Tuku kililakapastakatkan xlakata asamblea regional
Hora akxni natsuku chu nakgalhsputa tamakxtumit. Kamakgtsayan namalakkikan. Tamakxtumit xaʼakgtutu kilhtamaku nalitsuku tatlakgni 9:20. Akxni nawankan pi natsuku tatlakgni nema nalimatsukikan tamakxtumit naʼanaw tawilayaw xlakata natsuku chuna la xlilat. Viernes chu sábado, max programa nakgalhsputa 5:00 kakgotanun chu domingo, max nakgalhsputa 4:00.
Takilhtlin nema malanki Jehová. Makgasa, xkachikin Dios xlimalankikgo takilhtlin Jehová. La uku, lu xlakaskinka litaxtukgo takilhtlin akxni kakninaniyaw Jehová (Sal. 28:7). Akxni aku natsuku akgatunu sesión wilikan tatlakgni xlakata nakgaxmataw. Uma ni kaj watiya kgaxmatkan; tatlawanit xlakata nakakninaniyaw chu nakatsiniyaw xlakata Jehová. Wa xlakata, akxni nawan tiku pulalima tamakxtumit pi uma tatlakgni natsukuya, kilitawililatkan chu kilikgaxmatatkan, chu nialh kilikgalhchuwinatkan. Chuna limasiyayaw pi xlakaskinka akxilhaw tatlakgni nema tlawakgo orquesta xla Watchtower. Makgtiy akgatunu kata ankgo natalan lakpuskatin chu lakchixkuwin anta kPatterson (Nueva York) xlakata natlawakgo lu stlan tatlakgni nema lipaxuwayaw. Akxni kgaxmatnitawa tatlakgni nema litsuku tamakxtumit chatunu akinin tlan nalimalankiyaw Jehová takilhtlin.
Niku kawilikan putlaw. Ni kintikamaxokgekan niku nawiliyaw putlaw komo anta tapakgsi niku tamakxtumimaw chu chuna la nachintilhakgo putlaw nakakaxwilikan. Xlakata ni anan lhuwa niku nakawilikan putlaw, tlakg tlan xwa kaj akgtum putlaw xlipitit komo natanukgoyatit. Niku makgataxtikanit niku tlan nakawilikan putlaw nema liminkgo tiku nila tlawankgo, kajwatiya putlaw nema kgalhi letrero o placa niku wan pi maklakaskin tiku nila tlawan tlan natamakgxtakga.
Putawilh. Akxni namalakikan, ni nakgosnanaw xlakata naʼanaw tawilayaw niku lakgatiyaw, xtachuna la kaj lalakgatlajaputunaw. Xlakata kapaxkiyaw amakgapitsin tlawa pi pulana nakawiliyaw nixawa akinin. Wa uma kinkalilakgapaskanan pi xlikana kstalaninanin Cristo chu uma tlawa xlakata tiku kinkaʼakxilhmakgon na nakakninanikgo Dios (Juan 13:34, 35; 1 Cor. 13:5; 1 Ped. 2:12). Kajwatiya tiku akxtum kataʼanaw kputlaw o tiku wilakgolh kkinchikkan tlan nakamakgataxtiniyaw niku natawilakgo chu nachuna tiku kamakgalhtawakgemaw. Nitu kawili klaktawilh komo ni namakgataxtiya. Chuna tlakg tlan nakatsikan pi niti wilakgolh anta. Nakamakgataxtikan laktawilh niku natawilakgo tiku linkgoya kata chu tiku tatatlakgo. Xlakata ni lhuwa anan umakgolh laktawilh wa xlakata nila nakatatawilakgo putum xfamilia. Katlawa litlan, kakamakgxtakgni uma laktawilh tiku linkgoya kata chu tiku tatatlakgo chu tiku kakuentajtlawakgo.
