunu akgatunu xfamilias. 41 Chu niku xkitapakgta xtiyatkan nema katapakgsinilh wa Zorá, Estaol, Ir-Semes, 42 Saalabín, Ayalón, Itlá, 43 Elón, Timná, Ecrón, 44 Eltequé,* Guibetón, Baalat, 45 Jehúd, Bene-Berac, Gat-Rimón, 46 Me-Jarcón chu Racón, kxlakatin niku xkitapakgta Jope. 47 Pero tiyat nema xkamaxkikanit xtribu Dan lu aktsu xwanit. Wa xlakata ankgolh talatlawakgo Lésem, akgchipakgolh chu kalimasputukgolh espada. Alistalh akgchipakgolh chu anta tawilakgolh, chu xpalakata xamakgan xtlatkan Dan, lakgpalinikgolh xtukuwani Lésem chu limapakuwikgolh Dan. 48 Wa uma tuku katapakgsinilh xtribu Dan chuna la akgatunu akgatunu xfamilias. Wa umakgolh kachikinin chu laktsu xkachikinin.

49 Chuna makgpitsikgoka putum kachikinin xla uma tiyat xlakata xkamaxkikgoka tuku xkatapakgsinilh israelitas. Alistalh maxkikgolh Josué xkgawasa Nun tuku xtapakgsinilh kxlakgstipankan. 50 Chuna la limapakgsinalh Jehová, maxkika kachikin nema skilh, Timnat-Sérah, xkasipijni Efraín, chu xla lakkaxtlawapa kachikin chu anta latamalh.

51 Wa umakgolh tuku katapakgsinilh israelitas nema sacerdote Eleazar, Josué xkgawasa Nun chu napuxkun xalak akgatunu tribus xalak Israel makgpitsikgolh, chuna la Jehová makatsininalh kSiló, niku laktanukan ktabernáculo. Chuna makgpitsikgoka tiyat.

20 Alistalh Jehová wanilh Josué: 2 «Kakawani israelitas: “Kalaksaktit kachikinin niku tlan tatsekgkan nema kkalitachuwinan akxni Moisés xlamajku, 3 xlakata komo wi tiku namakgni chatum lataman pero nichuna xtlawaputun tlan anta natatsekga. Uma nakamakgtayayan xlakata tlan natatsekgniyatit xmalakgaxokgena kgalhni. 4 Chu makgnina xliʼanat kʼumakgolh kachikinin, chu xlitayat kxlakatin xmalakcha kachikin chu nakalitachuwinan lakgkgolotsin xalak ama kachikin tuku tlawanit. Xlakan xlimakgamakglhtinatkan chu xlimaxkitkan niku tlan natamakgxtakga, chu anta akxtum nakatalatama. 5 Komo xmalakgaxokgena kgalhni naputsastalani, ni milimakamastatkan makgnina, xlakata maski xla makgnilh xtalataman ni chuna xtlawaputun chu ni ksitsini. 6 Anta nalatama kʼama kachikin asta akxni naʼan kxlakatin jueces xlakata nalakputsananikan, chu anta natamakgxtakga asta akxni nani tiku nalitaxtu sacerdote tiku tlakg kgalhi limapakgsin ama kilhtamaku. Alistalh makgnina tlan nataspita kxkachikin chu kxchik”».

7 Wa xlakata lu xlakaskinka liʼakxilhka* umakgolh kachikinin xla Quedes kʼGalilea, kxkasipijni Neftalí; Siquem, kxkasipijni Efraín; chu Quiryat-Arbá, uma wamputun, Hebrón, kxkasipijni Judá. 8 Chu kxtiyat Jordán kxʼeste Jericó, xlakan laksakkgolh Bézer, kxakaskakni tiyat, kxakaxtum sipi, xalak xtribu Rubén; Ramot, kʼGalaad, xalak xtribu Gad; chu Golan, kBasán, xalak xtribu Manasés.

9 Wa umakgolh kachikinin nema kalaksakka xpalakatakan putum israelitas chu tiku xalak atanu kachikinin xwankgonit nema anta xkatalamakgolh. Chuna, katiwa tiku xmakgnilh chatum lataman pero nichuna xtlawaputun, tlan xtsalalh anta chu xmalakgaxokgena kgalhni ni xmakgnilh komo nina xlakputsananikan kxlakatin jueces.

