Niku mastakan xatakgalhtin akgtum takgalhskinin

◼ ¿La tlan nakamakgtayayaw precursores?

Septiembre kata 2008 asta agosto kata 2009, natalan lakchixkuwin chu lakpuskatin skujkgolh la precursores regulares chu especiales xlikalanka katiyatni chu atsinu ni chalh ochocientos mil. Uma natalan mastakgo tuku tlakg tlan kgalhikgo, xkilhtamakujkan, xlitliwakgakan chu tumin nema kgalhikgo xlakata namakatsininankgo xalakwan xalaksasti xla Tamapakgsin (Pro. 3:9). ¡Lu lipaxuwa Jehová xlakata akxilha tuku tlawakgo! Chu akinin, ¿limasiyayaw pi nachuna lakpuwanaw? ¿La tlan nakamakgtayayaw xlakata napaxuwakgo chu chuntiya putum kilhtamaku naskujnikgo Dios?

Pulana, tlan nakawaniyaw tachuwin nema nakamatliwakglha xlakata chuntiya naskujkgo la precursores (Pro. 25:11). Nachuna, max tlan nalakaxwiliyaw kinkilhtamakujkan akgatunu semana xlakata wi tiku nataʼanaw lichuwinanaw Dios. Akxni akxtum katawilaw, tlan nakawaniyaw pi namaklakaskinaw kimputlawkan chu ni xlakan o nakaxokgoniyaw xpasajekan. Chu komo anaw kxputlaw precursor, tlan xlimakgtayaw xla gasolina (1 Cor. 13:5; Fili. 2:4). Na kalimasiyaniyaw pi kapaxkiyaw chu kamakgtayayaw akxni liwana kamakgamakglhtinanaw kkinchikkan chu katawayanaw tiku putum kilhtamaku lichuwinankgo Dios (1 Ped. 4:8, 9).

Biblia liwana kinkawaniyan pi Jehová nakamaxki tuku maklakaskinkgo tiku pulana wilikgo xTamapakgsin (Sal. 37:25; Mat. 6:33). Pulaktum tuku maklakaskin Jehová wa kinatalankan tiku kinkapaxkikgoyan (1 Juan 3:16-18). Xlikana, precursores ni lakpuwankgo pi amakgapitsi nakamaxkikgo tuku maklakaskinkgo. Chu max ni katikawanikgolh natalan pi ni kgalhikgo tuku maklakaskinkgo. Wa xlakata talakaskin kuenta natlawayaw tuku maklakaskinkgo chu wi tuku nakalitamakgtayayaw xlakata “nakalimakgatsiniyaw wa ntu katsankgani” (2 Cor. 8:14, 15).

Akxni Febe alh kRoma, tiku lu lhuwa xlichuwinan Dios xalak congregación xalak pulana siglo, Pablo kawanilh kstalaninanin Cristo xalak ama kachikin: “Ukkamalakgachananiyan [...] kxtukuwini nkinTlatikan namakgamakglhtinanatit wa lantla mininikgoy xlakskujnin Dios, chu na nalimakgtayayatit nkaj xatu kawa ntu xkamaklakaskilh” (Rom. 16:1, 2). Uku, akinin na tlan nakalimasiyaniyaw pi kapaxkiyaw kinatalankan xalak congregación tiku putum kilhtamaku lichuwinankgo xalakwan xalaksasti la precursores regulares chu especiales (Hech. 5:42).