TAKGALHSKININ XLAKATA BIBLIA

¿Kgaxmata Dios putum oraciones?

Dios putum kakgaxmatni latamanin maski tanu tanu xalanin (Salmo 145:18, 19). Xtachuwin, Biblia, kinkawaniyan pi kalitachuwinaw tuku akinin lilakgaputsamaw (Filipenses 4:6, 7). Pero, ni lakgati oraciones nema watiya tachuwin wankan. (Kalikgalhtawakga Mateo 6:7.)

Na ni kgaxmata xʼoracioneskan tiku ni kgalhakgaxmatkgo xlimapakgsin (Proverbios 28:9). Akgtum liʼakxilhtit, makgasa, Jehová ni kakgaxmatnilh xʼoracioneskan israelitas tiku xmakgninankgo. Chuna la akxilhaw, xlakata nakinkakgaxmatniyan talakaskin wi tuku kilitlawatkan. (Kalikgalhtawakga Isaías 1:15.)

¿Tuku kilitlawatkan xlakata nakinkakgaxmatniyan Dios?

Komo ni kgalhiniyaw takanajla Dios, ni kintikakgaxmatnin (Santiago 1:5, 6). Liwana kilikatsitkan pi wi chatum Dios chu kinkalilakgaputsayan. Xlakata nakanajlayaw pi lama, talakaskin nalikgalhtawakgayaw xTachuwin, takanajla takilhti tuku katsinikan kxtachuwin. (Kalikgalhtawakga Hebreos 11:1, 6.)

Nachuna kilitlawanitkan oración xliputum kinakujkan chu nataktujuyaw, chuna la Jesús (Lucas 22:41, 42). Wa xlakata, ni nawaniyaw tuku natlawa Dios, wata naliskujaw xlakata nakatsiyaw tuku kinkaskiniyan. ¿La natlawayaw? Nalikgalhtawakgayaw Biblia. Natlawayaw kioracioneskan chuna la lakaskin. (Kalikgalhtawakga 1 Juan 5:14.)