21 Xnapuxkun xalak xtribu Leví lakgtalakatsuwikgolh sacerdote Eleazar, Josué xkgawasa Nun chu xnapuxkun xalak akgatunu tribus xalak Israel, 2 chu kawanikgolh kSiló, kxtiyat Canaán: «Jehová limapakgsilh Moisés pi xkinkamaxkikan kachikinin niku xaklatamaw, chu xkapukuxtun niku xʼanan sekget xlakata xwayankgolh kiʼanimaleskan». 3 Wa xlakata, chuna la limapakgsinalh Jehová, israelitas kamaxkikgolh kachikinin tuku xkatapakgsinilh levitas chu xkapukuxtun niku xʼanan sekget.

4 Akxni makatsininalh Dios,* pulana kalakgchalh xfamiliaskan cohatitas, chu levitas, xkamanan sacerdote Aarón kalakgchalh akgkututu kachikinin xalak xtribu Judá, xalak xtribu Simeón chu xalak xtribu Benjamín.

5 Chu amakgapitsi cohatitas kalakgchalh akgkaw kachikinin xalak xtribu Efraín, xalak xtribu Dan chu xalak itat xtribu Manasés.

6 Chu guersonitas kalakgchalh akgkututu kachikinin xalak xtribu Isacar, xalak xtribu Aser, xalak xtribu Neftalí chu xalak itat xtribu Manasés, kBasán.

7 Meraritas makgamakglhtinankgolh chuna la akgatunu xfamilias, akgkutiy kachikinin xalak xtribu Rubén, xalak xtribu Gad chu xalak xtribu Zabulón.

8 Wa xlakata, chuna la Dios makatsininalh, israelitas kamaxkikgolh levitas umakgolh kachikinin chu xkapukuxtun niku xʼanan sekget, chuna la Jehová xlimapakgsinit Moisés.

9 Wa umakgolh xtukuwanikan kachikinin nema mastakgolh xalak xtribu Judá chu xalak xtribu Simeón, 10 xfamilias Cohat xkamanan Aarón, xalak xtribu Leví wa tiku xapulana makgamakglhtinankgolh makgapitsi kachikinin chuna la makatsininalh Dios. 11 Chu kamaxkika Quiryat-Arbá (Arbá xtlat Anac xlitaxtu), uma wamputun, Hebrón, xkasipijni Judá, chu xkapukuxtun niku xʼanan sekget nema xlimakgstilikgo. 12 Pero xkapukuxtun kachikin chu laktsu xkachikinin maxkika Caleb xkgawasa Jefuné xlakata xtapakgsinilh.

13 Chu xkamanan sacerdote Aarón kamaxkika kachikin niku tlan xtatsekga tiku xmakgninan, kʼHebrón, chu xkapukuxtun niku xʼanan sekget, na kamaxkika Libná chu xkapukuxtun niku xʼanan sekget, 14 Jatir chu xkapukuxtun niku xʼanan sekget, Estemoa chu xkapukuxtun niku xʼanan sekget, 15 Holón chu xkapukuxtun niku xʼanan sekget, Debir chu xkapukuxtun niku xʼanan sekget, 16 Ain chu xkapukuxtun niku xʼanan sekget, Jutá chu xkapukuxtun niku xʼanan sekget chu Bet-Semes chu xkapukuxtun niku xʼanan sekget: akgnajatsa kachikinin xla uma akgtiy tribus.

17 Chu xalak xtribu Benjamín: Gabaón chu xkapukuxtun niku xʼanan sekget, Gueba chu xkapukuxtun niku xʼanan sekget, 18 Anatot chu xkapukuxtun niku xʼanan sekget chu Almón chu xkapukuxtun niku xʼanan sekget: akgtati kachikinin.

19 Xliputum kachikinin nema kamaxkika xkamanan Aarón, tiku sacerdotes xwankgonit, litakgatsikgolh akgkututu kachikinin chu xkapukuxtun niku xʼanan sekget.

20 Chu amakgapitsin familias tiku cohatitas xwankgonit, xalak xtribu Leví, kamaxkika tuku xkatapakgsinilh kachikinin xalak xtribu Efraín. 21 Kamaxkika kachikin niku tlan xtatsekgli tiku xmakgninan, Siquem chu xkapukuxtun niku xʼanan sekget, kxkasipijni Efraín, Guézer chu xkapukuxtun niku xʼanan sekget, 22 Quibzaim chu xkapukuxtun niku xʼanan sekget chu Bet-Horón chu xkapukuxtun niku xʼanan sekget: akgtati kachikinin.

