Masputukan Jerusalén

Kachikin Judá makglhuwa makgxtakgkgolh Jehová chu xkakninanikgo nixaxlikana dioses. Umakgolh kata, Jehová xkamakgtayaputun chu kamalakgachanilh lhuwa palakachuwinanin. Pero latamanin ni kuenta xkatlawanikgo chu xkalikgalhkgamanankgo. Jehová xmasputuputun takaknin xla ídolos. ¿La xʼama tlawa?

Xmapakgsina Babilonia, Nabucodonosor, xkaʼakgchipatilha akgatunu kachikinin. Xapulana akxni akgchipalh Jerusalén, kachipalh mapakgsina Joaquín, príncipes, soldados chu tiku katuwa tuku xkatsinikgo tlawakgo chu kalilh kBabilonia. Na kalilh tuku laklanka xtapalh xalak xtemplo Jehová. Alistalh, Nabucodonosor, laksakli Sedequías xlakata xmapakgsina Judá xwa.

Xapulana, mapakgsina Sedequías xkgalhakgaxmata Nabucodonosor. Pero nixaxlikana palakachuwinanin chu latamanin xalak lakatsu kachikin xwanikgo Sedequías pi xlakatakilh Babilonia. Jeremías wanilh: “Komo nalakatakinana, lhuwa tiku nanikgo, naʼanan tatsinkstat chu tajatat kJudá”.

Akxni xtitaxtunita akgtsayan kata, mapakgsina Sedequías lakatakilh Babilonia, pero skilh xtamakgtay xsoldados Egipto. Ama kilhtamaku, Nabucodonosor malakgachalh xsoldados xlakata xtalachipakgolh Jerusalén. Soldados xalak Babilonia xwilakgo lakatsu kkachikin. Jeremías wanilh Sedequías: “Jehová wan pi komo natamakamastaniya Babilonia, wix chu kachikin nalakgtaxtukgo. Pero komo ni natamakamastaya, xlakan nalhkuyukgo Jerusalén chu nachilinkgoyan”. Sedequías kgalhtinalh: “¡Ni ktitamakamastalh!”.

Akxni titaxtulh akgtum kata a itat, babilonios malakanikgolh xpatsaps Jerusalén. Anta laktanukgolh kkachikin chu lhkuyukgolh. Na lhkuyukgolh templo, kamakgnikgolh lhuwa latamanin chu lhuwa mil kachilinkgolh.

Sedequías tsalataxtulh kJerusalén, pero babilonios putsastalanikgolh, chipakgolh lakatsu kJericó chu linikgolh mapakgsina Nabucodonosor. Mapakgsina maʼakxilhnilh Sedequías la xkamakgnimaka xkamanan. Alistalh, lakgaxokgo tlawalh chu tamaknulh kpulachin. Anta nilh Sedequías. Pero Jehová malaknunilh kachikin Judá: “Akxni natitaxtu 70 kata, nakkamaspitparayan kJerusalén”.

¿Tuku xʼama kaʼakgspula lakgkgawasan tiku xkalinkanit kBabilonia? ¿Chuntiya ni xʼamakgo makgxtakgkgo Jehová?