Josafat lipawan Jehová

¿KATSIYA wix tiku uma lakchixkuwin chu tuku tlawamakgolh? Amakgolh kguerra, chu lakchixkuwin tiku pulatilhakgoy kilhtlitilhakgoy. Max lakpuwana: ¿Tuku xlakata ni linkgoy xespadajkan chu xlanzajkan wantiku kilhtlitilhakgoy? Kaʼakxilhwi tuku xlakata.

Josafat (Jehosafat) xmapakgsina tamputiy laklanka familia xla Israel. Josafat na xlama akxni xlamakgolh Acab chu Jezabel wantiku xkamapakgsiy pulakkaw laklanka familia nema xwilakgolh pakxtu. Pero Josafat lu xatlan mapakgsina chu xtlat Asa (Asá) na lu xatlan xlikatsiy. Wa xlakata akglhuwa kata kristianos tiku xalak tamputiy laklanka familia nema xwilakgolh pakgalhu, lu tlan xwilakgolh.

Pero uku wintuku kamakgapekuankgoy kristianos. Makgapitsi makatsininanin wanikgoy Josafat: Mimakgolh lu lhuwa soldados xalak Moab, Ammón chu Seír, natatlawakgoyan guerra. Lhuwa li Israel tamakxtumikgoy kJerusalén xlakata naputsakgoy xtamakgtay Jehová. Ankgoy ktemplo, chu anta Josafat tlaway akgtum oración chu wan: Jehová, Jehová kiDioskan, nikkatsiyaw tuku naktlawayaw. Nilay ktikatlajaw uma soldados lu xlhuwakan. Kakilamakgtayaw.

Jehová kgaxmata chu tlawalh pi chatum kskujni kakawanilh kachikin: Uma guerra ni milakan wa xla Dios. Ni wixin katitlawatit guerra. Kaj naʼakxilhatit la Jehová nakalakgmaxtuyan.

Wa xlakata lichali Josafat waniy kachikin: ¡Kalipawantit Jehová! Wa xlakata wililh tiku nakilhtlikgoy kxlakatin soldados chu akxni xʼamakgolh kguerra kilhtlinitilhakgoy Jehová. ¿Katsiya tuku lalh akxni talakatsuwikgolh xlakata natlawakgoy guerra? Jehová tlawalh pi wantiku xtalamakgasitsinkan xakstukan nalamakgnikgoy. ¡Chu akxni li Israel chankgolh anta niku xwilakgolh soldados tiku xtalamakgasitsinkan putum xnikgonitta!

Lu xaskgalala wa Josafat xlakata lipawa Jehová, ¿nixlikana? Komo nachuna natlawayaw, lu xalakgskgalalan nawanaw.