23 Chu xalak xtribu Dan: Eltequé chu xkapukuxtun niku xʼanan sekget, Guibetón chu xkapukuxtun niku xʼanan sekget, 24 Ayalón chu xkapukuxtun niku xʼanan sekget, Gat-Rimón chu xkapukuxtun niku xʼanan sekget: akgtati kachikinin.

25 Chu itat xtribu Manasés: Taanac chu xkapukuxtun niku xʼanan sekget chu Gat-Rimón chu xkapukuxtun niku xʼanan sekget: akgtiy kachikinin.

26 Xliputum kachikinin nema makglhtinankgolh amakgapitsin xfamilias cohatitas litakgatsikgolh akgkaw chu xkapukuxtun niku xʼanan sekget.

27 Chu guersonitas xalak xtribu Leví makgamakglhtinankgolh xalak itat xtribu Manasés kachikin niku tlan xtatsekgli tiku xmakgninan, kʼGolán, anta kBasán, chu xkapukuxtun niku xʼanan sekget chu Beesterá chu xkapukuxtun niku xʼanan sekget: akgtiy kachikinin.

28 Chu xalak xtribu Isacar: Quisión chu xkapukuxtun niku xʼanan sekget, Daberat chu xkapukuxtun niku xʼanan sekget, 29 Jarmut chu xkapukuxtun niku xʼanan sekget chu En-Ganim chu xkapukuxtun niku xʼanan sekget: akgtati kachikinin.

30 Chu xalak xtribu Aser: Misal chu xkapukuxtun niku xʼanan sekget, Abdón chu xkapukuxtun niku xʼanan sekget, 31 Helcat chu xkapukuxtun niku xʼanan sekget chu Rehob chu xkapukuxtun niku xʼanan sekget: akgtati kachikinin.

32 Chu xalak xtribu Neftalí: kachikin niku tlan xtatsekgli tiku xmakgninan, kQuedes, kʼGalilea, chu xkapukuxtun niku xʼanan sekget, Hamot-Dor chu xkapukuxtun niku xʼanan sekget chu Cartán chu xkapukuxtun niku xʼanan sekget: akgtutu kachikinin.

33 Xliputum kachikinin nema kamaxkika guersonitas chuna la akgatunu xfamilias litakgatsikgolh akgkututu kachikinin chu xkapukuxtun niku xʼanan sekget.

34 Chu xfamiliaskan meraritas, chu amakgapitsi levitas, makgamakglhtinankgolh xalak xtribu Zabulón: Jocneam chu xkapukuxtun niku xʼanan sekget, Cartá chu xkapukuxtun niku xʼanan sekget, 35 Dimná chu xkapukuxtun niku xʼanan sekget chu Nahalal chu xkapukuxtun niku xʼanan sekget: akgtati kachikinin.

36 Chu xalak xtribu Rubén: Bézer chu xkapukuxtun niku xʼanan sekget, Jáhaz chu xkapukuxtun niku xʼanan sekget, 37 Quedemot chu xkapukuxtun niku xʼanan sekget chu Mefaat chu xkapukuxtun niku xʼanan sekget: akgtati kachikinin.

38 Chu xalak xtribu Gad: kachikin niku tlan xtatsekgli tiku xmakgninan, Ramot, kʼGalaad, chu xkapukuxtun niku xʼanan sekget, Mahanaim chu xkapukuxtun niku xʼanan sekget, 39 Hesbón chu xkapukuxtun niku xʼanan sekget chu Jazer chu xkapukuxtun niku xʼanan sekget: akgtati kachikinin.

40 Xliputum kachikin nema kalakgchalh meraritas chuna la akgatunu xfamilias xalak xtribu Leví, litakgatsikgolh akgkutiy kachikinin.

41 Kachikinin nema levitas makglhtinankgolh kxtiyatkan israelitas, litakgatsikgolh tipuxamatsayan kachikinin chu xkapukuxtun niku xʼanan sekget. 42 Akgatunu akgatunu umakgolh kachikinin xlitamakgstilikgonit xkapukuxtun niku xʼanan sekget. Chu nachuna xkgalhikgo amakgapitsin kachikinin.

