Jehová kinkamakgtayan nakstakaw niku kinkachankan

Mats chu Ann-Catrin kilakgolh kʼEscuela de Galaad kkata 1979, chu chuna la titaxtunit kilhtamaku, lakalhuwa países niku kamalakgachakanit xlakata namakgtayanankgo chuna la kʼIrán, kMauricio, kMyanmar, kTanzania, k’Uganda chu kZaire. Chatum makgalhtawakgena xla Galaad, Jack Redford, wa tiku kamaxkilh tastakyaw pi kstakkgolh niku xkachanka. Chu uma lu kamakgtayanit, xlakata ni kajwatiya makgtum kachanka, wata makglhuwa xtachuna la xkamatikutuka chu xkachanka alakatanu. Mats chu Ann-Catrin nakinkalitachuwinankgoyan tuku titaxtukgonit.

Pulana kakilalitachuwinaw, ¿la lakgapastit xaxlikana?

Mats: Kintlat xlama kPolonia akxni xlama xliʼAkgtiy Guerra xLikalanka Katiyatni, chu akxilhli pi kpusikulan ni xmasiyakan tuku xaxlikana chu xlakgaputiyunankgo. Maski chuna, xla xwan: «Kkatsi pi anan xaxlikana takanajla». Titaxtulh kilhtamaku kkatsilh pi xlikana tuku xwan. Akit xaklakgati xakkatamawa libros nema xlimaklakaskinkanita, chu akgtum kilhtamaku ktamawalh maktum libro xaspupuku nema xwanikan La verdad que lleva a vida eterna. Lu klakgatilh xtítulo, chu ktsukulh likgalhtawakga. Watiya uma tsisni klikgalhtawakgakgolh maktuminika. Akxni xkgakgalh, kkatsilh pi xaktekgsnit xaxlikana.

Lata abril kata 1972 klikgalhtawakgalh atanu likgalhtawakga nema xtlawakgonit xtatayananin Jehová chu ktekgsli xtakgalhtin takgalhskinin nema xakkgalhi xpalakata Biblia. Kmakgkatsilh pi xaklitaxtu xtachuna la chatum stana nema lichuwinalh Jesús, tiku tekgsli akgtum perla nema lu lhuwa xtapalh xwanit chu stalh putum tuku xkgalhi xlakata tlan xtamawalh. Xlakata akit tlan xaktamawalh xaxlikana nema xtachuna la «perla» xwanit, talakaskilh pi xakmakgxtakgli kintakgalhtawakga kʼuniversidad xlakata akit makuchina xaklitaxtuputun (Mat. 13:​45, 46). Ktamunulh 10 xla diciembre kata 1972.

Nipara akgtum kata titaxtulh, kinatlatni chu xaʼaktsujku kintala, na makgamakglhtinankgolh xaxlikana chu tamunukgolh. Julio kata 1973 precursor regular klitaxtulh. Kkincongregación xwi chatum lu stlan precursora tiku lu tliwakga xkgalhi xtakanajla, wa Ann-Catrin. Ktsukuw lalakgapasaw chu ktamakgaxtokgwi kkata 1975. Akgtati kata kmakgtayanaw kStrömsund, kʼakgtum lu stlan kachikin xalak Suecia niku lhuwa latamanin xkatsiputunkgo xlakata Biblia.

Ann-Catrin: Kintlat lakgapasli xaxlikana akxni xmasputuma universidad kʼEstocolmo. Maski kajku akgtutu papaʼ xakkgalhi, xla xkilin ktamakxtumit chu akxni xlichuwinan Dios. Kintse ni xlakgati pi kintlat chuna xtlawalh, wa xlakata limasiyaniputulh pi xtatayananin Jehová kaj xʼakgsaninankgo. Pero nila chuna tlawalh, wa xlakata chuna la titaxtulh kilhtamaku na makgamakglhtinalh xaxlikana chu tamunulh. Akit ktamunulh akxni xakkgalhi 13 kata, chu akxni xakkgalhi 16 kata precursora regular klitaxtulh. Chu akxni xakkanit kmakgtayanan kʼUmeå, precursora especial kilimaxtuka.

