Tuku katsiputunkgo tiku likgalhtawakgakgo

¿Kajwatiya tuku lichuwinan Gálatas 5:22, 23 «xtatlaw espíritu»?

Umakgolh versículos lichuwinan pulaknajatsa tayat nema xlikgalhit kstalanina Cristo. Texto wan: «Xtatlaw espíritu wa: tapaxkit, tapaxuwan, takaksni, lu kgalhkgalhinankan, tlawakan tuku tlan, tlan talikatsit, takanajla, ni lakapala sitsikan, machokgo tuku [...] tlawaputun». Pero ni kajwatiya uma tayat nema tlawa pi xʼespíritu Dios nakinkamakgtayayan nalimasiyayaw.

Kaʼakxilhwi tuku tsokgwililh apóstol Pablo kxapulana versículos: «Xtatlaw makni [...] wa talakgxtumit nema ni xlitatlawat, tuku xalixkajni, tlawakan tuku xalixkajni chu ni lilakamaxanankan, kakninanikan ídolos, taskuwan, ni tlan latalalinkan, lalakakilhnikan, talakgsitsi, tasitsi, ni akxtum nalakpuwankan, tapapitsit, nixaxlikana tamasiy, lakgsitsilakankan, takgachin, akglakgwa paskua, chu tuku xtachuna la uma» (Gál. 5:19-21). Wa xlakata, Pablo tlan xtilichuwinalh atanu tuku makgtanuma «xtatlaw makni» xtachuna la tuku lichuwinalh kColosenses 3:5. Nachuna kitaxtu xlakata pulaknajatsa xatlan tayat nema lichuwinalh Pablo kʼGálatas 5:22, 23. Kʼumakgolh tayat, ni putum xlichuwinama tayat nema tlan kgalhiyaw xlakata xtamakgtay espíritu santo.

Chuna wanaw xlakata tamalakxtumiyaw tuku lichuwinan Gálatas chu tuku katsokgnanilh Pablo congregación xalak Éfeso: «Lilatamakan xkgakganat kilhchanima ankgalhin tlan nalikatsiya, xalakatitum chu xaxlikana nalatapaya» (Efes. 5:8, 9). Chuna la akxilhaw, «tlan likatsikan» na makgtanuma «lilatamakan xkgakganat», pero nachuna makgtanuma «xtatlaw espíritu».

Nachuna, Pablo makgpuwantinilh Timoteo nakgalhi pulakchaxan tayat: «Xaʼakgstitum latamat, chu lantla akgstitum kaknina nawana, chu ntakanajla, chu ntapaxkit, chu ntapaxuwanaliyan, chu lantla xasmalhwa nawana» (1 Tim. 6:11). Kajwatiya uma pulaktutu: takanajla, tapaxkit chu xasmalhwa nawana na anta makgtanumakgo «xtatlaw espíritu». Pero Timoteo nachuna xʼama maklakaskin pi xpulalilh espíritu santo xlakata nalimasiya amakgapitsi tayat nema Pablo lichuwinalh: xaʼakgstitum likatsikan, kakninanikan Dios chu tayanikan (katamalakxtupi Colosenses 3:12; 2 Pedro 1:5-7).

Wa xlakata, Gálatas 5:22, 23 ni putum lichuwinan tayat nema kstalaninanin Cristo tlan nakgalhiyaw xlakata xtamakgtay xʼespíritu santo Dios. Uma tlan nakinkamakgtayayan nalimasiyayaw uma pulaknajtsa «xtatlaw espíritu». Pero anan atanu tayat nema tlan nakgalhiyaw xlakata tlakg tlan kstalaninanin Cristo nawanaw chu nalilhakgananaw «xasasti tayat nema tlawaka chuna la xtalakaskin Dios, xaʼakgstitum chu ni makgxtakgnan» (Efes. 4:24).