43 Chuna Jehová kamaxkilh Israel tiyat nema xkamalaknuninit xalakgmakgan xnatlatnikan, chu xlakan akgchipakgolh chu anta latamakgolh. 44 Nachuna, Jehová kamaxkilh takaksni* ktiyat nema kamaxkilh chuna la xkamalaknuninit xalakgmakgan xnatlatnikan, chu nipara chatum xtalatlawananinkan kamakgatlajakgolh. Jehová kamakamaxkilh putum xtalatlawananinkan. 45 Xliputum laktlan tamalaknun nema Jehová xkatlawaninit israelitas putum kgantaxtukgolh; ni analh tuku ni xkgantaxtulh.

22 Alistalh Josué kamamakxtumilh rubenitas, gaditas chu itat xtribu Manasés, 2 chu kawanilh: «Wixin tlawanitantit putum tuku Moisés, kskujni Jehová kalimapakgsin, chu kilakgalhakgaxmatnitaw putum tuku kkalimapakgsin. 3 Putum uma kilhtamaku ni kamakgxtakgnitantit minatalankan, asta la uku; chu makgantaxtinitantit putum tuku Jehová miDioskan kalimapakgsin. 4 La uku Jehová miDioskan kamaxkinit takaksni* minatalankan chuna la kamalaknunilh. Wa xlakata wixin tlan nataspitatit kminchikkan xaxuwa anta ktiyat nema Moisés, kskujni Jehová, kamaxkin kxakilhtutu* Jordán. 5 Pero kuenta katlawatit chu liwana kamakgantaxtitit Limapakgsin nema Moisés, kskujni Jehová kamaxkin, napaxkiyatit Jehová miDioskan, natlawanatit kxtiji, nakgalhakgaxpatatit xlimapakgsin, ni namakgxtakgatit chu xliputum minakujkan chu milatamatkan naskujnaniyatit».

6 Alistalh Josué kasikulunatlawalh chu kamalakgachalh kxchikkan. 7 Moisés xkamaxkinit tuku xkatapakgsinilh kBasán, itat xtribu Manasés, chu aitat tribu, Josué kamaxkilh xtiyatkan kxʼoeste Jordán, lakatsu niku xwilakgolh xnatalankan. Nachuna akxni Josué kamalakgachalh kxchikkan, kasikulunatlawalh 8 chu kawanilh: «Kataspittit chu kalipitit tuku lhuwa xtapalh, lhuwa animales, plata, oro, cobre, likan chu lhuwa lhakgat. Kalipitit tuku kamakglhtitit mintalatlawananinkan chu kalatatapapitsitit».

9 Alistalh, rubenitas, gaditas chu itat xtribu Manasés kamakgxtakgkgolh amakgapitsi israelitas, taxtukgolh kSiló, ktiyat nema xwi kCanaán, chu taspitkgolh ktiyat nema xwi kʼGalaad, tiyat nema xmakgamakglhtinankgonit xlakata xkatapakgsinilh chu niku xwilakgolh chuna la Jehová xlimapakgsinanit akxni xlamajku Moisés. 10 Akxni chankgolh kkachikinin nema xwilakgolh lakatsu kJordán kxtiyat Canaán, rubenitas, gaditas chu itat xtribu Manasés tlawakgolh akgtum pumakamastan lakatsu kJordán, akgtum lu lanka pumakamastan. 11 Alistalh, amakgapitsi israelitas kgaxmatkgolh pi xkilhwamaka: «¡Kaʼakxilhtit! Rubenitas, gaditas chu itat xtribu Manasés tlawakgolh akgtum pumakamastan niku kitapakgta xtiyat Canaán, kkachikinin lakatsu kJordán, kxkilhpan niku kinkatapakgsiniyan». 12 Akxni israelitas katsikgolh, putum kachikin* tamakxtumikgolh kSiló xlakata naʼankgo katalatlawakgo.

13 Alistalh, israelitas malakgachakgolh Finehás xkgawasa sacerdote Eleazar niku xwilakgolh rubenitas, gaditas chu itat xtribu Manasés, ktiyat xla Galaad, 14 chu kgalhkaw lakchixkuwin akxtum xtaʼankgo chu chatunu chatunu xpulalin akgtum familia xalak xtribu Israel; putum xlakan xpulalinkgo akgtum familia* kxchik xtlatkan. 15 Akxni chankgolh niku xwilakgolh rubenitas, gaditas chu itat xtribu Manasés, ktiyat xla Galaad, kawanikgolh:

16 «Wa uma tuku wankgo putum xkachikin Jehová: “¿Tuku xlakata ni kgalhakgaxpattit Jehová xDios Israel chu tlawatit akgtum pumakamastan xlakata natalalakatawakayatit Jehová? 17 ¿Nialh lakapastakatit talakgalhin nema tlawaw kPeor? ¿Nialh lakapastakatit tuku nitlan kalakgchilh putum xkachikin Jehová? Chuntiyaku lipatinamaw uma talakgalhin. 18 ¡¿Chu wixin nialh stalaniputunatit Jehová?! Chu komo la uku natalalakatawakayatit Jehová, chali xla lu nakasitsini putum kachikin Israel. 19 Komo tiyat nema katapakgsiniyan ni xaskulunku, kapitit ktiyat nema tapakgsini Jehová niku wi xtabernáculo Jehová chu anta katamakgxtakgtit kkilakgstipankan; pero ni katalalakatawakatit Jehová chu ni katlawatit atanu pumakamastan xlakata Jehová ni nalakpuwan pi talalakatawakamaw. 20 Akxni Acán xkgawasa Zérah tlawalh tuku nitlan chu tiyalh tuku tanu xwilikanit xlakata namalakgsputukan, ¿ni lipatinankgolh putum israelitas? Chu ni kajwatiya xla nilh xlakata xtalakgalhin”».

21 Alistalh rubenitas, gaditas, chu itat xtribu Manasés kakgalhtikgolh xnapuxkun xalak akgatunu familias* xalak Israel: 22 «¡Jehová, Dios tiku kgalhi lhuwa litliwakga! ¡Jehová, Dios tiku kgalhi lhuwa litliwakga! Xla katsi chu Israel na nakatsi. Komo ktalalakatawakaw chu kmakgxtakgwi Jehová, ni kakilalakgmaxtuw la uku. 23 Komo naktlawayaw akgtum pumakamastan xlakata nialh nakstalaniyaw Jehová chu nakmakamastayaw xalhkun tamakamastan, tamakamastan xla talhtsi chu tamakamastan xla takaksni, Jehová nakinkalakputsananiyan. 24 Pero ni, ktlawaw uma xlakata atanu tuku xaklilakgaputsamaw. Klawaniw: “Kilhtamaku nema aku mima minkamanankan nakakgalhskinkgo kinkamanankan: «¿Tuku xlakata wixin akxtum kilatakakninaniyaw Jehová, xDios Israel? 25 Jehová wilinit kgalhtuchokgo Jordán xlakata nakinkamapapitsiyan akinin chu wixin, rubenitas chu gaditas. Wixin ni milikakninanitkan Jehová». Chu minkamanankan ni katikamaxkikgolh talakaskin kinkamanankan nakakninanikgo* Jehová”.

26 »Wa xlakata klawaniw: “Wi tuku kilitlawatkan, katlawaw akgtum pumakamastan, ni wa xpalakata namakamastayaw xalhkun tamakamastan nipara atanu tamakamastan, 27 wata nakinkamalakapastakayan pi naskujnaniyaw Jehová chu namakamaxkiyaw xalhkun tamakamastan, chu tamakamastan xla takaksni, xlakata minkamanankan ni nakawanikgo kinkamanankan kkilhtamaku nema aku mima: «Wixin ni milikakninanitkan Jehová»”. 28 Wa xlakata klawaniw: “Komo wa uma tuku xlakan nakinkawanikgoyan akinin chu kinkamanankan, kkilhtamaku nema aku mima, akinin nakkawaniyaw: «Kaʼakxilhtit xpumakamastan Jehová, nema xalakgmakgan kinatlatnikan tlawakgolh ni wa xpalakata namakamastakgo xalhkun tamakamastan wata nakinkamalakapastakayan pi skujnaniyaw Dios»”. 29 ¡Akinin nikxni kaktitalalakatawakaw Jehová chu nikxni kaktimakgxtakgwi Jehová, nikxni ktitlawaw atanu pumakamastan xlakata nakmakamastayaw xalhkun tamakamastan, tamakamastan xla talhtsi chu atanu tamakamastan, kajwatiya niku kiDioskan Jehová lakkaxwilinit kxlakatin tabernáculo!».

30 Akxni sacerdote Finehás, xnapuxkun kachikin chu napuxkun xalak akgatunu familias* xalak Israel nema akxtum xkatawilakgolh, kgaxmatkgolh umakgolh tachuwin nema wankgolh xkamanan Rubén, Gad chu Manasés, tlan akxilhkgolh. 31 Wa xlakata Finehás xkgawasa sacerdote Eleazar kawanilh xkamanan Rubén, Gad chu Manasés: «La uku katsiyaw pi Jehová wi kkilakgstipankan xlakata ni tlawanitantit tuku nitlan kxlakatin Jehová. Wixin kalakgmaxtunitantit israelitas kxmakan Jehová».