Lakatitum nalhakgananaw. Tuku nalhakgayaw akxni naʼanaw ktamakxtumit lakatitum xliwanat chu tlan xlitasiyat chu ni nalhakgananaw la lhakganankgo latamanin xalak kakilhtamaku (1 Tim. 2:9). Nachuna, ni nalhakgananaw la komo kaj paxialhnamaw o ni lixkajni xliwanat kintalhakgankan, asta akxni nachanaw khotel o akxni nataxtuyaw khotel chu maski ni ktamakxtumit natawilayaw. Chuna tlan nalimakgkatsiyaw pi linaw tarjeta xla solapa chu ni katimaxanaw akxni nalichuwinanaw Dios. Xlakata lu tlan natasiyayaw chu tlan nalikatsiyaw kʼasamblea regional, ni kajwatiya nalakgatikgo latamanin tiku katsiputunkgo tuku wan Biblia, wata na namakgapaxuwa Jehová (Sof. 3:17).
Teléfonos o atanu. Komo lakpuwanita pi nalipina akgtum teléfono o atanu, kalakkaxwiliw xlakata ni nakamalaktlawi tiku kgaxmatmakgolh taʼakgchuwin. Komo namaklakaskina cámara, video, tableta o atanu, kuenta katlawa xlakata ni nakamalaktlawiya tiku kgaxmatmakgolh o nakamalakgapatsekgaya. Xlakata nakamaxkiya kakni amakgapitsin, ni kamalakgacha mensajes o correos akxni wila ktamakxtumit komo ni natalakaskin.
Taway. Tlakg tlan nalinaw tuku nawayaw chu ni naʼanaw tamawayaw tastunut. Tlakg tlan komo xaʼaktsina tuku napulipina miliwat nema tlan natamaknuya xtanpin laktawilh. Anta ktamakxtumit ni mastakan talakaskin xalanka tuku napulinaw kiliwatkan chu na ni nalinaw tuku litatlawanit vidrio.
Tumin nema xatapaxuwan tamaskiwinan. Tlan nalimasiyayaw pi paxtikatsiniyaw taway xaʼespiritual xlakata kintakanajlakan akxni xatapaxuwan mastayaw tumin xlakata taskujut nema tatlawa xlikalanka katiyatni, anta klanka tamakxtumit. Wantiku namastakgo cheque nawilikgo pi wa maxkimaka «La Torre del Vigía, A.R.». Kmakgapitsi tamakxtumit na tlan namaklakaskina mintarjeta de débito o de crédito.
Likuchun. Komo wix waya likuchun nema maxkin makuchina kalipi ktamakxtumit nema nalimaklakaskina, xlakata ni katimaxkika ktamakxtumit. Komo wix diabético chu maklakaskina agujas chu jeringas, liwana kamakgchi akxni namakgana xlakata max wi tiku nitlan tuku naliʼakgspula. Ni kamakganti niku wilimaka basura ktamakxtumit o anta kʼhotel.
Kuenta katlawaw xlakata nitu nakinkaʼakgspulayan. Lu xlakaskinka xlakata ni nalitatantuxlitaw, o naliʼakgchakgxaw kintatunukan. Kata kata nitlan tuku kaliʼakgspula, kaj xtatunukan xlakata lu laktalhmanin linkgo. Tlakg tlan nalinaw tatunu chuna la xlilat, xlakata tlan kaniwa nalitlawanaw krampas, kʼescaleras, niku wilakgolh rejillas o alakatanu.
Tiku ni liwana kgaxmatkgo. Kmakgapitsi tamakxtumit tuku nalichuwinankan namatitaxtikan kradio (FM). Xlakata tlan nakgaxmata, talakaskin nalipina akgtum aktsu radio nema limaklakaskin pilas chu audífonos.
Tuku kalilinkan lakgskgatan nema kgalhi xllanta chu sillas nema tlan talakgxtu. Niti nalin ktamakxtumit tuku kalilinkan lakgskgatan nema kgalhi xllanta chu sillas nema tlan talakgxtu. Kajwatiya tlan linkan sillas nema tlan chiwilikan klaktawilh.
