Rahab kamatsekga skgalananin

Akxni skgalananin xalak Israel ankgolh kkachikin Jericó tamakgxtakgkgolh kxchik chatum puskat xwanikan Rahab. Akxni mapakgsina xalak Jericó katsilh, kamalakgachalh soldados kxchik Rahab. Xla kamatsekgli uma chatiy skgalananin xʼakgstin kxchik chu kawanilh soldados pi alakatanu xputsakgolh skgalananin. Alistalh Rahab kawanilh skgalananin: “Nakkamakgtayayan xlakata kkatsi pi Jehová katawilan chu nakamaxkiyan uma tiyat. Katlawatit litlan kakiwanitit pi nalakgmaxtuyatit kifamilia”.

Skgalananin wanikgolh Rahab: “Komo nachiwakaya kgantum xaspinini tasiw kmiventana kkawaniyan pi nitu katikaʼakgspulalh tiku tanumakgolh nawan kminchik. Chuna mifamilia nitu katilanikgolh”.

Rahab kamakgtayalh skgalananin nalitaktakgo kgantum tasiw kxventana xlakata nataxtukgo kJericó. Skgalananin tatsekgkgolh kkasipijni akgtutu kilhtamaku chu alistalh lakgankgolh Josué. Alistalh, israelitas patakutkgolh kgalhtuchokgo Jordán chu takaxkgolh xlakata namalanankgo kʼuma tiyat. Jericó wa xapulana kachikin nema xʼamakgo xʼakgchipakgo. Jehová kalimapakgsilh pi xtlawankgolh xlimakgstilili kachikin makgtum akgatunu kilhtamaku. Chu chuna tlawakgolh akgchaxan kilhtamaku. Xliʼakgtujun kilhtamaku makgtujun tlawankgolh xlimakgstilili kachikin. Alistalh sacerdotes tlakgkgolh xtrompetaskan, chu soldados israelitas pixlanka chuwinankgolh. Chu xpatsaps kachikin talaktilh. Maski xchik Rahab xwi kxpatsaps uma kachikin, nitu lanilh. Rahab chu xfamilia lakgtaxtukgolh xlakata xla lipawa Jehová.