32 Alistalh Finehás xkgawasa sacerdote Eleazar chu napuxkun kamakgxtakgkgolh rubenitas chu gaditas ktiyat xla Galaad, taspitparakgolh kxtiyat Canaán chu kamakatsinikgolh amakgapitsi israelitas. 33 Israelitas tlan akxilhkgolh tuku kamakatsinika. Chu israelitas tsukukgolh malankikgo Dios, chu nialh wankgolh pi xʼamputunkgo katalatlawakgo rubenitas chu gaditas xlakata namasputukgo tiyat niku xlamakgolh.

34 Alistalh rubenitas chu gaditas wilinikgolh xtukuwani uma pumakamastan,* xlakata wankgolh «nakinkamalakapastakayan pi skujnaniyaw Jehová, xaxlikana Dios».

23 Lhuwa kilhtamaku alistalh akxni Jehová xkamaxkinita takaksni Israel chu xkalakgmaxtunita kxmakankan xtalatlawananinkan, akxni Josué xkgolonita chu xlina kata, 2 Josué kamamakxtumilh putum israelitas, lakgkgolotsin, napuxkun, jueces chu xpulalinanin kachikin, kawanilh: «Kkgolonita chu klina kata. 3 Chu wixin akxilhnitantit putum tuku Jehová miDioskan katlawanilh umakgolh kachikinin kmimpalakatakan, xlakata Jehová miDioskan wa tiku xtalatlawanama mimpalakatakan. 4 Kaʼakxilhtit, kkamaxkilh mintribuskan tiyat nema xkatapakgsinilh chuna la Dios kimakatsinilh,* nema xwi lata kJordán asta kxaLanka pupunu,* kʼoeste,* niku xkatapakgsini kachikinin nema kkamalakgsputulh chu kachikinin nema wilakgolhku. 5 Chu Jehová miDioskan wa tiku kalimapanulh xlitliwakga kmilakatinkan, chu xla katamakxtulh mimpalakatakan, chu wixin akgchipatit xtiyatkan, chuna la Jehová miDioskan kamalaknunin.

6 »La uku talakaskin pi wixin ni napekuanatit xlakata nakgalhakgaxpatatit chu natlawayatit putum tuku tatsokgtawilanit kxLimapakgsin Moisés, nikxni napataxtutayayatit nipara kmimpakgastakatkan nipara kmimpakgxwikikan, 7 chu nikxni akxtum nakatalayatit umakgolh kachikinin nema wilakgolhku kmilakgstipankan. Nipara namapakuwiyatit xdioseskan chu nitu nalitayayatit kxlakatinkan, nikxni nakaskujnaniyatit nipara nakalakgtakilhputayatit. 8 Wata akxtum katatawilatit Jehová miDioskan, chuna la tlawanitantit asta la uku. 9 Jehová nakatamakxtu kmilakatinkan kachikinin nema laklanka chu lakgtliwakga; asta la uku nipara chatum chixku kamakgatlajanitan. 10 Kaj chatum chixku namakgatlaja akgtum mil, xlakata Jehová miDioskan talatlawanama mimpalakatakan, chuna la kamalaknunin. 11 Wa xlakata ankgalhin kapaxkitit Jehová miDioskan chu skgalalh katawilatit.

12 »Pero komo wixin napataxtutayayatit chu akxtum nakatalayatit chu nakatalalipinatit umakgolh kachikinin nema wilakgolh kmilakgstipankan, chu komo minkamanankan nakatatamakgaxtokgkgo xkamanankan, 13 liwana kakatsitit pi Jehová miDioskan nialh katikatamakxtulh umakgolh kachikinin mimpalakatakan. Xlakata nalitaxtukgo la akgtum akgsiyat, la kgantum tasiw nema lisnokgnankan chu la lhtukun kmilakgastapukan asta akxni wixin lakgsputnitantit nawan kʼuma xatlan tiyat nema Jehová miDioskan kamaxkinitan.

