Tuku masiya Tamapakgsin: La kamasiyanikan xlakskujnin Tamapakgsin

WIX lipaxuwaya tiku mastama takgalhchuwin kplataforma; chatum tala xalak congregación tiku mastama xapulana xtaʼakgchuwin kʼakgtum lanka tamakxtumit. Akxni kgaxpatniya, kaks lilakawana xlakata la xkachikin Dios kamakgalhtawakgekan. Lakapastaka akxni mastalh xapulana taʼakgchuwin, chu la uku akxilha la xlilhuwa katsininit. Tlakg katsinilh akxni kilalh kʼEscuela xla Precursor chu nina makgas xpuskat chu xla kilakgolh kʼEscuela xla Tiku lichuwinankgo xTamapakgsin Dios. Akxni makgapakgxnankan xlakata lu tlan taʼakgchuwin mastalh uma tala, wix kaʼakxilha tiku na anta wilakgolh chu lakpuwana la kamasiyanikan xkachikin Dios.

Biblia xlichuwinanit pi xʼama chan kilhtamaku pi uma kachikin «Jehová [...] nakamasiyani» (Is. 54:13). Chu la uku lamaw kʼuma kilhtamaku. Ni kaj kinkalimasiyanikanan likgalhtawakga na kinkamasiyanikanan ktamakxtumit, klaklanka tamakxtumit chu klhuwa escuelas nema lakkaxwilikanit xlakata natlawayaw akgtum taskujut kxkachikin Jehová. Kʼuma xlipulakkitsis naʼakxilhaw la putum tuku kinkamasiyanikanan liwana kinkalimasiyaniyan pi xTamapakgsin Dios mapakgsinama la uku.