Akxni Mats chu akit xaktamakgaxtokgnitawa, kkamakgtayaw makgapitsi latamanin xlakata xlakgapaskgolh xaxlikana. Chatum tiku kmakgtayaw wa Maivor, chatum tsumat tiku makgxtakgli takgaman niku tlan xtlajalh lhuwa tumin chu lu xlakgapaska, xlakata tlakg kskujnanilh Jehová. Xla precusora litaxtulh chu wa tiku ankgalhin xʼan talichuwinan Dios xa’aktsujku kintala tsumat. Xchatiykan kilakgolh kʼGalaad kkata 1984, misioneras kalimaxtuka chu makgtayanamakgo kʼEcuador.

Misioneros litaxtunitantit klakalhuwa países. ¿Tuku kamakgtayanitan namakgantaxtiyatit tastakyaw «Kastaktit niku nakachankanatit»?

Mats: Xlikana pi makglhuwa kinkamatikutukan chu alakatanu niku kinkachankan. Pero lu kliskujnitaw xlakata ankgalhin «tliwakglh» naklichapaxnanaw Jesús. Kstalaniyaw xliʼakxilhtit chu kliskujaw xlakata naktaktujuyaw chuna la xla xtlawa (Col. 2:​6, 7). Klakapastaka pi akxni xakchanaw kʼakgtum kachikin, ni xakkgalhkgalhiyaw pi natalan xtlawakgolh tuku akinin xaklismaninitaw, wata xakliskujaw nakʼakgatekgsaw tuku xlakata xlakan wi tuku xtlawakgo. Xak’akgatekgsputunaw xtalismaninkan chu tuku xlakpuwankgo. Akxni tlakg xakstalaniyaw xliʼakxilhtit Jesús, xakmakgkatsiyaw pi xaklitaxtuyaw la kgantum «kiwi nema chankanit kxkilhtun kgalhtuchokgo», chu chuna tlan xakstakaw kaniwa niku xkinkamalakgachakanan (Sal. 1:​2, 3, La Biblia. Traducción del Nuevo Mundo, TNM).

Ann-Catrin: Xlakata kiwi nema chankan alakatanu chuntiya nastaka, talakaskin pi chichini chuntiya namaxkgakge chu namatsitsijwi. Jehová kinkalitaxtuninitan chuna la «chichini» (Sal. 84:​11, TNM). Tapaxkit nema natalan kinkalimasiyanikgonitan, litaxtunit la akgtum xtasikulunalin Jehová. Klakapastaka pi natalan xalak congregación Teherán anta k’Irán, niku xakkwilaw, xlikatsikgo chuna la tiku kalichuwinankan kBiblia xlakata lu tlan xkamakgamakglhtinankgo amakgapitsin. Lu xaklakgatiyaw chu anta xaktamakgxtakgputunaw, pero julio kkata 1980 mapakgsina malakgachokgolh kintaskujutkan, chu kinkawanin pi kaj 48 horas xakkgalhiyaw xlakata xaktaxtuw kpaís. Kinkamalakgachakan kʼakgtum país xalak África, kZaire, nema la uku limapakuwikan República Democrática del Congo.

Akxni kkatsilh pi xʼamaka kinkamalakgachakanan kʼÁfrica, ktsukulh tasa. Lu xakpekuan xlakata xkilitachuwinankanit pi anta xʼanan lhuwa luwa chu tajatat. Pero chatiy kiʼamigoskan tiku akglhuwa kata xkimakgtayanankgonita anta, kinkawanikgon: «¡Pero nikxni kilanitantit kʼÁfrica! Kapitit lakgapasnanatit chu lu nalakgatiyatit». Chu xlikana tuku kinkawanikgon. Natalan xalak África lu tlan likatsikgo. Klakapastaka pi akxni xtitaxtunita akgchaxan kata lata xakwilaw kZaire chu kinkawanikan pi xaktaxtuw xlakata malakgachokgoka kintaskujutkan, klakalitsilh akxni kakxilhli pi xakskinima Jehová pi xkinkamaxkin talakaskin xaktamakgxtakgwi kʼÁfrica.

