Lu kliskujli xlakata nakmakgxtakga tuku nixatlan

LA XAKLAMA.

Kkata 1949, kintlat makgxtakgli Alemania chu alh latama kʼAustralia xlakata tlan kskujli kminas chu niku tlawakan energía eléctrica. Latamalh akstu kachikin xla Victoria, niku tatamakgaxtokgli kintse. Akit klakachilh kkata 1953.

Ni lhuwa kata titaxtulh, kintse tsukulh katakgalhtawakga Biblia xtatayananin Jehová, wa xlakata kkatsinilh tuku masiya Biblia. Pero kintlat nipara akgtum takanajla xlakgati. Lu nitlan tsukulh likatsi. Kintse lu xpekuani, maski chuna xatsekg xkgalhtawakga Biblia chu lu xlakaskinka xʼakxilha tuku xkatsinima. Akxni kintlat ni xwi kchiki, kintse xkinkamasiyaniyan tuku xkatsinima. Xkinkawaniyan pi Katiyatni akgtum paraíso xʼama wan chu pi lu xatapaxuwan xʼamaw latamayaw komo xtlawaw tuku wan Biblia (Salmo 37:10, 29; Isaías 48:17).

Xlakata la xlikatsi kintlat, ktaxtulh kkinchik akxni xakkgalhi 18 kata. Maski xakkanajla tuku kintse xkimasiyaninit, ni lhuwa xtapalh kli’akxilhli xtamasiy Biblia, wa xlakata ni ktlawalh tuku wan. Ktsukulh kskuja la electricista anta kminas chu ktamakgaxtokgli akxni xakkgalhi 20 kata. Xapulana kintsumat lakachilh akgtutu kata alistalh, chu uma kimalakpuwanilh tuku tlakg xlakaskinka xwanit kkilatamat. Xakkatsi pi Biblia tlan xmakgtayalh kifamilia, wa xlakata ktsukulh katakgalhtawakga xtatayananin Jehová. Pero kimpuskat ni xkakxilhputun xtatayananin Jehová. Akxni kkilalh akgtum tamakxtumit kiwanilh: o namakgxtakga la likgalhtawakgapat Biblia o namakgxtakga uma chiki. Komo ni xakkatsi tuku naktlawa, ktlawalh tuku kiskinilh chu nialh katakgalhtawakgalh xtatayananin Jehová. Alistalh nitlan klimakgkatsilh xlakata kmakgxtakgli tuku xakkatsi pi tlan xwanit.

Akgtum kilhtamaku, tiku xakkataskuja kimakgpuwantinikgolh nakkakxilha pornografía. Lu xaklakgati pero na xakxkajni, chu alistalh nitlan xaklimakgkatsi. Xaklakapastaka tuku xakkatsininit kBiblia chu liwana xakkatsi pi Dios xʼama kimalakgaxokge. Pero akxni tlakg xakakxilha tuku xalimaxana chu xalixkajni, nialhtu xaklimakgkatsi akxni xakakxilha pornografía chu tlakg ktsukulh klakgati.

Akgpuxam kata nema titaxtukgolh tlakg ktamakgatlinilh tuku xkimasiyaninit kintse. Tuku xaktlawa xlimasiya tuku xaklakpuwan. Lu lixkajni xakchuwinan chu lu lixkajnit xakkgalhkgamanan. Nitlan tuku xaklakpuwan xlakata talakgxtumit chu, maski xakkgalhi kimpuskat, xakkatatalakgxtumi atanu lakpuskatin. Makgtum ktalakanulh kʼespejo chu klakpuwa: «Kiʼakstu kixkajnikan». Nialh kiʼakstu xkimpaxkikan wata xkixkajnikan.

Klaktlawalh kintamakgaxtokgat chu lu nitlan kinkitaxtunilh. Wa xlakata ktlawanilh akgtum oración Jehová xliputum kinaku. Ktsukupa klikgalhtawakga Biblia maski xtitaxtunita akgpuxam kata lata xakmakgxtakgnit. Ama kilhtamaku kintlat xninita chu kintse xtatayana Jehová xlitaxtunit.

BIBLIA LAKGPALILH KILATAMAT.

