Tekgskgonit tuku tlakg tlan

WILAKGOLH lhuwa kstalaninanin Cristo tiku ni tlawakgo talakgatankuwit, o navidad. ¿Lakpuwankgo pi nitlan tuku laksakkgonit? ¿Wi tuku lakapastakkgo xlakata uma paskua? ¿Lakpuwankgo pi xkamanankan makgatsankgamakgolh tuku tlan? Kaʼaxilhwi tuku wankgo makgapitsi xtatayananin Jehová xla lakalhuwa kachikinin.

Lakapastakkan Jesús. «Akxni nina xtatayana Jehová xaklitaxtu ni lu xakkan kpusikulan. Kaj xakan akxni xtlawakan talakgatankuwit o pascua, pero ni ankgalhin. Pero nipara ama kilhtamaku xaklakapastaka Jesús. La uku nialh ktlawa talakgatankuwit, makgtiy akgatunu semana katatamakxtumi kincongregación chu kkamasiyani amakgapitsi latamanin tuku wan Biblia xlakata Jesús.» (EVE, AUSTRALIA.)

Mastakan tamaskiwin. «Lu kpaxuwa akxni kimaskiwikan tuku ni kkgalhkgalhima. ¡Lu klakgati tamaskiwin! Na lu klakgati ktlawa tarjetas chu dibujos xlakata nakkamaskiwi amakgapitsin. Chuna xlakan na paxuwakgo Chu akit nachuna.» (REUBEN, IRLANDA DEL NORTE.)

Kamakgtayakan tiku lakaskinkgo tamakgtay. «Lu kpaxuwayaw ktlawayaw xliwatkan tiku tatatlakgo. Lakgachunin kaliniyaw kaxtalanchu, xanat o atanu tamaskiwin tuku tlan kamamakgkatsini. Uma tlan tlawakan putum kata.» (EMILY, AUSTRALIA.)

Makxtum tawilakan kfamilia. «Akxni familia makxtum wilakgo kamanan tlakg tlan kalakgapaskgo xnakukun, xtatajkan, xnanajkan chu xnatapuxnimitni. Ni xafuerza ktlawayaw akgtum talismanin o akgtum pascua, kifamiliajkan katsikgo pi kalakgapaxialhnanaw xlakata kapaxkiyaw chu ni xafuerza ktlawayaw.» (WENDY, ISLAS CAIMÁN.)

Putsakan takaksni. «Lhuwa tuku xaktlawa ktalakgatankuwit chu ni xakkgalhi kilhtamaku nakputsa takaksni. Kkatsininit tuku Biblia malaknu xpalakata latamanin, ktekgsnit xaxlikana takaksni. Kkatsi pi kinkamanan nalatamakgo tlakg xatlan kakilhtamaku.» (SANDRA, ESPAÑA.)