¿Tlan xkilalitachuwinaw tuku tlan titaxtunitantit chuna la skujninitantit Jehová?

Mats: Pulaktum tuku klakapastaka wa pi lhuwa misioneros kkalakgapasnitaw xalak alakatanu kachikinin nema kiʼamigoskan litaxtukgo. Nachuna, kmakgapitsi kachikinin lhuwa tiku kkalimakgalhtawakgenitaw Biblia. Milh kilhtamaku asta 20 tiku xakkamakgalhtawakgemaw kinchatunukan. Na xatapaxuwan klakapastaka pi natalan xalak África lu tlan xkinkamakgamakglhtinankgoyan. Akxni xaklamaw kTanzania chu xakkalakgapaxialhnanaw congregaciones, xakyawayaw kimputlawkan nema kinchikkan xlitaxtu kxpaxtun xchikkan natalan, chu xlakan ankgalhin lhuwa tuku xkinkamaskiwikgoyan nixawa la xmatlanikgo (2 Cor. 8:3). Pulaktum tuku xaklakgatiyaw wa pi chali chali akxni nina xakkanaw lhtatayaw, Ann-Catrin chu akit, xaktawilayaw chu xaklikgalhchuwinanaw la xkinkakitaxtuninitan uma kilhtamaku chu xakpaxtikatsiniyaw Jehová xlakata xkinkamakgtayanitan.

Ann-Catrin: Akit lu klakgati pi kkalakgapasnit natalan xlikalanka katiyatni. Kkatsininitaw tipalhuwa tachuwin chuna la francés, luganda, persa chu suajili, chu na kkalakgapasnitaw latamanin tiku tanu tanu xtalismaninkan. Kkamakgtayanitaw natalan xlakata nakatsinikgo la natlawakgo taskujut nema kalakgayawakan kxkachikin Jehová, kkalakgapasnitaw lhuwa amigos chu akxtum xatapaxuwan kskujnaninitaw Jehová (Sof. 3:9).

Na kkakxilhnitaw tipalhuwa xtamalakatsukin Jehová chu putum tuku stlan tlawanit. Akxni xkinkamalakgachakanan kʼakgtum xasasti kachikin, xakmakgkatsiyaw xtachuna la xakkamaw paxialhnanaw chu wa Jehová tiku xkinkapulaliman. Xla kinkamaxkinitan talakaskin nakkanaw chu naklakgapasnanaw niku nikxnila xakkaw komo ni xakskujnaniw.

¿Tuku tuwa titaxtunitantit, chu tuku kamakgtayanitan natayaniyatit?

Mats: Putuminika umakgolh kata, tipalhuwa tajatat kinkachipanitan, chuna la malaria (o paludismo). Chu Ann-Catrin talakaskinit pi makglhuwa kaj lakapala nachukukan. Atanu tuku na xaklilakgaputsayaw wa akxni kinatlatnikan tsukukgolh kgolonkgo. Lu kkapaxtikatsiniyaw kinatalankan xlakata kinkamakgtayakgon nakakuentajtlawakgo kinatlatnikan (1 Tim. 5:4). Maski chuna, xmin kilhtamaku nitlan xaklimakgkatsiyaw xlakata makgat xakwilaw chu nila lhuwa tuku xaktlawayaw xlakata xakkamakgtayaw kinatlatnikan.

Ann-Catrin: Kkata 1983, akxni xaklamaw kZaire, kinchipalh cólera. Makuchina wanilh Mats: «¡Lakapala katamakxtu xlakata xlatamat kalipekua wi!». Lichali kkaw kSuecia. Xlakata ni xʼanan akgtum avión nema xkalin latamanin, ktawakaw kʼakgtum avión nema kaj takuka xlin.

Mats: Maski makuchina xkinkawaninitan pi Ann-Catrin nialh xʼama paksa, lu tlan pi nichuna lalh, xla paksli. Maski chuna, lu ktasaw xlakata klakpuwaw pi nialh misioneros xakkamaw litaxtuyaw. Pero akgtum kata alistalh, tlan ktaspitwi kZaire chu ktsukuw makgtayananaw kʼakgtum aktsu congregación nema xchuwinankan suajili kLubumbashi.

