La lakkaxtlawakan taʼakglhuwit nema tawila xlakata akgtum negocio

Anta 1 Corintios 6:1-8 Traducción del Nuevo Mundo, apóstol Pablo lichuwinalh la xlakkaxtlawakgolh xtaʼakglhuwitkan linatalan kcongregación. Pulana, limasiyalh pi ksitsinit xlakata makgapitsi kstalaninanin Cristo xalak Corinto “xlinkgo kxlakatin mapakgsinanin tiku ni xaʼakgstitum likatsikgo” (versículo 1). Alistalh, kawanilh pi taʼakglhuwit nema xʼanan kcongregación xtalakkaxtlawalh kcongregación chu ni kxlakatin mapakgsinanin. Kaʼakxilhwi makgapitsi tastakyaw nema lichuwinalh Pablo akxni malakpuwanika natsokga carta chu alistalh naʼakxilhaw niku max nila katimaklakaskiw xtastakyaw.

Akxni linatalan kgalhikgo taʼakglhuwit xlakata negocios, Jehová lakaskin natalakkaxtlawa chuna la lakaskin chu ni la akinin lakpuwanaw (Proverbios 14:12). Chuna la wa Jesús, talakaskin tunkun nalakkaxtlawayaw chu ni namakgxtakgaw tlakg lanka nawan taʼakglhuwit (Mateo 5:23-26). Lu nitlan, pero makgapitsi kstalaninanin Cristo xlamakgasitsi chu alistalh lalinkgo kxlakatin mapakgsinanin. Pero Pablo wa pi “xmakgatsankganankgonita akxni xlamalakgsiyakgo kxlakatin mapakgsinanin”. ¿Tuku xlakata? Wi tuku tlakg nitlan nakitaxtu, nitlan natalichuwinan Dios chu congregación. Xlakata nichuna nakitaxtu, talakaskin nakgalhakgaxmataw tuku wa apóstol: «¿Tuku xlakata ni mastayatit talakaskin nakatlawanikanatit tuku nitlan?» (versículo 7).

Pablo na wa pi Dios kawilinit tiku katsinikgo la lakkaxtlawakan taʼakglhuwit. Wan pi kʼakgatunu congregación wilakgolh lakchixkuwin tiku lakgskgalalan xlakata likgalhtawakgakgo Biblia. Xlikana, lakgkgolotsin xalak congregación kalakgayawakanit tlan “natalakkaxlakgo xnatalan” akxni anan «taʼakglhuwit xla latamat» (versículos 3-5). Jesús na wa pi xlakata tlan natalakkaxtlawa laklanka taʼakglhuwit, la akxni wi tuku nitlan nalalimawakakan xlakata nalalitlawanikan tuku nitlan o akxni nialh laxokgonaniputun, pulaktutu tuku tlan natatlawa. Wa uma tuku pulana xlitatlawat, xakstu natachuwinan tiku takgalhima taʼakglhuwit xlakata nalakkaxtlawakgo xtaʼakglhuwitkan; pero komo ni nalakkaxla taʼakglhuwit, wa uma xlipulaktiy tuku xlitatlawat, natachuwinampara tiku takgalhi taʼakglhuwit pero kxlakatin chatum o chatiy testigos; pero komo chuntiya ni nalakkaxla taʼakglhuwit, xaʼawatiya tlan nakaskini lakgkgolotsin xalak congregación namakgtayakgo nalakkaxtlawa uma taʼakglhuwit (Mateo 18:15-17).

Xlikana, lakgkgolotsin xalak congregación ni abogados, ni kawanikgo natalan la xlitlawatkan negocios. Na ni kawanikgo la nalakkaxtlawakgo xtaʼakglhuwitkan nema kgalhikgo chatiy natalan xlakata akgtum negocio. Pero kamakgtayakgo natalan natlawakgo tuku wan xtastakyaw Biblia, nalakkaxtlawakgo xtaʼakglhuwitkan chu alistalh ni nalasitsini. Komo lu tuwa lakkaxtlawakan taʼakglhuwit max nakgalhskinkgo superintendente de circuito o ksucursal xla xTatayananin Jehová. Pero, wilakgolh taʼakglhuwit nema xtastakyaw Pablo ni makgtayanan tlan nalakkaxtlawakan. Kaʼakxilhwi makgapitsi.

Akxni tiku malakgsiyanan ni wamputun pi kaj tlawaniputun tuku nitlan achatum. Max chuna tlawa xlakata chuna wan limapakgsin o xlakata liwana natalakkaxtlawa taʼakglhuwit. Makgapitsi liʼakxilhtit, akxni max wi tiku nalakxtlawaputunkgo xtamakgaxtokgatkan, akxni xatse o xatlat natatamakgxtakgputun xkamanan, akxni lamakgxtakga xatlat chu xatse, xatlat namastatilha tuku nakalikuentajtlawakan xkamanan, namatajinan akgtum seguro, akxni akgtum empresa makgasputa xtumin chu tiku xtaskujma ama empresa naxokgonikan tuku lakgchan, o liwana namatlawinan escritura akxni wi tuku namaxkikan. Chatum kstalanina Cristo na tlan namalakgsiyanan akxni namalakgsiyakan.a

Akxni chatum kstalanina Cristo malakgsiya tiku tlawanilh tuku nitlan, ni lakatsala tastakyaw nema Dios matsokgwilinilh Pablo, pero ni malakgsiya kaj xlakata natalatlawaputun.b Kalakapastakwi pi tuku tlakg xlakaskinka akxilhaw wa namasantujliyaw xtukuwani Jehová, ni naʼanan taʼakglhuwit chu makxtum natawila congregación. Kstalaninanin Cristo litalakgapasaw tapaxkit, uma tapaxkit «ni wa mputsay wantu nkaj xakstu nalakgtaxtuy» (1 Corintios 13:4, 5; Juan 13:34, 35).