Tuku katsiputunkgo tiku likgalhtawakgakgo

¿Tuku xkilhchanima Pablo akxni wa pi xlakachinit «akxni nina xlakgchan xkilhtamaku»? (1 Corintios 15:8)

Chuna la wan 1 Corintios 15:8, Pablo wa: «Xaʼawatiya na kintasiyanilh akit, wa xlakata klitaxtu chuna la chatum skgata tiku lakachinit akxni nina xlakgchan xkilhtamaku». Unu Pablo xlichuwinama akxni maʼakxilhnika lilanka nema kgalhi Jesús anta kʼakgapun. Makgasa xwanaw pi xtachuna la komo xmaxkikanit talakgalhaman nalakachimpara o nalakastakwanan klatamat xaʼespiritual akxni nina xlakgchan xkilhtamaku, akxni akglhuwa ciento kata xtsankga xlakata xtsukuka kamalakastakwanikan tiku xʼamakgo latamakgo kʼakgapun. Pero akxni tlakg liwana klakputsananiw uma versículo, kakxilhwi pi xlakaskinka nalakgpaliyaw chuna la xaklichuwinanaw xapulana.

Xlikana pi kʼuma versículo Pablo xlichuwinama tuku lalh akxni talakgpalilh. Pero ¿tuku xwamputun akxni wa pi “lakachilh akxni nina xlakgchan”? Max pulaklhuwa tuku xlakata chuna wa.

Kaj xalakapala chu kaj xalan talakgpalilh xlatamat. Makglhuwa, tiku lakachin akxni nina lakgchan kaj xalan chuna la. Akxni Saulo, tiku alistalh lilakgapaska Pablo, xʼama kxtiji Damasco xlakata nakaputsastalani kstalaninanin Cristo xalak ama kachikin, ni xlakpuwanit pi xʼama tasiyani Jesús tiku xlakastakwananita. Talakgpalit nema Pablo tlawalh ni kajwatiya xla kaks malakawanilh, nachuna putum kstalaninanin Cristo tiku xʼama kaputsastalani kDamasco. Nachuna, uma tuku titaxtulh lu kaks malakawanilh chu asta nialh lakawanalh makgapitsi kilhtamaku (Hech. 9:1-9, 17-19).

Talakgpalilh xlatamat kilhtamaku «akxni nina xlakgchan». Traducción Kadosh Israelita Mesiánica de estudio chuna matitaxti: «Klakachilh kilhtamaku akxni nina xlakgchan». Akxni Pablo lakgpalilh xlatamat, Jesús xtaspitnita kʼakgapun. Makgapitsi tiku xkalichuwinanit Pablo kʼumakgolh versículos, xʼakxilhkgonit Jesús akxni xlakastakwananita chu nina xʼan kʼakgapun pero Pablo nina xʼakxilhnit (1 Cor. 15:4-8). Akxni Jesús tasiyanilh Pablo maxkilh talakaskin naʼakxilha, maski xtasiya pi «nina xkilhtamaku xwanit».

Xʼakstu xlichuwinamaka pi nila putum tlan xtlawa. Chuna la wankgo makgapitsi especialistas, tachuwin nema maklakaskilh Pablo kʼuma versículo xlitaxtu la komo xʼakstu nitlan xlichuwinamaka. Komo chuna, Pablo xlimasiyama pi ni xlakgchan apóstol nalimapakuwikan. Wa xlakata wa: «Xliputum apóstoles akit tlakg ni xlakaskinka klitaxtu, chu ni kiminini apóstol nakilimapakuwikan, xlakata kputsastalanilh xcongregación Dios. Pero tlan ktlawa uma taskujut xlakata Dios kilimasiyanilh talakgalhaman nema ni anan xtachuna» (1 Cor. 15:9, 10).

Wa xlakata, Pablo xkilhchanima akxni kaj xalan o xalakapala tasiyanilh Jesús, kilhtamaku akxni nina xlakgchan natalakgpali o xlakata ni xlakgchan natasiyanikan. Maski chuna lalh o ni, tuku titaxtulh lu xlakaskinka wa xpalakata. Chuna limasiyalh Jesús pi xlakastakwananita. Wa xlakata makglhuwa xlichuwinan tuku xtitaxtunita akxni xkalitachuwinan amakgapitsin xlakata xtalakastakwanat Jesús (Hech. 22:6-11; 26:13-18).