14 »La uku, akit nialh makgas nakni,* chu wixin liwana katsiyatit xliputum minakujkan chu xliputum milatamatkan, pi nipara akgtum tachuwin xliputum laktlan tamalaknun nema Jehová katlawanin ni kgantaxtunit. Putum kgantaxtulh mimpalakatakan. Ni analh tuku ni kgantaxtulh. 15 Pero, chuna la kgantaxtunit putum laktlan tamalaknun nema Jehová miDioskan katlawanin, Jehová na nakamakaminiyan tuku nitlan chuna la kamalaknunin chu nakamalakgsputuyan kʼuma xatlan tiyat nema Jehová miDioskan kamaxkinitan. 16 Komo wixin nalaktlawayatit chu ni namakgantaxtiyatit talakkaxlan nema Jehová miDioskan kalimapakgsin, chu komo nakaskujnaniyatit atanu dioses chu nakalakgtakilhputayatit, xlikana pi Jehová lu nakasitsiniyan chu lakapala nakamalakgsputuyan kxastlan tiyat nema kamaxkinitan».

24 Alistalh Josué kamamakxtumilh kSiquem putum xtribus Israel chu kamatasaninalh lakgkgolotsin xalak Israel, napuxkun, jueces chu xpulalinanin kachikin, chu xlakan talakatsuwikgolh kxlakatin xaxlikana Dios. 2 Josué kawanilh putum kachikin: «Wa uma tuku wan Jehová xDios Israel: “Kxakilhtutu Kgalhtuchokgo* niku akglhuwa kata latamakgolh xalakgmakgan minatlatnikan, chuna la Taré, xtlat Abrahán chu xtlat Nacor, xlakan skujnanikgolh atanu dioses.

3 »”Titaxtulh makgapitsi kata, kxakilhtutu Kgalhtuchokgo klilh mintlatkan Abrahán, chu ktlawalh pi xlakgatsalalh putum xtiyat Canaán chu kmalhuwilh xkamanan. Kmaxkilh Isaac; 4 chu Isaac kmaxkilh Jacob chu Esaú. Alistalh Esaú kmaxkilh xlakata xtapakgsinilh sipi Seír; chu Jacob chu xkamanan ankgolh kʼEgipto. 5 Alistalh kmalakgachalh Moisés chu Aarón xlakata xkalakgmaxtun chu Egipto kmalakgachanilh tuku nitlan; alistalh kkatamakxtun anta. 6 Akxni akit xakkatamakxtuma minatlatnikan kʼEgipto chu wixin chipitit kpupunu, egipcios kaliputsastalanikgolh minatlatnikan xputlawkan nema xlitlawakgo guerra chu xkawayujkan asta kxaSpinini pupunu. 7 Xlakan tsukukgolh tasaskinikgo Jehová, wa xlakata wililh xatsitsakga puklhni xlakata egipcios nitu xkatlawanikgon, chu kalimakgtsilh pupunu, chu wixin akxilhtit tuku ktlawalh kʼEgipto. Alistalh wixin akglhuwa kata* latapatit kxakaskakni tiyat.

8 »”Chu kkalin kxtiyatkan amorreos nema xwilakgolh kxakilhtutu* Jordán chu xlakan katalatlawakgon. Pero kkamakamaxkin xlakata wixin xʼakgchipatit xtiyatkan chu kkamalakgsputulh kmilakatinkan. 9 Alistalh Balac xkgawasa Zipor, mapakgsina xalak Moab, talatlawalh Israel. Xla matasaninalh Balaam xkgawasa Beor xlakata xkawanin tuku nitlan. 10 Pero akit ni kkgalhakgaxmatputulh Balaam. Wa xlakata xla makglhuwa kasikulunatlawan, chu akit kkalakgmaxtun kxmakan.

11 »”Alistalh wixin patakuttit kgalhtuchokgo Jordán chu chipitit kJericó. Chu napuxkun* xalak Jericó, amorreos, perizitas, cananeos, hititas, guirgaseos, heveos chu jebuseos katalatlawakgon, pero akit kkamakamaxkin. 12 Kmilakatinkan kmalakgachalh tapekua nema tlawalh pi xlakan xtsalakgolh, chuna la chatiy xmapakgsinanin amorreos. Ni wa miʼespada nipara miʼarco tuku kalimakgatlaja. 13 Chuna kkamaxkin tiyat nema wixin ni liskujtit chu kachikinin nema ni tlawatit, chu anta tawilatit. Chu wapatit uvas chu olivos nema ni wixin chantit”.