Ann-Catrin: Akxni xaklamaw kLubumbashi, kkatsilh pi xakkama kgalhi skgata, pero ni xlimakgas kmakganalh. Maski ni xaklakkaxwilinitaw pi nakkgalhiyaw skgata, lu klilipuwa akxni kmakganalh. Pero ama kilhtamaku akxni lu xaklipuwamaw chu xaklakgaputsamaw, Jehová kinkamaxkin akgtum tamaskiwin. Tlakg lhuwa latamanin tsukukgolh likgalhtawakgakgo Biblia. Nipara kaj akgtum kata titaxtulh, kcongregación nialh kajwatiya 35 publicadores xʼanan wata 70, chu nialh kajwatiya 40 tiku xaktamakxtumiyaw wata 220. Lu xakliskujmaw xlakata nakkalitachuwinanaw Dios latamanin, chu akxni kakxilhwi pi Jehová ksikulunatlawama kintaskujutkan, lu tlan kinkamamakgkatsinin. Maski chuna, chuntiya klakapastakaw chu ni xmakgasni klichuwinanaw kiskgatakan. Lu kakxilhputunaw tuku natlawa Jehová xlakata nalakkaxtlawa uma kkilhtamaku nema aku mima.

Mats: Titaxtulh kilhtamaku, Ann-Catrin tsukulh makgkatsi pi lu xtlakgwan. Watiya uma kilhtamaku akit kiwanika pi xakkgalhi cáncer de colon chu lu xaksnunanita. Wa xlakata talakaskilh pi xkintlawanika akgtum lu tuwa operación. Pero la uku tlan kwi, chu Ann-Catrin chuntiya tlawama tuku matlani xlakata chuntiya naskujnani Jehová.

Liwana kkatsiyaw pi ni kajwatiya akinin ktitaxtuyaw tuku tuwa. Akxni xtitaxtunita kilhtamaku lata kamakgnika lhuwa latamanin kRuanda kkata 1994, kkalakgapaxialhnaw makgapitsi natalan tiku xlamakgo kcampo de refugiados. Akxni kkakxilhwi pi xlakan tliwakga xkgalhikgo xtakanajlakan, xtayanimakgo chu chuntiya xatapaxuwan xkamakgamakglhtinankgo amakgapitsin, kʼakgatekgswi pi Jehová kgalhi litliwakga xlakata nakamakgtaya kskujnin kaxatukawa tuku natitaxtukgo (Sal. 55:22).

Ann-Catrin: Ktitaxtuw atanu tuku lu tuwa kkata 2007. Kinkaʼinvitarlikan pi xakkaw kʼUganda xlakata xʼamaka malakikan xasasti sucursal. Akxni sputli programa, akinin chu amakgapitsi misioneros chu betelitas xakkamaw kNairobi (Kenia), kimputumkan 25 xakwanitaw. Akxni atsinu xtsankga nakchanaw niku kitapakgta Uganda chu tsuku Kenia, akgtum lanka putlaw milh kkilakatinkan chu kinkachokarlin. Tiku xmatlawanima putlaw chu kgalhkitsis natalan kaj lakapala nikgolh, chu achatum tala puskat nilh akxni xwilacha kʼhospital. ¡Lu kkgalhkgalhimaw kachalh kilhtamaku akxni nakkaʼakxilhparayaw kiʼamigoskan! (Job 14:​13-15).

Chuna la titaxtulh kilhtamaku, paksli niku xaktakgawinit o xaktasipaninit. Pero makgapitsi tiku xakkanaw kʼuma putlaw, chuna la Mats chu akit, kinkachipan tajatat xla talipuwan chu talakgaputsit. Katsisni akit kaj xalan xaklakgawan o xakstakwanan chu lu xakpekuanit, xakmakgkatsi pi xʼama tachokgo kinaku. Pulaktum tuku kinkamakgtayanitan naktayaniyaw wa pi lu ktlawaniyaw oración Jehová chu klikgalhtawakgayaw makgapitsi textos nema lu klakgatiyaw chu klilakpuwanaw. Na lu kinkamakgtayakgonitan makuchinanin. La uku nialh lu klakgaputsayaw chuna la xapulana, chu kskiniyaw Jehová pi na kakamakgtayalh tiku makgkatsikgo chuna la akinin.