Chuna la xaklin kilatamat chu tuku wan Biblia lu xtalakgpali. Pero liwana xaklakpuwanit nakputsa takaksni nema Dios malaknu kxTachuwin. Klakkaxwililh nialh nakwan lixkajni tachuwin chu nialh lu naksitsi. Na kmakgxtakgli xalimaxana kilatamat, takgaman xlakata tumin, kmakgxtakgli takgachin, chu nialh kkgalhanalh kkimputaskujut.

Tiku xakkataskuja ni xʼakgatekgskgo tuku xlakata lu xaklakgpaliputun kilatamat. Akgtutu kata chuntiya xkimalakpuwanikgo xaktlawapa tuku nitlan. Komo xakkakxilhpara pornografía o lakapala xaksitsi chu lixkajni xakchuwinampara xlakan lu xpaxuwakgo chu xwankgo: «¡Lu tlan Joe tiku xaklakgapasaw taspitpa!». ¡Lu nitlan xkimamakgkatsinikgo umakgolh tachuwin! Xakmakgkatsi pi nitu xaklitaxtu.

Kkintaskujut lu xʼakxilhkan pornografía. Putum kilhtamaku tiku xakkataskuja xlamalakgachanikgo fotos xakapsnat o kcomputadora, chuna la akit xaktlawa xapulana. Akit xakliskujma nakmaxtakga pornografía pero xtasiya pi xlakan xlakaskinkgo pi chuntiya xakakxilhli. Ktachuwinalh xtatayana Jehová tiku xkimakgalhtawakgema xlakata xkimakgtayalh chu xkimakgpuwantinilh, xla kinkgaxmatnilh tuku xakwanima. Limaklakaskilh textos xalak Biblia nema tlan xkimakgtayakgolh chu kimasiyanilh tuku tlan xaktlawalh xlakata xakmakgxtakgli pornografía. Na kimakgpuwantinilh naktlawani oración Jehová xlakata nakskini xtamakgtay (Salmo 119:37).

Akgtum kilhtamaku kkamamakxtumilh tiku xakkataskuja chu, akxni antiya xwilakgo, kkawanilh pi xkamaxkika patiy cervezas chatiy tiku xakkataskujaw chu xakkatsiyaw pi kgotnin xwankgonit. Putum sitsikgolh chu tsukukgolh kinkilhnikgo: «¡¿Tuku xlakata nakamaxkiyaw?! ¡Umakgolh lakchixkuwin makgxtakgputunkgo kuchu!». «Akit nachuna», kkakgalhtilh. Lata ama kilhtamaku akgatekgskgolh pi akit xakliskujma xlakata xakmakgxtakgputun pornografía chu nialhtu kiwanikgolh.

Chuna la titaxtulh kilhtamaku chu xlakata xtamakgtay Jehová kmakgxtakgli pornografía. Xtatayana Jehová klitaxtulh kkata 1999. Lu kpaxtikatsini xlakata kimaxkiparaka talakaskin naklipaxuwa xaskulunku kilatamat.

La uku kʼakgatekgsa tuku xlakata Jehová xkajni tuku akit lhuwa kilhtamaku klakgatilh. Xtachuna la chatum tlat xapaxkina ni xlakaskin pi pornografía xkintlawanilh tuku nitlan. Lu xlikana tuku wan Proverbios 3: 5, 6: «Kalipawanti Jehová xliputum minaku, chu ni wa mintalakapastakni kalipawanti. Xliputum mintiji kuentajkatlawani, chu xla namatsaja mintiji». Xtastakyaw Biblia lu makgtayanankgo; komo nakgalhakgaxmataw tlan nakinkakitaxtuniyan kkilatamatkan (Salmo 1: 1-3).

TUKU TLAN KINKITAXTUNINIT.

Makgasa kiʼakstu xkixkajnikan pero la uku kimpaxkikan chu kkgalhi takaksni. Xaskulunku klin kilatamat chu kmakgkatsi pi Jehová kintapatinit chu kimakgtaya. Kkata 2000 ktatamakgaxtokgli chatum xtatayana Jehová tiku wanikan Karolin. Xla paxki Jehová chuna la akit. Kkintamakgaxtokgatkan anan takaksni. Lu kpaxtikatsiniyaw pi tapakgsiyaw akgtum takanajla nema lilakgapaskan pi xaskulunku chu lalimasiyanikgo tapaxkit.