Kalakgatikgolh latamanin la nalichuwinanaw Dios
1. ¿La xmasiyakgo xapuna kstalaninanin Cristo chu tuku kinkamasiyaniyan?
1 Xapulana kstalaninanin Cristo masiyanikgolh xalakwan xalaksasti latamanin maski tanu xtakanajlakan chu tanu la xkamakgastakkanit (Col. 1:23). Maski tema nema xlichuwinankgo, watiya xtamapakgsin Dios, tanu tanu la xkawanikgo latamanin akxni xkatachuwinankgo. Akgtum liʼakxilhtit, akxni katachuwinalh makgapitsi judíos tiku xkanajlakgo xtachuwin Dios, Pedro limaklakaskilh tuku xtsokgnit palakachuwina Joel (Hech. 2:14-17). Anta kHechos 17:22-31 akxilhaw pi tanu la katachuwinalh Pablo tiku griegos. La uku, wilakgolh niku talichuwinan Dios lu xlakaskinka akxilhkan Biblia, chu ni anan taʼakglhuwit komo nakamasiyaniyaw makapitsi textos kxchikkan. Pero akxni nakatekgsaw tiku ni kanajlanikgo Cristo chu Biblia chu ni kgalhikgo xtakanajlakan, wata ni tunkun Biblia nakalitachuwinanaw.
2. ¿La nalimaklakaskinaw likgalhtawakga xla uma papaʼ xlakata nakalimakgtayayaw tiku kanajlakgo tuku wan Biblia chu tiku ni kanajlakgo?
2 Lu kakatsiniw la nalimaklakaskinaw likgalhtawakga nema natamasta. Septiembre asta agosto xliʼakgatiyun papaʼ natalakgpalitilha tuku namakgpitsiyaw, chu natamakgpitsi revistas, tratados chu folletos. Maski latamanin tiku ni katsiputunkgo xlakata Biblia, tlan nakalitachuwinanaw atanu tuku nakatsiputunkgo. Ni nalitachuwinanaw xlakata Biblia chu ni nalikgalhtawakganiyaw texto, pero komo kinkakgaxmatnin kilitaspitatkan xlakata namakgtayayaw nakanajlani Jehová chu xTachuwin. Pero, akxni nakatachuwinanaw latamanin tiku kanajlakgo tuku wan Biblia, tlan nalimaklakaskinaw chu nakamaxkiyaw likgalhtawakga nema lichuwinan xlakata Biblia. Asta tlan nakamaxkiyaw libro ¿Tuku xlikana masiyay Biblia? chu folletos Kakgalhakgaxpatti Dios o Kakgalhakgaxpatti Dios chu nalatapaya putum kilhtamaku maski ni wa tamakgpitsima uma papaʼ. Wantuku tlakg xlakaskinka wa pi kalakgatikgolh latamanin la nakalichuwinanaw Dios.
3. ¿La tatalakxtumi naku niku chananankan?
3 Liwana kalakputsaw la nalichuwinanaw Dios. Xnakujkan latamanin xtachuna niku chananankan (Luc. 8:15). Makgapitsi lakaskinkgo tlakg nakamakgtayakan, xlakata xaxlikana tlakg nastaka kxnakujkan. Xapulana kstalaninanin Cristo lu tlan kakitaxtunilh akxni kamakgxtakgnikgolh kxnakujkan lhuwa latamanin tuku xaxlikana, lu lipaxuwakgolh chu tlan limakgkatsikgolh (Hech. 13:48, 52). Nachuna nakinkakitaxtuniyan komo skgalalh natawilayaw la nalichuwinanaw tuku xaxlikana.