Wixin wanatit pi Jehová kamakgtayanitan natayaniyatit tuku tuwa chu wanatit pi kalinitan xtachuna la linkan kgalhwat. ¿Tlan xkilawaniw tuku wamputun uma?

Mats: Wi akgtum refrán ktachuwin suajili nema wan «Tumebebwa kama mayai mabichi», uma wamputun, «Kinkalinkan chuna la kgalhwat». Xtachuna la chatum lataman lu kuenta tlawa akxni lin kgalhwat xlakata ni natapakglha, Jehová lu kuenta kinkatlawanitan xliputum kachikinin niku kinkamalakgachakanitan. Ankgalhin kkgalhinitaw tuku kmaklakaskinaw, chu minit kilhtamaku asta tlakg lhuwa kkgalhinitaw nixawa tuku kmaklakaskinaw. Pulaktum la Jehová kinkalimasiyaniyan xtapaxkit wa la kinkalikatsinikgoyan Lakgkgolotsin tiku Pulalinankgo. Xlakan lu kinkaʼakgatekgsnikgoyan.

Ann-Catrin: Tuku wa Mats xlakata la Jehová kinkakuentajtlawayan kimalakapastaka tuku kinkaʼakgspulan makgtum. Akgtum kilhtamaku kintachuwinanka chu kiwanika pi kintlat xwi k’hospital chu lu snun xwanit. Mats nina makgas xlitatatlanit malaria chu ni xakkgalhiyaw tumin xlakata xakkaw kSuecia. Wa xlakata klakpuwaw pi xakkamaw stayaw kimputlawkan. Pero akxni nina xakstayaw, kinkatachuwinankgon chatiy natalan. Tiku pulana kinkatachuwinan wa akgtum tamakgaxtokgat tiku katsikgolh tuku xkinkaʼakgspulaman chu kinkawanikgon pi xʼamakgo xokgokgo maktum boleto xla avión. Achatum tiku kinkatachuwinan wa chatum tala tiku xlina kata chu xmastokgnit xtumin kʼakgtum aktsu caja. Xwilininit akgtum tatsokgni nema xwan: «Uma wa xla tiku maklakaskin tamakgtay». Kaj lakapala Jehová milh kinkamakgtayayan (Heb. 13:6).

¿Tuku katsininitantit umakgolh 50 kata nema skujninitantit Jehová?

Ann-Catrin: Kkatsininit pi nakgalhiyaw litliwakga komo ni lu nalakgaputsayaw chu nalipawanaw Jehová chuna la wan Isaías 30:15. Akxni lipawanaw Jehová, xla kinkamakgtayayan natayaniyaw (2 Crón. 20:​15, 17). Xlakata lu kliskujnitaw liwana nakmakgantaxtiyaw taskujut nema kinkalakgayawakanitan, Jehová tlakg lhuwa tasikulunalin kinkamaxkinitan nixawa tuku xakkgalhiw komo ni xakskujnaniw.

Mats: Tuku tlakg xlakaskinka kkatsininit wa pi talakaskin naklipawan Jehová kaxatukawa tuku naktitaxtu, chu chuna tlan nakakxilha tuku xla tlawama xlakata nakimakgtaya (Sal. 37:5). Chuna la xla malaknunit, ankgalhin kinkamakgtayanitan. La uku kwilaw kBetel xalak Myanmar, chu chuntiya kakxilhmaw pi Jehová kinkamakgtayaman.

Klakaskinaw pi putum lakgkgawasan chu laktsuman tiku tlakg skujnaniputunkgo Jehová, kaʼakxilhkgolh pi Jehová nikxni makgxtakgnan chu pi ankgalhin kinkapaxkiyan. Liwana kkatsiyaw pi tlan naskujnikgo Jehová komo namastakgo talakaskin pi xla nakamakgtaya nastakkgo niku nakachankan.