Perfumes. Lhuwa tamakxtumit katlawakan niku putum talakchuwanit chu kgalhikgo aire acondicionado. Wa xlakata limasiyayaw pi paxkinanaw akxni ni wiliyaw lhuwa perfume nema lu takgankgawanan nema max natlawa pi amakgapitsin nalitatatlakgo o nitlan nalimakgkatsikgo (1 Cor. 10:24).
Restaurantes. Akxni limasiyayaw tlan tayat krestaurantes malankiyaw xtukuwani Jehová. Liwana kalhakgananti, chuna la xlilhakganat chatum kstalanina Cristo. Komo talismani namastakan propina, kamakgxtakgti chuna la xlilat.
Hoteles:
Ni kaskinti cuartos nema ni namaklakaskina chu ni kamasta talakaskin tlakg natamakgxtakgkgo, kajwatiya tiku chuna la wankanit.
Kajwatiya komo xlikana nila katipi kawanti pi nialh namaklakaskina akgtum cuarto chu tunkun kamakatsininanti khotel (Mat. 5:37). Komo chuna natlawaya, katsokgwili número nema namaxkikana xlakata nialh katimaklakaskinti. Komo nawana pi nialh katimaklakaskinti chu kaj 48 horas tsankga natsuku asamblea, nialh katimaxkika mintumin nema xlixokgonita.
Milikatsit pi komo maklakaskina tarjeta de crédito o débito akxni naskina cuarto, hotel namakglhtiyan tsinu mintumin xlakata nalixokgoniya tuku namaklakaskina kcuarto, o komo wi tuku nalani cuarto akxni anta natawilaya. Wix tlan nalimaklakaskimparaya uma tumin akxni natitaxtukgo makgapitsi kilhtamaku.
Kalipi tuku pulinkan maletas akxni pinpata maklakaskina chu tunkun kamaspitti xlakata tlan atanu tiku nalimaklakaskin.
Komo chuna talismaninit, kamaxki propina tiku natalinan mimaleta chu chali chali kamakgxtakgni propina tiku kaxaka mincuarto khotel.
Kajwatiya natlawaya liwat kcuarto niku mastakan talakaskin.
Ni kalipi liwat, café o hielos nema maskiwinankan akxni wila khotel anta ktamakxtumit.
Xliputum kilhtamaku kalimasiya lakwan tayat chuna la nakalikatsiniya tiku skujkgo khotel. Kalakapastakti pi lhuwa tiku wilakgolh khotel chu lhuwa taskujut kgalhikgo, wa xlakata napaxtikatsinikgo komo akinin ni lhuwa tuku nakaskiniyaw, tlan nakalikatsiniyaw chu ni nakasitsiniyaw.
Lu xlakaskinka pi natlatni nakuentajtlawakgo xkamanan akxni natawilakgo khotel, tuku kilhchani niku wi ascensores, piscina, niku putum chinkgo chu gimnasio.
Kkapsnat niku tatsokgnit Tukuya hoteles tlan natamakgxtakgaw wilikanit la naxokgoyaw chali chali, chu tanu naxokgoyaw impuestos. Komo tlakg namaxokgekana tuku wix nitu skinpat ni kaxokgo, tunkun kamakatsini Departamento tiku Putsakgo niku tlan Natamakgxtakgkgo natalan.
Komo nakgalhiya taʼakglhuwit khotel, tunkun kamakatsini Departamento tiku Putsakgo niku tlan Natamakgxtakgkgo natalan.
Tiku xatapaxuwan skujputunkgo. Putum tiku makgtayananputunkgo kaʼalh kDepartamento xlakata tiku Xatapaxuwan Skujputunkgo. Tiku nina kgalhikgo 16 kata na tlan namakgtayanankgo, pero wa xnatlatnikan tiku kakuentajtlawakgo o chatum tiku nakalakgayawakgo xnatlatnikan.