14 »Wa xlakata, kapekuanitit Jehová chu kaskujnanitit, katatayatit chu ni kamakgxtakgtit, kamapanutit dioses nema kaskujnanikgolh xalakgmakgan minatlatnikan kxakilhtutu Kgalhtuchokgo chu kʼEgipto, chu kaskujnanitit Jehová. 15 Chu komo ni skujnaniputunatit Jehová, la uku kalaksaktit tiku naskujnaniyatit: dioses tiku kaskujnanikgolh xalakgmakgan minatlatnikan kxakilhtutu Kgalhtuchokgo o xdioses amorreos tiku katapakgsini tiyat niku lapatit. Pero kifamilia chu akit, nakskujnaniyaw Jehová».

16 Alistalh kachikin kgalhtinalh: «Nikxni ktilakpuwaw nakkaskujnaniyaw atanu dioses chu nakmakgxtakgaw Jehová. 17 Wa Jehová kiDioskan tiku kinkatamakxtun akinin chu kinatlatnikan kʼEgipto, ktiyat niku skujnin xaklitaxtuyaw, chu tiku tlawalh laklanka milagros* kkilakatinkan chu kinkakuentajtlawan ktiji nema klakgatsalaw chu kputum kachikinin niku ktitaxtuw. 18 Jehová katamakxtulh putum kachikinin, nachuna amorreos, tiku xlamakgolh kʼuma tiyat akxni nina xminaw akinin. Wa xlakata akinin na nakskujnaniyaw Jehová xlakata xla kiDioskan».

19 Alistalh Josué kawanilh kachikin: «Wixin nila katiskujnanitit Jehová, xlakata xla chatum Dios xasanto; chatum Dios tiku lakaskin pi kajwatiya xla naskujnanikan. Ni katikatapatin tuku nitlan natlawayatit* nipara mintalakgalhinkan. 20 Komo namakgxtakgatit Jehová chu naskujnaniyatit atanu dioses, xla nakasitsiniyan chu nakamalakgsputuyan, maski lhuwa tuku tlan tlawalh mimpalakatakan».

21 Pero putum kachikin wanikgolh Josué: «¡Ni, akinin nakskujnaniyaw Jehová!». 22 Alistalh Josué kawanilh kachikin: «Wixin liwana katsiyatit pi kiʼakstukan laksaknitaw naskujnaniyaw Jehová». Chu xlakan kgalhtinankgolh: «Chuna, kkatsiyaw».

23 Chu Josué wa: «Wa xlakata kakamapanutit dioses nema wilakgolh kmilakgstipankan chu kajwatiya kaskujnanitit Jehová, xDios Israel». 24 Kachikin wanilh Josué: «¡Nakskujnaniyaw Jehová kiDioskan chu nakkgalhakgaxmataw!».

25 Amacha kilhtamaku, Josué katatlawalh akgtum talakkaxlan kachikin chu lakkaxwililh akgtum limapakgsin kSiquem. 26 Alistalh Josué tsokgwililh umakgolh tachuwin klibro xla xLimapakgsin Dios chu wililh akgtum lanka chiwix kxtampin kgantum lanka kiwi nema lakatsu wi niku xasanto tlawanit Jehová.

27 Josué chuntiya kawanilh kachikin: «¡Kaʼakxilhtit! Uma chiwix kgaxmatnit putum tuku Jehová kinkawaninitan, chu akxni wixin naʼakxilhatit uma chiwix nalakapastakatit, xlakata ni nawanatit pi ni lakgapasatit miDioskan». 28 Chuna, Josué katachuwinankgolh kachikin, chu chatunu chatunu taspitparakgolh ktiyat nema xkatapakgsini.

29 Titaxtulh kilhtamaku, Josué xkgawasa Nun, kskujni Jehová, nilh akxni xkgalhi 110 kata. 30 Maknuka* ktiyat nema makglhtinalh, kTimnat-Sérah, nema wi kxkasipijni Efraín, kxnorte sipi Gaas. 31 Israelitas skujnanikgolh Jehová akxni xlamajku Josué chu kxkilhtamakujkan lakgkgolotsin nema latamakgolh akxni xninita Josué, tiku xkatsikgo putum tuku Jehová xtlawanit xpalakata Israel.

32 Xlukut José nema israelitas xliminkgonitancha kʼEgipto, maknukgolh kSiquem, kpukuxtu nema Jacob kalimakgtamawalh akgtum ciento tumin xla plata* xkamanan Hamor, xtlat Siquem; chu wa uma tuku katapakgsinilh xkamanan José.

33 Na nilh Eleazar xkgawasa Aarón. Maknuka kʼaktsu ksipi nema xtapakgsini Finehás, xkgawasa, nema xmaxkikanit kxkasipijni Efraín.