Xatlan tsumat xpuskat nawan Isaac

¿LAKGAPASA uma tsumat xalak dibujo? Xtukuwani Rebeca. Chu ama chixku wantiku lakgama xtukuwani Isaac. Rebeca, xpuskat nawan Isaac. ¿La chuna kitaxtulh?

Abrahán xlakaskin pi xkgawasa Isaac xkgalhilh xatlan xpuskat. Nixlakaskin xtatamakgaxtokgli lakpuskatin xalak Canaán xlakata xlakan xkakninanikgoy dioses nixaxlikana. Wa xlakata tasanilh kskujni chu wanilh, kapit anta niku wilakgolh kinparientes kHarán chu nalitana chatum tsumat xlakata xpuskat nawan kinkgawasa Isaac.

Kskujni Abrahán lakapara makaxli tankaw laklanka animales kawanikan camellos chu alh niku wanika. Akxni xtalakatsuwinit niku xwilakgolh xparientes Abrahán, jaxli anta niku kxkgatnankgokan. Atsinu ni axtsiswan, akxni lakpuskatin xʼankgoy xkgatnanakgoy. Wa xlakata kskujni Abrahán, tlawanilh Jehová akgtum oración chu wanilh: Wa tsumat nema namin chu nakimaxkiy chuchut chu na namaxki camellos wa kawa tiku wix laksaknita xlakata xpuskat nawan Isaac.

Rebeca tunkun milh xkgata, akxni kskujni Abrahán makgskilh chuchut, maxkilh chuchut. Alistalh Rebeca na kamakgotnilh putum camellos nema xkgalhputimakgolh. Lhuwa skujli, xlakata camellos lhuwa chuchut wakgoy.

Akxni Rebeca kamakgotnikgolh, kskujni Abrahán kgalhskilh xtukuwani xtlat. Na kgalhskilh komo tlan naʼan makglhtatay anta kchikkan. Rebeca kgalhtinalh: Kintlat xtukuwani Betuel, chu katat anta kkinchikkan wi niku tlan nalhtataya. Kskujni Abrahán xkatsiy pi Betuel xkgawasa Nacor xwanit wantiku xtala Abrahán. Wa xlakata tatsokgostalh chu maxkilh tapaxtikatsini Jehová xlakata lilh niku xwi xparientes Abrahán.

Tama katsisni kskujni Abrahán kawanilh Betuel chu Labán xtala Rebeca tuku xlakata xkalakgminit. Xchatiykan wankgolh pi tlan kalinika Rebeca Isaac xlakata xpuskat nawan. ¿Tuku wa Rebeca akxni kgalhskinka? Wa pi xamputun. Wa xlakata lichali kgatawilakgolh camellos chu ankgolh makgat kCanaán.

Akxni chankgolh katsisni xwanit, Rebeca akxilhli chatum chixku tiku xlapulay kkakiwin. Wa Isaac xwanit. Isaac lu lipaxuwalh akxni akxilhli Rebeca. Sara, xtse Isaac kajku akgtutu kata xninit, chu Isaac xlilipuwanku. Pero Isaac paxkilh Rebeca, chu paxuwapa.