Tuku katsiputunkgo tiku likgalhtawakgakgo

¿Tiku policías xlitaxtukgo ktemplo, chu tuku xtlawakgo?

Makgapitsi levitas tiku ni sacerdotes xwankgonit lhuwa taskujut xtlawakgo ktemplo, la komo policías xlitaxtukgo. Wa xkakuentajtlawa tiku xpulalin templo. Tsokgna Judío tiku wanikan Filón lichuwinalh tuku taskujut xtlawakgo: «Makgapitsin xtawilakgo kmalakcha chu kuenta xtlawakgo niku xlaktanukan, makgapitsi xtawilakgo kxpulakni, kxlakatin santuario, xlakata xkamalakgachokgokgolh tiku ni xlitanutkan xwanit, makgapitsin xkuentajtlawakgo kxpulakni xakatsisni chu xakakuwani, chuna la xkalakgchantilha».

Umakgolh policías xkaskujnanikgo tiku xmakgtapakgsikgo kSanedrín. Mapakgsina xalak Roma kajwatiya umakgolh judíos xkamaxki talakaskin nalinkgo tuku xlimakgninankan.

Joachim Jeremias, chatum chixku tiku lakputsanani Biblia, lichuwinan pi «kalilakawanilh Jesús xlakata chali chali xtawila ktemplo xlakata namasiya, pero ni chipakgolh». Uma nixlikana xwa komo «ni xtichipakgolh policías xalak templo» (Mat. 26:55). Watiya uma chixku lichuwinan pi tiku xchipaputunkgo Jesús wa policías xalak templo xwankgonit (Juan 7:32, 45, 46). Titaxtulh kilhtamaku, tiku xkapulalin chu policías kalimapakgsika pi xkalinkgolh kstalaninanin Jesús kxlakatin Sanedrín. Max watiya umakgolh policías tiku chipakgolh Pablo kxkilhtin templo (Hech. 4:1-3; 5:17-27; 21:27-30).