¿Xkatsiyata?

¿Niku xmakankgo sacerdotes xkgalhni animales nema xmakamastakgo ktemplo kxapulana siglo?

KXAMAKGAN kachikin Israel, sacerdotes xmakamastakgo lhuwa mil animales akgatunu kata kpumakamastan nema xwi ktemplo. Historiador Josefo, tiku latamalh kxapulana siglo, wa pi akxni xtlawakan Pascua xkamakgnikan liwaka 250,000 borregos. Uma limasiya pi xtamakgan lhuwa kgalhni (Lev. 1:​10, 11; Núm. 28:​16, 19). ¿Niku xmakankan putum uma kgalhni?

Tuku arqueólogos tekgskgonit limasiya pi templo nema xlakkaxtlawanit Herodes, liwana xtlawanikanit niku xlaktamakxtukan chuchut. Chu wa uma tuku xlimaklakaskinkan xlakata xchakgetamakxtuka kgalhni ktemplo. Uma templo maklakaskinka asta kkata 70, akxni malakgsputuka.

Kalichuwinaw pulaktiy tuku xtlawakan xlakata templo xaskulunku xtawi:

• Klhukikanit pumakamastan. Maktum xamakgan libro nema lichuwinan xlimapakgsinkan chu xtalismaninkan judíos nema tsokgwilika akxni xtitaxtunita kata 200 nachuna lichuwinan tuku wankgo arqueólogos. Libro lichuwinan pi kxchastun pumakamastan lakatiy niku xtalhukinit. Xkgalhni animales nema xkamakamastakan lakxtum xtala chuchut nema xlikachakgekan kpumakamastan chu anta xlaktaxtu. Uma xtajuyacha kxtiji chuchut nema xkichan kxakaxtum Cedrón. Maktum xasasti libro nema lichuwinan xlakata judíos na watiya tuku lichuwinan xlakata xtiji chuchut nema arqueólogos tekgskgonit. Xlakata tuku tekgskgonit, xlakan wankgo pi niku klhukikanit pumakamastan xmaklakaskinkan xlakata xlaktamakxtuka kgalhni.

• Xʼanan lhuwa chuchut. Sacerdotes xmaklakaskinkgo lhuwa chuchut xlakata skulunku xmakgxtakgkgolh pumakamastan chu niku xlaktamakxtukgo kgalhni. ¿Niku xtiyakgo chuchut? Xkikilhtiyakgonit kkachikin. Liwana xtlawanikgonit xtiji, wi niku xmaʼakgstokgwilikgo chu xlakkaxwilikgonit la xmalakgatumikgolh. Arqueólogo Joseph Patrich, wan: «Ni xʼanan atanu templo makgasata nema lu liwana xlakkaxwilinikanit la xkgalhikgolh chuchut, skulunku xtawilakgolh chu xkgalhikgolh niku xlaktamakxtukgolh xalixkajni chuchut».