José kaliʼakxilha xnatalan

JOSÉ katsiputun komo xkgalhkawkan xnatalan xalakpuxku, chunaku lixkajni likatsikgoy chu nipaxkinankgoy. Wa xlakata kawaniy: Wixin kaj tanitantit skgalayatit kinkachikinkan anta niku nitliwekga wi.

Ni, niwa kliminitaw. Akinin tlan klikatsiyaw. Putum akinin linatalan. Kinkgalhkutiykan xakwanitaw. Pero chatum nialhtu wi chu xataju tatamakgxtakgcha kintlatkan.

José tlaway la nikakanajlaniy. Matamaknuninalh kpulachin xtalakan Simeón, chu amakgapitsi kamaxkilh talakaskin naʼankgoy kxchikkan chu nalinkgoy tuku nawakgoy. Chu kawaniy: Akxni natamparayatit, nakilitaniyatit mintalakan xataju.

Akxni chankgolh kxchikkan kCanaán, xnatalan José wanikgolh xtlat Jacob wantuku kaʼakgspulalh. Jacob lu lilipuwan. Pixlanka tasay chu wan, José nialhtu wi chu Simeón na nialhtu wi. Ni ktimastalh talakaskin nalipinatit Benjamín xataju kinkgawasa. Pero akxni ay ksputmaja taway, Jacob mastalh talakaskin nalinkan kʼEgipto Benjamín xlakata tlan naliminkgoy tuku nawakgoy.

José ay akxilha xnatalan mimakgolh. Lu lipaxuwalh pi akxilhma Benjamín xtala nema tlakg xataju. Xlikana, nichatum xnatalan katsiy pi uma chixku tiku lanka xlakatsukut wa José. José tsukulh lakkaxwiliy la nakaliakxilha xtayatkan xtunatalan.

Kawaniy kskujnin pi kalimatsamakgolh wantuku nawakgoy kxkuxtalhkan. Chu na kawanilh kskujnin pi kamujunikgolh kxkuxtalh Benjamín xcopa, chu nikawaniy xnatalan. Alistalh akxni nina makgat xʼankgonitta, José kamalakgachalh kskujnin nakaputsastalanikan. Akxni kamataxtukka, kskujnin José wankgoy: ¿Tuku xlakata kgalhanitantit xcopa xaplata kimalana?

Xlakan kgalhtinankgolh chu wankgolh, nitu kgalhanitaw copa. Kakilamakgputsaw komo wintiku natekgsniyatit kamakgnitit.

Wa xlakata kskujnin tsukukgolh putsakgoy kxkuxtalhkan, chu tekgska tama copa anta kxkuxtalh Benjamín chuna la akxilhpat kdibujo. Kskujnin José kawanikgoy: Kaj watiya Benjamín naklinaw chu wixin tlan napinatitta. ¿Tuku natlawakgoy uku xtunatalan José?

Xputumkan tataspitkgolh Benjamín kxchik José. José kawaniy: Mimputumkan tlan napinatita kminchikkan, pero Benjamín natamakgxtakga unu xlakata kiskujni nawan.

Judá wa: Komo akit nakchan chu nitu klin Benjamín, naniy kintlat, xlakata lu paxkikan. Wa xlakata, akit kakimakgxtakgti miskujni nakwan, kskiniyan litlan kamakgxtakgti kataspitli Benjamín.

José akxilhma pi xnatalan talakgpalikgonitta. Nialh lixkajni xtayatkan la pulana xwankgonit chu ay paxkinankgoy. Kaʼakxilhwi tuku tlawalh José.