Jesús katasiyanilh skitinanin

Akxni xtitaxtunita kilhtamaku lata Jesús xkatasiyaninit xʼapóstoles, Pedro alh skitinan kpupunu xalak Galilea. Tomás, Santiago, Juan chu amakgapitsin kstalaninanin Jesús stalanikgolh. Pero tantaskaka nitu chipakgolh.

Lichali, lu tsisa, akxilhkgolh chatum chixku tiku xya kplaya. Lata niku xyacha kakgalhskilh: “¿Chipatit skiti?”. Xlakan kgalhtinankgolh: “Ni”. Chixku kawanilh: “Kamakapitit mintsalhkan o tuku lichipayatit skiti kminpakgastakatkan”. Akxni xmakankgonita, tsalh litatsamalh lhuwa skiti asta nila xmawakakgo kbarco. Kaj xalan, Juan akxilhli pi uma chixku wa Jesús chu wa: “¡Wa Malana!”. Pedro tunkun tajulh kchuchut chu paxtawakatnalh asta kxkilhtun. Amakgapitsi kstalaninanin Jesús kbarco minkgolh.

Akxni chankgolh kxkilhtun pupunu, akxilhkgolh lhkuyat. Anta xlakni lhkuyat xwi skiti chu kaxtalanchu. Jesús kaskinilh pi xliminkgolh makgapitsi skiti xlakata xmakchakgolh. Chu kawanilh: “Katantit wayanatit”.

Akxni xwayankgonita, Jesús kgalhskilh Pedro: “¿Tlakg kimpaxkiya nixawa umakgolh skiti?”. Pedro kgalhtilh: “Chuna, Malana, wix katsiya pi kpaxkiyan”. Jesús wanilh: “Kakamawi kiborregos”. Amakgtum, Jesús kgalhskilh: “Pedro, ¿kimpaxkiya?”. Pedro kgalhtilh: “Malana, wix katsiya pi kpaxkiyan”. Jesús wanilh: “Kakakuentajtlawa laktsu kiborregos”. Jesús xlimakgtutu watiya kgalhskimpa. Pedro lu lilipuwa chu kgalhtilh: “Malana, wix putum katsiya. Katsiya pi kpaxkiyan”. Jesús skinilh: “Kakamawi laktsu kiborregos”. Chu alistalh wanilh: “Chuntiya kakistalani”.