Lu laklanka lakchixkuwin unu kKatiyatni

KOMO tiku xlakgmin lu lanka chu xtakgstipuwakalh kminchik, ¿tuku xlakpuwanti? ¡Xwanti pi lu lanka! Milh kilhtamaku akxni xlikana chuna xʼanankgoy lakchixkuwin kKatiyatni. Biblia wan pi xnatlatnikan ángeles xwankgonit, xalak akgapun. Pero, ¿la chuna lalh?

Kalakapastakti, Satanás tama ángel lixkajni xtayat wantiku xwilima taʼakglhuwit. Asta na xlitsakgsama pi xʼángeles Dios na nitlan xlikatsikgolh. Alh kilhtamaku, chu makgapitsi ángeles tsukukgolh tlawanikgoy kuenta Satanás. Makgxtakgkgolh xtaskujutkan nema Dios xkamaxkinit anta kʼakgapun. Minkgolh kKatiyatni chu tlawakgolh xmaknikan chuna la xla chatum chixku. ¿Katsiya tuku xlakata?

Biblia wan pi minkgolh xlakata akxilhkgolh lakstlan lakpuskatin kKatiyatni chu xtatawilaputunkgoy. Wa xlakata minkgolh chu katatamakgaxtokgkgolh lakpuskatin. Biblia wan pi uma tuku tlawakgolh nitlan, Dios katlawalh ángeles xlakata nalatamakgoy kʼakgapun.

Akxni ángeles chu xlakpuskatin kgalhikgolh xlakgskgatankan, uma lakgskgatan ni chuna xwankgonit la amakgapitsi. Akxni laktsinajku xwankgonit ni max tanu xtasiyakgoy. Pero tsukukgolh stakkgoy chu lu laklanka wankgolh, nachuna lu lakgtliwakga wankgolh, chu lu laklanka stakkgolh.

Uma lu laklanka lakchixkuwin, lixkajni xlikatsikgoy. Xlakata lu laklanka xwankgonit chu lu lakgtliwakga, xkatlawaniy kristianos tuku nitlan. Chu fuerza xkamatlawaputun kristianos pi putum nitlan xlikatsikgolh.

Enoc xninitta pero xlama achatum chixku kKatiyatni tiku tlan xlikatsiy. Uma xtukuwani Noé. Uma chixku putum kilhtamaku xtlaway tuku Dios xlakgatiy natlaway.

Pero akgtum kilhtamaku Dios wanilh Noé pi xchanit kilhtamaku akxni xʼama kamalakgsputuy putum tiku lixkajni xtayat. Pero Dios xʼama malakgtaxtiy Noé chu xfamilia chu lhuwa animales. Kaʼakxilhwi la tlawalh.